Chapter – 245
“အဆင့်တက်ခြင်း၏ အကျိုးသက်ရောက်မှု”
ရဲရှောင်တို့နှစ်ဦး မည်မျှအထိ ပြင်းပြင်းထန်ထန် တိုက်ခိုက်နေစေကာမူ အသက်အန္တရာယ် စိုးရိမ်ရမည့် အနေအထားသို့ ရောက်မည် မဟုတ်ချေ။
ပိုင်ရှင်းယွဲ့သည် လေ့ကျင့်မှု ပြုလုပ်ချင်နေသည့် ရဲရှောင်၏ ရည်ရွယ်ချက်အား သိသည့်အလျောက် တိုက်ခိုက်မှုတွင်ဝင်ရောက်စွက်ဖက်ခြင်း မရှိခဲ့ပေ။ အပြန်အလှန်တိုက်ခိုက်နေရင်းဖြင့်တပည့်ဖြစ်သူ ဝမ်ရမ်ချူးချူး၏ အခြေအနေသည်လည်း တိုးတက်နိုင်သည် မဟုတ်ပါလော။ ချင်းယန်နယ်ပယ်ရှိ ထိပ်သီးဂိုဏ်းများတွင်ယခုကဲ့သို့ ပညာဖလှယ်၍ လေ့ကျင့်မှုများ ပြုလုပ်ကြသည်မှာ ထုံးစံပင် ဖြစ်သည်။ ပညာဖလှယ်ခြင်းသည်တိုက်ခိုက်သူ နှစ်ဦးစလုံးအတွက် အကျိုးရှိသည့်အလုပ်ပင် မဟုတ်ပါလော။
ပိုင်ရှင်းယွဲ့၏ စိတ်ထဲတွင်ရဲရှောင်တစ်ယောက်ကိုယ့်ဒုက္ခကိုယ်ရှာသည့်အလုပ်မျိုး လုပ်လိမ့်မည်ဟု မထင်ထားခဲ့မိချေ။ ရဲရှောင်ထံသို့ စွမ်းအင်များ ထိမှန်သွားသည့်အချိန်တွင်ပိုင်ရှင်းယွဲ့ဘက်မှ တားဆီးရန်ကြိုးစားခဲ့သော်လည်း မမီခဲ့ပေ။
ရဲရှောင်သည် ရရှိထားသည့်အခွင့်အရေးအား လက်လွတ်မခံဘဲ အမိအရ ဖမ်းဆုပ်ယူနိုင်ခဲ့သည်။ မော်တယ်ကမ္ဘာတွင် ဝမ်ရမ်ချူးချူးကဲ့သို့ အဆင့်ရှိသည့် ပညာရှင်မျိုးနှင့် ပညာဖလှယ်နိုင်ခြင်းသည်ကြုံတောင့်ကြုံခဲ အခွင့်အရေးတစ်ခုပင် ဖြစ်သည်။ ကျင့်ကြံမှုအဆင့်နိမ့်သည့်လူများနှင့်လည်း မတိုက်ခိုက်ချင်သဖြင့် အခွင့်အရေးရတုန်း ရခိုက်ရဲရှောင်သည်မိမိကိုယ်ကို အဆင့်တက်အောင် လုပ်ခဲ့ခြင်း ဖြစ်သည်။
ထို့ကြောင့် ရဲရှောင်သည် စိတ်ပိုင်းဖြတ်လိုက်၍ သူထုတ်လွှတ်လိုက်သည့်စွမ်းအင်များကိုသာမက ဝမ်ရမ်ချူးချူးထံမှ သက်ရောက်လာသော စွမ်းအင်များကိုပါ စုပ်ယူခဲ့သည်။
ရဲရှောင်၏ လုပ်ရပ်သည်အလွန်အန္တရာယ်များသော လုပ်ရပ်တစ်ခုပင် ဖြစ်သည်။
[ပိုင်ရှင်းယွဲ့က အစွမ်းရှိတဲ့ လူတစ်ယောက်ဆိုတော့ ငါဘယ်လိုပဲလုပ်လုပ် သူ့ဘက်က အေးအေးဆေးဆေး တားဆီးနိုင်မှာ သေချာတယ်။ ဒါပေမယ့်ငါ့ကိုယ်ငါ လုပ်မယ်လို့တော့ သူလည်း ထင်ထားမှာ မဟုတ်ဘူး . . .]
