Chapter – 270
“တန်ပြန်တိုက်ခိုက်မှု”
နန်ရှန်ဆင်းသည် ရဲရှောင်၏ တိုက်ခိုက်မှုအား အကောင်းဆုံး ကာကွယ်နိုင်ရန် ကြိုးစားသည့်အနေဖြင့်နောက်သို့ ခြေတစ်လှမ်းဆုတ်၍ ရှောင်တိမ်းလိုက်သည်။
ရန်သူ့ဘက်မှနေ၍ ယခုကဲ့သို့ ပြင်းပြင်းထန်ထန်တုန့်ပြန်တိုက်ခိုက်လာခြင်းမျိုးအား သူ၏ ဘဝတွင်တစ်ခါမျှ မကြုံဖူးခဲ့ချေ။ ယခုတိုက်ပွဲတွင် အနိုင်ရရှိရန်ထက်အသက်မဆုံးရှုံးရန်သာ ပို၍ အရေးကြီးကြောင်း နန်ရှန်ဆင်း ဆင်ခြင်သုံးသပ်လိုက်မိသည်။
“ဘုန်း . . .”
ကောင်းကင်ထက်မှ တောင်ကြီးများ ကျဆင်းလာသည့်အလား ဓားသည်အရှိန်အဟုန်အပြည့်ဖြင့်နန်ရှန်ဆင်းပေါ်သို့ ကျရောက်လျက်ရှိသည်။
နန်ရှန်ဆင်းသည် ထိပ်တန်းအဆင့် ပညာရှင်တစ်ဦး ဖြစ်ပြီး မော်တယ်ကမ္ဘာ၏ အတော်ဆုံး ပညာရှင်များထဲမှ တစ်ယောက်ဖြစ်ကာ ကောင်းကင်အဆင့်ပင်ဖြစ်သော်လည်း ယခုအခါတွင်မူ ပြန်လည်၍ ထိုးစစ်ဆင်နိုင်ခြင်း မရှိတော့ပေ။ သူ့ထံသို့ ကျဆင်းလာသည့်ဓားချက်များကိုသာ အသည်းအသည်ရှောင်တိမ်းနေရသည်။
ထိုတိုက်ကွက်သည် ချင်းယန်နယ်ပယ် တစ်ခုလုံးကိုပင် ဖိန့်ဖိန့်တုန်စေသည့် တိုက်ကွက် ဖြစ်လေသည်။
နန်ရှန်ဆင်းသည်နံရံကို ကပ်မိသည်အထိ နောက်ဆုတ်ပြီးသောအခါ ဓားမှ အလင်းတန်းများ ပျောက်ကွယ်သွားသည်ကို တွေ့လိုက်ရသည်။သူ၏ ခန္ဓာကိုယ်တွင်လည်း ဒဏ်ရာဒဏ်ချက်ပေါင်းများစွာ ရရှိနေပြီ ဖြစ်သည်။ နက်ရှိုင်းစွာ ခုတ်ပိုင်းခံထားရခြင်း မဟုတ်သည့်တိုင် သွေးစက်များမှာမူ တစက်စက် ကျဆင်းလျက်ရှိသည်။
ရဲရှောင်၏ ဓားချက်ကြောင့် နန်ရှန်ဆင်း၏ ခန္ဓာကိုယ်တွင်အနည်းဆုံး ဒဏ်ရာပေါင်း ၇၀ ကျော်မျှ ရရှိသွားခဲ့ပြီ ဖြစ်သည်။
ရဲရှောင်လည်း နောက်ဆုံး ဓားချက်အား အံကြိတ်၍ ပြုလုပ်လိုက်သည်။
ဓားချက်များအား ပြင်းထန်စွာ ခုတ်ပိုင်းချလိုက်သည့်အတွက်လက်ရှိအချိန်တွင်ရဲရှောင်သည်အားအင်ကုန်ခန်းနေပြီ ဖြစ်သည်။ သူ၏ ဝိညာဉ်တော်ချီဓာတ်များသည်ကုန်ဆင်းနေပြီဖြစ်သော်လည်း နန်ရှန်ဆင်းမှာမူ အတတ်နိုင်ဆုံး ခုခံလျက် ရှိနေတုန်းပင် ဖြစ်သည်။ နန်ရှန်ဆင်းဘက်မှ တန်ပြန်တိုက်ခိုက်လိုက်သည့်လက်ဝါးရိုက်ချက်မှာလည်း အလွန်အားပါ ပြင်းထန်လှသည့်အတွက်အရိုက်ခံထိသွားသောအခါ ရဲရှောင်လွင့်ထွက်သွားမတတ်ပင် ဖြစ်သွားခဲ့သည်။
