Martial Peak
အထွဋ်အထိပ်သိုင်းဧကရာဇ်
အပိုင်း (၁၇၂၆)
“ခင်ဗျား မိုးကြိုးပစ်ခံရတာလား အကြီးအကဲချင်း” ရန်ကိုင်က အံ့အားသင့်တကြီး မေးလိုက်ည်။
“ဟုတ်တယ်” ချင်းတုန်က ခေါင်းညိတ်လိုက်၏ “ဘာမှ ဖြစ်မသွားပေမယ့် မိုးကြိုးဒဏ်က လျှော့တွက်လို့တော့မရဘူး”
ဖေးကျီးတုလည်း အံ့ဩတကြီးဖြင့် ပြောလိုက်လေသည် “ငါက မင်းကျင့်စဉ်တစ်ခုခုကျင့်ရင်း မိုးကြိုးဓါတ်ကို ဆွဲငင်လိုက်သလို ဖြစ်သွားလို့ မိုးကြိုးပစ်ချခံရတယ် ထင်နေတာ”
“ဘယ်လိုလုပ်ပြီး အဲ့လိုဖြစ်ရမှာလဲ” ချင်းတုန် ရယ်ရခက်၊ ငိုရခက် အမူအရာဖြင့် “အရိပ်လခန်းမမှာ ဘယ်လို ကျင့်စဉ်တွေရှိလဲ မင်းလည်း သိတာပဲ။ ဘယ်ကျင့်စဉ်ကများ မိုးကြိုးဓါတ်ကို ဆွဲငင်နိုင်လို့လဲ။ ပြီးတော့ ငါဘာကျင့်စဉ်ကိုမှလည်း ကျင့်ဖို့ မလိုသေးဘူး။ ငါ့ကျင့်ကြံခြင်းကိုပဲ တည်ငြိမ်အောင် အရင် လုပ်ရဦးမှာ”
“အရင်အကြိမ်က မြေမီးတောက်ကော” တုန်ရွှမ်းအာက ဝင်မေးလိုက်လေသည်။
“ဘာမြေမီးတောက်လဲ” ဖေးကျီတုက နားမလည်ဟန်ဖြင့် ပြန်မေးလိုက်သည်။
တုန်ရွှမ်းအာက မျက်တောင်လေး ပုတ်ခတ်ပုတ်ခတ် လုပ်လျက် “လွန်ခဲ့တဲ့ နှစ်လတုန်းက ဆရာကျင့်ကြံနေတုန်း မြေကြီးတောက်ကြီး ရုတ်တရက် ပေါ်လာတယ်လေ”
“အဲ့လို ဖြစ်သွားသေးတာလား” ဖေးကျီတု ထပ်မံ အံ့ဩရပြန်သည်။
“အဲ့ဒါငါ့ကို အရိပ်ကြယ်ရဲ့ လောကနိယာမတွေက ငြင်းပယ်နေလို့ ဖြစ်တာ” ချင်းတုန်က မကျေမနပ်ဖြင့် ငြီးတွားလိုက်လေသည် “ငါအရိပ်ကြယ်ကို ပြန်ရောက်ကတည်းက အဲ့လိုမျိုးတွေ ခဏခဏ ကြုံနေရတာ။ အဲ့ဒါတွေကြောင့် ဘာဒဏ်ရာမှ မရဘူးဆိုပေမယ့် ကောင်းကောင်း ကျင့်ကြံလို့ကို မရတော့ဘူး။ အဲ့ဒါတင် မဟုတ်သေးဘူး။ လေပေါ် ပျံနေပြီ ဆိုရင်လည်း ဘယ်ကနေမှန်းမသိ လေပြင်းတွေ ဗြုန်းစားကြီး ကောက်တိုက်လာပြန်ရော။ လေပြင်းတွေကလည်း ရိုးရိုး မဟုတ်ဘူး။ ငါ့စိတ်စွမ်းအင်ကိုပါ တိုက်စားပစ်တဲ့ လေပြင်းတွေ။ အဲ့ဒါကြောင့် အခုနောက်ပိုင်း အရမ်းကြီး မြင့်မြင့် မပျံရဲတော့ဘူး။ ပျံမယ်ဆိုရင်တောင် ခဏလောက်ပဲ ပျံရဲတော့တယ်”
“မိုးကြိုးပစ်ခံရတယ်။ မြေမီးတောက် ပေါ်လာတယ်။ လေပြင်းတိုက်ခံရတယ်…” ရန်ကိုင်က ရေရွတ်လိုက်၏ “ခင်ဗျား ဘဝက တော်တော်လေး ခက်ခဲနေတာပဲ အကြီးအကဲချင်း”
ရန်ကိုင် စကားကိုကြားသည့်အခါ ချင်းတုန်လည်း ငြီးတွားမိလိုက်သည်။
ထိုကဲ့သို့ အဆက်မပြတ် နှောင့်ယှတ်ခံနေရသည်မှာ အလွန်ကိုမှ စိတ်ညစ်ဖွယ်ကောင်းလှသည်။ ဤရက်များအတွင်း ချင်းတုန် တံခါးပိတ်ကျင့်စဉ် မဝင်သေးသည်မှာ ကံကောင်းသွား၏။ သူသာ ကျင့်စဉ်ဝင်နေစဉ် အတောအတွင်း အနှောင့်ယှတ်ခံရလျှင် ကျင့်ကြံခြင်းလမ်းကြောင်း သွေဖီသည့် ပြဿနာများနှင့်ပင် ကြုံရလာနိုင်သည်။ ထိုသို့သာ ဖြစ်သွားလျှင် တန်ခိုးရှင်ဘုရင်အဆင့် ဖြစ်နေလျှင်ပင် ကောင်းကောင်းကြီးကို ဒုက္ခရောက်ရပေလိမ့်မည်။
“ဘယ်လိုလုပ်ပြီး ဖြစ်နိုင်မှာလဲ” ဖေးကျီတု မယုံကြည်နိုင် ဖြစ်နေခဲ့သည် “ငါမြို့သခင်ဖြစ်တာ ကြာပြီ။ ဒါပေမယ့် အခုလိုမျိုး ကြားဖူးတာ ပထမဆုံးပဲ”
“ငါ့အတွက်လည်း ပထမဆုံးပဲ” ချင်းတုန်က သက်ပြင်း အမောကြီး ချလိုက်ပြီး ရန်ကိုင်ဘက်သို့ လှည့်၍ “ရန်ကိုင်၊ မင်းက ကြယ်သခင်ဆိုတော့ ဒီကိစ္စကို ဖြေရှင်းနိုင်မယ့် နည်းလမ်းလေး ဘာလေးများ မင်းမှာ မရှိဘူးလား”
ဘယ်အချိန် မိုးကြိုးပစ်ခံရမလဲ၊ ဘယ်အချိန် မြေမီးတောက် ပေါ်လာပြီး သူ့အား လောင်ကျွမ်းမလဲကို မသိရသဖြင့် ချင်းတုန် အဖို့ စိတ်အေးအေးဖြင့် တံခါးပိတ်ကျင့်စဉ် မဝင်နိုင် ဖြစ်နေ၏။ ထို့ကြောင့် ရန်ကိုင် အဖြေရှာတွေ့နိုင်ပါစေဟုသာ သူ့စိတ်ထဲ ကြိတ်၍ ဆုတောင်းနေရတော့သည်။
သို့သော်လည်း သူစိတ်ပျက်သွားရသည်မှာ ရန်ကိုင်တွင်လည်း အဖြေ ရှိမနေခြင်းပင် “အရိပ်ကြယ်ရဲ့ လောကနိယာမတွေနဲ့ ဆက်သွယ်နိုင်တယ်ဆိုပေမယ့် သူတို့ကို ကျုပ်ပြောင်းလဲဖို့ ကျုပ်လည်း မတတ်နိုင်ဘူး လူအိုကြီးချင်းရေ”
ထိုစကားကို ကြားသည့်အခါ ချင်းတုန် နောက်တစ်ကြိမ် သက်ပြင်းချလိုက်ပြန်၏။
ခန်းမတစ်ခုလုံး တစ်ခဏတာ တိတ်ဆိတ်သွားခဲ့သည်။
တန်ခိုးရှင်ဘုရင်အဆင့် ကျင့်ကြံသူတစ်ဦး ပိုင်ဆိုင်ထားခြင်းသည် အရိပ်လခန်းမအတွက် သတင်းကောင်း တစ်ခု ဖြစ်သော်ငြား လောကနိယာမများမှ ချင်းတုန်အား ငြင်းပယ်နေသည်မှာတော့ သတင်းဆိုးတစ်ခု ဖြစ်နေခဲ့လေ၏။
ခဏအကြာတွင် ချင်းတုန်က ရုတ်တရက် ပြောလိုက်၏ “ကြည့်ရတာ ဒီကနေ ထွက်သွားဖို့ပဲ ရှိတော့တယ်နဲ့ တူတယ်”
“တစ္ဆေအိုကြီးချင်း၊ မင်းအရိပ်ကြယ်ကနေ ထွက်သွားဖို့ လုပ်နေတာလား” ဖေးကျီတု ထိတ်လန့်သွားခဲ့သည်။
ဝေကုချန်းနှင့် တုန်ရွှမ်းအာတို့သည်လည်း ချင်းတုန်အား အထိတ်တလန့်ဖြင့် ကြည့်လိုက်ကြသည်။
“ဟုတ်တယ်။ မထွက်သွားရင် တောက်လျှောက်ကို ပြဿနာတွေနဲ့ ကြုံနေရတော့မှာ။ ဘယ်တော့မှ ကောင်းကောင်း ကျင့်ကြံနိုင်တော့မှာ မဟုတ်ဘူး” ချင်းတုန်က ယဲ့ယဲ့လေး ပြုံးလျက် “တန်ခိုးရှင်ဘုရင်အဆင့်ကို ရောက်ပြီးမှ တစ်သက်လုံး ဒီအဆင့်မှာပဲ တစ်နေရမှာမျိုး ငါမကြုံချင်ဘူး။ ဒီထက် ပိုမြင့်တဲ့ အဆင့်တွေကို ငါရောက်ချင်သေးတယ်”
“မင်းအသက်နဲ့ အဲ့ရည်မှန်းချက်တွေကို မစွန့်နိုင်သေးဘူးပေါ့” ဖေးကျီတုက မဲ့ပြုံးပြုံးလိုက်လေသည်။
“ဖေးအိုကြီး၊ မင်းကော တန်ခိုးရှင်အဆင့်မှာပဲ တစ်သက်လုံး တစ်နေချင်လား” ချင်းတုန်က ပြန်မေးလိုက်သည်။
“ဘာလို့ တစ်နေရမှာလဲ” ဖေးကျီတုက နှာခေါင်းရှုံ့လျက် “အရင်တစ်ကြိမ်တုန်းက ငါ့ကျင်ကြံခြင်း လျော့ကျသွားလို့သာ မဟုတ်ရင် ငါလည်း တစ်ခါတည်း မင်းနဲ့ အရိပ်ကြယ်ကနေ ထွက်သွားတယ်။ တန်ခိုးရှင်ဘုရင်အဆင့်ကို ရောက်မရောက်ကတော့ တစ်ကဏ္ဍပေါ့”
“ရေတွေက အမြင့်ကနေ အနိမ့်ကို စီးသလို ငါတို့ လူတွေကလည်း ပိုမြင့်တဲ့ အဆင့်တွေဆီ တက်လှမ်းချင်တာပဲ”
“ဆုံးဖြတ်ပြီးမှတော့ မင်းဘာမှ ထပ်ပြောနေစရာ မလိုတော့ဘူး။ အရိပ်လခန်းမက ကိစ္စတွေကိုတော့ စိတ်ပူမနေနဲ့။ ငါဂရုစိုက်ထားလိုက်မယ်”
“ရန်ကိုင်၊ ဒီကနေ ထွက်သွားဖို့ဆိုရင် ငါမင်းကို အားကိုးမှပဲ ရလိမ့်မယ်” ချင်းတုန်သည် ရန်ကိုင်အား ကြည့်လိုက်၏။
“သွားဖို့ကတော့ ပြဿနာ မဟုတ်ပါဘူး” ရန်ကိုင်က ယဲ့ယဲ့လေးပြုံးလျက် “တကယ်တော့ ကျုပ်လည်း လူအိုကြီးချင်း ဖြစ်ချင်တာနဲ့ ကိုက်ညီတဲ့ အစီအစဉ်တစ်ခုကို အကောင်အထည် ဖော်ဖို့ လုပ်နေတာ”
“အို၊ ဘာအစီအစဉ်လဲ” ချင်းတုန်က အံ့အားသင့်တကြီး ပြန်မေး၏။
“ကမ္ဘာခြင်း ဟင်းလင်းပြင်အစီအရင်တစ်ခု တည်ဆာက်ဖို့ စဉ်းစားနေတာ”
“ကျင့်ကြံရေး ကြယ်တွေကို ဆက်သွယ်နိုင်တဲ့ ဟင်းလင်းပြင် အစီအရင်ကို ပြောချင်တာလား” ချင်းတုန်နှင့် ဖေးကျီတုတို့ နှစ်ဦးစလုံး ရန်ကိုင်အား အလွန်အမင်း အံ့အားသင့်နေသည့် အမူအရာများဖြင့် ကြည့်လိုက်ကြသည်။
ရန်ကိုင်က ခေါင်းညိတ်လိုက်၏ “ဟုတ်တယ်။ အရိပ်ကြယ် ကြယ်စီရင်စုထဲကနေ ကွဲထွက်နေတာ တော်တော် ကြာနေပြီ။ အခု ကြယ်စီရင်စုထဲ ပြန်ပေါင်းစည်းဖို့ အချိန်ပဲ။ ကျုပ်စီစဉ်ထားတဲ့ အတိုင်းသာ လုပ်နိုင်မယ်ဆိုရင် တန်ခိုးရှင်အထွဋ်အထိပ်ကို ရောက်နေတဲ့ ကျင့်ကြံသူတိုင်း တန်ခိုးရှင်ဘုရင်အဆင့်ရဲ့ နက်နဲဆန်းကြယ်မှုတွေကို လွတ်လွတ်လပ်လပ် လေ့လာလို့ရပြီ”
ချင်းတုန်နှင့် ဖေးကျီတုတို့ အချိန်အတော်ကြာသည်အထိ စကားတစ်ခွန်းပင် ပြန်မပြောနိုင် ဖြစ်နေခဲ့သည်။
အချိန်အတော် ကြာသွားသည့်အခါမှပဲ ချင်းတုန်က မေးလိုက်၏ “မင်းတကယ် အဲ့လိုလုပ်နိုင်တာလား”
“စမ်းကြည့်ရမှာပေါ့” ရန်ကိုင်က ရယ်သွမ်းသွေးလျက် “အနည်းဆုံးတော့ ဟင်းလင်းပြင်အစီအရင်တစ်ခု ခင်းကျင်းဖို့က အဲ့လောက် ပြဿနာမရှိဘူးလို့တော့ ထင်တာပဲ”
“ဒါပေမယ့် အဲ့ဟင်းလင်းပြင်အစီအရင်ကနေ အခြား ကျင့်ကြံကြယ်တွေ ငါတို့ အရိပ်ကြယ်ကို ကျူးကျော်လာရင်ကော။ အဲ့ဒါဆို ပြဿနာ မများနိုင်ဘူးလား” ချင်းတုန်က စိုးရိမ်တကြီး ပြန်မေး၏။
“ဟဲဟဲ၊ အဲ့ဒါကိုတော့ စိတ်ပူနေစရာ မလိုဘူး” ဖေးကျီတုက ရယ်မော၍ စကြာဝဠာ ဟူသော နာမည် ထိုးထွင်းထားသည့် တံဆိပ်ပြားအချို့ကို ထုတ်ပြရင်း ရှင်းပြလိုက်လေသည် “ဒါတွေ မရှိဘဲနဲ့ ရန်ကိုင် ခင်းကျင်းထားတဲ့ ဟင်းလင်းပြင်အစီအရင်ကို သူတို့ သုံးနိုင်မှာ မဟုတ်ဘူး”
“အဲ့ဒါ ဘာကြီးလဲ” ချင်းတုန် နားမလည်ခဲ့ပေ။
“ဖြတ်သန်းရေး တံဆိပ်ပြားပဲ” ဖေးကျီတုက ချက်ချင်း ရှင်းပြလိုက်သည်။ ဖြတ်သန်းရေး တံဆိပ်ပြား၏ ရည်ရွယ်ချက်ကို နားလည်သွားသည့်နောက် ချင်းတုန်က သက်ပြင်းချလျက် “ရန်ကိုင်၊ အစကတည်းက မင်းအခုလိုလုပ်ဖို့ စဉ်းစားထားတားလား”
“ဆိုပါစို့။ အရိပ်ကြယ်ပေါ်မှာ ဟင်းလင်းပြင်အစီအရင်တွေ လိုက်ခင်းကျင်းတယ် ဆိုတာကလည်း အဲ့ဒါကို ခင်းကျင်နိုင်ဖို့ ကြိုတင် လေ့ကျင့်ထားတဲ့ သဘောပဲ” ရန်ကိုင်က ပြုံးလျက် ပြန်ပြောလိုက်သည်။
သူ့နောက်ဆုံး ပန်းတိုင်သည် အရိပ်ကြယ်အား ကြယ်စီရင်စုကြီးနှင့် ဆက်သွယ်နိုင်သော ဟင်းလင်းပြင်အစီအရင် တစ်ခုကို တည်ဆောက်ဖို့ပဲ။ ထိုအစီအစဉ်မှာ စိတ်ကူးယဉ် သက်သက်မဟုတ်ဘဲ သူတွေးထားခဲ့သည်မှာ ကြာပြီဖြစ်သည့် အစီအစဉ်တစ်ခု ဖြစ်သည်။
လက်ရှိ အနေအထားဖြင့် အရိပ်ကြယ်မှ ကြယ်စီရင်စုထဲရှိ နာမည်ကျော် ကျင့်ကြံရေးကြယ်များသို့ သွားရန် အလွန်အမင်း အချိန်ယူရနိုင်သော်ငြား ကြယ်များကြား ကူးသန်းသွားနိုင်သော ဟင်းလင်းပြင်အစီအရင် တစ်ခုကိုသာ တည်ဆောက်နိုင်ပါက ထိုပြဿနာကို အလွယ်တကူ ဖြေရှင်းသွားနိုင်ပေလိမ့်မည်။
လတ်တလောအနေဖြင့် အထက်စကြာဝဠာဂိုဏ်းတွင် တန်ခိုးရှင်အဆင့်၏ အထွဋ်အထိပ်သို့ ရောက်နေသည့် ကျင့်ကြံသူပေါင်းများစွာ ရှိပေသည်။ ဂိုဏ်းချုပ် ဖြစ်သည့်အလျောက် ရန်ကိုင်အနေဖြင့် ဂိုဏ်း၏ နောင်ရေးအတွက် အစီအစဉ်များ လုပ်ထားရပေမည်။ သူကိုယ်တိုင်ပင်လျှင် တန်ခိုးရှင်တတိယအဆင့်သို့ ရောက်နေပြီး မနှောင်းသော အချိန်အတွင်း တန်ခိုးရှင်ဘုရင်အဆင့်သို့ ချိုးဖျက်ရန်အတွက် အရိပ်ကြယ်မှ ထွက်ခွာရဦးမည် မဟုတ်လေလော။
ထို့အပြင် ဟင်းလင်းပြင်အစီအရင်များကို ခင်းကျင်းခြင်းသည် လေဟာနယ်စွမ်းအားကို ကျင့်ကြံသည့် နည်းလမ်းတစ်မျိုးလည်း ဖြစ်လေသည်။
ယခင်ရက်များအတွင်း လေဟာနယ်စွမ်းအားအပေါ် သူ့နားလည်မှု ပို၍ တိုးတက်လာကြောင်း ရန်ကိုင် ခံစားမိနေ၏။ ထိုကဲ့သို့ သူ့အတွက် အကျိုးရှိသည့် အလုပ်တစ်ခုကို မည်ကဲ့သို့ စွန့်ပစ်နိုင်မည်နည်း။
“မင်းအဲ့လို အကောင်းအထည်ဖော်ဖို့ လုပ်နေမှန်း သိလိုက်ရပြီဆိုမှတော့ ဒီလူအိုကြီး စိတ်အေးသွားပြီ။ မင်းကြယ်သခင် တစ်ပါး ဖြစ်လာတာ ငါတို့ အရိပ်ကြယ် ကောင်းချီးပေးခံရတာပဲ” ချင်းတုန်က ရယ်ရယ်မောမောနှင့် ပြောလိုက်သည်။
“အဲ့ဒါဆို ကျုပ်နဲ့ အခု လိုက်ထွက်မလား။ ဒါမှမဟုတ် ဟင်းလင်းပြင်အစီအရင်ကို ခင်းကျင်းပြီးတော့မှပဲ ထွက်မလား”
ချင်းတုန်က ခဏလောက် စဉ်းစားလိုက်၏။ ပြီးမှပဲ “အခုလောလောဆယ်တော့ မထွက်သေးဘူး။ ဒီမှာပဲ ခဏ နေလိုက်ဦးမယ်။ မင်းဟင်းလင်းပြင်အစီအရင်ကို ခင်းကျင်းပြီးတော့မှပဲ ထွက်တော့မယ်။ ငါအခု အရိပ်လခန်းမမှာ လုပ်စရာကိစ္စ နည်းနည်း ရှိသေးတယ်”
“အဲ့ဒါဆို သတင်းကောင်းကို စောင့်နေလိုက်တော့” ရန်ကိုင်က ပြုံးကာ ပြန်ပြောလိုက်၏။
ချင်းတုန်နှင့် ဆွေးနွေးတိုင်ပင်ပြီးနောက် ကောင်းကင်ကံကြမ္မာမြို့တွင် ဆက်မနေတော့ဘဲ အထက်စကြာဝဠာဂိုဏ်းဆီသို့ ပြန်လေ၏။
အကြီးအကဲများကို ဆင့်ခေါ်ပြီးနောက် သူ့အစီအစဉ်ကို ရှင်းပြလိုက်သည်။ သူ့အစီအစဉ်ကို ကြားလိုက်သည့်အခိုက် ရီရှီယွင်နှင့် အခြား အကြီးအကဲအားလုံး စိတ်လှုပ်ရှားသွားကြလေ၏။
ပြောစရာမလိုအောင်ပင် ရီရှီယွင်သည် တန်ခိုးရှင်ဘုရင်အဆင့်သို့ အလွန်ကိုမှ ချိုးဖျက်ချင်နေသည့်သူ ဖြစ်သည်။ ယခင်အကြိမ်က ယန်ယန်ကို စောင့်ရှောက်ရန် အတွက်ကြောင့်သာ အထက်စကြာဝဠာဂိုဏ်း၌ နေရစ်ခဲ့ခြင်း ဖြစ်သည်။
ရန်ကိုင်သာ ကမ္ဘာခြား ဟင်းလင်းပြင်အစီအရင်တစ်ခု တည်ဆောက်နိုင်ပါက သူမအနေဖြင့် အရိပ်ကြယ်၏ အချုပ်အနှောင်မှ အချိန်မရွေး ရုန်းထွက်ကာ တန်ခိုးရှင်ဘုရင် အဆင့်သို့ ချိုးဖျက်ဝင်ရောက်ရန် ကြိုးစားနိုင်ပေလိမ့်မည်။
ရန်ရှုကျုနှင့် အခြားသူများလည်း ထိုကဲ့သို့ တွေးထားကြ၏။ ယခင်အကြိမ်က ကံမကောင်းအကြောင်းမလှသဖြင့် သွေးအကျဉ်းထောင်အတွင်း၌ တန်ခိုးရှင်ဘုရင်အဆင့်သို့ မချိုးဖျက်နိုင်ခဲ့သော်လည်း သူ့တို့တွင် အခွင့်အရေး မရှိတော့ဟု မဆိုလိုချေ။ သူတို့ လုပ်ရမည်မှာ ကြိုးစားကြည့်ရန်ပင်။ ကြိုးစားကြည့်လို့ မအောင်မြင်လျှင်ပင် နောင်တရစရာအကြောင်း မရှိချေ။
“အကုန်လုံးက သဘောတူတယ်ဆိုမှတော့ ဒီဂိုဏ်းချုပ်လည်း အဲ့အစီအစဉ်ကို အကောင်အထည် ဖော်ရတော့တာပေါ့” ရန်ကိုင်က ပြုံးဖြီးလျက် “ဒါပေမယ့် မစခင် ပစ္စည်းနည်းနည်းစုဖို့ လိုလိမ့်မယ်”
“ဘာတွေ လိုတာလဲ” ရီရှီယွင်က မေးလိုက်သည်။
“လေဟာနယ်သလင်းကျောက်တွေ” ရန်ကိုင်၏ အမူအရာ ရုတ်ချည်း လေးနက်သွားခဲ့သည်။ “ဟင်းလင်းပြင်အစီအရင်ကို ခင်းကျင်းတဲ့ နေရာမှာ အရေးအကြီးဆုံးပစ္စည်းက လေဟာနယ် သလင်းကျောက်ပဲ။ အစီအရင်နှစ်ခုကြားက အကွာအဝေးပေါ်ကို မူတည်ပြီး လိုအပ်တဲ့ လေဟာနယ်သလင်းကျောက် ပမာဏက ကွဲပြားသွားလိမ့်မယ်။ အခု ခင်းကျင်းမယ့် အစီအရင်က ကမ္ဘာခြား ဟင်းလင်းပြင်အစီအရင်ဆိုတော့ လေဟာနယ်သလင်းကျောက် များများရနိုင်လေ ပိုကောင်းလေပဲ”
“နားလည်ပြီ” ရီရှီယွင် ခေါင်းညိတ်လိုက်၏။
လက်ရှိ အထက်စကြာဝဠာဂိုဏ်း၏ ဂုဏ်သတင်းအရ ကုန်ကြမ်းပစ္စည်းများကို စုဆောင်းရန်အတွက် သိပ်မခက်လှချေ။ မေးစရာရှိသည်မှာ လေဟာနယ်သလင်းကျောက် ဘယ်လောက် များများ သူတို့ ဝယ်ယူနိုင်မည်လဲ ဆိုသည်သာ ဖြစ်သည်။
တကယ်တော့ လေဟာနယ်သလင်းကျောက်များသည် အလွန်ကိုမှ ရှားပါးလှပြီး ရှာတွေ့ထားသည့် လေဟာနယ် သလင်းကျောက် အများစုမှာလည်း သိုလှောင်လက်စွပ်များ သွန်းလုပ်ရာ၌ အသုံးပြုလိုက်သဖြင့် ကုန်သွားကုန်ကြ၏။
ရန်ကိုင်သည် နဂါးလိုဏ်ဂူတောင်အောက်တွင် လေဟာနယ် သလင်းကျောက်တွင်းကြီးတစ်တွင်း ရှာတွေ့ခဲ့ဖူးပေသည်။ သို့သော် ရှာတွေ့သည့် လေဟာနယ်သလင်းကျောက်များမှာ သူ့လေဟာနယ်စွမ်းအားကို မြှင့်တင်ရာ၌ သုံးလိုက်သဖြင့် ကုန်သွားခဲ့လေပြီ။
လွန်ခဲ့သော လများအတွင်း ရန်ကိုင် ခင်းကျင်းခဲ့သည့် ဟင်းလင်းပြင်အစီအရင်များ၌ အသုံးပြုခဲ့သော လေဟာနယ် သလင်းကျောက်များကို သူသွားရောက်ခဲ့သည့် ဂိုဏ်းအသီးသီးမှ ထောက်ပံ့ပေးခဲ့ခြင်း ဖြစ်သည်။
“သုံးလ၊ သုံးလကြာရင် အရိပ်ကြယ်ကနေ ကျုပ်ထွက်မယ်။ အဲ့အချိန်အတွင်း လေဟာနယ်သလင်းကျောက် များများ ရှာပေးနိုင်ဖို့ ကျုပ်မျှော်လင့်တယ်”
“ဟုတ်ကဲ့” အကြိးအကဲအားလုံး ခေါင်းညိတ်လိုက်ပြီး ချက်ချင်းပဲ လေဟာနယ်သလင်းကျောက်များကို ရှာဖွေရန်အတွက် အလျင်အမြန် ထွက်သွားကြလေသည်။
အကြီးအကဲများ ထွက်သွားပြီးနောက် ရန်ကိုင် အားလပ်ချိန် အချို့ ရလာလေသည်။ သူ့မိဘများနှင့် အချိန်အချို့ ဖြုန်းပြီးနောက် စုယန်နှင့် ရှနင်းချန်ကိုခေါ်ကာ အရိပ်ကြယ်အနှံ့ ခရီးထွက်လေ၏။
နောက်ဘယ်အချိန် အားမည်မှန်းမသိသဖြင့် သူ့စီနီယာအစ်မ နှစ်ယောက်အား ထိုသုံးလအတွင်း တောက်လျှောက် အဖော်ပြုပေးခဲ့၏။
ထိုသုံးလသည် ရန်ကိုင်အတွက်လည်း အလွန်ကိုမှ ကောင်းမွန်သော အခိုက်အတန့်လေးတစ်ခု ဖြစ်ခဲ့ပေသည်။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၂၇)
“ဒါအရင်က ဖန်သွေးရောင်ဂိုဏ်း တည်ရှိခဲ့တဲ့ နေရာလား” စုယန်သည် အောက်ဘက်ရှိ တောင်စဉ်တောင်ဆက်တန်းအား ငုံ့ကြည့်ရင်း မေးလိုကသ်ည်။
“ဟုတ်တယ်” သူမဘေးတွင် ရပ်နေသော ရန်ကိုင်က ခေါင်းညိတ်လိုက်၏။ ထို့နောက် ကောင်းကင်စိတ်အာရုံကို ဖြန့်ကျက်၍ စစ်ဆေးကြည့်လိုက်သည်။ ကြယ်သခင်တစ်ပါး ဖြစ်သည့် သူ့အတွက် မိုင်သောင်းနှင့်ချီ ရှည်လျားသော ဤတောင်တန်းအား စစ်ဆေးရန် ဘာမှ သိပ်မခက်ပါချေ။ “ကြည့်ရတာ ဖန်သွေးရောင်ဂိုဏ်းက အလောင်းဝိဥာဉ်ဂိုဏ်းနဲ့ တိုက်ပွဲမှာ သိပ်ပြီး မခံလိုက်ရဘူးပဲ။ သူတို့ ဠာနချုပ်က ငါအရင်တစ်ခါ လာတုန်းကနဲ့ အတူတူပဲ။ ဘာမှ မပြောင်းသွားဘူး”
ရှနင်းချန်သည် အဝေးတစ်နေရာသို့ လှမ်းကြည့်၍ ပြောလိုက်သည် “အရိပ်ကြယ်ပေါ်က မိုးမြေစွမ်းအင်က ထုန်းရွှမ်းလောကကြီးထက် အများကြီး သာတယ်နော်။ ငါတို့ သွားလိုက်တဲ့ နေရာတိုင်းက ထုန်းရွှမ်လောကကြီးထက် အမြဲတမ်း မိုးမြေစွမ်းအင် ပိုသိပ်သည်းနေတာချည်းပဲ”
ပြောရင်း အနည်းငယ် ဝမ်းနည်းလာသည့်ပုံပင်။
ရန်ကိုင်သည် အရိပ်ကြယ်၏ ကြယ်သခင်ဖြစ်သလို သူမသည် ထုန်းရွှမ်လောကကြီး၏ ကြယ်သခင် ဖြစ်သည်။ ကြယ်သခင်တိုင်း အတွက် သူတို့ သန့်စင်ထားသည့် ကြယ်တိုင်းသည် သူတို့၏ အကောင်းဆုံး အပေါင်းအဖော်များ ဖြစ်ကြပေသည်။
ထုန်းရွှမ်လောကကြီး၏ ညိုးလျော်နေသည့် အရှိန်အဝါသည် သူမအား အနည်းငယ် စိတ်ဓါတ်ကျစေမိ၏။
“ကြယ်သခင်နဲ့ ကျင့်ကြံရေးကြယ်တွေက တိုက်ရိုက် ဆက်စပ်တယ်လေ။ စီနီယာမမလေး ကြိုးစားကျင့်ကြံဖို့ပဲ လိုတယ်။ အဲ့ဒါဆို ထုန်းရွှမ်လောကကြီး တစ်နေ့ကျ ပြန်ပြီး စည်းပင်သာယာ ဝပြောလာလိမ့်မယ်” ရန်ကိုင်က နှစ်သိမ့်ပေးလိုက်သည်။
“ဟုတ်တယ်နော်” ရှနင်းချန် ခေါင်းညိတ်လိုက်၏။
“သွားကြရအောင်၊ ဂိုဏ်းချုပ်ကုန်း ငါတို့ ရောက်လာတာကို သတိထားမိသွားပြီ” ရန်ကိုင်သည် အမျိုးသမီးနှစ်ဦး၏ လက်ကို ကိုင်၍ အောက်သို့ ဆင်းသွားလေသည်။
သူတို့ အရိပ်ကြယ်အနှံ့ လိုက်ပတ်နေသည်မှာ သုံးလတင်းတင်း ပြည့်ခါနီးနေလေပြီ။
လွန်ခဲ့သော သုံးလအတွင်း ရန်ကိုင်တို့ သုံးယောက်သည် အရိပ်ကြယ်ပေါ်ရှိ ကျော်ကြားသည့် နေရာတိုင်းလိုလိုအား လှည့်ပတ်ကြည့်သည်။ ရိုးရာအစားအစာ၊ ဝတ်စားဆင်ယင်ပုံကို လိုက်အတွေ့အကြုံယူသည်။ အဆုံးမဲ့သမုဒ္ဒရာကြီး၏ ခမ်းနားသော တဝုန်းဝုန်း ရိုက်ခတ်နေသည့် လှိုင်းလုံးများနှင့် သဲကန္တာရများ၏ ရင်သက်ရှုမောဖွယ်ရာ တိတ်ဆိတ်လှသည့် အလှတရားကိုလည်း လိုက်ခံစား၏။ ထို့အတွက်ကြောင့် ကျော်ကြားသော တောင်တန်းများ၊ မြစ်ပြင်များလိုလိုတွင် သူတို့၏ ခြေရာများ ထင်ကျန်ရစ်နေခဲ့တော့သည်။
သုံးလတာကာလ ခရီးသည် သူတို့သုံးဦးစလုံး၏ ရင်ထဲဝယ် အလှပဆုံးသော အမှတ်တရတစ်ခု ဖြစ်လာမည်မှာ မလွဲမသွေပင်။
ဖန်သွေးရောင်ဂိုဏ်းသည် ရန်ကိုင် နောက်ဆုံး ရွေးထားသည့် နေရာ ဖြစ်သည်။
ဤနေရာသို့ လာရခြင်းမှာ ရှုခင်းကြည့်ရန် ဖြစ်သလို ကုန်းအောင်ဖုဆီမှ တစ်ခုခု တောင်းဆိုစရာရှိသည့် အတွက်ကြောင့်လည်း ဖြစ်ပေသည်။
ကုန်းအောင်ဖုသည် ဖန်သွေးရောင်ဂိုဏ်း၏ လက်ကျန် အသက်ရှင်ကျန်ရစ်သူများကို ဦးဆောင်လျက် အထက်စကြာဝဠာဂိုဏ်းထဲ ဝင်ခိုလှုံခဲ့ပြီး သူမ ကိုယ်တိုင်သည် အထက်စကြာဝဠာဂိုဏ်း၏ အကြီးအကဲတစ်ဦး ဖြစ်လာသော်ငြား အလောင်းဝိဥာဉ်ဂိုဏ်း ပျက်စီးသွားသည့်နောက်တွင် ရန်ကိုင်သည် သူမအား ဖန်တောင်တန်းဆီသို့ ပြန်ခွင့်ပေးလိုက်လေသည်။
ကျင့်ကြံသူတစ်ဦးအတွက် ဘိုးဘေးတို့ ထားရစ်ခဲ့သည့် အမွေအနှစ်မှာ မည်မျှ အဖိုးတန်သလဲ ဆိုသည်ကို ရန်ကိုင် ကောင်းကောင်း နားလည်ပေသည်။
ဤသည်မှာ အရိပ်ကြယ်ပေါ်တွင် အထက်စကြာဝဠာဂိုဏ်း ဆိုသည့် ဂိုဏ်းကို သူထူထောင်ထားသည်နှင့် တူပေသည်။ ကုန်းအောင်ဖုသည် အစစအရာရာ ပိုမို သာလွန်သော အထက်စကြာဝဠာဂိုဏ်းတွင် နေနေရလျှင်ပင် ဖန်သွေးရောင်ဂိုဏ်းကိုတော့ ဘယ်တော့မှ မေ့နိုင်လိမ့်မည် မဟုတ်ချေ။
ထို့အပြင် အထက်စကြာဝဠာဂိုဏ်းထဲသို့ ကုန်းအောင်ဖု ဝင်လာစဉ်ကတည်းက၊ သူမသာ ဆန္ဒရှိလျှင် တစ်နေ့ကျ ဖန်သွေးရောင်ဂိုဏ်းကို ပြန်တည်ထောင်နိုင်သည်ဟု ရန်ကိုင်မှ သူမအား ကတိပေးခဲ့သေးသည်။
ကုန်းအောင်ဖုသည်လည်း ရန်ကိုင်အား အလွန် ကျေးဇူးတင်သွားသည်။ သူမ တပည့်များကိုခေါ်ပြီး ဖန်တောင်တန်းဆီသို့ ပြန်လာကာ ဖန်သွေးရောင်ဂိုဏ်းကို ပြန်လည် တည်ထောင်ခဲ့သော်လည်း ဖန်သွေးရောင်ဂိုဏ်းသည် အထက်စကြာဝဠာဂိုဏ်း၏ လက်အောက်ခံ ဂိုဏ်းတစ်ဂိုဏ်း အဖြစ် နေရစ်မည်ဟု ပြောသွား၏။
ဖန်သွေးရောင်ဂိုဏ်းသည် အထက်စကြာဝဠာဂိုဏ်း၏ ပထမဆုံး လက်အောက်ခံ ဂိုဏ်းတစ်ဂိုဏ်း ဖြစ်လာခဲ့သည်။
စုယန်၊ ရှနင်းချန်တို့နှင့်အတူ ဤနေရာသို့ ရောက်လာစဉ် ကုန်းအောင်ဖုကို သူရောက်နေကြောင်း လှမ်းအကြောင်းကြားလိုက်၏။
ဖန်သွေးရောင်ဂိုဏ်း၏ အဓိက တောင်ထွတ်ဆီသို့ ရောက်သည့်အခါ သူတို့အား ကုန်းအောင်ဖုမှ ဦးဆောင်သည့် ကျင့်ကြံသူတစ်သိုက်က စောင့်ကြိုနေကြောင်း တွေ့လိုက်ရသည်။
တိုက်ယွမ်သည် သူမ၏ ယခင် ကျောက်ပေါက်မာများ ပေါက်နေသည့် မျက်နှာအတိုင်း ရှိနေဆဲ။
သူမတို့ နှစ်ဦး၏ နောက်တွင် ဖန်သွေးရောင်ဂိုဏ်း၏ အကြီးအကဲများနှင့် ယင်စုတျယ်အပါအဝင် လက်ရွေးစင် တပည့်များ ရှိနေခဲ့သည်။
ရန်ကိုင် ရောက်လာသည်ကိုမြင်သော် အကုန်လုံး ဦးညွှတ် အလေးပြုလိုက်ကြလေသည်။
“လက်အောက်ငယ်သား ကုန်းအောင်ဖု ဂိုဏ်းချုပ်နဲ့ ဂိုဏ်းချုပ်ကတော်တို့ကို နှုတ်ဆက်ပါတယ်” ကုန်းအောင်ဖုက အလျင်အမြန် ပြောလိုက်သည်။
“ဒီမှာ အကုန်လုံးက အချင်းချင်းတွေပဲ။ ဂိုဏ်းချုပ်ဖု အခုလို ယဉ်ကျေးနေစရာ မလိုဘူး” ရန်ကိုင်က သူ့လက်ကို ဝှေ့ရမ်း၍ ပြောလိုက်ချိန် စုယန်ကမူ ဂိုဏ်းချုပ်ကတော်ဟူသော သူမ၏ ဂုဏ်ပုဒ်ကို ပြုံးလျက် ဂုဏ်ယူစွာ ခံယူလေသည်။ ရှနင်းချန်မှာမူ ယခင်အတိုင်း ဂိုဏ်းချုပ်ကတော်ဟူသော စကားကို ကြားလိုက်ချိန် လည်တိုင်တစ်လျှောက် နာသီးလေးများအထိ နီတက်သွားခဲ့၏။
နှစ်ပေါင်းများစွာ ကြာသွားသည့်တိုင် စီနီယာမမလေးသည် ယခင်အတိုင်း အရှက်ကြီးနေဆဲပင်။
“အစ်မတိုက်ယွမ်၊ မတွေ့တာတောင် ကြာပြီနော်” ရန်ကိုင်သည် တိုက်ယွမ်အား လှမ်းနှုတ်ဆက်လိုက်သည်။ အခြားသူများ သိမည်မဟုတ်သော်ငြား သူမ၏ ကျောက်ပေါက်မာ ပေါက်နေသော မျက်နှာအောက်ဝယ် အလွန်လှပသော မျက်နှာလေး ရှိသည်ကို ရန်ကိုင် သိပေသည်။
တိုက်ယွမ်၏ ကိုယ်လုံးကိုယ်ပေါက်သည် တကယ်ကို ရင်သွေးကြွဖွယ်ကောင်းလှသော်ငြား ပုံဆိုးဆိုး သူမ၏ မျက်နှာမှာ သူမ၏အလှကို ပြန်ဖျက်နေခဲ့၏။ ရန်ကိုင်နှင့် တိုက်ယွမ်သည် မတူညီကွဲပြားသော လောကနှစ်ခုတွင် နေနေသော လူများဟုပင် ပြော၍ရသည်။ ရန်ကိုင်သည် အထက်အာကာယံတွင် ကူးခတ် သွားလာနေသော နဂါးတစ်ကောင်ဟု ပြောရမည်ဆိုလျှင် တိုက်ယွမ်သည် မြေပြင်ထက် တွားသွားနေသော ပုရွက်ဆိတ် တစ်ကောင်ဟုသာ ပြောရပေမည်။ ထိုသို့ ဖြစ်သည်ကို ရန်ကိုင် ဘာကြောင့် တိုက်ယွမ်အား အရမ်း အရေးစိုက်နေလဲ ဆိုသည်ကို မည်သူမှ နားမလည်နိုင် ဖြစ်နေ၏။
ရန်ကိုင်က လာနှုတ်ဆက်သည့်အခါ တိုက်ယွမ်သည် ပြန်၍ ခေါင်းညိတ်ပြလိုက်၏။
ကုန်းအောင်ဖုက ပြုံးလျက် အလျင်အမြန် ပြောလိုက်၏ “အရင်လတွေတုန်းက ဂိုဏ်းချုပ်ရန် အရိပ်ကြယ်အနှံ့ လိုက်ပတ်နေတယ်လို့ အကြီးအကဲရီက ပြောတယ်။ ဂိုဏ်းချုပ်ရန် အခွင့်အရေး အသစ်တွေ ရှာတွေ့ပြန်ပြီလား”
“ကျုပ်တို့က ဒီအတိုင်းပဲ လျှောက်ပတ်နေတာ။ ဘယ်လိုလုပ်ပြီး အခွင့်အလမ်းတွေ ရှာတွေ့ရမှာလဲ” ရန်ကိုင်က ရယ်ရယ်မောမောဖြင့် ပြန်ပြော၏။
“ဂိုဏ်းချုပ်နဲ့ ဂိုဏ်းကတော် နှစ်ယောက်က တကယ်ကို နတ်ဖက်တဲ့ စုံတွဲတွေပဲ”
ရန်ကိုင်သည် စုယန်နှင့် ရှနင်းချန်အား လှည့်ကြည့်လိုက်၏။ သုံးယောက်စလုံး ပြိုင်တူ ပြုံးလိုက်ကြလေသည်။
ကုန်းအောင်ဖုသည် ဝတ်သဘောအရ ပြောနေခြင်းဖြစ်မှန်း သိကြသော်လည်း မည်သူမှ သူမ၏စကားကို စိတ်ထဲ မထားချေ။
“ဒါနဲ့ ဂိုဏ်းချုပ်ဒီကို ဘာလို့ ရောက်လာလဲ သိလို့ရမလား။ ရှုခင်းတွေ ကြည့်ဖို့ဆိုရင် ကျွန်မ ချက်ချင်းပဲ စီစဉ်ပေးလို့ရတယ်။ ဖန်တောင်တန်းမှာ အရမ်းလှတဲ့ ရှုခင်းတွေ အများကြီးပဲ”
“မဟုတ်ဘူး။ ကျုပ်ဒီကို ရှုခင်းကြည့်ဖို့ ရောက်လာတာ မဟုတ်ဘူး” ရန်ကိုင်က ခေါင်းခါ၍ “အကြီးအကဲကုန်းဆီ တစ်ခုခု တောင်းဆိုချင်လို့ လာခဲ့တာ”
“ဂိုဏ်းချုပ် ဘာများ တောင်းဆိုချင်တာလဲ” ကုန်းအောင်ဖုက ပြုံး၍ “ဂိုဏ်းချုပ်ကြောင့်သာ မဟုတ်ရင် ဖန်သွေးရောင်ဂိုဏ်း ပျောက်ကွယ်သွားတာ ကြာနေပြီ။ အဲ့အတွက်တောင် ဂိုဏ်းချုပ်ကို ပြန်ပြီး ကျေးဇူးမဆပ်ရသေးဘူး။ ဂိုဏ်းချုပ် လိုအပ်တာရှိရင် ပြောလေ။ ကျွန်မ တတ်နိုင်တဲ့အပိုင်းကဆို အကောင်းဆုံး ကူညီပေးမယ်”
ရန်ကိုင်က ခေါင်းညိတ်၍ “ကျုပ်ဒီကို ပုံရိပ်တစ်ထောင်ဖန် နည်းနည်းလောက် လိုချင်လို့ ရောက်လာတာ။ အလောင်းဝိဥာဉ်ဂိုဏ်းနဲ့ တိုက်ပွဲမှာ ခင်ဗျားတို့ ပုံရိပ်တစ်ထောင်ဖန်တောင် ဘာမှ မထိခိုက်သွားဘူးမလား”
“ပုံရိပ်တစ်ထောင်ဖန်” ကုန်းအောင်ဖုက မျက်ခုံးပင့်လျက် “ပုံရိပ်တစ်ထောင်ဖန်ကတော့ ဘာမှဖြစ်မသွားဘူး။ ဒါပေမယ့် ဂိုဏ်းချုပ်တောင်းဆိုတာက နည်းနည်းတော့ ခက်လိမ့်မယ်။ အရင်လတွေတုန်းက ကျွန်မတို့ စုထားတာ နည်းနည်းလောက်ပဲ ရသေးတယ်။ လက်သီးဆုပ် နှစ်ဆုပ်၊ သုံးဆုပ်စာလောက်ပဲ ရှိဦးမယ်။ အဲ့လောက်က ဂိုဏ်းချုပ်အတွက် လောက်ပါ့မလား”
“အဲ့လောက်ကတော့ မရဘူး” ရန်ကိုင် ရယ်ချင်စိတ်ကို မနည်း အောင့်အည်းနေရသည်။
“အဲ့ဒါဆို… တိုက်ယွမ်ကိုပဲ ထပ်သွားယူခိုင်းရမှာပေါ့” ကုန်းအောင်ဖုက တုန့်ဆိုင်းတုန့်ဆိုင်းဖြင့် ပြောလိုက်သည်။
ပုံရိပ်တစ်ထောင်ဖန်ဂိုဏ်း၌ တိုက်ယွမ် တစ်ဦးသည်သာ ပုံရိပ်တစ်ထောင်ဖန်ကို ထုတ်ယူနိုင်စွမ်း ရှိပေသည်။
ထို့ကြောင့် ဖန်သွေးရောင်ဂိုဏ်းသည် ပုံရိပ်တစ်ထောင် ဖန်တောင် ကဲ့သို့သော ရတနာကြီးကို ပိုင်ဆိုင်ထားသည့်တိုင် အပြည့်အဝ အသုံးချနိုင်ခြင်း မရှိချေ။
“တပည့် အများကြီး တူးနိုင်မှာ မဟုတ်ဘူး။ ဒါပေမယ့် ရန်ကိုင်မှာတော့ နည်းလမ်းရှိလိမ့်မယ်လို့ ထင်တယ်” တိုက်ယွမ်က ရန်ကိုင်ဘက်သို့လှည့်၍ ပြောလိုက်သည်။
“ဂိုဏ်းချုပ်ရန်ကို နင်ဘယ်လိုတွေ ပြောနေတာလဲ။ ဂိုဏ်းချုပ်ကို ဘယ်လိုလုပ်ပြီး နာမည်တပ်ခေါ်ရဲတာလဲ” ကုန်းအောင်ဖုက တိုက်ယွမ်အား လှမ်းအော်ဟစ်လိုက်လေသည်။
တိုက်ယွမ်အား ဆူနေသော်ငြား ကုန်းအောင်ဖု၏ အကြည့်သည် ရန်ကိုင်ဆီသို့သာ ရောက်နေခဲ့သည်။ ရန်ကိုင် ဒေါသမထွက်သွားမှန်း တွေ့လိုက်ရမှပဲ စိတ်အေးသွားခဲ့၏။
“ရတယ် ဘာမှမဖြစ်ဘူး။ ကျုပ် အစ်မတိုက်ယွမ်နဲ့ သိလာတာကြာပြီ။ အရင်ကလည်းက အခုအတိုင်းပဲ ခေါ်ကြတာ” ရန်ကိုင်က ရယ်ရယ်မောမောဖြင့် ပြောလိုက်၏။
တိုက်ယွမ်ကမူ အံကြိတ်၍သာ ရန်ကိုင်အား ဒေါသတကြီး ကြည့်လိုက်လေသည်။
အလောင်းဝိဥာဉ်ဂိုဏ်း ထကြွမသောင်းကျန်းစဉ်က သူမနှင့် ရန်ကိုင်သည် အဆင့်တူများသာ ဖြစ်ကြသော်ငြား ယခုမူ ထိုသကောင့်သားသည် သူမ၏ ဆရာကိုပင် အမိန့်ပေးနိုင်စွမ်း ရှိနေခဲ့လေပြီ။
“အခုလို နားလည်ပေးတဲ့အတွက် ဂိုဏ်းချုပ်ကို ကျေးဇူးအများကြီးတင်ပါတယ်။ လက်အောက်ငယ်သား တိုက်ယွမ်ကို ကောင်းကောင် မသင်ကြားပေးလိုက်လို့ပါ” ကုန်းအောင်ဖုက ဦးညွှတ်၍ ချက်ချင်းပဲ ခေါင်းစဉ်ပြောင်းလိုက်၏ “ဂိုဏ်းချုပ်ရန်မှာ ပုံရိပ်တစ်ထောင်ဖန်ကို တူးနိုင်တဲ့ နည်းလမ်း ရှိတာလား”
“ရှိတယ်” ရန်ကိုင် ခေါင်းညိတ်လိုက်သည်။
“အဲ့ဒါဆိုရင် ကိစ္စမရှိတော့ဘူး။ ဂိုဏ်းချုပ် တူးချင်သလောက် တူးသွားလို့ရတယ်။ ကျွန်မတို့ တူးမယ်ဆိုရင်တောင် အခု လောလောဆယ် ပုံရိပ်တစ်ထောင်ဖန်တွေကို ဘယ်နေမှာ သုံးမယ်ဆိုတာ စဉ်းစားရသေးတာ မဟုတ်ဘူး။ ဂိုဏ်းချုပ်၊ ကျွန်မနောက် လိုက်ခဲ့ပေးပါ”
ကုန်းအောင်ဖုသည် ချက်ချင်းပဲ သဘောတူ၍ ရန်ကိုင်အား ဦးဆောင် ခေါ်သွားလေသည်။
ရန်ကိုင်၊ စုယန်နှင့် ရှနင်းချန်တို့သည်လည်း သူမနောက်သို့ အလျင်အမြန် လိုက်သွားကြလေသည်။
