Switch Mode

Chapter – 272

စားရကံကြုံလို မုတ်ဆိတ်ပျားစွဲ

Chapter – 272
“စားရကံ ကြုံလို့ မုတ်​ဆိတ်​ပျားစွဲ”

နန်ရှန်ဆင်းသည် ခံနိုင်ရည်စွမ်း မရှိတော့ချေ။ မြေပြင်ပေါ်သို့ ကြိုးပြတ်သွားသည့် စွန်ပမာ အရုပ်ကြိုးပြတ်ပင်​လဲကျသွားလေသည်​။
ထို့ပြင်​သူ၏ ခန္ဓာကိုယ်​တစ်​ခုလုံး တောင့်တင်းလာပြီး လှုပ်ရှားရန် ကြိုးစားသည့်တိုင် မရ​တော့​ပေ။
“ဘုန်း . . .”
ရဲရှောင်သည်လည်း​မြေပြင်ေ​ပ်ါသို့ လဲကျသွား​လေသည်​။ သူ၏ အရိုးများနှင့် ကြွက်သားများအားလုံး အပြင်းအထန် ဒဏ်ရာ ရရှိ​နေပြီ ဖြစ်​သည်​။ ထို့ကြောင့် လဲကျနေရာမှ ထနိုင်ရန် အချိန်ယူရပေလိမ့်မည်။
နန်ရှန်ဆင်းသည် ရဲရှောင်၏​အရှေ့ လက်တစ်ကမ်းအကွာတွင် လူသေတစ်ကောင်​ကဲ့သို့ မလှုပ်မယှက် ဖြင့် လဲကျ​နေခြင်း ဖြစ်သည်။
နန်ရှန်ဆင်း၏ ကိုယ်တွင်းရှိ အေးစက်သော ချီဓာတ်များသည် ပေါက်ကွဲထွက်နေ​လေပြီ။
ရဲ​ရှောင်​ပစ်​လွှတ်​လိုက်​သည့်​နတ်မိစ္ဆာအသွား လက်နက်များ၏ အစွမ်းကြောင့်ပင် ဖြစ်သည်။
နန်ရှန်ဆင်း၏ ခန္ဓာကိုယ်ရှိ ဒဏ်ရာများ သွေးထွက်နေရာမှ ရပ်တန့်သွားသည်။ ထို့​နောက် ထိုဒဏ်​ရာများသည်​ခ​ရမ်းေ​ရာင်အဖြစ်​အ​ရောင်​ပြောင်းသွားကာ သွေးကြောများသည်လည်း​တဖြည်းဖြည်း အေးခဲသွားသည်​။ အချိန်​ခဏ​လေး အတွင်းမှာပင်​နန်​ရှန်​ဆင်း၏ သွေးကြော ၆၀ ရာခိုင်နှုန်းခန့် ပျက်ဆီးသွား​ခဲ့ပြီ ဖြစ်​သည်​။
နန်​ရှန်​ဆင်းသည်​ရဲရှောင်အား ပြူးကျယ်သော မျက်လုံးများဖြင့် ငေးစိုက်​ကြည့်​လျက်​ရှိသည်​။ သူ၏ မျက်လုံးများထဲတွင် အံ့သြခြင်း၊ ထိတ်လန့်ခြင်း နှင့်​မယုံနိုင်​ဖွယ်​ဖြစ်​နေခြင်းတို့ကို မြင်​တွေ့နိုင်ပေသည်။
သူ့ထက် အဆပေါင်းများစွာ အင်အားနည်းသည့် လူတစ်ဦးမှ သူ့အား ယခုကဲ့သို့ အရုပ်ကြိုးပြတ် ဖြစ်သွားအောင်ပင်​လုပ်လိုက်​နိုင်သည်ကို မယုံကြည်ဖွယ်​ဖြစ်နေမိသည်။
လွန်ခဲ့သော မိနစ်အနည်းငယ်ခန့်က နန်​ရှန်​ဆင်းသည်​အသာစီးရ​နေခဲ့သည်​။ အရာအားလုံးသည် သူ၏ ထိန်းချုပ်မှု အောက်တွင်သာ ရှိနေခဲ့သည်​။ သို့​သော်​ယခုအခါတွင်​မူ အဖြစ်​အပျက်​များသည်​ပြောင်းပြန်​လှန်​ပစ်​လိုက်​သလိုပင်​။
နန်​ရှန်​ဆင်းသည်​ရဲရှောင်အား အားယူ၍ ကြည့်​လိုက်​ကာ –
“ဒါ . . . ဒါ ဘာတိုက်ကွက်လဲ . . .”