ရဲရှောင်သည် နန်ရှန်ဆင်းနှင့် အဆင့်များစွာ ကွာခြားလှသည်။ ရှောင်ဧကရာဇ်၏ ဓားရေးသည် ပြိုင်ဘက်ကင်း၍ အတုမရှိအောင် အစွမ်းထက်လှသည့်အတွက်ယခုတိုက်ပွဲတွင် အပေါ်စီးမှသာ တိုက်ခိုက်နိုင်ခဲ့သည်။ သို့သော်နန်ရှန်ဆင်းအားကြီးကြီးမားမား ဒဏ်ရာရရှိအောင် မလုပ်နိုင်ခဲ့ချေ။ ထို့ပြင်
ရဲရှောင်၏ စွမ်းအင်များ ကုန်ဆုံးလာပြီ ဖြစ်သည့်အတွက်ဓားချက်များသည်အားပျော့လာခဲ့သည်။ ရဲရှောင်အနေဖြင့် ဆက်လက်၍ ထိန်းထားရန် မစွမ်းသာတော့ချေ။ ထို့ကြောင့်နန်ရှန်ဆင်း၏ လက်ဝါးရိုက်ချက်များကိုသာ အလူးအလဲ ခံစားနေရသည်။
အရိုက်ခံလိုက်ရသည့်တစ်စက္ကန့်အတွင်းမှာပင် ရဲရှောင်၏ တစ်ကိုယ်လုံး တုန်ခါ၍ ကလီစာများ ဗြောင်းဆန်သွားသလိုပင်ဖြစ်သွားခဲ့သည်။ ထို့ပြင်စွမ်းအင်များ အကုန်အစင် ထုတ်သုံးခဲ့သောကြောင့်လည်း သူ၏ ခန္ဓာကိုယ်တစ်ခုလုံး ပေါက်ကွဲထွက်မတတ်ပင် ခံစားနေရသည်။
ရဲရှောင်၏ စွမ်းအင်သိုလှောင်ရာသည် ဝိညာဉ်တော်ချီဓာတ်များအား အလွန်လျင်မြန်သော နှုန်းဖြင့် စုပ်ယူနေသော်လည်း နောက်ထပ်တစ်ချက် ခုတ်ပိုင်းရန်အတွက်မူ စွမ်းအင်လုံလောက်မှု မရှိတော့သည်ကို ရဲရှောင် သိနေလေသည်။ ထို့ကြောင့် သက်ပြင်းများသာ အကြိမ်ကြိမ်ချနေမိတော့သည်။
ရှောင်ဧကရာဇ်၏ ဓားသိုင်းကွက်တွင် ဓားရေး ၉ မျိုး ပါရှိသည်။ ယခုတိုက်ပွဲတွင် ရဲရှောင်အနေဖြင့်သူ၏ ရှိရှိသမျှသော စွမ်းအင်များအားလုံး ထုတ်သုံးခဲ့သည့်တိုင် ဓားရေး ၃ မျိုးကိုသာ ထုတ်သုံးနိုင်ခဲ့သည်။ ထို သုံးမျိုး သုံးပြီးသည်နှင့်သူလည်း စွမ်းအင်အကုန်ပင် ဖြစ်သည်။
ရဲရှောင်သည် အစွမ်းကုန် ဆက်လက်၍ ခုတ်ပိုင်းနေချင်သော်လည်း ထိုကဲ့သို့ ဓားရေး ၉ မျိုးလုံး အသုံးပြုနိုင်ရန်မှာ မူလတာအိုအဆင့်သို့ ရောက်ရှိမှသာ ဖြစ်နိုင်ပေလိမ့်မည်။
