Chapter – 258
“ပျော်ရွှင်သွားသောဥ”
အလွန်ကို့ရို့ကားယားနိုင်သော အခြေအနေပင်ဖြစ်ပြီး ဝိညာဉ်တော်ချီဓာတ်များသည် ရဲရှောင်ထံသို့ တိုးဝင်လာနေလေသည်။ သို့သော် ထိုအချက်သည် ကောင်းသောအချက်ပင်ဖြစ်ကြောင်း ရဲရှောင် သဘောပေါက်လိုက်သည်။
ဝိညာဉ်တော်ချီဓာတ်များသည် တကူးတက စုပ်ယူနေစရာမလိုဘဲ မုန်တိုင်းထန်နေသကဲ့သို့ပင်အရှိန်အဟုန်အပြည့်ဖြင့်တိုးဝင်လာနေကြသည်။ ရဲရှောင်အနေဖြင့်ထွေထွေထူးထူး လုပ်နေစရာမလိုဘဲ ထိုင်နေရုံပင်ဖြစ်သည်။
ရဲရှောင်ဘက်မှ စုစည်း၊ ချေဖျက်၍ သန့်စင်ရုံပင် ဖြစ်သည်။
ဝိညာဉ်တော်ချီဓာတ်များ ဝင်ရောက်နေမှုသည် မြန်ဆန်လွန်းလှသဖြင့် ရဲရှောင်ပင် လိုက်မမီနိုင်အောင် ဖြစ်နေခဲ့သည်။ အကယ်၍ သန့်စင်ခြင်းလုပ်ငန်းစဉ်သည်အနည်းငယ် နောက်ကျခဲ့ပါက ရဲရှောင်၏ ခန္ဓာကိုယ်တစ်ခုလုံးပင် ပေါက်ကွဲသွားနိုင်ပေသည်။ ဝိညာဉ်တော်ချီဓာတ်များသည်သွေးကြောများထဲထိပင်စီးဆင်းလျက်ရှိသည်။ ရဲရှောင်လည်း ရှည်ရှည်ဝေးဝေး စဉ်းစားချိန်ပင်မရတော့ဘဲ သန့်စင်ချေဖျက်၍သာ နေရတော့သည်။ အဆိုပါချီဓာတ်များသည်မည်သည့်အခါမျှ အဆုံးမသတ်တော့မည့်အလား စီးဆင်းနေကြသည်။
“ဒီနေရာက ကောင်းလှချည်လား . . .”
ရဲရှောင်၏ စိတ်ထဲတွင်အလွန်အံ့ဩ တုန်လှုပ်နေမိသည်။ လက်ရှိ သူထိုင်ထားသည့်နေရာသည်ဥ၏ နေရာဖြစ်သည့်အတွက် သာမန်နေရာတစ်ခု မဟုတ်မှန်း အစကတည်းပင်သိရှိထားခဲ့သည်။ သို့သော်ယခုကဲ့သို့မျှော်လင့်ထားသည်ထက်ပင်ပို၍ အံ့သြစရာ ကောင်းနေမည်မှန်း ထင်မှတ်မထားခဲ့မိချေ။
(တော်တော်အရေးမပါတဲ့ဥပဲ၊ ဒီလိုနေရာမှာ အကြာကြီး ရှိနေခဲ့တော့ ဒီကောင် ဘယ်လောက်ထိတောင် ဝိညာဉ်တော်ချီဓာတ်တွေကို စုပ်ယူပြီးပြီလဲ မသိဘူး။ ပမာဏတော်တော်ကို များနေလောက်ပြီ။ စကြဝဠာကြီးတစ်ခုလုံးမှာ ရှိတဲ့ ချီဓာတ်တွေထက်တောင် များနိုင်ဦးမယ် . . .)