ရဲရှောင် အသက်ပြင်းပြင်း​တစ်ချက် ရှူသွင်းလိုက်ရင်း နန်​ရှန်​ဆင်း၏ အနားတွင်​ထိုင်ချလိုက်သည်။ ထို့နောက် အထင်သေးသည့်​အကြည့်​များဖြင့်​ကြည့်​လိုက်​ကာ ခနဲ့​သော အပြုံးမျိုးဖြင့်​ပြုံးလိုက်​ရင်း နန်ရှန်ဆင်း၏ ရင်ဘတ်တွင် စိုက်ဝင်နေသော အပ်တစ်ချောင်းအား​အေး​အေးလူလူဖြင့်​ပင်​ဆွဲနှုတ်လိုက်သည်​။
အလွန်သေးငယ် ချွန်ထက်လှသည့် အပ်တစ်စင်းပင် ဖြစ်သည်။
ထိုအပ်အား သူ၏ ဆံပင်များထဲတွင် ပြန်ထည့်၍ သိမ်းလိုက်သည်။
ထို့နောက် တစ်ချောင်းပြီးတစ်ချောင်း ဆွဲနှုတ်ရင်း ပြန်သိမ်းနေလေသည်​။
ခုနစ်စင်းမြောက် အပ်အား ဆွဲထုတ်လိုက်ပြီးသည့် အ​ချိန်တွင် ရဲရှောင်သည် သူ၏ အင်္ကျီလက် အစအား မလိုက်သည်​။ ထို့နောက် လက်ကောက်ဝတ်ရှိ အရေပြား အတုထဲသို့ အပ်အား ထည့်သိမ်းလိုက်​ပြီး အရေပြား အတုအား သေချာစွာ ပြန်၍ တပ်ဆင်လိုက်သည်။ ရဲ​ရှောင်​ပြုလုပ်​နေသည့်​အရာများအား နန်​ရှန်​ဆင်းသည်​အစမှ အဆုံးတိုင်​အောင်​ကောင်းစွာ မြင်တွေ့လိုက်ရသည်​။
ရဲရှောင်သည် ထိုအခြင်းအရာများအား ပေါ်​ပေါ်ထင်ထင်​ပင် ပြုလုပ်နေခြင်း ဖြစ်သည်​။
အားလုံး ပြီးစီးသွား​သောအခါ နန်ရှန်ဆင်းအား ကြည့်လိုက်​ရင်း –
“မင်းအခု နားလည်ပြီလား . . .”
နန်ရှန်ဆင်း အံ့သြသွားသည်။ မယုံကြည်နိုင်သေးသော်လည်း ခေါင်းညိတ်လိုက်ရင်း –
“ငါမြင်တယ် . . .”
ထို့နောက် ဘေးသို့ ခေါင်းငိုက်ခနဲ ကျသွားကာ သေဆုံးသွားလေတော့သည်။
ကမ္ဘာတစ်ခုလုံးအား ရာစုနှစ်တစ်ခုမျှ ကြာအောင် စိုးမိုးခြယ်လှယ်ခဲ့သည့် ပညာရှင်တစ်ဦးသည် ရဲရှောင်၏ လက်ချက်​ကြောင့်​ကျဆုံးခဲ့ရချေပြီ။
ထိုအချိန်တွင်​နန်ရှန်ဆင်း၏ မျက်နှာသည် ခရမ်းပုတ်ရောင်ပင်​သမ်းနေလေသည်​။
မသေခင် အချိန်တွင် သူသေဆုံးခဲ့ရသည့် အကြောင်းရင်းအား နားလည်သွားသည်​။ စိတ်ရှင်းရှင်းဖြင့် သေသွားရသည်​ဟုပင်​ဆိုရ​ပေမည်​။
