Chapter – 244
“မယုံနိုင်ဖွယ် အဆင့်တက်ခြင်း”
ဖန်ဇီလင်၏ ခန္ဓာကိုယ်အား လှည့်ပတ်နေသော ချီဓာတ်များသည်တောက်ပသည်ထက်တောက်ပလာကြပြီး အမှုန်လေးများသဖွယ်ပင်ဖြစ်တည်လာကြသည်။ ထို့နောက်ထိုအမှုန်လေးများသည်လျင်မြန်စွာဖြင့်ပင်ပျောက်ကွယ်သွားကြသည်။ ထိုမှတဖန်ခရမ်းရောင် အလင်းတန်းများ ထွက်ပေါ်လာပြန်သည်။
အလင်းတန်းများသည်တောက်ပလွန်းသဖြင့် မျက်စိဖြင့်သေချာစူးစိုက်ကြည့်ရန်ပင် ခက်ခဲလှသည်။
ခဏအကြာတွင် ပင်လယ်ပြင်ကြီး၏ အရောင်ကဲ့သို့ အပြာရင့်ရင့်အလင်းတန်းများသည်ထပ်မံ၍ ထွက်လာပြန်သည်။
အဆိုပါ အလင်းတန်းများသည် ပတ်ဝန်းကျင်တစ်ခုလုံးအား လွှမ်းခြုံထားလျက် ရှိသည်။
အလင်းတန်းများ ထွက်လာပြီးသည့်နောက်တွင်ရဲရှောင်၏ ပါးစပ်မှ ခရမ်းရောင်နှင့် ရွှေရောင်စပ်ထားသည့်အရောင်အဆင်းရှိသည့်သွေးများ အန်ထွက်လာသည်။
ထိုကဲ့သို့ အန်ထွက်သွားပြီးနောက် ရဲရှောင်တစ်ယောက်ချက်ချင်းပင် သက်သာသွားသည့်ပုံစံ ပေါက်သွားလေသည်။
ဝမ်ရမ်ချူးချူးတို့ ဆရာတပည့် နှစ်ဦးသည် ရဲရှောင်အား အံ့ဩမှင်သက်စွာဖြင့်ငေးကြည့်နေမိကြသည်။
ယခုကဲ့သို့ အဖြစ်အပျက်မျိုး ဖြစ်လာခဲ့ခြင်းအတွက်ပိုင်ရှင်းယွဲ့တို့နှစ်ဦးသည်ကိုယ့်မျက်စိကိုယ်ပင်မယုံကြည်နိုင်အောင်ဖြစ်နေကြသည်။
တိုက်ရင်းခိုက်ရင်းဖြင့် အဆင့်တက်သွားစေရန်ပြုလုပ်ခြင်းသည်အလွန်ခက်ခဲသော ကိစ္စတစ်ခုပင်ဖြစ်သည်။
ရဲရှောင်သည် ယခုအခါတွင်မူ မြေကြီးအဆင့်နှင့် ကောင်းကင်အဆင့်ကြားတွင်ရှိသော အတားအဆီးအားကျော်ဖြတ်၍ ကောင်းကင်အဆင့်သို့ ရောက်ရှိသွားခဲ့ပြီ ဖြစ်သည်။
အဆင့်တက်ခြင်းသည်ကျင့်ကြံမှု ပြုလုပ်သူတိုင်း၏ အရေးကြီးဆုံး အခိုက်အတန့်ပင် ဖြစ်သည်။
ကောင်းကင်အဆင့်သို့ တက်လှမ်းနိုင်ခြင်းသည် ထိပ်တန်းကျင့်ကြံမှု နယ်ပယ်၏ ခရီးအစသို့ ခြေချမိလိုက်ခြင်းပင်ဖြစ်သည်။
ရဲရှောင်အဖို့ကောင်းကင်အဆင့်သို့ရောက်ရှိသွားခဲ့သော်လည်း သူ၏ ကျင့်ကြံမှုခရီးစဉ်သည်ယခုမှပင်အစပြုသည်ဟု ဆိုရပေမည်။ယခင်ဘဝထက် ပိုမိုသာလွန်သော အခြေအနေရရှိရန်ကျင့်ကြံမည်ဟုလည်း စိတ်ပိုင်းဖြတ်ထားပြီး ဖြစ်သည်။
ပတ်ဝန်းကျင်တစ်ခုလုံးအား လွှမ်းခြုံထားသော အပြာရောင်အလင်းတန်းများသည်တခဏမျှ တောက်ပနေပြီးနောက် ချက်ချင်းပင် ပြန်လည်ေပျာက်ကွယ်သွားသည်။ ရဲရှောင်လည်း သူ၏ ပါးစပ်မှသွေးများအား သုတ်လိုက်ရင်း ထခုန်မတတ်ပင်ပျော်ရွှင်မြူးတူးလျက်ရှိသည်။ ထို့နောက်သူ့အား အံ့သြတကြီး ရပ်ကြည့်နေကြသည့် ဝမ်ရမ်ချုးချူးတို့၏ အနားသို့ပြေးသွားကာ –
“ဝမ်ရမ်ချူးချူး . . . ငါ့ကို အဆင့်တက်အောင် ကူညီပေးလို့ ကျေးဇူးတင်ပါတယ် . . .”