ဖန်သွေးရောင်ဂိုဏ်း၏ ကျင့်ကြံသူများသည် ရန်ကိုင် မည်သည့်နည်းလမ်းကိုသုံး၍ ပုံရိပ်တစ်ထောင်ဖန်အား တူးမည်လဲ ဆိုသည်ကို အတော်လေး သိချင်နေကြသည့်အတွက် လိုက်ကြည့်ကြလေသည်။
“နင်တကယ်ရူးတာပဲ” ယင်စုတျယ်သည် လူအုပ်ကြီးကို တိုးဝှေ့၍ တိုက်ယွမ်နားသို့ တိုးကပ်ကာ ပြောလိုက်၏ “ဂိုဏ်းချုပ်က နင့်ကို သူနဲ့ အောင်သွယ်တော် လုပ်ပေးနေတာကို ဘာလို့ ငြင်းလိုက်တာလဲ”
“မငြင်းလို့ ဘာလုပ်ရမှာလဲ။ သူ့ရင်ခွင်ထဲ ပစ်ဝင်ရမှာလား” တိုက်ယွမ်က ပြန်ပြော၏။
ယင်စုတျယ် ခဏတာ ဘာပြန်ပြောလို့ ပြောရမှန်းမသိ ဖြစ်သွားခဲ့လေသည်။ ခဏလောက် စဉ်းစားပြီးနောက် ရယ်သွမ်းသွေး၍ “ငါသာဆိုရင် အဲ့လိုပဲ လုပ်မှာ။ သူက အရိပ်ကြယ်မှာ အားအကောင်းဆုံးပဲဟာကို။ သူလို လူတစ်ယောက်ကို တမင်တကာ ချဉ်းကပ်တာ ဘာရှက်စရာရှိမှာမို့လို့လဲ”
“ပြောရတာက လွယ်တာပေါ့။ ဒါပေမယ့် သူ့ဘေးက မိန်းကလေး နှစ်ယောက်ကို နင်မမြင်တာလား” တိုက်ယွမ်က ယင်စုတျယ်အား အထင်တသေး ကြည့်လိုက်၏။
စုယန်နှင့် ရှနင်းချန်အကြောင်း ပြန်စဉ်းစားမိလိုက်သော် ယင်စုတျယ် လုံးဝ ကြောင်အမ်းအမ်း ဖြစ်သွားလေ၏။ သူမ ကိုယ်တိုင်ပင် ထိုအမျိုးသမီးနှစ်ဦးရှေ့၌ နိမ့်ကျသလို ခံစားရ၏။
စုယန်သည် အားကောင်းပြီး အေးစက်သည့် အရှိန်အဝါကို မသိလိုက်မသိဘာသာ ထုတ်လွှတ်နေ၏။ သူမရှေ့တွင် ရပ်နေရသည်မှာ သူမအတွက်ပင် အလွန်ကို ဖိအားများလှသည်။ စုယန် ရပ်နေသည့်အတွက် ယဉ်စုတျယ်လည်း ရန်ကိုင်အား သွားမပြာရဲတော့ချေ။
ဟိုရိုးရှင်းသိမ်မွေ့သည့် ဇာပဝါဝတ်ထားသော အမျိုးသမီးကမူ မြင့်မြတ်သည့် အရှိန်အဝါတစ်မျိုးမျိုးကို ပေးစွမ်းနေ၏။ အမျိုးသမီး နှစ်ဦးစလုံးသည် သူမအား သိမ်ငယ်စိတ် ဝင်စေမိသည်။
“ဘာပဲဖြစ်ဖြစ်၊ ဂိုဏ်းချုပ် ပျော်ဖို့က အဓိကပဲလေ” ယင်စုတျယ်က အေးစက်စက် အမူအရာဖြင့် နှာခေါင်းရှုံ့လိုက်၏။
“ငါနင့်နဲ့ ပြိုင်ငြင်းမနေချင်ဘူး” တိုက်ယွမ်သည် ယင်စုတျယ်အား မျက်နှာသေဖြင့် တစ်ချက်ကြည့်လိုက်ပြီးနောက် ခေါင်းခါ၍ လူအုပ်ကြီးနောက် လိုက်သွားလေသည်။
“တုံးလိုက်တဲ့ စီနီယာအစ်မ၊ ရုပ်ဆိုးမ” ယင်စုတျယ်သည် တိုက်ယွမ်အား မကျေမနပ်ဖြင့် ကြည့်ရင်း ကျိန်ဆဲလေသည်။
တိုက်ယွမ်ကမူ မကြားချင်ယောင်သာ ဆောင်နေ၏။
ပုံရိပ်တစ်ထောင်ဖန်တောင်သည် အလွန်ကိုမှ ကြီးမားလှသော ပုံရိပ်တစ်ထောင်ဖန်ကျောက်တုံးကြီး ဖြစ်လေသည်။ ဤကျောက်တုံးကြီးသည် ပုံရိပ်တစ်ထောင်ဖန်အလင်းကိုလည်း ထုတ်လွှတ်နိုင်၏။
ပုံရိပ်တစ်ထောင်ဖန်အလင်းသည် ဒြပ်ကြီးငါးပါးကိုသာမက စိတ်ဝိဥာဉ်ကိုပင် ဖိနှိပ်နိုင်ပေသည်။
လွန်ခဲ့သော နှစ်ပေါင်းများစွာက တိုက်ယွမ်မှ ရန်ကိုင်အား ပေးခဲ့သည့် ပုံရိပ်တစ်ထောင်ဖန်လုံးမှာ ပုံရိပ်တစ်ထောင်ဖန် အပိုင်းအစများကို နှစ်ပေါင်းများစွာကြာအောင် စားသုံးခြင်းမှ ဖြစ်ပေါ်လာသည့်အရာ ဖြစ်သည်။ ရှင်းရှင်းပြောရလျှင် မွန်းစတားသားရဲ တစ်ကောင်၏ မွန်းစတားအမြူတေနှင့် တူပေသည်။ ထိုပုံရိပ်တစ်ထောင်ဖန်လုံးကို ရန်ကိုင်မှ သန့်စင်ခဲ့ပြီး သုတ်သင်ခြင်းနတ်ဆိုးမျက်လုံးနှင့် ပေါင်းစပ်ခဲ့သည်။
ထို့အပြင် ပုံရိပ်တစ်ထောင်ဖန်သည် ပုံစံမျိုးမျိုးသို့ ပြောင်းလဲနိုင်သော စွမ်းရည်ကိုလည်း ပိုင်ဆိုင်ထားသေးသည်။
ပုံရိပ်တစ်ထောင်ဖန်အား မှော်ရတနာ သွန်းလုပ်ရာတွင် ထည့်သွင်းအသုံးပြုမည်ဆိုပါက ရလာသည့် မှော်ရတနာသည် အမျိုးမျိုးသော ပုံစံအသွင်သို့ ပြောင်းလဲနိုင်သည်ဟု ကောလဟာလများ ရှိပေသည်။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၂၈)
ပုံရိပ်တစ်ထောင်ဖန် ပမာဏများစွာသုံး၍ တည်ဆောက်ထားသော အထက်စကြာဝဠာဂိုဏ်း၏ တန်ခိုးရှင်ဘုရင်အဆင့် ကြယ်သင်္ဘောသည် အံ့မခန်း ခုခံရေးစွမ်းရည်များကို ပိုင်ဆိုင်ထားရုံမက တပ်ဆင်ထားသော အစီအရင်များကို အသုံးပြု၍ ဥက္ကာခဲတစ်ခုအသွင်လည်း ပြောင်းလဲ၍ ရပေသည်။
ယန်ယန်သည်သာလျှင် ထိုကဲ့သို့သော ကြယ်သင်္ဘောမျိုးကို တည်ဆောက်နိုင်ပေလိမ့်မည်။ ကြယ်စီရင်စုထဲရှိ မည်သည့် ပန်းပဲပညာရှင်မှ ပုံရိပ်တစ်ထောင်ဖန် ပမာဏများစွာကို သုံး၍ ထိုကဲ့သို့သော ကြယ်သင်္ဘောမျိုး တည်ဆောက်နိုင်လိမ့်မည် မဟုတ်ပေ။
ကျောက်တုံးရုပ်သေးရုပ်သည် အမျိုးမျိုးသော ရှားပါး သတ္တုများအား ဝါးမြိုပြီး အသန့်စင်ဆုံး သတ္တုများအဖြစ်သို့ ပြန်လည် သန့်စင်ပစ်နိုင်သည့် မွေးရာပါစွမ်းရည်ကို ပိုင်ဆိုင်ထား၏။ ပုံရိပ်တစ်ထောင်ဖန်ဟာလည်း သတ္တု တစ်မျိုးသာ ဖြစ်သဖြင့် ကျောက်တုံးရုပ်သေးရုပ်အဖို့ ထိုအရာကို ဝါးမြိုရန် ပြဿနာ မရှိပေ။
နယ်ပယ်ကျောက်တောင်ပင်လျှင် ကျောက်တုံးရုပ်သေးရုပ် ဝါးမြိုလိုက်သည့်အတွက်ကြောင့် ဟောင်းလောင်းပြီး ဖြစ်သွားခဲ့ရာ ပုံရိပ်တစ်ထောင်ဖန်ကကော မည်သို့များ ကျောက်တုံး ရုပ်သေးရုပ်၏ ကိုက်ချက်ကို ခုခံနိုင်မည်နည်း။
အားလုံး၏ အံ့အားသင့်နေသည့် အကြည့်အောက်မှာပင်၊ ရှောင်ရှောင်သည် ပုံရိပ်တစ်ထောင်ဖန်တောင်ဆီသို့ ကွတကွတဖြင့် လျှောက်သွားလိုက်ပြီး ၎င်း၏ပါးစပ်ကိုဟ၍ စတင် ကိုက်ဝါးတော့လေသည်။
ဂျွတ်…ဂျွတ်… ဂျွတ်…
တဂျွတ်ဂျွတ် မြည်သံများ အဆက်မပြတ် ထွက်ပေါ်လာ၏။ ကျောက်တုံးရုပ်သေးရုပ်သည် အလွန်ကိုမှ မြန်ဆန်သော အမြန်နှုန်းဖြင့် ပုံရိပ်တစ်ထောင်ဖန်တောင်အတွင်းသို့ လိုဏ်ခေါင်း တစ်ခု တူးသွားလေသည်။ နှစ်ပေါင်းများစွာကြာအောင် တည်ရှိလာသော ပုံရိပ်တစ်ထောင်ဖန်တောင်သည် ကျောက်တုံး ရုပ်သေးရုပ်ကြောင့် တစ်ခဏအတွင်း အစိတ်အပိုင်းအကြီးကြီး ဆုံးရှုံးလိုက်ရ၏။
ထိုမြင်ကွင်းကိုကြည့်ရင်း ဖန်သွေးရောင်ဂိုဏ်းမှ ကျင့်ကြံသူများ ကြက်သေသေနေခဲ့ကြလေသည်။
မကြာမီ ရှောင်ရှောင်၏ ခန္ဓာကိုယ်သည် ပုံရိပ်တစ်ထောင်ဖန်တောင်၏ အတွင်းပိုင်းသို့ ရောက်သွား၏။ မည်သူမှ ရှောင်ရှောင်ကို မတွေ့ရတော့သော်လည်း တဂျွတ်ဂျွတ် ကိုက်ဝါးသံများသည် ရှောင်ရှောင် ပုံရိပ်တစ်ထောင်ဖန်များကို ဆက်၍ ကိုက်ဝါးနေကြောင်း သက်သေပြနေခဲ့သည်။
“ဂိုဏ်းချုပ်၊ ဒီအသက်ရှိနေတဲ့ ရုပ်သေးရုပ်မှာ အဲ့လို မှော်ဆန်တဲ့ စွမ်းရည်ရှိတာလား” ကုန်းအောင်ဖုက အံ့အားသင့်နေသည့် လေသံဖြင့် မေးလိုက်သည်။
ရှောင်ရှောင်ကို သူမသိပေသည်။ နဂါးလိုဏ်ဂူတောင်နှင့် တိုက်ပွဲတွင် ရှောင်ရှောင်သည် ကျောက်ဘီလူးကြီး အသွင်သို့ ပြောင်း၍ အနက်ရောင်တုတ်ချောင်းကို ဝှေ့ရမ်းကာ တိုက်ခိုက်ခဲ့သည် မဟုတ်ပေလော။
ကျောက်တုံးရုပ်သေးရုပ်သည် အလွန် အားကောင်းသော တိုက်ခိုက်နိုင်စွမ်းကို ပိုင်ဆိုင်ထားရုံမက ပုံရိပ်တစ်ထောင်ဖန်ကို အလွယ်တကူ ဝါးစားပစ်နိုင်သည့် မှော်ဆန်ဆန် စွမ်းရည်ကိုလည်း ပိုင်ဆိုင်ထားဦးမည်ဟု မထင်ထားခဲ့ချေ။
“ဟဲဟဲ၊ သူ့လို သက်ရှိမျိုးက အရမ်းရှားတယ်။ အရင်တုန်းက ဒီလို ကိစ္စမျိုးတွေ ကြုံရပြီဆို သူကပဲ ကူညီပေးခဲ့တာ” ရန်ကိုင်က ပြန်ပြောလိုက်သည်။ အသေးစိတ်တော့ ရှင်းပြမနေခဲ့ချေ။ ထို့နောက် ဆက်၍ ပြောလိုက်၏ “ကျုပ် ပုံရိပ်တစ်ထောင်ဖန် အများကြီး လိုတယ်…”
“ဂိုဏ်းချုပ် လိုချင်သလောက် ယူသွားပါ။ တစ်တောင်လုံး တူးယူသွားလည်း ဘာမှမဖြစ်ပါဘူး” ကုန်းအောင်ဖုက ချက်ချင်းပဲ ပြန်၍ ပြောလိုက်သည်။
“အဲ့လောက်ကြီးတော့ မလိုပါဘူး” ရန်ကိုင်က ရယ်ချင်စိတ်ကို ချုပ်တည်းရင်း “ပုံရိပ်တစ်ထောင်ဖန်တောင်က အကြီးကြီးပဲ။ ကျုပ်က သူ့ရဲ့ တစ်ရာခိုင်းနှုန်းလောက်ကိုပဲ လိုတာ”
“ဒီတူးနှုန်းနဲ့ဆို အဲ့လောက်ရဖို့ နှစ်ရက်သုံးရက်လောက် ကြာဦးမှာ။ ဂိုဏ်းချုပ် စိတ်မရှိရင် ကျွန်မတို့ဆီမှာ ခဏလောက် လာနားလိုက်လေ။ နှစ်ရက်ကြာတော့မှပဲ ဒီက အခြေအနေကို တစ်ချက် လာပြန်စစ်ဆေးကြည့်ပေါ့”
“အင်း။ အဲ့အတိုင်းပဲ လုပ်ကြတာပေါ့” ရန်ကိုင် ခေါင်းညိတ်လိုက်၏။
ကုန်းအောင်ဖုသည် ရန်ကိုင်၊ စုယန်နှင့် ရှနင်းချန်တို့အား ဖန်သွေးရောင်ဂိုဏ်း၏ အဓိက တောင်ထွတ်ဆီ ဦးဆောင် ခေါ်သွားပြီး သူတို့အတါက် အကောင်းဆုံး နန်းတော်တစ်လုံးကို ပြင်ဆင်ပေးလိုက်လေသည်။
စားပွဲသောက်ပွဲကိုတော့ ပြင်ဆင်ပေးမနေခဲ့ချေ။ ရန်ကိုင် ထိုကဲ့သို့သော အရာများကို စိတ်မဝင်စားမှန်း ကုန်းအောင်ဖု သိသည်။ ရန်ကိုင်၏ နေ့တဒူဝ ဝေယျာဝစ္စ ကိစ္စများကို ဆောင်ရွက်ရန်အတွက် အစေခံအချို့ကို ထားရစ်ခဲ့ပြီး ရန်ကိုင်အား လုံးဝ မလိုအပ်လျှင် သွားမနှောင့်ယှတ်ရန်လည်း သေချာ မှာကြားခဲ့ပေသည်။
သုံးရက်ကြာပြီးနောက်တွင် အကုန်ဆုံး အဆင်သင့် ဖြစ်သွား၏။ လွန်ခဲ့သည့် သုံးရက်လုံးလုံး ရှောင်ရှောင်သည် ပုံရိပ်တစ်ထောင်ဖန်များကို တောက်လျှောက် ဝါးမြိုခဲ့သည့် အတွက် သူ့ဝမ်းဗိုက်လေးပင် သိသိသာသာ ဖောင်းကားလာ၏။
ရန်ကိုင်သည် ရှောင်ရှောင်ဝါးမြိုထားသည့် ပုံရိပ်တစ်ထောင်ဖန်းများကို ထွေးထုတ်ခိုင်းကာ သိုလှောင်လက်စွပ်ထဲ ထည့်သိမ်းလိုက်၏။ ထို့နောက် ကုန်းအောင်ဖုကို နှုတ်ဆက်၍ ထွက်ခွာလာခဲ့လေသည်။
မထွက်သွားခင် တန်ခိုးရှင်အဆင့် မှော်ရတနာအချို့နှင့် တန်ခိုးရှင်အဆင့် ဆေးလုံးအချို့ကိုအား ဖန်သွေးရောင်ဂိုဏ်း အတွက် ချန်ရစ်ခဲ့လိုက်လေသည်။
ဤသည်မှာ ပုံရိပ်တစ်ထောင်ဖန်အများကြီးကို ယူသွားသည့် အတွက် အလျော်အစားသဘော ပြန်ပေးခြင်း ဖြစ်သည်။ တန်ခိုးရှင်အဆင့် မှော်ရတနာများဖြစ်စေ၊ တန်ခိုးရှင်အဆင့် ဆေးလုံးများဖြစ်စေ၊ နှစ်ခုစလုံးသည် အရိပ်ကြယ်၌ အလွန် အဖိုးတန်သည့် အရာများ ဖြစ်ကြသည်. ထို့ကြောင့် ကုန်းအောင်ဖုသည် ထိုအရာများကို ဝမ်းမြောက်ဝမ်းသာ လက်ခံယူထားလိုက်လေသည်။
ဆယ်ရက်ကြာပြီးနောက်၊ အထက်စကြာဝဠာဂိုဏ်းထဲ၌…
အစည်းအဝေးခန်းမ အပြင်ဘက်ရှိ အဓိကမြေကွက်လပ်၌ ဟင်းလင်းပြင်အစီအရင်သစ်တစ်ခု ရှိနေခဲ့လေ၏။
ဤဟင်းလင်းပြင်အစီအရင်သည် ရန်ကိုင် ယခင်က ခင်းကျင်းခဲ့သည့် ဟင်းလင်းပြင်အစီအရင်များနှင့် အနည်းငယ် ကွာခြားပေသည်။ အဓိက ကွာခြားချက်မှာ အရွယ်အစားနှင့် အရှိန်အဝါပင် ဖြစ်သည်။ လက်ရှိ ဟင်းလင်းပြင်အစီအရင်၏ အရွယ်အစားမှာ ရန်ကိုင် ယခင် ခင်းကျင်းခဲ့သည့် အစီအရင်များ၏ အရွယ်အစားထက် ပိုသေးသော်ငြား အရှိန်အဝါမှာတော့ ပို၍ အားကောင်း၏။
ဤအစီအရင်သည် ကမ္ဘာခြားဟင်းလင်းပြင်အစီအရင်တစ်ခု ဖြစ်ပေသည်။ အရိပ်ကြယ်၏ အပြင်ဘက်မှ စကြာဝဠာဂိုဏ်းဆီသို့ ဦးတည်မည့် အစီအရင်လည်း ဖြစ်၏။
သူယခင်က လုပ်ခဲ့သည့်နည်းတူ ယခု အခြားသော ကြယ်တစ်လုံးပေါ်တွင် ဟင်းလင်းပြင်အစီအရင်တစ်ခု သွားခင်းကျင်းရန် လိုအပ်လေပြီ။ သို့မှသာ ကြယ်နှစ်လုံးကြား အပြန်အလှန်သွားလာရေး လမ်းကြောင်းတစ်ခုကို ဖန်တီးနိုင်ပေလိမ့်မည်။
ဤအစီအရင်နှင့်ဆိုပါက အထက်စကြာဝဠာဂိုဏ်းတွင် ဟင်းလင်းပြင်အစီအရင် နှစ်ခု ရှိလာခဲ့လေပြီ။
တစ်ခုသည် အထက်စကြာဝဠာဂိုဏ်း၏ အပြင်ဘက်တွင် ခင်းကျင်းထားသည့် ဟင်းလင်းပြင်အစီအရင်ဖြစ်ပြီး အရိပ်ကြယ် တစ်ခုလုံးနှင့် ဆက်သွယ်ထား၏။ နောက်တစ်ခုမှာ အထက်စကြာဝဠာဂိုဏ်း အတွင်းပိုင်းထဲတွင် ဖြစ်ပြီး ကြယ်စီရင်စုထဲရှိ ကြယ်တစ်လုံးနှင့် ဆက်သွယ်ရန် စီစဉ်ထားသည့် ဟင်းလင်းပြင်အစီအရင် ဖြစ်သည်။
လွန်ခဲ့သည့်သုံးလအတွင်း အထက်စကြာဝဠာဂိုဏ်းသည် လေဟာနယ်သလင်းကျောက်များကို အသည်းအသန် ရှာဖွေခဲ့သော်ငြား စုစုပေါင်းမှ နှစ်ထောင်ခန့်သာ ရရှိခဲ့သည်။
ထိုလေဟာနယ်သလင်းကျောက်များသည် လက်ရှိ အရိပ်ကြယ်တစ်ခုလုံးမှ ထောက်ပံ့ပေးနိုင်သည့် လေဟာနယ် သလင်းကျောက် အားလုံးနီးပါးကို ကိုယ်စားပြုနေသည်။ အသစ်အသစ်သော လေဟာနယ်သလင်းကျောက်တွင်းများကို ထပ်မံရှာမတွေ့လျှင် မနှောင်းသော အနာဂတ်တွင် အရိပ်ကြယ်၌ လေဟာနယ်သလင်းကျောက် ပြတ်လပ်မှုများ ဖြစ်လာနိုင်၏။ သို့သော်လည်း နှစ်ထောင်ခန့်သော လေဟာနယ်သလင်းကျောက်များဖြင့်သာ ဆိုပါက ကမ္ဘာခြား ဟင်းလင်းပြင်အစီအရင် သုံးလေးခုလောက်ကိုပင် တည်ဆောက်နိုင်ပေသည်။
လုပ်စရာအချို့ကို လတ်စသတ်ပြီး မိသားစုဝင်များ၊ မိတ်ဆွေများနှင့် စကားပြောပြီးနောက် သဲမီးတောက်နယ်မြေ၏ ခြောက်လွှာမြောက်သို့သွားကာ ယန်ယန်နှင့် ခဏ သွားစကားပြော၏။ ထို့နောက် ကြယ်လွန်းပျံကိုထုတ်ကာ ကြယ်စီရင်စုထဲသို့ ထွက်လာလိုက်လေသည်။
အထက်စကြာဝဠာဂိုဏ်းထဲတွင် သောင်းနှင့်ချီသော လူများသည် ကောင်းကင်ယံထက် တဖြည်းဖြည်း သေးကာ ပျောက်ကွယ်နေသော အလင်းစက်လေးအား မော့ကြည်နေ၏။
“အဆင်ပြေပါစေ” စုယန်နှင့် ရှနင်းချန်တို့သည် သူတို့ နေထိုင်သည့် တောင်ထွတ်အသီးသီးပေါ်တွင် ရပ်၍ ရန်ကိုင်အား ဆုတောင်းပေးလိုက်ကြသည်။
……
အရိပ်ကြယ်မှ မိုင်သန်းပေါင်းများစွာ ဝေးကွာသည့် နေရာတစ်ခုတွင်… ကြမ်းတမ်းစွာ တိုက်ခတ်နေသည့် အာကာသ လေပြင်များကြောင့် အာကာသမုန်တိုင်းများ ဖြစ်ပေါ်နေခဲ့၏။ များပြားလွန်းလှသော ပရမ်းပတာ ရွေ့လျားနေသည့် ဂြိုလ်သိမ်ဂြိုလ်မွှားများမှာလည်း ထိုအာကာသမုန်တိုင်းများထဲ လွင့်မျောပါနေခဲ့ကြ၏။
ဤနေရာသည် အရိပ်ကြယ်နှင့် ကြယ်စီရင်စုကြီးအား ပိုင်းခြားထားသည့် အကာအရံတစ်ခု ဖြစ်၏။ အရိပ်ကြယ်မှ ကျင့်ကြံသူမှ ကျင့်ကြံသူများကမူ ဤနေရာကို သေခြင်းတရားဇုံဟု ခေါ်ကြသည်။
မိုင်သန်းပေါင်းများစွာ ကျယ်ဝန်းသော သေခြင်းတရားဇုံသည် ခြံစည်းရိုးတစ်ခုနှယ် အရိပ်ကြယ်မှ မည်သူ့ကိုမှ အခြားနေရာသို့ သွား၍မရအောင်၊ ကြယ်စီရင်စုထဲမှ အခြားသူများကိုလည်း အရိပ်ကြယ်သို့ လာမရအောင် တားဆီးထားလေသည်။
ဤပြဿနာလောက်သာ ဆိုလျှင်တော့ တန်ခိုးရှင်ဘုရင် အဆင့် ကျင့်ကြံသူများ ဤနေရာသို့ လာရဲကြပေသည်။ အရိပ်ကြယ်သည် အတော်လေးကို ချောင်ကျသည့် နေရာတွင် ရှိနေသော်ငြား ကြယ်စီရင်စုကြီးတစ်ခုလုံးကို လိုက်ပတ် ကြည့်ရှုကာ အခွင့်အရေးရှာနေကြသည့် တန်ခိုးရှင်ဘုရင်အဆင့် ကျင့်ကြံသူများမှာလည်း တစ်ယောက်စ၊ နှစ်ယောက်စ အမြဲတစေ ရှိနေတတ်သည် မဟုတ်ပေလော။
သို့သော်လည်း သေခြင်းတရားဇုံးတွင် တန်ခိုးရှင်ဘုရင်အဆင့် ကျင့်ကြံသူများပင် ကြောက်ရသည့် စွမ်းအားတစ်မျိုး ရှိနေ၏။
ဧကရာဇ်ဖိအားပင်…
ဧကရာဇ်ဖိအားသည်သာ တန်ခိုးရှင်ဘုရင်အဆင့် ကျင့်ကြံသူများကို ဤနေရာသို့ မလာရဲအောင် တားဆီးထားနိုင်၏။
ယခင်တစ်ခါက တန်ခိုးရှင်ဘုရင်အဆင့် ကြယ်သင်္ဘော၏ အကာအကွယ်ကိုသုံး၍ သေခြင်းတရားဇုံကို ဖြတ်ကျော်ခဲ့သော်ငြား ယခုတစ်ကြိမ်တွင်တော့ တစ်ယောက်တည်း လာခဲ့ခြင်း ဖြစ်သည့် အတွက် ကိုယ့်အားကိုယ်ကိုးရန်သာ ရှိတော့ပေသည်။
သေခြင်းတရားဇုံ မည်ကဲ့သို့ ဖြစ်ပေါ်လာခဲ့သလဲ ဆိုသည်ကို ရန်ကိုင် မသိသော်ငြား ယန်ယန် ပြောပြခဲ့သည့် ဇာတ်လမ်းများကို နားထောင်ပြီးနောက် ဤနေရာသည် ယန်ယန်နှင့် အင်းဆက်ဧကရာဇ်ကြားမှ တိုက်ပွဲကြောင့် ဖြစ်ပေါ်လာရမှန်း ခန့်မှန်းမိသွားခဲ့သည်။
ထို့ကြောင့် ဤနေရာတစ်ခုလုံး ဧကရာဇ်ဖိအားတို့ဖြင့် ပြည့်နေခြင်း ဖြစ်သည်။
ကံကောင်းစွာဖြင့် ဧကရာဇ်ဖိအားမှာ ကြောက်မက်ဖွယ် ကောင်းသော်ငြား ရန်ကိုင်သည် ဧကရာဇ်ဖိအားကို ပထမဆုံးအကြိမ် ခံစားဖူးခြင်းမဟုတ်။ ဧကရာဇ်ဥယျာဉ် ဖွင့်စဉ်အခါက ဧကရာဇ်ဥယျာဉ်မှ ဖြာထွက်နေသော ဧကရာဇ်ဖိအားကို သုံး၍ပင် လေဟာနယ်စွမ်းအင်ကို သူ့ရှီစွမ်းအင်ထဲသို့ ပေါင်းထည့်ခဲ့သေး၏။
ဧကရာဇ်ဖိအားကို ရင်ဆိုင်ရမည်ဆိုပါက မည်သူ့ထက်ကို မဆို ရန်ကိုင်သည် သူ့ကိုယ်သူ ပိုယုံကြည်ချက် ရှိပေသည်။
ရန်ကိုင်သည် အဘက်ဘက်မှ သူ့ဆီသို့ တိုးဝင်နေသော ဂြိုလ်သိမ်ဂြိုလ်မွှားများကို ရှောင်ရှားရင်း သေခြင်းတရားဇုံထဲသို့ ပြေးဝင်သွားလေသည်။
မမြင်နိုင်သော အာကာသလေပြင်းများသည် ဓါးသွားများနှယ် သူ့အား ဖြတ်တောက်ရန် ကြိုးစားခဲ့သော်ငြား သတ္တုချင်း ထိခတ်သံတို့သာ ထွက်ပေါ်လာခဲ့ရသည်။ ငါးရောင်ခြယ် အလင်းတန်းတို့ ရန်ကိုင်ဆီမှ ဖြာထွက်လာပြီး သံချပ်ကာ အင်္ကျီ တစ်ခုနှယ် ရန်ကိုင်တစ်ကိုယ်လုံးကို လွှမ်းခြုံသွားလေ၏။
အရိပ်ကောင်းကင်ကြာပန်းများကို အဆက်မပြတ် သောက်သုံးခဲ့မှုကြောင့် ရန်ကိုင်၏ ခန္ဓာကိုယ်သည် အလွန်ကိုမှ အားကောင်းသည့် အဆင့်ထိ ရောက်နေခဲ့လေပြီ.
တန်ခိုးရှင်ဘုရင်အဆင့် ကျင့်ကြံသူများကို လက်တွန့်အောင် လုပ်နိုင်သော အာကသလေပြင်းများသည် ရန်ကိုင်အား မည်သည့် ဒဏ်ရာမှရအောင် မလုပ်နိုင်ခဲ့ချေ။ သူ့အား ရံဖန်ရံခါ လာမှန်သည့် ဂြိုလ်သိမ်ဂြိုလ်မွှားများမှာလည်း တစ်စစီသာ ပျက်စီးသွားကြရ၏။
ရန်ကိုင်သည် အာကာသမုန်တိုင်းများထဲသို့ အကြောက်အလန့်မရှိ ပြေးဝင်သွားပြီး အချိန်အတော် ကြာပြီးသည့်နောက်တွင် အာကာသမုန်တိုင်း၏ အခြား တစ်ဖက်မှ ပြန်ထွက်လာခဲ့သည်။
ရန်ကိုင်သည် ရပ်တန့်မရသော အရှိန်အဟုန်ဖြင့် အတားအဆီး အားလုံးကို ဖြတ်ကျော်သွားလေသည်။
သေခြင်းတရားဇုံထဲတွင် ယှတ်သိုင်းနေသော ဧကရာဇ်ဖိအားသည်ပင် ရန်ကိုင်အား ဘာမှမလုပ်နိုင်ချေ။ ထို့အစား ရန်ကိုင်သည် ဧကရာဇ်ဖိအားထဲ ကိန်းအောင်းနေသော ဆန်းကြယ်နက်နဲသည့် သဘောတရာများကိုပင် လေ့လာနေလိုက်သေး၏။
ဤသို့ လေ့လာခြင်းသည် နယ်ပယ်ကျောက်တုံးထဲရှိ စွမ်းအင်များကို စုပ်ယူခြင်းထက် ပိုပြီး အကျိုးရှိပေသည်။
ရန်ကိုင်၏ရှီသည် ပြီးပြည့်စုံခြင်းအဆင့်သို့ ရောက်နေလေပြီ။ သူတော်စင်ချီနှင့် စိတ်စွမ်းအင်မှာလည်း တန်ခိုးရှင်အဆင့် ကျင့်ကြံသူတစ်ဦး စုဆောင်းနိုင်သည့် အကန့်အသတ်သို့ ရောက်နေလေပြီ။
အရိပ်ကြယ် လောကနိယာမများ၏ ဖိနှိပ်ထားခြင်း ခံရသည့် အတွက်ကြောင့်သာ မဟုတ်လျှင် အစောကြီးကတည်းက တန်ခိုးရှင် ဘုရင်အဆင့်သို့ ချိုးဖျက်ရန် ကြိုးစားနေလေပြီ။
ထိုသို့ သွားနေရင်းမှ မကြာခင် ပြဿနာတစ်ခုနှင့် ရန်ကိုင် ကြုံလာရလေသည်။ သေခြင်းတရားဇုံထဲတွင် ဧကရာဇ်ဖိအားကို လေ့လာရသည်မှာ တကယ်ကို ရှားပါးသည့် အခွင့်အရေးတစ်ရပ် ဖြစ်သော်လည်း ဧကရာဇ်ဖိအားသည် သူနားလည်နိုင်သည့် အကန့်အသတ်ထက်ကို ကျော်လွန်နေကာ အလွန်ကိုမှ နက်နဲဆန်းကြယ်နေ၏။ နယ်ပယ်ကျောက်တုံးထဲရှိ စွမ်းအင်များကဲ့သို့ မဟုတ်ချေ။
စဉ်းစားကြည့်လိုက်သည့်နောက် အကြောင်းအရင်းကို နားလည်သွားခဲ့လေသည်။
သူသည် လက်ရှိတွင် တန်ခိုးရှင်တတိယအဆင့်တွင် ရှိနေ၏။ တန်ခိုးရှင်အဆင့်အထက်တွင် တန်ခိုးရှင်ဘုရင်အဆင့်ရှိပြီး တန်ခိုးရှင်ဘုရင်အဆင့်ထက်တွင် နောက်တစ်ဆင့် ရှိနေသေးကာ ထိုအဆင့်၏ အထက်တွင်မှ ယန်ယန် ရောက်နေသည့်အဆင့် လာသည်။
တန်ခိုးရှင်အဆင့်လေးဖြင့် သူ့ထက် အဆင့်ကြီးအများကြီး ပိုမြင့်မားသော အဆင့်မှ ဧကရာဇ်ဖိအားကို နားလည်နိုင် ကြိုးစားခြင်းမှာ သူ့ကိုယ်သူ အရမ်း အထင်ကြီးနေခြင်း ဖြစ်သည်။
လက်ရှိ ရန်ကိုင် လုပ်နေသည့်ပုံစံမှာ လေးဘက်ထောက်ပင် မသွားတတ်သေးသော မွေးကင်းစကလေးတစ်ဦး မတ်တပ်ရပ် လမ်းလျှောက်ရန် ကြိုးစားနေသည်နှ့်ပင် တူပေသေးသည်။
သေခြင်းတရားဇုံထဲရှိ ဧကရာဇ်ဖိအားကို တန်ခိုးရှင်ဘုရင် အဆင့်သို့ ရောက်လာမှသာ လာလေ့လာကြည့်လျှင် ပိုကောင်းပေလိမ့်မည်။
ထိုသို့ စဉ်းစားပြီးနောက်တွင် ရန်ကိုင်သည် ဆက်၍ အချိန်ဖြုန်းမနေတော့ဘဲ မြန်နိုင်သမျှ မြန်မြန် သွားတော့၏။
ကြယ်မြေပုံ ရှိထားသည့်အတွက် ကြယ်စီရင်စုထဲ လမ်းလျှောက်မည်ကို စိုးရိမ်စရာ မလိုချေ။ ကြယ်မြေပုံ၏ အကူအညီဖြင့် အရိပ်ကြယ်နှင့် အမျိုးမျိုးသော ကြယ်များကြားရှိ အကွာအဝေးကို ခန့်မှန်းနိုင်ကာ အန္တရာယ်ကင်းသည့် လမ်းကြောင်းများကိုလည်း ရွေးချယ်နိုင်ပေသည်။
ရက်ပေါင်းများစွာကြာပြီးနောက်တွင် ရန်ကိုင်သည် ရေခဲတမျှ အေးစက်သော ကြယ်တစ်လုံးပေါ်သို့ ရန်ကိုင် ရောက်လာခဲ့သည်။
ကြယ်စီရင်စုထဲတွင် မိုးမြေစွမ်းအင် သို့မဟုတ် လောကနိယာမများ မရှိသည့် ကြယ်သေများစွာ ရှိပေသည်။ နှစ်ပေါင်းများစွာကြာပြီးနောက်တွင် ကြယ်သေအချို့သည် ကျင့်ကြံရေးကြယ်တစ်လုံး ပြန်ဖြစ်လာနိုင်သော်လည်း ထိုကဲ့သို့သော ကိစ္စများသည် သူတို့ကဲ့သို့များ ကျင့်ကြံသူများ တွေးနိုင်သည့် အလွန်တွင် ရှိနေ၏။ သို့ရာတွင် ကြယ်သေ အများစုမှာတော့ ယခင်အတိုင်းသာ ရှိနေတတ်ကြ၏။
ကြယ်သေပေါ်သို့ ရောက်ပြီးနောက်တွင် ရန်ကိုင်သည် ချက်ချင်း မနားသေးဘဲ ပတ်ဝန်းကျင်ကို အရင် စစ်ဆေးကြည့်၏။
မည်သည့် သက်ရှိမှမရှိမှန်း အတည်ပြုပြီးနောက်တွင် တောင်ကြားတစ်ခု၌ သူ့ပထမဆုံး ဟင်းလင်းပြင်အစီအရင်ကို စတင် ခင်းကျင်းလေသည်။
ဤဟင်းလင်းပြင်အစီအရင်သည် အရိပ်ကြယ်နှင့် ကြယ်စီရင်စုကြီးကို ဆက်သွယ်ပေးမည့် ပထမဆုံး ကမ္ဘာခြား ဟင်းလင်းပြင်အစီအရင်တစ်ခု ဖြစ်လာပေလိမ့်မည်။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၂၉)
ရန်ကိုင်သည် ရှောင်ရှောင်အား သွားချင်သည့်နေရာသွား ဟူသော သဘောဖြင့် လွှတ်ထားပေးလိုက်သည်။
ကြယ်သေများပေါ်သို့ရောက်တိုင်း ရန်ကိုင် ဤကဲ့သို့ လုပ်တတ်သည်။ ရှောင်ရှောင်ကို လွှတ်ပေးထားလိုက်ခြင်းဖြင့် ရှောင်ရှောင်မှ ရှားပါးသည့် သတ္တုအချို့ ရှာတွေ့နိုင်ပေသည်။
တကယ်လည်း ရှာတွေ့ခဲ့ဖူးပေသည်။ သို့သော် ရှောင်ရှောင် ရှာတွေ့သည့် သတ္တုများမှာ အတော်လေးကို နည်းပါးလှသဖြင့် ရန်ကိုင်လည်း ထိုသတ္တုများ၏ အဆီအနှစ်အား ရှောင်ရှောင်ကိုသာ သန့်စင်ခိုင်းလိုက်လေ၏။
သတ္တုများ၏ အဆီအနှစ်ကို စုပ်ယူခြင်းဖြင့် ရှောင်ရှောင်သည် ပို၍ အားကောင်းလာနိုင်ပေသည်။
ရှောင်ရှောင်သည် ရန်ကိုင်၏ မြင်ကွင်းမှ အလျင်အမြန် ပျောက်ကွယ်သွားခဲ့သည်။ ရန်ကိုင်သည် သိုလှောင်လက်စွပ်ထဲမှ အမျိုးမျိုးသော ပစ္စည်းများကိုထုတ်၍ ဟင်းလင်းပြင်အစီအရင်ကို စတင် ခင်းကျင်းတော့လေသည်။
သူရွေးချယ်လိုက်သော တောင်းကြာသည် သိပ်မကျဉ်းလှ။ အပေါ်စီးမှ ငုံ့ကြည့်လိုက်လျှင် ဧရာမကျဉ်းပေါက်ကြီး တစ်ပေါက်နှင့်ပင် တူသေး၏။
ရန်ကိုင်သည် တောင်ကြားထဲ တော်ရုံတတ်ရုံ လူမမြင်နိုင်သည့် နေရာတစ်ခုရှာပြီးနောက် ယူလာသော သတ္တုများကို အရည်ဖျော်ကာ ပုံစသွင်းတော့လေသည်။
ထိုအရာများသည် ဟင်းလင်းပြင်အစီအရင်၏ အခြေခံ အစိတ်အပိုင်းများ ဖြစ်လာပေလိမ့်မည်။ ထိုအရာများကို သေချာ သန့်စင်ပြီး နေရာချထားပြီးသည်နှင့် လေဟာနယ်စွမ်းအားကို သုံး၍ အစီအရင်ကို ထိုးထွင်းကျန်သာ ကျန်ပေလိမ့်မည်။ အစီအရင် ထိုးထွင်းသည့် ဖြစ်စဉ်လည်း ပြီးသွားပါက ဟင်းလင်းပြင် အစီအရင် ခင်းကျင်းသည့် ဖြစ်စဉ်လည်း ပြီးပေပြီ။
ပထမဆုံးအကြိမ် မဟုတ်သည့်အတွက် ရန်ကိုင်အနေဖြင့် သိပ်ပြီး အချိန်မယူခဲ့ရပေ။ သို့သော်လည်း ကူညီမည့်လူ မရှိဘဲ တစ်ယောက်တည်း လုပ်ရသည့်အတွက် ယခင်ထက်တော့ နည်းနည်း ပိုကြာပေသည်။
ဆယ်ငါးရက်ကြာပြီးနောက်တွင် ဟင်းလင်းပြင်အစီအရင်ကို ရန်ကိုင် ခင်းကျင်ပြီးသွားခဲ့သည်။ အစီအရင်၏ အရွယ်အစားသည် သေးငယ်ရုံမက ကျောက်ဆောင်တစ်ခု၏ အောက်ခြေတွင်လည်း ရှိနေသည့်အတွက် သေချာသာ လိုက်မရှာလျှင် တော်ရုံတန်ရုံဖြင့် သတိပြုမိရန် မဖြစ်နိုင်ချေ။
သို့သော်လည်း ဤမျှလောက်ဖြင့် ဆိုပါက ဟင်းလင်းပြင်အစီအရင်ကို အခြားသူများ ရှာတွေ့သွားနိုင်ပေးသည်။
ရန်ကိုင်သည် သူတော်စင်ချီကိုသုံး၍ ဟင်းလင်းပြင်အစီအရင်ကို ကျောက်တုံးတစ်တုံး အသွင်သို့ ပြောင်းလဲပစ်လိုက်၏။
ယခုဆိုလျှင် ဟင်းလင်ပြင်အစီအရင်သည် အစီအရင်နှင့် မတူတော့ဘဲ ကျောက်တုံးကြီးတစ်တုံး ဖြစ်နေခဲ့လေပြီ။ သေချာ စစ်ဆေးမှသာ မတူကွဲပြားမှုများကို သတိပြုမိပေလိမ့်မည်။
အရိပ်ကြယ်မှ မထွက်လာခင် ဖန်သွေးရောင်ဂိုဏ်းသို့ သွားပြီး ပုံရိပ်တစ်ထောင်ဖန်များ သွားတောင်းခဲ့ရခြင်းမှာ ဤအကြောင်းကြောင့် ဖြစ်သည်။ ပုံရိပ်တစ်ထောင်ဖန်သည် ပုံစံ အမျိုးမျိုးသို့ ပြောင်းလဲနိုင်သည် မဟုတ်ပေလော။
ဤနေရာသည် မည်သည့် ကျင့်ကြံသူမှ ရောက်လာမည် မဟုတ်သည့် ကြယ်သေတစ်လုံး ဖြစ်သော်ငြား အနာဂတ်ကို ပုံသေပြော၍မရချေ။ အကယ်၍ တစ်ယောက်ယောက်သာ ဤနားမှ ဖြတ်သွားစဉ် ဤနေရာ၌ လာနားခဲ့ပါက ပြဿနာ တက်သွားနိုင်ပေသည်။
သို့သော်လည်း ပုံရိပ်တစ်ထောင်ဖန်နှင့်သာ ဆိုပါက ပြသနာမရှိတော့ချေ။ ပုံရိပ်တစ်ထောင်ဖန်သည် ပုံစံအမျိုးမျိုး ပြောင်းလဲနိုင်သည့်အတွက် ကောင်းကင်စိတ်အာရုံကို သုံး၍ အသေးစိတ် မလေ့လာနိုင်လျှင် ပုံရိပ်တစ်ထောင်ဖန်ကို သုံး၍ အစီအရင်မှ ပြောင်းလဲထားသည့် ကျောက်တုံးနှင့် သာမန် ကျောက်တုံးကို ခွဲခြားရန် အလွန်ခက်ပေသည်။
ထို့အပြင် ပုံရိပ်တစ်ထောင်ဖန်ကြောင့် အစီအရင်သည် ယခင်ထက် ပို၍ မာကျောသွားသည်။ သာမန် ဥက္ကာခဲတစ်လုံးလောက် တိုက်ခံရရုံဖြင့် ပျက်စီးရမည့် အရေးနှင့် ရင်ဆိုင်ရတော့မည် မဟုတ်ချေ။
အစီအရင်အား ထပ်ခါထပ်ခါ ပြန်စစ်ဆေးကြည့်ပြီး မည်သည့် ပြဿနာမှ မရှိမှန်း သေချာတော့မှပဲ ရန်ကိုင် ကျေကျေနပ်နပ် ခေါင်းညိတ်လိုက်၏။
အားလုံး ပြင်ဆင်ပြီးသည့်နောက်တွင် ရန်ကိုင်သည် ဟင်းလင်းပြင်အစီအရင်အား အခြေခံအုတ်မြစ်အပေါ်တွင် စတင် ခင်းကျင်းကာ လေဟာနယ်စွမ်းအင်ကို ထည့်သွင်းတော့၏။
စက်ဝိုင်းပုံစံအစီအရင် တဝီဝီ မြည်လာလေသည်။
ထိုအခြင်းအရာကိုမြင်သော် ရန်ကိုင် ပျော်ရွှင်စွာ ပြုံးလိုက်၏။ ဟင်းလင်းပြင်အစီအရင် အခုလို ဖြစ်သွားရခြင်းမှာ အထက်စကြာဝဠာဂိုဏ်း၌ သူခင်းကျင်းထားသည့် ဟင်းလင်းပြင် အစီအရင်နှင့် အောင်အောင်မြင်မြင် ချိတ်ဆက်သွားသည့် အတွက်ကြောင့် ဖြစ်ပေသည်။ သို့သော် အစီအရင်မှတစ်ဆင့် အထက်စကြာဝဠာဂိုဏ်းဆီသို့ ရောက်နိုင် မရောက်နိုင်ကိုတော့ စစ်ဆေးကြည့်ရပေဦးမည်။
ပုံမှန်အားဖြင့် စစ်ဆေးမည့်လူဟာလည်း သူသာ ဖြစ်ပေသည်။ ရန်ကိုင်သည် လေဟာနယ်တာအိုတွင် ကျွမ်းကျင်ထားသဖြင့် မတော်တဆ တစ်ခုခုဖြစ်လျှင် လေဟာနယ်ကို ဆုတ်ဖြဲ၍ ဟင်းလင်းပြင်ထဲမှ ထွက်ပြေးလာနိုင်ပေသည်။
ထို့ကြောင့် ရှောင်ရှောင်အား ပြန်ခေါ်လိုက်လေ၏။ တစ်ရက်လောက် ကြာမှသာ ရှောင်ရှောင် ပြန်ရောက်လာသည်။
သူနှင့်ရှောင်ရှောင်ကြားရှိ ထူးခြားသော စိတ်ဝိဥာဉ်ချင်း ချိတ်ဆက်ထားမှုကြောင့်သာ မဟုတ်လျှင် ရှောင်ရှောင် တစ်ခုခု ဖြစ်နေပြီဟုပင် ရန်ကိုင် ထင်မိမည်သာ။
ဤမျှ နောက်ကျနေရသလားဟု ရှောင်ရှောင်ကို အပြစ်တင်တော့မည်အပြု ရန်ကိုင်၏ အကြည့်သည် ရှောင်ရှောင်၏ ဖောင်းဖောင်းလေး ဖြစ်နေသည့် ဗိုက်ဆီသို့ ရောက်သွား၏။ ရှောင်ရှောင်၏ ဗိုက်ဖောင်းနေရခြင်းမှာ လွန်ခဲ့သည့် လဝက်အတွင်း သတ္တုများစွာကို ရှောင်ရှောင် ဝါးမြိုခဲ့သည့် အတွက်ကြောင့်သာ ဖြစ်ရပေမည်။
ရန်ကိုင် အတော်လေး အံ့အားသင့်သွားခဲ့သည်။
ဤတစ်နှစ်အတွင်း ကြယ်သေများစွာသို့ ရန်ကိုင် ရောက်ခဲ့ဖူးပေသည်။ သို့သော်လည်း မည်သည့် ကြယ်သေပေါ်တွင်မှ အဖိုးတန်ပစ္စည်းများကို ရှာမတွေ့ခဲ့ပေ။
သို့သော်လည်း ရှောင်ရှောင်၏ ဖောင်းနေသော ဗိုက်အရ ဤကြယ်သေတွင် မည်သည့် မိုးမြေစွမ်းအင်မှ မရှိသော်လည်း သတ္တုရိုင်းကတော့ ကျိန်းသေ ကြွယ်ဝပေလိမ့်မည်ဟု ပြောနေသည်။
ထို့အပြင် ရှောင်ရှောင်သည် သာမန် သတ္တုရိုင်းလောက်ကို စိတ်ဝင်စားတတ်သူမဟုတ်။
“မင်းတူးထားတဲ့ သတ္တုတွေကို ထွေးထုတ်ပြပါဦး။ ငါတစ်ချက်ကြည့်ကြည့်ရအောင်” ရန်ကိုင်က ရှောင်ရှောင်ကို ပြောလိုက်၏။
ရှောင်ရှောင်သည် ခေါင်းကုတ်လျက် သူတူးယူထားသော သတ္တုများကို ထွေးထုတ်တော့လေသည်။ သူဝါးမြိုထားသည့် သတ္တုများမှာ တစ်မျိုးတည်း မဟုတ်ဘဲ အမျိုးအစား အမျိုးမျိုး ရှိကြသည်။ သတ္တုများမှာ တောက်လျှောက် ထွက်လာနေရာ မကြာမီ ရန်ကိုင်ရှေ့တွင် တောင်တစ်လုံးနှယ် ပုံထပ်သွားခဲ့လေသည်။
သတ္တုများကို ထွေးထုတ်ပြီးနောက် ရှောင်ရှောင်သည် အပြစ်ကင်းစင်သည့် အမူအရာဖြင့် သူ့ဗိုက်ကို ပွတ်သပ်လိုက်၏။