ထို့ပြင်​ဖန်ဧကရာဇ်မှ တိုက်ပွဲအစတွင် ကမှူးကရှူးထိုး တိုက်ခိုက်ကာ အားအင် ကုန်ခမ်း​ချင်ယောင် ဆောင်ခဲ့သည် ဆိုသည်ကိုလည်း သဘောပေါက်သွားခဲ့သည်။ အမှန်​တကယ်​တွင်​ရဲရှောင်သည် ဆင်​ကြံ ကြံ​နေခြင်းပင်​ဖြစ်​သည်​။​ရှေ့တစ်​လှမ်းတိုးရန်​အတွက်​နောက်​နှစ်​လမ်း ဆုတ်​ခွာသည့်​သ​ဘောပင်​။ မိမိကိုယ်​ကို အထင်​ကြီး ဘဝင်​မြင့်​နေ​သော နန်ရှန်ဆင်း၏ အမြင်တွင် သူ့အား ပေါ့ပေါ့ပါးပါး အနိုင်ယူနိုင်မည်ဟု ထင်မြင်အောင်လည်း လှည့်စားခဲ့သည်​။ နောက်ဆုံးအချိန်ကျမှသာ သူ၏ ပွဲသိမ်းတိုက်ကွက်အား ထုတ်သုံးလိုက်ခြင်း ဖြစ်သည်။
ထိုတိုက်ကွက် ပြီးသည်နှင့် နန်ရှန်ဆင်းလည်း သေဆုံးသွားရသည်​။
နန်​ရှန်​ဆင်းသည်​ရဲရှောင်မှ အပ်များ ပြန်လည် သိမ်းဆည်း​နေသည့်​မြင်​ကွင်းအား အစမှအဆုံးအထိ​သေ​သေချာချာ မြင်တွေ့လိုက်ရသဖြင့် ရဲရှောင်၏ ထူးဆန်းသော တိုက်ကွက်အကြောင်း ကောင်းစွာ သိရှိသွားသည်​။
နန်ရှန်ဆင်းသည်​ရဲ​ရှောင်​အား အနိုင်ရ​တော့မည်ဟု အပိုင်တွက်ထားသည့် အချိန်တွင် ရဲ​ရှောင်​ဘက်​မှ ပွဲသိမ်း တိုက်ကွက် ထုတ်လိုက်ခြင်း ဖြစ်သည်​။
ထိုတိုက်​ကွက်​သည်​ရဲ​ရှောင်​၏​နောက်ဆုံးတိုက်ကွက်ဟုလည်း ဆိုနိုင်ပေသည်။
နန်ရှန်ဆင်း၏ တရစပ် တိုက်ခိုက်မှု ခံနေရသည့် အချိန်မှာပင် ရဲရှောင်သည် ထိုတိုက်ကွက်အား ပြုလုပ်နိုင်ခဲ့သည်​။
တိုက်ကွက်တစ်ကွက်တည်းဖြင့် တိုက်ပွဲအား အဆုံးသတ်ကာ အလှည့်အပြောင်း ဖြစ်စေလိုက်ခြင်းပင်​ဖြစ်သည်​။
အကယ်၍ ရဲရှောင်ဘက်​မှ ထိုတိုက်ကွက်အား တိုက်​ပွဲအစမှာပင်​ထုတ်သုံးခဲ့လျှင် အကျိုးရှိနိုင်မည် မဟုတ်ချေ။ အ​ကြောင်းမှာ နန်​ရှန်​ဆင်းအ​နေဖြင့်​တိုက်​ပွဲအစတွင် အားပြည့်အင်ပြည့်ပင်​ဖြစ်နေသဖြင့်​သေချာ​ပေါက်​ပင်​ခုခံနိုင်​ပေလိမ့်​မည်​။ ထို့​ကြောင့်​နန်ရှန်ဆင်း အားနည်းသွားသည့် အချိန်မှသာ ထုတ်​သုံးလိုက်​သောအခါ ပို၍ ထိရောက်မှု ရှိသွားခြင်း ဖြစ်သည်​။
နန်ရှန်ဆင်းအဖို့ ရဲရှောင်၏ လက်တွင် အသေခံခဲ့ရခြင်းမှာ မထိုက်​တန်ဟု တွေး​ကောင်း​တွေးမိ​နေ​ပေလိမ့်​မည်​။ သို့သော် ရဲရှောင်သည် အကြံကြီးကြီး ကြံထားသူပင်​မဟုတ်ပါ​လော။
“မင်းက နုပါသေးတယ်ကွာ . . .”