ယခင်ရှောင်ဧကရာဇ် ဘဝတွင်ပင် ဥကဲ့သို့ ဝိညာဉ်တော် စွမ်းအင်များအား မစုပ်ယူနိုင်ခဲ့ချေ။
ထို့ပြင် ရှောင်ဧကရာဇ်ဘဝတွင် စုပ်ယူခဲ့သည့် ဝိညာဉ်တော် ချီဓာတ်များမှာလည်း စုပ်ယူပြီးပြီးချင်း အသုံးပြု၍ မရပေ။ အသုံးမပြုခင်သန့်စင်ရသေးပေသည်။
ဥမှာမူ သန့်စင်ခြင်း လုပ်ငန်းစဉ်အား ပြုလုပ်နေစရာမလိုဘဲ အဆုံးမရှိအောင်များပြားလှသည့် ဝိညာဉ်တော်ချီဓာတ်များအား စုပ်ယူနိုင်သည့် သဘောပင်။ မည်သည့်အခါမျှ ပြည့်ဝသည်ဟူ၍လည်း မရှိချေ။
ထိုကဲ့သို့ နေ့ပေါင်းများစွာ ညပေါင်းများစွာ ဝိညာဉ်တော်ချီဓာတ်များအား စုပ်ယူခဲ့သည့်တိုင် ယခုထိပင် အကောင်မပေါက်သေးချေ။
မကြာမီကာလအတွင်း အကောင်ပေါက်လာမည့် ပုံလည်း မပေါ်ချေ။
“တော်တော် ထူးဆန်းတဲ့ ဥပဲ . . .”
ရဲရှောင် သက်ပြင်းချရင်း ရေရွတ်လိုက်မိသည်။ တဟုန်ထိုး စီးဆင်းနေသည့် ဝိညာဉ်တော် ချီဓာတ်များသည်တဖြည်းဖြည်းဖြင့်ထိန်းချုပ်ရ ခက်လာခဲ့သည်။ ထို့ကြောင့်ရဲရှောင်အဖို့ စီးဆင်းနေသည့် ချီဓာတ်များအား သန့်စင်ရန်ပင် အချိန်မလောက်ငှတော့ချေ။ အလွန်များပြားသော ချီဓာတ်များပင် ဖြစ်သည်။
ထို့ပြင် ရဲရှောင်အနေဖြင့်အနည်းငယ်ပင်ရှက်ရွံ့နေမိသည်။
အကြောင်းမှာ ဥ၏ နေရာတွင်ထိုင်ရင်း ဥကဲ့သို့ ဟန်ဆောင်နေရသည်မဟုတ်ပါလော။
ရဲရှောင်အဖို့ တင်ပါးအောက်မှ တိုးဝင်လာသော ဝိညာဉ်တော်ချီဓာတ်များသည် စအိုဝမှ တဆင့် စီးဆင်းနေသောကြောင့်နေရထိုင်ရပင်ခက်နေလေသည်။
ထို့ပြင်ဥသည် သူ၏ပေါင်ကြားတွင် ရှိနေခြင်းကြောင့် စုစုပေါင်း ဥ သုံးလုံးပင်ရှိနေသည်ဟု ရဲရှောင် အူကြောင်ကြောင်နိုင်စွာ တွေးမိလိုက်သည်။
စဉ်းစားနေရင်းဖြင့်ရဲရှောင် အထိတ်တလန့်ဖြစ်သွားကာ ချက်ချင်းပင် မတ်တပ်ထရပ်လိုက်သည်။
မထ၍လည်း မဖြစ်တော့ချေ။ အကယ်၍ ဆက်ထိုင်နေမည်ဆိုပါက သိပ်သည်းများပြားလှသည့်ချီဓာတ်များ အဆက်မပြတ်တိုးဝင်နေခြင်းကြောင့်သူ၏ သွေးကြောများ ပေါက်ကွဲထွက်သွားနိုင်ပေသည်။ ခန္ဓာကိုယ်တွင်း လက်ရှိစုပ်ယူထားသည့်ချီဓာတ်များကိုပင် အလျင်အမြန် ချေဖျက် သန့်စင်ရဦးမည် ဖြစ်သည်။