လက်ရှိအချိန်တွင်ရဲရှောင်သည်ဆက်လက် ထိန်းထားနိုင်စွမ်း မရှိတော့ချေ။ နန်ရှန်ဆင်းသည်လည်း ရဲရှောင်၏ ဓားချက် အားလျော့နည်းသွားသည်နှင့် အဆက်မပြတ် ပြန်လည်၍ တိုက်ခိုက်လိုက်သည်။ သူ့ကိုယ်သူပင် သက်သာအောင် မလုပ်တော့ချေ။
နန်ရှန်ဆင်း၏ လှုပ်ရှားမှုများသည်လေကဲ့သို့ပင်မြန်ဆန် လွန်းလှသည့်အတွက်ရဲရှောင်ပင်မျက်ခြေမပြတ်မကြည့်နိုင်တော့ပေ။ ထိုအချိန်တွင်ရဲရှောင်၏ရှေ့၌ သွေးချင်းချင်း နီနေသော နန်ရှန်ဆင်းသည်ရုတ်တရက်ပေါ်လာလေသည်။ ရဲရှောင် ပြင်ဆင်ချိန် မရလိုက်ခင်မှာပင်နန်ရှန်ဆင်း၏ လက်ဝါးရိုက်ချက်သည် သူ၏ ရင်ဘတ်ဆီသို့ ပြင်းထန်စွာ ထိမှန် သွားခဲ့သည်။
ထိုအချိန်တွင်နန်ရှန်ဆင်းသည်ရဲရှောင်အား တန်ဖိုးရှိသည်ဟု မမှတ်ယူတော့ချေ။ သူ့အား ဒုက္ခပြန်ပေးနိုင်သည့် အရာတစ်ခုဟုသာ မှတ်ယူသွားမိသည်။ ရဲရှောင်အား သက်ညှာမိလျှင်မြွေပွေးအား ခါးပိုက်ပိုက်ထားသည်နှင့်ပင်တူနေပေလိမ့်မည်။ ကနဦးတွင်ရဲရှောင်၏ တိုက်ခိုက်မှုများကြောင့် အသက်နှင့်ခန္ဓာကိုယ်အိုးစားမကွဲခဲ့သည်မှာ နန်ရှန်ဆင်းအဖို့ ကံကောင်းသွားခြင်း ဖြစ်သည်။ အချိန်ကြာလာသည်နှင့်အမျှ ရဲရှောင်၏ အစွမ်းအစအား မြင်တွေ့လိုက်ပြီ ဖြစ်သောကြောင့် စိတ်အေးလက်အေး မနေရဲတော့ချေ။ သို့သော် သူ၏ စိတ်ထဲတွင် ရဲရှောင်အား အရှင်ဖမ်း၍ ရနိုင်လိမ့်မည်ဟုလည်း တွေးနေမိပြန်သည်။ အကယ်၍ ရဲရှောင် သေဆုံးသွားခဲ့လျှင်ဖြစ်စေ သို့မဟုတ်ဒဏ်ရာအပြင်းအထန် ရသွားခဲ့လျှင်ဖြစ်စေ သူ့အဖို့ အကျိုးမရှိနိုင်တော့မည်မဟုတ်ပေ။
လက်ဝါးဖြင့်အရိုက်ခံလိုက်ရပြီးနောက်ရဲရှောင်သည်နောက်သို့ လွင့်ထွက်သွားခဲ့ပြီး ပါးစပ်မှပင်သွေးများ အန်ထွက်လာခဲ့သည်။ သူ၏ ခန္ဓာကိုယ်မြေပြင်နှင့် မထိခင်မှာပင် နန်ရှန်ဆင်းသည်အနားသို့ ချက်ချင်း ရောက်လာကာ ရင်ဘတ်အား ပြင်းထန်စွာ ရိုက်ချလိုက်ပြန်သည်။ ထို့နောက် နန်ရှန်ဆင်းသည်မကျေမချမ်း ဖြစ်နေသော အသံဖြင့်-
“ခွေးကောင် . . . ငါမင်းကို သတ်ပစ်မယ်၊ မင်းလိုကောင်ကများ ရာရာစစ ငါ့ကို ဒဏ်ရာတွေ ရစေရတယ်လို့ကွာ . . .”