ရဲရှောင်သည်စွမ်းအင်များ မစုပ်ယူခင်အချိန်တွင်အရာအားလုံးအား ခြုံငုံတွေးတော သုံးသပ်၍ ဆုံးဖြတ်ချက်ပြတ်သားစွာဖြင့်လုပ်ခဲ့ခြင်း ဖြစ်သည်။
ချန်ရှင်းမြို့တော်တွင် လေလံပွဲ နီးကပ်လာပြီ ဖြစ်သဖြင့် အင်အားစုအသီးသီး စုရုံးရောက်ရှိနေကြပြီး ဖြစ်သည်။ထိလွယ်ရှလွယ်သော ဂိုဏ်းကြီးများကြားတွင် ရဲရှောင်၏ အသက်သည် အချိန်မရွေး ပျောက်ကွယ်သွားနိုင်သည်။ ထို့ကြောင့် ယခုကဲ့သို့ အခွင့်အရေးရသည့်အချိန်တွင်အဆင့်တက်စေရန်ပြု လုပ်ထားမှသာ စိတ်ချရမည် ဖြစ်သည်။
တိုးတက်မှု မဆိုသလောက် ဖြစ်ခဲ့သည့်တိုင် ထိုမဆိုသလောက်လေးကပင် နောက်ရက်အနည်းငယ် အတွင်း ကြုံတွေ့နိုင်သည့် အန္တရာယ်များကြားမှ လွတ်မြောက်ရန်အထောက်အကူ ပြုပေလိမ့်မည်။ ကောင်းကင်အဆင့်သို့ ရောက်ရှိသွားပြီ ဖြစ်သဖြင့် ရဲရှောင်၏ ချီဓာတ်များသည်ယခင်ကထက်ပင်ပို၍ ပိုမိုသိပ်သည်း အားကောင်းသွားပြီ ဖြစ်သည်။
ထို့ကြောင့် ရဲရှောင်သည် အခွင့်အရေးအား လက်လွှတ်မခံခဲ့ခြင်း ဖြစ်သည်။ မိမိကိုယ်ကို အနာခံ၍ စွမ်းအင်များအား ရုပ်သိမ်း၍ ထိန်းချုပ်ဖိနှိပ်ထားခဲ့သည်။ ဖွင့်ထုတ်သင့်သည်အခြေအနေသို့ရောက်သောအခါမှ ရုတ်တရက်ဖွင့်ချလိုက်သောအခါ စွမ်းအင်များသည်အတားအဆီးမရှိ အရှိန်အဟုန်အပြည့်ဖြင့်ပေါက်ကွဲထွက်သွားခဲ့သည်။ စွမ်းအင်သိုလှောင်ရာအတွင်း တစ်ဆို့နေသော အရာများအား ဖယ်ရှား ရှင်းလင်းလိုက်သည့်အနေအထားပင်ဖြစ်သည်။ ထို့မျှသာမက ဝမ်ရမ်ချူးချူး၏ စွမ်းအင်သက်ရောက်မှုနှင့် ပေါင်းစပ်လိုက်သောအခါ လွတ်လွတ်ကျွတ်ကျွတ်ပင် အဆင့်တက်သွားခဲ့သည်။
များပြားလှသော စွမ်းအင်လှိုင်းများသည် စွမ်းအင်သိုလှောင်ရာအတွင်း ပေါက်ကွဲထွက်သွားပြီး သူ၏ ရည်ရွယ်ချက်လည်း ပြည့်ဝခဲ့ရသည်။
