Chapter – 239
“အံ့ဘွယ်လက်ဆောင်”
မြေကြီးအဆင့်၏ နောက်ဆုံးအဆင့်နှင့် ကောင်းကင်အဆင့်သည် နီးကပ်နေပြီ ဖြစ်သော်လည်း ကွာခြားမှုမှာမူ ကြီးမားလှသည်။ ကောင်းကင်အဆင့်သို့ ရောက်ရှိသွားပါက ရဲရှောင်အဖို့ သူ၏ ကျင့်ကြံမှု ခရီးစဉ်အစသို့ ရောက်ပြီဟု ဆိုရပေမည်။
သို့သော် မော်တယ်ကမ္ဘာတွင် ကောင်းကင်အဆင့် သည် လူတိုင်းအတွက် အိပ်မက် တစ်ခုကဲ့သို့ပင်ဖြစ်သည်။
ကောင်းကင်အဆင့်သည်သာမန်လူများအဖို့ အလွန်ကြီးကျယ်ခမ်းနားသော အဆင့်တစ်ခုဖြစ်သော်လည်း ရဲရှောင်အတွက်မူ ကျင့်ကြံမှုခရီးစဉ်၏ အစမျှသာ ရှိသေးပေသည်။ ထိုထက်မက မြင့်မားသော အဆင့်များ တက်လှမ်းနိုင်ရန်ကြိုးစားရပေဦးမည်ဖြစ်သည်။
အဆင့်တက်တော့မည့်အတွက် ရဲရှောင် အကျေနပ်ကြီးကျေနပ်နေမိသည်။ ကျင့်ကြံမှုများ ပြုလုပ်နေရင်းဖြင့်တစ်ခါတစ်ရံတွင်ပိုင်အာထံသို့ သွားရောက်၍ ကြည့်ရှုပေးနေရသည်။ သူစိမ်းမိန်းကလေးတစ်ယောက်ပင်ဖြစ်လင့်ကစားနေ့စဉ်ပြုစုစောင့်ရှောက်ပေးနေရသည့်အတွက်ရဲရှောင်အဖို့ နေသားကျလာကာ ခက်ခဲမှု မရှိတော့ချေ။ ပိုင်အာ၏ ဖြူစင်သော မျက်ဝန်းများအား မြင်တိုင်း သူ၏ ပခုံးထက်တွင်အလွန်လေးလံသော ဝန်ထုပ်ဝန်ပိုးကြီးတစ်ခုရောက်လာသကဲ့သို့ ရဲရှောင်ခံစားနေရသည်။
သံယောဇဉ်နှင့် မေတ္တာတရားများကြောင့် နွေးထွေးရသကဲ့သို့ ရှေ့ရှေးနှင့် ပတ်သက်၍ ရင်ပူနေရပြန်သည်။
ကျင့်ကြံမှုများ ပြုလုပ်ရင်းဖြင့်သူ၏ ချီဓာတ်များ တိုးတက်လာသည်ကို ရဲရှောင်ခံစားနေရသည်။ သူ့ထံသို့ ပိုင်အာ ရောက်လာသည့် အချိန်မှစ၍ ပို၍ ပင်ပန်းခဲ့သော်လည်း ပင်ပန်းသည်ဟု မခံစားခဲ့ရပေ။ ယခင်ရှောင်ဧကရာဇ်ကဲ့သုိ့ အထီးကျန်ဘဝမျိုးနှင့်စာလျှင် ယခုဘဝသည် သူ့အတွက် နွေးထွေးမှုများဖြင့် ပြည့်နှက်နေသကဲ့သို့ ခံစားနေရသည်။
“ဘဝဆိုတာ ဒါလား . . . တာဝန်ယူမှု၊ တာဝန်ခံမှု၊ စောင့်ရှောက်မှုတွေနဲ့ အဓိပ္ပါယ်အပြည့်ပါပဲလား။ ငါ့အတွက် ပိုပြီး အတွေ့အကြုံတွေ ပြည့်ဝစေတယ်။ ဘာပဲပြောပြော . . . အနည်းဆုံးတော့ ငါ အထီးမကျန်ရတော့ဘူးပေါ့လေ . . .”