ကို့ရို့ကားယားနိုင်လှသော အခြေအနေနှင့် ကြုံတွေ့ခဲ့ရပြီးနောက် ရဲရှောင်သည် အံ့သြ၍ နေမိတုန်းပင်ဖြစ်သည်။
စိတ်ထဲတွင်လည်း အကြမ်းဖျင်းတွက်ချက်နေမိသည်။ သူ့ထံသို့ စီးဆင်းဝင်ေရာက်ခဲ့သည့် ဝိညာဉ်တော်ချီဓာတ်များ၏ ပမာဏအရ မည်မျှအထိ အဆင့်မြင့်တက်ခဲ့သည်ဆိုသည်ကိုတွက်ချက်ကြည့်နေခြင်းပင် ဖြစ်သည်။ ရံဖန်ရံခါ ယခုကဲ့သို့ လေ့ကျင့်မည် ဆိုပါက သူ၏ အဆင့်တက်နှုန်းမှာ အံ့သြဖွယ် ကောင်းလောက်အောင်ပင်မြန်ဆန်သွားမည် ဖြစ်သည်။
အကယ်၍ ယခုလက်ရှိတွင်ရဲရှောင်အနေဖြင့်ကောင်းကင်အဆင့်၏ ထိပ်တန်းပညာရှင်တစ်ဦး ဖြစ်နေမည်ဆိုလျှင်ပင် ဥ၏နေရာတွင် ကြာမြင့်စွာ ထိုင်နိုင်မည် မဟုတ်ချေ။
များပြားလှသည့်ဝိညာဉ်တော်ချီဓာတ်များကြောင့်ရဲရှောင်၏ ခန္ဓာကိုယ်တစ်ခုလုံး ပေါက်ကွဲထွက်၍ အသက်ဆုံးရှုံး သွားပေလိမ့်မည်။
ယခုနေရာတွင်၂ နာရီတိုင်တိုင်မထစတမ်း ထိုင်ခွင့်ရမည် ဆိုပါက ရဲရှောင်သည် မူလ ဝိညာဉ်တော် အဆင့်သို့ပင် ရောက်ရှိသွားပေလိမ့်မည်။
ရဲရှောင် ကမန်းကတန်းပင်ထလိုက်သောကြောင့် ဥ သည်အံ့သြသွားသည့်ပုံပေါ်သွားလေသည်။ ထို့ကြောင့်ရဲရှောင်၏ရှေ့သို့ ပျံဝဲလာ၍ နားမလည်နိုင်သည့်ဟန်ဖြင့်ရပ်နေခဲ့သည်။
အကယ်၍ ဥသည်သာ ရဲရှောင်အား စကားပြောတတ်မည် ဆိုပါက –
(ကျုပ်ကတော့ ခင်ဗျားကို အကောင်းဆုံးနေရာ ပေးထားတာ။ ခင်ဗျားက ချက်ချင်းကို ထရပ်တာပဲလား။ ခင်ဗျား ရူးများ ရူးနေလား။ ကျုပ်ကို အခုထိ စိတ်ကောက်နေတုန်းပဲလား။ ဒီလိုသာ ဆိုရင်တော့ ခင်ဗျားက သဘောထားမကြီးတဲ့ လူပဲ ဖြစ်ရမယ်. . .)
ရဲရှောင်သည် ဥ၏ ခံစားချက်အား သတိပြုမိသွားသည်။ သူ့အနေဖြင့်လည်း ဥ၏နေရာအား လုယူထားသည့်သဘော ဖြစ်နေ၍ မိမိကိုယ်ကို ရှက်ရွံ့နေမိသည်။ ထို့ကြောင့် အရှက်ပြေ ချောင်းတစ်ချက်နှစ်ချက်ခန့်ဟန့်လိုက်ရင်း –
“ဒါမင်းနေရာလေ၊ အဲဒီတော့ မင်းပဲ နေသင့်ပါတယ်။ ငါမင်းဆီက မလိုချင်ပါဘူး . . .”