အများအမြင်တွင် ရဲရှောင်၏ လုပ်ရပ်သည် ကိုယ့်လည်ပင်းကိုယ်ကြိုးကွင်းစွပ်၍သေကြောင်း ကြံလိုက်သည်နှင့်ပင်တူနေပါသည်။ အကယ်၍ ရလဒ်သည်ရဲရှောင် မျှော်လင့်ထားသည့်အတိုင်း ဖြစ်မလာခဲ့ပါက သူ၏ စွမ်းအင်သိုလှောင်ရာနှင့် သွေးကြောများအားလုံး ပေါက်ကွဲထွက်သွားကာ ပျက်ဆီးသွားပေလိမ့်မည်။ ထို့အပြင် ခန္ဓာကိုယ် တစ်ခုလုံးသည်လည်း ရစရာမရှိအောင်စုတ်ပြတ်သွားမည်ဖြစ်သည်။
စွမ်းအင်များအား စုပ်ယူလိုက်သည့်အချိန်တွင်ရဲရှောင်၏ မျက်လုံးများ ပြာဝေသွားပြီး ကမ္ဘာကြီး ချာချာလည်သွားသကဲ့သို့ပင်ခံစားခဲ့ရသည်။
ထို့ပြင်နားထဲတွင်လည်း အသံမျိုးစုံ ဆူညံစွာ ကြားလိုက်ရသည်။ ကမ္ဘာပေါ်ရှိ သက်ရှိများအားလုံးသည်အဆင့်တက်နိုင်သွားသည့် သူ့အားအော်ဟစ်၍ ကောင်းချီး ဝိုင်းပေးနေကြသည့်အလားပင်။
ရဲရှောင်၏ စွမ်းအင်သိုလှောင်ရာ တစ်ခုလုံး မီးတောင်တစ်လုံး ပေါက်ကွဲထွက်သွားသကဲ့သို့ ခံစားခဲ့ရပြီး အဆုံးမရှိသည့် ဝိညာဉ်တော် ချီဓာတ်များ သွေးကြောများအတွင်း အဆက်မပြတ် စီးဆင်းသွားသည်ကိုလည်း ခံစားလိုက်ရသည်။ ဖော်ပြရခက်သော ခံစားမှုတစ်ခုပင် ဖြစ်သည်။
လက်ရှိတွင်လည်း ရဲရှောင်နှင့် ဝမ်ရမ်ချူးချူးတို့သည် ဆက်လက်၍ တိုက်ခိုက်နေကြသည်။
ရဲရှောင်သည် ကျယ်လောင်စွာ ရယ်မောလိုက်ရင်း ဝမ်ရမ်ချူးချူး၏ စွမ်းအင်များအား ချေဖျက်ပစ် နေသည်။
သူ၏ တိုက်ခိုက်မှုများသည် ယခင်ကနှင့် လားလားမျှ မတူတော့ချေ။ ယခင်တိုက်ပွဲတွင် ရဲရှောင်ဘက်မှ အရေးနိမ့်သည့်အခြေအနေ ဖြစ်ခဲ့ရသည်။ အချိန်တိုင်းလိုလိုပင်ဝမ်ရမ်ချူးချူး၏ တိုက်ကွက်များအား ခုခံကာကွယ်နေခဲ့ရသည်။ သို့သော် ယခုအခါတွင်မူ ရဲရှောင်ဘက်မှ ပြင်းပြင်းထန်ထန် တိုက်ခိုက်နိုင်လျက်ရှိသည်။ အသက်သေစေနိုင်သည့် တိုက်ခိုက်မှုများ မဟုတ်သည့်တိုင် အလွန်မြန်ဆန် အားပါလှသဖြင့် ခုခံရန် ခက်ခဲလှသည်။