ရဲရှောင် လက်ရှိဘဝအားတွေးတော သုံးသပ်နေမိသည်။
“ကျင့်ကြံမှုတွေချည်းလုပ်ပြီး ငါ အင်အား ကြီးသထက် ကြီးလာမယ်။ ငါသတ်ချင်တဲ့ ဘယ်သူ့ကိုမဆို သတ်နိုင်လောက်တဲ့အထိ အစွမ်းထက်လာမယ်၊ ငါ့ရဲ့ ကျင့်ကြံမှု အဆင့်ကလည်း မြင့်သထက် မြင့်လာရင်တောင်မှ အထီးကျန်နေရင် ဘာများ ပျော်ရွှင်စရာ ရှိတော့မှာလဲ . . .”
“တကယ်တော့ ကျင့်ကြံမှု နဲ့ ချစ်ခြင်းမေတ္တာဆိုတာ လမ်းကြောင်း တစ်ခုတည်းပဲ။ ငါ့ဘဝမှာ ဒါတွေနဲ့ တွေ့ကြုံရလေလေ ပိုပြီး ပြည့်စုံလေလေပဲ။ ငါသေတဲ့အချိန်မှာတောင် အထီးကျန်ဆန်ဆန် မသေသွားရဖို့က အရေးကြီးတယ် . . .”
ထိုအကြောင်းအရာများ အားလုံးသည် မကြာသေးမီ အချိန်ကမှ ရဲရှောင်နားလည်ခဲ့သော အရာများ ဖြစ်သည်။သူ၏ အတွေးအခေါ်အသစ်များ ဆိုလျှင်လည်း မမှားချေ။
နောက်ရက်အနည်းငယ်တွင် ရဲရှောင်သည် ပိုင်အာ၏ သွေးကြောများအား စစ်ဆေး ကုသ၍ သွေးအတွင်းရှိ အညစ်အကြေးများအား ဖယ်ထုတ်ပေးလိုက်သည်။ ထိုအခါ အံ့သြစရာကောင်းသော အရာတစ်ခုအား ရဲရှောင်တွေ့လိုက်ရသည်။ ပိုင်အာ၏ သွေးကြောများသည် ရှုပ်ထွေးပိတ်ဆို့နေခြင်း မရှိဘဲ ရှင်းလင်းနေကြောင်း တွေ့လိုက်ရခြင်းပင် ဖြစ်သည်။
ချီဓာတ်များ ရှိမနေသော်လည်း သူမ၏ ခန္ဓာကိုယ်သည် ကျင့်ကြံမှုများ ပြုလုပ်ရန် အထူးသင့်တော် ကောင်းမွန်လှကြောင်း ရဲရှောင် တွေ့လိုက်ရသည်။
အံ့သြစရာကောင်းသော ခန္ဓာကိုယ်အား ပိုင်ဆိုင်ထားခြင်းပင် ဖြစ်သည်။
ပိုင်အာအနေဖြင့်မည်သည့် ကျင့်ကြံမှုမျိုးကိုမဆို ကျင့်ကြံပါက လျင်မြန်စွာ တိုးတက်နိုင်ပေလိမ့်မည်။
ထိုကဲ့သို့သော ခန္ဓာကိုယ် ပိုင်ရှင်မျိုးအား ရဲရှောင် တစ်ခါမျှ မမြင်တွေ့ခဲ့ဖူးချေ။