“ဒါက…” သူ့ရှေ့ရှိ သတ္တုပုံကြီးကိုကြည့်ရင်း ရန်ကိုင်၏ မျက်ဝန်းအစုံ တဖျက်ဖျက် တောက်ပလာခဲ့လေသည်။ လက်ဆေးဇလုံအရွယ် ငွေရောင်သတ္တုတစ်တုံးကို ကောက်ယူ စစ်ဆေးကြည့်ပြီးနောက် အံ့အားသင့်နေသည့် လေသံဖြင့် “ငွေကောင်းကင်သတ္တုပါလား”
ရန်ကိုင်သည် ယခင်ကကဲ့သို့ ဘာမှမသိသည့် တောကြိုအုံကြားမှ လူတစ်ယောက် မဟုတ်တော့ချေ။ ကြယ်စီရင်စုထဲ နှစ်ပေါင်းများစွာ လှည့်လည်သွားလာပြီးနောက် ဗဟုသုတ အတော်လေး ကြွယ်ဝလာခဲ့လေပြီ။ ကြယ်စီရင်စုထဲရှိ ပစ္စည်းအားလုံးကို သိသည်ဟု မပြောရဲသော်ငြား ပစ္စည်းအများစုကိုတော့ မြင်သည်နှင့် တန်အမျိုးအစား ခွဲနိုင်လာလေပြီ။
ဤလက်ဆေးဇလုံအရွယ် ငွေရောင်သတ္တုသည် တန်ခိုးရှင် အထွဋ်အထိပ်အဆင့် ငွေကောင်းကင်သတ္တုဖြစ်ပေသည်။ ပန်းပဲသွန်းလုပ်ရာတွင် ဤသတ္တုနည်းနည်းကို ထည့်သွင်း အသုံးပြုမည်ဆိုပါက ရရှိလာမည့် မှော်ရတနာသည် ပို၍ ကြုံနိုင်၊ဆန့်နိုင်မည်ဖြစ်ကာ လွယ်လွယ်နှင့် ပျက်စီးတော့လိမ့်မည် မဟုတ်ချေ။
ကြက်ဥတစ်လုံးအရွယ် ငွေကောင်းကင်သတ္တုသည် အနည်းဆုံး အဆင့်မြင့် သူတော်စင်သလင်းကျောက် တစ်သိန်းလောက်တန်ပေသည်။
တစ်နည်းဆိုရသော် ဤလက်ဆေးဇလုံအရွယ် ငွေရောင်သတ္တုသည် သူတော်စင်သလင်းကျောက် သန်းပေါင်းများစွာ တန်ပေသည်။
ငွေကောင်းကင်သတ္တုကြောင့် အံ့ဩမပြေသေးခင်မှာပင် ရန်ကိုင်၏ အကြည့်သည် ရွှေရောင်တောက်နေသည့် သတ္တုတုံကြီးဆီသို့ ထပ်ရောက်သွားပြန်လေသည်။
“ဥက္ကာခဲအမြူတေ”
“ငါးရောင်ခြယ်သဲ”
“ဖီးနစ်ပြာမျက်ရည်သံ”
“များလိုက်တဲ့ သူတော်စင်သလင်းကျောက်တွေ”
ရန်ကိုင်သည် သူ့ရှေ့ရှိ သတ္တပုံကြီးကို စစ်ဆေးရန် ပေါ်ပေါ်လာသော သတ္တုများကြောင့် ထပ်ခါတဲလဲလဲကို အံ့အားသင့်နေရလေသည်။
သူ့ရှေ့ရှိ သတ္တုပုံကြီး၏ တန်ဖိုးကို တွက်ကြည့်ရင်း ရှောင်ရှောင်၏ ဤကြယ်သေပေါ်၌ လဝက်ကြာအောင် ကြိုးစားအားထုတ်မှုသည် အရိပ်ကြယ်ပေါ်ရှိ အလယ်အလတ်အဆင့် မိသားစုတစ်ခုလုံး၏ တန်ကြေးနှင့် ယှဉ်နိုင်ကြောင်း အံ့အားသင့်စွာ တွေ့ရှိလိုက်ရလေသည်။
သူ့ရှေ့ရှိ သတ္တပုံကြီးထဲတွင် တန်ခိုးရှင်အဆင့် သတ္တုများသာ မဟုတ်ဘဲ တန်ခိုးရှင်ဘုရင်အဆင့် သတ္တုများပင် ပါပေသည်။ ရန်ကိုင် နားမလည်နိုင်အဖြစ်ရဆုံးမှာ ရှောင်ရှောင် ပြန်သယ်လာသည့် မြောက်မြားလှသော သူတော်စင်သလင်းကျောက်များကိုပင်။
ဤကြယ်သေပေါ်တွင် အဖိုးတန် သတ္တုရိုင်းများ ရှိနေသည်ကို ရန်ကိုင် နားလည်နိင်ပေသည်။ သို့သော်လည်း မိုးမြေစွမ်းအင် မရှိသည့် ကြယ်သေပေါ်တွင် မည်သို့များ သူတော်စင်သလင်းကျောက်များ ရှိနေရသနည်း။
သူတော်စင်သလင်းကျောက်များသည် မိုးမြေစွမ်းအင် သိပ်သည်းကြွယ်ဝသည့် ကျင့်ကြံရေးကြယ်ပေါ်တွင်သာ ရှိသည့် အရာများ ဖြစ်ကြသည်။
စဉ်းစားနေရင်းမှ သူ့စိတ်ထဲ အတွေးတစ်ချက် ဝင်လာ၏။ ချက်ချင်းပဲ ရှောင်ရှောင်ဘက်သို့လှည့်၍ မေးလိုက်လေသည် “မင်းဒါတွေကို ဘယ်ကနေ ရလာတာလဲ။ ငါ့ကို အဲ့နေရာဆီ ခေါ်သွားပေး”
ရှောင်ရှောင်သည် ချက်ချင်းပဲ မြေကြီးထဲ တွင်းတူးသွားလေသည်။
ရန်ကိုင် ဟင်းလင်းပြင်အစီအရင် ခင်းကျင်းထားသည့် တောင်ကြားနှင့် မိုင်တစ်သောင်းအကွာတွင် ဧရာမ တွင်းပေါက်ကြီး တစ်ပေါက် ရှိနေခဲ့သည်။
ဟင်းလင်းပြင်အစီအရင်ကို မခင်းကျင်းစဉ်က ပတ်ပတ်လည် မိုင်းသုံးသိန်းပတ်လည်ကို ကောင်းကင်စိတ်အာရုံဖြင့် စစ်ဆေးကြည့်ခဲ့ရာတွင် ဤတွင်းပေါက်ကြီးကို သတိပြုမိခဲ့သော်ငြား သိပ်ပြီး အာရုံမစိုက်ခဲ့ချေ။ ရှောင်ရှောင်သည် ဤတွင်းပေါက်ကြီးဆီမှ ပစ္စည်းကောင်းများကို ရှာတွေ့လာခဲ့ခြင်း ဖြစ်သည်။
တွင်းပေါက်ကြီးမှာ အလွန်ကိုမှ နက်လှ၏။ အောက်သို့ ဆင်းနေစဉ်အတောအတွင်း လေပြင်များ သူ့အား တဖြန်းဖြန်း လာရောက်ရိုက်ခတ်သည်။ သို့သော်လည်း ထိုမျှလောက်သော လေပြင်းသည် ရန်ကိုင်အတွက် ပြဿနာ မဟုတ်ချေ။ ကောင်းကင်စိတ်အာရုံဖြင့် စစ်ဆေးကြည့်ပြီးနောက် တွင်းပေါက်၏ ပုံပန်းသွင်ပြင်ကို အကြမ်းဖျင်း ခန့်မှန်းမိသွားသည်။
မီတာ သုံးထောင့်ခန့် ဆင်းလာပြီးနောက်တွင် လိုဏ်ဂူ၏ အောက်ခြေသို့ ရောက်လာခဲ့လေသည်။
မြေပြင်ပေါ်သို့ ခြေခိုင်ခိုင် ရပ်ပြီးနောက် ကောင်းကင်စိတ်အာရုံကို ဖြန့်ကျက်လိုက်၏။ စစ်ဆေးကြည့်ပြီးနောက် ရန်ကိုင် အလွန်ကိုမှ အံ့အားသင့်သွားခဲ့လေသည်။
ဤမြေအောက်လိုဏ်ခေါင်းသည် သူထင်ထားသကဲ့သို့ ဟောင်းလောင်းဖြစ်နေသည့် လိုဏ်ခေါင်းတစ်ခု မဟုတ်ချေ။ ဤနေရာသည် သူ့ကောင်းကင်စိတ်အာရုံဖြင့်ပင် အပြည့်အဝ မစစ်ဆေးကြည့်နိုင်သည့် ဧမရာမြေအောက် လိုဏ်ဂူကြီးတစ်ခု ဖြစ်ပေသည်။
ဤနေရာရှိ လေသည် အနည်းငယ် ခြောက်သွေ့သော်ငြား အသက်ရှူလို့တော့ ရပေသည်။ ကောင်းကင်စိတ်အာရုံဖြင့် စစ်ဆေးကြည့်လိုက်သည့်နောက် ပျက်စီးပြိုကျနေသော အဆောက်အဦးတန်းကြီးကို တွေ့ရှိလိုက်ရသည်။
ဤနေရာသည် အပျက်အစီးပုံကြီးတစ်ခု ဖြစ်နေခဲ့လေသည်။
အဆောက်အဦးများကို ပုံစံကို ကြည့်ရသလောက် ဤအဆောက်အဦးများသည် လွန်ခဲ့သည့် နှစ်ပေါင်း သောင့်နှင့်ချီက တည်ဆောက်ခဲ့သည့် အဆောက်အဦးများ ဖြစ်လောက်မည်မှန်း ရန်ကိုင် ခန့်မှန်းမိလိုက်လေသည်။
အဆောက်အဦးများ၏ အထားအသိုအရ ဤနေရာသည် တစ်ချိန်က ဂိုဏ်းတစ်ဂိုဏ်း၏ ဠာနချုပ် ဖြစ်ခဲ့ဟန်တူ၏။
“ငါသိသွားပြီ…” သူထင်ထားသည့်အတိုင်းပင်။
ရှောင်ရှောင်မှ သူတော်စသလင်းကျောက်များ ပြန်သယ်လာသည်ကို တွေ့ပြီးနောက် ရန်ကိုင် အချက်ချင်းပဲ အကြောင်းအရင်းနှစ်ခုကို စဉ်းစားမိလိုက်သည်။
တစ်ခုမှာ ဤကြယ်သေသည် ကျင့်ကြံရေး ကြယ်တစ်လုံး အဖြစ်သို့ ပြောင်းလဲခါနီးနေသည့် ကြယ်တစ်လုံးဖြစ်သည်။ ထို့ကြောင့်သာ မဟုတ်လျှင် ကြယ်သေတစ်လုံးပေါ်တွင် သူတော်စင်သလင်းကျောက်များ ပေါ်လာစရာအကြောင်း မရှိချေ။ တစ်နည်းဆိုရသော် ဤကြယ်သေပေါ်တွင် ကိုယ်ပိုင် လောကနိယာမများမှာ ဖြစ်ပေါ်ခါနီးနေလေပြီ။
သို့သော်လည်း ဤနေရာတွင် လောကနိယာမများ ဖြစ်ပေါ်တော့မည့် အရိပ်အယောင်တစ်ခုကိုပင် ရန်ကိုင် မတွေ့ရ။ ထို့ကြောင့် ထိုဖြစ်နိုင်ချေသည် အတော့်ကိုမှ ဖြစ်နိုင်ခဲလှသည်။
နောက်တစ်ချက်မှာ ဤကြယ်သေသည် တစ်ချိန်က ကျင့်ကြံရေး ကြယ်တစ်လုံးဖြစ်ခဲ့ပြီး ပြောင်းလဲမှုတစ်ခုခုကြောင့် လောကနိယာမများ ပျက်စီးသွားပြီး ကြယ်သေတစ်လုံး အဖြစ်သို့ ပြောင်းလဲသွားခြင်းပင်။
ပြင်ပအကူအညီတစ်ခုခုသာ မရှိလျှင် နောက်နှစ်ပေါင်းများစွာအကြာ၌ ထုန်းရွှမ်လောကကြီးသည်လည်း ကြယ်သေတစ်လုံး ဖြစ်လာပေလိမ့်မည်။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၃၀)
အရာအားလုံးသည် မွေးဖွားပြီး အိုမင်းကာ သေဆုံးကြရမည်မှာ လောကဓမ္မတာသာ ဖြစ်သည်။ ကြယ်များသည်လည်း ချွင်းချက် မဟုတ်ပေ။
ဤကြယ်ဘာကြောင့် ကြယ်သေတစ်လုံး အဖြစ်သို့ ပြောင်းလဲသွားရလဲ ဆိုသည်ကို ရန်ကိုင် မသိသော်လည်း တစ်ချိန်က ဤကြယ်သည် အရင်းအမြစ်များ ပေါကြွယ်ဝခဲ့သည့် ကြယ်တစ်လုံး ဖြစ်မှန်းတော့ ပြောနိုင်ပေသည်။ သူ့ရှေ့ရှိ အဆောက်အဦးပျက်များသည် တစ်ချိန်က ဂိုဏ်းကြီးတစ်ဂိုဏ်း၏ ဠာနချုပ် ဖြစ်ခဲ့သည်မှာ သေချာသလောက် ရှိသည်။
သူ့အား တစ်ခုခုမှာ လာဆွဲနေသည်ကို သတိပြုမိသဖြင့် လှည့်ကြည့်လိုက်ရာ ရှောင်ရှောင်မှ သူ့အား လိုက်လာရန် အချက်ပြနေကြောင်း တွေ့လိုက်ရသည်။ ရန်ကိုင်လည်း ခေါင်းညိတ်လိုက်ပြီး ရှောင်ရှောင်နောက်သို့ လိုက်သွားလေသည်။
သွားနေစဉ်အတွင်း ရန်ကိုင်သည် နည်းနည်းလေးမှ သတိလျော့ပေါ့ခြင်း မရှိခဲ့ချေ။ သို့သော်လည်း ခဏကြာအောင် သွားနေပြီးနောက် ထိုမျှ သတိထားနေစရာ မလိုမှန်း သိလိုက်ရသည်။ အကြောင်းမှာ အဆောက်အဦးပျက်များထဲ၌ အကောင်းအတိုင်း ရှိနေသေးသော အစီအရင်များ ရှိနေလျှင်ပင် ထိုအစီအရင်များ အသက်ဝင်လာနိုင်မည် မဟုတ်သည့် အတွက် ဖြစ်၏။
အကြောင်းမှာ ဤကြယ်သေပေါ်တွင် မိုးမြေစွမ်းအင် မရှိသောကြောင့် ဖြစ်ပေသည်။ မိုးမြေစွမ်းအင် မရှိဘဲနှင့် အစီအရင်များ လုံးဝ အသက်ဝင်လာနိုင်မည် မဟုတ်။
မကြာမီ ရှောင်ရှောင်နောက် လိုက်ရင်းမှ သတ္တုရိုင်းများ၊ ကျောက်စိမ်းဆေးပုလင်းများနှင့် အခြားသော ပစ္စည်းများစွာ တောင်နှယ် ပုံထပ်နေသည့် ဂိုဒေါင်တစ်လုံးရှေ့သို့ ရောက်လာခဲ့လေသည်။
ကျောက်စိမ်းပုလင်းများသည် ဆေးပုလင်းများ ဖြစ်ကြသည်။
ဆေးပုလင်းအချို့ကို ကောက်ဖွင့် စစ်ဆေးကြည့်ပြီးနောက် ဆေးလုံးများမှာ ပျက်စီးနေပြီဖြစ်ကြောင်း တွေ့ရှိလိုက်ရသည်။ ဆေးပင်များကိုပါ တွေ့လိုက်ရသေးသော်ငြား ဆေးပင်များမှာလည်း ညိုးလျော်ပြီး ခြောက်သွေ့နေကုန်ကြလေပြီ။ အသုံးမဝင်ကြတော့။
သူတော်စင်သလင်းကျောက်များစွာလည်း ရှိနေပေသည်။ သို့သော်လည်း ကောင်းကောင်း သိုလှောင်ထားခြင်း မရှိသည့် အတွက် သလင်းကျောက်ထဲတွင် မည်သည့် စွမ်းအင်မှ မကျန်ရစ်တော့ပေ။ ရှောင်ရှောင် ယူလာသည့် သူတော်စင်သလင်းကျောက်များသည် သုံး၍ရသေးသော နောက်ဆုံး လက်ကျန် သလင်းကျောက်များ ဖြစ်သည့်ပုံပင်။
ဂိုဒေါင်ထဲတွင် အသုံးဝင်သည့် ပစ္စည်းဆို၍ သတ္တုရိုင်းများသာ ရှိတော့သည်။
သတ္တုရိုင်းများသည် အလွန်ကိုမှာ ကြာရှည်ခံအသုံးဝင်၏။ ကောင်းကောင်း မထိန်းသိမ်းထားလျှင်ပင် အချိန်အတော်ကြာသည်အထိ ပျက်စီးသွားခြင်း မရှိကြပေ။
ဂိုဒေါင်ထဲရှိ သတ္တုရိုင်းပမာဏသည် ရှောင်ရှောင် ယူလာသည့် ပထမထက် အဆပေါင်းများစွာ ပိုများပေသည်။
ရန်ကိုင်သည် ထိုသတ္တုရိုင်းအားလုံးကို သိုလှောင်လက်စွပ်ထဲ ထည့်သိမ်းလိုက်ပြီးနောက် ရှောင်ရှောင်ကိုခေါ်ကာ အနီးအနား တစ်ဝိုက်ကို လိုက်လံ စူးစမ်းစစ်ဆေးကြည့်လေသည်။
တစ်ရက်ကြာပြီးနောက်တွင် အပျက်အစီးနယ်မြေ တစ်ခုလုံးကို စစ်ဆေးလို့ ပြီးသွားခဲ့သည်။
ကံမကောင်းစွာဖြင့် အဖိုးတန်ပစ္စည်း များများစားစား ထပ်မရတော့ချေ။ ရှောင်ရှောင် ခေါ်သွားသည့် ဂိုဒေါင်ထဲတွင်သာ အချီကြီး ရလိုက်ခြင်း ဖြစ်သည်။ အပျက်အစီးနယ်မြေထဲ သိုလှောင်လက်စွပ်အချို့ ကောက်ရသော်ငြား မိုးမြေစွမ်းအင်၏ ထောက်ပံ့ပေးမှု မရှိတော့သည့်အတွက် ထိုသိုလှောင်လက်စွပ် အားလုံးမှာ ပျက်စီးနေကုန်ကြလေပြီ။
သို့သော်လည်း အချက်တစ်ချက်ကို ရန်ကိုင် ရှာတွေ့ခဲ့သည်။ ဤမြေအောက်လိုဏ်ခေါင်းနှင့် ယှဉ်လိုက်လျှင် သူတို့ရှေ့ရှိ အပျက်အစီးနယ်မြေသည် ရေခဲတောင်၏ အဖျားလောက်သာ ရှိသေးသည် ဆိုသည်ကိုပင်။ မြေအောက်လိုဏ်ခေါင်းသည် အလွန်တရာကိုမှ ကျယ်ပြောလှသည့် လဟာပြင်ကြီး တစ်ခု ဖြစ်နေခဲ့သည်။
ထို့ကြောင့် ဆက်၍ စူးစမ်းကြည့်ရန် ရန်ကိုင် ဆုံးဖြတ်လိုက်သည်။
အဆောက်အဦးပျက်များကို ဖြတ်ကျော်၍ နေ့ဝက်ကြာအောင် ပျံသန်းလာပြီးနောက်တွင် တောင်တန်းတစ်ခုရှေ့သို့ ရောက်လာခဲ့၏။ သို့သော်ငြား တောင်များပေါ်တွင် များစွာသော လိုဏ်ခေါင်းများ ရှိနေကြောင်း တွေ့လိုက်ရလေသည်။
ရှောင်ရှောင်သည် ထိုတောင်တန်းများ၏ အတွင်းပိုင်းသို့ သွားစစ်ဆေးကြည့်ချင်နေသည့်ပုံ ပေါက်နေသဖြင့် ရန်ကိုင်က ရှောင်ရှောင်ဘက်သို့လှည့်၍ မေးလိုက်လေသည် “အဲတောင်ထဲမှာ သတ္တုရိုင်းတွေ ရှိနေတာလား”
ကျောက်တုံးရုပ်သေးရုပ်များသည် သတ္တုရိုင်းများကို အာရုံခံရာတွင် အလွန် ထူးချွန်ပေသည်။ အဖိုးတန်သည့် သတ္တုများကိုဆိုလျှင် ပို၍ပင် အာရုံခံနိုင်သေးသည်။ မြွေများသည် အသားနံ့ကို အာရုံခံနိုင်သလို ကျောက်တုံးရုပ်သေးရုပ်များတွင်လည်း သတ္တုရိုင်းများကို အာရုံခံနိုင်သည့် အထူးအနံ့ခံအာရုံတစ်မျိုး ပါရှိပေသည်။
ရန်ကိုင်၏ မေးခွန်းကိုကြားသော် ရှောင်ရှောင်သည် အလျင်အမြန်ပဲ ခေါင်းညိတ်လိုက်သည်။
“အဲ့ဒါဆို သွားကြည့်တာပေါ့” ရန်ကိုင်သည် ရယ်မောလျက် သူတော်စင်ချီဖြင့် ရှောင်ရှောင်ကို ရစ်ပတ်၍ တောင်တန်းထဲသို့ ပျံသန်းသွားလေသည်။
မကြာမီ မိုင်တွင်းတစ်ခုထဲမှ ရန်ကိုင်၏ အသံ ထွက်ပေါ်လာခဲ့သည် “မိုးမြေဖျက်သလင်းကျောက်လား”
ဤနေရာတွင် သတ္တုတွင်းရှိနေပြီး ထိုသတ္တုတွင်းသည် အလွန်ကိုမှ အဖိုးတန်သည့် သတ္တုတစ်မျိုးဖြစ်သော မိုးမြေဖျက် သလင်းကျောက်တွင်းကြီး ဖြစ်နေခဲ့သည်။
မိုးမြေဖျက်သလင်းကျောက်များကို မှော်ရတနာများ သန့်စင်ရာတွင် အသုံးမပြုနိုင်ချေ။ အကြောင်းမှာ မိုးမြေဖျက် သလင်းကျောက်များသည် မိုးမြေစွမ်းအင်နှင့် အလွန်ကိုမှ ဓါတ်မတည့်သည့် အတွက်ကြောင့် ဖြစ်ပေသည်။ မိုးမြေဖျက် သလင်းကျောက်ကိုသုံး၍ မှော်ရတနာ ပြုလုပ်လိုက်မည် ဆိုပါက ထိုမှော်ရတနာကို မည်သည့် ကျင့်ကြံသူမှ အသုံးပြုနိုင်လိမ့်မည် မဟုတ်ချေ။
ထိုသို့ဖြစ်သည့်တိုင် မိုးမြေဖျက်သလင်းကျောက် အလွန် အသုံးဝင်ရခြင်းမှာ ထိုသတ္တုများကို အစီအရင်တစ်မျိုး တည်ဆောက်ရာတွင် အသုံးပြုသည့် အတွက်ကြောင့် ဖြစ်ပေသည်။ မိုးမြေဖျက်သလင်းကျောက်ကိုသုံး၍ တည်ဆောက်ထားသော အစီအရင်တစ်မျိုးသည် ကျင့်ကြံသူများအား သူတော်စင်ချီကို အသုံးမပြုနိုင်အောင် လုပ်နိုင်ပေသည်။ တစ်နည်းဆိုရသော် ထိုအစီအရင်ထဲသို့ ရောက်သွားသည်နှင့် ကျင့်ကြံသူများသည် သူတော်စင်ချီကို အသုံးပြုနိုင်တော့မည် မဟုတ်ဘဲ ကာယခွန်အား သက်သက်ကိုသာ အသုံးပြုနိုင်တော့ပေလိမ့်မည်။ အရိပ်ဝိဥာဉ်ကျွန်းထဲသို့ ရောက်သွားသလိုပင် ဖြစ်သည်။
မိုးမြေဖျက်သလင်းကျောက်သည် မိုးမြေဖျက်အစီအရင်၏ အစီအရင်အမြူတေ ဖြစ်ပေသည်။
သူတော်စင်ချီအား အသုံးမပြုနိုင်သည့် ကျင့်ကြံသူအား ကျင့်ကြံသူဟု ခေါ်နိုင်ဦးမည်လော။ အရိပ်ဝိဥာဉ်ကျွန်း၏ ကျင့်ကြံသူများသည် အရိပ်ကောင်းကင်ဆေးလုံးများကို သုံး၍ သူတို့၏ ခန္ဓာကိုယ်ကို ပိုမိုအားကောင်းလာအောင် ကျင့်ကြံနိုင်၏။ သို့သော်လည်း ကျင့်ကြံသူတိုင်းတွင် အရိပ်ကောင်းကင်းဆေးလုံး မရှိကြသလို ကျင့်ကြံသူတိုင်းဟာလည်း ခန္ဓာကိုယ်ကို အားကောင်းအောင် ကျင့်ကြံထားသူများ မဟုတ်ကြချေ။
မိုးမြေဖျက်အစီအရင်သည် ကျင့်ကြံသူတိုင်းအတွက် သေမင်းထောင်ချောက်တစ်ခု ဖြစ်ပေသည်။ ထိုအစီအရင်ထဲသို့ ရောက်သွားမည်ဆိုပါက တန်ခိုးရှင်ဘုရင်အဆင့် ကျင့်ကြံသူများပင် ကောင်းကောင်း ဒုက္ခရောက်နိုင်ပေသည်။
ထိုအစီအရင်သည် အတော့်ကိုမှ အားကောင်းသော်ငြား မိုးမြေဖျက်သလင်းကျောက်များသည် အလွန်ကိုမှ ရှားပါးလှ၏။ သို့သော်လည်း ကံကောင်းထောက်မပြီး ဤနေရာတွင် မိုးမြေဖျက်သလင်းကျောက်တွင်းကြီး၏ လာတွေ့သည်။ ထို့အပြင် သလင်းကျောက်တွင်းမှာလည်း အတော်လေးကိုမှ ကြီးသည့် သလင်းကျောက်တွင်းကြီး ဖြစ်နေသည်။
သတ္တုတွင်းများကို အကြမ်းဖျင်း သုံးမျိုးသုံးစား ခွဲနိုင်သည်။ အဆင့်နိမ့်၊ အလယ်အလတ်နှင့် အဆင့်မြင့် ဟူ၍ပင်။
ယေဘုယျအားဖြင့် အဆင့်မြင့် သတ္တုတွင်းတစ်တွင်းသည် ဂိုဏ်းကြီးတစ်ဂိုဏ်းအတွက်ပင် အလွန်ကိုမှ အဖိုးတန်လှသည်။ ဤနေရာတွင် အဆင့်မြင့် သတ္တုတွင်းတစ်တွင်းကို လာတွေ့လိမ့်မည်ဟု ရန်ကိုင် တကယ် မထင်ထားခဲ့ပေ။
ရှောင်ရှောင်သည် ဤနေရာသို့ ရောက်ကတည်းက သတ္တုရိုင်းများကို စတင် ဝါးမြိုနေခဲ့၏။ ရှောင်ရှောင်ကိုကြည့်ရင်း ရန်ကိုင်လည်း တုန့်ဆိုင်းမနေဘဲ မိုးမြေဖျက်သလင်းကျောက်များကို အပြေးအလွှား သွားတူးလေသည်။
မိုးမြေဖျက်သလင်းကျောက်တွင်းကြီး ဖြစ်နေသည့်အတွက် ဤနေရာတွင် သူတော်စင်ချီကို ကောင်းကောင်း မသုံးနိုင်သော်ငြား ရန်ကိုင်၏ ကာယခွန်အားသည် ပေါ့သေးသေး မဟုတ်သည့်အတွက် သူတ္တုတူးသည့်နှုန်းသည် အတော်လေးမြန်သည်ဟု ပြော၍ရသည်။
တစ်ရက်အတွင်း မိုးမြေဖျက်သလင်းကျောက် အတုံးငါးရာခန့် ရန်ကိုင် တူးလိုက်နိုင်၏။ ရှောင်ရှောင် မည်မျှ တူးလိုက်နိုင်သလဲ ဆိုသည်ကိုတော့ စဉ်းစားနေစရာပင်မလို၊ အလွန်များပြားမည်မှာ မြေကြီးလက်ခတ်မလွဲပင်။
မိုးမြေဖျက်သလင်းကျောက် အတုံးငါးရာသည် ဂိုဏ်းလေး တစ်ဂိုဏ်းလုံးကို လွှမ်းခြုံထားနိုင်သော အစီအရင်ကို ခင်းကျင်းရန် အတွက် လုံလောက်ပေသည်။ သို့သော်ငြား မည်သည့်ဂိုဏ်းမှ ရူးမိုက်ပြီး မိုးမြေဖျက်အစီအရင်ကို ထိုကဲ့သို့ သွားခင်းကျင်းလိမ့်မည် မဟုတ်ချေ။ ထိုသို့သာ ခင်းကျင်းလိုက်လျှင် ကိုယ့်သေတွင်းကိုယ်တူးသလို ဖြစ်သွားပေလိမ့်မည်။ ဂိုဏ်းထဲရှိ မည်သူမှ ကျင့်ကြံလို့ ရတော့လိမ့်မည် မဟုတ်။ မိုးမြေစွမ်းအင်ကို ပိတ်ပင်တားဆီးသည့် အစီအရင်ဆိုကာမှ ထိုအစီအရင်ကို ဂိုဏ်းတစ်ခုလုံးအား လွှမ်းခြုံလိုက်မှဖြင့် ဂိုဏ်းသားများအဖို့ မိုးမြေစွမ်းအင်ကို မည်သို့များ အာရုံခံနိုင်တော့မည်နည်း။
မိုးမြေဖျက်အစီအရင်များကို အချို့သော နေရာများ၊ ဥပမာအားဖြင့် တားမြစ်နေရာများ၊ ထောက်ချောက်ဆင်လိုသည့် နေရာများတွင် ခင်းကျင်းခြင်းသည် အကောင်းဆုံး ဖြစ်၏။
ရှောင်ရှောင်နှင့် ရန်ကိုင်တို့ အားကြိုးမာန်တက်ဖြင့် တူးနေသော်ငြား မိုးမြေဖျက်သလင်းကျောက်များမှာ နည်းနည်းလေးမှ လျော့ကျသွားသည့်ပုံမပင်။ ကောင်းကင်စိတ်အာရုံဖြင့် စစ်ဆေးကြည့်ပြီးနောက် ရန်ကိုင် သက်ပြင်းတစ်ချက် ချလိုက်လေသည်။ ဤနေရာတစ်ခုလုံးကို အပြီးတူးပစ်ရန်မှာ အချိန်တိုအတွင်း ပြီးမြောက်နိုင်သည့်ကိစ္စ တစ်ခု မဟုတ်ချေ။
ဤသတ္တုတွင်းတစ်ခုလုံးကို တူးပစ်လိုလျှင် နှစ်ပေါင်းများစွာ အချိန်ယူရပေလိမ့်မည်။ ထိုကဲ့သို့ တွေးမိလိုက်သည့်နောက် ဆက်ပြီး တူးမနေတော့ဘဲ ရှောင်ရှောင်ကိုခေါ်ကာ တောင်တန်း၏ အတွင်းပိုင်းကို ဆက်လက် စစ်ဆေးကြည့်လေသည်။
တစ်ရက်ကြာပြီးနောက်တွင် ရန်ကိုင်နှင့် ရှောင်ရှောင်သည် အခြား တောင်တစ်လုံးဆီသို့ ရောက်လာခဲ့သည်။ တောင်ထဲသို့ ဝင်လာပြီးနောက် မြင်လိုက်ရသည့် မြင်ကွင်းကြောင့် ရန်ကိုင် အံ့အားသင့်တကြီး ရေရွတ်မိလိုက်လေသည် “ပတ္တရာကျောက်စိမ်း”
ပတ္တရာကျောက်စိမ်းသည် ဝိဥာဉ်ကို အားဖြည့်ပေးနိုင်သည့် သတ္တုရိုင်းတစ်မျိုး ဖြစ်သည်။
ပတ္တရာကျောက်စိမ်းသည် အစိမ်းရင့်ရောင်ရှိပြီး ထိုပတ္တရာကျောက်စိမ်းကို သူတော်စင်ချီ သို့မဟုတ် မိုးမြေစွမ်းအင်ဖြင့် အသက်သွင်းလိုက်မည် ဆိုပါက ကျောက်စိမ်းသည် ကျင့်ကြံသူ၏ ဝိဥာဉ်နှင့် စိတ်စွမ်းအင်ကို အားဖြည့်ပေးနိုင်သော စွမ်းအင်ဖျော့ဖျော့တစ်မျိုးကို ထုတ်လွှတ်ပေးပေလိမ့်မည်။
ဤကျောက်စိမ်းသည် ဝိဥာဉ်ကြာပန်းနှင့် တူသော အာနိသင်ကို ပေးစွမ်းနိုင်သော်ငြား ဝိဥာဉ်ကြာပန်းလောက်တော့ ဝိဥာဉ်ကို အားဖြည့်ပေးရာတွင် ကောင်းမွန်ခြင်း မရှိချေ။
ဝိဥာဉ်ကြာပန်းသည် ကျင့်ကြံသူတစ်ဦး၏ အသိစိတ်ပင်လယ်ထဲတွင် တည်ရှိနိုင်ပြီး ထိုကျင့်ကြံသူ၏ ဝိဥာဉ်ကို အဆက်မပြတ် အားဖြည့်ပေးနိုင်သည်။ ရန်ကိုင်၏ဝိဥာဉ်သည် သာမန် အဆင့်တူကျင့်ကြံသူများထက် အဆပေါင်းများစွာ ပိုမို အားကောင်းနေရခြင်းမှာ ဝိဥာဉ်ကြာပန်း၏ နှစ်ပေါင်းများစွာ အားဖြည့်ပေးမှုကြောင့် ဖြစ်သည်။
သို့သော်လည်း ဝိဥာဉ်ကြာပန်းများသည် အလွန်ကိုမှ ရှားပါးလှသော ထွတ်မြတ်လောကရတနာများ ဖြစ်ကြလေရာ အလွယ်တကူရှာတွေ့ရန် လုံးဝ မဖြစ်နိုင်ချေ။ ဝိဥာဉ်ကြာပန်း ဆိုသည့် အရာများသည် တန်ခိုးရှင်ဘုရင်အဆင့် ကျင့်ကြံသူများပင် အလွန်လိုချင်သည့် အရာများ ဖြစ်ကြသည် မဟုတ်လေလော။
ပတ္တရာကျောက်စိမ်းမှာမူ ထိုကဲ့သို့ မဟုတ်။ ပတ္တရာကျောက်စိမ်းမှာ ဝိဥာဉ်ကြာပန်းလောက် အစွမ်း မထွက်သော်ငြား ကျင့်ကြံသူတစ်ဦး၏ ဝိဥာဉ်ကို အားဖြည့်ပေးရာတွင် အလွန်အသုံးဝင်သည့် သတ္တတစ်မျိုး ဖြစ်နေသေးသည်။ ပတ္တရာကျောက်စိမ်းများသည် ဈေးကွက်ထဲတွင် ရံဖန်ရံခါ ပေါ်လာလေ့ရှိသော်ငြား ပေါ်လာသည့်အခါတိုင်း ကျင့်ကြံသူပေါင်းများစွာသည် ထိုကျောက်စိမ်းကို ဝယ်ယူနိုင်ရန် အတွက် အလုအယက် ကြိုးစားကြလေသည်။
ဤနေရာတွင် ထိုသတ္တုများရှိနေသည့် မိုင်းတွင်းကြီး ရှိနေခဲ့သည်။
ဟိုတစ်စဒီတစ်စ ပြန့်ကျဲပုံထောက်လျှင်တော့ ဤသတ္တုတွင်းသည် အလယ်အလတ် မရှိတတ်ရှိတတ် သတ္တုတွင်း တစ်တွင်း ဖြစ်လောက်ပေသည်။
ရန်ကိုင် မှင်သက်နေစဉ် ရှောင်ရှောင်သည် ပတ္တရာကျောက်စိမ်းများကို တူးကာ စတင် ဝါးမြိုနေလေပြီ။
ရန်ကိုင်လည်း ပတ္တရာကျောက်စိမ်းအချို့ကို သွားတူလိုက်ပြီးနောက် ရှောင်ရှောင်ကိုခေါ်ကာ တောင်းတန်းကို ဆက်လက် လေ့လာလေသည်။
သူမမျှော်လင့်ဘဲ ရောက်လာခဲ့သော ကြယ်သေပေါ်တွင် အလွန်ကိုမှ အဖိုးတန်သည့် သတ္တရိုင်းတွင်းများ ရှိနေခဲ့၏။
သုံးရက်ကြာပြီးနောက်တွင် ဖီးနစ်ပြာမျက်ရည်သံ သတ္တုတွင်းကို ထပ်တွေ့ပြန်၏။
တစ်လကြာပြီးနောက်တွင် မိုင်းတွင်း စုစုပေါင်းရှစ်တွင်းကို တွေ့ခဲ့ပြီး တစ်တွင်းမှာ သူတော်စင်သလင်းကျောက်တွင်း ဖြစ်ပေသည်။
တစ်လကြာအောင် စူးစမ်းပြီးနောက် ရန်ကိုင် ရပ်တန့်လိုက်၏။ ဆက်စူးစမ်းနေစရာ မလိုတော့ချေ။ တစ်လကြာ စူးစမ်းထားသည့် ရလဒ်အရ ဤကြယ်သေသည် တစ်ချိန်က သတ္တုကြယ်တစ်လုံး ဖြစ်ခဲ့သည်ဟု ရန်ကိုင်အား ပြောနေခဲ့သည်။
ကျင့်ကြံရေးကြယ်များတွင် ကိုယ်ပိုင် လောကနိယာမများ ရှိကြသည်။ မိုးမြေစွမ်းအင်အားလုံးသည် အကြမ်းဖျင် တူညီသော်ငြား မသိသာလှသော ကွဲပြားချက်အချို့တော့ ရှိပေသည်။
ထိုကွဲပြားချက်များကြောင့် ကျင့်ကြံရေးကြယ်များပေါ်တွင် ဖြစ်ပေါ်လာသည့် သဘာဝသယံဇာတများလည်း ကွဲပြားသွားရ၏။
အချို့ကြယ်များသည် ဆေးပင်များ စိုက်ပျိုးရာတွင် အလွန် အသုံးဝင်သဖြင့် ဆေးပင်ကြယ်ဟု ခေါ်ဆိုကြသည်။
ဆေးပင်ကြယ်ပေါ်တွင် ပုံမှန်အားဖြင့် နှစ်တစ်ရာလောက် ကြာအောင် စိုက်ပျိုးရသော ဆေးပင်တစ်ပင်ကို နှစ်ငါးဆယ်၊ သုံးဆယ်၊ ယုတ်ဆွဆုံး ဆယ်နှစ်လောက်နှင့်ပင် စိုက်ပျိုးနိုင်၏။
အချို့ကြယ်များသည် သာမန် ကျင့်ကြံရေးကြယ်များထက် တွင်းထက်သယံဇာတများ ပို၍ ပေါကြွယ်ဝသည်။ ထိုကဲ့သို့သော ကြယ်မျိုးကို သတ္တုကြယ်ဟု ခေါ်ပေသည်။ သတ္တုကြယ်များတွင် အမျိုးမျိုးသော သတ္တုများကို ပေါများစွာ ရှာတွေ့နိုင်သည်။
ကြယ်စီရင်စုထဲရှိ အားအကောင်းဆုံးသော အင်အားစုများသည် သတ္တုကြယ်နှင့် ဆေးပင်များကို အရေအတွက် တစ်ခုအထိ ထိန်းချုပ်ထားကြသည်။ ဥပမာ ပြရသော် ဟုန်းလော့ ကုန်သွယ်ရေး အဖွဲ့အစည်းသည် ဆေးပင်ကြယ်နှင့် သတ္တုကြယ် တစ်လုံးမက ပိုင်ဆိုင်ထားကြပေသည်။ ထို့ကြောင့်သာလျှင် ဟုန်းလော့ကုန်သွယ်ရေး အဖွဲ့အစည်းသည် ကြယ်စီရင်စုထဲ အလွန်ကိုမှ နာမည်ကျော်ကြားသည့် အဖွဲ့အစည်းတစ်ခု ဖြစ်ရခြင်း ဖြစ်သည်။
ရန်ကိုင် မမျှော်လင့်ဘဲ ခြေချမိလိုက်သော ဤကြယ်သေသည် သတ္တုကြယ်တစ်လုံး ဖြစ်နေခဲ့သည်။ ထို့အပြင် ရှာတွေ့ထားသည့် သတ္တုများ၏ အရည်အသွေးနှင့် ပမာဏအရ သတ္တုကြယ်များတွင်ပင် အဆင့်မြင့်သည့် သတ္တုကြယ်များထဲ ပါသည့် သတ္တုကြယ်တစ်လုံး ဖြစ်သည်။
ယခု လုပ်ဖို့လိုသည်မှာ ဤနေရာကို တိုးတက်အောင်လုပ်ရန်ပင်။
အထက်စကြာဝဠာဂိုဏ်းသာ ဤကြယ်ကို ထိန်းချုပ်နိုင်လျှင် အနာဂတ်တွင် ပိုမို တိုးတက်လာမည်မှာ မလွဲမသွေပင်။ ထိုအကြောင်း တွေးမိလိုက်သည်နှင့် ရန်ကိုင် စိတ်လှုပ်ရှားလာ၏။
ချက်ချင်း တုန့်ဆိုင်းမနေဘဲ သူတော်စင်သလင်းကျောက် မိုင်းတွင်း အပြင်ဘက်၌ တောင်ကြားထဲရှိ ဟင်းလင်းပြင် အစီအရင်နှင့် ဆက်သွယ်ထားသော ဟင်းလင်းပြင်အစီအရင် တစ်ခုကို စတင် ခင်းကျင်းလေသည်။
ကမ္ဘာခြားဟင်းလင်းပြင်အစီအရင် မဟုတ်သည့်အတွက် တစ်ရက်အတွင်း ပြီးသွားခဲ့လေသည်။ သူတော်စင်သလင်းကျောက် ထည့်သွင်း၍ အစီအရင်အား အသွင်းလိုက်ပြီးနောက် တောင်ကြားဆီသို့ ပြန်လာခဲ့သည်။
တုန့်ဆိုင်းမနေဘဲ သူတော်စင်သလင်းကျောက်များကို ထုတ်ကာ သူ့ခြေထောက်အောက်ရှိ ကမ္ဘာခြားဟင်းလင်းပြင် အစီအရင်ထဲသို့ ထည့်လိုက်လေသည်။ ထို့နောက် ချက်ချင်းပဲ အစီအရင်ကို အသက်သွင်းကာ အရိပ်ကြယ်သို့ ပြန်လာခဲ့၏။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၃၁)
ရန်ကိုင် ပန်းတစ်ရာတောင်သို့ ရောက်လာသည့်အခါ လင်းယွင်အားလေးအား သင်ကြားပြသပေးနေသည့် ရီရှီယွင် ကြောင်သွားခဲ့လေသည်။ ရန်ကိုင် ဘာမှ ပြန်မပြောရသေးခင်မှာပင် မယုံသင်္ကာဖြင့် မေးလိုက်လေသည် “ဂိုဏ်းချုပ် ဘာလို့ ဒီလောက် အစောကြီး ပြန်လာတာလဲ။ အန္တရာယ်တစ်ခုခုနဲ့ ကြုံရလို့လား”
သူမ အံ့ဩချင်လည်း အံ့ဩချင်စရာပင်။ ယခင်တစ်ခါ ရန်ကိုင် အရိပ်ကြယ်မှ ထွက်သွားစဉ်က ရှစ်နှစ်ကြာမြင်ခဲ့သည်။ ရန်ရှုကျုနှင့် အခြားသူများ ပြန်ပြောပုံအရ အရိပ်ကြယ်သည် အလွန်ကိုမှ ချောင်ကျပြီး အခြားသော ကျင့်ကြံရေးကြယ်များနှင့် အလွန် ဝေးကွာသည့်အတွက် အနီးဆုံး ကျင့်ကြံရေးကြယ်သို့ ရောက်ရန်ပင် တစ်နှစ်ကျော် ကြာမြင့်ကြောင်း သိရသည်။
သို့သော်ငြား ရန်ကိုင် ထွက်သွားသည်မှာ တစ်နှစ်လောက်သာ ရှိပေသေးသည်။ ဘာကြောင့် ဤမျှ မြန်မြန် ပြန်လာရသနည်း။
“သတ္တုကြယ်တစ်လုံးတွေ့လို့လေ” ရီရှီယွင်ကို ပြန်ဖြေရင်း လင်းယွင်အာကို ကောင်းကင်စိတ်အာရုံဖြင့် စစ်ဆေးကြည့်လိုက်၏။
တိုက်တန်ခွန်အား ခန္ဓာကိုယ်ကို ပိုင်ဆိုင်ထားသော ဤကလေးမလေးသည် အသက် ဆယ်ငါးနှစ်သာ ရှိသေးသော်ငြား သူမ၏ ခန္ဓာကိုယ်သည် နှစ်ရာပေါင်းများစွာ အသက်ရှင်လာသော တန်ခိုးရှင်အဆင့် ကျင့်ကြံသူများ၏ ခန္ဓာကိုယ်နှင့် ယှဉ်နိုင်နေပြီ ဖြစ်ကြောင်း အံ့အားသင့်စွာ ရန်ကိုင် တွေ့ရှိလိုက်ရလေသည်။
သူမ၏ ခန္ဓာကိုယ်လေးမှာ သေးသေးသွယ်သွယ်လေး ဖြစ်သော်ငြား ထိုခန္ဓာကိုယ် ပေါက်စလေးထဲ ကိန်းအောင်းနေသော ခွန်အားမှာတော့ မတွေးရဲလောက်စရာပင်။
ယခင်တစ်ကြိမ် ကြည်လင်ကောင်းကင်ဂိုဏ်းတွင် တွေ့ရသည်နှင့်စာလျှင် လင်းယွင်အာသည် အရပ်အနည်းငယ် ပိုရှည်လာပြီး ခန္ဓာကောက်ကြောင်းမှာလည်း စတင်၍ အသက်ဝင်လာနေခဲ့လေပြီ။ ပို၍ ရှည်လျားလာသော ခြေတံရှည် သွယ်သွယ်လေးများနှင့် ဆံထုံးထုံးထားသော သူမပုံစံမှာ သူရဲကောင်းမယ်လေး တစ်ဦးနှင့်ပင် တူနေ၏။
ရန်ကိုင် သူမအား ကြည့်နေသည်ကိုမြင်သော် လင်းယွင်အာသည် ဂိုဏ်းချုပ်ဦးလေးဟု ပါးနပ်စွာ ပြန်၍ နှုတ်ဆက်လိုက်လေသည်။
ရန်ကိုင်လည်း ခေါင်းပြန်ညိတ်ပြလိုက်လေသည်။
“သတ္တုကြယ်လား” ရီရှီယွင်၏ မျက်ဝန်းအစုံ တောက်ပသွားခဲ့လေသည်။
သူမတစ်ဘဝလုံး အရိပ်ကြယ်တွင် နေလာခဲ့ရသည့်အတွက် ကြယ်စီရင်စုကြီးထဲသို့ တစ်ခါမှ မရောက်ဖူးသော်လည်း သတ္တုကြယ်သည် မည်သို့သော ကြယ်ဖြစ်သလဲ ဆိုသည်ကိုတော့ မသိဘဲ မနေပါချေ။
သတ္တုကြယ်သည် ကြွယ်ဝချမ်းသာခြင်းနှင့် တောက်ပသော အနာဂတ်ကို ကိုယ်စားပြုပေသည်။ အထူးသဖြင့် ဂိုဏ်းတစ်ဂိုဏ်း အတွက်ပင်။
“အဆင့်မြင့်သတ္တုကြယ်လား” ရီရှီယွင်က ထပ်မေး၏။
“ခင်ဗျား ထင်ထားတာထက် ပိုပြီး အဆင့်မြင့်တယ်” ရန်ကိုင်က အလေးအနက် ပြန်ပြောလိုက်၏ “တစ်လလောက်ပဲ ရှာလိုက်တာတောင် မိုင်းတွင်းရှစ်တွင်းတွေ့နေပြီ။ အဆင့်မြင့်ကနေ အဆင့်နိမ့်အထိ အကုန်ပါတယ်။ မိုးမြေဖျက်သလင်းကျောက် မိုင်တွင်းရယ်၊ ဖီးနစ်ပြာမျက်ရည်သံ မိုင်းတွင်းရယ်၊ ပတ္တရာကျောက်စိမ်း မိုင်းတွင်းရယ်၊ နှင်းရေခဲကြေး မိုင်းတွင်းရယ်၊ ရေတိမ်တိုက်သံမဏိ မိုင်းတွင်းရယ်နဲ့ သူတော်စင် သလင်းကျောက် မိုင်းတွင်းတွေပဲ”
“အများကြီးပဲ” ပုံမှန်အားဖြင့် အလွန်ကိုမှ တည်ငြိမ်နေတတ်သည့် ရီရှီယွင်သည် ရန်ကိုင် ပြောပြသွားသည့် နာမည်ကိုကြားပြီးနောက် မျက်ခုံးပင့်သွားကာ မျက်တောင်များ တဖျက်ဖျက် လှုပ်လာခဲ့လေသည်။
“အဲ့ဒါတွေကတောင် ရေခဲတောင်ရဲ့ အဖျားလောက်ပဲ ရှိသေးတာနော်”
“အဲ့မှာ အန္တရာယ်တွေရှိလား”
“မရှိဘူး။ အဲ့ဒါက ဘာမိုးမြေစွမ်းအင်မှမရှိတဲ့ ကြယ်သေကြီး” ရန်ကိုင်က ရယ်ရယ်မောမောဖြင့် “အဲ့မှာ အန္တရာယ် ရှိနေရင် ကျုပ်ဒီကို ပြန်လာမှာမဟုတ်ဘူး။ တစ်လလောက် ရှာလိုက်သေးတယ်။ ဘာသက်ရှိမှမတွေ့ဘူး။ အန္တရာယ်ရှိတဲ့ ဟာတွေ ဆိုရင်တော့ ပိုတောင်ဝေးသေး”