ရဲရှောင်သည် မြေပြင်ပေါ်တွင် လဲကျနေလျက်ရှိပြီး အနည်းငယ်မျှသာ လှုပ်နိုင်တော့သည်။ နန်ရှန်ဆင်းသည် ရဲရှောင်၏ ကိုယ်ပေါ်သို့ ခြေဖြင့် နင်းထားသည်။ သို့သော် ရဲရှောင်သည် နန်ရှန်ဆင်းအား အထင်သေးသည့် အကြည့်များဖြင့်ကြည့်နေတုန်းပင် ရှိပြီး လေသံ ခပ်မာမာဖြင့် –
“လုပ်လေ . . . ဘာလို့ ရပ်နေတာလဲ။ သတ်လိုက်ပါလား၊ မင်းငါ့ကို တိုက်ခိုက်တာ ၃၀ ရာခိုင်နှုန်းပဲလား . . .”
နန်ရှန်ဆင်းသည် အလွန်အမင်း ဒေါသထွက်နေသည့်တိုင် ရဲရှောင်အား မသတ်ချင်သေးပေ။
ဖန်ဇီလင် အသက်ရှင်လျက် ရှိနေသည်က သူ့အတွက် ပို၍ အကျိုးရှိနိုင်မည် ဖြစ်သည်။
သူ့အတွက်မူ ဖန်ဇီလင်သည် ငွေတွင်းတစ်တွင်းပင် ဖြစ်သည်။ အကယ်၍ ရဲရှောင်သာသေဆုံးသွားမည် ဆိုပါက သူကြိုးစားတိုက်ခိုက်ခဲ့ရသမျှ သဲထဲရေသွန်ပင်ဖြစ်သွားပေလိမ့်မည်။
ဖန်ဇီလင်၏ သေဆုံးသွားသည့် ခန္ဓာကိုယ်ကြီးသည် သူ့အတွက် အသုံးဝင်မည် မဟုတ်ချေ။
နန်ရှန်ဆင်းသည် ရဲရှောင်အား ဒေါသထွက်သည့်အပြင် အသွေးထဲအသားထဲမှပင် မုန်းတီးနေမိသည်။ သို့သော် မသတ်နိုင် ဖြစ်နေပြန်သည်။
ဖန်ဇီလင်အား သတ်လိုက်မည် ဆိုပါက ခဏတာ စိတ်ကျေနပ်မှု ရသွားနိုင်မည် ဖြစ်သော်လည်း ထူးခြားအစွမ်းထက် ဆေးလုံးများကိုမူ ဘယ်သောအခါမျှ ထပ်ရနိုင်တော့မည် မဟုတ်ချေ။ ထို့ကြောင့် နန်ရှန်ဆင်းအနေဖြင့်ရှေ့တိုးရခက်နောက်ဆုတ်ရခက်ပင်ဖြစ်နေမိသည်။
သို့သော် ဒေါသအလွန်အမင်း ထွက်နေသည့်အတွက်ထိုဒေါသများအား ဖြေဖျောက်ရန် နည်းလမ်း ရှာမတွေ့နိုင်ေအာင်ပင်ဖြစ်နေမိသည်။ ထို့ကြောင့်ထွက်ပေါက်ပေးသည့်အနေဖြင့်ရဲရှောင်၏ ပါးအား ဖြန်းခနဲ မြည်အောင်ပင်ရိုက်ချလိုက်သည်။ ထို့နောက် အေးစက်သော အပြုံးများဖြင့်ပြုံးလိုက်ရင်း –
“မင်းကို အခု ငါ မသတ်ချင်သေးဘူး။ ဒါပေမယ့်ငရဲကျတာထက် ဆိုးအောင်ကို နှိပ်စက်ပြမယ်။ သေတာထက် ပိုပြီးဆိုးတဲ့ ဘဝရှိတယ် ဆိုတာကို မင်းသိအောင် ပြရသေးတာပေါ့ . . .”
