Switch Mode

Chapter – 254

အချောင်သမားများ

Chapter – 254
“အ​ချောင်​သမားများ”

“ဒီကမ္ဘာက အင်အားအကြီးဆုံး ဂိုဏ်းကြီး ၂ ဂိုဏ်းပေါ့ဗျာ။ နေရောင်ဂိုဏ်းနဲ့ ကြယ်ရောင်ဂိုဏ်းတို့ပဲ”
“သူတို့အမြင်မှာ​တော့ ကျုပ်​တို့က ပမွှားပဲဗျ။ သူတို့နဲ့ယှဉ်ရင် လင်းပါအိုဆိုတာ ဘာမှကို မဟုတ်တော့ဘူး။ သူ . . . သူတို့က သိပ်ကို အင်အားကြီးလွန်းတယ် . . .”
ဝမ်ဇန်းဟိုသည်​မျက်စိပျက်မျက်နှာပျက်ဖြင့် ပြောလိုက်သည်။
ရဲရှောင်​လှောင်​ရယ်​သော အပြုံးမျိုးဖြင့်​ပြုံးလိုက်​ရင်း –
“အင်အားကြီးလွန်းတယ် ဟုတ်လား။ နေရောင်ဂိုဏ်းနဲ့ ကြယ်ရောင်ဂိုဏ်းက ဘာတွေများ ပြောသွားလို့လဲ ပြောစမ်းပါဦး . . .”
ရဲရှောင်၏ မျက်နှာသည်​အေးစက်မာကြောလျက် ရှိပြီး စိတ်ထဲတွင်လည်း မခံချင်​ပင်​ဖြစ်​နေမိသည်​။
(နေရောင်ဂိုဏ်းတဲ့လား . . . ဟမ့် . . . ဒါ ချင်းယန်နယ်ပယ်က သူရိယဂိုဏ်းရဲ့ ဂိုဏ်းခွဲတစ်ခု ဖြစ်မယ်ထင်တယ်။ ကြယ်ရောင်ဂိုဏ်းကလည်း ကြယ်အလင်းဂိုဏ်းရဲ့ ဂိုဏ်းခွဲဖြစ်မှာပေါ့။ သူတို့က မော်တယ်ကမ္ဘာမှာတောင် လာပြီး နယ်ချဲ့​နေကြတာပါလား . . .)
“နေရောင်ဂိုဏ်းက ထူးခြားအစွမ်းထက်ဆေးလုံးတွေ တစ်မျိုးကို ၆ လုံးစီ လိုချင်တယ်တဲ့။ ကြယ်ရောင်ဂိုဏ်းကလည်း ဒီလိုပဲ။ သူတို့ကတော့ ၈ လုံးစီ လိုချင်တယ် ပြောတယ် . . .”
ဝမ်ဇန်းဟိုသည်​ထိုကိစ္စနှင့် ပတ်သက်၍ ကြံရာမရ ဖြစ်နေသည့်ပုံပင်။
ရဲရှောင်လည်း အေးစက်စက်မျက်နှာပေးဖြင့် ခြောက်ကပ်ကပ် ရယ်မောလိုက်ရင်း –
“ဟဲဟဲ . . . သူတို့က လိုချင်တာတော့ အများကြီးပဲ။ ဘာများ ပြန်ပေးမယ် ပြောလဲ . . .”
ဝမ်ဇန်းဟို မခံချိမခံသာ ဖြစ်နေသည့်ဟန်ဖြင့် –
“သူတို့ဘက်က ဘာပေးမယ် ဆိုတာကိုတော့ မပြောသွားဘူး . . .”
“ဟားဟား ဟားဟား . . .”
ရဲရှောင် ဟက်ဟက်ပက်ပက်ပင်​ရယ်မောပစ်လိုက်မိသည်။ သ​ဘောကျလွန်းသည့်​အတွက်​မဟုတ်​ဘဲ ဒေါသထွက်လွန်း၍သာ ရယ်မောလိုက်​ခြင်း ဖြစ်သည်​။ ထို့နောက် တည်​ကြည်​လေးနက်သော အသံဖြင့် –
“ဒါဆို သူတို့က ကျုပ်တို့ဆီကနေ လုယူချင်နေတာ​ပေါ့။ သူတို့ဆီက​တော့ ဘာမှ ပေးမှာ မဟုတ်လောက်ဘူးမလား။ ရောင်းတာကို မဝယ်ဘဲ အတင်းအကြပ်​လိုချင်​နေမှတော့ လုတာပဲပေါ့ . . .”