ဝမ်ရမ်ချူးချူးသည်ရဲရှောင်အား မျက်လုံးအပြူးသားဖြင့် ကြည့်နေပြီး တုန်ယင်သော အသံဖြင့် –
“ရှင် . . . ရှင်က အဆင့်တက်သွားတယ်ပေါ့ . . .”
ရဲရှောင် သူ၏ သွားများပင်ပေါ်အောင်ပြုံးလိုက်ရင်း –
“ဒါပေါ့။ ငါကောင်းကင်အဆင့် ရောက်သွားပြီဆိုတာကို မင်းမခံစားမိဘူးလား။ လာစမ်းပါ၊ နောက်တစ်ပွဲလောက် တိုက်ကြရအောင် . . .”
ပိုင်ရှင်ယွဲ့သည်ယခုအခါမှသာ စိတ်သက်သာရာ ရသွားပြီး ပြုံးလိုက်မိသည်။
ကျင့်ကြံမှုအရာတွင် အတွေ့အကြုံ ကြွယ်ဝသူတစ်ဦးပီပီ ပိုင်ရှင်းယွဲ့သည်ဖန်ဇီလင်အနေဖြင့်အဘယ်ကြောင့် ယခုကဲ့သို့ ပြုလုပ်လိုက်သည် ဆိုသည်ကို နားလည်သဘောပေါက်လိုက်သည်။ ပိုင်ရှင်း ယွဲ့သည်ဖန်ဇီလင်အား အထင်သေးခဲ့မိသည်။ အစပိုင်းတွင်ဝမ်ရမ်ချူးချူးနှင့်တိုက်ခိုက်ခဲ့ခြင်းသည်လေ့ကျင့်မှု ပြုရုံအတွက်သာ ထင်ခဲ့မိသည်။နောက်ပိုင်းတွင်မူ ရဲရှောင်သည်ဝမ်ရမ်ချုးချုးဘက်မှ အစွမ်း ကုန်တိုက်ခိုက်လာစေရန်အတွက်မခံချင်အောင်အောင်ပြောဆိုရင်းဖြင့်အဆုံးသတ်တွင်အဆင့်တက်သွားစေရန်ပြုလုပ်ခဲ့သည်။ ရဲရှောင်သည်အရာရာတိုင်းအား သူ့စိတ်တိုင်းကျ လိုသလို ကြိုးဆွဲသွားခြင်းပင်ဖြစ်သည်။
ရဲရှောင်သည် သူ၏ စွမ်းအင်များအား စွမ်းအင်သိုလှောင်ရာ အတွင်း၌ ဖိနှိပ်သထက် ဖိနှိပ်ထားခဲ့ပြီး ခုခံနေရုံသာ ခုခံခဲ့သည်။ အမှန်တကယ်တွင်မူ ရဲရှောင်ဘက်မှ အခွင့်အရေးရရန် စောင့်ဆိုင်းေနခြင်းပင် ဖြစ်သည်။