ရဲရှောင်လည်း မတုန်မလှုပ်အမူအယာဖြင့်-
“မင်းမပြောလည်း ပိုဆိုးမယ်ဆိုတာ ငါသိပြီးသားပါ . . .”
နန်ရှန်ဆင်းသည်ရဲရှောင်၏ မျက်နှာအား ထပ်မံ၍ ရိုက်လိုက်ပြန်ရင်း ခနဲ့သော အသံဖြင့် –
“မင်းက အခု ငါ့လက်ခုပ်ထဲကရေ ဖြစ်နေပြီ။ အဲဒါတောင် စောင့်ကြွားကြွားနဲ့ ပြန်ပြောနိုင်သေးတယ်ပေါ့။ ဟဲဟဲ . . . မင်းတစ်ခွန်းပြောတာနဲ့ ငါလည်း တစ်ချက် ရိုက်ရမှာပဲ။ ဘယ်လောက်ထိ ပြောနိုင်မလဲ ပြောစမ်း . . .”
ထိုအချိန်တွင်ရဲရှောင်၏ ပါးစပ်မှ သွေးများ ရုတ်တရက်အန်ထွက်လာခဲ့သည်။ သွေးများသည် ရဲရဲနီလျက် ရှိပြီး ပမာဏအားဖြင့်အလွန်များပြားလှသည်။
နန်ရှန်ဆင်းသည်ထိုမြင်ကွင်းအား ကြည့်ရင်း ထိတ်ထိတ်ပြာပြာပင်ဖြစ်သွားသည်။ ရဲရှောင်အား မတော်တဆ သတ်မိသွားမည်ကိုလည်း စိုးရိမ်မိသွားသည်။ ထို့ကြောင့်ရဲရှောင်၏ ကိုယ်ပေါ်သို့ နင်းထားသည့်သူ၏ ခြေထောက်အား အနည်းငယ် ကြွပေးလိုက်သည်။ထိုအချိန်မှာပင် ရဲရှောင်၏ ဟင်းလင်းပြင်ကြီး အတွင်းရှိ ဥသည် ရုတ်တရက် လေထဲသို့ မြောက်တက်သွားသည်။ ရဲရှောင် အန္တရာယ် ကျရောက်နေသည်ကို ဥမှ အာရုံခံမိသွားသည့်အလားလေထဲသို့မြောက်တက်ရင်း တုန်ခါလျက် ရှိသည်။
ထိုကဲ့သို့ ဥ သည်တုန်ခါနေသောအခါ လေထဲရှိ ခရမ်းရောင် ချီဓာတ်များသည် စုဆုံ၍ရောက်ရှိလာကြသည်။
ခဏအကြာတွင် ကျယ်လောင်သော ပေါက်ကွဲသံနှင့်အတူ ရဲရှောင်၏ စွမ်းအင်သိုလှောင်ရာသို့ များပြားသိပ်သည်းလှသည့် ခရမ်းရောင် ချီဓာတ်များသည် ဒီရေအလား တဟုန်ထိုး စီးဆင်းဝင်ရောက်သွားကြသည်။
ရဲရှောင်သည် နန်ရှန်ဆင်း ပြုသမျှ နုနေရပြီး အားအင်ချိနဲ့လျက်ရှိသည်။ ထို့ပြင်သူ၏ စွမ်းအင် သိုလှောင်ရာတစ်ခုလုံးတွင်လည်း ဟာလာဟင်းလင်း ဖြစ်နေသည့်အလား ခံစားနေရသည်။ သို့သော် ချက်ချင်းဆိုသလိုပင်စွမ်းအင်သိုလှောင်ရာ အတွင်း၌ စွမ်းအင်များ ရုတ်တရက် ပြည့်ဝလာသကဲ့သို့ ခံစားလိုက်ရသည်။ စွမ်းအင်များသည်ပြည့်လျှံလွန်းသွားသည့်အတွက် ပေါက်ကွဲထွက်မတတ်ပင် ဖြစ်သွားလေသည်။ ထိုစွမ်းအင်များကိုသာ ထုတ်မသုံးလျှင် ရဲရှောင်၏ ခန္ဓာကိုယ် တစ်ခုလုံး ပေါက်ကွဲထွက်သွားနိုင်ပေသည်။