ရဲရှောင်၏ စကားကြောင့်ဥသည် အနောက်သို့ အနည်းငယ် ခုန်သွားခဲ့သည်။ ရဲရှောင်အပေါ်တွင်လည်း နားမလည်နိုင် ဖြစ်နေသည့်ပုံပင်။
ရဲရှောင်လည်း ဥအားကိုင်၍ အချပ်ပြားအလယ်ရှိ ချိုင့်လေးထဲသို့ နေရာချပေးလိုက်သည်။
ရဲရှောင်ကိုယ်တိုင်မှာမူ အစွန်းတွင် ထိုင်ရင်းဖြင့်-
“ဒီမှာထိုင်ရုံနဲ့တင် ငါ့အတွက်က အဆင်ပြေပါတယ် . . .”
ဥသည် ကျေနပ်သွားသည့် အမူအယာဖြင့်ခုန်စွ ခုန်စွ ပြုလုပ်လိုက်သည်။
(တော်တော် စိတ်သဘောထားပြည့်တဲ့လူပါလား။ ငါ့ကို အကောင်းဆုံးနေရာ ပေးတယ်။ ငါ့အတွက် အများကြီး စဉ်းစားပေးတာပါလား။ ငါကတော့ သူ့ကို လွင့်ထွက်သွားအောင်တောင် တစ်ခါလုပ်ခဲ့ဖူးတယ်။ ငါမှားခဲ့တာပဲ။ အဲ့ဒီအတွက်သူ ငါ့ကိုစိတ်ဆိုးခဲ့တာလည်း မဆန်းပါဘူးလေ . . .)
အကယ်၍ ဥသည်သာ သက်ရှိဆိုပါက ထိုကဲ့သို့ပင်တွေးနေမိမည်မှာ အသေအချာပင်ဖြစ်သည်။
ဥသည် ရဲရှောင်၏ ဂရုစိုက်မှုကြောင့်အလွန်အမင်းခံစားသွားရသည့်ပုံပင်။ရဲရှောင်၏ လက်ဘေးသို့ ပျံဝဲလာရင်း လက်အား ပွတ်သီးပွတ်သပ်ပြုလုပ်နေလေသည်။
ကြောင်လေးတစ်ကောင်မှ သခင်ဖြစ်သူအား ကပ်၍ ချွဲနေသည်နှင့်ပင် တူနေပါသေးသည်။
ဥ၏ အပြုအမူကြောင့်ရဲရှောင် ကြောင်ငေးသွားမိသည်။ ဥသည် သူ့အပေါ်တွင်မှီခိုအားထားပြုနေရမှန်း သဘောပေါက်လိုက်မိသည်။
(ဘာဖြစ်နေတာလဲဟ၊ ငါလည်းဘာမှမလုပ်ပါဘူး။ ငါက မင်းပိုင်တဲ့နေရာ မင်းကို ပြန်ပေးတာလေ။ နောက်ပြီး ငါကိုယ်တိုင်ကလည်း ကြာကြာမထိန်းချုပ်နိုင်လို့ပါ။ အဲဒါကို မင်းက ဒီလောက်ထိ ခံစားသွားရတယ်ပေါ့။ ဥကဥပါပဲ၊ ခံစားချက်မှ မရှိတာ။ ဘယ်လိုလုပ် ဖြစ်နိုင်မှာလဲ . . .)