“ဂိုဏ်းချုပ်က…” ရီရှီယွင်သည် ရန်ကိုင်အား တောက်ပသည့် မျက်ဝန်းအစုံဖြင့် ကြည့်လိုက်သည်။
“ဟုတ်တယ်။ အဲ့ကိုလူတွေလွှတ်ပြီး မိုင်းတူးမလားလို့” ရန်ကိုင်က ပြုံးဖြီးလျက် “ဒါပေမယ့် အထက်စကြာဝဠာဂိုဏ်း အတွက်တောင် အဲ့သတ္တုကြယ်က တော်တော်လေး ကြီးတယ်။ ကျုပ်တို့ ရင်းနှီးတဲ့ ဂိုဏ်းတွေကိုလည်း ဒီအကြောင်း ပြောပြလိုက်ရင် ကောင်းမလားလို့”
“ဂိုဏ်းချုပ်က အဲ့လိုလုပ်ချင်မှတော့ ကျွန်မလည်း ဘာမှ ကန့်ကွက်စရာ မရှိပါဘူး။ ဒါပေမယ့် ကျွန်မတို့နဲ့ ပူးပေါင်းနိုင်မယ့်ဂိုဏ်းက သိပ်များများစားစားမရှိဘူး။ ပြီးတော့ သူတို့ကိုလည်း မိုင်းတူးခွင့်ပေးသင့်တယ်။ သူတို့ တူးလာတဲ့ သတ္တုတွေရဲ့ သုံးဆယ်၊ လေးဆယ် ရာခိုင်နှုန်းလောက်ကို အထက်စကြာဝဠာဂိုဏ်းဆီ အခွန်အဖြစ် ပြန်ပေးပေါ့။ အဲ့လို လုပ်နိုင်ဖို့ဆိုရင် ကျွန်မတို့ အဲ့ဘက်မှာ ကောင်းကောင်း ခြေကုပ်ယူထားနိုင်မှ ဖြစ်မှာ”
“ဟုတ်တယ်။ အကြီးအကဲချုပ်က တကယ် အသေးစိတ်တာပဲ” ရန်ကိုင်က ခေါင်းညိတ်လိုက်သည် “ဒါပေမယ့် အရိပ်လခန်းမကိုတော့…”
“အရိပ်လခန်းမကတော့ ချွင်းချက်ပေါ့” ရီရှီယွင်က ပြုံးလျက် ပြောလိုက်သည်။ ရန်ကိုင်နှင့် ချင်းတုန် အလွန် ရင်းနှီးကြောင်း သူမ သိပေသည်။
“ကောင်းပြီလေ။ အခုကိစ္စကိုတော့ အကြီးအကဲချုပ် လက်ထဲပဲ ထည့်ထားလိုက်မယ်။ ကျုပ် ဖြတ်သန်းရေး တံဆိပ်ပြား နည်းနည်း ထပ်လုပ်လိုက်ဦးမယ်” စကားပြောပြီးသွားသည်နှင့် ရန်ကိုင် ချက်ချင်းပ ြန်ထွက်သွားလေသည်။
သတ္တုကြယ်သို့ လူအများကြီးကို ခေါ်သွားရမည် ဖြစ်သည့်အတွက် အထူး ဖြတ်သန်းရေး တံဆိပ်ပြားများကို သန့်စင်ရန် လိုအပ်လာလေပြီ။
အထူး ဖြတ်သန်းရေးတံဆိပ်ပြား အခုငါးဆယ်ကို သန့်စင်ဖို့ရာ အတော်လေး အချိန်ကြာသွားခဲ့လေသည်။
ထိုကဲ့သို့သော ဖြတ်သန်းရေးတံဆိပ်ပြားသည် သူယခင် သန့်စင်ခဲ့သည့် ဖြတ်သန်းရေးတံဆိပ်ပြားများနှင့် တကယ်ကို ကွာခြားပေသည်။ ဤဖြတ်သန်းရေးတံဆိပ်ပြားသည် ရန်ကိုင် ခင်းကျင်းထားသော ဟင်းလင်းပြင်အစီအရင်ဆီသို့ လူငါးဆယ်ကို တစ်ပြိုင်တည်း ပို့ပေးနိုင်သည်။ ထို့အပြင် ထိုဖြတ်သန်းရေး တံဆိပ်ပြားများကို သန့်စင်ရာ၌ တံဆိပ်ပြားထဲတွင် သူနှင့် ရီရှီယွင်၏ သူတော်စင်ချီကိုသာ တုန့်ပြန်မည့် အစီအရင် တစ်မျိုးကို ထည့်သွင်းထားလိုက်သည်။ ထို့ကြောင့် တစ်ယောက်ယောက်သာ ထိုဖြတ်သန်းရေးတံဆိပ်ပြားကို အသုံးပြုလိုလျှင် သူ သို့မဟုတ် ရီရှီယွင်မှ ကူညီပေးမှ ရပေလိမ့်မည်။
ဤနည်းလမ်းသည် ကရိကထ များသော်ငြား ဤအထူး ဖြတ်သန်းရေး တံဆိပ်ပြားသာ ရန်သူလက်ထဲသို့ မတော်လို့ ရောက်သွားခဲ့လျှင် ဖြစ်လာနိုင်သည့် ပြဿနာများကို တားဆီးပေးနိုင်ပေသည်။
ဤအထူး ဖြတ်သန်းရေးတံဆိပ်ပြားများသည် ပို၍ သန့်စင်ရ ခက်သဖြင့် ရန်ကိုင်အဖို့ ထိုတံဆိပ်ပြားများကို သန့်စင်ရန်အတွက် ဆယ်ခန့်ရက် အချိန်ယူလိုက်ရလေသည်။
တံဆိပ်ပြားများကို သန့်စင်ပြီးနောက် စုယန်၊ ရှနင်းချန်တို့နှင့် သွားတွေ့သော်ငြား နှစ်ယောက်စလုံး တံခါးပိတ်ကျင့်စဉ် ဝင်နေကြောင်း တွေ့ရှိလိုက်ရလေသည်။
ရန်ကိုင်လည်း သူတို့အားတွေ့ရန် အရမ်းကြီး အလျင် လိုမနေသည့်အတွက် သွားမနှောင့်ယှတ်တော့ချေ။ ကမ္ဘာခြား ဟင်းလင်းပြင်အစီအရင်ကို ခင်းကျင်းပြီးသွားပြီ ဖြစ်သဖြင့် ထိုအစီအရင်မှ ဤနေရာသို့ အချိန်မရွေး ပြန်လာနိုင်ပေသည်။
ချင်းတုန်သည် သတင်းကြားပြီးနောက် လက်ရွေးစင် တစ်ဖွဲ့ကိုခေါ်ကာ အထက်စကြာဝဠာဂိုဏ်းသို့ ရောက်လာ၏။
ရီရှီယွင် ပြောသည့်အကြောင်းကို အတော်လေး စိတ်ဝင်စားသည့်အလား သူနှင့်အတူ လူအယောက်တစ်ထောင် ခေါ်လာခဲ့သည်။ ပြန်လည်တည်ဆောက်ဆဲ အရိပ်လခန်းမ အတွက် လူတစ်ထောင်ဆိုသော ပမာဏသည် အတော်လေး များသည့် ပမာဏ ဖြစ်ပေသည်။
အထက်စကြာဝဠာဂိုဏ်းသို့ ရောက်လာပြီး ကြယ်သေ အကြောင်း ရန်ကိုင် ရှင်းပြသည်ကို နားထောင်ပြီးနောက်တွင် ချင်းတုန်သည် ချက်ချင်း ပြန်၍ ပြောလိုက်လေသည် “ဒါဆို ဘာလို့ စောင့်နေဦးမှာလဲ။ သွားကြမယ်လေ။ ငါတို့သာ အဲ့သတ္တုရိုင်းတွေ အကုန်လုံးကို တူးထုတ်နိုင်ရင် လုံးဝချမ်းသာပြီပဲ”
“ချင်းအိုကြီး၊ ခင်းဗျား ကြည့်ရတာ အရိပ်ကြယ်ကနေ အရမ်း ထွက်သွားချင်နေတဲ့ပုံပဲနော်” ရန်ကိုင်က ပြုံးလျက် လှမ်းပြောလိုက်သည်။
ချင်းတုန် တစ်ချက် ကြောင်သွားခဲ့သည်။ ထို့နောက် သည်းလှိုက်အူလှိုက် ရယ်မောလိုက်လေသည် “မထွက်သွားချင်လို့လည်း ရမလားကွာ။ နေ့တိုင်းလိုလိုကို မိုးကြိုးပစ်ချခံနေရတာကိုးကွ။ အချိန်ကြာလေကြာလေ ဒီက လောကနိယာမတွေက ငါ့ကို ပိုပြီး ငြင်းဆန်လာလေပဲ။ အစကတော့ နောက်ထပ် နှစ်နည်းနည်းလောက် ထပ်နေဦးမလို့ပဲ။ ဒါပေမယ့် အခွင့်အရေးက ရောက်လာပြီဆိုမှတော့ တစ်ခါတည်း အသုံးချရတော့မှာပေါ့။ ရန်ကိုင်၊ မင်းစိတ်ချထားလိုက်။ သတ္တုကြယ်ကို ငါစောင့်ကြည့်ထားလိုက်မယ်။ အခြားလူတွေ အဲ့ကြယ်ကို လာလုမှာ မင်းစိတ်ပူစရာ မလိုဘူး”
“အဲ့လိုဆိုရင် ကျုပ်စိတ်အေးရပြီ” ရန်ကိုင်က ခေါင်းညိတ်၍ လက်ဝှေ့ရမ်းကာ ပြောလိုက်လေသည် “အချိန်ဆွဲနေလည်း ဘာမှ ထူးတာ မဟုတ်ဘူးဆိုတော့ သွားကြတာပေါ့”
အထက်စကြာဝဠာဂိုဏ်း၏ ကမ္ဘာခြားဟင်းလင်းပြင် အစီအရင်ရှေ့တွင် လူနှစ်ထောင် စုဝေးနေကြလေသည်။
လူနှစ်ထောင်အနက် တစ်ဝက်မှာ အရိပ်လခန်းမမှ ဖြစ်ပြီး ကျန်တစ်ဝက်မှာ အထက်စကြာဂိုဏ်းမှ ဖြစ်သည်။
အများစုမှာ သူတော်စင်ဘုရင်အဆင့်များ ဖြစ်ကြပြီး အနည်းငယ်သည်သာ တန်ခိုးရှင်အဆင့်များ ဖြစ်ကြသည်။ မိုင်းတူခြင်းအလုပ်ကို သူတော်စင်၊ သူတော်စင်ဘုရင်များဖြင့် လုပ်၍ရသော်ငြား လုံခြုံရေးအတွက် ပညာရှင်အချို့တော့ လိုအပ်ပေသေးသည်။
လူအယောက်ငါးဆယ်စီ တစ်ဖွဲ့ဖွဲ့ပြီး အဖွဲ့ခေါင်းဆောင်တိုင်းသည် ရီရှီယွင်မှ ပေးထားသည် ဖြတ်သန်းရေး တံဆိပ်ပြားများကို ကိုင်ဆောင်ထားကြသည်။ ချင်းတုန်တို့ အဖွဲ့သည့် အန္တရာယ်ရှိမရှိ စူးစမ်းရန်အတွက် ထောက်လှမ်းရေး အဖွဲ့အဖြစ် ပထမဆုံး ထွက်သွားကြသည်။
အမွှေးတိုင်တစ်ချောင်းစာ ကြာပြီးနောက်တွင် လူနှစ်ထောင်စလုံး ရွှေ့ပြောင်းလို့ ပြီးသွားခဲ့လေသည်။
အေးစက်စက်၊ ခြောက်ကပ်ကပ် ကြယ်သေပေါ်ရှိ တောင်ကြားတစ်ခုထဲတွင် လူနှစ်ထောင် ပေါ်လာခဲ့သည်။ ခြောက်ကပ်ကပ် ပတ်ဝန်းကျင်ကြီးကို ကြည့်ရင်း လူတိုင်း အနည်းနှင့်အများဆိုသလို စိုးရိမ်စိတ် ဝင်မိကြ၏။
နောက်ဆုံးအသုတ်နှင့်အတူ ရန်ကိုင် ထွက်လာသည်ကို မြင်သော် ချင်းတုန်သည် သူ့ဆီသို့ အမြန် လျှောက်သွားပြီး မေးလိုက်လေသည် “မင်းပြောတဲ့ ကြယ်သေက ဒီနေရာလား”
“ဟုတ်တယ်”
“ငါကြည့်ရတာ ဘာမှ သိပ်မရှိဘဲ ခြောက်ကပ်ကပ်ကြီးလိုပဲ” ချင်းတုန်က မျက်မှောင်ကြုတ်၍ ပြောလိုက်သည်။
ထိုစကားကို ကြားသည့်အခါ ရန်ကိုင်က ရယ်မောလျက် ပြန်ပြောလိုက်လေ၏ “ကြယ်သေပဲဟာကို၊ ခြောက်ကပ်ကပ်ပဲ ဖြစ်နေမှာပေါ့။ ဒါပေမယ့် အပြင်ပန်းကိုကြည့်ပြီး သွားဆုံးဖြတ်လို့ မရဘူး။ တကယ့် ဆန်းကြယ်မှုတွေဆိုတာ ဒီကြယ်သေရဲ့ ဒီနေရာမှာ ရှိနေတာ”
ပြောပြီးသည်နှင့် ရန်ကိုင်သည် မြေကြီးအား မေးထိုးပြလိုက်လေသည်။
“မြေအောက်လား”
“ဟုတ်တယ်၊ ကျုပ်နောက်လိုက်ခဲ့” ရန်ကိုင်သည် အားလုံးအား သူ့နောက်လိုက်လာရန် ပြောကာ ရှေ့ဆုံး ဦးဆောင် ထွက်သွားလေသည်။
လူနှစ်ထောင်သည် ပတ်ဝန်းကျင်ကို သတိကြီးကြီးထားရင်း ရန်ကိုင်နောက်သို့ လိုက်လာခဲ့လေသည်။
သို့သော်လည်း ဤနေရာတွင် သတိထားစရာ ဘာမှ မရှိမှန်း သတိပြုမိပြီးနောက် အကုန်လုံး တဖြည်းဖြည်း စိတ်အေးလက်အေး ဖြစ်သွားကြလေသည်။
မိုးမြေစွမ်းအင် မရှိသည့်အတွက် ဤနေရာတွင် သူတို့အား အန္တရာယ်ပေးနိုင်သည့်အရာ သိပ်များများစားစား မရှိချေ။
တစ်နာရီခန့်ကြာပြီးနောက်တွင် ရန်ကိုင်သည် ယခင်က ခုန်ဆင်းသွားခဲ့သည့် တွင်းပေါက်ကြီးဆီသို့ ရောက်လာခဲ့၏။ လူနှစ်ထောင်သည် ရန်ကိုင်ဆင်းသွားသည့် လမ်းအတိုင်း လိုက်ဆင်းလာကြသည်။
မကြာမီ အားလုံးရှေ့ အဆောက်အဦးပျက်များ ထွက်ပေါ်လာခဲ့လေသည်။
ထိုအဆောက်အဦးပျက်များအကြောင်း ရန်ကိုင်၏ မှန်းဆချက်များကို နားထောင်ရင်း ချင်းတုန်နှင့် ရီရှီယွင်တို့ အလိုလို သက်ပြင်းချမိလိုက်ကြသည်။
မွေးဖွားခြင်း၊ အိုမင်းခြင်း၊ ဖျားနာခြင်းနှင့် တဖြည်းဖြည်း သေဆုံးခြင်းတို့သည် ကြယ်များပင် မလွတ်မြောက်နိုင်သော လောကဓမ္မတာ ဖြစ်လေသည်။ အကုန်လုံးသည် ထိုလောက ဓမ္မတာကို မဖြစ်မနေ လိုက်နာရမည်ဆိုလျှင် ကျင့်ကြံသူများလည်း ကောင်းကင်၏ အလိုဆန္ဒကို ဆန့်ကျင်နိုင်မည်လော။ တစ်နေ့နေ့ တစ်ချိန်ချိန်၌ သူတို့အားလုံး လက်တစ်ဆုပ်စာ ပြာပုံဘဝသို့ ပြောင်းလဲသွားနိုင်သည်မှာ ဖြစ်နိုင်၏။ လက်ရှိ အရိပ်ကြယ်တွင် အလွန်ကိုမှ အားကောင်းနေသော အထက်စကြာဝဠာဂိုဏ်းသည်လည်း တစ်နေ့နေ့တွင် ပျက်သုဉ်းပြီး သမိုင်းကြောင်းထဲ မေ့လျော့ပျောက်ကွယ်သွားခံရနိုင်သည်မှာလည်း ဖြစ်နိုင်သည်။
ထိုအနိစ္စတရားအကြောင်းကို တွေးတောရင်း ခေါင်ဆောင်နှစ်ဦး၏ အမူအရာ သိပ်မကောင်းကြတော့ချေ။
“ကျုပ်စဉ်းစားထားတာကတော့၊ ဒီနေရာမှာ စခန်းတစ်ခု တည်ဆောက်မယ်။ နေရာတစ်ခုရှိနေပြီဆိုတော့ နည်းနည်း ပြင်ဆင်ပြီး သန့်ရှင်းလိုက်ရင် နေလို့ရမယ် ထင်တာပဲ။ ဒီကနေ မိုင်းသွားတူး။ ပြီးရင်း ပြန်လာ။ ပြီးရင် ပြန်သွား၊ အဲ့လိုမျိုးပေါ့။ ခင်ဗျားတို့ ဘယ်လိုထင်ကြလဲ” ရန်ကိုင်က သူ့ရှေ့ရှိ အဆောက်အဦးပျက်များကို ညွှန်ပြရင်း မေးလိုက်သည်။
“ပြဿနာမရှိဘူး” ချင်းတုန်က ခေါင်းညိတ်လိုက်သည်။
“အကြီးအကဲချုပ်ကော” ရန်ကိုင်က ရီရှီယွင်ဘက်သို့ လှည့်၍ မေးလိုက်လေသည်။
“ကျွန်မလည်း ကန့်ကွက်စရာ မရှိပါဘူး”
“ဒါပေမယ့် အဆောက်အဦးဆောက်ဖို့ လိုတဲ့ ပစ္စည်းတွေကကော” ချင်းတုန် မျက်မှောင်ကြုတ်သွား၏။
ရီရှီယွင်က ရယ်မောလျက် ပြုံးကာ “ကျွန်မတို့ ယူလာတယ်။ ဂိုဏ်းချုပ်က ဒီအစီအစဉ်ကို အစကတည်းက စဉ်းစားထားတာမိုလို့ လိုအပ်တဲ့ ပစ္စည်းတွေ အကုန်လုံးကို ကျွန်မတို့ ပြင်ဆင်ထားတယ်”
“အဲ့လိုဆိုမှတော့ ဒီလူအိုကြီး အလုပ်ရှုပ်ခံနေစရာ မလိုတော့ဘူးပေါ့” ချင်းတုန်းက ရယ်ရယ်မောမောဖြင့် အားလုံးဘက်သို့လှည့်၍ “အရိပ်လခန်းမက တပည့်တွေ၊ အထက်စကြာဝဂိုဏ်းက မင်းတို့ရဲ့ ရောင်းရင်းညီအစ်ကို မောင်နှမတွေကိုကူညီပြီး အိမ်တွေ ဆောက်ပေးလိုက်ကြဦး။ ဒီနေရာက အခုကနေစပြီး ငါတို့ ယာယီနားနေမယ့် စခန်းပဲ”
ချက်ချင်းပဲ အရိပ်လခန်းမတပည့်များ စတင် အလုပ်လုပ်ကြတော့လေသည်။
နှစ်ပေါင်းများစွာကြာအောင် စွန့်ပစ်ထားခံရသော အပျက်အစီး နယ်မြေသည် ရုတ်တရက် လူပေါင်းများစွာဖြင့် လှုပ်ရှား အသက်ဝင်လာခဲ့လေသည်။ ထိုအချိန်အတောအတွင်း ရန်ကိုင်သည် ဟင်းလင်းပြင်အစီအရင်တစ်ခုကို စတင် ခင်းကျင်းလေ၏။
ဤနေရာသည် အဓိကစခန်းဖြစ်သဖြင့် အပြင်ဘက်တွင် ဆက်သွယ်နိုင်မည့် ဟင်းလင်းပြင်အစီအရင်တစ်ခု ဤနေရာတွင် ရှိနေရန် လိုအပ်ပေသည်။ ဤနေရာရှိ အစီအရင်အား အထက်စကြာဝဠာဂိုဏ်းရှိ အစီအရင်နှင့်ဖြစ်စေ၊ တောင်ကြားထဲရှိ အစီအရင်နှင့်ဖြစ်စေ၊ ဆက်သွယ်ထားရန် လိုအပ်သည်။
ဤနည်းဖြင့် သတ္တုများကို သယ်ယူပို့ဆောင်ရာတွင် အလွန်ကို အချိန်ကုန် သက်သာသွားပေလိမ့်မည်။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၃၂)
ဆယ်ရက်ကြာပြီးနောက်တွင် မူလက အပျက်အစီးနယ်မြေ ဖြစ်ခဲ့သောနေရာ၍ အသစ်ဆက်ဆက် ဆောက်လုပ်ထားသော အဆောက်အဦးများစွာ ရှိနေခဲ့လေပြီ။ ဤနေရာသည် သူတို့အားလုံး ရေရှည်နေကြမည့် နေရာဖြစ်သည့်အတွက် တပည့်များသည် အဆောက်အဦးများ ဆောက်လုပ်ကြရာ၌ အတတ်နိုင်ဆုံး ကြိုးစားထားကြလေသည်။
အဆောက်အဦးများ၏ ပုံစံမှာ သူတို့ ဂိုဏ်းထဲရှိ အဆောက်အဦးများနှင့် ခပ်ဆင်ဆင်ပင်။ ထို့ကြောင့် ဤနေရာ၌ နေရသော်ငြား သူတို့ဂိုဏ်းတွင် နေနေရသလို ခံစားရနိုင်၏။ ကွာခြားသွားသည့် အချက်ဆို၍ မိုးမြေစွမ်းအင် မရှိသည့် အချက်သာ ရှိပေသည်။
သို့ရာတွင် မိုးမြေစွမ်းအင်အစား သူတော်စင်သလင်ကျောက်ကို သုံး၍ အစားထိုး ကျင့်ကြံနိုင်၏။
အပျက်အစီးနယ်မြေ၏ လမ်းထောင်များတွင် ညလင်း ကျောက်တုံးများ ချိတ်ဆွဲထားကြသဖြင့် မူလက မှောင်မိုက် မည်းမှောင်နေခဲ့သော လမ်းများသည် တစ်ဖန် အလင်းရောင်ဖြင့် ပြန်လည် တောက်ပလာခဲ့လေသည်။
ရန်ကိုင်သည် သူရှာဖွေတွေ့ရှိထားသည့် မိုင်းတွင်းရှစ်တွင်း၏ တည်နေရာကို ရီရှီယွင်နှင့် ချင်းတုန်တို့အား ပြောပြလိုက်သည်။ သတ္တုများအား မည်ကဲ့သို့ တူးဖော်မည်လဲဆိုသည့် ကိစ္စနှင့် ပက်သက်၍မူ သူတို့ဘာသာ စဉ်းစားကြပေလိမ့်မည်။ ရန်ကိုင် အနေဖြင့် ခေါင်းရှုပ်ခံကာ လိုက်၍ စဉ်းစားနေစရာ မလိုပေ။
လူအင်အား မလုံလောက်လျှင်လည်း ဟင်းလင်းပြင်အစီအရင်ကို သုံး၍ အရိပ်ကြယ်မှ အချိန်မရွေး လူများ ထပ်ခေါ်၍ ရပေသည်။ ရန်ကိုင် သူတို့အတွက် အားလုံး ပြင်ဆင်ထားပြီးသွားလေပြီ။
ထိုမျှသာလျှင် မဟုတ်သေးဘဲ ရန်ကိုင်သည် စခန်း တည်ဆောက်ခြင်း ပြီးစီးသွား၍ တပည့်များ မိုင်းစတူးသည်နှင့် မိုင်းတစ်သန်းပတ်လည်အတွင်းတွင် ဟင်းလင်းပြင်အစီအရင် များစွာကို ခင်းကျင်ခဲ့လေသည်။
ထိုအစီအရင်များနှင့် ဆိုပါက တပည့်များအဖို့ တစ်နေရာမှ တစ်နေရာသို့သွားရန် ပို၍ လွယ်ကူသွားလေပြီ။
တစ်လကြာပြီးနောက်တွင် စရန်ထွက်ရန်အတွက် ရန်ကိုင် အဆင်သင့် ဖြစ်နေလေပြီ။
သူ၏ မူလရည်ရွယ်ချက်မှာ အရိပ်ကြယ်နှင့် ကျင့်ကြံရေးကြယ် တစ်လုံးကြား ဆက်သွယ်ရေးတစ်ခု တည်ဆောက်ရန်ပင်။ သတ္တုကြယ်ကို တွေ့ရှိလိုက်ခြင်းမှာ မတော်တဆ တွေ့ရှိမှု တစ်ခုသာ ဖြစ်သည်။
ယခု သတ္တုကြယ်ရှိ ကိစ္စများကို စီမံပြီးသွားပြီ ဖြစ်သဖြင့် သူ့ခရီးကို ဆက်၍ နှောင့်နှေးနေစရာ မလိုတော့ချေ။
အပျက်အစီးနယ်မြေကြီးထဲ ရပ်ရင်း ရန်ကိုင်သည် ရှောင်ရှောင်ကို ဆင့်ခေါ်လိုက်လေသည်။
အရိပ်ကြယ်သို့ ရောက်ပြီးစကတည်းက ရန်ကိုင်သည် ရှောင်ရှောင်ကို တောက်လျှောက် လွှတ်ထားပေးခဲ့ခြင်း ဖြစ်သည်။ သတ္တုများစွာဖြင့် ပေါကြွယ်ဝသော ဤနေရာသည် ရှောင်ရှောင် အတွက် သုခဘုံ ဖြစ်လေသည်။ သတ္တုများကို ဝါးမြိုခြင်းဖြင့် ရှောင်ရှောင်သည် ပို၍ အားကောင်းလာသည်။ ထူးခြားသော ဂုဏ်သတ္တိရှိသည့် သတ္တုတစ်မျိုးမျိုးကို ဝါးမြိုနိုင်ခဲ့လျှင် ထိုသတ္တုနှင့် ဆက်စပ်သော စွမ်းရည် အမျိုးအစား အသစ်များကိုပင် ရနိုင်သေးသည်။
သူ့ချော်ရည်အကာအကွယ်သည် အကောင်းဆုံး ဥပမာ ဖြစ်သည်။ ထိုအရာမှာ နေမီးလျှံအမြူတေကို ဝါးမြိုလိုက်ရင်းမှ ရှောင်ရှောင် ရရှိလိုက်သည့် စွမ်းရည်အသစ်တစ်ခု ဖြစ်သည်။
ထိုအကာအကွယ်ကို ထုတ်လွှတ်လိုက်နိုင်သည်နှင့် မည်သူမဆို ရှောင်ရှောင်နှင့် ဆယ်မီတာအကွာအတွင်းသို့ ချဉ်းကပ်ရန် အလွန်ကိုမှ ခဲယဉ်းသွားလေ၏။ ချော်ရည် အကာအကွယ်ဆီမှ ဖြာထွက်နေသော အပူစွမ်းအင်သည် တန်ခိုးရှင်အဆင့် ပညာရှင်များကိုပင် ပြန်ဆုတ်သွားအောင် တွန်းအားပေးနိုင်ပေသည်။
သတ္တုကြယ်တစ်လုံး ဖြစ်သည့်အတွက် သတ္တုများစွာဖြင့် ပေါကြွယ်ဝနေမည် ဖြစ်သည့်အတွက်ကြောင့်လည်း ရန်ကိုင်သည် ရှောင်ရှောင်ကို လွှတ်ပေးထားလိုက်ခြင်း ဖြစ်သည်။
ရန်ကိုင်၏ ခေါ်သံကိုကြားသည့်အခါ ရှောင်ရှောင်သည် မြေကြီးတစ်လျှောက် တွင်းတူးပြီး ပြန်လာခဲ့လေသည်။ တစ်နာရီ ကြာပြီးနောက် ရှောင်ရှောင် ပြန်ရောက်လာခဲ့သည်။
သို့သော်လည်း ရှောင်ရှောင်ပုံစံကို မြင်ပြီးနောက် ရန်ကိုင် အနည်းငယ် စိတ်ပူသွားခဲ့သည်။
ရှောင်ရှောင်သည် သူမ၏ နိမ့်ကျသော ဥာဏ်ရည်ကြောင့် အနည်းငယ် တုံးအအပုံစံပေါက်သည်။ သူ့မျက်နှာ အမူအရာကို ကြည့်ရုံဖြင့် ထိုအချက်ကို သိနိုင်ပေသည်။ သို့သော်လည်း လက်ရှိ သူ့ပုံစံသည် ထို့ထက်ပင် ပိုဆိုးနေသေး၏။ ပုံမှန်ဆိုလျှင် အနည်းငယ် တောက်တောက်ပပ ဖြစ်နေသည့် သူ့မျက်လုံးများဆိုလျှင် လုံးဝကို မှေးမှိန်နေခဲ့သည်။
သူ့ဆီ လမ်းလျှောက်လာနေသည့် အခါတွင်ပင် ရှောင်ရှောင်သည် အရက်မူးနေသည့်အလား ဒယီးဒယိုင် ဖြစ်နေခဲ့လေသည်။
ရှောင်ရှောင်ပုံစံကို မြင်ပြီး ရှောင်ရှောင်သည် မစားသင့်သည့် သတ္တုတစ်မျိုးမျိုးကို သွားစားလိုက်လေသလားဟုပင် ရန်ကိုင် တွေးမိသွားခဲ့သည်။ သို့သော် သေချာ စစ်ဆေးကြည့်ပြီးနောက် ရှောင်ရှောင်၏ ခန္ဓာကိုယ် အခြေအနေသည် လုံးဝကို အကောင်းအတိုင်း ရှိနေကြောင်း တွေ့လိုက်ရလေသည်။
ထို့အပြင် ရှောင်ရှောင်ဆီမှ… ထူးခြားသော စွမ်းအင်တစ်မျိုး ဖြာထွက်နေသည်ကိုပင် ရန်ကိုင် ခံစားမိလိုက်သည်။
ထိုကဲ့သို့သော စွမ်းအားကို သူရင်းရင်းနှီးနှီး သိနေသည်။ ထိုစွမ်းအားသည် အရိပ်ကြယ်၏ ကြယ်အမြူတေကို သန့်စင်ပြီးနောက် သူခံစားလိုက်ရသည့် လောကနိယာမများပင် ဖြစ်လေသည်။
“လောကနိယာမစါမ်းအား” ရန်ကိုင်၏ အမူအရာ အပြောင်းလဲကြီး ပြောင်းလဲသွားပြီး ရှောင်ရှောင်အား နောက်တစ်ကြိမ် သေချာ ထပ်မံ စစ်ဆေးတော့လေသည်။
အချိန်အတော်ကြာအောင် စစ်ဆေးကြည့်ပြီးနောက် ရန်ကိုင်သည် မျက်မှောင်ကြုတ်လျက် ကောင်းကင်စိတ်အာရုံကို ပြန်ရုတ်သိမ်းလိုက်လေသည်။
ရှောင်ရှောင်နှင့် ပက်သက်၍ အားလုံး ပုံမှန်ပင်။ သို့သော် လက်ရှိ ရှောင်ရှောင်၏ ခန္ဓာကိုယ်သည် လောကနိယာမစွမ်းအား တစ်ပိုင်းတစ်စကို ထုတ်လွှတ်နေခဲ့လေပြီ။ သူထုတ်လွှတ်သည့် စွမ်းအားမှာ အရိပ်ကြယ်၏ လောကနိယာမ စွမ်းအားနှင့် ယှဉ်လိုက်လျှင်တော့ အဆပေါင်းများစွာ အားနည်းနေသေး၏။
သို့သော် လောကနိယာမများမှာ တန်ခိုးရှင်ဘုရင်အဆင့် ကျင့်ကြံသူများပင် လက်လှမ်းမမီသော လောကနိယာမများသာ ဖြစ်ကြပေသည်။
သူသိချင်နေသည်မှာ ရှောင်ရှောင်၏ ခန္ဓာကိုယ်မှ ဘာကြောင့် လောကနိယာမ စွမ်းအားကို ထုတ်လွှတ်နေရသလဲ ဆိုသည်ကိုပင်။
သေချာပြန်စဉ်းစားကြည့်လိုက်သည့်နောက် အဖြေတစ်ခုကို ရန်ကိုင် စဉ်းစားမိသွား၏ “မင်းဒီကြယ်သေရဲ့ ကြယ်အမြူတေကို ဝါးမြိုပြီး သန့်စင်ပစ်လိုက်တာလား။ ဒီကြယ်သေမှာ ကြယ်အမြူတေ ရှိသေးတယ်ပေါ့”
ရှောင်ရှောင်သည် ဘာမှနားမလည်သည့် အမူအရာဖြင့် ရန်ကိုင်အား မော့ကြည့်လာသည်။ ထို့နောက် ခြေတစ်လှမ်းလှမ်းရန် ပြင်လိုက်သည်။ သို့သော် ခြေတစ်လှမ်းပင် မလှမ်းနိုင်သေးခင်မှာပင် ဖင်ထိုင်လျက် လဲကျသွားလေသည်။
ထိုမြင်ကွင်းကိုကြည့်ရင်း ရန်ကိုင် ရယ်ရခက် ငိုရခက် ဖြစ်သွားခဲ့လေသည်။ လက်ရှိ ရှောင်ရှောင်နှင့် ပက်သက်၍ မည်သည့် ပြဿနာမှ မရှိချေ။ ရှောင်ရှောင် ယခုကဲ့သို့ပုံစံမျိုး ဖြစ်နေရခြင်းမှာ သူဝါးမြိုထားသည့် ကြယ်သေ၏ အမြူတေကို အပြည့်အဝ မသန့်စင်နိုင်သေးသည့်အတွက် သူ့ခွန်အားကိုပါ မထိန်းချုပ်နိုင်တော့ခြင်း ဖြစ်သည်။ ထိုအချက်ကို နားလည်လိုက်သည့်နောက်တွင် ရန်ကိုင်လည်း အခြားဘာမှ လုပ်မနေတော့ဘဲ ကမ္ဘာငယ်လေးထဲသို့သာ ရှောင်ရှောင်ကို ပြန်ခေါ်လိုက်လေသည်။
သို့သော်လည်း ဖြစ်စဉ်တစ်ခုလုံးသည် ရန်ကိုင်အတွက် အလွန်ကိုမှ အံ့အားသင့်စရာ ဖြစ်နေသေး၏။
ဤကြယ်သေတွင် ကြယ်အမြူတေ ရှိနေဦးမည်ဟု ရန်ကိုင် တကယ်ကို မထင်ထားခဲ့ချေ။
ကြယ်သေတစ်ခု အဖြစ်နေဖြင့် ကြယ်အမြူတေ ရှိနေခြင်းမှာ လုံးဝ မဖြစ်နိုင်သည့်ကိစ္စ ဖြစ်သည်။ အကြောင်းမှာ မိုးမြေစွမ်းအင် မရှိဘဲ လောကနိယာမများ ရှိမလာနိုင်သည့် အတွက်ကြောင့် ဖြစ်သည်။ ဤသည်မှာ လူတစ်ယောက် သေသွားပြီး သူတို့၏ ခန္ဓာကိုယ်ပုပ်သိုးကာ အဆီအနှစ်လည်း တစ်စတစ်စ ပျောက်ကွယ်သွားပြီး အရိုးဖြူများသာ ကျန်ရစ်ခဲ့သည်နှင့် တူပေသည်။
သို့သော် ချွင်းချက်ဆိုသည်မှာတော့ ရှိစမြဲပင်။
သူခန့်မှန်းကြည့်ရသလောက် ဤကြယ်သေသည် ယခင်က အလွန်ကိုမှ မိုးမြေစွမ်းအင်တို့ဖြင့် သိပ်သည်းကြွယ်ဝခဲ့သော ကျင့်ကြံရေးကြယ်တစ်လုံး ဖြစ်ခဲ့လောက်သည်။ အမျိုးမျိုးသော အကြောင်းများကြောင့် လွန်ခဲ့သော နှစ်ထောင်ပေါင်းများစွာက သေဆုံးသွားခဲ့ခြင်း ဖြစ်သည်။ ထို့ကြောင့် သူ၏ ကြယ်အမြူတေ စွမ်းအင်အချို့မှာ ကျန်ရစ်ခဲ့လေ၏။
ရှောင်ရှောင်သည် မြေကြီးထဲ အနက်ကြီးတူးပြီး ကျန်ရစ်နေသည့် ကြယ်အမြူတေ အချို့ကိုတွေ့ကာ ဝါးမြိုခဲ့ခြင်း ဖြစ်သည်။
ဤသည်မှာ သူ့အတွက် ကံကောင်းမှုတစ်ခုပင် ဖြစ်သည်။ တကယ့် ကြယ်အမြူတေသာ ဆိုလျှင်တော့ ရှောင်ရှောင် အနေဖြင့် လုံးဝ သန့်စင်နိုင်လိမ့်မည် မဟုတ်ချေ။
ရှောင်ရှောင် ကြယ်အမြူတေကို ဝါးမြိုသန့်စင်လိုက်သည့် ပုံစံမှာ ရန်ကိုင်မှ အရိပ်ကြယ်၏ ကြယ်အမြူတေကို သန့်စင်ပြီး ကြယ်သခင်တစ်ပါး ဖြစ်လာသည့် လမ်းကြောင်းနှင့် လုံးဝ ကွဲပြားပေသည်။ ကြယ်သခင်နှင့် ကျင့်ကြံရေး ကြယ်တို့၏ ကံကြမ္မာမှာ ဆက်စပ်နေသည်။ ရန်ကိုင် ကြယ်သခင် ဖြစ်လာသော်ငြား အရိပ်ကြယ်၏ ကြယ်အမြူတေသည် ဆက်၍ တည်ရှိနေသေးသည်။ သူတို့ကြား ရန်ကိုင်အား အရိပ်ကြယ်၏ စွမ်းအားအချို့ကို သုံးစေနိုင်သော ဆန်းကြယ်သည့် ဆက်သွယ်ချက် ဖြစ်လာခြင်းသာ။
ရှောင်ရှောင်ကမူ ဤကြယ်၏ ကြယ်အမြူတေကို တိုက်ရိုက် ဝါးမြိုပစ်လိုက်ခြင်း ဖြစ်သည်။ တစ်နည်းဆိုရသော် ဤကြယ်၏ ကြယ်အမြူတေသည် လုံးဝ ပျောက်ကွယ်သွားခဲ့လေပြီ။ အရိပ်ကြယ်၏ ကြယ်အမြူတေကဲ့သို့ ဆက်ပြီး တည်ရှိနိုင်တော့မည် မဟုတ်ချေ။
ရှောင်ရှောင် အဆင်ပြေနေသဖြင့် ရန်ကိုင်လည်း ဆက်ပြီး စိတ်ပူမနေတော့ပေ။ ချင်းတုန်နှင့် ရီရှီတို့ဖြင့် စကားပြောပြီးနောက် သတ္တုကြယ်မှ ထွက်ခွာလာခဲ့လေသည်။
ကြယ်စီရင်စုထဲ ခရီးသွားရသည်မှာ အလွန်ကိုမှ ပျင်းရီငြီးငွေ့စရာ ကောင်းလှသည်။ အထူးသဖြင့် မည်သည့် ကျင့်ကြံရေးကြယ်မှ မရှိသော ဤကဲ့သို့နေရာမျိုးတွင် ဖြစ်သည်။
ကြယ်မြေပုံမှတစ်ဆင့် သူနှင့် အနီးဆုံးသော ကျင့်ကြံရေးကြယ်သို့ ရောက်ရန် အနည်းဆုံး တစ်နှစ်ခန့် လိုသေးကြောင်း ရန်ကိုင် သိထားသည်။
ရန်ကိုင်သည် ခဏသွားလိုက်၊ ဂြိုလ်သိမ်းများပေါ် ခဏဝင်နားကာ ကျင့်ကြံလိုက်လုပ်ရင်း ကြယ်စီရင်စုအား ဖြတ်သန်းသွားလာနေခဲ့သည်။
ကြယ်သေများကို တွေ့လျှင် ထိုကြယ်သေများပေါ် ဆင်ကာ အကျိုးအမြတ်များလည်း ရှာကြည့်သေးသည်။
သို့သော် ကြယ်သေများသည် ကြယ်သေများသာ ဖြစ်ကြသည်။ ကြယ်သေများစွာကို ရှာဖွေခဲ့သည်တိုင် အကျိုးအမြတ် များများစားစား မရခဲ့ချေ။ သတ္တုကြယ်ကို ရှာတွေ့ခဲ့ခြင်းမှာ အလွန်ကိုမှ ကံကောင်းသည့် အတွက်ကြောင့်ဟုသာ ပြောရပေလိမ့်မည်။
ထိုကဲ့သို့ အဖြစ်အပျက်မျိုး နောက်တစ်ကြိမ် ထပ်ဖြစ်တော့မည် မဟုတ်ချေ။
ပြောရပြောရသော်ငြား ရန်ကိုင်သည် သူဆင်းခဲ့သည့် ကြယ်သေတစ်လုံးပေါ်တွင် သတ္တုကြယ်ဆီသို့ ဦးတည်နေသော ဟင်းလင်းပြင်အစီအရင်တစ်ခုကို ခင်းကျင်းခဲ့လိုက်သေးသည်။
ထိုအချိန်အတောအတွင်း ရှောင်ရှောင်မှာမူ ကမ္ဘာငယ်လေး အတွင်း၍သာ မလှုပ်မယှတ် အိပ်စက်နေခဲ့လေသည်။ သို့သော် ရှောင်ရှောင်၏ ခန္ဓာကိုယ်ပေါ်မှ မသန့်စင်သည့် မဲနက်နေသော ကျောက်ရည်များ တစ်စတစ်စ ထွက်လာနေသည်ကို ရန်ကိုင် သတိပြုမိသည်။ ထိုကျောက်ရည်များသည် ယခုဆိုလျှင် ကျောက်ခွံကြီးတစ်ခုနှယ် ရှောင်ရှောင်အား ဖုံးလွှမ်းနေခဲ့လေပြီ။
ကျောက်တုံးရုပ်သေးရုပ်တွေလည်း ဆင့်ကဲပြောင်းလဲနိုင်တာလား ရှောင်ရှောင် နိုးလာသည့်နောက်တွင် မည်ကဲ့သို့ ပြောင်းလဲသွားမလဲ ဆိုသည်ကို ရန်ကိုင် အတော်လေး သိချင်နေမိသည်။
ရက်ပေါင်းများစွာကြာအောင် ကျင့်ကြံပြီးနောက်တွင် အတားအဆီးတစ်ခုနှင့် ရန်ကိုင် စကြုံရလေတော့သည်။
ထိုအတားအဆီးသည် သူ့အား တန်ခိုးရှင်ဘုရင်အဆင့်သို့ မရောက်အောင် တားဆီးထားသည့် အတားအဆီး ဖြစ်သည်။ ထိုအတားအဆီးကို ဖြတ်ကျော်နိုင်မှသာလျှင် တန်ခိုးရှင်ဘုရင် အဆင့်သို့ ရောက်နိုင်ပေလိမ့်မည်။
လက်ရှိ အနေအထားဖြင့် ကျင့်ကြံရေးကြယ် တစ်လုံးလောက် ရှာပြီး ထိုကြယ်ပေါ်တွင် နှစ်ဝက်၊ တစ်နှစ်လောက် တံခါးပိတ် ကျင့်ကြံလိုက်လျှင် တန်ခိုးရှင်ဘုရင်အဆင့်သို့ ချိုးဖျက်နိုင်လိမ့်မည်ဟု ရန်ကိုင် ယုံကြည်နေသည်။
တစ်နေ့သ၌… ရန်ကိုင်သည် ရှောင်ရှောင်၏ အခြေအနေကို စစ်ဆေးကြည့်နေ၏။
ရှောင်ရှောင် မလှုပ်မယှတ် ဖြစ်နေသည်မှာ နှစ်အတော် ကြာနေပြီ ဖြစ်သဖြင့် ရန်ကိုင်သည် ရံဖန်ရံခါ သူ့အား သွား၍ စစ်ဆေးကြည့်ရလေသည်။ သို့ရာတွင် ယခုတစ်ကြိမ် စစ်ဆေးကြည့်သည့် အခါ၍ ကျောက်ခွံအတွင်းမှ စွမ်းအင်လှိုင်း အချို့ ဖြာထွက်နေသည်ကို ရန်ကိုင် သတိပြုမိလိုက်သည်။ ရှောင်ရှောင် မကြာခင် နိုးလာတော့မည့်ပုံပင်။
ထို့ကြောင့် ရန်ကိုင်လည်း ရှောင်ရှောင် နိုးလာမည့်အချိန်ကို စောင့်ရန်အတွက် ခဏနားနေရန် နေရာတစ်ခု လိုက်ရှာလေ၏။ ပတ်ဝန်းကျင်အား စစ်ဆေးကြည့်ပြီးနောက် အနားအနီးရှိ ဂြိုလ်သိမ်ဂြိုလ်မွှား ပင်လယ်ကြီးဆီ တန်းသွားလိုက်လေသည်။
ဤဂြိုလ်သိမ်ဂြိုလ်မွှားပင်လယ်သည် အတော်လေးကို ကျယ်ကာ နည်းနည်းလေးမှ လှုပ်ရှားနေခြင်း မရှိဘဲ လုံးဝကို ငြိမ်သက်တိတ်ဆိတ်နေခဲ့သည်။ ဤနေရာသည် ခဏတာ အနားယူရန်အတွက် အကောင်းဆုံးနေရာ ဖြစ်ပေသည်။
သို့သော်လည်း ဂြိုလ်သိမ်ဂြိုလ်မွှားပင်လယ်သို့ ချဉ်းကပ်လာစဉ် ရန်ကိုင် ရုတ်တရက် မျက်မှောင်ကြုတ်သွား၏။
ဂြိုလ်သိမ်ဂြိုလ်မွှားပင်လယ် အတွင်း၌ ပုန်းအောင်းနေသော အရှိန်အဝါများစွာ ရှိနေသည်ကို ရန်ကိုင် သတိပြုမိလိုက်သည်။ ထိုလူများသည် အတတ်နိုင်ဆုံး ပုန်းအောင်းနေကြသော်လည်း အကုန်လုံးသည် တန်ခိုးရှင်အဆင့်များချည်း ဖြစ်နေကြသည်။
ရန်ကိုင်၏ ကောင်းကင်စိတ်အာရုံသည် သူတို့ထက် အများကြီး ပိုအားကောင်းသည့်အတွက်ကြောင့်သာ ထိုလူအုပ်ကို သတိပြုမိလိုက်ခြင်း ဖြစ်သည်။
သူ့ကံ အတော်ဆိုးလှပါလားဟု ရန်ကိုင် တွေးမိသွား၏။ ထိုအရှုပ်ထုပ်ထဲ ဝင်မပါချင်သည့်အတွက် ထိုနေရာမှ အလျင်အမြန် ပြန်ထွက်ခွာလာလိုက်လေသည်။
သို့သော်လည်း သူပြန်လှည့်ရုံတင်ရှိသေး ဂြိုလ်သိမ်ဂြိုလ်မွှား ပင်လယ်အတွင်းမှ သူ့ဆီသို့ အလင်းတန်းတစ်ခု တိုးဝင်လာသည်ကို သတိပြုမိလိုက်လေသည်။
ထိုတိုးကပ်လာနေသော အလင်းတန်းဆီမှ ကြောက်မက်ဖွယ်ရာ စွမ်းအားတစ်ရပ်ကို ရန်ကိုင် ခံစားနေရသည်။ အလင်းတန်သည် အလွန်ကိုမှ မြန်ဆန်သော အမြန်နှုန်းဖြင့် ရန်ကိုင်ဆီသို့ တိုးဝင်လာနေခဲ့လေသည်။
“တန်ခိုးရှင်ဘုရင်အဆင့်” ဂြိုလ်သိမ်ဂြိုလ်မွှား ပင်လယ်ထဲ တန်ခိုးရှင်ဘုရင်အဆင့် ကျင့်ကြံသူတစ်ဦး ပုန်းအောင်းနေကြောင်း သိလိုက်ရချိန် ရန်ကိုင် မျက်နှာပျက်သွားလေ၏။ သူပင်လျှင်ပင် ဤနေရာ၌ တန်ခိုးရှင်ဘုရင်အဆင့် ကျင့်ကြံသူတစ်ဦး ရှိနေမှန်း မသိခဲ့ချေ။
သူလက်ရှိ ခွန်အားအရ တန်ခိုးရှင်အဆင့်များကြား ပြိုင်ဘက်ကင်း ဖြစ်သော်လည်း တန်ခိုးရှင်ဘုရင်အဆင့်နှင့်တော့ သွားယှဉ်မရသေးချေ။
တန်ခိုးရှင်အဆင့်နှင့် တန်ခိုးရှင်ဘုရင်အဆင့်သည် လုံးဝကို ကမ္ဘာခြားနေသည့် အဆင့်နှစ်ခု ဖြစ်သည်။ ထို့ကြောင့် ကြယ်စီရင်စုထဲရိ ပညာရှင်များစွာတို့သည် တန်ခိုးရှင်တတိယ အဆင့်တွင်သာ တစ်နေပြီး တန်ခိုးရှင်ဘုရင်အဆင့်သို့ မည်သို့မှ မတက်ရောက်နိုင်ခြင်း ဖြစ်သည်။
ပုန်းအောင်နေသည့် တန်ခိုးရှင်ဘုရင်အဆင့် ပညာရှင်သည် ရန်ကိုင်အား တစ်ကွက်တည်းဖြင့် အသေသတ်ချင်နေသည့်ပုံပင်။
သို့သော် ရန်ကိုင်၏ ခွန်အားကို သူအထင်သေးလွန်းသွားခဲ့သည်။ တိုးဝင်လာနေသည့် အလင်းတန်းသည် အလွန်ကိုမှ အားကောင်းသော်လည်း ရန်ကိုင် မရင်ဆိုင်နိုင်သည့် အရာမျိုးမဟုတ်ချေ။ ရန်ကိုင်သည် မာန်သွင်း အော်ဟစ်၍ ရွှေရောင်သွေးမျှင်များစွာကို ထုတ်လွှတ်ကာ ဒိုင်းတစ်ခုအဖြစ်သို့ သိပ်သည်းစေလျက် သူ့ရှေ့တွင် ပိတ်ကာထားလိုက်လေသည်။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၃၃)
ဘုန်း…