အခွင့်အရေး အမိအရ ရသည့်အခါ ထိုစွမ်းအင်များအား ပေါက်ကွဲထွက်စေ၍ အဆင့်တက်ရန် ကြိုးစားခဲ့သည်။
ရဲရှောင်တစ်ယောက်အဆင့်တက်ရန်လုပ်နေမှန်း သိသည့်တိုင် သူ၏ အသက်အား စတေးရလောက်သည်အထိ စွန့်စားဝံ့လောက်မည်မဟုတ်ဟု ပိုင်ရှင်းယွဲ့ထင်ခဲ့မိသည်။
ရဲရှောင်၏ လုပ်ရပ်သည်လွန်စွာ အန္တရာယ်များသော လုပ်ရပ်ပင် ဖြစ်သည်။
အဖြစ်အပျက် အလုံးစုံအား ခြုံငုံသုံးသပ်လိုက်မိသည့်တိုင် ပိုင်ရှင်းယွဲ့သည်စိတ်လှုပ်ရှားမှုကြောင့်ရင်ခုန်သံ မြန်နေဆဲပင်ြဖစ်သည်။ ထိတ်လန့်စိတ်လည်း မပြေသေးချေ။
တစ်စုံတစ်ခု မှားယွင်းခဲ့မည် ဆိုပါက မတွေးဝံ့စရာပင် မဟုတ်ပါလော။
[ဘယ်လိုများ လုပ်နိုင်ရတာလဲ၊ စွန့်စားလွန်းရာ မကျဘူးလား။ တစ်ခုခုသာ မှားယွင်းသွားရင် သူ့အသက်တင် မဟုတ်ဘူး ဝိညာဉ်တော်ပါ ပျက်ဆီးသွားမယ် ဆိုတာ သူ မသိတာလား။ သူ့လိုလူမျိုးကတော့ စကြဝဠာ တစ်ခုလုံးမှာ တစ်ယောက်ပဲရှိမယ် ထင်တယ် . . .]
[သူ့အတွက် အဆင့်တက်ဖို့ ရာခိုင်နှုန်းက မရှိသလောက်ကို နည်းတယ်။ တစ်ခုခုဖြစ်လို့ ကယ်မယ် ဆိုရင်တောင် ငါကယ်ပေးနိုင်မှာ မဟုတ်ဘူး . . .]
[လောကမှာ တစ်ဆင့်ပြီး တစ်ဆင့်တက်လှမ်းသွားတဲ့ ပညာရှင်ကြီးတွေ အများကြီးရှိတယ်။ ငါ့ဘဝတစ်လျှောက်လုံး ဒီလိုမျိုး ကိုယ့်အသက်ကိုယ် စတေးပြီး အဆင့်တက်အောင်လုပ်တာ မြင်ဖူးဖို့ မပြောနဲ့ ကြားတောင် မကြားဖူးဘူး။ ဖန်ဇီလင်က ကိုယ့်အသက်ကို တန်ဖိုးမထားဘဲ ကစားနေသလိုပဲ . . .]