“သူတို့ဘက်က တစ်ခုခု ပေးမယ်ဆိုရင်တောင် အများကြီးတော့ ဟုတ်မှာ မဟုတ်ဘူး။ အများဆုံးပေးမှ တစ်လုံးစာတောင် ရှိမှာ မဟုတ်လောက်ဘူး . . .”
ဝမ်ဇန်းဟိုသည်​သက်ပြင်းချလိုက်ရင်း –
“ကျုပ်လည်း ဒီတစ်ခါတော့ ခေါင်းကြိမ်းနေပြီ။ ဒီလို ထိပ်တန်းဂိုဏ်းကြီးတွေက အခုလို အရှက်မရှိတဲ့ လုပ်​ရပ်​မျိုး လုပ်ကြလိမ့်မယ်လို့ ကျုပ်ဖြင့် ထင်တောင်မထင်ထားခဲ့မိဘူး”
ရဲ​ရှောင်​လည်း မဲ့ပြုံးတစ်​ချက်​ပြုံးလိုက်​ရင်း –
“ခင်ဗျား​ပြော​နေတာ​တွေက မှား​နေပြီ ဝမ်​ဇန်းဟို။ ထိပ်​သီးဂိုဏ်း​တွေအ​ကြောင်း ခင်ဗျားသိတာ နည်းနည်းလေးပဲ ရှိသေးတယ်။ ခင်ဗျားသိတဲ့ ကိစ္စကလည်း သေးသေးလေးပါ။ ဒါကြောင့် ခင်ဗျားအခု ဘာလုပ်လို့ ဘာကိုင်​ရမှန်း မသိ ဖြစ်နေတာပေါ့။ တကယ်တော့ ခင်ဗျား ဘာမှလုပ်စရာ မလိုဘူး . . .”
“ဘာလို့လဲဆိုတော့ အင်အားကြီးတဲ့ ဂိုဏ်းဖြစ်လေလေ အရှက်မရှိလေလေပဲ။ သူတို့ကတော့ အားလုံးကို ချုပ်ကိုင်နိုင်တယ် အစွမ်းရှိတယ်လို့ သူတို့ကိုယ်သူတို့ ထင်ထားကြမှာပဲ​လေ။ ကျုပ်တို့ဘက်က သူတို့ကို ဘာမှ လုပ်နိုင်မှာ မဟုတ်ဘူးပေါ့။ အဲဒါကြောင့်မို့လဲ အခုလို ရဲရဲတင်းတင်းပဲ တောင်းဆိုရဲ​နေတာ . . .”
‌“ကျုပ်တို့ လေလံပွဲကို အခုလို ကြီးကြီးကျယ်ကျယ် ကျင်းပဖို့ စီစဉ်ခဲ့တာပဲ ကံကောင်းတယ် ပြောရမယ်။ ဒီလိုမှ မဟုတ်ရင် သူတို့ဂိုဏ်းတွေက လျှို့ဝှက်​လုပ်ကြံလာနိုင်တယ်။ ကျုပ်တို့ကလည်း ကျုပ်တို့ဆီမှာ တန်ဖိုးကြီး ဆေးလုံးတွေ အများကြီးရှိတယ်လို့ ကြေညာခဲ့တယ် မဟုတ်လား။ လောဘကြီးတဲ့ လူတွေအမြင်မှာတော့ ကျုပ်တို့က ကလေး​လေးတစ်ယောက် ရွှေချောင်းတွေကိုင်ပြီး ဈေးထဲ လျှောက်သွားနေသလို ဖြစ်နေမှာပဲ . . .”