ကျယ်လောင်သော ပေါက်ကွဲသံနှင့်အတူ ရန်ကိုင် သွေးပွက်ပွက်အန်ထွက်ကာ နောက်သို့ လွင့်ပျံထွက်သွားလေသည်။
ရွှေရောင်သွေးမျှင်များဖြင့် ဖန်တီးထားသော ဒိုင်းသည် ရွှေရောင်အလင်းတန်းအား လုံးဝ မတားဆီးနိုင်ခဲ့ချေ။
သို့သော်လည်း ထို့အတွက်ကြောင့် သူဘာဖြင့် တိုက်ခိုက်ခံလိုက်ရသလဲ ဆိုသည်ကို သေချာ မြင်သွားရသည်။
သူ့အား တိုက်ခိုက်လိုက်သည့်အရာမှာ လုံးပတ် ကလေးလက်မောင်းအရွယ်ရှိသော သုံးမီတာကျော် အရှည်ရှိသည့် ရွှေရောင်တလက်လက် တောက်ပနေသော လှံရှည်တစ်ချောင်း ဖြစ်သည်။
တန်ခိုးရှင်ဘုရင်အဆင့် မှော်ရတနာပင်…
လှံရှည်အား ရွှေရောင်ဒိုင်းမှ ရပ်တန့်နိုင်ခဲ့သော်ငြား ၎င်းဆီမှ ဖြာထွက်နေသော ထက်ရှသည့် အရှိန်အဝါကို တားဆီးနိုင်ခဲ့ခြင်း မရှိချေ။ ထို့ကြောင့် ရန်ကိုင်၏ အသားများ ပေါက်ထွက်သွားရ၏။ နာကျင်မှုကြောင့် ရန်ကိုင် မျက်နှာတစ်ပြင်လုံး ရှုံ့မဲ့လာခဲ့သည်။
သူ့နေရာ၌ သာမန် တန်ခိုးရှင်တတိယအဆင့် တစ်ဦးသာ ဆိုလျှင်တော့ လုံးဝကို အသက်ပျောက်သွားခဲ့လေပြီ။ သူပင်လျှင် အားကောင်းသော ခန္ဓာကိုယ်ကို ပိုင်ဆိုင်ထားခဲ့သည့် အတွက်ကြောင့်သာ အနည်းငယ်လောက်ပဲ ဒဏ်ရာရသွားခဲ့ခြင်း ဖြစ်သည်။
အရိပ်ကြယ်မှ ထွက်လာခဲ့သည့် အချိန်မှစ၍ ယခုအချိန်ထိ ပထမဦးဆုံး အခြားကြယ်မှ ကျင့်ကြံသူကို တွေ့ဖူးခြင်း ဖြစ်သည်။ သို့ရာတွင် တွေ့တွေ့ခြင်းမှာပင် တန်ခိုးရှင်ဘုရင်အဆင့် ကျင့်ကြံသူ တစ်ဦးမှ သူ့အား တန်ခိုးရှင်ဘုရင်အဆင့် မှော်ရတနာဖြင့် တိုက်ခိုက်လာမည်ဟု မထင်ထားခဲ့ပေ။
ရန်ကိုင်အား တိုက်ခိုက်ပြီးနောက်တွင် လှံရှည်သည် လာရာ လမ်းကြောင်းအတိုင်း ပြန်လှည့်သွားပြီး ဂြိုလ်သိမ်ကြီး တစ်လုံးပေါ်၌ ရပ်နေသော သက်လတ်ပိုင်းလူကြီး၏ လက်ထဲသို့ ပြန်ရောက်သွား၏။
သက်လတ်ပိုင်းလူကြီး၏ ခက်ထန်သည့် အမူအရာရှိပြီး အပြာရင့်ရောင်ဝတ်ရုံကို ဝတ်ဆင်ထား၏။ သူ့ဆီမှ ဖြာထွက်နေသော ကျောချမ်းဖွယ်ရာ အရှိန်အဝါသည် မည်သူ့ကိုမှ သူ့အနားသို့ ချဉ်းကပ်မလာအောင် တားဆီးနေခဲ့သည်။
သက်လတ်ပိုင်းလူကြီးသည် ထိုတိုက်ကွက်ဖြင့် ရန်ကိုင်အား မသတ်နိုင်ခဲ့သည့်အပေါ် အတော်လေး အံ့အားသင့်နေသည့်ပုံပင်။
“စိတ်ဝင်စားစရာပဲ။ ငါတို့ ရှိနေတာကို အာရုံခံနိုင်ရုံတင် မဟုတ်ဘူး။ ငါ့တိုက်ကွက်ကိုတောင် အသက်ရှင်လျက် ခုခံနိုင်သေးတယ်” သက်လတ်ပိုင်းလူကြီးသည် ကြမ်းကြုတ်စွာ ပြုံးလျက် ရန်ကိုင် ထွက်ပြေးသွားသည့်ဘက်သို့ ကြည့်ရင်း မေးလိုက်လေသည် “မင်းတို့ သူဘယ်သူလဲ သိလား”
ထိုလူကြီးနားတွင် တန်ခိုးရှင်အဆင့် ပညာရှင် အယောက်နှစ်ဆယ် ရှိနေခဲ့သည်။ အကုန်လုံးသည် တန်ခိုးရှင် တတိယအဆင့်ချည်းများ ဖြစ်ကြသည်။ သက်လတ်ပိုင်းလူကြီး၏ မေးခွန်းကိုကြားသော် အကုန်လုံး အကြည့်ချင်း ဖလှယ်လိုက်ကြပြီး ခေါင်းခါပြလိုက်လေ၏။
“မင်းတို့ မသိဘူးဆိုတော့ ဒီအတိုင်း ဖြတ်သွားဖြတ်လာ တစ်ယောက်ပဲပေါ့” သက်လတ်ပိုင်းလူကြီးက ခဏတာ စဉ်းစားပြီးနောက် “ဒါပေမယ့် ဒီကိစ္စက အရမ်း အရေးကြီးတယ်။ နည်းနည်းလေးမှ အတိမ်းအစောင်းခံလို့ မဖြစ်ဘူး။ သူက ဖြတ်သွားဖြတ်လာ တစ်ယောက်ဆိုရင်တောင် ငါတို့ သူ့ကို လုံးဝ အလွတ်ပေးလို့ မဖြစ်ဘူး”
“ဆရာ တိုက်ခိုက်လိုက်တာကို ခံလိုက်ရတယ်ဆိုမှတော့ သူအသက်ရှင်နိုင်ပါဦးမလား” တစ်ယောက်ယောက် မေးလိုက်၏။
အစောပိုင်းက သက်လတ်ပိုင်းလူကြီး၏ တိုက်ကွက်ကို သူတို့လည်း မြင်ပေသည်။ ထိုတိုက်ကွက်ကို အသက်ရှင်လျက် ခုခံနိုင်မည်ဟု သူတို့ထဲက မည်သူမှ ယုံကြည်ချက် မရှိကြ။ တစ်ဖက်လူ မည်သူမှန်း သူတို့ မသိရသော်ငြား ထိုလူသည် တန်ခိုးရှင်အဆင့်သာ ရှိသေးသည်။ ထို့ကြောင့် သူ့အနေဖြင့် သက်လတ်ပိုင်းလူကြီး၏ တိုက်ကွက်မှ မည်သည့်နည်းနှင့်မှ အသက်ရှင်စရာအကြောင်း မရှိချေ။
“သတိဆိုတာ ပိုတယ်မရှိဘူးကွ။ ကျန်းဖုနဲ့ လျိုတုန်း၊ သူ့အလောင်းကို ငါ့ဆီ ပြန်သယ်လာခဲ့” သက်လတ်ပိုင်းလူကြီးက အမိန့်ပေးလိုက်လေသည်။ သူ့တိုက်ခိုက်သည်ကို ခံလိုက်ရပြီးနောက် ရန်ကိုင်သည် သေအံ့ဆဲဆဲ လူတစ်ယောက်သာ ဖြစ်သွားပြီဟု သက်လတ်ပိုင်းလူကြီး ထင်နေခြင်း ဖြစ်သည်။
“ဟုတ်ကဲ့” တန်ခိုးရှင်တတိယအဆင့် ကျင့်ကြံသူနှစ်ဦးသည် သူတို့၏ ကြယ်လွန်းပျံအသီးသီးကိုထုတ်ကာ ချက်ချင်းပဲ ရန်ကိုင် ထွက်ပြေးသွားသည့်ဘက်သို့ လိုက်သွားကြလေသည်။
ရန်ကိုင် တိုက်ခိုက်ခံလိုက်ရသည့် နေရာမှ မိုင်သုံးထောင် အကွာခန့်ရှိ လွင့်မျောနေသော ဂြိုလ်သိမ်တစ်ခုပေါ်တွင်၊ ရန်ကိုင်သည် တင်ပလင်ခွေထိုင်လျက် သူထွက်ပြေးလာသည့် လမ်းကြောင်းဆီသို့ ငြိမ်သက်စွာ စောင့်ကြည့်နေခဲ့သည်။
တန်ခိုးရှင်ဘုရင်အဆင့် ပညာရှင် ဘာကြောင့် သူ့အား တိုက်ခိုက်လိုက်သလဲ ဆိုသည်ကို ရန်ကိုင် မသိသော်လည်း တစ်ဖက်လူ၏ ပုန်းလျှိုးကွယ်လျှိုး အပြုအမူအရ တစ်စုံတစ်ဦးကို ချောင်းမြောင်းတိုက်ခိုက်ရန် ကြံနေသည်မှာ သေချာပေသည်။ ရန်ကိုင်သည် ဖြတ်သွားဖြတ်လာတစ်ဦး ဖြစ်လျှင်ပင် သူတို့၏ အစီအစဉ်ကို အနှောင့်အယှတ် ပေးနိုင်ပေသည်။
တစ်နည်းဆိုရသော်ငြား တစ်ဖက်လူသည် မျက်မြင်သက်သေကို နှုတ်ပိတ်ပစ်ရန်အတွက် သူ့အား တိုက်ခိုက်ခဲ့ခြင်း ဖြစ်သည်။
ထို့အတွက်ကြောင့် သူထွက်ပြေးမည်ဆိုလျှင်ပင် တစ်ဖက်လူသည် သူ့အား အလွတ်ပေးလိမ့်မည် မဟုတ်ချေ။ တစ်ယောက်ယောက် သူ့နောက်သို့ လိုက်လာလိမ့်မည်ဟု ရန်ကိုင် သေချာသိနေသည်။
ထို့အကြောင်းကြောင့်သာ ရန်ကိုင်သည် အလျင်စလို ထွက်မသွားသေးဘဲ ဤနေရာတွင် ထိုင်စောင့်နေခဲ့ခြင်း ဖြစ်သည်။
အလကားသက်သက် အကြောင်းမရှိဘဲ တိုက်ခိုက်ခံရသည်ကို ရန်ကိုင် မည်ကဲ့သို့ ကျေနပ်နိုင်မည်နည်း။ တစ်ဖက်လူ၏ တိုက်ခိုက်မှုမှာ ကြောက်စရာကောင်းသော်ငြား သူ့အား တိုက်ခိုက်ခဲ့သည့်လူမှာ တန်ခိုးရှင်ဘုရင် ပထမအဆင့်သာ ရှိသေးကြောင်း ရန်ကိုင် သတိပြုမိသည်။
သူသည် လော့ဟိုင်ကိုပင် သတ်လာခဲ့သူတစ်ဦးဖြစ်ရာ တန်ခိုးရှင်ဘုရင် ပထမအဆင့်လေးတစ်ဦးကို ဘာကြောင့်များ ကြောက်နေရမည်နည်း။ ကြယ်ဧကရာဇ်တံဆိပ်ပြားကြောင့် လော့ဟိုင်ကို သတ်နိုင်ခဲ့သည် ဆိုသော်ငြား အခြေအနေ မဟန်လျှင်ပင် သူ့အနေဖြင့် ချက်ချင်း ထွက်ပြေးနိုင်ပေသည်။
လော့ဟိုင်သည် လပေါင်းများစွာကြာအောင် သူ့အား တောက်လျှောက် လိုက်ဖမ်းခဲ့သော်လည်း ဖမ်းမမိခဲ့ချေ။ ဤတန်ခိုးရှင်ဘုရင် ပထမအဆင့်သည် လော့ဟိုင်ထက် ပို၍ မြန်မည်လား။
ရန်ကိုင် ထင်ထားသည့်အတိုင်းပင်၊ လက်ဖက်ရည် ခွက်တစ်ဝက်စာ ကြာပြီးနောက်တွင် အလင်းတန်းနှစ်ခု အဝေး တစ်နေရာမှ ရုတ်တရက် ထွက်ပေါ်လာခဲ့သည်။ ထိုအလင်းတန်း နှစ်ခု ပျံသန်းလာနေသည့် အမြန်နှုန်းအရ ထိုလူနှစ်ဦးသည် ကျိန်းသေ တန်ခိုးရှင်တတိယအဆင့် ပညာရှင်များ ဖြစ်သည်။
ရန်ကိုင် မဲ့ပြုံးပြုံးလိုက်၏။ သို့သော် အလင်းတန်းနှစ်ခု သူ့အနီးသို့ ရောက်လာသည့်အခါ ထိတ်လန့်တုန်လှုပ်သွားဟန် ဆောင်လျက် ချက်ချင်း ဂြိုလ်သိမ်ပေါ်မှ ခုန်ဆင်းကာ ကြယ်လွန်းပျံကိုထုတ်၍ အခြားတစ်ဖက်သို့ ပျံပြေးလေ၏။
သို့သော်လည်း အရမ်းကြီး မြန်မြန်မပြေးခဲ့။ ဒဏ်ရာ ရထားဟန်ဆောင်လျက် လမ်းဆုံးသို့ ရောက်နေသော မြှားတစ်စင်းနှယ် ဖြည်းဖြည်းချင်းသာ ပျံသန်းလေသည်။
ထိုအခြင်းအရာကို မြင်သည့်အခါ ကျန်းဖုနှင့် လျိုတုန်းတို့သည် အကြည့်ချင်းဖလှယ်လိုက်ပြီး ရန်ကိုင်နောက်သို့ အေးအေးဆေးဆေးသာ လိုက်ကြလေသည်။ ကြောင်နှင့်ကြွက် ဂိမ်းကစားသလို တစ်ဖက်လူအား ဖြည်းဖြည်းချင်း နှိပ်စက်ပြီးမှ သတ်ပစ်ရန် စဉ်းစားနေသည့်ပုံပင်။
ပျံသန်းနေစဉ် အတောအတွင်း ရန်ကိုင်သည် ရန်သူများ သူ့နောက်သို့ လိုက်မှီလာမည်ကို စိုးရိမ်နေသည့်အလား နောက်သို့ စိုးရိမ်တကြီး လှည့်ကြည့်လှည့်ကြည့် လုပ်ပြ၏။
ထိုမြင်ကွင်းကိုကြည့်ရင်း ကျန်းဖုနှင့် လျိုတုန်းတို့ မဲ့ပြုံးပြုံးလိုက်ကြသေည်။ တစ်နာရီခန့်ကြာပြီး အတော်ဝေးဝေးသို့ ပျံသန်းလာပြီးပြီဟု ထင်သည့်အခါမှပဲ ရန်ကိုင်သည် ရုတ်တရက် ရပ်လိုက်ပြီး နောက်သို့ ပြန်လှည့်လိုက်သည်။
ကျန်းဖုနှင့် လျိုတုန်းတို့သည်လည်း ရန်ကိုင်နှင့် မီတာ သုံးရာအကွာတွင် ရပ်လျက် သူ့အား လှောင်ပြုံးပြုံးကာ ကြည့်လိုက်ကြ၏။
အရပ်ရှည်ရှည်နှင့် ကျန်းဖုက ရန်ကိုင်အား ကြည့်လျက် “ကောင်လေး၊ မင်းက မဆိုးဘူးပဲကွ။ စီနီယာလီရဲ့ ဝိဥာဉ်ဖျက်လှံနဲ့ တိုက်ခိုက်ခံရတာတောင် ဒီအထိ ထွက်ပြေးနိုင်သေးတယ်။ ငါတကယ် အထင်ကြီးသွားပြီ”
“စီနီယာလီ” ရန်ကိုင် မျက်မှောင်ကြုတ်သွားခဲ့သည်။ မကြာခဏ ချောင်းဆိုးပြနေရင်း ပြန်၍ မေးလိုက်လေသည် “ကျုပ် ခင်ဗျားတို့နဲ့ ဘာရန်ငြိုးမှ ရှိတာလည်းမဟုတ်ဘူး။ ဘာလို့ ကျုပ်ကို တိုက်ခိုက်တာလဲ”
ကျန်းဖုသည် လက်စွပ်တစ်ကွင်းဖြင့် ဆော့ကစားရင်း အေးစက်စက်ပြုံးလျက် “ငါတို့ကြားမှ ရန်ငြိုးမရှိတာ မှန်တယ်။ ဒါပေမယ့် မင်းကိုယ်ကကို ကံဆိုးပြီး အဲ့နေရာကို ဖြတ်သွားတာကိုးကွ။ ဟဲဟဲ၊ စီနီယာလီက သူ့အစီအစဉ် နှောင့်ယှတ်ခံရတာကို အမုန်းဆုံးပဲဆိုတာ မင်းသိလား”
“ဘာအစီအစဉ်လဲ” ရန်ကိုင်က ပြန်မေး၏။
သူ့ဘေးနားတွင် ရပ်နေသော လျိုတုန်းက ဖြတ်ပြောလိုက်၏ “ကောင်လေး၊ သေရတော့မှာကိုတောင် အေးအေးဆေးဆေး မသေဘဲ သောက်မေးခွန်းတွေ မေးနေနိုင်သေးတယ်ပေါ့”
“သေရတော့မှာမို့လို့ မေးနေတာလေ။ အနည်းဆုံးတော့ ဘာမှ မသိဘဲ သေလိုက်ရတာမျိုး မဖြစ်တော့ဘူးပေါ့” ရန်ကိုင်က ဖြည်းဖြည်းချင်း ခေါင်းခါလိုက်၏။
“ဘာလို့ သေရတာလဲ နားလည်သွားချင်တယ်ပေါ့” ကျန်းဖုသည် လှောင်ပြုံးပြုံးလျက် ရန်ကိုင်အား ကြည့်လိုက်၏။
“ဟုတ်တယ်”
“ငါမပြောနိုင်တာတော့ မဟုတ်ဘူး။ မင်း…” ကျန်းဖု ပြောလို့ မပြီးသေးခင်မှာပင် လျိုတုန်းက ဖြတ်ပြောလိုက်လေသည်။
“အပိုတွေတော်ပြီ။ လုပ်စရာရှိတာ မြန်မြန် လတ်စသတ်လိုက်တော့။ ငါတို့ သူ့အလောင်းကို စီနီယာလီဆီ မြန်မြန် ပြန်ယူသွားရမယ်”
“ဟုတ်တယ်” ကျန်းဖုသည် ခေါင်းညိတ်လိုက်ပြီး ရန်ကိုင်လက်ရှိ သိုလှောင်လက်စွပ်အား လှမ်းကြည့်လိုက်သည် “စီနီယာရဲ့ တိုက်ကွက်ကနေ အသက်ရှင်နိုင်တယ်ဆိုတော့ ဒီကောင် ပေါ့သေးသေးတော့ မဟုတ်ဘူး။ သူ့ဆီမှာ ပစ္စည်းကောင်းတွေ အများကြီး ရှိလောက်တယ်။ ငါတို့ တစ်ယောက်တစ်ဝက် ခွဲယူကြမလား”
“အေး ယူကြမယ်” လျိုတုန်းက ခေါင်းညိတ်လိုက်သည်။
စီနီယာလီသည် ရန်ကိုင်၏ အလောင်းကို ပြန်ယူလာရန်သာ ပြောသွားသည်။ ရန်ကိုင် ကိုယ်ပေါ်ရှိ ရတနာများအကြောင်း တစ်ခွန်းမှ ပြောမသွားချေ။ ထို့အပြင် စီနီယာလီ၏ အဆင့်အတန်းအရ သူတို့ဆီမှ ပစ္စည်းများကို ပြန်လုယူလိမ့်မည် မဟုတ်ဟု ကျန်းဖုနှင့် လျိုတုန်း ယုံကြည်နေကြသည်။
“ကျုပ်ပစ္စည်းတွေ လိုချင်တာလား” ရန်ကိုင်က ပြုံးဖြီးလိုက်ပြီးနောက် ရုတ်တရက် အေးစက်စက် လေသံဖြင့် “အဲ့ဒါဆိုရင် ခင်ဗျားတို့ အသက်နဲ့ လဲရမှာနော်”
“သောက်ရူးကောင်” လျိုတုန်းက အေးစက်စက် လေသံဖြင့် နှာခေါင်းရှုံ့လိုက်သည်။ သို့သော်လည်း ချက်ချင်းပဲ မျက်လုံး အပြူးသားဖြင့် ရန်ကိုင် ရပ်နေရာဆီသို့ လှမ်းကြည့်လိုက်လေ၏။ သို့ရာတွင် ရန်ကိုင် ရပ်နေရာ၌ မည်သူမှ ရှိမနေခဲ့ချေ။
ဘယ်အချိန်ကတည်းကမှန်းမသိ ရန်ကိုင်သည် သူတို့၏ မြင်ကွင်းမှ ပျောက်ကွယ်သွားခဲ့သည်။
ရုတ်တရက် သူ့လည်တိုင်တစ်လျှောက် အေးစက်သွားသလို လျှိုတုန်း ခံစားလိုက်ရသည်။ တစ်ချိန်တည်းတွင် ကျန်းဖု၏ အလန့်တကြား အော်ဟစ်သံကိုလည်း ကြားလိုက်ရလေသည် “အစ်ကိုလျို၊ ရှောင်လိုက်”
လျိုတုန်းသည် တန်ခိုးရှင်တတိယအဆင့် ပညာရှင်တစ်ဦး ဖြစ်သည်။ ရန်ကိုင် မရှိတော့ကတည်းက တစ်ခုခု မှားယွင်းနေမှန်း သိလိုက်၏။ ရှောင်ဖု၏ သတိပေးသံကို ကြားလိုက်ချိန် ဘာကိုမှ စဉ်းစားမနေဘဲ သူတော်စင်ချီကို အဆုံးစွန်ထိ လှည့်ပတ်ကာ ထွက်ပြေးရန် ကြိုးစားလိုက်လေသည်။
သို့သော်လည်း ထိတ်လန့်ဖွယ်ရာကောင်းသော ရှီစွမ်းအင် တစ်မျိုးကြောင့် သူ့သူတော်စင်ချီကို ကောင်းကောင်း လှည့်ပတ်၍ မရတော့ချေ။ ထိုမျှသာလျှင် မဟုတ်သေးဘဲ လေဟာနယ်တစ်ခုလုံး အေးခဲနေသည့်အလား သူတစ်ကိုယ်လုံး လှုပ်မရတော့ပေ။
ဤမျှအားကောင်းသောရှီ ဤလောကကြီး၌ တကယ် ရှိသလား။ တစ်ကိုယ်လုံး အေးစက်စက် ဖြစ်လာခဲ့သည်။ ကြောက်ရွံ့မှုကို ဖိနှိပ်ရင်း ရှီကို ထုတ်လွှတ်၍ တစ်ဖက်လူ၏ ရှီကို ခုခံရန် ကြိုးစားသည်။
ဤတိုက်ပွဲသည် တန်ခိုးရှင်အဆင့် ပညာရှင်များကြား ပုံမှန် တိုက်ပွဲတစ်ခုဖြစ်သည်။ ရှီသာ အားကောင်းလျှင် တိုက်ပွဲ၏ အခြေအနေကို အထက်အောက်ပြောင်းပြန် လှန်ပစ်နိုင်ပေသည်။
သို့သော်လည်း အမှန်တရားသည် လျိုတုန်းအား ပို၍ ထိတ်လန့်တုန်လှုပ်သွားခဲ့လေသည်။ သူထုတ်လွှတ်လိုက်သော ရှီသည် နေရောင်ထဲရောက်သွားသည့် နှင်းပွင့်လေးနှယ် တစ်မုဟုတ်ချည်း အငွေးပျံ ပျောက်ကွယ်သွားလေသည်။
ထိုစဉ် သူ့လည်တိုင်တစ်ချောင် အေးစက်သွားသလို ခံစားလိုက်ရသဖြင့် ငုံ့ကြည့်လိုက်ရာ ခေါင်းမပါသည့် အလောင်းတစ်ခု ဟင်းလင်းပြင်ထဲ ရပ်နေသည်ကို တွေ့လိုက်ရ၏။ ခေါင်းပြတ်နေသည့် လည်တိုင်ဆီမှ သွေးစိမ်းရှင်ရှင်တို့သည် ရေတံခွန်တစ်ခုနှယ် ဖြာထွက်နေခဲ့သည်။
ထိုလူ၏ အဝတ်အစား၊ ခန္ဓာကိုယ်ပုံစံနှင့် လက်တွင် ဝတ်ထားသော လက်စွပ်သည် သူ့နှင့် တစ်ထေရာတည်း ဆင်တူ၏။
ငါသေသွားပြီလား
ချွေးစေးတို့ လျိုတုန်း၏ နဖူးထက် တတောက်တောက် ကျဆင်းလာခဲ့သည်။ မကြာမီ သူ့မြင်ကွင်းတစ်ခုလုံး အမှောင် ဖုံးသွားခဲ့လေသည်။
“မင်းရှင်းပြလို့ရပြီလား” ရန်ကိုင် ပြန်ပေါ်လာသည့်အခါ၌ ကျန်းဖုနှင့် ဆယ်မီတာအကွာသို့ ရောက်နေခဲ့လေ၏။
ရန်ကိုင်သည် ရွှေရောင်သွေးမျှင်ကို လက်ချောင်းထိပ်တွင် ဆော့ကစားရင်း ကျန်းဖုးအား အေးစက်စက်အကြည့်ဖြင့် စိုက်ကြည့်ကာ မေးလိုက်လေသည်။
ဖြစ်ပျက်သွားသည့် အဖြစ်အပျက်ကြောင့် ကျန်းဖု တုန်ုတုန်ရီရီ ဖြစ်နေသည်။ တစ်ကိုယ်လုံးဟာလည်း အလောင်း ခန္ဓာကိုယ်နှယ် အေးစက်စက် ဖြစ်နေသည်။
သူနှင့် လက်ရည်တူဖြစ်သော လင်းတုန်သည် လူငယ်လေး၏လက်၌ ဘာမှ ပြန်မလုပ်နိုင်ဘဲ အသတ်ခံလိုက်ရ၏။ ကျန်းဖု ကိုယ်တိုင်သည်လည်း ရွှေရောင် အလင်းတစ်ချက်ကိုသာ မြင်လိုက်ရပြီး ရန်ကိုင် မည်ကဲ့သို့ လှုပ်ရှားသွားသလဲ ဆိုသည်ကို လုံးဝ မမြင်လိုက်ရပေ။
ဤလောကကြီးတွင် ဤမျှ အားကောင်းလှသော တန်ခိုးရှင်အဆင့် ကျင့်ကြံသူ တကယ်ကြီး ရှိသလော။
စီနီယာလီပင် သူတို့အား ဤမျှ အလွယ်တကူ သတ်နိုင်ပါ့မလား။ မသတ်နိုင်လောက်ပေ။
စဉ်းစားရင်းစဉ်းစားရင်း ကျန်းဖု ပို၍ လန့်လာသည်။ ပုတီးစေ့ခန့်အရွယ်ရှိသော ချွေးသီးတို့သည် နဖူးထက် ဝေ့သီလာကြ၏။ မျက်နှာပြင်ဟာလည်း သွေးမရှိတော့သည့် အလား ဖြူဖတ်ဖြူလျော် ဖြစ်လာခဲ့လေသည်။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၃၄)
“ဟိုကောင်က သိပ်မပါးနပ်ဘူးကွ။ ဒါကြောင့် သေသွားရတာ” ရန်ကိုင်သည် ကျန်းဖုအား ထူးမခြားနားဟန်ဖြင့် စိုက်ကြည့်ရင်း ပြောလိုက်သည်။ ရန်ကိုင် ပုံစံကိုကြည့်ရင်း ကျန်းဖု ပို၍ ချွေးစေးများ ပျံလာခဲ့လေသည်။
ထွက်ပြေးချင်သော်လည်း ထွက်ပြေးရဲသည့်သတ္တိ မရှိ။
သူထွက်ပြေးရန် ကြိုးစားလျှင်ပင် ဤနတ်ဆိုးလက်မှ မည်သို့မှ လွတ်မြောက်နိုင်လိမ့်မည် မဟုတ်ဟု သူ့မသိစိတ်က ပြောနေသည်။
“မင်းငါ့ကို ပြောပြပေးမယ်လို့ မျှော်လင့်တယ်” ရန်ကိုင်သည် ကျန်းဖုအား စိုက်ကြည့်ရင်း ဆက်၍ ဖိအားပေးကာ မေးလိုက်သည်။
ကျန်းဖုသည် ကြောက်ကြောက်လန့်လန့်ဖြင့် တံတွေးတစ်လုတ် မျိုချလိုက်ပြီးနောက် ပြန်၍ မေးလေသည် “ငါပြောပြရင် မင်းငါ့ကို လွှတ်ပေးမှာလား”
“မင်းဘယ်လိုထင်လဲ” ရန်ကိုင် ပြံးလျက် ပြန်မေး၏။
ကျန်းဖု၏ ခန္ဓာကိုယ် တုန်ရီသွားခဲ့လေသည်။ အဆုံးတွင် မရှိမဲ့ရှိမဲ့သတ္တိလေးကို စုစည်း၍ ပြန်ပြောလိုက်၏ “မလွှတ်ပေးမှတော့ ငါဘာလို့ ပြောပြနေရဦးမှာလဲ။ ပြောပြော မပြောပြော သေရမှာကိုပဲ”
“မင်းဘာနာကျင်မှုမှ မခံစားလိုက်ရဘဲ သေသွားအောင် ငါလုပ်ပေးလို့ရတယ်” ရန်ကိုင်က ပြုံးမြဲပြုံးဆဲ အမူအရာဖြင့် ပြန်ပြောလိုက်၏။
ရန်ကိုင်၏ အပြုံးသည် ကျန်းဖုအတွက် ငရဲကြီးရှစ်ထပ်မှ တက်လာသည့် သေမင်း၏အပြုံးနှယ် ချောက်ခြားဖွယ် ကောင်းလွန်းလှသည်။
“ငါစဉ်းစားကြည့်လိုက်ဦးမယ်” ကျန်းဖုသည် တံတွေး အနိုင်နိုင်မျိုချရင်း ဟိုကြည့်ဒီကြည့်လုပ်လျက် ထွက်ပြေးနိုင်မည့် နည်းလမ်းတစ်ခုခုများ ရှိနေမလား ရှာကြည့်လေသည်။
ရန်ကိုင်သည် ခဏကြာအောင် စောင့်ကြည့်နေပြီးနောက် သူ့လက်ကို ရုတ်တရက် လှုပ်လိုက်၏။ ထိုအခြင်းအရာကို မြင်သည့်အခါ ကျန်းဖုသည် အလန့်တကြား ထအော်၍ အလျင်စလို ရှောင်တိမ်းရန် ကြိုးစားလိုက်လေသည်။
သို့သော်လည်း သူမရှောင်နိုင်သေးခင်မှာပင် အားကောင်းသော ရှီစွမ်းအင်သည် သူ့တစ်ကိုယ်လုံးအား လှုပ်မရအောင် လာရောက် ရစ်ပတ်ချုပ်နှောင်လေသည်။
ကျန်းဖု၏ မျက်ဆံများ အပ်တစ်ချောင်းနှယ် ကျုံ့ဝင်သွားပြီး အလန့်တကြား အောက်သို့ ငုံ့ကြည့်လိုက်ရာ သူ့ဘယ်ဘက်လက်၏ လက်ချောင်းထိပ်များသည် အလွန်ကိုမှ ထက်ရှသော ဓါးတစ်ချောင်းဖြင့် ခုတ်ဖြတ်ခြင်း ခံလိုက်ရသည့်အလား တိတိရိရိ ပြတ်နေကြောင်း တွေ့လိုက်ရလေသည်။ နီရဲရဲ သွေးများသည် လက်ချောင်းထိပ်မှ တရဟော စီးကျနေခဲ့၏။
ဤနာကျင်မှုသည် တိုက်ပွဲများစွာအား တိုက်ခိုက်လာသော ကျန်းဖုအတွက် ဘာမှမဟုတ်ပါချေ။ ကျန်းဖုအား အမှန်ကတယ် ကြောက်လန့်သွားစေသည်မှာ တစ်ဖက်လူ၏ တိုက်ခိုက်မှုကို နည်းနည်းလေးမှ ပြန်မခုခံနိုင်သည့် အချက်ပင်။
နှစ်ယောက်စလုံးမှာ တန်ခိုးရှင်တတိယအဆင့်များသာ ဖြစ်ကြသော်လည်း တစ်ဖက်လူရှေ့တွင် သူသည် လူကြီးရှေ့သို့ ရောက်နေသော သုံးနှစ်သားကလေးတစ်ဦးကဲ့သို့ ဖြစ်နေသည်။
ရွှေရောင်အလင်း နောက်တစ်ကြိမ် ထပ်လက်သွားပြန်သည်။
နာကျင်မှုကြောင့် ကျန်းဖုမျက်နှာ တစ်ချက် ထပ်မဲ့သွား၏။ သူ့ဘယ်ဘက်လက်၏ လက်ချောင်းထိပ်များ ထပ်မံ ဖြတ်တောက်ခံလိုက်ရပြန်လေပြီ။
ရန်ကိုင်သည် ဘာမှဆက်မပြောတော့ဘဲ ရွှေရောင်သွေးမျှင်ကို ထိန်းချုပ်၍သာ ကျန်းဖု၏ လက်ချောင်းများမှ အသားကို တစ်လွှာချင်း ဖြတ်တောက်ပစ်နေခဲ့လေသည်။
အဆက်မပြတ် ဖြတ်တောက်ခံနေရလေရာ မကြာမီတွင် ကျန်းဖု၏ ဘယ်ဘက်လက်ဝါးတစ်ခုလုံး ကုန်သွားပြီး လက်ဖဝါး မရှိတော့သော လက်မောင်းရင်းကြီး တစ်ခုသာ ကျန်ရစ်တော့၏။ ရန်ကိုင်ကမူ ရပ်တန့်မည့် အရိပ်အယောင် မပြသေးဘဲ ကျန်းဖု၏ အသားတစ်လွှာချင်းစီကို ဆက်၍ ဖြတ်တောက်နေခဲ့သည်။
ကျန်းဖုအား ပို၍ ကြောက်လန့်သွားစေသည်မှာ သူ့အား နှိပ်စက်ရင်း ရန်ကိုင် ပြောနေသော စကားများပင်။ ရန်ကိုင်သည် ကျန်းဖု၏ အသားများကို ဖြတ်တောက်နေရင်း “မင်းဘယ်လက် ပြီးရင် ညာလက်ကို ဖြတ်မယ်၊ ပြီးရင် ဘယ်ခြေထောက်၊ ညာခြေထောက်တွေကို ဆက်ဖြတ်မယ်။ စိတ်မပူနဲ့… ဒီကျင့်ကြံခြင်း အဆင့်နဲ့ မင်းမှာ ခြေလက်တွေ မရှိတော့ရင်တောင် မသေနိုင်သေးဘူး။ ပြီးတော့ ငါကလည်း မင်းကို လွယ်လွယ်ပေးသေမှာ မဟုတ်ဘူး။ မင်းနှလုံး တတိတိနဲ့ ဖြတ်တောက်ခံရပြီး သေသွားခဲ့ရသည့် ခံစားချက်ကို ငါမင်းကို ပေးခံစားမှာ”
အဆုံးတွင် ကျန်းဖုလည်း ဆက်၍ နှုတ်ပိတ်မိနေနိုင်တော့ဘဲ ချက်ချင်း အော်ပြောလိုက်လေသည် “ငါပြောမယ်၊ ငါပြောမယ်၊ မင်းဘာသိချင်တာလဲပြော”
တဖြည်းဖြည်း နှိပ်စက်ခံရပြီးမှ နာကျင်မှုကို တစိမ့်စိမ့် ခံစားရင်း သေသွားရခြင်းနှင့် နာကျင်မှုမရှိဘဲ သေသွားရခြင်းသည် လုံးဝ မတူညီသော အရာနှစ်ခုဖြစ်သည်။ သူ့တစ်ကိုယ်လုံး တစ်စစီ ဖြတ်တောက်ခံနေရသည်ကို အသက်ရှင်လျက် ထိုင်ကြည့်နေရသည့် ခံစားချက်ကို ကျန်းဖု ဆက်၍ မခံစားနိုင်တော့ချေ။ ထိုအကြောင်းကို တွေးကြည့်လိုက်ရုံဖြင့် သူ့တစ်ကိုယ်လုံး တဆတ်ဆတ် တုန်ရီလာခဲ့သည်။
ရန်ကိုင်သည် လုပ်လက်စအလုပ်ကို ရပ်လိုက်ပြီး ကျန်ဖုအား ကြည့်၍ ရယ်သွမ်းသွေးကာ “အစကတည်းက ငါမေးတာကို ပြောလိုက်ရင် မင်းအခုလိုတောင် ခံစားနေစရာမလိုဘူး။ အခုတော့ ကြည့်ပါဦး”
ကျန်းဖုက အံကြိတ်၍ ပြန်ပြောလေ၏ “နိုင်တဲ့သူကဘုရင် ရှုံးတဲ့လူက လူဆိုးပဲ။ ပြော၊ မင်းဘာသိချင်တာလဲ”
“ဒီလိုမှပေါ့။ မင်းဘယ်သူလဲ” ရန်ကိုင်သည် လိုရင်းကို တန်းမေးလိုက်လေသည်။
“ငါက ဓါးအဖွဲ့အစည်းက”
“ဓါးအဖွဲ့အစည်း” ရန်ကိုင် မျက်ခုံးပင့်သွားခဲ့သည်။
ဓါးအဖွဲ့အစည်းသည် ကျင့်ကြံရေးကြယ်ပေါင်းများစွာကို ထိန်းချုပ်ထားသော ကြယ်စီရင်စုကြီး၏ ထိပ်တန်းအဆင့် အင်အားစုတစ်ခု ဖြစ်သည်။ ဟုန်းလော့ကုန်သွယ်ရေး အဖွဲ့အစည်းလောက် မကြီးမားသော်ငြား အထင်သေးသင့်သည့် အင်အားစုတစ်ခုတော့ မဟုတ်ချေ။
ယခင်ကလည်း ဓါးအဖွဲ့အစည်းမှ ကျင့်ကြံသူများကို ရန်ကိုင် တွေ့ခဲ့ဖူးပေသည်။ သို့သော် ထိုအဖြစ်အပျက်မှာ လွန်ခဲ့သော နှစ်ပေါင်းများစွာခန့်က ဖြစ်သည်။ သူသိသလောက် ကြယ်စီရင်စုထဲ ဟုန်းလော့ကုန်သွယ်ရေး အဖွဲ့အစည်းနှင့် ဓါးအဖွဲ့အစည်းအပြင် ခရမ်းကြယ်ဟုခေါ်သော မဟာအင်အားစုတစ်ခုလည်း ထပ်ရှိသေး၏။ စွန့်ပစ်တွင်းမြေနှင့် ကြယ်တာရာစီးကြောင်းဟု ခေါ်သော အင်အားစုတို့လည်း အပါအဝင် ဖြစ်ကြသည်။
“မင်းတို့ ဒီမှာပုန်းပြီး ဘယ်သူ့ကို ချောင်းတိုက်ခိုက်ဖို့ လုပ်နေကြတာလဲ” ရန်ကိုင်က ထပ်မေးလိုက်သည်။
ကျန်းဖုသည် ခဏတာ တုန့်ဆိုင်းနေပြီးနောက် အံကြိတ်၍ “ဓါးအဖွဲ့အစည်းကလူကိုပဲ”
ရန်ကိုင်၏ အမူအရာ ထူးဆန်းသွားခဲ့သည်။
ကျန်းဖုက အလျင်အမြန် ရှင်းပြလိုက်လေသည် “ငါလိမ်နေတာ မဟုတ်ဘူး။ ငါတို့ တိုက်ခိုက်ဖို့လုပ်နေတာ ငါတို့ ရန်သူပဲ။ ဓါးအဖွဲ့အစည်းကပဲ ဆိုပေမယ့် ဓါးအဖွဲ့အစည်းထဲမှာပဲ အဖွဲ့တွေအများကြီး ရှိတယ်”
ရန်ကိုင် ခေါင်းညိတ်လိုက်သည်။ ကျန်းဖု၏ မျက်လုံးအရ သူလိမ်နေခြင်း မဟုတ်မှန်း ရန်ကိုင် ပြောနိုင်ပေသည်။
ဓါးအဖွဲ့အစည်းကဲ့သို့ အင်အားစုကြီးတွင် အတွင်းရေး ပဋိပက္ခများ ရှိသည်မှာ သဘာဝသာ ဖြစ်သည်။ သို့သော်လည်း ဤကဲ့သို့ ချောင်းမြောင်တိုက်ခိုက်ရန် ကြိုးစားသည်မှာတော့ အနည်းငယ် လွန်ပေသည်။
“အသေးစိတ်ပြော” ရန်ကိုင်က ဆက်၍ မေးလိုက်လေသည်။
ပြောပြပြီးသွားပြီ ဖြစ်သဖြင့် ကျန်းဖုလည်း သူသိသလောက် အကုန် ပြောပြလိုက်လေသည်။
ဓါးအဖွဲ့အစည်းတွင် အဖွဲ့ပေါင်းများစွာရှိသည့်အနက် အဖွဲ့ နှစ်ဖွဲ့သည် အင်အားအကောင်းဆုံး ဖြစ်သည်။ တစ်ဖွဲ့ကို လက်ရှိ အဖွဲ့အစည်းခေါင်းဆောင်မှ ဦးဆောင်ပြီး ကျန်အဖွဲ့ကို ဒုခေါင်းဆောင်မှ ဦးဆောင်သည်။ ထိုအဖွဲ့နှစ်ဖွဲ့သည် နှစ်ပေါင်းများစွာ ကြာသည်အထိ တစ်ဖွဲ့နှင့်တစ်ဖွဲ့ အပြန်အလှန် တိုက်ခိုက်လာခဲ့ခြင်း ဖြစ်သည်။
ကျန်းဖု ပြောခဲ့သော စီနီယာလီ၏ တကယ့်နာမည်မှာ လီမင်ဟိုင်ဖြစ်ပြီး ဒုခေါင်းဆောင်အဖွဲ့မှ ဖြစ်ပေသည်။
သူတို့ ချောင်းမြောင်းတိုက်ခိုက်မည့်လူမှာ အဖွဲ့အစည်း ခေါင်းဆောင်အဖွဲ့၏ တက်သစ်စကြယ်ပွင့်ဖြစ်သော အဖွဲ့အစည်းခေါင်းဆောင် ကုချန်းယွင်၏ တိုက်ရိုက် မျိုးဆက်လည်း ဖြစ်သည့် ကုကျန်းရှင်ပင် ဖြစ်သည်။
“တက်သစ်စကြယ်ပွင့်၊ တိုက်ရိုက်မျိုးဆက် ဆိုရင်တောင် တန်ခိုးရှင်ဘုရင်အဆင့်ကို လွှတ်ပြီး တိုက်ခိုက်ရလောက်တဲ့အထိ မလိုဘူးလားလို့” ရန်ကိုင်သည် ကျန်းဖုအား အံ့အားသင့်တကြီး ကြည့်လျက် ပြန်မေးလိုက်လေသည် “အဲ့ကောင် ဘာတွေ ထူးခြားနေလို့ မင်းတို့သူ့ကို ဒီလောက် ကြောက်နေရတာလဲ”
ကျန်းဖုက ခါးသက်စွာပြုံးလျက် “သာမန် တန်ခိုးရှင်အဆင့် ဆိုရင်တော့ ဂရုစိုက်မနေပါဘူး။ ဒါပေမယ် သခင်လေးက မဟာဓါးခန္ဓာကိုယ်ကို ပိုင်ဆိုင်ထားတဲ့လူပဲ။ သူအခု တန်ခိုးရှင် တတိယအဆင့်ကို ရောက်နေပြီ။ သူသာ တန်ခိုးရှင်ဘုရင်အဆင့်ကို ချိုးဖျက်သွားရင် ဒုခေါင်းဆောင်အဖွဲ့အတွက် မျှော်လင့်ချက် မရှိတော့ဘူး။ ဒါကြောင့် သူအားကောင်းမလာခင် သူ့ကို ရှင်းပစ်ဖို့ လုပ်တာ”
“မဟာဓါးခန္ဓာကိုယ်” ရန်ကိုင်က မေးစေ့ကိုပွတ်လျက် “အထူးခန္ဓာကိုယ် တည်ဆောက်ပုံတစ်မျိုးပေါ့။ အဲ့ခန္ဓာကိုယ်ကို ဘာတွေ ဒီလောက် ကြောက်ဖို့ကောင်းလို့လဲ”
“သခင်လေးက အခုမှ အသက်ခြောက်ဆယ်ပဲ ရှိသေးတယ်။ ဒါတောင် တန်ခိုးရှင်တတိယအဆင့်ကို ရောက်နေပြီ။ အဲ့ဒါ ကြောက်ဖို့ကောင်းတာ မဟုတ်ရင် ဘာလဲ” ကျန်းဖုက အလေးအနက် အမူအရာဖြင့် “မင်းအသက်ကလည်း အဲ့လောက် မကြီးလောက်ဘူး၊ ဟုတ်တယ်မလား။ ဒါပေမယ့် မင်းတောင် သခင်လေးနဲ့တွေ့ရင် လွယ်မှာ မဟုတ်ဘူး”
“တကယ်လား” ရန်ကိုင် ရယ်သွမ်းသွေးလိုက်သည်။
တန်ခိုးရှင်တတိယအဆင့်ကို အသက်ခြောက်ဆယ်ဖြင့် ရောက်နိုင်သည်မှာ တကယ်ကို ချီးကျူးစရာ ကောင်းပေသည်။ သို့သော် ရန်ကိုင်သည် ယခုမှ အသက်ငါးဆယ်သာ ရှိသေး၏။ ကုကျန်းရှင်ထက် ဆယ်နှစ်ပင် ပိုငယ်သေးသည်။
ကျင့်ကြံသူများ ကျင့်ကြံကြသည့်အခါ အချိန်ကုန်လို့ ကုန်သွားမှန်းကို သတိမပြုမိကြသဖြင့် သူတို့ အသက်ကိုလည်း အဲ့လောက် အရမ်းကြီး ဂရုမစိုက်ကြချေ။
“မင်းပြောတာသာ အမှန်ဆိုရင် အဲ့သခင်လေးဆိုတဲ့လူကို ငါတော်တော်လေး စိတ်ဝင်စားသွားပြီ” ရန်ကိုင်က ရယ်ပြုံးပြုံးလျက် ပြောလိုက်သည်။
ကျန်းဖုသည် ရန်ကိုင်အား ဝေ့ကြည့်လိုက်ပြီး ခေါင်းညိတ်၍ “မင်းတို့လိုလူတွေ တစ်နေ့မဟုတ် တစ်နေ့တော့ တွေ့ကြမှာပဲ… ဒါပေမယ့် အဲ့လို တွေ့နိုင်ဖို့ကလည်း သခင်လေး ဒီတစ်ကြိမ် အလစ်ချောင်း တိုက်ခိုက်ခံရတာကနေ အသက်ရှင်လျက် လွတ်မလွတ်အပေါ် မူတည်သေးတယ်။ ငါသိတာအကုန်လုံး မင်းကို ပြောပြီးသွားပြီ”
“အင်း” ရန်ကိုင်က ခေါင်းညိတ်လိုက်ပြီး ကျန်းဖုအား ကြည့်လိုက်သည်။
“လုပ်ပေတော့” ကျန်းဖုက စိတ်မရှည်ဟန်ဖြင့် ပြောလိုက်သည်။ သို့သော် ရန်ကိုင်ကမူ နည်းနည်းလေးမှ မလှုပ်ရှားခဲ့။ ထို့အစား ကျန်းဖုသည် သူ့အသိစိတ်တစ်ခုလုံး ဝေဝါးလာသလိုသာ ခံစားလိုက်ရလေသည်။
ဘာတွေဖြစ်လို့ ဖြစ်သွားမှန်းပင် သူမသိလိုက်ပါချေ။
ရန်ကိုင်သည် ကျန်းဖုနှင့် လျိုတုန်းတို့၏ သိုလှောင်လက်စွပ်ကို ယူပြီး ထိုနှစ်ယောက်၏ ခန္ဓာကိုယ်ကို နတ်ဆိုးမီးတောက်ဖြင့် မီးရှို့ပြာချပစ်လိုက်သည်။ ခဏမျှ စဉ်းစားနေပြီးနောက် ကြယ်လွန်းပျံကိုထုတ်၍ လာရာ လမ်းကြောင်းအတိုင်း ပြန်လှည့်လာခဲ့လေသည်။
ပြဿနာ ရှာရသည်ကို မကြိုက်သော်ငြား ထိုလီမင်ဟိုင် ဆိုသည့်လူသည် စကားတစ်ခွန်းပင် မပြောဘဲ အနားမှ ဖြတ်သွားသည် ဟူသော အကြောင်းပြချက်ဖြင့် သူ့အား သတ်ရန် ကြိုးစားခဲ့သည်။ အလကားသက်သက် အတိုက်ခံရသည်ကို ရန်ကိုင်လည်း ငြိမ်ခံမနေနိုင်ပါချေ။
သူလည်း နည်းနည်းပါးပါးတော့ ဝင်ပျော်ပေးရပေမည်။ လီမင်းဟိုင်အား သတ်နိုင်သည့် အခွင့်အရေး ရလျှင်တော့ ပို၍ပင် ကောင်းသည်ဟု ပြောရမည်။
ဂြိုလ်သိမ်ဂြိုလ်မွှား ပင်လယ်ထဲတွင် လီမင်ဟိုင် ဦးဆောင်သည့် ကျင့်ကြံသူအုပ်သည် အချိန်မရွေး ခုန်အုပ်မည့် သားရဲများနှင့် စိတ်ရှည်ရှည်ဖြင့် စောင့်ဆိုင်းနေကြသည်။
အချိန်အတော်ကြာသွားသည့်နောက် တစ်ယောက်ယောက်က မျက်မှောင်ကြုတ်၍ မေးလိုက်လေသည် “ကျန်းဖုနဲ့ လျိုတုန်းတို့ ဘာလို့ ပြန်မလာသေးတာလဲ၊ ဒီကောင်တွေ ဟိုကောင့်ကို မသတ်နိုင်တာတော့ မဟုတ်ပါဘူးနော်”
“အန္တရာယ်တစ်ခုခုနဲ့ ကြုံနေရတာများလား”
“ဒီနားမှာ ဘာအန္တရာယ်ရှိမှာမို့လို့လဲ။ သူတို့ နှစ်ယောက်ကို ဟိုကောင် ပြန်သတ်လိုက်တာလို့ မင်းပြောချင်နေတာမလား”
“ဘယ်လိုလုပ်ပြီး အဲ့လို ဖြစ်နိုင်မှာ။ စီနီယာလီ လက်ကတောင် အဲ့ကောင် ကံကောင်းလို့ လွတ်သွားတာ။ ဒီလောက် ဒဏ်ရာကြီးနဲ့ ကျန်းဖုနဲ့ လျိုတုန်းကို သူဘယ်လိုလုပ်ပြီး ပြန်တိုက်ခိုက်နိုင်မှာလဲ။ ဒါပေမယ့် ဒီကောင်တွေသွားတာ တော်တော် ကြာပြီ။ စီနီယာလီ၊ ကျုပ်တို့ လိုက်သွားရမလား” လူတစ်ယောက်က လီမင်ဟိုင်ကို မေးလိုက်သည်။