ဥပမာအားဖြင့် စုယဲ့ယွဲ့သည် ဖီးနစ်ခန္ဓာကိုယ် မပိုင်ဆိုင်ခင် အချိန်ကပင် ထူးခြားသော မိန်းကလေး တစ်ဦး ဖြစ်ခဲ့သည်။ သင်ကြားပြသပေးမည့် ဆရာမရှိဘဲ မော်တယ်အဆင့် ၇ သို့ ရောက်ရှိခဲ့သည်။ ထိုကဲ့သို့ ကျင့်ကြံနိုင်မှုသည် အလွန်ရှားပါးလှသည်။ ချင်းယန်နယ်ပယ်မှာပင် ထိုကဲ့သို့သော ပါရမီရှင်မျိုး အလွန်ရှားသည်ဟု ဆိုရပေမည်။ စုယဲ့ယွဲ့ကဲ့သို့ တပည့်မျိုးအား ချင်းယန်နယ်ပယ်ရှိ ထင်ရှားကျော်ကြားသော ဂိုဏ်းများမှ အသည်းအသန် လိုချင်နေကြမည်မှာ သေချာပေါက်ပင်ဖြစ်သည်။ ယခင်ဘဝ ရဲရှောင်ပင်လျှင်ယဲ့ယွဲ့လောက် ကျင့်ကြံမှုအား မကောင်းသည်ကို ဝန်ခံရပေလိမ့်မည်။
သို့သော် ယခု ရဲရှောင်၏ရှေ့တွင်ရှိနေသော ပိုင်အာမှာမူ စုယဲ့ယွဲ့ထက်ပင် ပင်ကိုယ်ပါရမီ ထူးကဲ ကောင်းမွန်သူ ဖြစ်နေလေသည်။ ခန္ဓာကိုယ် လိုအပ်ချက်လည်း ပိုမိုပြည့်စုံပြီး ဘုရားပေးသော လက်ဆောင်ဟုပင် ဆိုနိုင်ပေသည်။ သာမန်လူတစ်ဦး တစ်နှစ်ခန့် ကျင့်ကြံရမည်ဆိုလျှင်ပိုင်အာအနေဖြင့်တစ်ရက်တည်းဖြင့် ကျင့်ကြံနိုင်ပေလိမ့်မည်။ ထိုထက်ပင် ပို၍ မြန်နိုင်ဦးမည် ဖြစ်သည်။
ထို့ကြောင့် ရဲရှောင် အံ့သြနေမိခြင်း ဖြစ်သည်။
ရဲရှောင်အဖို့ အလုပ်တစ်ခု ပိုလာခဲ့သည်။ ပိုင်အာအား စာဖတ်တတ်စေရန် သင်ကြားပေးခြင်းပင် ဖြစ်၏။ အစပိုင်းတွင် ရဲရှောင်သည် စာလုံး ၁၀ လုံးသာ သင်ကြားပေးခဲ့သည်။ သို့သော် ပိုင်အာအပေါ် အထင်သေးသွားမိမှန်း သိပ်မကြာခင်အချိန်တွင်ရဲရှောင် သိလိုက်ရလေသည်။
ပိုင်အာသည် မှတ်ဉာဏ်များ ပျောက်ဆုံးနေသည့်တိုင် အလွန်ထူးခြားသော မှတ်သားနိုင်စွမ်း ရှိသည်။ တစ်ခေါက် မြင်ရုံဖြင့်ပင် သူ မြင်ခဲ့သည့် အရာအားလုံး မှတ်မိနေခြင်းပင်ဖြစ်သည်။
ရဲရှောင်သည် ပို၍ ပျော်ရွှင်ကျေနပ် သွားမိသည်။ တဖြည်းဖြည်း တိုး၍ သင်ပေးသွားရာ ရက်အနည်းငယ် အတွင်းမှာပင် အခြေအနေသည်များစွာ တိုးတက်လာခဲ့သည်။ တစ်ရက်တည်းဖြင့် စာလုံး ၃၀၀ခန့်ထိ တိုး၍ သင်နိုင်ခဲ့သည်။
ရဲရှောင်အဖို့ တစ်ခါမျှ မမြင်တွေ့ဖူးသော တိုးတက်မှုနှုန်းပင် ဖြစ်သည်။