အဆင့်တက်သွားသော ဖန်ဇီလင်အား မျက်မြင်ကိုယ်တွေ့ တွေ့လိုက်ရသည့်တိုင် ပိုင်ရှင်းယွဲ့သည်ထိုကဲ့သို့ လုပ်ရဲရသည့် အကြောင်းရင်းအားတွေးလေတွေးလေ နားမလည်နိုင်အောင်ပင် ဖြစ်ေနမိသည်။
သူ၏ အမြင်တွင် ဖန်ဇီလင်သည် ပါးနပ်လိမ္မာသောလူ၊ ထူးခြားသော ဆေးပညာရှင်တစ်ယောက်သာ ဖြစ်သည်။ ထိုကဲ့သို့ ရိုးသားအေးဆေးသည့်လူတစ်ယောက်သည်ယခုကဲ့သို့ အသက်စွန့်ဝံ့သည့် ကိစ္စမျိုး မလုပ်နိုင်ဟုသာ မှတ်ယူမိခဲ့သည်။
ပိုင်ရှင်းယွဲ့ တွေးနေစဉ်မှာပင် တိုက်ခိုက်သံများအား ကြားလိုက်ရပြန်သည်။ ဖန်ဇီလင် နှင့်ဝမ်ရမ်ချူးချူးတို့ ထပ်မံ၍ တိုက်ခိုက်နေကြခြင်း ဖြစ်သည်။
ယခုအကြိမ်တွင်မူ ဖန်ဇီလင်သည်စွမ်းအင်များ ပို၍ ပြည့်ဝနေသည့်ပုံပင်။
ဝမ်ရမ်ချူးချူးသည်ကျင့်ကြံမှုအရာတွင် သာလွန်နေသည့်တိုင် ယခုအခါတွင်မူ အရေးနိမ့်လျက် ရှိသည်။ သူမဘက်မှ ရဲရှောင်အား ပြင်းပြင်းထန်ထန်လည်း မတိုက်ခိုက်ရဲတော့ချေ။ ထို့ပြင်လင်းရှောင်ရေခဲတိုက်ကွက်လည်း ထုတ်မသုံးဝံ့တော့သဖြင့်ဝမ်ရမ်ချုးချုးတစ်ယောက်ရှေ့မတိုးသာ နောက်မဆုတ်သာ အခြေအနေဖြင့်ရင်ဆိုင်နေရသည်။
တိုက်ခိုက်နေရင်းဖြင့်ဝမ်ရမ်ချူးချုး၏ စိတ်ထဲတွင်ရှုပ်ထွေးလျက် ရှိသည်။
ပိုင်ရှင်းယွဲ့သည်တပည့်ဖြစ်သူအား ကြည့်ရင်းခေါင်းတယမ်းယမ်းဖြင့်-
[ဒီလိုသာဆို ချူးချူးတော့ ရှုံးမှာပဲ . . .]
ကနဦးတွင် ရဲရှောင်သည်ဝမ်ရမ်ချူးချူးနှင့် တိ်ုက်ခိုက်ချင်သည့်အကြောင်းအရင်းမှာ သူ၏ စွမ်းအင် အတိမ်အနက်အား စမ်းသပ်ကြည့်ချင်လို၍ ဖြစ်သည်။ တိုက်ခိုက်ရင်းဖြင့်အဆင့်တက်နိုင် မတက်နိုင်ဆိုသည်ကိုမူ ရဲရှောင်ကိုယ်တိုင်လည်းအသေအချာ မသိခဲ့ပေ။
ထို့ကြောင့် ဝမ်ရမ်ချူးချူးဘက်မှ အစွမ်းကုန်တိုက်ခိုက်လာစေရန်အတွက်ဒေါသများ ဆွပေးခဲ့သည်။
ရဲရှောင်သည် သူ၏ စွမ်းအင်များအား အပြည့်အဝ အသုံးပြုချင်သည့်တိုင် ပိုင်ရှင်းယွဲ့အား သတိထားနေရပါသေးသည်။ ထို့ကြောင့် တိုက်ခိုက်ချင်တိုင်း တိုက်ခိုက်၍ မရဘဲ ချိန်ဆ၍သာ တိုက်ခိုက်နေခဲ့ရသည်။