ရဲရှောင် ခနဲ့တဲ့တဲ့ဖြင့်​ရေရွတ်လိုက်ရင်း နန်ရှန်ဆင်း၏ ကိုယ်တွင် စိုက်ဝင်နေသည့် ဓားမြောင်များကိုပါ ဆွဲနှုတ်၍ ဆံပင်များကြား ညှပ်လိုက်ပြန်သည်​။
ပတ်ဝန်းကျင်အား တစ်ချက် အကဲခတ်ကြည့်လိုက်သောအခါ မည်သူမျှ ရှိမနေသည်ကို ရဲ​ရှောင်​တွေ့လိုက်ရသည်​။ ထို့​နောက်​နန်​ရှန်​ဆင်းအား ထိမှန်​ခြင်း မရှိသွား​သော အပ်များ လိုက်လံကောက်လိုက်​သည်​။
​နောက်​ဆုံးတွင်​မူ ရဲ​ရှောင်​သည်​အပ်​များအား တစ်ချောင်းပြီးတစ်ချောင်း သူ့နေရာနှင့်​သူ ပြန်သိမ်းထားနိုင်လိုက်ပြီ ဖြစ်သည်​။
တိုက်ပွဲပြီးဆုံးသွားသည့် အချိန်မှသာ ရဲရှောင်လည်း စိတ်သက်သာရာ ရသွားသည့်​ဟန်​ဖြင့်​သက်ပြင်းချမိလိုက်သည်​။ သူ၏ စိတ်​ထဲတွင်​ရုတ်တရက် ပေါ့ပါး လန်းဆန်းသွားသကဲ့သို့လည်း​ခံစားလိုက်ရသည်။ ထိုအချိန်တွင် သူ၏ ခန္ဓာကိုယ်တစ်ခုလုံး ပေါက်ကွဲထွက်မတတ် နာကျင်သွားသည့်​နာကျင်​မှုအား ခံစားလိုက်ရသည်​။ အရိုးများအားလုံးသည်​လည်း ကျိုးကြေလုနီးပါးပင်​ဖြစ်နေသည့်​အတွက်​လှုပ်ပင် မလှုပ်နိုင်တော့ချေ။
တိုက်ပွဲပြီးသွားပြီး​နောက်​စိတ်ဒုံးဒုံးချလိုက်သောအခါ ရဲ​ရှောင်​၏ ခန္ဓာကိုယ်တွင်းရှိ ဒဏ်ရာများမှ ဒုက္ခပေးလာခြင်းပင် ဖြစ်သည်။ အစပိုင်းတွင်​သွေးပူနေ၍သာ သတိမထားမိခဲ့ခြင်း ဖြစ်သည်​။ လမ်း​လျှောက်​ရန်​အင်အားပင် လုံးဝမရှိတော့သည့်​အလား ခံစား​နေရသည်​။
ထို့ပြင်​ရဲရှောင်သည်​အလွန်အမင်း​အိပ်ချင်လာသလိုလည်း ခံစားလိုက်ရသည်​။​လျှောက်​နေရင်း ဖြင့်​လဲကျတော့မတတ်ပင် ဖြစ်နေခဲ့သည်​။ တိုက်ပွဲအတွင်း ဒုတိယအဆင့်သို့ တက်လှမ်းနိုင်ခဲ့သည့်တိုင် သူ၏ သွေးကြောများသည်​ပြင်းပြင်းထန်ထန် ဒဏ်ရာရရှိထားသည့်အတွက်​မသက်မသာပင်​ခံစားနေရခြင်း ဖြစ်သည်။
ထိုအချိန်က အဆင့်တက်နိုင်၍သာ ကံကောင်းသွားသည်ဟု ဆိုရ​ပေမည်​။ ထိုကဲ့သို့ အဆင့်တက်သွားသဖြင့် သူ၏ စွမ်းအင်များ တဟုန်ထိုး တိုးလာခဲ့သည်။ ထို့​ကြောင့်​နောက်ဆုံးတိုက်ကွက်အား အပြည့်အဝ ပြုလုပ်နိုင်လိုက်ခြင်းပင်​ဖြစ်သည်​။
ထိုကဲ့သို့ မဟုတ်ပါက ဒဏ်ရာအပြည့် ရရှိထား​သော ရဲရှောင်သည် နောက်ဆုံးပွဲသိမ်း တိုက်ကွက်အား ကောင်းစွာ ပြုလုပ်နိုင်လိမ့်မည် မဟုတ်ချေ။ အလွန် အန္တရာယ်များသော အခြေအနေတစ်​ခုပင်​ဖြစ်​သည်​။
“တော်သေးတာပေါ့ . . .”