ထို့ကြောင့်ရက်အနည်းငယ်အတွင်းတွင်ပိုင်အာသည် အသုံးများသော စာလုံးမှန်သမျှအား တတ်ကျွမ်း သွားခဲ့ပြီး ဖြစ်သည်။ ဖြစ်နိုင်သည့် အချက်တစ်ချက်မှာ ပိုင်အာသည် မှတ်ဉာဏ်ပျောက်ဆုံးနေသည့်တိုင် ယခင်က သင်ကြားခဲ့ဖူးသည်များအား ပြန်လည် အမှတ်ရလာခြင်းပင်ဖြစ်နိုင်ပေသည်။ သူမ၏ စိတ်ထဲတွင် စွဲမြဲနေပြီးသော အရာများဖြစ်နေ၍ ပို၍ မြန်ဆန်နေခြင်းလည်း ဖြစ်နိုင်သည်။
မည်သို့ပင် ဆိုစေကာမူ ပိုင်အာသည် စာကောင်းကောင်း ဖတ်တတ်သွားခဲ့ပြီ ဖြစ်သည်။
ရဲရှောင်လည်း စိတ်ကျေနပ်မှု အပြည့်ရရှိနေခဲ့သည်။ နေ့စဉ်သုံး စကားလုံးများအား သင်ကြား ပေးနေရာမှ ကျင့်စဉ်များ၊ သွေးကြောများနှင့် သက်ဆိုင်သည့် စကားလုံးများအား စတင်၍ သင်ကြားပေးခဲ့ပြန်သည်။ ပိုင်အာသည် အံ့သြဖွယ် ကောင်းလောက်အောင်ပင်မှတ်ဉာဏ် ကောင်းလှသဖြင့် ရဲရှောင်သင်သမျှအား လွယ်လွယ်ကူကူဖြင့်တတ်မြောက်ခဲ့သည်။ ထို့အပြင် အကြောင်းအရာအချို့နှင့် ပတ်သက်၍ သူမ၏ ထင်မြင်ယူဆချက်များကိုပင် ပေးနိုင်လေသည်။
ပိုင်အာသည်ပြန်လည် သက်သာလာသည့်တိုင် လှုပ်ရှား၍ မရသေးသဖြင့် စကားသာ ပြောဆိုနိုင်သေးသည်။ ရဲရှောင်ထံမှ ချီးမွမ်းစကား ကြားရသည့် အခါတိုင်း ကျေနပ်သော အပြုံးများဖြင့်ပြုံးနေလေ့ရှိသည်။
ရဲရှောင်ဘက်မှလည်း အမှန်တကယ်ကျေနပ်နေမိသောကြောင့်ရင်ထဲမှနေ၍ လိုလိုလားလားပင် ချီးကျူးစကား ဆိုလေ့ရှိသည်။
ရဲရှောင်အား ထပ်မံ၍ အံ့အားသင့်စေခဲ့သည့် အချက်မှာ ပိုင်အာသည် လှုပ်ရှား၍ မရနိုင် သေးသော်လည်း ရဲရှောင်ပြောသည့်အတိုင်း ကျင့်ကြံမှုများ စတင်လုပ်ဆောင်ရန် ကြိုးစားခြင်းပင် ဖြစ်သည်။ ကျင့်ကြံမှု လုပ်ဆောင်သည့်သုံးရက်အတွင်း ကမ္ဘာလောကကြီး အတွင်းရှိ ဝိညာဉ်တော် ချီဓာတ်များအား သူမ စတင် ခံစားမိသွားခဲ့သည်။
“ကမ္ဘာပေါ်မှာ သက်ရှိတွေ အများကြီး ရှိနေတယ်လို့ ကျွန်မခံစားနေရတယ်။ အဲဒီသက်ရှိတွေက ကျွန်မခန္ဓာကိုယ်ထဲ တိုးဝင်လာသလိုပဲ။ ဒါပေမယ့်ဘာတွေလဲဆိုတာ ကျွန်မ မသိဘူး ဖြစ်နေတယ်။ ဖမ်းဆုပ်လို့လည်း မရဘူးနော် . . .”