ရဲရှောင်သည်ဝမ်ရမ်ချူးချူးအား အနိုင်ရရန် ယုံကြည်ချက် ရှိသည့်တိုင် ပိုင်ရှင်းယွဲ့ကိုမူ မည်သို့မျှ အနိုင်တိုက်နိုင်လိမ့်မည် မဟုတ်ချေ။ သေချာပေါက်ပင် ရှုံးနိမ့်ရပေလိမ့်မည်။ ရဲရှောင်အနေဖြင့်ကောင်းကင်အဆင့်၏ ထိပ်ဆုံးအဆင့်သို့ ရောက်နေသည့်တိုင် ပိုင်ရှင်းယွဲ့အား အနည်းငယ်မျှ ထိခိုက်အောင်ပင် လုပ်နိုင်ဦးမည် မဟုတ်သေးပေ။
ထို့ကြောင့် ဝမ်ရမ်ချူးချူးအား စိတ်ရှိတိုင်း မတိုက်ခိုက်ခဲ့ဘဲလေ့ကျင့်နေသည့်သဘောမျိုးဖြင့်သာ တိုက်ခိုက်ခဲ့သည်။
ရဲရှောင်တို့ နှစ်ဦးသည်တိုက်ခိုက်ရင်းဖြင့် ပိုင်ရှင်းယွဲ့၏ အနားသို့ ရောက်သွားခဲ့ကြသည်။
ပိုင်ရှင်းယွဲ့၏ မျက်နှာတွင်ရန်လိုသော အရိပ်အယောင်မျိုး ရှိမနေသည်ကို တွေ့လိုက်ရသည်။ နှစ်ဦးစလုံး၏ တိုက်ခိုက်မှုများ မပြင်းထန်သေးသ၍ ပိုင်ရှင်းယွဲ့ဘက်မှလည်း ဝင်ပါဦးမည်မဟုတ်ပေ။
ထို့ကြောင့် ရဲရှောင်သည်ဝမ်ရမ်ချူးချူး၏ ဒေါသများ ထွက်သည်ထက် ထွက်လာစေရန်ပြောဆိုနေခဲ့ပြီး တိုက်ခိုက်မှုများ ပြင်းထန်လာစေရန်လည်း ပြုလုပ်ခဲ့သည်။ ပထမအဆင့်အနေဖြင့်ဝမ်ရမ်ချုးချုးအားဒေါသထွက်စေရန်ပြုလုပ်ခဲ့ပြီးသည့်နောက်ဒုတိယအဆင့်အနေဖြင့်ရဲရှောင်သည်တိုက်ခိုက်မှုများ ခုခံရင်းဖြင့်သူ၏ စွမ်းအင်များအား ဖိနှိပ်နေခဲ့သည်။
စွမ်းအင်များအားတစ်ခါ ဖိနှိပ်လိုက်သည့်အခါတိုင်း ရှေးဦးခရမ်းရောင်ချီဓာတ် အနည်းငယ်ကိုပါ ဖိနှိပ်လိုက်မိသည်ကိုလည်း ခံစားလိုက်ရသည်။ ထိုခရမ်းရောင်ချီဓာတ်များ ပမာဏတစ်ခုသို့ ရောက်ရှိလာပါက ဖွင့်ချလိုက်မည်ဟု ကြံရွယ်ထားခဲ့သည်။
ပိုင်ရှင်းယွဲ့သည်ဝမ်ရမ်ချူးချူးအား အနည်းငယ်မျှ ထိခိုက်ခံလိမ့်မည်မဟုတ်ကြောင်း ရဲရှောင်အတပ်သိလေသည်။
ဝမ်ရမ်ချူးချူးသည်ဒေါသထွက်လွန်းသဖြင့် သူ့အား သေအောင်ပင် ရိုက်ပစ်ချင်နေ၍ ပိုင်ရှင်းယွဲ့မှာမူ အခြေအနေအရပ်ရပ်အား စောင့်ကြည့်နေသည်ဟုလည်း ရဲရှောင် ခံစားနေမိသည်။ တိုက်ခိုက်မှုတွင်အန္တရာယ်များသည့် အခြေအနေတစ်ခုခု ဖြစ်လာမည် ဆိုပါက ပိုင်ရှင်းယွဲ့ဘက်မှသေချာပေါက်ပင်ဝင်ရောက်တားဆီးပေလိမ့်မည်။
ရဲရှောင်သည် အတွေ့အကြုံ ရင့်ကျက်သူတစ်ဦးပီပီ ပိုင်ရှင်းယွဲ့မှ ဝင်ရောက် ဟန့်တားလာမည့် အခြေအနေအား ကြိုတင်၍ ရိပ်စားနေမိသည်။ သူမှဖြစ်စေ ဝမ်ရမ်ချူးချူးမှဖြစ်စေ သေစေနိုင်လောက်သော တိုက်ကွက်မျိုး ထုတ်လိုက်မည် ဆိုပါက ချက်ချင်းပင် တားဆီးမည်မှာ အသေအချာပင်ဖြစ်ပါတော့သည်။