ယခုမှပင် ဘက်ညီသည့်တိုက်ပွဲကောင်းတစ်ခု ကြည့်နေရသကဲ့သို့ ဖြစ်သွားခဲ့သည်။ တိုက်ခိုက်သည့်အချိန် ကြာလာသည်နှင့်အမျှ စွမ်းအင်သိုလှောင်ရာအတွင်း စွမ်းအင်များ ပို၍ မြန်ဆန်စွာ စီးဆင်းလာသည်ကိုလည်း ရဲရှောင် ခံစားလိုက်ရသည်။ သူ၏ စွမ်းအင်များသည် မည်သည့်အခါမျှ ကုန်ဆုံးခြင်း မရှိတော့သည့်အလားပင်။
တဖြည်းဖြည်းဖြင့် ရဲရှောင်၏ တိုက်ခိုက်မှုမှ ထွက်လာသော စွမ်းအင်အလင်းတန်းများသည်အရောင်ပြောင်းသွားခဲ့သည်။ မူလတွင်အဝါရောင် ထွက်နေရာမှ ယခုအခါ အပြာရောင်သို့ ပြောင်းလဲသွားခြင်း ဖြစ်သည်။ အပြာရောင်အလင်းများတန်းများသည်ရဲရှောင်အား လွှမ်းခြုံထားလျက်ရှိပြီး လှုပ်ရှားမှု ပြုလိုက်သည့်အခါတိုင်း လင်းလက်တောက်ပနေကြသည်မှာ မြင်ရသူအပေါင်းအဖို့ ရင်သပ်ရှုမောဖွယ်ပင်ဖြစ်သည်။ အပြာရောင်ကမ္ဘာတစ်ခု ဖန်တီးထားသည်နှင့်ပင်တူနေပါသေးသည်။
ရဲရှောင်၏ မျက်လုံးများသည် တည်ငြိမ်လျက်ရှိပြီး သူ၏ တိုက်ခိုက်မှုများသည်လည်း ပို၍ မြန်ဆန်တိကျ၍ ပြင်းထန်လာခဲ့သည်။ ပြာလဲ့လဲ့ အလင်းများအောက်တွင် ဖန်ဇီလင်၏ မျက်နှာသည် ပို၍ ဆွဲဆောင်မှု ရှိနေသယောင်ပင်။
ဝမ်ရမ်ချူးချူးသည် ယခုအကြိမ်တွင်ဖန်ဇီလင်အား စိတ်ရှိတိုင်း မတိုက်ခိုက်ဝံ့တော့ချေ။ ဖန်ဇီလင် သေလုမျောပါး အခြေအနေနှင့် ရင်ဆိုင်ခဲ့ရသည့်အခြေအနေအား မြင်တွေ့ခဲ့ရသည့်အတွက် ဆက်လက်၍ မတိုက်ခိုက်ချင်သော်လည်း ရဲရှောင်၏ တောင်းဆိုမှုကြောင့် စိတ်မပါလက်မပါဖြင့်တိုက်ခိုက်ပေး နေရသည်။
ဖန်ဇီလင်သည်မိမိအသက်ကိုပင်ပဓာနမထားဘဲ အဆင့်တက်စေရန်အတွက်အဘယ့်အတွက်ကြောင့်ကြိုးစားခဲ့သည်ဆိုသည်ကို ဝမ်ရမ်ချုးချုးတစ်ယောက်ယခုမှပင်သဘောပေါက်သွားခဲ့လေသည်။