ရဲရှောင် သက်ပြင်းချရင်း တွေးနေမိသည်။
သို့သော် ဥသည် သူ့အပေါ်တွင် ကြည်ကြည်ဖြူဖြူ ရှိနေသဖြင့် ရဲရှောင်လည်း ဥပေက္ခာ မပြုချင်တော့ပေ။ ထို့ကြောင့်စိတ်သဘောထား ကြီးကြီးထားလိုက်တော့မည်ဟုပင်ရဲရှောင်၏ စိတ်ထဲတွင်တွေးလိုက်မိသည်။
(ငါက လူတစ်ယောက်ပဲဟာ ဒီလို ဥလေးတစ်လုံးကို ဘာများ ဖြစ်စရာ လိုမှာလဲ . . .)
ရဲရှောင်လည်း ချက်ချင်းပင် စိတ်ကောင်းဝင်သွားမိသည်။ ဥအပေါ်တွင်လည်း ကောင်းကောင်းမွန်မွန်ဆက်ဆံတော့မည်ဟု ဆုံးဖြတ်လိုက်သည်။
ရဲရှောင်ဟင်းလင်းပြင်ထဲမှ ထွက်ခွာရန် ပြင်သောအခါ ဥသည် မသွားစေချင်သည့်ပုံပင်။
ရဲရှောင်၏ ရင်ခွင်ထဲသို့ အတင်းအကြပ်ပင်တိုးဝင်လာ၍ သူနှင့်အတူ အပြင်သို့ လိုက်ချင်သည့်အမူအယာအမျိုး ပြုလုပ်ပြနေလေသည်။ ရဲရှောင်လည်း ဥအားကြည့်၍ သနားသွားမိသောကြောင့်ဆက်လက်၍ မနှိပ်စက်ချင်တော့ပေ။
ထို့ကြောင့် အပြင်သို့ အမြန်ထွက်လာပြီးနောက် ဟင်းလင်းပြင်ကြီး အတွင်းသို့ ပစ္စည်းများ ပြန်လည် ထည့်သွင်းလိုက်သည်။ လွန်ခဲ့သော ရက်များအတွင်း လင်းပါအိုမှ စုဆောင်းမိခဲ့သည့်ပစ္စည်းများမှာ မနည်းမနောပင်ဖြစ်သည်။
ရဲအိမ်တော်၏ အခန်းလွတ်တစ်ခုအတွင်း အပြည့်ပင် ဖြစ်သည်။
ရဲရှောင်သည် ထိုပစ္စည်းများ အားလုံးအား တစ်ခါတည်း ထည့်သွင်းလိုက်ခြင်းပင်ဖြစ်သည်။ ချက်ချင်းဆိုသလိုပင် သစ်သားဟင်းလင်းပြင်သည် ယခင်ကထက် ၂ ဆခန့် ဖြစ်သွားပြီး ရွှေဟင်းလင်းပြင်သည်လည်း ပြည့်သွားခဲ့သည်။ ပစ္စည်းများထည့်သွင်းပြီး တခဏအကြာတွင် အမျိုးမျိုးသော စွမ်းအင်များ စုစည်းမိသွားလေသည်။
အခြားသော ဟင်းလင်းပြင်များ အတွင်းတွင်လည်း ဝိညာဉ်တော်ချီဓာတ်များ လျင်မြန်စွာ တိုးတက်သွားခဲ့လေသည်။
အဆိုပါဝိညာဉ်တော်စွမ်းအင်များသည်ဟင်းလင်းပြင်များ အားလုံးသို့ ပြန့်နှံ့သွားလေသည်။
ဥသည် အလွန်ကျေနပ်ပျော်ရွှင်သွားခဲ့သည့်အတွက်လေထဲတွင် ပတ်လည်လှည့်၍ မြူးထူးလျက် ရှိသည်။ အကယ်၍ လူတစ်ယောက်ကဲ့သို့သာ အသံထွက်နိုင်မည် ဆိုပါက “ဟေး” ဟုပင် ထ၍ အော်မိမည် ဖြစ်ပေတော့သည်။
Top of Form