ရဲရှောင် ပြုံးလိုက်ပြန်​ရင်း –
“ကျုပ် ဒီလိုကိစ္စတွေကို အရင်ကလည်း ကြုံခဲ့ဖူးပါတယ်။ သူတို့ဘက်က တစ်ခုခု ပေးမယ်ဆိုရင်တောင် ကျုပ်က အံ့သြ​နေမိဦးမှာ။ သူတို့တွေက ဘာမှမပေးဘဲ ဆေးလုံးတွေကို လုယူချင်နေတယ် ဆိုတာ မထူးဆန်းဘူး။ အဲ့ဒါ ပုံမှန်အခြေအ​နေပဲ။ သူတို့ရဲ့ မရှိတဲ့ ဂုဏ်သိက္ခာကိုလည်း သူတို့က ရှာကြံပြီး အထင်ကြီးတတ်ကြသေးတာ။ တကယ်လို့ သူတို့လိုချင်တာ သာပေးလိုက်မယ်ဆိုရင် ကျုပ်တို့က​ပေးလည်း​ပေးရ​သေးတယ်​သူတို့အထက်​စီးက​နေ ဆက်​ဆံတာလည်း ခံရဦးမယ်​. . .”
ဝမ်ဇန်းဟိုသည်​နဖူးမှ ချွေးများအား သုတ်လိုက်ရင်း –
“ဆရာဖန်​ဘက်​က အခုလို ပေါ့ပေါ့လေး ပြောနိုင်ပုံထောက်ရင်​တော့ ဆရာဖန်​ဆီမှာ အကြံအစည် ရှိပြီးသား ထင်တယ်။ ဒါပေမယ့်​အခုကျုပ်တို့ ဘာဆက်လုပ်ရမလဲဆိုတာ မြန်မြန်ပြောမှဖြစ်မယ်။ သူတို့က သိတဲ့အတိုင်း အရှက်မရှိတဲ့လူ​တွေ။ ကျုပ်တို့က သူတို့ကို မယှဉ်နိုင်တော့ သူတို့ခိုင်းတာ လုပ်ရမလို ဖြစ်နေပြီ . . .”
ဝမ်ဇန်းဟိုသည် ထိုသို့ ပြောလိုက်ပြီးနောက် စိတ်ထဲတွင်​လည်း ဖန်​ဇီလင်​၏ အ​ကြောင်းအား​တွေး​နေမိသည်​။
(ဧကရာဇ်က ဒီလိုဂိုဏ်းကြီးတွေ အကြောင်းကို ဘာလို့ အများကြီး သိနေရတာလဲ။ သူ့ပုံစံက စိတ်ဆိုးနေပေမယ့်​အံ့သြတဲ့ အရိပ်အယောင်လည်း မပြဘူး။ သိထားပြီးသလိုတောင် ဖြစ်နေသေးတယ်။ ဘယ်လိုရင်ဆိုင်ရမလဲ ဆိုတာကိုလည်း အစီအစဉ်ချထားပုံပဲ။ ငါကတော့ ဒီလုပ်ငန်းလုပ်လာတာ နှစ်ပေါင်းများစွာ ရှိနေပြီ တစ်ခါမှ ဒီလိုဂိုဏ်းကြီးတွေနဲ့ မဆက်ဆံခဲ့ဖူးဘူး။ ဧကရာဇ်က အသက်အားဖြင့်လည်း တော်တော်ငယ်ဦးမှာပါ။ ဒါဆို ဘာကြောင့်များ အတော်များများ သိနေရတာလဲ မသိဘူး။ ဘယ်လောက်ပဲဉာဏ်ကောင်းပြီး ပါရမီရှိရှိ အတွေ့အကြုံက ငါ့လောက်တောင် ရှိမှာ မဟုတ်သေးဘူး။ ဒါပေမယ့်​အခုကြ . . . အံ့သြစရာပါပဲလား . . .)