အန္တရာယ်များသည့်တိုင် ယခုကဲ့သို့ စွမ်းအင်များ တိုးတက်လာခြင်းကြောင့် တန်သည်ဟုပင် ဆိုနိုင်ပေသည်။ ထိုကဲ့သို့ ခဲရာခဲဆစ် အဆင့်တက်ခဲ့ရပြီးနောက် ရဲရှောင်သည် တိုက်ခိုက်ချင်စိတ်များ တဖွားဖွား ဖြစ်ပေါ်ခဲ့သည်။ ကောင်းကင်အဆင့်သို့ ရောက်ခါစ သူ၏ အခြေအနေအား တည်ငြိမ်မှု ရရှိရန်ထိန်းချုပ်ချင်သည့်အတွက်ဝမ်ရမ်ချုးချုးနှင့်ထပ်မံ၍ တိုက်ခိုက်ချင်ရခြင်း ဖြစသည်။
ဖန်ဇီလင်သည် သေဘေးနှင့် နီးကပ်ခဲ့ရသည့်တိုင် အသက်ရှင်နိုင်ခဲ့သည်ကို တွေ့ရသဖြင့် ဝမ်ရမ်ချူးချူးတစ်ယောက်စိတ်သက်သာရာ ရသွားခဲ့သည်။ ထိုကဲ့သို့ တိုးတက်သွားသည့် အတွက်လည်း ပျော်ရွှင်သွားမိသည်။ သူမ၏ အကူအညီကြောင့် အဆင့်တက်သွားသည့်အတွက်ကျေနပ်မိလျက်ရှိသည်။ ထို့ကြောင့်စိတ်ကိုလျော့ချ၍ ဆက်လက်ကူညီပေးရန် တိုက်ခိုက်ပေးခဲ့ခြင်း ဖြစ်သည်။
[ရှင်က တော်တော် ကံကောင်းတာပဲ။ ဒီလိုဆိုမှတော့ ကျွန်မဘက်ကလည်း ဆက်ပြီး ကူညီပေးရ သေးတာပေါ့ . . .]
ဝမ်ရမ်ချုးချုးတစ်ယောက်တွေးလေကျေနပ်မိလေပင်ဖြစ်နေမိသည်။ ယခုအခါတွင်ချီတုံချတုံ ဖြစ်မနေတော့ပဲ ကောင်းစွာ ပြန်၍ တိုက်ခိုက်ပေးလိုက်သည်။
[ဒီလို အခြေအနေမျိုးမှာ အဆင့်တက်အောင် လုပ်နိုင်ခဲ့တာ တကယ်ချီးကျူးစရာပဲ။ ကောင်းကင် အဆင့်ကို ရောက်သွားတာဆိုတော့ အဆင့်တက်ခါစမှာ ကောင်းကောင်း ထိန်းချုပ်နိုင်ဖို့ လိုလိမ့်မယ်။ အဲဒါတွေ အားလုံးကို သူက ကြိုတင်တွက်ဆခဲ့တာပါလား . . .]
[တစ်ကမ္ဘာလုံးမှာ သူ့လိုပုံစံမျိုး အဆင့်တက်နိုင်တဲ့လူ ရှိပါ့မလားပဲ။ တိုက်ခိုက်ရင်းနဲ့ အဆင့်တက်အောင်လုပ်တယ်လို့ ငါတော့ တစ်ခါမှ မကြားဖူးခဲ့ဘူး . . .]
ဝမ်ရမ်ချူးချူးသည်တိုက်ခိုက်နေရင်းဖြင့်စဉ်းစားခန်း ဖွင့်နေမိသည်။ သူ၏ စိတ်ထဲတွင်ယခုအချိန်ထိအံ့သြနေမိတုန်းပင်ဖြစ်သည်။
ထိုအချိန်တွင် ဖန်ဇီလင်၏ တည်ငြိမ်သော မျက်နှာအား ကြည့်မိလိုက်ေသာအခါ ရင်ခုန်သွားမိသည့်အတွက်တိုက်ခိုက်မှုပြုနေသည့်အပေါ် သတိလက်လွတ်ဖြစ်သွားမိသည်။
ထိုအခိုက် ပိုင်ရှင်းယွဲ့မှ –
“ချုးချုး . . . သတိထား . . .”