“မလိုဘူး။ ဒီလောက်လေးတောင် မလုပ်နိုင်ရင် အဲ့ကောင်တွေ အသက်ရှင်နေလို့ ဘာထူးဦးမှာလဲ။ မဆင်မခြင် မလုပ်နဲ့။ တစ်ရက်၊ နှစ်ရက်လောက်ဆို သခင်လေးရဲ့ ကြယ်သင်္ဘော ဒီနားက ဖြတ်သွားတော့မှာ”
“ဟုတ်ကဲ့”
နည်းနည်းပါးပါး ပြောဆိုဆွေးနွေးပြီးနောက် လီမင်ဟိုင်တို့ အဖွဲ့ ပြန်တိတ်သွားခဲ့လေသည်။
ဂြိုလ်သိမ်ဂြိုလ်မွှား ပင်လယ်သည် အတော်လေး ကြီးသည့်အတွက် ပုန်းရကွယ်ရ အဆင်ပြေပေသည်။ ထို့ကြောင့် ကုကျန်းရှင်အား ချောင်းမြောင်းတိုက်ခိုက်ရန်အတွက် ဤနေရာကို လီမင်ဟိုင်တို့ ရွေးချယ်ခဲ့ခြင်း ဖြစ်သည်။
ထို့ကြောင့်ပင် ရန်ကိုင် ခိုးကြောင်ခိုးဝှက်နှင့် ရောက်လာသည်ကိုလည်း မည်သူမှ သတိမထားမိခြင်း ဖြစ်သည်။ လက်ရှိတွင် ရန်ကိုင်သည် လီမင်ဟိုင်တို့အဖွဲ့နှင် မိုင်တစ်ရာ အကွာခန့်တွင် ရှိနေခဲ့သည်။ ရန်ကိုင်သည် ဂြိုလ်သိမ်ကြီး တစ်လုံး၏ နောက်တွင် ပုန်းလျက် လီမင်ဟိုင် ရှိနေသည့် အရပ်ဆီသို့ အေးစက်စက် အမူအရာဖြင့် စိုက်ကြည့်လိုက်သည်။
သူ့လက်ရှိ ခွန်အားအရ လီမင်ဟိုင်တို့အား ပြေးဝင် တိုက်ခိုက်နိုင်ပေသည်။ လီမင်ဟိုင်ကို မသတ်နိုင်လျှင်ပင် သူ့လက်အောက်ငယ်သားအချို့ကို သတ်ပြီး အေးအေးဆေးဆေး ပြန်ဆုတ်လာဖို့ရာ ပြဿနာ မရှိပါချေ။
သို့သော်လည်း ထိုသို့မလုပ်ရခြင်းမှာ သူ့အား ဒဏ်ရာရအောင် တိုက်ခိုက်ခဲ့သူမှာ လီမင်ဟိုင် ဖြစ်သည့်အတွက် လီမင်ဟိုင်နှင့်သာ စာရင်းရှင်းလိုသည့် အတွက်ကြောင့် ဖြစ်ပေသည်။
လီမင်ဟိုင်တို့ စောင့်နေသလို ရန်ကိုင်သည်လည်း စောင့်နေခဲ့၏။ လီမင်ဟိုင်တို့သည် သူတို့၏ သခင်လေးအား အလစ်ချောင်းတိုက်ရန် ကြံစည်နေသလို ရန်ကိုင်သည်လည်း လီမင်ဟိုင်အား ချောင်းမြောင်းသတ်ဖြတ်နိုင်ရန် ကြံနေလေသည်။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၃၅)
ရန်ကိုင်သည် ဂြိုလ်သိမ်ဂြိုလ်မွှား ပင်လယ်ကြီးထဲရှိ တစ်နေရာ၌ သူ့အရှိန်အဝါကို ကောင်းစွာဖုံးကွယ်၍ ပုန်းအောင်းနေ၏။ တစ်ဖက်လူသည် တန်ခိုးရှင်ဘုရင်အဆင့် ဖြစ်နေလျှင်ပင် သူ့အား အာရုံခံနိုင်လိမ့်မည် မဟုတ်ဟု ရန်ကိုင် ယုံကြည်နေသည်။
လက်ရှိ အချိန်ကို အခွင့်ကောင်းယူ၍ ရန်ကိုင်သည် ရှောင်ရှောင်၏ အခြေအနေကို စစ်ဆေးကြည့်လိုက်လေသည်။
ရှောင်ရှောင်ကို အခြေအနေကို စစ်ဆေးရန်အတွက် ဂြိုလ်သိမ်ဂြိုလ်မွှားပင်လယ်ထဲသို့ ခေတ္တနေစရာရှာရန် ရောက်လာခဲ့သော်ငြား လီမင်ဟိုင်၏ ချောင်းမြောင်း တိုက်ခိုက်မှုကြောင့် ပြန်၍ ထွက်ပြေးခဲ့ရသည်။ ယခုမှပဲ ရှောင်ရှောင်အား သေချာ စစ်ဆေးနိုင်တော့သည်။
စစ်ဆေးကြည့်ပြီးနောက် ရန်ကိုင် ပျော်သွားခဲ့လေသည်။
ရှောင်ရှောင်အား လွှမ်းခြုံထားသော ကျောက်ခွံပေါ်တွင် အက်ရာများ ထွက်ပေါ်နေခဲ့လေပြီ။ ထိုအရာမှာ မကြာခင် ရှောင်ရှောင် အပြင်သို့ ထွက်လာတော့မည်ဟု ပြောနေသည့် အရိပ်အယောင်များ ဖြစ်ကြသည်။
သို့သော်ငြား ကျောက်တုံးရုပ်သေးရုပ်၏ ဆင့်ကဲ ပြောင်းလဲမှုသည် သိသာထင်ရှားသော အဖြစ်အပျက်များကို ဖြစ်လာစေနိုင်သည်။ သူသာ ဤနေရာတွင် ဆက်နေလျှင် လီမင်ဟိုင် သူကို သတိပြုမိသွားနိုင်ပေသည်။
ထို့ကြောင့် ရန်ကိုင်လည်း ရှောင်ရှောင်နှင့်အတူ ကမ္ဘာငယ်လေးထဲသို့သာ ဝင်လာရတော့လေသည်။
ရန်ကိုင်သည် သူ့ရှေ့ရှိ ကျောက်တုံးကြီးကို ကြည့်ရင်း ငြိမ်သက်စွာ စောင့်ဆိုင်းနေခဲ့သည်။
မကြာမီ ကျောက်တုံးမျက်နှာပြင်တစ်ခုလုံး အက်ရာများဖြင့် ပြည့်နှက်သွားပြီး ရှောင်ရှောင်အထဲမှ ခုန်ထွက်လာခဲ့လေသည်။
ရှောင်ရှောင်၏ ခန္ဓာကိုယ်သည် ရန်ကိုင်ရှေ့သို့ ပြုတ်ကျလာခဲ့၏။ ရှောင်ရှောင်၏ ယခင်က မှိုင်းတိုင်းတိုင်း ဖြစ်နေသော မျက်လုံးများသည် ယခုအခါ အသိဥာဏ်ရှိသည့် လူတစ်ဦး၏ မျက်လုံးများနှယ် တောက်ပနေခဲ့သည်။
ရန်ကိုင် သူ့အား ကြည့်နေသည်ကိုမြင်သော် ရှောင်ရှောင် ပြန်ပြုံးပြလိုက်သည်။
ရန်ကိုင်သည် မေးစေ့ကိုပွတ်ရာင်း ကောင်းကင်စိတ်အာရုံဖြင့် ရှောင်ရှောင်ကို စစ်ဆေးကြည့်လိုက်၏။
“ဘာမှမပြောင်းသွားဘူး” အချိန်အတော်ကြာအောင် တိတ်ဆိတ်နေပြီးနောက်တွင် ရန်ကိုင်သည် သင်္ကာမကင်း လေသံဖြင့် ရေရွတ်လိုက်လေသည်။
ကျောက်ခွံထဲမှ ပြန်ထွက်လာပြီးနောက်တွင် ရှောင်ရှောင် တစ်ခုခု ပြောင်းလဲသွားလိမ့်မည်ဟု ရန်ကိုင် ထင်ထားခဲ့ခြင်း ဖြစ်သည်။ သို့သော် သူ့အရမ်း မျှော်လင့်ထားလိုက်သည့်ပုံပင်။ ကြယ်သေပေါ်ရှိ သတ္တုများကို ဝါးမြိုပြီးနောက်တွင် ရှောင်ရှောင် အနည်းငယ် ပြောင်းလဲသွားခဲ့သည်။ သတ္တုများ၏ အဆီအနှစ်ကို စုပ်ယူပြီးနောက် ရှောင်ရှောင် သိသိသာသာ ပို၍ အားကောင်းလာ၏။
ဤသည်မှာ ကျင့်ကြံသူတစ်ဦးမှ ကျင့်ကြံရန်အတွက် ဆေးလုံးများကို သောက်သုံး၍ သူတို့၏ ခွန်အားကို မြှင့်တင်သည်နှင့် တူပေသည်။ ထိုတစ်ခုမှလွဲ၍ အခြား ဘာပြောင်းလဲမှု ကြီးကြီးမားမားမှ မရှိခဲ့ပေ။
ရှိလျှင်ပင် ရှိသည့်အရာမှာ ပို၍ တောက်ပလာသော ရှောင်ရှောင်၏ မျက်လုံးများသာ ဖြစ်လေသည်။ ဆိုလိုသည်ကား ရှောင်ရှောင်၏ ဥာဏ်ရည်သည် ပို၍ မြင့်မားလာခဲ့လေပြီ။ သို့သော် လူသား တစ်ဦး၏ အသိဥာဏ်အဆင့်ထိတော့ မရောက်သေးပေ။
“အကောင်းကြီးပြကြည့်စမ်း” ရန်ကိုင်က ပြောလိုက်၏။
ရှောင်ရှောင်သည် ရန်ကိုင်၏ အမိန့်အတိုင်း ချက်ချင်းပဲ ကျောက်ဘီလူးကြီးအဖြစ်သို့ အသွင်ပြောင်းလိုက်လေသည်။
“မင်းရဲ့ ချောရည်အကာအကွယ်ကော” ရန်ကိုင် ထပ်မေးလိုက်သည်။
ရှောင်ရှောင်၏ ခန္ဓာကိုယ်ထက် ချစ်ချစ်တောက် ပူလောင်သော ချော်ရည် အကာအကွယ်တစ်ခု ဖြစ်ပေါ်လာခဲ့သည်။
“ဒါလည်း ဘာမှသိပ်မပြောင်းဘူး” ရန်ကိုင် မျက်မှောင်ကြုတ်သွားသည်။ သူ့စိတ်ထဲသိပ်၍ နားမလည်နိုင် ဖြစ်နေခဲ့သည်။ တကယ်တော့ ကြယ်အမြူတေ တစ်စိတ်တစ်ပိုင်းကို စုပ်ယူပြီးလျှင် ရှောင်ရှောင် အနေဖြင့် အရမ်းကြီး မပြောင်းလဲသွားလျှင်ပင် အနည်းငယ်တော့ ပြောင်းလဲသွားသင့်သည် မဟုတ်လော။
ကြယ်အမြူတေကို ဝါးမြိုထားသည့် ရှောင်ရှောင်၏ ပုံစံမှာလည်း ပုံမှန်ထက်ကို သိသားလွန်းနေသည်။ ကြယ်အမြူတေကို စုပ်ယူပြီးနောက် ပုံမှန် နေနေသကဲ့သို့ပင် မနေနိုင်တော့ဘဲ ကြယ်အမြူတေကို စုပ်ယူပြီးပြီးချင်း စွမ်းအင်များကို ချေဖျက်ပစ်ရန်အတွက် ချက်ချင်း အသွင်ပြောင်းလဲခြင်း ဖြစ်စဉ်ကို စတင် ပစ်လိုက်ရသည်။
သို့ရာတွင် နောက်ဆုံးရလဒ်သည် သူမျှော်လင့်ထားသည်နှင့် အနည်းငယ် ကွဲပြားနေခဲ့သည်။
မစဉ်းစားတတ်တော့သည့်အဆုံး ရန်ကိုင်လည်း ဆက်ပြီး စဉ်းစားမနေတော့ချေ။ နောက်မှ ပြန်ဆန်းစစ်ကြည့်လျှင်လည်း နောက်မကျသေးသည့်အတွက် ရှောင်ရှောင်အား ပုံမှန်အတိုင်း ပြန်နေရင် အမိန့်ပေးလိုက်ပြီးနောက် ကမ္ဘာငယ်လေးထဲမှ ထွက်လာခဲ့လိုက်သည်။
အပြင်သို့ ပြန်ရောက်သည်နှင့် တစ်ခုခု ပြောင်းလဲနေမှန်း ရန်ကိုင် သတိပြုမိလိုက်၏။
မိုင်တစ်ရာခန့်အကွာတွင် ရှိနေသော လီမင်ဟိုင်တို့ အဖွဲ့သည် ယခင်ကထက်ပင် ပို၍ ပုန်းလျှိုးကွယ်လျှိုး လုပ်နေသည်။ မည်သို့သော ပညာရပ်ကို ထပ်သုံးထားလဲမသိ၊ ရန်ကိုင်ပင်လျှင် သူတို့အား အတော်လေး ထောက်လှမ်းရ ခက်သွား၏။
ထို့အပြင် ခပ်ဝေးဝေး တစ်နေရာဆီမှ ကြယ်သင်္ဘောတစ်စင်း ဖြည်းဖြည်းချင်း ချဉ်းကပ်လာနေသည်ကိုလည်း တွေ့လိုက်ရသည်။
ထိုကြယ်သင်္ဘောသည် ဓါးအဖွဲ့အစည်း သခင်လေး၏ ကြယ်သင်္ဘော ဖြစ်ပေသည်။
သခင်လေးဆိုသည့်လူ ရောက်လာသည်မှာ တကယ် မြန်ပေသည်။ လီမင်ဟိုင်ဆိုသည့်လူ သူ့အား တုန့်ဆိုင်းခြင်းမရှိ တိုက်ခိုက်ခဲ့သည်မှာ အထူးအဆန်းမဟုတ်တော့။ သူတို့၏ အစီအစဉ် စတင်မည့် အချိန်သည် အလွန်ကိုမှ စောလွန်းသဖြင့် မစတင်ခင် မည်သည့် အတိမ်းအစောင်းမှ မဖြစ်စေလိုသည့် အတွက်ကြောင့် ဖြစ်ပေသည်။
အဆုံးတွင်မူကား လီမင်ဟိုင်သည် ရန်ကိုင်အား မသတ်နိုင်ခဲ့သည့်အပြင် အန္တရာယ်တစ်ခုကိုပါ လက်ယပ် ဖိတ်ခေါ်မိလိုက်လေသည်။ လီမင်ဟိုင်သာ ထိုအကြောင်းကို သိခဲ့လျှင် မည်ကဲ့သို့ ဖြစ်သွားမလဲ ဆိုသည်ကို ရန်ကိုင် သိချင်မိသည်။
ကြယ်သင်္ဘော သူတို့ ပုန်းနေသည့် နေရာသို့ ရောက်လာရန် အများဆုံး တစ်နာရီလောက်သာ ကြာပေတော့မည်။ ရန်ကိုင်သည် အသက်ပြင်းပြင်းတစ်ချက် ရှုသွင်းလျက် နောက်ဘာဆက်ဖြစ်မလဲ ဆိုသည်ကို မျှော်လင့်တကြီး စောင့်မျှော်နေလိုက်သည်။
အချိန်ကြာလာသည်နှင့်အမျှ ဂြိုလ်သိမ်ဂြိုလ်မွှား ပင်လယ်ထဲ၌ ပုန်းအောင်းနေသူများ ပို၍ ငြိမ်သက်တိတ်ဆိတ်လာကြသည်။
မကြာမီတွင် ဓါးအဖွဲ့အစည်း သခင်လေး၏ ကြယ်သင်္ဘောသည် အခြား ကြယ်သင်္ဘောများနှင့်အတူ လာနေကြောင်း တွေ့ရှိလိုက်ရသည်။ ဓါးအဖွဲ့အစည်း သခင်လေး စီးလာသည့် ကြယ်သင်္ဘောသည် အလယ်တွင် ရှိနေပြီး အခြားသော ကြယ်သင်္ဘောများထက် အနည်းငယ် ပိုကြီးကာ အရှည် မီတာသုံးရာခန့် ရှိပေသည်။ ဘယ်နှင့် ညာဘက်တွင်မူ နှစ်ရာမီတာခန့် အရှည်ရှိသော ကြယ်သင်္ဘောတစ်စင်းစီ ရှိနေသည်။
အကွာအဝေးမှာ တော်တော်လေး လှမ်းနေသဖြင့် ကြယ်သင်္ဘောများ၏ အဆင့်ကို ရန်ကိုင် မပြောနိုင်သော်ငြား တန်ခိုးရှင်အဆင့်ထက် နိမ့်မည် မဟုတ်မှာတော့ သေချာသည်။
ဓါးအဖွဲ့အစည်းသည် တကယ်ကို မဟာ အင်အားစုတစ်ခု ဖြစ်ပေသည်။ အရိပ်ကြယ်တွင် တန်ခိုးရှင်အဆင့် ကြယ်သင်္ဘောများမှာ အလွန်ကိုမှ အဖိုးတန်သော ယာဉ်များ ဖြစ်ကြသော်ငြား ဓါးအဖွဲ့အစည်းကမူ သူတို့၏ သခင်လေး စီးရန်အတွက်ပင် တစ်ခါတည်း သုံးစီး စေလွှတ်နိုင်သည်။
သို့ရာတွင် ထိုသုံးစီးမှာ ယန်ယန် ဆောက်လုပ်ထားသော ကြယ်သင်္ဘောနှင့် အတော်လေး ကွဲပြားပေသည်။ ရှင်းရှင်း ပြောရလျှင် ထိုကြယ်သင်္ဘောများသည် ပင်လယ်ကူးသင်္ဘောများနှင့် ပိုတူပေသည်… အထူးသဖြင့် အလယ်တွင် ရှိနေသော ကြယ်သင်္ဘောပင်။ သင်္ဘာဦးထိပ်မှာ အတော်လေး ချွန်ပြီး ကိုယ်ထည်မှာ ရှည်မျောမျောဖြစ်ကာ သင်္ဘောတစ်စင်းလုံးသည် ဓါးတစ်ချောင်းနှင့်ပင် တူနေသည်။
သင်္ဘောကုန်းပတ်ပေါ်တွင် ခေါက်တုန့်ခေါက်ပြန် သွားလာနေသော ကျင့်ကြံသူများ ရှိနေသည်။
ကြယ်သင်္ဘောသုံးစင်သည် ပုန်းကွယ်နေသော အန္တရာယ်ကို သတိမပြုမိဘဲ ဂြိုလ်သိမ်ဂြိုလ်မွှား ပင်လယ်ထဲသို့ ရွက်လွှင့်လာနေ၏။ မိုင်ငါးဆယ်လောက်သာ ဝေးတော့သည့် အချိန်တွင် လီမင်ဟိုင်တို့ စတင် လှုပ်ရှားလေတော့သည်။
မိုင်တစ်ရာအကွာတွင် ရှိနေသော ရန်ကိုင်ပင်လျှင် ဂြိုလ်သိမ်ဂြိုလ်မွှားပင်လယ်အတွင်းမှ အားကောင်းသော စွမ်းအင်လှိုင်းများ နေရာပေါင်းစုံမှ ပေါက်ကွဲထွက်လာသည်ကို သတိပြုမိပေသည်။
ချက်ချင်းဆိုသလို အဖြူရောင်အလင်းတန်းများစွာတို့သည် ဂြိုလ်သိမ်ဂြိုလ်မွှားပင်လယ် အတွင်းမှ ရုတ်တရက် ပေါ်လာပြီး လျှပ်စီးတန်းများနှယ် ကြယ်သင်္ဘောသုံးစင်းဆီသို့ တိုးဝင်သွာလေ၏။
ထိုအခါမှပဲ သူတို့ ချောင်းမြောင်းတိုက်ခိုက်ခံရပြီမှန်း ကြယ်သင်္ဘောသုံးစင်းပေါ်တွင် ရှိနေသူများ နားလည်လိုက်ကြ၏။ ချက်ချင်းပဲ သူတို့၏ အကာအကွယ်မှော်ရတနာ အသီးသီးကို ထုတ်၍ ကြယ်သင်္ဘောအား တတ်စွမ်းသလောက် ကာကွယ်ကြလေတော့သည်။
ကြယ်သင်္ဘောသုံးစင်း၏ တုန့်ပြန်မှုမှာ နှေးမနေခဲ့ချေ။
ချက်ချင်းပဲ စွမ်းအင်အကာအကွယ်တစ်ခု ထွက်ပေါ်လာပြီး ကြယ်သင်္ဘောသုံးစင်းကို လွှမ်းခြုံသွားခဲ့သည်။ တစ်ချိန်တည်းတွင် တိုးဝင်လာနေသော အလင်းတန်းများကို မထိရလေအောင် ချက်ချင်း လမ်းကြောင်းပြောင်းရန် ကြိုးစားလေသည်။
သို့သော်လည်း လီမင်ဟိုင်တို့အဖွဲ့သည် အစကတည်းက ယခု အခိုက်အတန့်အတွက် ပြင်ဆင်လာခဲ့ခြင်း ဖြစ်သည်။ သူတို့၏ တိုက်ခိုက်မှုမှာ ကြယ်သင်္ဘောသုံးစင်းလုံး မရှောင်နိုင်လောက်အောင် ချိန်သားကိုက် ဖြစ်နေခဲ့သည်။
ဧရာမဆူနာမီလှိုင်းလုံးကြီးမှ ပင်လယ်ကူးသင်္ဘောအား လာရောက်ရိုက်ခတ်သည့်နှယ် အဖြူရောင် အလင်းတန်းများသည် ကြယ်သင်္ဘောသုံးစင်းအား လာရောက် ထိမှန်လေသည်။
မျက်စိကျိန်းမတတ် အလင်းတန်းများ ထွက်ပေါ်လာပြီး ဘယ်ဘက်တွင် ရှိနေသော ကြယ်သင်္ဘော၏ အကာအရံ ချက်ချင်း ပျက်စီးသွားခဲ့သည်။ အလင်းတန်းများသည် ကြယ်သင်္ဘော၏ ကိုယ်ထည်အား ဆက်လက် ဖောက်ထွက်သွားခဲ့လေသည်။ ဘုန်း… ဆိုသော မြည်သံကြီးနှင့်အတူ ကြယ်သင်္ဘောတစ်စင်းလုံး ပေါက်ကွဲထွက်သွားခဲ့၏။
ကြယ်သင်္ဘောပေါ်တွင် ရှိနေသူအားလုံး မည်သူမှ အသက် မရှင်နိုင်ခဲ့ချေ။
ညာဘက်တွင် ရှိနေသော ကြယ်သင်္ဘောမှာတော့ ပိုကံကောင်းသည်ဟု ပြောရမည်။ အကာအကွယ်ဒိုင်းမှာ အလျင်အမြန် ပျက်စီးသွားခဲ့သော်ငြား ဘယ်ဘက်သင်္ဘောထက်တော့ အခြေအနေ ပိုကောင်းပေသည်။
ကြယ်သင်္ဘောမှာ အဖြူရောင်အလင်းတန်း နှစ်စင်း၏ ထိမှန်ခြင်း ခံလိုက်ရသော်ငြား ဘယ်ဘက်တွင် ရှိနေသော ကြယ်သင်္ဘောကဲ့သို့ ပေါက်ကွဲထွက်သွားခဲ့ခြင်း မရှိချေ။
သေဘေးမှ လွတ်မြောက်လာပြီးနောက် ကြယ်သင်္ဘောပေါ်၌ ရှိနေသူများသည် ချက်ချင်း ရန်သူများကို ရှာဖွေကြတော့သည်။ ဘယ်ဘက်တွင် ရှိနေသော ကြယ်သင်္ဘော၏ ဖြစ်အင်ကို မြင်ပြီးနောက် အကုန်လုံး၏ စိတ်ထဲ ကြောက်စိတ်နှင့် ဒေါသတို့ တစ်ပြိုင်တည်း ဖြစ်ပေါ်လာခဲ့လေသည်။
ကြယ်သင်္ဘောသုံးစင်းအနက်တွင် အလယ်၌ ရှိနေသော ကြယ်သင်္ဘောသည်သာ အတော်လေး အခြေအနေကောင်းသည်ဟု ပြော၍ရသည်။
အခြားကြယ်သင်္ဘောနှစ်စင်းထက် ပို၍ တိုက်ခိုက်ခဲ့ခဲ့ရသော်ငြား ကြယ်သင်္ဘော၏ အဆင့်မှာ ဘေးဘက်တွင် ရှိနေသော ကြယ်သင်္ဘောနှစ်စင်းထက် ပိုမြင့်သဖြင့် အကာအကွယ်မှာလည်း ပို၍ မာကျောကြံခိုင်သည်။ ထို့ကြောင့် အလင်းတန်းများ လာရောက်ထိမှန်သည့်အခါ အကာအကွယ်မှာ လုံးဝ ပျက်စီးသွားခြင်းမရှိဘဲ အရောင်သာ မှိန်ကျသွားခဲ့၏။
အသက်ရှင်ကျန်ရစ်သူများ အသိပြန်မဝင်နိုင်သေးခင်မှာပင် လီမင်ဟိုင်တို့အဖွဲ့ ပြေးဝင်လာကြလေသည်။
အလင်းတန်းများကို ပစ်လွှတ်ပြီးသည်နှင့် တစ်ပြိုင်နက် ချက်ချင်း လှုပ်ရှားလိုက်ကြခြင်း ဖြစ်သည်။ အသက်ရှင်သူများ ရှေ့သို့ရောက်သည်နှင့် လက်နက်အသီးသီးကိထုတ်၍ စတင် တိုက်ခိုက်ကြလေသည်။
မှိန်ကျနေသော အကာအကွယ်သည် တစ်မုဟုတ်ချည်း ပျက်စီးသွားခဲ့သည်။
“လီမင်ဟိုင်၊ ခင်ဗျားကိုး” အလယ်ရှိ ကြယ်သင်္ဘောဆီမှ လူငယ်လေးတစ်ဦး၏ ဒေါသတကြီးအော်ဟစ်သံတစ်သံ ထွက်ပေါ်လာခဲ့သည် “ဒီသခင်လေးကို တိုက်ခိုက်ရဲတဲ့ အကျိုးဆက်ကို ခင်ဗျား မသိတာလား”
“သခင်လေးကို တိုက်ခိုက်ရင် ကြုံရမယ့် အကျိုးဆက်ကို ဒီလူအိုကြီး ကောင်းကောင်း နားလည်တာပေါ့” လီမင်ဟိုင်က နည်းနည်းလေးမှ ကြောက်ရွံ့ဟန်မပြဘဲ ထူးမခြားနားဟန်ဖြင့် ပြန်၍ ပြောလိုက်သည် “ဒီလူအိုကြီး ကိုယ်တိုင်ကလည်း ဓါးအဖွဲ့အစည်းရဲ့ အကြီးအကဲတစ်ယောက်ပဲဟာကို၊ ဘာလို့ အဲ့အကြောင်း မသိရမှာလဲ။ ဒါပေမယ့် အဲ့ဘာမဟုတ်တဲ့ စည်းမျဉ်းတွေနဲ့ ဒီလူအိုကြီးကို ခြိမ်းခြောက်လို့ရမယ် ထင်နေရင်တော့ သခင်လေး မှားသွားပြီ”
“ကောင်းတယ်၊ ကောင်းတယ်၊ အဲ့လိုဆိုမှတော့ ဒီသခင်လေးရဲ့ ဒေါသကို ခံယူဖို့ ပြင်ထားပေတော့ပေါ့” ထိုအော်ပြောသံနှင့်အတူ ကုကျန်းရှင် သင်္ဘောကုန်းပတ်ပေါ်သို့ ထွက်လာခဲ့လေသည်။ လူငယ်လေးသည် ရဲရင့်ပြီး သူရဲကောင်းဆန်သည့် ရုပ်သွင်နှင့် ဓါးသွား တစ်ချောင်းနှယ် ထက်ရှသော အကြည့်ကို ပိုင်ဆိုင်ထား၏။
တန်ခိုးရှင်ဘုရင်အဆင့် ကျင့်ကြံသူကို ရင်ဆိုင်နေရသည့်တိုင် နည်းနည်းလေးမှ ကြောက်ရွံ့ဟန်မပြဘဲ ဓါးတစ်ချောင်းကဲ့သို့သော ဖြောင့်တန်းစွာ ရပ်နေခဲ့သည်။
ကုကျန်းရှင် ဘယ်နှင့်ညာဘက်တွင် အမျိုးသမီး တစ်ဦးစီ ရှိနေခဲ့သည်။ ဘယ်ဘက်ရှိ အမျိုးသမီးမှာ အရပ်ရှည်ကာ သရေယိုစရာ ကိုယ်လုံးကိုယ်ပေါက်နှင့် အရည်ရွှန်းလဲ့နေသော မျက်ဝန်းတစ်စုံကို ပိုင်ဆိုင်ထား၏။ ညာဘက်ရှိ အမျိုးသမီးမှာမူ သေးသေးသွယ်သွယ်၊ ချစ်စဖွယ် မျက်နှာထားနှင့် ခါးထိ ဖြာကျနေသော ပိတုန်းရောင် ဆံကေသာကို ပိုင်ဆိုင်ထားသည့် မိးန်မငယ်လေး တစ်ဦး ဖြစ်သည်။ အမျိုးသမီးနှစ်ဦးသည် လုံးဝကို ကွဲပြားသော ရုပ်သွင်နှင့် စိတ်နေစရိုက်ကို ပိုင်ဆိုင်ထားသည်။ သို့သော် နှစ်ဦးစလုံးသည်လည်း တန်ခိုးရှင်ဘုရင်အဆင့်ကို ရင်ဆိုင်နေရသည့်တိုင် နည်းနည်းလေးမှ ကြောက်ရွံ့မနေခဲ့ပေ။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၃၆)
လီမင်ဟိုင်နှင့် ကုကျန်းရှင်တို့ အကြည့်ချင်း ထိပ်တိုက် တွေ့ဆုံသွားခဲ့သည်။ မကြာခင် လီမင်ဟိုင် မျက်မှောင်အနည်းငယ် ကြုံ့သွားခဲ့သည်။
ကုကျန်းရှင်၏ အရှိန်အဝါသည် သူယခင်တစ်ခေါက် တွေ့ခဲ့စဉ်ကထက် ပိုသိပ်သည်းနေကြောင်း တွေ့ရှိလိုက်ရသည်။
သခင်လေး ကုကျန်းရှင်သည် နောက်သုံးနှစ်မှငါးနှစ်အတွင်း တန်ခိုးရှင်ဘုရင်အဆင့်သို့ ချိုးဖျက်ရန် ကြိုးစားလိမ့်မည်ဟူသော ကောလဟာလများသည် အခြေအမြစ်မရှိဘဲ ထွက်ပေါ်လာခြင်း မဟုတ်ချေ။
သူသာ တန်ခိုးရှင်ဘုရင်အဆင့်သို့ ချိုးဖျက်သွားသည်နှင့် သူပိုင်ဆိုင်ထားသော မဟာဓါးခန္ဓာကိုယ်နှင့်တကွ လက်ဝဲ၊ လက်ယာ ဓါးအစေခံတို့၏ အကူအညီနှင့်ဆိုပါက မည်သည့် တန်ခိုးရှင်ဘုရင် ပထမအဆင့်မှ သူ့ပြိုင်ဘက် ဖြစ်နိုင်တော့မည် မဟုတ်ချေ။ တန်ခိုးရှင်ဒုတိယအဆင့် အချို့ကိုပင် ယှဉ်ပြိုင် တိုက်ခိုက်နိုင်ပေလိမ့်မည်။
တကယ်ကို မွန်းစတား တစ်ကောင်ပင်… ဒုခေါင်းဆောင် ဝေချန်းဇုန် သူ့အား အလွန် သတ်ချင်နေသည်မှာလည်း အထူးအဆန်း မဟုတ်တော့။ ကုကျန်းရှင်၏ ပါရမီသည် အလွန်ကိုမှ ကြောက်မက်ဖွယ်ကောင်းနေသည်ကိုး။
ကံကောင်းစွာဖြင့် ရှားပါးသော အခွင့်အရေးတစ်ခု ယနေ့၌ ဆိုက်ဆိုက်မြိုက်မြိုက် သူ့ရှေ့သို့ ရောက်ရှိလာခဲ့သည်။ ကုကျန်းရှင်သာ သေသွားပြီဆိုလျှင် ဓါးအဖွဲ့အစည်း၏ အနာဂတ်သည် အနှေးနှင့်အမြန်ဆိုသလို ဒုခေါင်းဆောင်၏ လက်ထဲသို့ ရောက်ရှိလာပေလိမ့်မည်။ တကယ်တော့ ပါရမီရှင် တစ်ဦး မည်မျှပင် ထူးချွန်နေစေကာမူ သေသွားသည်နှင့် မည်သို့မှ အသုံးဝင်တော့လိမ့်မည် မဟုတ်ပေ။
“လီမင်ဟိုင်၊ ဒီသခင်လေး မေးချင်တာ တစ်ခုပဲရှိတယ်” ကုကျန်းရှင်သည် လက်နောက်ပစ်လျက် ရပ်နေရင်း “ဒီသခင်လေး ဒီနေရာကို ဖြတ်သွားလိမ့်မယ်လို့ မင်းဘယ်လို သိတာလဲ”
လီမင်ဟိုင်က မျက်လုံးမှေးစဉ်းလျက် အေးစက်စက် လေသံဖြင့် “သခင်လေး သိနေပြီပဲကို ဘာလို့ မေးနေသေးတာလဲ”
ကုကျန်းရှင်က အသာအယာ ခေါင်းညိတ်လျက် “ကြည့်ရတာ ဒီသခင်လေးဘေးမှာ သစ္စာဖောက်တွေ ရှိနေတာပဲ။ အဲ့လိုဆိုမှတော့ ဒီကိစ္စကြီးပြီးရင် ရှင်းလင်းလေး လုပ်ရတော့မှာပေါ့”
“သခင်လေးက သေရတော့မှာပဲကို၊ ဘာလို့ ဒီကိစ္စတွေကို စိတ်ပူနေသေးတာလဲ” လီမင်ဟိုင်က လက်ဝှေ့ရမ်း၍ အော်ပြောလိုက်သည် “အကုန်လုံးကို သတ်ပစ်ကြ။ တစ်ယောက်မှ လွတ်မသွားစေနဲ့”
တစ်ယောက်ယောက်သာ လွတ်မြောက်သွားခဲ့လျှင် ပြဿနာ အကြီးကြီး တက်နိုင်ပေလိမ့်မည်။ ထို့ကြောင့် မျက်မြင်သက်သေ အကုန်လုံးကို ရှင်းပစ်ရန် လီမင်ဟိုင် စီစဉ်ထားခြင်း ဖြစ်သည်။
လီမင်ဟိုင်မှ အမိန့်ပေးလိုက်သည်နှင့် သူ့နားတွင် ရှိနေသော တန်ခိုးရှင်အဆင့် ကျင့်ကြံသူအားလုံး ကြယ်သင်္ဘောပေါ်တွင် ရှိနေသော ကျင့်ကြံသူများကို ပြေးဝင် တိုက်ခိုက်ကြလေသည်။
ကုကျန်းရှင် ရပ်နေသည့် ရပ်ကြယ်သင်္ဘောပေါ်မှ ကျင့်ကြံသူပေါင်းများစွာ ထွက်လာပြီး လီမင်ဟိုင်တို့ အဖွဲ့အား ပြန်၍ ခုခံတိုက်ခိုက်ကြသည်။
ချက်ချင်းဆိုသလို ငြိမ်သက်တိတ်ဆိတ်နေလေ့ရှိသော ဂြိုလ်သိမ်ဂြိုလ်မွှားပင်လယ်ကြီးထဲ အော်ဟစ်သံများနှင့်အတူ အလင်းရောင်များ ဖြိုးဖြိုးဖျက်ဖျက် တောက်ပလာလေတော့သည်။
လီမင်ဟိုင်တို့အဖွဲ့တွင် လူနည်းနည်းသာ ရှိသော်လည်း အကုန်လုံးသည် တန်ခိုးရှင်ဒုတိယအဆင့်နှင့် အထက်ချည်းများ ဖြစ်ကြသည်။ ကုကျန်းရှင်တို့မှာမူ လူနှစ်ရာထက်မက ရှိသော်ငြား အဆင့်မြင့် ကျင့်ကြံသူ အရေအတွက်မှာတော့ လီမင်ဟိုင်တို့ထက် ပိုနည်းပေသည်။
အရေးအကြီးဆုံးမှာ လီမင်ဟိုင်ကိုယ်တိုင်သည် တန်ခိုးရှင်ဘုရင်အဆင့် ကျင့်ကြံသူ ဖြစ်နေခြင်းပင်။ ထို့ကြောင့် ကုကျန်းရှင်တို့ အဖွဲ့အတွက် အလွန်ကိုမှ ဖိအားများနေရသည်။
သို့ဖြစ်သည့်အတွက် တိုက်ပွဲစသည်နှင့် ကုကျန်းရှင်တို့ဘက်မှ တစ်ယောက်ပြီးတစ်ယောက် ကျသွားသော်ငြား လီမင်ဟိုင်တို့ အဖွဲ့မှာတော့ အကောင်းအတိုင်းသာ ရှိနေကြသေးသည်။
တိုက်ပွဲစသည့်အချိန်မှစ၍ လီမင်ဟိုင်တို့ အဖွဲ့သည် အသာစီးဖြင့် ဖိတိုက်ခဲ့ပေသည်။
တိုက်ပွဲမှာ စနေပြီဖြစ်သော်လည်း လီမင်ဟိုင်သည် နည်းနည်းလေးမှ မလှုပ်ရှားသေးချေ။ ကုကျန်းရှင်နှင့် သူ့ဘေးရှိ အမျိုးသမီး နှစ်ဦးကိုသာ အလေးအနက် အမူအရာဖြင့် စိုက်ကြည့်နေသည်။
ထိုသုံးယောက်အတွဲသည် လီမင်ဟိုင်ပင် ဂရုပြုရမည့် ပြိုင်ဘက်များ ဖြစ်သည့်ပုံပင်။
သူမလှုပ်ရှားသေးသော်ငြား ကုကျန်ရှင်းတို့ သုံးယောက် ပို၍ အားနည်းသည်မှာ သိသာလှသည်။ ထို့ကြောင့် မဆင်မခြင် မလှုပ်ရှားရဲသေးဘဲ သူ့လက်အောက်ငယ်သားများ တစ်ဦးပြီးတစ်ဦး အသတ်ခံရနေရသည်ကိုသာ ရပ်ကြည့်နေရလေသည်။
အချိန်အတော်ကြာအောင် တိတ်ဆိတ်နေပြီးနောက်တွင် လီမင်ဟိုင်က မေးလိုက်လေသည် “သခင်လေး၊ ကိုယ့်ဘာသာ သက်သေမလား၊ ဒါမှမဟုတ် ဒီလူအိုကြီး လုပ်ပေးရမလား”
“ခွေးအိုကြီး၊ ခင်ဗျား ကျုပ်ကို နိုင်ပြီ ထင်နေတာလား” ကုကျန်းရှင် အေးစက်စက် အမူအရာဖြင့် ပြန်အော်ပြောသည်။
လီမင်ဟိုင်က ဖြည်းဖြည်းချင်း ခေါင်းခါလျက် “ဒီလီ ဒီမှာ ပေါ်လာရဲတယ်ဆိုမှတော့ လုံးဝ ပြင်ဆင်ထားပြီးလို့ပေါ့။ သခင်လေးက ပါရမီရှင်တွေကြားမှ ပါရမီရှင်တစ်ဦးပဲ။ ပြီးတော့ သခင်လေးနဲ့အတူ ငယ်ငယ်လေးထဲက ကျင့်ကြံလာတဲ့ လက်ဝဲ၊ လက်ယာ ဓါးအစေခံတွေလည်း ရှိသေးတယ်။ ပုံမှန်သာဆိုရင် သခင်လေးက တကယ်ကို ရင်ဆိုင်ရခက်မယ့်လူ။ ဒါပေမယ့်… အခု သခင်လေးက တန်ခိုးရှင်ဘုရင်အဆင့်ကို ရောက်သေးတာ မဟုတ်ဘူး။ သခင်လေးသာ တန်ခိုးရှင်ဘုရင်အဆင့်ကို ရောက်နေရင်တော့ ဒီလူအိုကြီး ကျိန်းသေ သခင်လေးရဲ့ ပြိုင်ဘက် မဖြစ်နိုင်ဘူးပေါ့။ ကံမကောင်းစွာနဲ့ သခင်လေးမှာ အဲ့လို အခွင့်အရေးမျိုး ရှိမနေဘူး”
“ဟုတ်လား၊ အဲ့ဒါဆို စမ်းကြည့်ရတာပေါ့” ပြန်အော်ပြောလိုက်ပြီးနောက် လီမင်ဟိုင်သည် အဖြူရောင် ဓါးရှည်တစ်ချောင်းကို ထုတ်ယူလိုက်သည်။ ဓါးအလင်းများနှင့်အတူ ကုကျန်းရှင်၏ ခန္ဓာကိုယ်သည် သင်္ဘောကုန်းပတ်ပေါ်မှ တဖြည်းဖြည်း ပျံဝဲတက်လာခဲ့သည်။
ကုကျန်းရှင်အား ဝန်းရံထားသည့် ဓါးအလင်းမှာ ကမ္ဘာမြေအား အလင်းရောင် ဆောင်ကျဉ်းပေးနေသော နေအလင်းရောင်နှယ် မြင့်မြတ်ကြီးကျယ် တောက်ပနေ၏။
သူလှုပ်ရှားသည်နှင့် တစ်ပြိုင်နက် သူ့နောက်တွင် ရပ်နေသော အမျိုးသမီးနှစ်ဦးလည်း တစ်ပြိုင်တည်း လှုပ်ရှားလိုက်ကြသည်။ ကုကျန်းရှင်ကဲ့သို့ပင် အမျိုးသမီးနှစ်ဦးသည်လည်း တောက်ပသော ဓါးနှစ်ချောင်းကို အသီးသီး ထုတ်လိုက်ကြသည်။
အမျိုးသမီးနှစ်ဦးဆီမှလည်း ဓါးအလင်းရောင်များ ထွက်ပေါ်လာကြသည်။ ကုကျန်းရှင်နှင့် မတူသည်မှာ အမျိုသမီး နှစ်ဦး၏ ဓါးအလင်းရောင်သည် လစန္ဒာနှင့် ကြယ်တာရာကောင်းကင်ကဲ့သို့ သိမ်မွေ့ထက်ရှနေခြင်း ဖြစ်သည်။
ဓါးအလင်းတန်းသုံးခု အတူတကွ ပေါင်းစည်းသွားခဲ့သည်။ တန်ခိုးရှင်အဆင့်များ ထုတ်လွှတ်နိုင်သော စွမ်းအားထက်ကို ကျော်လွန်သည့် အရှိန်အဟုန်ဖြင့် ဓါးအလင်းတန်းသည် ဟင်းလင်းပြင်ကို ပိုင်းဖြတ်ကာ လီမင်ဟိုင်ဆီသို့ တိုးဝင်သွား၏။
ထိုစွမ်းအားကို မြင်ပြီးနောက် လီမင်ဟိုင်က အံ့အားသင့်နေသည့် အမူအရာဖြင့် “နေ၊လ၊ကြယ်၊ သုံးရောင်ခြယ်ဓါးသိုင်း ဆိုတဲ့အတိုင်းပါပဲလား။ ဒီလောက်နဲ့ဆို တန်ခိုးရှင် အဆင့်ထဲမှာ သခင်လေးကို ဘယ်သူမှ နိုင်တော့မှာ မဟုတ်ဘူး။ ဒါပေမယ့် သခင်လေးရဲ့ ဓါးအစေခံနှစ်ယောက်က သခင်လေးလောက် အားမကောင်းတာ ဆိုးတာပဲ။ ပြီးတော့ သခင်လေး ကိုယ်တိုင်ကလည်း တန်ခိုးရှင်ဘုရင်အဆင့်ကို ရောက်သေးတာ မဟုတ်ဘူး။ ဒီလိုဆိုမှတော့ တန်ခိုးရှင်အဆင်နဲ့ တန်ခိုးရှင်ဘုရင်အဆင့် ဘယ်လောက် ကွာခြားလဲ ဒီလူအိုကြီးကိုယ်တိုင် သခင်လေးကို ပြပေးရတာပေါ့”
ပြောပြီးသည်နှင့် မမြင်နိုင်သော စွမ်းအားတစ်ရပ်သည် လီမင်ဟိုင်ဆီမှ ဖြာထွက်လာခဲ့လေသည်။
နယ်ပယ်ပင်…
လီမင်ဟိုင်သည် လွန်ခဲ့သော နှစ်ငါးရာလောက်ကတည်းက တန်ခိုးရှင်ဘုရင်အဆင့်ကို ချိုးဖျက်ထားသူ တစ်ဦး ဖြစ်သည်။ သူ့အနေဖြင့် တန်ခိုးရှင်ဘုရင်ဒုတိယအဆင့်သို့ ဆက်လက် မချိုးဖျက်နိုင်တော့လျှင်ပင် သူ့နယ်ပယ်သည် အတော့်ကိုမှ အားကောင်းနေသေးသည်။
သူ့နယ်ပယ်ထဲ ရောက်ရှိသွားသော တန်ခိုးရှင်အဆင့် ကျင့်ကြံသူများအဖို့ ကျိန်းသေ ဖိနှိပ်ခံရပေလိမ့်မည်။
သို့သော်လည်း လီမင်ဟိုင်၏ နယ်ပယ်သည် ဓါးအလင်းတန်းကို တားဆီးနိုင်ခဲ့ခြင်း မရှိချေ။ ဓါးအလင်းတန်း သုံးခုဆီမှ အားအသစ်တစ်ရပ် ရုတ်တရက် ထွက်ပေါ်လာပြီး လီမင်ဟိုင်၏ နယ်ပယ်ကို အလွယ်တကူ ချိုးဖျက်သွားခဲ့သည်။
လီမင်ဟိုင်က အံ့အားသင့်နေသည့် လေသံဖြင့် တိုးတိုးလေး ရေရွတ်လိုက်၏ “ရေပြင်ခြားနတ်ကြေးမုံ၊ အဖွဲ့အစည်းခေါင်းဆောင်က သခင်လေးကို ဒီလို ရတနာတောင် ပေးထားတာပဲ”
ရေပြင်ခြားနတ်ကြေးမုံသည် နယ်ပယ်၏ စွမ်းအားကို အတိုင်းအတာတစ်ခုအထိ ဖယ်ရှားပစ်နိုင်သော တန်ခိုးရှင်ဘုရင် အဆင့် မှော်ရတနာမျိုး ဖြစ်သည်။ အားနည်းသည့် နယ်ပယ်သာ ဆိုလျှင် ထိုကြေးမုံကြောင့် တစ်ခါတည်း ပျက်စီးသွားနိုင်သည်။
နယ်ပယ်အား ခုခံနိုင်သည့် စွမ်းရည်ကြောင့် ရေပြင်ခြားနတ်ကြေးမုံသည် ကြယ်စီရင်စုထဲ အတော့်ကိုမှ ကျော်ကြားပေသည်။
ထိုမှော်ရတနာ၏ အကူအညီဖြင့် ကုကျန်းရှင်တို့ သုံးဦး လီမင်ဟိုင်နယ်ပယ်၏ ဖိနှိပ်မှုမှ ရုန်းထွက်နိုင်ခဲ့လေသည်။
လီမင်ဟိုင်အနေဖြင့် ဓါးအလင်းတန်းအား ပေါ့ပေါ့ဆဆ မမှတ်ရဲ။ ချက်ချင်းပဲ ရန်ကိုင်အား တိုက်ခိုက်ခဲ့သည့် လှံရှည်ကို ထုတ်၍ လှံရှည်ထဲသို့ သူတော်စင်ချီ ထည့်သွင်းလိုက်၏။ လှံရှည်ထိပ်ဖျားထက် ထိတ်လန့်ဖွယ်ရာ အားတစ်ရပ် စုစည်းလာပြီးနောက် ဓါးအလင်းတန်းဆီသို့ တိုးဝင်သွားလေ၏။
ဓါးနှင့်လှံအရိပ်တို့ ထိပ်တိုက်တွေ့သွားသည့်အခိုက် မျက်စိကျိန်းမတတ် အလင်းတန်းများ ထွက်ပေါ်လာပြီး လီမင်ဟိုင်နှင့် ကုကျန်ရှင်းတို့ သုံးဦးစလုံးကို လွှမ်းခြုံသွားခဲ့သည်။
ရန်ကိုင်သည် ထိုမြင်ကွင်းကို အံ့အားသင့်တကြီး ထိုင်ကြည့်နေခဲ့သည်။
တန်ခိုးရှင်အဆင့်လေးဖြင့် တန်ခိုးရှင်ဘုရင်အဆင့် ယှဉ်ပြိုင် တိုက်ခိုက်ဖို့သည် သာမန် တန်ခိုးရှင်အဆင့် ကျင့်ကြံသူများ လုပ်နိုင်သည့် အရာမျိုး မဟုတ်ချေ။ သို့သော်လည်း ကုကျန်းရှင်က လုပ်ပြသွားခဲ့သည်။ သူ့နောက်ဘက်ရှိ အမျိုးသမီးနှစ်ဦး၏ အကူအညီကြောင့် ယခုထိ တောင့်ခံနိုင်သေးသော်လည်း အနှေးနှင့်အမြန်ဆိုသလို သူရှုံးနိမ့်သွားရပေလိမ့်မည်။
ထို့အပြင် အမျိုသမီးနှစ်ဦး၏ ကျင့်ကြံခြင်းမှာလည်း တန်ခိုးရှင်ဒုတိယအဆင့်လောက်သာ ရှိသေးသည်။ လီမင်ဟိုင်လို တန်ခိုးရှင်ဘုရင်အဆင့် ကျင့်ကြံသူများနှင့် အချိန်အကြာကြီး ယှဉ်ပြိုင်တိုက်ခိုက်ဖို့ရာ ကုကျန်းရှင်တို့တွင် စွမ်းအင် အလုံအလောက် ရှိမနေခဲ့ပေ။
ဓါးအဖွဲ့အစည်းက သခင်လေးက တကယ် အထင်ကြီးဖို့ ကောင်းတာပဲ
တိုက်ပွဲစသည့်အချိန်တွင် ရန်ကိုင်သည် ပုန်းနေရာမှ ထွက်၍ တိုက်ပွဲကွင်းပြင်ဆီသို့ တိုးတိုးတိတ်တိတ် ချဉ်းကပ်သွားခဲ့သည်။
သူ့အာရုံ အလုံးစုံနီးပါးသည် လီမင်ဟိုင် အပေါ်တွင်သာ ကျရောက်နေခဲ့သည်။