ထိုကဲ့သို့ တွေးရုံသာ တွေးနေမိ​သော်​လည်း ဝမ်​ဇန်းဟို၏ နှုတ်​မှ ထုတ်ဖော်၍တော့ မပြောဝံ့ချေ။
ဖန်ဇီလင်သည် လျှို့ဝှက်ဆန်းကြယ်၍ ခန့်မှန်းရခက်သော လူတစ်ဦးဖြစ်​မှန်း ဝမ်ဇန်းဟိုသည်​ကောင်းစွာ သိထား​လေသည်​။
“ဝမ် . . . ခင်ဗျား သိပ်လည်း စိုးရိမ်မနေပါနဲ့။ ဒီလိုကိစ္စကို ကျုပ်သိလိုက်ရပြီဆိုတော့ ရင်ဆိုင်ဖို့ နည်းလမ်းကို ရှာရမှာပေါ့။ ကျုပ်တို့ဆီက အခွင့်အရေးယူဖို့ ထင်သလောက် မလွယ်ဘူးဆိုတာကို ပြရမယ်”
ရဲရှောင် ခနဲ့တဲ့တဲ့ဖြင့် ပြောလိုက်သည်။
ဝမ်ဇန်းဟိုလည်း ထိုအခါကြမှသာ စိတ်သက်သာရာ ရသွားလေသည်​။
ဝမ်ဇန်းဟိုသည် မည်သို့ကြောင့်ရယ်​မှန်းမသိ ဖန်ဇီလင်အား အကြွင်းမဲ့ ယုံကြည်နေမိသည်။ ထိပ်သီးဂိုဏ်းကြီး ၂ ခုစလုံးသည် မော်တယ်ကမ္ဘာတွင် အင်အားအကောင်းဆုံး ဖြစ်ကြသည်​။ ဂိုဏ်းနှစ်​ခုအနက်​တစ်​ခုတည်းကိုပင်​ချန်နိုင်ငံတော်၏ အင်အားစုများ အားလုံး​ပေါင်း၍ ရင်ဆိုင်​လျှင်​ပင်​ရင်​ဆိုင်​နိုင်​လိမ့်​မည်​မဟုတ်ချေ။ ထို့ပြင် ထိုဂိုဏ်းအသီးသီးသည် အထက်ပိုင်း နယ်ပယ်များမှ အထောက်အပံ့ကောင်းများကိုလည်း ရရှိထားကြပါသေးသည်။
အမှန်တကယ်ပင် အင်အားကြီး၍ အစွမ်းထက်လှသော ဂိုဏ်းများ ဖြစ်ကြသည်​။ ဝမ်​ဇန်းဟိုသည်​ဖန်ဇီလင်ထံတွင် ထူးခြားအစွမ်းထက်သည့်​ဆေးလုံးများစွာ ရှိနေသည်ကို ရိပ်စားမိသည်​။ ဖန်​ဇီလင်​သည်​အဆင့်မြင့် ဆေးပညာရှင် တစ်ဦးဖြစ်​သော်လည်း ကျင့်ကြံမှုပိုင်းတွင်မူ အဆင့်နိမ့်​နေ​သေးသည်​ဟု ဆိုရ​ပေမည်​။ လင်းပါအိုသည်လည်း လျူချန်းဂျန် ပါဝင်လာသည့် အချိန်မှစ၍သာ အင်အားတောင့်တင်းလာခြင်း ဖြစ်သည်။
သို့သော် လျူချန်းဂျန်သည်​အစွမ်းထက်ဆုံး ပညာရှင် မဟုတ်သေး​ပေ။ လျုချန်းဂျန်​အ​နေဖြင့်​သာမန်ဂိုဏ်းများအား မမှုသည့်တိုင် နေရောင်ဂိုဏ်းနှင့် ကြယ်ရောင်ဂိုဏ်းတို့ကဲ့သို့ ဂိုဏ်းကြီးများနှင့် ယှဉ်လျှင် အ​သေးအမွှားသာ ဖြစ်​သွား​လေသည်​။ ထို့ကြောင့် ထိုဂိုဏ်းကြီး ၂ ဂိုဏ်းအား ဆန့်ကျင်မည်ဆိုပါက တောင်နံရံအား ဥနှင့် ပစ်​ပေါက်​နေသကဲ့သို့ပင်​ဖြစ်နေ​ပေလိမ့်မည်။
ထိုသို့ ဖြစ်သည့်တိုင် ဖန်ဇီလင်မှ စိတ်မပူရန် ပြောသောအခါ ဝမ်ဇန်းဟိုသည်လည်း စိတ်ဒုန်းဒုန်းချ၍ နေနိုင်​သွားမိသည်​။
ရဲရှောင်သည်​ဝမ်​ဇန်းဟိုအား ကြည့်​လိုက်​ရင်း –
“ကျုပ်တို့ရဲ့ အထူးခန်းတွေ အကုန်လုံး ပြည့်သွားပြီလား . . .”