ဝမ်ရမ်ချုးချုး၏ မျက်နှာအနီးသို့ လေတစ်ချက်ဟပ်သွားခဲ့သည်။ ဖန်ဇီလင်သည် လေထဲသို့ ခုန်တက်သွားခဲ့ပြီး သူ၏ ခန္ဓာကိုယ်အား လေထဲတွင် မွှေ့ယမ်းနေသဖြင့် ထိုကဲ့သို့ လေပြင်းများ တိုက်ခိုက်သွားရခြင်း ဖြစ်သည်။
တိုက်ကွက်မှာ အလွန်ထူးဆန်းလှသဖြင့် ဝမ်ရမ်ချူးချူးပင်တုန်လှုပ်သွားခဲ့မိသည်။ ရဲရှောင်သည် ဘယ်မှညာ အထက်မှအောက်သို့ ရွေ့လျားနေသည့်အတွက်ဝမ်ရမ်ချုးချူးတစ်ယောက်မည်သို့ပင် ရှောင်တိမ်းစေကာမူ လွတ်မြောက်နိုင်ရန်ခက်ခဲလှသည်။
ဝမ်ရမ်ချူးချူးသည်အသံစူးစူးတစ်ချက် အော်ဟစ်လိုက်ပြီး သူမ၏ ကိုယ်ခွဲ တစ်ဒါဇင်ခန့်အား ပေါ်ထွက်စေရန်ပြုလုပ်လိုက်သည်။ ထိုအချိန်တွင်အေးစက်သော လေပြင်းများပင်တိုက်ခတ်သွားခဲ့သည်။
လင်းရှောင်ရေခဲတိုက်ကွက် နောက်တစ်ကြိမ် ထပ်မံပေါ်လာပြီ ဖြစ်သည်။
ဝမ်ရမ်ချူးချူးသည် ရဲရှောင်၏ တိုက်ရည်ခိုက်ရည်အား ကြည့်ရင်း အံ့သြနေမိသည်။ သူ့အနေဖြင့်ကောင်းကင်အဆင့် ၆ ရှိနေသည့် ပညာရှင်တစ်ဦး ဖြစ်သည့်တိုင် အဆင့်တူများထက်ပင်သာလွန်သော အခြေအနေရှိသည်။ မော်တယ်ကမ္ဘာရှိ မည်သည့် ကောင်းကင်အဆင့် ၆ ပညာရှင်ကိုမဆိုကောင်းစွာ အနိုင်ယူနိုင်လေသည်။ မော်တယ်ကမ္ဘာ၏ ကောင်းကင်အဆင့် ပညာရှင်များ၏ စွမ်းအင်သည် ချင်းယန်နယ်ပယ်ရှိ ကောင်းကင်အဆင့် ပညာရှင်များ၏ စွမ်းအင်လောက် သန့်စင်မှု မရှိချေ။
ထိုအချက်သည် အလွန်သိသာသော ကွာခြားချက်ပင် ဖြစ်သည်။ ဝမ်ရမ်ချူးချူး၏ လင်းရှောင်ရေခဲ တိုက်ကွက်တွင် အလွန်သန့်စင်သော စွမ်းအင်များ ပါဝင်နေလေသည်။
ထို့ကြောင့် ဝမ်ရမ်ချုးချုးသည်သူ့ထက်အဆင့်မြင့်သည့်မော်တယ်ကမ္ဘာရှိ ကောင်းကင်ပညာရှင်များကိုပင် စာရင်းထဲ ထည့်မတွက်ချေ။
ဝမ်ရမ်ချူးချူး၏ လင်းရှောင်ရေခဲကျင့်စဉ် ထွက်ပေါ်လာသည့်တိုင် ရဲရှောင်သည် မတုန်မလှုပ်ဟန်ဖြင့် ရှိနေတုန်းပင် ဖြစ်ပါတော့သည်။