လီမင်ဟိုင်ကဲ့သို့ တန်ခိုးရှင်ဘုရင်အဆင့် ကျင့်ကြံသူကို ချောင်းမြောင်းတိုက်ခိုက်လိုလျှင် ချိန်သားကိုက်ဖို့သည် အလွန်ကိုမှ အရေးကြီးသည်။ အလျင်စလို လှုပ်ရှားလိုက်လျှင် ရန်သူကို သတိပေးသလိုသာ ဖြစ်သွားလိမ့်မည် ဖြစ်သည့်အတွက် ရန်ကိုင်သည် စိတ်ရှည်ရှည်ဖြင့်သာ စောင့်ဆိုင်းနေခဲ့လေသည်။
အစကမူ ကုကျန်းရှင်နှင့် အခြားသူများ တစ်ကွက်တည်းဖြင့် အနိုင်ယူခံရမည်ကို စိုးရိမ်နေသေးသည်။ သို့ရာတွင် လက်ရှိ သူထုတ်ပြသွားသည့် စွမ်းအားကို မြင်ပြီးနောက် ကုကျန်းရှင် အနေဖြင့် လီမင်ဟိုင်အား အချိန် အတော်ကြာသည်အထိ ပြန်လည် တိုက်ခိုက်နိုင်လိမ့်မည်ဟု ရန်ကိုင် ယုံကြည်မိသွားသည်။
လီမင်ဟိုင်တို့ တိုက်ပွဲကို စောင့်ကြည့်နေစဉ်အတွင်း အလင်းတန်းအချို့ ဂြိုလ်သိမ်ဂြိုလ်မွှားပင်လယ်ထဲသို့ ထွက်ပြေးနေသည်ကို တွေ့ရှိလိုက်ရသည်။
အချို့သည် တိုက်ခိုက်နေကြချိန် အချို့မှာတော့ ထွက်ပြေးရန် ကြိုးစားကြသည်။ ဂြိုလ်သိမ်ဂြိုလ်မွှားများစွာဖြင့် ပြည့်နေသော ဤနေရာသည် ထွက်ပြေးရန် အကောင်းဆုံးနေရာ ဖြစ်ပေသည်။
အားနည်းသော ကျင့်ကြံသူနှစ်ဦး ထွက်ပြေးနေခဲ့သည်။ ကြည့်ရသလောက် ထိုနှစ်ဦးသည် အမျိုးသမီးများ ဖြစ်ကြ၏။ တစ်ချိန်တည်းတွင် လီမင်ဟိုင်ဘက်မှ လူတစ်ဦးသည် ထိုအမျိုးသမီးနှစ်ဦးနောက်သို့ လိုက်နေလေသည်။
သူတို့ဆီမှ ထွက်ပေါ်နေသော စွမ်းအင် အရှိန်အဝါအရ အမျိုးသမီး နှစ်ဦးသည် သူတော်စင်ဘုရင် တတိယအဆင့်သာ ရှိကြသေးသည်။ ထိုကျင့်ကြံခြင်းသည် ဤကဲ့သို့သော တိုက်ပွဲမျိုးတွင် ဘာမှလုပ်နိုင်လိမ့်မည် မဟုတ်ချေ။
သူတို့နောက်သို့ လိုက်နေသည့် ကျင့်ကြံသူမှာတော့ တန်ခိုးရှင်ဒုတိယအဆင့် ဖြစ်ပေသည်။ ကျင့်ကြံခြင်းအဆင့် ဤမျှ ကွာခြားနေလေရာ အမျိုးသမီးနှစ်ဦး အသက်ရှင်လျက် ထွက်ပြေးနိုင်လျှင်ပင် တကယ်ကို အံ့အားသင့်စရာ ကောင်းနေလေပြီ။
လီမင်ဟိုင်သည် ခွေးတစ်ကောင် ကြောင်တစ်မြီးပင် မလွတ်စေရန် အမိန့်ပေးထားသည့်အတွက် တန်ခိုးရှင်အဆင့် ကျင့်ကြံသူသည် ထိုအမျိုးသမီးနှစ်ဦးကို လုံးဝ အလွတ်မပေးခဲ့ပေ။ အလျင်စလို လိုက်ဖမ်းနေခဲ့ရာ အမျိုးသမီးနှစ်ဦးကို တဖြည်းဖြည်း လိုက်မှီလာခဲ့လေသည်။
ထိုအမျိုးသမီးနှစ်ဦးကို ကြည့်ရင်း ရန်ကိုင် စိတ်ညစ်လာရ၏။ အကြောင်းမှာ အမျိုးသမီးနှစ်ဦး ထွက်ပြေးနေသည့်ဘက်သည် သူပုန်းနေသည့်ဘက် ဖြစ်နေသောကြောင့်ပင်။
ဘာမှမဖြစ်ခဲ့လျှင် အမျိုးသမီးနှစ်ဦးသည် တစ်ခဏအတွင်း သူရှိနေရာကို ရောက်ရှိလာပေလိမ့်မည်။
သက်ပြင်းတစ်ချက်ချလျက် ရန်ကိုင်သည် အချိန်မရွေး လှုပ်ရှားနိုင်ရန် ပြင်ဆင်ထားလိုက်လေသည်။
ခဏအကြာတွင် အမျိုးသမီးနှစ်ဦးသည် ရန်ကိုင် ပုန်းနေသည့် ဂြိုလ်သိမ်အား ဖြတ်ကျော်သွားခဲ့လေသည်။ အနီးကပ် ဖြစ်နေသည့် အတွက် ရန်ကိုင်လည်း အမျိုးသမီးနှစ်ဦး၏ မျက်နှာကို သေချာ မြင်လိုက်ရသည်။
အကြည့်ချင်း ဆုံသွားသည့်အခိုက်တွင် ရန်ကိုင် ကြောင်သွားခဲ့သလို အမျိုးသမီးနှစ်ဦးမှာလည်း မှင်သက်သွားခဲ့၏။
ချက်ချင်းဆိုသလို အမျိုးသမီးနှစ်ဦးကို လိုက်ဖမ်းနေသည့် တန်ခိုးရှင်ဒုတိယအဆင့် လိုက်မှီလာပြီး မှင်သက်နေသည့် အမျိုးသမီးနှစ်ဦးဆီ လက်ဝါးတစ်ချက် ရိုက်ထုတ်လိုက်လေသည်။
ပုံမှန်သာဆိုလျှင် ထိုလက်ဝါးချက် အရိုက်ခံလိုက်ရလျှင် အမျိုးသမီးနှစ်ဦးစလုံး အပြင်အထန် ဒဏ်ရာရသွားမည် ဖြစ်သော်ငြား လက်ဝါးချက်သည် ပစ်မှတ်ဆီသို့ မရောက်သေးခင်မှာပဲ ပျက်စီးသွားခဲ့လေသည်။
“ဘာဖြစ်သွားတာလဲ” ဘာတွေဖြစ်လို့ ဖြစ်နေမှန်း မသိခင်မှာပဲ ရွှေရောင်အလင်းတစ်ချက် လက်သွားသည်ကို တန်ခိုးရှင်ဒုတိယအဆင့် လှမ်းမြင်လိုက်ရလေသည်။
သူ့ကိုယ်သူ ကာကွယ်ရန် သုံးထားခဲ့သော သူတော်စင်ချီသည် ထိုရွှေရောင်အလင်းတန်းရှေ့တွင် စက္ကူဖြူတစ်ရွက်နှယ် အလွန်ကိုမှ စုတ်ပြဲလွယ်နေခဲ့လေသည်။ တဆစ်ဆစ် နာကျင်မှုနှင့်အတူ တန်ခိုးရှင်ဒုတိယအဆင့် ကျင့်ကြံသူ၏ မြင်ကွင်းတစ်ခုလုံး အမှောင်ဖုံးသွားခဲ့လေ၏။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၃၇)
ရန်ကိုင်သည် အမျိုးသမီးနှစ်ဦးကို ကြောင်ကြည့်နေခဲ့၏။
အမျိုးသမီးနှစ်ဦးသည် ရန်ကိုင်ထက်ပင် ပို၍ အံ့အားသင့်နေသည်။ သူတို့အား လိုက်ဖမ်းနေသည့် တန်ခိုးရှင်အဆင့် ကျင့်ကြံသူ သေသွားသည်ကိုမြင်သော် အမျိုးသမီးနှစ်ဦးစလုံး အလန့်တကြား ထအော်ပြီး သူတို့အား မည်သူ ကယ်လိုက်သလဲ သိရအောင် နောက်သို့ လှည့်ကြည့်လိုက်ကြသည်။
သို့သော်လည်း သူမတို့ အဖွဲ့သား တစ်ယောက်ကိုမှ မတွေ့ရသဖြင့် ရန်ကိုင်ဆီသို့ ပြန်လှည့်ကြည့်လိုက်ကြ၏။ ဘာတွေဖြစ်ပျက်သွားသလဲ သူတို့ နားလည်သွားခဲ့လေပြီ။ သို့တိုင် သူမစိတ်ထဲ အလွန်ကိုမှ ထိတ်လန့်မိနေသေးသည်။
“နင်တို့ ဘာကြောင်ကြည့်နေတာလဲ။ ဒီကို မြန်မြန်လာခဲ့” ရန်ကိုင်က လက်ယပ်ခေါ်ရင်း လေသံတိုးတိုးဖြင့် လှမ်း၍ အော်ပြောလိုက်သည်။
ထိုအခါမှပဲ အမျိုးသမီးနှစ်ဦး အသိပြန်ဝင်လာပြီး အကြည့်ချင်း ဖလှယ်လျက် ရန်ကိုင်နှင့် ဆယ်မီတာအကွာဆီသို့ အလျင်အမြန် ပြေးသွားလေသည်။ ရန်ကိုင်အား သင်္ကာမကင်း အမူအရာဖြင့် တစ်ချိန်လုံး စိုက်ကြည့်နေလေသည်။
ရန်ကိုင်သည် ထိုနှစ်ဦးအား ပြုံးဖြဲဖြဲဖြင့်ကြည့်ကာ ပြောလိုက်လေသည် “ဘာလဲ၊ နည်းနည်းလောက် ကြာသွားတာနဲ့ ငါ့ကို မမှတ်မိတော့တာလား”
ထိုစကားကို ကြားမှပဲ အမျိုးသမီးနှစ်ဦး ရန်ကိုင် ဘယ်သူမှန်း သိသွားကြလေသည်။ အမျိုးသမီးနှစ်ဦးအနက် အရပ်ရှည်ရှည်နှင့် အမျိုးသမီးက သူမပါးစပ်ကို အုပ်လျက် တုန့်ဆိုင်းတုန့်ဆိုင်းဖြင့် မေးလိုက်လေသည် “ရန်ကိုင်လား”
“တကယ်ပဲ နင်လား။ အဲ့လူကို နင်သတ်လိုက်တာလား။ နင်ဘယ်လိုလုပ်ပြီး ဒီလောက်တောင် အားကောင်းလာတာလဲ။ ပြီးတော့ နင်ဘာလို့ ဒီကို ရောက်နေတာလဲ” အငယ်မ ဖြစ်ဟန်တူသော အမျိုးသမီးက မေခွန်းများကို သေနတ်ပစ်သလို တရစပ်မေးလွှတ်တော့လေသည် “နင်လီမင်ဟိုင်နဲ့ တစ်ဖွဲ့တည်းလား”
အကြီးမဖြစ်ဟန်တူသူမှာမူ ရန်ကိုင်အား ခဏကြာသည်အထိ စိုက်ကြည့်နေပြီးနောက် ခေါင်းတရမ်းရမ်းဖြင့် “ညီမလေး၊ နင်ဘာတွေ ပြောနေတာလဲ။ သူသာ လီမင်ဟိုင်နဲ့ တစ်ဖွဲ့တည်းဆိုရင် ငါတို့ကို ကယ်ပါဦးမလား”
ရန်ကိုင်က ရယ်သွမ်းသွေးလျက် အငယ်မအားကြည့်ကာ ပြောလိုက်လေသည် “ဟဲမြောင်၊ နင်ကတော့ တကယ်ကို အရင်အတိုင်းပဲ။ နည်းနည်းမှကို ပြောင်းလဲမသွားဘူး”
ထိုစကားကို ကြားသည့်အခါ ဟဲမြောင် ရှက်သွားခဲ့လေ၏။ ရှက်ကိုးရှက်ကန်း အမူအရာဖြင့် ပြန်၍ ပြောလိုက်လေ၏ “ငါ အရမ်းကြောက်နေတာကိုး”
“ဘာမှမဖြစ်ဘူး” ရန်ကိုင်က ပြုံးလျက် အမျိုးသမီးနှစ်ဦးကို ကြည့်ကာ ပြောလိုက်လေသည် “နင်တို့ကို ဒီလို နေရာမျိုးမှာ နောက်တစ်ကြိမ် ထပ်တွေ့ရလိမ့်မယ်လို့ မထင်ထားဘူး”
ထိုအမျိူးသမီးနှစ်ဦးသည် ရန်ကိုင် ကြယ်စီရင်စုထဲသို့ စဝင်လာစဉ်က ပထမဆုံးတွေ့ခဲ့သည့် ဟဲကျောင်နှင့် ဟဲမြောင်တို့ ညီအစ်မနှစ်ဦးပဲ ဖြစ်ကြလေသည်။
လွင့်မျောတိုက်ကြီးမှ လွတ်မြောက်လာပြီးနောက် သူတို့ တစ်ဦးနှင့်တစ်ဦး တစ်ခါမှ ထပ်မတွေ့ဖြစ်တော့ချေ။ ထို့ကြောင့် သူမတို့ နှစ်ဦးအား ဤနေရာ၌ မြင်လိုက်ရသည့်အခါ ရန်ကိုင် အတော်လေး အံ့အားသင့်သွားခဲ့ခြင်း ဖြစ်သည်။ သို့သော်လည်း ပြန်စဉ်းစားကြည့်လိုက်သည့်အခါမှပဲ ထိုအမျိုးသမီးနှစ်ဦးမှာ ဓါးအဖွဲ့အစည်း၏ အဖွဲ့သားများဖြစ်ကြောင်း ပြန်သတိရလိုက်သည်။ သူမတို့အား ဤနေရာ၌ လာတွေ့သည်မှာ အရမ်းကြီးတော့ အထူးအဆန်း မဟုတ်ချေ။
သို့သော် ဤကဲ့သို့ အဖြစ်အမျိုးထဲ ဝင်ပက်သက်မိရသည်ကို ထောက်ရှုကြည့်လျှင် ထိုအမျိုးသမီးနှစ်ဦးသည် တကယ်ကို ကံဆိုးလှကြပေသည်။
“ဟုတ်တယ်။ ငါတို့ မတွေ့တာ အတော်ကြာနေပြီ” ဟဲကျောင်က သက်ပြင်းချလျက် “နင်ဒီလောက်အထိ အားကောင်းနေလိမ့်မယ်လို့ မထင်ထားဘူး။ ခုဏတုန်းကလူကို နင်သတ်လိုက်တာမလား”
“အင်း”
ရန်ကိုင် ဝန်ခံသည်ကို ကြားသည့်အခါ သူမစိတ်ထဲ ထိုကဲ့သို့ ဖြစ်လိမ့်မည်ဟု တွေးထားသည့်တိုင် ညီအစ်မ နှစ်ဦးစလုံး အနည်းငယ် ဆွံ့အသွားခဲ့ကြပေသေးသည်။
ရန်ကိုင်နှင့် ပထမဆုံးအကြိမ် စတွေ့စဉ်က ရန်ကိုင်သည် သူတော်စင်ပထမအဆင့် ကျင့်ကြံသူသာ ဖြစ်သေးသည်။ သူတို့ နှစ်ဦး၏ ကျင့်ကြံခြင်းသည်ပင် ရန်ကိုင်ထက် ပိုမြင့်ပေသေးသည်။ အကြီးမသည် သူတော်စင်တတိယအဆင့် ဖြစ်ပြီး အငယ်မမှာ သူတော်စင်ဒုတိယအဆင့် ဖြစ်သည်။
နှစ်သုံးဆယ်ကြာပြီးနောက်တွင် ညီအစ်မနှစ်ဦးသည် သူတို့ တတ်စွမ်းသမျှ စွမ်းရည်ကိုသုံး၍ ကြိုးစားခဲ့ရာ သူတော်စင်ဘုရင် တတိယအဆင့်သို့ ရောက်ရှိနိုင်ခဲ့လေသည်။
သို့သော်လည်း ရန်ကိုင်နှင့် ယှဉ်လိုက်သည့်အခါတွင်မူ လုံးဝကို မျက်နှာငယ်စရာ ဖြစ်သွားရတော့လေသည်။
တန်ခိုးရှင်ဒုတိယအဆင့်ကို တစ်မုဟုတ်ချည်း သတ်ပစ်နိုင်သည်ကို ထောက်ရှုကြည့်လျှင် ရန်ကိုင်ကိုယ်တိုင်သည် အနည်းဆုံး တန်ခိုးရှင်အဆင့် ကျင့်ကြံသူတစ်ဦ ဖြစ်သည်ဟု သက်သေပြနေခဲ့သည်။ တန်ခိုးရှင်အဆင့် ဆိုလျှင်ပင် တန်ခိုးရှင် တတိယအဆင့် ကျင့်ကြံသူတစ်ဦး ဖြစ်နိုင်ချေမှာ အလွန်များ၏။
ရန်ကိုင် သူ့ခွန်အားကို ထုတ်ပြလိုက်စဉ်က သူ့ဆီမှ ဖြာထွက်လာသော စွမ်းအင်လှိုင်းသည် သခင်လေး ကုကျန်းရှင်ဆီမှ ဖြာထွက်လာသော စွမ်းအားအောက် နိမ့်ကျခြင်း လုံးဝ မရှိချေ။
ညီအစ်မနှစ်ဦးစလုံးကို တကယ်ကို မှင်သက်နေကြသည်။
ရုတ်တရက် ဟဲကျောင်၏ အမူအရာ ပြောင်းလဲသွားပြီး အလေးအနက်အမူအရာဖြင့် မေးလိုက်လေသည် “ရန်ကိုင်၊ ကျေးဇူးပြုပြီး ငါတို့ကို ကူညီပေးပါလား”
“ဘာကို ကူညီရမှာလဲ”
“ငါတို့ ဆရာကို ကူညီပေးဖို့ပြောတာ”
“နင်တို့ဆရာ” ရန်ကိုင် မျက်မှောင်ကြုတ်သွားခဲ့၏။ အလျင်အမြန်ပဲ ဟဲကျောင်းသည် ရွယ့်ရှီဟုခေါ်သော အမျိုးသမီးကို ပြောနေမှန်း ရန်ကိုင် မှတ်မိသွားလေသည်။
လွင့်မျောတိုက်ကြီးတွင် ပိတ်မိနေစဉ်က ဟဲကျောင်နှင့် ဟဲမြောင်တို့၏ ဆရာဖြစ်သူနှင့် ရန်ကိုင် တွေ့ခဲ့ဖူးသည်။ သို့ရာတွင် သူတို့ကြားရှိ ဆက်ဆံရေးမှာ ကောင်းမွန်ခြင်း မရှိချေ။ ရန်ကိုင်၏ မွေးဖွားရာအရပ်သည် နိမ့်ကျသလို သူ့ကျင့်ကြံခြင်းမှာလည်း မြင့်မားခြင်း မရှိသည့်အတွက် ရွယ့်ရှီသည် သူ့အား အထင်သေး၏။
ထို့အပြင် ရန်ကိုင်သည် ရွယ့်ရှီ၏ တပည့်ကိုလည်း သတ်ခဲ့သေးဖြင့် ရွယ့်ရှီသည် ရန်ကိုင်အပေါ် အလွန်ကိုမှ အမြင်မကြည် ဖြစ်ခဲ့လေသည်။
သို့သော်လည်း နောက်ပိုင်းတွင် ရွယ့်ရှီနှင့် ရန်ကိုင်ကြားရှိ ဆက်ဆံရေးမှာ အမျိုးမျိုးသော အကြောင်းများကြောင့် အတော်လေး တိုးတက်လာခဲ့လေသည်။ ရန်ကိုင်၏ အကူအညီဖြင့် ရွယ့်ရှီသည် သူမ၏ တပည့်နှစ်ဦးနှင့်အတူ လွင့်မျောတိုက်ကြီးမှ အောင်မြင်စွာ လွတ်မြောက်လာနိုင်ခဲ့သည်။
“ရွယ့်ရှီလည်း ဒီရောက်နေတာလား” ပြောနေရင်း ရန်ကိုင်သည် တိုက်ပွဲကွင်းရှိရာဆီသို့ လှမ်းကြည့်လိုက်ကြသည်။ တိုက်ပွဲကွင်းပြင်တစ်ခုလုံး တလက်လက် တောက်ပနေသော အရောင်မျိုးစုံတို့ဖြင့် ပြည့်နေသဖြင့် ရန်ကိုင်အဖို့ ရွယ့်ရှီ မည်သူလဲ ခန့်မှန်းရ ခက်နေခဲ့သည်။
ဟဲကျောင်း စိုးရိမ်လာခဲ့လေသည် “ငါတို့ ဆရာ ရန်သူတွေကို တားထားပေးလို့ ငါတို့ လွတ်လာနိုင်ခဲ့တာ။ ဒါပေမယ့် ဆရာ အခြေအနေက သိပ်မကောင်းဘူး။ ငါတို့သာ သွားမကယ်နိုင်ရင် အနှေးနဲ့အမြန် ဆရာ အသတ်ခံရတော့မှာ။ ရန်ကိုင်၊ နင်…”
သူမ၏ တောင်းဆိုမှုသည် အနည်းငယ် လွန်ကဲနေမှန်း သူမ နားလည်ပေသည်။ လက်ရှိအချိန်၌ တိုက်ပွဲ ကွင်းပြင်တစ်ခုလုံးမှာ အလွန်ကိုမှ ပရမ်းပတာ ဖြစ်နေပြီး တန်ခိုးရှင်ဘုရင်အဆင့်ပင် ဝင်ရောက်တိုက်ခိုက်နေသည်။
သို့သော်လည်း ဟဲကျောင်းသည် သူတော်စင်ဘုရင် တတိယအဆင့်သာ ရှိသေးသည့်အတွက် ရွှယ့်ရှီအား လုံးဝ မကူညီပေးနိုင်ချေ။ ထို့ကြောင့် ရှက်ရွံ့စိတ်ကို မျိုသိပ်၍ ရန်ကိုင်ဆီမှသာ အကူအညီ တောင်းရတော့လေသည်။
“အစ်ကိုရန်…” ဟဲမြောင်ကလည်း သနားစဖွယ် အသံလေးဖြင့် အနူးအညွှတ် တောင်းဆိုလိုက်လေသည်။ တန်ခိုးရှင်ဒုတိယအဆင့်အား မျက်စိတစ်မှိတ်အတွင်း သတ်ပြသွားသော ရန်ကိုင်၏ စွမ်းရည်ကြောင့် အမျိုးသမီးနစ်ဦး စလုံး ရန်ကိုင်သာ လှုပ်ရှားလျှင် သူမတို့၏ ဆရာကို ကယ်တင်နိုင်လိမ့်မည်ဟု ယုံကြည်နေကြသည်။
ရွှယ့်ရှီသည် ရန်ကိုင်ကို သိပ်ကြည့်မရသော်လည်း သူ့တပည့် နှစ်ဦးအပေါ်တော့ တကယ်ကို ကောင်းပေသည်။ မဟုတ်လျှင် သူမ၏ တပည့်နှစ်ယောက် ထွက်ပြေးရန်အတွက် ရန်သူအား အချိန်ဆွဲထားလိမ့်မည် မဟုတ်ချေ။
ရန်ကိုင် မျက်မှောင်ကြုတ်သွားခဲ့လေသည်။
ထိုအခြင်းအရာကိုမြင်သည့်အခါ အမျိုးသမီးနှစ်ဦးစလုံး ရန်ကိုင်အား ဆက်မတောင်းဆိုရဲကြတော့ဘဲ စိုးရိမ်တကြီးဖြင့်သာ ရပ်စောင့်နေလိုက်ကြလေသည်။
တစ်ခဏကြာ တိတ်ဆိတ်နေပြီးနောက် ရန်ကိုင်က မျက်ခုံးပင့်၍ အလေးအနက် အမူအရာဖြင့် ပြောလိုက်လေသည် “ငါဒီမှာ ပုန်းနေတာက လီမင်ဟိုင်ကို အလစ်ချောင်း တိုက်ခိုက်ဖို့ပဲ”
ဟဲကျောင်နှင့် ဟဲမြောင်တို့ နှစ်ဦးစလုံး ရန်ကိုင်အား ရုတ်တရက် အလန့်တကြား ကြည့်လိုက်ကြလေသည်။
တန်ခိုးရှင်အဆင့်လေး တန်ခိုးရှင်ဘုရင်အဆင့်အား ချောင်းတိုက်ခိုက်ရန် ကြိုးစားခြင်းမှာ ပုရွက်ဆိတ်မှ ဆင်အား နင်သတ်ရန် ကြိုးစားသကဲ့သို့ပင်၊ တကယ်ကို မဖြစ်နိုင်သည့် လုပ်ရပ်မျိုး ဖြစ်သည်။
“ငါတကယ် ပြောနေတာ။ ငါဒီနားက ဖြတ်သွားတုန်က ငါ့ကို တိုက်ခိုက်ထားလို့ မကျေနပ်လို့ ဒီမှာ ပြန်စောင့်နေတာ” ရန်ကိုင်က ပြောလိုက်သည် “ဒါကြောင့် ငါအခုချက်ကြီး ထွက်လာဖို့က အဆင်မပြေသေးဘူး”
အမျိုးသမီးနှစ်ဦး၏ မျက်နှာများ ညိုးကျသွားခဲ့သည်။
“ဒါပေမယ့် ဟဲမြောင်က ငါ့ကို အစ်ကိုကြီးလို့ ခေါ်နေမှတော့ ငါလည်း ဘယ်ထိုင်ကြည့်နေလို့ ဖြစ်ပါ့မလဲ” ရန်ကိုင်က ရယ်သွမ်းသွေးလိုက်လေသည်။
ဟဲမြောင်သည် ရန်ကိုင်အား အံ့အားသင့်တကြီး မော့ကြည့်လာ၏။ ညိုးလျော်နေသည့် သူမ၏ မျက်နှာလေးမှာလည်း ပန်းရောင် သန်းလာခဲ့လေသည်။
“ထွက်လာခဲ့” ရန်ကိုင်က ရုတ်တရက် အော်ခေါ်လိုက်၏။ ချက်ချင်းဆိုသလို သူ့ခန္ဓာကိုယ်မှ အနီရောင်စွမ်းအင်တို့ ရုတ်တရက် ပေါက်ကွဲထွက်လာပြီး လူသားပုံရိပ်တစ်အဖြစ်သို့ လျင်မြန်စွာ သိပ်သည်းသွားခဲ့လေသည်။
မျက်တောင်တစ်ခတ်အတွင်း ကျော့ရှင်းလှပသော အမျိုးသမီးတစ်ဦး ဟဲမြောင်နှင့်ဟဲကျောင်တို့ရှေ့ ထူးဆန်းစွာ ထွက်ပေါ်လာခဲ့လေသည်။
ထိုအမျိုးသမီးသည် အလွန်ကိုမှ လှပသည့် မီးတောက် ကဲ့သို့သော အနီရောင်ဆံပင်များကို ပိုင်ဆိုင်ထားပြီး သွေးနီရောင် အဝတ်အစားကို ဝတ်ဆင်ထားခဲ့သည်။ ထိုအမျိုးသမီးဆီမှ အန္တရာယ်များသည် စွမ်းအင်အရှိန်အဝါတို့ ဖြာထွက်နေသည်ကို ဟဲကျောင်နှင့် ဟဲမြောင်တို့ နှစ်ဦးစလုံး ခံစားမိလိုက်ကြသည်။
“သခင်၊ ဘာများ အမိန့်ရှိလို့လ မသိဘူး” အမျိုးသမီးသည် ပေါ်လာသည်နှင့် ရန်ကိုင်အား လေးလေးစားစားဖြင့် မေးလိုက်၏။ ဟဲကျောင်နှင့် ဟဲမြောင်တို့အား တစ်ချက်ဖြင့် လှဉ့်မကြည့်ပေ။
“သူတို့နောက် လိုက်သွားပြီး သူတို့ကို ကာကွယ်လေိုက်” ရန်ကိုင်က ဟဲကျောင်နှင့် ဟဲမြောင်ကို လက်ညိုးထိုးပြလိုက်သည်။
အမျိုးသမီးသည် ညီအစ်မနှစ်ဦးအား ကြည့်လိုက်ပြီး ခေါင်းညိတ်ပြလိုက်သည်။
“ရန်ကိုင်၊ သူက…” ဟဲကျောင်းသည် အမျိုးသမီးကို ကြည့်ရင်း တုန့်ဆိုင်းတုန့်ဆိုင်းဖြင့် မေးလိုက်သည်။
“ငါ့မိတ်ဆွေပဲ၊ သူ့ကို လျှို့ယန်လို့ ခေါ်လို့ရတယ်” ရန်ကိုင်က ပြန်ပြောလိုက်သည်။
လျို့ယန်အား ညီအစ်နှစ်ဦးဖြင့် မိတ်ဆက်ပေးလိုက်သည့် အချိန်တွင် လျို့ယန်၏ မျက်ဝန်းအစုံး မသိမသာလေး တဖျက်ဖျက် တောက်ပသွားသည်ကို ရန်ကိုင် လုံးဝ သတိမပြုမိလိုက်ချေ။
“ဒီတော့ အစ်မလျို့ယန်ပေါ့။ ဒါဆိုရင် အစ်မကိုပဲ အလုပ်ရှုပ်စေရတော့မှာပေါ့နော်” လျို့ယန်တွင် ခန္ဓာရုပ်သွင် မရှိသော်ငြား တစ်ဖက်လူသည် အတော်လေး အသိဥာဏ် မြင့်မားသည့် သက်ရှိတစ်ဦး ဖြစ်နေသည့်အတွက် ဟဲကျောင်လည်း လောကဝတ်ကို နည်းနည်းလေးမှ မလျှော့ချရဲခဲ့ပေ။
“လျို့ယန် သခင်အမိန့်အတိုင်း လုပ်လိုက်ပါမယ်” လျို့ယန်သည် မည်သည့်အပိုစကားမှ ဆက်ပြောမနေခဲ့ချေ။
“အင်း၊ သွားတော့” ရန်ကိုင်က ခေါင်းညိတ်၍ ပြန်ပြောလိုက်သည်။ လျို့ယန်သည် ခေါင်းညိတ်လိုက်ပြီး အနက်ရောင်အလင်းတန်း တစ်ခုအသွင်သို့ ပြောင်း၍ ဟဲကျောင်ကိုယ်ထဲသို့ တိုးဝင်သွားခဲ့လေသည်။
စစချင်း ဟဲကျောင် ထိတ်လန့်သွားခဲ့သော်လည်း ချက်ချင်းပဲ အံ့အားသင့်သွားခဲ့လေသည်။
အကြောင်းမှာ သူမကိုယ်ထဲ ကိန်းအောင်းနေသော ကြောက်မက်ဖွယ်ရာ စွမ်းအားတစ်ရပ်ကို ခံစားမိလိုက်သည့် အတွက်ကြောင့် ဖြစ်ပေသည်။ ထိုစွမ်းအားသည် သူမ၏ ထိန်းချုပ်မှုအောက်တွင် ရှိမနေသည့် အပြင်ကိုမှ သူမအား အနည်းငယ် စိတ်မသက်မသာ ဖြစ်စေသော်လည်း ထိုစွမ်းအား၏ အကူအညီဖြင့်သာ ဆိုပါက သူမဆရာအား ကျိန်းသေ ကယ်တင်နိုင်လိမ့်မည်ဟု ယုံကြည်နေလေသည်။
ချက်ချင်းပဲ ရန်ကိုင်ဘက်သို့လှည့်၍ ကျေးဇူးတင်စကား ဆိုလိုက်လေသည် “ကျေးဇူးပဲ”
“သတိထားဦးနော်” ရန်ကိုင်က ပြုံးလျက် သတိပေးလိုက်သည်။
ဟဲကျောင်နှင့် ဟဲမြောင်သည် အကြည့်ချင်း ဖလှယ်လိုက်ပြီး ချက်ချင်း တိုက်ပွဲဖြစ်နေသည့်ဘက်ဆီသို့ ပြန်လှည့်ပြေးလေ၏။
လျို့ယန် ရှိနေပြီဖြစ်သည့်အတွက် ညီအစ်မနှစ်ဦး၏ လုံခြုံရေးကို စိတ်ပူနေစရာ မလိုတော့ချေ။ မီးတောက်ဂိုဏ်းမှ အာကာယံမိုးကြိုးမီးတောက်ကို စုပ်ယူပြီးသည့် အချိန်မှစ၍ လျို့ယန်၏ အသိဥာဏ်မှာ သာမန် လူတစ်ယောက်၏ အသိဥာဏ် အဖြစ်သို့ ဆင့်ကဲပြောင်းလဲသွားခဲ့သလို သူမ၏ ခွန်အားကိုမှာလည်း မြင့်မားလာခဲ့လေသည်။
အာကာယံမိုးကြိုးမီးတောက်ကို မဝါးမြိုခင်ကတည်းက လျို့ယန်သည် တန်ခိုးရှင်တတိယအဆင့်များကို ယှဉ်တိုက်နိုင်ခဲ့သည်။ အာကာယံမိုးကြိုးမီးတောက်ကို စုပ်ယူပြီးနောက်တွင်တော့ ပြောနေစရာပင် မလိုတော့။ တန်ခိုးရှင်ဘုရင် ပထမအဆင့် ကျင့်ကြံသူများနှင့်ပင် ယှဉ်ပြိုင်နိုင်နေလေပြီ။
တိုက်ပွဲတွင် တန်ခိုးရှင်ဘုရင်အဆင့်ဆို၍ လီမင်ဟိုင် တစ်ဦးတည်းသာ ရှိသည့်အတွက် မည်သူမှ လျို့ယန်၏ ပြိုင်ဘက် မဖြစ်နိုင်တော့ချေ။ လျို့ယန်နှင့်အတူ ပြန်ရောက်လာသော ဟဲကျောင်နှင့် ဟဲမြောင်သည် တိုက်ပွဲ အခြေအနေကို လုံးဝ အထက်အောက်ပြောင်းပြန် လှန်ပစ်နိုင်ပေလိမ့်မည်။
အတွေးများကို ပြန်စုစည်းလိုက်ပြီးနောက် ရန်ကိုင်သည် လီမင်ဟိုင်နှင့် ကုကျန်းရှင် တိုက်ပွဲအား ပြန်အာရုံစိုက်လိုက်၏။
သူတို့နှစ်ဦးကြား တိုက်ပွဲသည် အားလုံးထဲတွင် အပြင်းထန်ဆုံး ဖြစ်သည်။ ကုကျန်းရှင်နှင့် လက်ဝဲ၊ လက်ယာ ဓါးအစေခံတို့သည် သူတို့ကိုယ်သူ နေ၊လ၊ကြယ်ပုံရိပ်များဖြင့် ရစ်ပတ်လျက် သိပ်သည်းသော ဓါးလှိုင်းများကို ထုတ်ကာ လီမင်ဟိုင်အား တိုက်ခိုက်နေခဲ့ကြသည်။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၃၈)
လီမင်ဟိုင်နှင့် တိုက်ပွဲတွင် ကုကျန်းရှင် အခက် တွေ့လာနေခဲ့လေပြီ။
တိုက်ပွဲစစဉ်က ကုကျန်းရှင်နှင့် အမျိုးသမီးနှစ်ဦး ထုတ်သုံးခဲ့သည့် နေ၊လ၊ကြယ်တို့၏ ရောင်စဉ်သုံးခုမှာ အလွန်ကိုမှ တောက်ပပေသည်။ သို့သော်လည်း ယခုမူ ထိုပုံရိပ်သုံးခု၏ အရောင်အဝါမှာ တဖြည်းဖြည်းချင်း မှိန်ကျလာနေခဲ့သည်။
လီမင်ဟိုင်၏ ခွန်အားမှာမူ နည်းနည်းလေးမှ လျော့ကျသွားခြင်း မရှိချေ။
မည်သည့် အပြောင်းအလဲမှသာ ဖြစ်မလာခဲ့လျှင် ကုကျန်းရှင် ကျိန်းသေ ရှုံးနိမ့်သွားရပေတော့မည်။
နှစ်ဦးသား တိုက်ပွဲအပေါ်တွင် အာရုံစိုက်နေသည်ကို အခွင့်ကောင်းယူလျက် ရန်ကိုင်သည် တိုက်ပွဲ ဖြစ်နေရာဆီသို့ တဖြည်းဖြည်းချင်း ချဉ်းကပ်သွားလေသည်။
လက်ရှိ အချိန်ကြာသည်အထိ တန်ခိုးရှင်တတိယအဆင့်ဖြင့် တန်ခိုးရှင်ဘုရင်ပထမအဆင့်သို့ ရောက်နေသော လီမင်ဟိုင်အား ယှဉ်တိုက်နိုင်သည်မှာ တကယ်ကို အထင်ကြီးစရာ ကောင်းပေ၏။ နောက်ဆုံးအချိန်သို့ ရောက်သည်ထိတိုင်အောင် ကုကျန်းရှင် အနေဖြင့် လီမင်ဟိုင်အား ထိခိုက်ဒဏ်ရာ ကြီးကြီးမားမားရအောင် မလုပ်နိုင်လျှင်ပင် အနည်းဆုံး လီမင်ဟိုင်၏ ခွန်အားကို အတိုင်းအတာတစ်ခုအထိ လျော့ချနိုင်ပေလိမ့်မည်။
လီမင်ဟိုင်သာ ကုကျန်းရှင်အပေါ် အာရုံစိုက်နေသရွေ့ ရန်ကိုင် အနေဖြင့် ထိုအခိုက်အတန့်ကို အခွင့်ကောင်းယူနိုင်၏။
မကြာမီ ရန်ကိုင်သည် တိုက်ပွဲနှင့် ဆယ်မိုင် အတွင်းသို့ ရောက်လာခဲ့သည်။ ဤအကွာအဝေးသည် သူလာနိုင်သည့် အကန့်အသတ် ဖြစ်သည်။ သူသာ ဆက်တိုးသွားလျှင် လီမင်ဟိုင် ကျိန်းသေ သူ့အား သတိပြုမိသွားပေလိမ့်မည်။
ရန်ကိုင် သူ့ကိုယ်သူ နောက်တစ်ကြိမ် ပုန်းကွယ်လိုက်စဉ်မှာပဲ လီမင်ဟိုင်၏ အော်ဟစ်သံ ထွက်ပေါ်လာခဲ့လေသည် “သခင်လေး၊ မင်းဒီလောက်ပဲ တတ်နိုင်တာဆိုရင်တော့ နှုတ်ဆက်ပါတယ်”
ကုကျန်းရှင်ကမူ ဘာမှပြန်မပြောခဲ့ဘဲ တိုက်ပွဲအပေါ်၌သာ အာရုံစိုက်နေခဲ့သည်။ သူနှင့် လက်ဝဲ၊ လက်ယာ ဓါးအစေခံတို့ဆီမှ ထွက်ပေါ်နေသော ဓါးအလင်းတန်းသည် ရုတ်ချည်း တောက်ပလာပြီး မီတာထောင်နှင့်ချီ ရှည်လျားသော ဓါးတစ်ချောင်း အဖြစ်သို့ အသွင်ပြောင်းကာ လီမင်ဟိုင်၏ ဦးခေါင်းကို ခုတ်ပိုင်းချလေသည်။
ထိုအခြင်းအရာကို မြင်သည့်အခါ လီမင်ဟိုင်က အေးစက်စက် ရယ်မောလျက် “မတောက်တခေါက်လေးတွေ၊ အခုထိတောင် သခင်လေးက အကျိုးမဲ့တဲ့ အလုပ်ကို လုပ်ချင်နေသေးတာပဲ”
သူ့စကားသံ ဆုံးသွားသည်နှင့် ဝိဥာဉ်ဖျက်လှံသည် လီမင်ဟိုင်၏ လက်ထဲမှ ပျောက်ကွယ်သွားပြီး မီတာ ထောင်နှင့်ချီ ရှည်လျားသော ဓါးအလင်းတန်းအား သွားရောက် တားဆီးလေ၏။
အဖြူရောင်နှင့် အနက်ရောင်တို့ ထိပ်တိုက်တွေ့ရာမှ အားကောင်းသော စွမ်းအင်လှိုင်းများ ဖြာထွက်လာခဲ့လေသည်။ ထိုစွမ်းအင်လှိုင်းများကြောင့် အနီးအနားတွင် တိုက်ခိုက်နေကြသော တန်ခိုးရှင်အဆင့် ပညာရှင်များ နောက်သို့ ဆုတ်သွားကြရလေသည်။
စွမ်းအင်နှစ်ခုသည် မျှခြေ အခြေအနေတွင် ရှိနေခဲ့သော်ငြား မကြာမီတွင် မျှခြေမှာ ကျိုးပျက်သွားခဲ့လေသည်။
လီမင်ဟိုင်၏ ဝိဥာဉ်ဖျက်လှံ၏ စွမ်းအားမှာ ရုတ်ချည်း မြင့်တက်လာခဲ့ပြီး ဓါးအလင်းတန်းကို ဖိနှိပ်သွားခဲ့လေသည်။
ဘုန်း…
ဓါးအလင်းတန်း တစ်စစီ ပေါက်ကွဲထွက်သွားခဲ့ပြီး ပုံရိပ်သုံးခုသည် အဘက်ဘက်သို့ လွင့်ထွက်သွားကြ၏။
ကုကျန်းရှင်၏ မျက်နှာမှာ ဖြူလျော်နေပြီး သွေးစက်များ သူ့ပါးစပ်ထောင့်စွန်းမှ စီးကျနေခဲ့သည်။
လက်ဝဲ၊ လက်ယာ ဓါးအစေခံနှစ်ဦး၏ အခြေအနေမှာတော့ ပို၍ပင် ဆိုးသေးသည်။ နှစ်ဦးစလုံး အဆက်မပြတ် သွေးအန်နေကြရရာ သူတို့၏ ဝတ်ရုံများပင် သွေးချင်းနီသွားတော့လေသည်။
လီမင်ဟိုင်၏ မျက်ဝန်းထဲ ရက်စက်ကြမ်းကြုတ်သည့် အလင်းတန်းတို့ တဖျက်ဖျက် လက်သွားခဲ့သည်။ သို့သော် ထိုအခိုက်အတန့်ကို အခွင့်ကောင်းယူ၍ ကုကျန်းရှင်အား တိုက်ခိုက်ရန် မကြိုးစားဘဲ လက်ဝဲဘက်တွင် ရှိနေသော ဓါးအစေခံကိုသာ တိုက်ခိုက်လိုက်လေသည်။
လက်ရှိ အချိန်သည် ကုကျန်းရှင်အား သတ်နိုင်မည့် အခွင့်အရေးကောင်း တစ်ခုဖြစ်သော်လည်း ကုကျန်းရှင်သည် သာမန် ကျင့်ကြံသူတစ်ဦး မဟုတ်။ ထို့အပြင် သူ့တွင် ပင်လယ်ခြားနတ်ကြေးမုံကဲ့သို့သော အသက်ကယ်ရတနာတစ်ခု ရှိနေသေးသည်။ ထို့ကြောင့် ကုကျန်းရှင်အား တစ်ချက်တည်းဖြင့် သတ်နိုင်ဖို့ သိပ်မသေချာချေ။
သို့ဖြစ်သည့်အတွက် လက်ဝဲဓါးအစေခံကို တိုက်ခိုက်ရန်သာ ရွေးချယ်လိုက်လေသည်။ လက်ဝဲ ဓါးအစေခံသာ သေသွားသည်နှင့် ကုကျန်းရှင် အနေဖြင့် နေ၊လ၊ကြယ် ဓါးအလင်းတန်းကို ထုတ်သုံးနိုင်တော့လိမ့်မည် မဟုတ်ချေ။ ထိုအခါ အောင်ပွဲသည် အနှေးနှင့်အမြန် ဆိုသလို လီမင်ဟိုင်၏လက်ထဲ ရောက်လာပေလိမ့်မည်။
လီမင်ဟိုင် ဘာလုပ်ချင်နေသလဲ ဆိုသည်ကို သတိပြုမိလိုက်သည်နှင့် လက်ယာဓါးအစေခံသည် ချက်ချင်းပဲ သူတော်စင်ချီကို ကမန်းကတန်း စုစည်းလျက် ဓါးအလင်းတန်းကို ထပ်မံ စုစည်းကာ လက်ဝဲ ဓါးအစေခံဆီသို့ ပြေးသွားလေသည်။
ကုကျန်းရှင်ကလည်း အလျင်စလို လှမ်းအော်ဟစ်လိုက်၏ “လင်းယွဲ့၊ သတိထား”
တစ်ချိန်တည်းတွင် လက်ဝဲဓါးအစေခံဆီသို့ ပြေးသွားလေ၏။
ပုံရိပ်သုံးခုသည် လက်ဝဲဓါးအစေခံဆီသို့ တစ်ပြိုင်တည်း ပြေးဝင်သွားကြလေသည်။
လီမင်ဟိုင်၏ မျက်နှာထက် ညစ်ကျယ်ကျယ်အပြုံးတစ်ခု ထွက်ပေါ်လာခဲ့သည်။ အချိန်ကိုက်လောက်ပြီဟု ထင်သည်နှင့် ခန္ဓာကိုယ်ကို တစ်ချက်လှည့်လိုက်ပြီး ဝိဥာဉ်ဖျက်လှံအား လက်ယာဓါးအစေခံဆီသို့ ရုတ်တရက် ပစ်လွှတ်လိုက်လေသည်။
အကုန်လုံး ကြောင်သွားခဲ့သည်။
ယခုမှပဲ လီမင်ဟိုင်၏ ပစ်မှတ်သည် လက်ဝဲဓါးအစေခံ မဟုတ်ဘဲ လက်ယာဓါးအစေခံသာဖြစ်မှန်း အကုန်လုံး နားလည်သွားကြသည်။
ဝိဥာဉ်ဖျက်လှံသည် လီမင်ဟိုင်၏ လက်ထဲမှ လွတ်သွားသည်နှင့် တစ်ပြိုင်နက် ဧရာမမြွေကြီး တစ်ကောင်အဖြစ်သို့ ပြောင်းကာ လက်ယာဓါးအစေခံကို ပြေးကိုက်လေသည်။
ဤလက်နက်သည် အစစ်အမှန် တန်ခိုးရှင်ဘုရင်အဆင့် မှော်ရတနာတစ်ခုဖြစ်ကာ လက်ယာဓါးအစေခံ ခုခံနိုင်သည့် အရာမျိုး မဟုတ်ချေ။ သူမသာ ထိုတိုက်ခိုက်မှုကို ထိပ်တိုက် ရင်ဆိုင်ရလျှင် ကျိန်းသေ သေသွားပေလိမ့်မည်။
ထိုစဉ် ကုကျန်းရှင်၏ ခန္ဓာကိုယ် တဖျက်ဖျက် တောက်ပလာခဲ့ပြီး မူလနေရာမှ ပျောက်သွားကာ လက်ယာ ဓါးအစေခံရှေ့၌ ရုတ်တရက် ပေါ်လာခဲ့လေသည်။ တစ်ချိန်တည်းတွင် အကြွေးခွံလေးများဖြင့် ဖွဲ့စည်းထားသော မိုးပြာရောင်ကိုယ်ကြပ် အကာအကွယ်တစ်ခုသည် ကုကျန်းရှင်၏ ခန္ဓာကိုယ်ထက် ထွက်ပေါ်လာခဲ့လေသည်။
ထိုအကာအကွယ်ကို အသက်သွင်းလိုက်သည်နှင့် တစ်ပြိုင်နက် ကုကျန်းရှင်ပတ်လည်၌ စွမ်းအင် အကာအကွယ် တစ်ခု ဖြစ်ပေါ်လာခဲ့လေသည်။
ဧရာမမြွေကြီးသည် ကုကျန်းရှင်၏ အကာအကွယ်ကို ဝင်ရောက်တိုက်ခိုက်လေသည်။
အကာအကွယ်သည် အသက်နှစ်ရှိုက်စာသာ တောင်ခံနိုင်ခဲ့ပြီး ချက်ချင်း ပျက်စီးသွားခဲ့လေသည်။ မြေကြီး၏ လက်ကျန်စွမ်းအင်မှ လာရောက်ရိုက်ခတ်သည့်အတွက် ကုကျန်းရှင်သည် သွေးအပွက်ပွက်အန်ကာ လက်ယာအစေခံနှင့်အတူ လွင့်ထွက်သွားခဲ့လေသည်။
“သခင်လေးရဲ့စိတ်နေစရိုက်ကို ဒီလူအိုကြီး လေးစားမိတာတော့ အမှန်ပဲ။ ဒါပေမယ့် သခင်လေး… အခု အဲ့တစ်ယောက်ကို ကယ်လိုက်နိုင်ပေမယ့် နောက်တစ်ယောက်ကိုကော ကယ်နိုင်ဦးမှာလား” လီမင်ဟိုင်၏ လှောင်ပြောင်သံ ထွက်ပေါ်လာခဲ့လေသည်။
လွင့်ထွက်နေသော ကုကျန်းရှင်သည် ခေါင်းမော့၍ လှည့်ကြည့်လိုက်ရာ လီမင်ဟိုင်သည် သူ့လက်ဝါးထက် သူတော်စင်ချီကို စုစည်းရင်း လက်ဝဲဓါးအစေခံဆီသို့ ပျံသန်းသွားနေကြောင်း တွေ့လိုက်ရသည်။
ထိုလက်ဝါးဆီမှ အားကောင်းသော ဝဲဂယက်တစ်ခု ဖြစ်ပေါ်လာခဲ့လေသည်။
ဝဲကတော့၏ စွမ်းအားနှင့်တကွ နယ်ပယ်၏ စွမ်းအားကြောင့် လက်ဝဲဓါးအစေခံမှာ နည်းနည်းလေးမှပင် မလှုပ်ရှားနိုင်သည်အထိ ဖိနှိပ်ခံလိုက်ရလေသည်။
သို့သော် သေခြင်းတရား ရောက်လာနေသည့်တိုင် လက်ဝဲဓါးအစေခံသည် နည်းနည်းလေးမှ တုန်လှုပ်သွားခြင်းမရှိ။ ကုကျန်းရှင်ဆီသို့သာ စိုးရိမ်တကြီး လှမ်းကြည့်လိုက်သည်။ ကုကျန်းရှင် မသေသေးမှန်း တွေ့လိုက်ရမှပဲ စိတ်သက်သာရာရသွားဟန်ဖြင့် သက်ပြင်းတစ်ချက် ချလိုက်လေသည်။
ကုကျန်းရှင်၏ အသံကို မကြားရသော်ငြား သူမအား ထွက်ပြေးရန် လှမ်းပြောနေကြောင်း သိပေသည်။
“လီမင်ဟိုင်” ကုကျန်းရှင်သည် ဒဏ်ရာရထားသည့် သားရဲ တစ်ကောင်နှယ် လှမ်းအော်ဟစ်လိုက်သည်။ သူ့မျက်လုံးများ ဆိုလျှင်လည်း လုံးဝကို သွေးနီရောင်လွှမ်းနေခဲ့လေပြီ။
“သခင်လေး မြန်မြန် ထွက်ပြေးပေတော့” ကုကျန်းရှင်၏ လက်မောင်းထဲတွင် ရှိနေသော ဓါးအစေခံသည် ကုကျန်းရှင်၏ လက်မောင်းကို ခပ်တင်းတင်း ဆုပ်ကိုင်လျက် ဝမ်းနည်းတကြီး တောင်းဆိုလိုက်လသည် “လင်းယွဲ့က သခင်လေးကို ဒီမှာ သေစေချင်မှာ မဟုတ်ဘူး။ သခင်လေးသာ လွတ်သွားခဲ့ရင် လင်းယွဲ့လည်း သူသေတာကို နောင်တရမှာ မဟုတ်ဘူး။ မဟုတ်ရင် သူသေသွားခဲ့တာတောင် သခင်လေးကို မကာကွယ်နိုင်ခဲ့လို့ ဆိုပြီး နောင်တရနေမှာ”