“အားလုံး ပြည့်ပြီ။ ၃ ခန်းကိုတော့ အထူးဦးစားပေးတဲ့ လူတွေထားဖို့ စီစဉ်ထားတယ်။ ကောင်းကင်၊ မြေကြီးနဲ့ လူသား အခန်းတွေလေ။ အခန်းမှာ နေရာမရတဲ့ လူတွေကတော့ ရိုးရိုးပွဲကြည့်စဉ်ကပဲ ကြည့်ကြရမှာပေါ့။ မြေကြီးအခန်းနဲ့ လူသားအခန်းကို နေရောင်အခန်းနဲ့ ကြယ်ရောင်အခန်းက စာရင်းသွင်းသွားတာပဲ . . .”
ဝမ်​ဇန်းဟိုသည်​သွက်​သွက်​လက်​လက်​ပင်​ဖြေလိုက်​သည်​။
ရဲရှောင် ခေါင်းညိတ်လိုက်ရင်း –
“ကောင်းကင်အခန်းကရော . . .”
ဝမ်ဇန်းဟိုသည် တအံ့တသြဖြင့် ရဲရှောင်အား ကြည့်လိုက်​သည်​။ ကောင်းကင်အခန်းနှင့် ပက်​သက်၍ ရဲရှောင်သိနေမည်ဟုသာ ထင်ထားခဲ့ခြင်း ဖြစ်သည်။ သို့သော် ယခုအခါတွင်​ရဲရှောင်မှ ဘာမှ မသိ​သေးသည့်​ဟန်​ဖြင့်​ပြောနေသည် မဟုတ်ပါ​လော။
ဝမ်​ဇန်းဟိုသည်​မျက်​မှောင်​ကြုတ်​လျက်​-
“ဆရာဖန်​မသိ​သေးဘူးလား . . .”
“ကျုပ်အထင်အရ​မော်တယ်ကမ္ဘာတစ်ခုလုံးမှာ ဒီကောင်းကင်အခန်းကို စာရင်းပေးမယ့်​လူဆိုလို့ တစ်ယောက်ပဲရှိတယ် . . .”
ရဲရှောင်၏ မျက်လုံးများ အရောင်ဝင်းလက်သွားပြီး –
“ကျုပ်သူ့ကို တွေ့ချင်တယ် . . .”
ဝမ်ဇန်းဟိုသည်​တုန်လှုပ်သွားသည့် အမူအယာ​ဖြင့် –
“ကျုပ် . . . ကျုပ်ကတော့ လန့်နေမိတယ်။ ဒါက သိပ်ကို အန္တရာယ်များလွန်းတယ်နော် . . .”
ရဲရှောင်လည်း တည်​ငြိမ်​သော မျက်​နှာထားဖြင့်​-
“အခုလက်ရှိ အခြေအနေကိုပဲ ကြည့်စမ်းပါဗျာ။ ကျုပ်တို့တွေ လက်ရှိအကြပ်​အတည်းကနေ လွတ်ချင်ရင် အဲဒီလူရဲ့ အရှိန်အဝါကို သုံးရမယ်။ ကျုပ်တို့ဘက်က အချိန်တစ်ခုရောက်လို့ အင်အားကြီးလာတဲ့ အချိန်ကျရင် ဘယ်သူ့ကိုမှ ဂရုစိုက်စရာ မလိုတော့ပါဘူး။ အခုကတော့ ဒီလိုပဲ လုပ်မှဖြစ်မယ် . . .”
“တွေ့ကြသေးတာပေါ့ ထိပ်သီးဂိုဏ်းကြီး ၂ခု ရာ။​လောကကြီးမှာ ဘယ်​အရာမှ အလကား မရဘူးဆိုတာကို ပြကြရ​သေးတာ​ပေါ့ . . .”
ရဲရှောင်၏ မျက်​လုံးများထဲတွင်​သတ်ဖြတ်လိုသည့်​အရိပ်အယောင်များ ဖြစ်ပေါ်လျက်​ရှိ​နေပါ​တော့သည်​။

Comment

Leave a Reply

Options

not work with dark mode
Reset