ရဲရှောင် ခပ်တိုးတိုး ရေရွတ်လိုက်မိသည်။ တိုက်​ပွဲပြီးဆုံးသွား​သော်​လည်း ရဲရှောင်သည်​သတိလက်လွတ် မနေရဲချေ။ နိုးနိုးကြားကြား ဖြစ်စေရန်အတွက် သူ၏ ဟင်းလင်းပြင်အတွင်းရှိ ဝိညာဉ်တော်ချီဓာတ်များအား လည်ပတ်စီးဆင်း နေစေလိုက်သည်။
လေလံပွဲတွင် သူရှိ​နေမှသာ ဖြစ်ပေလိမ့်မည်။ နောက်ကျသွားမည် ဆိုပါက မလိုလားအပ်သော ပြသာနာများ ဖြစ်ပေါ်သွားနိုင်ပေသည်။ ထို့ကြောင့် အနားယူချင်​နေသည့်​တိုင်​ယခုအချိန်တွင်​အိပ်စက် အနားယူရန်​မဖြစ်နိုင်သေးချေ။
အိပ်စက်အနားယူခြင်းဖြင့်​သူ၏ ဒဏ်ရာများ ပိုမို လျင်မြန်စွာ သက်သာပျောက်ကင်း လာနိုင်သည်ကို သိ​သော်​လည်း မအိပ်ရဲသေး​ချေ။
ဥသည် ကမ္ဘာပေါ်ရှိ ဝိညာဉ်တော် ချီဓာတ်များအား စုပ်ယူ၍ ရဲရှောင်အား အထောက်အပံ့ ပေးခဲ့သည်​။ ထိုချီဓာတ်​များသည်​နန်​ရှန်​ဆင်းအား ပြန်လည် တိုက်ခိုက်နိုင်ရန်အတွက် များစွာ အထောက်အကူပြုခဲ့သည်။
ထိုအချိန်မှာပင် ပုံရိပ်တစ်ခုသည်​ရဲရှောင်၏ အရှေ့သို့ ရုတ်တရက်​ရောက်ရှိလာ​လေသည်။
“နာမည်ကျော် ဖန်ဧကရာဇ်က တကယ့်ကို ဆရာကြီးပါလား။ ကြယ်ရောင်ဂိုဏ်းက အဆင့်မြင့် ပညာရှင်တစ်ယောက်ကိုတောင် သတ်နိုင်လိုက်တယ်ပေါ့။ သိပ်ကောင်းတယ်၊ ဒီတိုက်ပွဲက ငါ့အတွက်တော့ တော်တော် အကျိုးရှိသွားတယ်။ ဟဲဟဲ . . . စားရကံကြုံလို့ မုတ်ဆိတ်ပျားစွဲတာပဲဟေ့ . . .”
ထိုလူသည် မခံချင်စဖွယ် ရယ်မော၍ ပြောဆိုလိုက်သည်။
ရဲရှောင် မျက်လုံးမှိတ်ထားလျက်ပင် သက်ပြင်းချလိုက်မိရင်း –
(ငါတို့ တိုက်ခိုက်ခဲ့တာ အပြင်ကိုပါ သက်ရောက်မှု ရှိသွားတယ်ထင်တယ်။ ဒါပေမယ့်​အခုတော့ ငါ လှုပ်တောင် မလှုပ်နိုင်တော့ဘူး၊ ဒီလူက ဘယ်သူပဲဖြစ်ဖြစ် ဒီလူလက်က လွတ်အောင် အကောင်းဆုံး ကြိုးစားရမှာပဲ။ ငါကလည်း တိုက်ပွဲကိုပဲ အာရုံစိုက်နေတော့ ဒီလူ ရောက်လာတာတောင် သတိမထားမိလိုက်ဘူးပဲ . . .)
ရဲရှောင် မျက်လုံးဖွင့်ကြည့်လိုက်သောအခါ လူတစ်​ယောက်​အား မြင်တွေ့လိုက်ရသည်​။ ထိုလူသည် စိမ်းပြာရောင် ဝတ်ရုံအား ဝတ်ဆင်ထားပြီး ဦးထုပ်တစ်လုံး ဆောင်းထားလေသည်​။ ထိုအဝတ်အစားများအရ နေရောင်ဂိုဏ်းမှ လူဖြစ်​သည်​ဆိုသည်​ကို ရဲရှောင် ရိပ်စားမိလိုက်ပါတော့သည်​။

Comment

Leave a Reply

Options

not work with dark mode
Reset