ပိုင်အာ နားမလည်ဟန်ဖြင့် မေးလိုက်သည်။
“ကျွန်မ ရူးများနေတာလားဟင်၊ ကျွန်မ ခံစားမိနေတာတွေက အမှန်တွေပဲလား . . .”
သူမ၏ အမေးကြောင့် ရဲရှောင်တစ်ယောက်ဆွံ့အသွားမိသည်။
[မင်းက ရူးနေတယ် ဟုတ်လား။ မင်းသာ ရူးနေရင် ချင်းယန်နယ်ပယ်နဲ့ ဒီကမ္ဘာပေါ်က ပညာရှင်တွေအားလုံး ရှက်လို့ ကိုယ့်ကိုယ်ကိုယ် သတ်သေသွားလောက်တယ်။ မင်းပြောနေတဲ့ သက်ရှိဆိုတာ တကယ့်သက်ရှိ မဟုတ်ဘူးကွ။ ဝိညာဉ်တော်ချီဓာတ်လို့ ခေါ်တယ်။ လှုပ်ရှားနေလို့ မင်းက သက်ရှိထင်နေတာ . . .]
[သာမန်လူတွေဆိုရင်ဒီချီဓာတ်ကို ခံစားသိရှိဖို့က မလွယ်ဘူး။ လူ ၁၀၀ မှာ ၉၉ ယောက်လောက်က မသိကြဘူး . . .]
[အဲ့ဒီလို သိသွားတဲ့ လူတွေကလည်း ပညာရှင်တွေ ဖြစ်ကုန်ကြတာပဲ။ ဒါပေမယ့်တော်ေတ်ာများများက ဒီလို ချီဓာတ်တွေ ရှိနေတာကို သိဖို့ အချိန်အတော်ကြာတယ် . . .]
[မင်းကတော့ သုံးရက်တည်းနဲ့ ချီဓာတ်တွေ ကမ္ဘာပေါ်မှာ ရှိနေတယ် ဆိုတာကို သိသွားပြီပေါ့။ သူ့လို လူမျိုး ဘယ်မှာမှတောင် ရှိနိုင်မယ်လို့ ငါမထင်ဘူး . . .]
ရဲရှောင် တအံ့တဩဖြင့်စဉ်းစားနေမိသည်။
[သူ့ရဲ့ ပါရမီက တော်တော်ကို ထူးခြားတာပါလား . . .]
ရဲရှောင်၏ စိတ်ထဲတွင်လည်း အလွန်ပျော်ရွှင်သွားမိသည်။ ယခုကဲ့သို့ ဝိညာဉ်တော်ချီဓာတ်များအား ခံစားသိရှိသွားပြီ ဖြစ်သဖြင့် ရှေ့ဆက်၍လည်း တိုးတက်မှုများ ပို၍ မြန်ဆန်လာမည်ဖြစ်သည်။
ပိုင်အာ၏ ဒဏ်ရာများသည်လည်း တဖြည်းဖြည်း သက်သာလာခဲ့ပြီ ဖြစ်သည်။
[ငါအခုမှ စဉ်းစားမိတယ်။ သူ့ရဲ့ ဒဏ်ရာတွေ သက်သာလာတာလည်း တော်တော်ကို မြန်ပါလား။ ငါကောက်တွေ့ခဲ့တဲ့ အမှိုက်လေးက စကြာဝဠာတစ်ခုလုံးမှာ အရှားပါးဆုံး ရတနာတစ်ခု ဖြစ်နေတာပါလား . . .]
ရဲရှောင် တအံ့တဩတွေးနေမိပါတော့သည်။