လက်ရှိတိုက်ပွဲ အခြေအနေအရ နန်ရှန်ဆင်းဘက်မှ အသာစီး ရလျက်ရှိသည်။ အရုပ်ကြိုးပျက်ပင်လဲကျနေသည့်ရဲရှောင်သည်သူ၏ခြေထောက်အောက်တွင်ပင်ရောက်ရှိနေပြီ ဖြစ်သဖြင့်ရဲရှောင်ဘက်မှ မည်သည့်နည်းနှင့်မျှ သူ့အား ပြန်လည်တိုက်ခိုက်နိုင်တော့မည်မဟုတ်ကြောင်း နန်ရှန်ဆင်း ယုံကြည်ထားခဲ့မိသည်။ သို့သော်ရဲရှောင်၏ စွမ်းအင်သိုလှောင်ရာအတွင်းတွင်စွမ်းအင်များသည်ထင်မှတ်မထားလောက်အောင်ပင်ပြည့်လျှံသွားခဲ့သည်။ ထိုအချိန်တွင်ရဲရှောင်လည်း တွေဝေတုံ့ဆိုင်းခြင်း အလျင်း မရှိတော့ဘဲ ကျယ်လောင်စွာ အော်ဟစ်၍ ဝုန်းခနဲပင်မတ်တတ်ထရပ်လိုက်ကာ နန်ရှန်ဆင်း၏ ရင်ဘတ်အား သူ၏ လက်များဖြင့် ရိုက်ထုတ်ပစ်လိုက်ပါတော့သည်။
နန်ရှန်ဆင်းသည် ရဲရှောင်ဘက်မှ ယခုကဲ့သို့ တန်ပြန်တိုက်ခိုက်မှုမျိုး ပြုလုပ်လာသည်ကို တွေ့လိုက်ရသောအခါ အလွန်အံ့သြသွားလေသည်။
သူ၏ ရင်ဘတ်အား မိမိရရပင်ထိမှန်သွားခြင်း ဖြစ်သည်။
အရိုက်ခံပြီးသည့်နောက်တွင်အရိုးကျိုးသံကဲ့သို့ အသံတစ်သံ ထွက်ပေါ်သွားခဲ့သည်။ ရဲရှောင်၏ ရိုက်ချက်ကြောင့် နန်ရှန်ဆင်း၏ နံရိုး ၂ ချောင်းကျိုးသွားခဲ့လေပြီ။ သို့သော် ထိုကဲ့သို့ အရိုက်ခံလိုက်ရသည့်တိုင် နန်ရှန်ဆင်းဘက်မှ ပြန်လည် တိုက်ခိုက်နိုင်သည့် စွမ်းအင်မျိုး ရှိနေသေးသဖြင့် ရဲရှောင်အား အားကုန်သုံးကာ ရိုက်ချလိုက်သည်။
သို့သော် ရဲရှောင်သည် နန်ရှန်ဆင်းအား ရိုက်ပြီးသည်နှင့် ခုန်လိုက်ပြီးသားပင်ဖြစ်သည်။ ရဲရှောင်၏ စွမ်းအင် သိုလှောင်ရာ အတွင်းရှိ ဝိညာဉ်တော် ချီဓာတ်များသည် ရေနွေးအိုးထဲမှ ရေများ ဆူပွက်နေသကဲ့သို့ ပေါက်ကွဲထွက်တော့မလိုပင်ရှိနေခဲ့သည်။ ထိုပမာဏသည် သူ့အဆင့်နှင့် ပိုင်ဆိုင်နိုင်သော ပမာဏမျိုး မဟုတ်ချေ။
ရဲရှောင် ခုန်လိုက်ပြီးနောက် သူ့ထံသို့ ထပ်မံ သက်ရောက်လာသည့် နောက်ထပ် ရိုက်ချက်တစ်ချက်အား ရှောင်တိမ်းခြင်း မပြုတော့ဘဲ ရှေ့သို့ပင် တစ်လှမ်းတိုးကာ ယုံကြည်မှုရှိရှိဖြင့် ရင်ဘတ်အား ထိုးခံ၍ပေးလိုက်ပါတော့သည်။