ကုကျန်းရှင်လည်း ဘာလုပ်ရဘာကိုင်ရမှန်းမသိ ဖြစ်သွားခဲ့၏။ သို့သော် ထိုစဉ် ဒေါသထွက်နေသည့် သူ့မျက်နှာထက် အံ့အားသင့်နေသည့် အရိပ်အယောင်တို့ ထွက်ပေါ်လာခဲ့လေသည်။ သူ့အကြည့်သည် ချက်ချင်းဆိုသလို လီမင်ဟိုင်နောက်ဘက်သို့ ရောက်သွားခဲ့လေသည်။
ဘယ်အချိန်ကတည်းကမှန်းမသိ လီမင်ဟိုင် နောက်ဘက်၌ ပုံရိပ်တစ်ခု ပေါ်လာသည်ကို တွေ့လိုက်ရသည်။ ထိုလူသည် တစ္ဆေသရဲ တစ်ကောင်နှယ် လီမင်ဟိုင်ပင် သတိမပြုမိဘဲ လီမင်ဟိုင်နှင့် ဆယ်မီတာအတွင်းသို့ ချဉ်းကပ်လာနိုင်ခဲ့သည်။
ချက်ချင်းဆိုသလို ထိုလူငယ်လေးသည် သူ့လက်အား လေထဲ ဖြတ်ပိုင်းချလိုက်၏။ အနက်ရောင် လခြမ်းကွေးများစွာ အလျင်အမြန် ထွက်ပေါ်လာပြီး လီမင်ဟိုင်ဆီသို့ တိုးဝင်သွား၏။
အဝေးတွင် ရှိနေသည့်တိုင် ထိုဓါးသွားများဆီမှ ထူးခြား ဆန်းကြယ်သော စွမ်းအင်တစ်ရပ်ကို လီမင်ဟိုင် ခံစားမိနေခဲ့သည်။
ရန်ကိုင်မှ တိုက်ခိုက်လိုက်သည်နှင့် လီမင်ဟိုင်လည်း ချက်ချင်း သတိပြုမိသွားခဲ့လေသည် “ဘယ်သူလဲ”
ချက်ချင်းပဲ နောက်လှည့်၍ သူ့လက်ဝါးနှစ်ဖက်ကို ရှေ့တည့်တည့်သို့ ရိုက်ချလိုက်လေသည်။
ကုကျန်းရှင် အလွန်ကိုမှ ထိတ်လန့်စိတ်လှုပ်ရှားလာခဲ့သည်။ လီမင်ဟိုင်သည်၏ လက်ဝါးသည် ထိုလခြမ်းကွေးဓါးသွားများ၏ တိုက်ခိုက်မှုကို အပြည့်အဝ မတားဆီးနိုင်ခဲ့ချေ။ တားဆီးရင်း ခွေးအိုကြီးလီမင်ဟိုင်၏ လက်မောင်းမှ အသားစများ ရုတ်တရက် ပျောက်ကွယ်သွားခဲ့လေသည်။
သူ့လက်မောင်း တစ်စိတ်တစ်ပိုင်းသည် ဟင်းလင်းပြင်၏ အပြည့်အဝ ဝါးမြိုခြင်း ခံလိုက်ရလေသည်။
နာကျင်မှုကြောင့် အသိပြန်ဝင်လာချိန် လီမင်ဟိုင်သည် ဒေါသတကြီး အော်ဟစ်လျက် ဘာမှမဖြစ်သေးသော သူ့လက်အား ဆန့်ထုတ်၍ ဝိဥာဉ်ဖျက်လှံကို ပြန်ဆင့်ခေါ်လိုက်လေသည်။ သူ့အား တိုက်ခိုက်လိုက်သည့် လူငယ်လေးအား မီးတောက်မကြည့် အကြည့်ဖြင့် စိုက်ကြည့်ရင်း အော်ပြောလိုက်လေသည် “ဂျူနီယာ၊ မင်းသေဖို့ ပြင်ထားပေတော့”
“ခင်ဗျားမှာ အဲ့လို အခွင့်အရေး မရှိတော့ဘူး” လူငယ်လေးသည် အေးစက်စက် အမူအရာဖြင့် နှာခေါင်းရှုံ့လျက် အသွားမဲ့ အစိမ်းရောင်ဓါးရှည်တစ်ချောင်းကို ထုတ်ယူလိုက်၏။ ဓါးရှည်သည် တဝှီဝှီ မြည်ဟည်းလာပြီး အစိမ်းရင့်ရောင့် နဂါးတစ်ကောင်အဖြစ်သို့ ပြောင်းလဲလျက် လီမင်ဟိုင်အား ခုန်အုပ်လေသည်။
နဂါးဟိန်းသံသည် အာကာယံတစ်ခွင် မြည်ဟည်းသွား၏။ လီမင်ဟိုင်လည်း ထူးထူးဆန်းဆန်း အော်ဟစ်ရင်း သူတော်စင်ချီကို အသည်းအသန် လှည့်ပတ်၍ ဝိဥာဉ်ဖျက်လှံအား ဧရာမမြေကြီး တစ်ကောင်အဖြစ်သို့ ပြောင်းလဲပစ်လိုက်လေသည်။
မွန်းစတားနှစ်ကောင် ထိပ်တိုက်တွေ့သွားခဲ့သည်။ သို့သော်ငြား မြွေပေါက်တစ်ကောင်မှ နဂါးတစ်ကောင်အား မည်ကဲ့သို့ ယှဉ်ပြိုင်အံတုနိုင်မည်နည်း။ အသက်တစ်ရှိုက်စာ အတွင်းမှာပင် မြွေကြီးသည် နဂါးလက်ချက်ကြောင့် တစ်စစီ ပျက်စီးသွားခဲ့ရလေသည်။
ယခုမှပဲ လီမင်ဟိုင် စတင် ကြောက်ရွံ့လာလေတော့သည်။ သူ့အား တိုက်ခိုက်လိုက်သည့်လူကို လိုက်ရှာသော်ငြား မည်သို့မှ ရှာမတွေ့ခဲ့ချေ။ ထူးဆန်းသော နဂါးမှော်ရတနာကို ထုတ်ယူပြီးသည်နှင့် လူငယ်လေးသည် တစ္ဆေတစ်ကောင်နှယ် ပြန်လည် ပျောက်ကွယ်သွားခဲ့သည်။
ရုတ်တရက် သူ့နောက်ဘက်မှ သိပ်သည်းလှသော သတ်ဖြတ်လိုစိတ်တို့ ထွက်ပေါ်လာသဖြင့် လီမင်ဟိုင် ရင်ထိတ်သွားပြီး တိုးဝင်လာနေသည့် ဘာမှန်းမသိရသော တိုက်ခိုက်မှုကို တားဆီရလိုရငြား နယ်ပယ်စွမ်းအားကို အလိုလို ထုတ်လွှတ်လိုက်လေသည်။
တိုက်ခိုက်မှုမှာ တစ်ခဏတာ ဖြစ်သော်ငြား သူ့အား တိုက်ခိုက်လူသည့် လူငယ်လေးမှာ တန်ခိုးရှင်တတိယအဆင့်သာ ရှိသေးကြောင်း လီမင်ဟိုင် သတိပြုမိလိုက်သည်။ ထိုကဲ့သို့သော တန်ခိုးရှင်အဆင့်များနှင့် ရင်ဆိုင်ရသော် နယ်ပယ်သည် အကောင်းဆုံး ရွေးချယ်မှုတစ်ရပ် ဖြစ်သည်။
အကုန်လုံးသည် ကုကျန်းရှင်ကဲ့သို့ ရေပြင်ခြားနတ်ကြေးမုံကို ပိုင်ဆိုင်ထားသူများ မဟုတ်ချေ။
လီမင်ဟိုင်သည် အကောင်းဆုံး တန်ပြန်တိုက်ခိုက်မှုကို ပြုလုပ်ခဲ့သော်ငြား သူ့နယ်ပယ်ကို ဖြန့်ကျက်လိုက်သည့် အချိန်မှာပဲ အားကောင်းသော ရှီစွမ်းအင်နှင့် သွားရင်ဆိုင်ရလေသည်။ ထိုစွမ်းအင်ကို သူ့နယ်ပယ်စွမ်းအင်မှ မဖိနှိပ်နိုင်ခဲ့ဘဲ ယှဉ်ပြိုင် တိုက်ခိုက်ရုံသာ တတ်နိုင်ခဲ့သည်။
ထိုရှီစွမ်းအင်ထဲ ဆန်းကြယ်သော စွမ်းအင်တစ်ရပ် ပေါင်းစပ်ပါဝင်နေခဲ့သည်။
ပတ်ပတ်လည် လေဟာနယ်တစ်ခုလုံး ပြိုကျလာခဲ့ပြီး မရေမတွက်နိုင်သော ဟင်းလင်းပြင် အက်ကွဲကြောင်းလေးများ ဖြစ်ပေါ်လာကာ လီမင်ဟိုင်လည်း ထိုအက်ကြောင်းများထဲ အလိုလို ပိတ်မိသွားခဲ့ရလေသည်။
“လေဟာနယ်စွမ်းအား” လီမင်ဟိုင် အလန့်တကြား ထအော်လေသည်။
ထိုစဉ် မြွေပေါက်စကို ကြိတ်ချေပြီးသော အစိမ်းရောင် နဂါးသည် လီမင်ဟိုင်အား ကိုက်ချလာခဲ့လေသည်။
တစ်ချိန်တည်းတွင် သူ့ကျောဘက်မှ အားကောင်းသော သတ်ဖြတ်လိုစိတ်ဖြင့် ပြည့်နေသော အေးစက်မှုတစ်ခုသည် ဒီရေလှိုင်းလုံးများနှယ် လီမင်ဟိုင်အား လာရောက် ရိုက်ခတ်လေသည်။
လီမင်ဟိုင် ပြေးပေါက်ပိတ်သွားခဲ့လေပြီ။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၃၉)
“ခွေးအိုကြီး” ကုကျန်းရှင်သည် နေမီးလျှံနှယ် တလက်လက် တောက်ပနေသော ဓါးအလင်းတန်းကို ကိုင်စွဲရင်း လီမင်ဟိုင်ဆီသို့ ပြေးဝင်လာလေသည်။
တစ်ချိန်တည်းတွင် ရွှေရောင်အလင်း တဖျက်ဖျက် တောက်ပလာပြီး ပတ်ပတ်လည် ဟင်းလင်းပြင်တစ်ဝိုက်တွင် ရွှေရောင်သွေးမျှင်များ ရုတ်တရက် ထွက်ပေါ်လာခဲ့လေသည်။
လီမင်ဟိုင်၏ ခန္ဓာကိုယ်အား ဝန်းရံထားဟော လေဟာနယ် အက်ကွဲကြောင်းတို့မှာလည်း ပို၍ ကြီးမားလာခဲ့သည်။ ရုတ်ချည်း ဆိုသလို လီမင်ဟိုင် ရှိနေသည့် နေရာတစ်ခုလုံး ချောက်ခြားဖွယ်ရာ သေမင်းတမန် တိုက်ခိုက်မှုများဖြင့် ပြည့်နှက်သွားလေတော့သည်။
လီမင်ဟိုင် ရှိနေသည့် နေရာမှ မျက်စိကျိန်းမတတ် အလင်းတန်းများနှင့်အတူ အလွန်အားကောင်းသော အဖျက် စွမ်းအင်လှိုင်းများ ဖြာထွက်လာခဲ့လေသည်။
ကုကျန်းရှင်သည် ယခင်တစ်ကြိမ်ထက်ပင် ပိုမို မြန်ဆန်သော အရှိန်ဖြင့် လွင့်စင်ထွက်လာခဲ့သည်။ လက်ယာ ဓါးအစေခံသည် ထိုကဲ့သို့ ဖြစ်မည်ကို ကြိုသိထားသည့်အလား စောင့်ကြို၍ ကုကျန်းရှင်ကို လှမ်းဖမ်းထားလိုက်လေသည်။
“သခင်လေး” လက်ယာဓါးအစေခံသည် စိုးရိမ်တကြီးဖြင့် ကုကျန်းရှင်အား ကြည့်လိုက်သည်။
ကုကျန်းရှင်ကမူ ပြန်မဖြေသေးဘဲ လီမင်ဟိုင် ရှိနေသည့် နေရာတည့်တည့်သို့သာ စိုက်ကြည့်နေခဲ့သည်။
လီမင်ဟိုင် သေသွားသလား၊ မသေဘူးလား ဆိုသည်ကို သူမသိသော်ငြား သူ့ဓါးဖြင့် လီမင်ဟိုင်၏ ခန္ဓာကိုယ်အား ထိုဖောက်မိလိုက်သည်မှာတော့ သေချာပေသည်။
သို့ရာတွင် လီမင်ဟိုင်သည် တန်ခိုးရှင်ဘုရင်အဆင့် ကျင့်ကြံသူတစ်ဦး ဖြစ်နေသည်။ သူ့တစ်သက်နှင့်တစ်ကိုယ် တန်ခိုးရှင်ဘုရင်အဆင့် ကျင့်ကြံသူနှင့် ပထမဦးဆုံး သူသေကိုယ်သေ တိုက်ပွဲကို ဆင်နွှဲဖူးခြင်းလည်း ဖြစ်သည်။ ထို့ကြောင့် သူ့မျက်စိနှင့် မမြင်ရသေးသရွေ့ လီမင်ဟိုင် သေပြီဟု မယုံကြည်ရဲသေးချေ။
အလင်းတန်းများ ပျောက်ကွယ်သွားပြီးနောက်တွင် ပုံရိပ်တစ်ခု ထွက်ပေါ်လာခဲ့သည်။
ကုကျန်းရှင်၏ မျက်လုံးများ မှေးစဉ်းသွားခဲ့လေသည်။
လီမင်ဟိုင် မသေသေးချေ။
ဤမျှ ကြောက်မက်ဖွယ် တိုက်ခိုက်မှုများကို ခံလိုက်ရသည့်တိုင် လီမင်ဟိုင် သေမသွားခဲ့ပေ။ သို့ရာတွင် အားကောင်းသော တိုက်ကွက်များကို တရစပ် ဆင့်ခံလိုက်ရသည့်အတွက် လီမင်ဟိုင် အတော်လေး ဒုက္ခရောက်သွားသည်ဟု ပြော၍ရပေသည်။ အရေးကြုံမှ သူကောက်ထုတ်သုံးလိုက်သည့် အကာအကွယ် မှော်ရတနာ ဆိုလျှင် ပျက်စီးခါနီးပင် ဖြစ်နေခဲ့လေပြီ။
ကုကျန်းရှင် ဝမ်းသာသွားရသည့် အချက်မှာ လီမင်ဟိုင်သည် မသေသေးသော်ငြား သူရထားသည့် ဒဏ်ရာများမှာ ပေါ့သေးသေး မဟုတ်သည့် အချက်ပင်။ ခန္ဓာကိုယ်အနှံ့မှ သွေးများ အဆက်မပြတ် စီးကျနေပြီး အရိုးထိနက်သော ဒဏ်ရာများစွာလည်း ခန္ဓာကိုယ်အနှံ့ ရှိနေခဲ့သည်။
လီမင်ဟိုင်မှာမူ ဒေါသလည်းထွက်၊ ကြောက်လည်း ကြောက်မိနေခဲ့သည်။
သေမင်းနှင့် လက်တစ်ကမ်း အကွာကို ရောက်သွားခဲ့သဖြင့် သူတကယ်ကို ကြောက်လန့်သွားခဲ့ခြင်း ဖြစ်သည်။
သေမင်းတမန် တိုက်ခိုက်မှုများမှ လွတ်လာသည်နှင့် လီမင်ဟိုင်သည် ကုကျန်းရှင်နှင့် လက်ယာဓါးအစေခံအား တစ်ချက် လှမ်းကြည့်လိုက်ပြီး ပတ်ဝန်းကျင်ကို စတင် စစ်ဆေးလေ၏။
“ဂျူနီယာ၊ မင်းနဲ့ငါတစ်နေ့ ပြန်တွေ့ကြတာပေါ့ကွာ” ပြောပြီးသည်နှင့် လီမင်ဟိုင်သည် နောက်ပင် လှည့်မကြည့်တော့ဘဲ ချက်ချင်း လှည့်ထွက်ပြေးလေသည်။
“သူလွတ်သွားလို့ မဖြစ်ဘူး” ကုကျန်းရှင်သည် အမောတကော အသက်ရှူရင်း လှမ်းအော်ပြောလိုက်သည်။
သူ့အသံ ဆုံးသွားသည်နှင့် တစ်ပြိုင်နက် ဟင်းလင်းပြင်ထဲမှ အရောင်ငါးသွယ်ချီစွမ်းအင်တို့ ပေါက်ကွဲထွက်လာပြီး ဓါးတစ်ချောင်း အသွင်သို့ပြောင်းကာ လီမင်ဟိုင်ဆီသို့ တိုးဝင်သွားလေသည်။
လီမင်ဟိုင်လည်း ကြောက်လန့်တကြားနှင့် အကာအကွယ် ပညာရပ်တစ်ခုကို ထုတ်သုံးလိုက်သည်။
သို့ရာတွင် လက်ရှိ လီမင်ဟိုင်သည် လမ်းဆုံးသို့ ရောက်နေပြီ ဖြစ်သော မြှားတစ်ချောင်းသဖွယ် ဖြစ်နေသဖြင့် သူဖန်တီးလိုက်သည့် အကာအကွယ်သည် အရောင်ငါးသွယ်ဓါးအား တစ်ခဏသာ တားဆီးလိုက်နိုင်ခဲ့သည်။ ဓါးသည် အကာအရံကို ချိုးဖျက်ပြီးသည်နှင့် လီမင်ဟိုင်၏ ခန္ဓာကိုယ်ကို ဆက်လက် ထိုးဖောက်ကာ ဟင်းလင်းပြင်ထဲ တိုးဝင် ပျောက်ကွယ်သွား၏။
လီမင်ဟိုင်၏ မျက်လုံးအပြူးသား ဖြစ်နေသော ခန္ဓာကိုယ်သည်သာ မလှုပ်မယှတ် ကျန်ရစ်ခဲ့လေသည်။
အသက်စွမ်းအင်တို့ ယုတ်လျော့ပျောက်ကွယ်သွားခဲ့ပြီး မျက်လုံးထဲရှိ အလင်းရောင်မှာလည်း မှိန်ကျသွားခဲ့သည်။
အစစ်အမှန်တန်ခိုးရှင်ဘုရင်အဆင့် ကျင့်ကြံသူတစ်ဦး ဤနေရာ၌ သေဆုံးသွားခဲ့ရလေပြီ။
ကုကျန်းရှင်မှာတော့ အခြေအနေကို သေချာမသိသေး။ ဒဏ်ရာမှာ အတော်လေး ပြင်းထန်သဖြင့် အလျင်စလို မလှုပ်ရှားရဲဘဲ လီမင်ဟိုင်၏ ခန္ဓာကိုယ်ကိုသာ မမှိတ်မသုံ စိုက်ကြည့်နေခဲ့သည်။ မကြာမီ တုန်တုန်ရီရီ ဖြစ်နေသော လက်ယာဓါးအစေခံသည် လီမင်ဟိုင်၏ ခန္ဓာကိုယ်ကို သွားစစ်ဆေးပြီး ကုကျန်းရှင်အား ဝမ်းသာတကြီးဖြင့် ပြန်လာပြောပြလေသည်။
“ဘယ်လိုလဲ”
“လီမင်ဟိုင် သေသွားပြီ” လက်ယာဓါးအစေခံက ပြန်ပြောလိုက်သည်။
ထိုအခါမှပဲ ကုကျန်းရှင် သက်ပြင်း အမောကြီး ချလိုက်နိုင်လေသည်။ နောက်ဆုံး အားတင်းခံထားသော သူ့ခန္ဓာကိုယ်သည် လက်ယာဓါးအစေခံပေါ်သို့ လဲကျသွား၏။ အမောတကော အသက်ရှူရင်းမှ ဖြည်းဖြည်းချင်း ပြောလိုက်၏ “ကောင်းတယ်၊ ကောင်းတယ်၊ သူသေသွားတာ တကယ် ကောင်းတယ်”
“သခင်လေး၊ ခုဏတုန်းကလူက…” လက်ယာဓါးအစေခံက သင်္ကာမကင်း အမူအရာဖြင့် မေးလိုက်သည်။
“ငါတို့ ဓါးအဖွဲ့အစည်းက မဟုတ်ဘူး” လီမင်ဟိုင်သည် ဆေးလုံးအချို့ကို ပါးစပ်ထဲ ပစ်ထည့်ရင်းမှ “သူ့ကိစ္စ ခဏ ထားလိုက်ဦး။ ငါတို့လူတွေကို အရင်သွားကူရမယ်။ လီမင်ဟိုင် ခေါ်လာတဲ့ ပညာရှင်တွေက နည်းတာမဟုတ်ဘူး။ ငါတို့သာ သွားမကူရင် သူတို့…”
တိုက်ပွဲဖြစ်နေရာဆီသို့ အကြည့်ရောက်သွားသည့် အခိုက် ကုကျန်းရှင်၏ ပြောလက်စစကားများ လည်ချောင်းဝတွင် တစ်ဆို့သွားခဲ့လေသည်။
တိုက်ပွဲသည် သူထင်ထားသလို ဟုတ်မနေခဲ့ပေ။ သူ့ဘက်မှ ကျင့်ကြံသူများစွာမှာ အသက်ရှင်နေသေးသော်ငြား လီမင်ဟိုင် ခေါ်လာသည့် ပညာရှင်များစွာမှာတော့ သေသူကသေ၊ ဒဏ်ရာ အကြီးအကျယ်ရသူကရနှင့် ဒုက္ခရောက်နေကြသည်။ အစောပိုင်းက လီမင်ဟိုင်နှင့် တိုက်ခိုက်ရာတွင်သာ အာရုံစိုက်နေခဲ့သဖြင့် လက်ရှိ တိုက်ပွဲရလဒ်သည် သူ့အား အတော့်ကိုမှ အံ့အားသင့်စရာ ဖြစ်နေခဲ့သည်။
လီမင်ဟိုင်သည် သူ့အား ချုံခိုတိုက်ခိုက်ရန် ရည်ရွယ်ထားသဖြင့် အားလုံးကို ကြိုတင်ပြင်ဆင်ထားလောက်၏။ သူ့အနေဖြင့် လီမင်ဟိုင်ကို ကံကောင်းပြီး သတ်နိုင်ခဲ့ခြင်းမှာ သူစိမ်းလူ၏ အကူအညီကြောင့်သာ ဖြစ်သည်။ မဟုတ်လျှင် သူလည်း သေနေလောက်ပြီ။
သို့သော်လည်း တိုက်ပွဲကို ကြည့်နေရင်းမှ ဘာကြောင့် ထိုကဲ့သို့ ဖြစ်နေရသလဲ ဆိုသည်ကို နားလည်သွားခဲ့သည်။
ရွှယ်ရှီနှင့် သူ့တပည့်နှစ်ဦးကြောင့် တိုက်ပွဲရလဒ် ဤကဲ့သို့ ဖြစ်နေရခြင်း ဖြစ်သည်။
ရွှယ်ရှီ၊ ဟဲကျောင်နှင့် ဟဲမြောင်တို့ကို ကုကျန်းရှင် တွေ့ဖူးပေသည်။ ရွှယ့်ရှီသည် တန်ခိုးရှင်အဆင့် ကျင့်ကြံသူ တစ်ဦး ဖြစ်ပေသည်။
လက်ရှိတွင် ဆရာတပည့်သုံးဦးသည် ရန်သူအားလုံးအား သူတို့ တစ်ဖွဲ့တည်းဖြင့် ပြန်လှန် တွန်းလှန်တိုက်ခိုက်နေခဲ့သည်။ ပုံမှန်အားဖြင့် ရန်သူများသည် သူတို့ထက် ပိုမို အားကောင်းသင့်သော်ငြား ကြည့်ရသလောက်တော့ တိုက်ပွဲ တစ်ခုလုံးသည် ဆရာတပည့်သုံးဦး၏ ထိန်းချုပ်မှုအောက်တွင်သာ အပြည့်အဝ ရှိနေခဲ့လေသည်။
တိုက်ပွဲစသည်နှင့် ဟဲကျောင်၏ ခန္ဓာကိုယ်ဆီမှ အနီရောင်အလင်းတန်းတစ်ခု ပေါက်ကွဲထွက်လာပြီး ကျင့်ကြံသူ တစ်ဦး ရှင်းပြမရစွာ သေဆုံးသွားလေသည်။
အဲ့အနီရောင်အလင်းတန်းက ဘာကြီးလဲ သူ့လက်အောက်ငယ်သားများထဲတွင် ထိုကဲ့သို့ စွမ်းနိုင်သော ကျင့်ကြံသူတစ်ဦး ရှိနေလိမ့်မည်ဟု ကုကျန်းရှင် မထင်ထားခဲ့ပေ။
လီမင်ဟိုင်လည်း သေသွားပြီ ဖြစ်သဖြင့် လက်ရှိ အခြေအနေအရ တိုက်ပွဲရလဒ်မှာ ဆုံးဖြတ်ပြီးသွားလေပြီ။ လီမင်ဟိုင် ခေါ်လာသည့် ကျင့်ကြံသူများမှာ လက်ရှိတွင် ခြေဦးတည့်ရာ ထွက်ပြေးနေကြပြီး လီမင်ဟိုင်၏ လက်အောက်ငယ်သားများမှာမူ ထိုလူများကို လိုက်လံ တိုက်ခိုက်သတ်ဖြတ်နေကြလေသည်။
လက်ရှိ တိုက်ပွဲရလဒ်ကို မြင်ပြီးနောက် ကုကျန်းရှင် စိတ်သက်သာရာ ရသွားခဲ့သည်။ လက်သီးဆုပ်၍ လှမ်းကာ အော်ပြောလိုက်လေသည် “ရောင်းရင်းရဲ့ နာမည်ကို သိလို့ရမလား။ အခုလို ကျုပ်အသက်ကို ကယ်ပေးတဲ့အတွက် ဒီကု အရမ်းကို ကျေးဇူးတင်ပါတယ်။ အဆင်ပြေရင် ထွက်လာပြီး ကျုပ်နဲ့ တွေ့လို့ရပါလား”
“ဟားဟား၊ အဖွဲ့အစည်းသခင်လေးက အရမ်း ယဉ်ကျေးနေတာပါပဲလား” အနီအနားမှ ရယ်မောသံတစ်သံ ထွက်ပေါ်လာသဖြသ်ြ လှည့်ကြည့်လိုက်ရာ အစောပိုင်း တိုက်ပွဲက မြင်ဖူးလိုက်သလို ထင်ရသော်ငြား စိတ်ထဲ မမှတ်မိနိုင် ဖြစ်နေသော လူငယ်လေးကို တွေ့လိုက်ရလေသည်။
လက်ဝဲ၊ လက်ယာ ဓါးအစေခံနှစ်ဦးသည် ရန်ကိုင်အား ကျေးဇူးတင်တကြီး ကြည့်လိုက်သည်။
ရန်ကိုင်ကြောင့်သာ မဟုတ်လျှင် သူတို့အားလုံး လီမင်ဟိုင် လက်ထဲ သေသွားလောက်ပေပြီ။ ထို့ကြောင့် တိုက်ပွဲ အခြေအနေကို ပြောင်းလဲပေးခဲ့သော ရန်ကိုင်အား လက်ဝဲ၊ လက်ယာ ဓါးအစေခံနှစ်ဦးစ အလွန်ကိုမှ ကျေးဇူးတင်နေကြ၏။
ကုကျန်းရှင်သည် ရန်ကိုင်အား သေသေချာချာ လေ့လာကြည့်နေသည်။ ရန်ကိုင်သည် သူအာရုံခံမိလိုက်သလိုပင် တန်ခိုးရှင်တတိယအဆင့်သာ ရှိသေးသည်။ သို့သော်လည်း ထိုလူငယ်လေး ပြသသွားသော တိုက်ပွဲစွမ်းရည်မှာ တန်ခိုးရှင် တတိယအဆင့်ထက်ကို အများကြီး ကျော်လွန်ပေသည်။
လက်ဝဲ၊ လက်ယာအစေခံနှင့် ပူးပေါင်းလိုက်လျှင်ပင် ထိုလူငယ်လေး၏ ပြိုင်ဘက် မဟုတ်လောက်ဟု စိတ်ထဲ အလိုလို တွေးမိလိုက်သည်။ ထိုအတွေး ခေါင်းထဲ ပေါ်လာသည်နှင့် ကုကျန်းရှင် အလွန်ကို ထိတ်လန့်တုန်လှုပ်သွားခဲ့လေသည်။
ဓါးအဖွဲ့အစည်း၏ သခင်လေးတစ်ဦး ဖြစ်သည်နှင့်အညီ သူသည် ငယ်စဉ်ကတည်းက သာမန်လူများ အိမ်မက်မက်ရုံသာ တတ်နိုင်သော အရင်းအမြစ်များ၊ လေ့ကျင့်မှုများကို ရရှိခဲ့သည်။ ထို့အပြင် သူသည် ပျော်ပါးသောက်စားဖို့သာ သိသော လူပျက် သခင်လေးတစ်ဦး မဟုတ်၊ သူ့တွင် မြင့်မားသော ရည်မှန်းချက်တို့ ရှိသည်။ ငယ်စဉ်ကတည်းက ကျင့်ကြံရာတွင်လည်း တစ်ခါမှ ပျင်းရိခဲ့ခြင်း မရှိပေ။
ကြယ်စီရင်စုထဲတွင် တန်ခိုးရှင်အဆင့်ချင်း အတူတူကို သူ့အား ယှဉ်နိုင်သည့်လူ အနည်းငယ်လောက်သာ ရှိလိမ့်မည်ဟု ယုံကြည်ထားသည်။
ယနေ့တွင် တစ်ယောက် တွေ့ခဲ့လေပြီ။ အဆင့်တူချင်းတွင် သူ့အား အလွန်ပြင်းထန်သော ဖိအားကို ခံစားရစေသည့် ကျင့်ကြံသူ တစ်ဦးပင်။
“တတိယသခင်လေးရွှယ့်ယွယ်လား မသိဘူး” ကုကျန်းရှင်က မယုံသင်္ကာဖြင့် မေးလိုက်သည်။
ရန်ကိုင်မျက်နှာ မဲ့သွားခဲ့လေသည် “ကျုပ်က အဲ့မိန်းမလျာလို ကောင်နဲ့ တူလို့လား”
ကုကျန်းရှင် ဘာဆက်ပြောလို့ ပြောရမှန်းမသိ ဖြစ်သွားခဲ့သည်။ လက်ဝဲလက်ယာဓါးအစေခံတို့မှာ ဝါးလုံးကွဲ အော်မရယ်လိုက်သော်ငြား လက်ဝဲဓါးအစေခံမှာတော့ ပါးစပ်လေးကို လက်ဖြင့်အုပ်လျ် တခစ်ခစ် ရယ်မောနေလေ၏။
“တောင်းပန်ပါတယ်။ ဒီကု၊ သခင်လေးရွှယ့်ယွယ်နဲ့ မတွေ့တာကြာတော့ သူ့မျက်နှာကို သေချာ မမှတ်မိတော့ဘူး ဖြစ်သွားတယ်” ကုကျန်းရှင်က ရှင်းပြလိုက်သည် “ရွှယ့်ယွယ် မဟုတ်ဘူးဆိုရင် ကျိတုန်လား”
“ကျိတုန်က ဘယ်သူလဲ” ရန်ကိုင်က နားမလည်နိုင်ဟန်ဖြင့် ပြန်မေး၏။
“ခရမ်းကြယ်ရဲ့ သခင်လေးလေ…” ကုကျန်းရှင် စဉ်းစားရနေလေပြီ။
“ကြည့်ရတာ အဖွဲ့အစည်းသခင်လေးက အခြား အင်အားစုကြီးတွေက သခင်လေးတွေကိုပဲ အဆင့်တူအဖြစ် သတ်မှတ်ထားတာနဲ့ တူတယ်” ရန်ကိုင်က ကုကျန်းရှင်အား ပြုံးလျက် ကြည့်လိုက်လေသည်။
“မဟုတ်ပါဘူး” ကုကျန်းရှင်က အလေးအနက် အမူအရာဖြင့် “ပုံမှန်ဆိုရင် အင်အားစုကြီးတစ်ခုရဲ့ အကူအညီမပါဘဲ ဒီလောက်ထိ အားကောင်းနိုင်တဲ့လူက မရှိသလောက်ကို ရှားတာ။ ဒါကြောင့် မသင့်တော်သလို ဖြစ်သွားရင် တောင်းပန်ပါတယ်”
“ဘာမှမဖြစ်ပါဘူး” ရန်ကိုင်က ယဲ့ယဲ့လေးပြုံးလျက် “ကျုပ်က ဘယ်အင်အားစုကြီးကမှ မဟုတ်ဘူး။ ကျုပ်နာမည်က ရန်ကိုင်ပဲ”
ရန်ကိုင်ဆိုသည့် နာမည်ကို ကုကျန်းရှင် တစ်ခါမှ မကြားဖူးချေ။ ရန်ကိုင်သည် မည်သည့် အင်အားစုကြီးကမှ မဟုတ်မှန်း သိလိုက်ရသည့်နောက်တွင် ကုကျန်းရှင် ပို၍ အံ့အားသင့်သွားခဲ့လေသည်။
အလေးအနက်အမူအရာဖြင့် လက်သီးဆုပ်၍ ယဉ်ယဉ်ကျေးကျေး ပြန်ပြောလိုက်လေသည် “ဒီတော့ ရောင်းရင်းရန်ပေါ့”
ရန်ကိုင်က ခေါင်းညိတ်လိုက်ပြီး အဆုံးသတ်သွားပြီဖြစ်သော တိုက်ပွဲအား လှမ်းကြည့်လိုက်သည်။ လျို့ယန်၏ အကူအညီဖြင့် လီမင်ဟိုင်၏ လက်အောက်ငယ်သားအားလုံး တမလွန်ဘဝသို့ အလကား ရောက်ရှိခွင့် ရသွားခဲ့လေပြီ။ အသက်ရှင်ကျန်ရစ်ပြီး လွတ်မြောက်သွားသည့်လူ တစ်ယောက်မှ မရှိချေ။
“ရောင်းရင်းရန်၊ ဒီကု မေးခွန်းတစ်ခုလောက် မေးချင်လို့၊ အဆင်ပြေမလားမသိဘူး” ကုကျန်းရှင်က ရုတ်တရက် ပြောလိုက်သည်။
“ကျုပ်ဒီနားက ဖြတ်သွားတုန်းက အဲ့လီမင်ဟိုင်ဆိုတဲ့လူက ဘာမပြောညာမပြောနဲ့ ဗြုန်းစားကြီး ပေါ်လာပြီး ကျုပ်ကို သတ်ဖို့ လုပ်တယ်။ ဒါကြောင့် မကျေနပ်တာနဲ့ ကျုပ်လည်း ဒီနားမှာ ပုန်ပြီး သူ့ကို ပြန်သတ်ဖို့လုပ်တာပဲ” ရန်ကိုင်က ကုကျန်းရှင် ဘာကို မေးချင်နေလဲ သိသည့်အလား တန်းပြောလိုက်လေသည်။
“ရောင်းရင်းရန်က သတ္တိရှိတာတင် မဟုတ်ဘူး။ တကယ်ကိုလည်း အားကောင်းတာပဲ” ကုကျန်းရှင် မျက်ခုံးပင့်သွားခဲ့သည်။
သာမန် တန်ခိုးရှင်အဆင့်တစ်ဦးသာ ဆိုလျှင်တော့ တန်ခိုးရှင်ဘုရင်အဆင့်တစ်ဦး၏ အလစ်အငိုက် ချောင်းမြောင်း တိုက်ခိုက်ခြင်း ခံလိုက်ရသည့်အချိန်တွင် ထွက်ပြေးရန်သာ ရွေးချယ်ပေလိမ့်မည်။ မကျေနပ်လျှင်ပင် အံကြိတ်ပြီး ဒေါသကို မြိုသိပ်ကာ ခေါင်းလှည့်၍ ထွက်သွားမည်သာ။ ရန်ကိုင်ကဲ့သို့ ပြန်လာပြီး တိုက်ခိုက်ရန် ကြိုးစားသည့်လူဆို၍ အနည်းငယ်သာ ရှိပေလိမ့်မည်။
ထိုကဲ့သို့ လုပ်ရဲသည့်လူများသည် ဘာဆိုဘာမှ မကြောက်သည့် လူများဖြစ်လျှင်ဖြစ် မဖြစ်လျှင် သူတို့တွင် အားကိုးအားထား ပြုစရာ တစ်ခုခု ရှိနေသည့် အတွက်ကြောင့် ဖြစ်ပေသည်။
ရန်ကိုင်သည် ဒုတိယအမျိုးအစားထဲတွင် ပါဝင်ပေသည်။ ကြည့်ရသလောက် ယခင်တိုက်ပွဲတွင် သူ့ခွန်အားကုန်ကို ထုတ်မသုံးသွားသည့်ပုံပင်။
ထို့အပြင် ရန်ကိုင်သည် မကျေနပ်ချက်ရှိလျှင် ကျိန်းသေ လက်စားပြန်ချေတတ်သည့် လူစားမျိုးလည်း ဖြစ်ကြောင်း လီမင်ဟိုင်နှင့် ကိစ္စက သက်သေပြသွားခဲ့လေပြီ။
Martial Peak
အထွဋ်အထိပ်သိုင်းဧကရာဇ်
အပိုင်း (၁၇၄၀)
“ချောင်းတိုက်ဖို့ဆိုမှတော့ ရောင်းရင်းရန် ဘာလို့ နည်းနည်းလောက် ထပ်မစောင့်တာလဲ။ ဥပမာ၊ ခွေးအိုကြီးလီ ဒီကုကို သတ်ပြီး သတိလျော့သွားတဲ့ အချိန်မျိုးလေ၊ အဲ့အချိန်မှာသာ သူ့ကိုသတ်မယ်ဆိုရင် ဒီလောက်ထိ ခက်ခဲလောက်မှာ မဟုတ်ဘူး” ကုကျန်းရှင်က မေးလိုက်သည်။
“ပိုပြီး အားစိုက်ရဖို့ လိုတယ်ဆိုတာက ကျုပ်သူ့ကို မသတ်နိုင်ဘူးလို့ ပြောတာ မဟုတ်ဘူး” ရန်ကိုင်က ယုံကြည်ချက် အပြည့်ဖြင့် ပြုံးလျက် “ကျုပ်ဘာလို့ အဖွဲ့အစည်းသခင်လေးကို ကယ်လိုက်တာလဲလို့ မေးချင်နေတာမလား”
ကုကျန်းရှင် ခေါင်းညိတ်လိုက်သည်။
“ကိုယ့်မိန်းကလေးအတွက် အသက်ကိုစတေးရဲတဲ့ ယောကျာ်းတစ်ယောက် အခုလိုမျိုး သေသွားရမှာ နှမြောစရာမို့လို့ပဲ” ရန်ကိုင်က ပြန်ပြောလိုက်သည်။
အစောပိုင်းက ကုကျန်းရှင်သည် လီမင်ဟိုင်၏ တိုက်ကွက်ကို လက်ယာဓါးအစေခံအစား ဝန်ခံပေးသည်။ ထိုသို့ လုပ်ခြင်းသည် မည်မျှ အန္တရာယ်များကြောင်း ရန်ကိုင် သိပေသည်။ တစ်ခုခုသာ မှားယွင်းသွားခဲ့လျှင် ကုကျန်းရှင်နှင့် လက်ယားဓါးအစေခံ နှစ်ဦးစလုံး တစ်ခါတည်း သေပွဲဝင်သွားကြရပေလိမ့်မည်။
ရန်ကိုင်သည် လော့ဟိုင်ကဲ့သို့ ပညာရှင်မျိုးအား စုယန်နှင့် လက်တွဲကာ ယှဉ်တိုက်ခိုက်ခဲ့ဖူးသည့်အတွက် ကုကျန်းရှင်၏ လုပ်ရပ်အပေါ် အတော်လေး လေးစားမိသည်။
ကိုယ်ချစ်ရသူအတွက် ဤကဲ့သို့ ပေးဆပ်ရဲသည့် ယောကျာ်း တစ်ဦးသည် ဥာဏ်နီဥာဏ်နက်များပြီး ကောက်ကျစ်သည့် လူတစ်ယောက် လုံးဝ မဟုတ်ချေ။
ကုကျန်းရှင် ကြောင်သွားခဲ့၏။
လက်ဝဲနှင့် လက်ယာဓါးအစေခံတို့သည်လည်း ရန်ကိုင်၏ စကားကြောင့် ရှက်သွေးဖြာသွားပြီး ကုကျန်းရှင်ဆီ ချစ်ရိပ်တို့ လွှမ်းနေသည့် မျက်ဝန်းများဖြင့် လှမ်း၍ ကြည့်လိုက်ကြသည်။
မကြာမီ ကုကျန်းရှင် သည်းလှိုက်အူလှီုက် ထရယ်တော့လေသည်။ စိတ်အားတက်ကြွနေဟန်ဖြင့် “ရောင်ရင်းရန်က ယောကျာ်းဆိုမှ တကယ် အာဂယောကျာ်းပဲ။ ရောင်းရင်းရန်လို လူမျိုးနဲ့ လာတွေ့ရတာ ဒီကုအတွက် တကယ်ကို ဂုဏ်ယူစရာပဲ”
ရန်ကိုင်က နှာခေါင်းကိုပွတ်၍ ပြန်ပြောလိုက်လေသည် “အခြား အကြောင်းအရင်တစ်ခုကတော့… သခင်လေးကုရဲ့ ဓါးအဖွဲ့အစည်းက တစ်ယောက်ယောက်နဲ့ ကျုပ်သိနေလို့ပဲ”
“အို၊ ကျုပ်တို့ အဖွဲ့အစည်းက တစ်ယောက်ယောက်နဲ့ ရောင်းရင်းရန် သိတာလား” ကုကျန်းရှင် ပျော်သွားခဲ့သည်။
ရန်ကိုင် သူ့အား ကယ်ထားသည်ကို ထည့်မတွက်လျှင်ပင် ကုကျန်းရှင်သည် ရန်ကိုင်နှင့် မိတ်ဆွေဖွဲ့ချင်နေခဲ့သည်။ ထို့ကြောင့် ရန်ကိုင်သည် ဓါးအဖွဲ့အစည်းမှ တစ်ယောက်ယောက်နှင့် သိနေကြောင်း ကြားလိုက်ရသည့်အခါမှ ကုကျန်းရှင် အလွန် ပျော်သွားခဲ့ခြင်း ဖြစ်သည်။
“ရောင်းရန်းရန် ဘယ်သူနဲ့ သိနေတာလဲ”
“ဟိုမှာ သူတို့ လာနေပြီ” ရန်ကိုင်က မေးငေါ့ပြလိုက်၏။
ကုကျန်းရှင်လည်း ရန်ကိုင် ညွှန်ပြသည့်ဘက်သို့ လှမ်း၍ ကြည့်လိုက်ရာ ရွယ်ရှီတို့ ဆရာတပည့်သုံးဦး သူတို့ဆီသို့ ပျံသန်းလာနေသည်ကို တွေ့လိုက်ရလေသည်။
“သူတို့လား” ကုကျန်းရှင် အမှန်တကယ်ကို အံ့အားသင့်သွားခဲ့သည်။
ရန်ကိုင်သိသည့်လူသည် သူ့လက်အောက်ငယ်သားများ အနက် ထိပ်တန်းပညာရှင်တစ်ဦးဦး ဖြစ်လိမ့်မည်ဟု ထင်ထားခဲ့သော်ငြား ထိုသုံးယောက် ဖြစ်နေလိမ့်မည်ဟု မထင်ထားခဲ့ချေ။
မကြာမီ ရွယ်ရှီ၊ ဟဲကျောင်းနှင့် ဟဲမြောင်တို့ ရောက်လာခဲ့သည်။ ကုကျန်းရှင်အား ဦးညွှတ်နှုတ်ဆက်လိုက်ပြီးနောက် သူ့အခြေအနေကို မေးမြန်းကြည့်လေသည်။ အဖွဲ့အစည်းသခင်လေး အဆင်ပြေနေကြောင်း သိလိုက်ရမှပဲ အကုန်လုံး စိတ်သက်သာရာ ရသွားခဲ့ကြသည်။
“အစ်ကိုရန်” ဟဲကျောင်နှင့် ဟဲမြောင်သည် ရန်ကိုင်ဘက်သို့ လှည့်လိုက်သည်။ ယခုတစ်ကြိမ်တွင် ရန်ကိုင်၏ အကူအညီဖြင့် သေဘေးမှ လွတ်မြောက်နိုင်ခဲ့ခြင်း ဖြစ်သည်။ ထို့ကြောင့် ရန်ကိုင်အား အပြင်လူတစ်ဦးအဖြစ် သဘောမထား၊ တရင်းတနှီးပင် အစ်ကိုရန်ဟု ခေါ်လိုက်လေသည်။
ရန်ကိုင်က ခေါင်းညိတ်လိုက်ပြီး လက်ကို ဆန့်ထုတ်၍ ဟဲကျောင်၏ ခန္ဓာကိုယ်ထဲမှ အနီရောင်အလင်းကို သူ့ကိုယ်ထဲသို့ ပြန်၍ စုပ်ယူလိုက်လေသည်။
“ကျေးဇူးပဲ ရန်ကိုင်၊ နင့်ကြောင့်သာ မဟုတ်ရင် ငါတို့ အကုန်လုံး ဒီမှာ သေသွားပြီ။ ငါနဲ့ငါ့တပည့် နှစ်ယောက်စလုံး နင့်အပေါ် ကျေးဇူးကြွေးတင်သွားပြီ” ရွယ့်ရှီသည် ရန်ကိုင်အား ကျေးဇူးတင်စကား ပြောလိုက်သည်။
ရန်ကိုင်ကမူ ဘာမှပြန်ပြောမနေခဲ့ဘဲ ခေါင်းသာ ညိတ်ပြလိုက်လေသည်။
“ရောင်းရင်းရန်က မိန်းကလေးရွယ့်တို့နဲ့ သိနေတာလား။ တကယ်ကို ရေစက်ဆုံသွားတာပဲ” ကုကျန်းရှင်က အကျယ်ကြီး အော်ရယ်မောလျက် “ရောင်းရင်းရန် စိတ်မရှိရင် ဒီကုရဲ့ ကြယ်သင်္ဘောပေါ် တက်ခဲ့ပါလား။ ဒီကု ရောင်းရင်းရန်ကို ကောင်းကောင်း ဧည့်ခံချင်လို့”
ရန်ကိုင်ကမူ ချက်ချင်း လက်မခံခဲ့။
သူဤနေရာတွင် နေနေရခြင်းမှာ လီမင်ဟိုင်အား ချောင်းမြောင်းသတ်ဖြတ်လိုသည့် အတွက်ကြောင့် ဖြစ်သည်။ ယခု လီမင်ဟိုင် သေသွားပြီ ဖြစ်သည့်အတွက်ကြောင့် သူ့အနေဖြင့် ဤနေရာတွင် ဆက်နေစရာ မလိုတော့ချေ။
ရန်ကိုင် တိတ်သွားသည်ကို မြင်သော် ကုကျန်းရှင်သည် ရန်ကိုင်အား ဆက်၍ တွန်းအားမပေးခဲ့ပေ။ ဟဲကျောင်နှင့် ဟဲမြောင်ကမူ ရန်ကိုင်အား မျှော်လင့်တကြီး မျက်ဝန်းများဖြင့် စိုက်ကြည့်နေကြလေသည်။
“အဖွဲ့အစည်းသခင်လေး ဘယ်ကို ဆက်သွားဖို့လုပ်နေလဲ ဒီရန် သိလို့ရမလား” ခဏစဉ်းစားနေပြီးနောက် ရန်ကိုင်က မေးလိုက်သည်။
“ရောင်းရင်းကုလို့ပဲ ခေါ်ပါ ရောင်းရင်းရန်၊ အဖွဲ့အစည်း သခင်လေးကို ခေါ်နေတာကို ကြားရတာက နားထဲ နည်းနည်း တစ်မျိုးပဲ” ကုကျန်းရှင်က ပြုံးလျက် “ဘယ်ကို ဆက်သွားမလဲ ဆိုတော့ ကျုပ်အခု မိုးပြာသစ်ပင်ကြယ်ဆီ သွားမလို့ လုပ်နေတာ”
“မိုးပြာသစ်ပင်ကြယ်”
“ဟုတ်တယ်။ ကျုပ်တို့ ဓါးအဖွဲ့အစည်းရဲ့ လက်အောက်မှာ ရှိနေတဲ့ ကြယ်တွေထဲက တစ်လုံးပဲ။ ပုံမှန်အတိုင်းသွားရင် ဒီကနေ တစ်လလောက် သွားရတယ်”
“အဲ့လိုကိုး…” ရန်ကိုင်သည် ခဏလောက် ထပ်စဉ်းစားပြီးနောက် “အစ်ကိုကုက ဖိတ်ခေါ်နေမှတော့ ဒီရန်လည်း လိုက်ရတာပေါ့”
ရန်ကိုင် သဘောတူလိုက်သည်ကို မြင်သော် ကုကျန်းရှင်၏ မျက်ဝန်အစုံ တောက်ပသွားခဲ့လေသည်။ ချက်ချင်းပဲ ငယ်ပေါင်းကြီးဖော် မိတ်ဆွေများနှယ် ရန်ကိုင် ပခုံးပေါ် လက်တင်၍ သူ့အား ကြယ်သင်္ဘောထဲသို့ ခေါ်သွားလေသည်။
လီမင်ဟိုင်၏ တိုက်ခိုက်မှုကြောင့် ကြယ်သင်္ဘောသုံးစင်း အနက် တစ်စီ လုံးဝဥဿုံ ပျက်စီးသွားပြီး ကျန်းတစ်စီးမှာ ဆက်၍ မောင်းမရတော့ချေ။ အကောင်းအတိုင်း ကျန်သေးသည့် ကြယ်သင်္ဘောဆို၍ အလယ်တစ်စီးသာ ရှိတော့သည်။ ဤကြယ်သင်္ဘောသည်လည်း ထိခိုက်သွားခဲ့သော်လည်း အရမ်းကြီး မဆိုးသည့်အတွက် အနည်းငယ်လောက် ပြန်ပြင်လိုက်ရုံဖြင့် ပြန်မောင်း၍ ရပေပြီ။
သင်္ဘောပေါ်သို့ ရောက်သော် ကုကျန်းရှင်သည် ရန်ကိုင်အတွက် နေစရာ စီစဉ်ပေးလိုက်သည်။ ထို့နောက် သူ့ဒဏ်ရာများကို ကုလိုက်ဦးမည်ဟူသော အကြောင်းပြချက်ဖြင့် ထွက်သွားလေသည်။ လီမင်ဟိုင်နှင့် တိုက်ပွဲတွင် ကုကျန်းရှင် အတော်လေး ဒဏ်ရာရသွားခဲ့သည်။ သေလောက်သည့် ဒဏ်ရာများ မဟုတ်သော်ငြား အတော့်ကို ပြင်းထန်သည့် ဒဏ်ရာများ ဖြစ်သည်။ ထိုကဲ့သို့သော ဒဏ်ရာများကို အချိန်ကြာကြာ မထားသင့်ဘဲ မြန်မြန် ကုသသင့်ပေသည်။
ရန်ကိုင်လည်း ထိုအချက်ကို နားလည်ထားသည့်အတွက် စိတ်ထဲ ထားမနေခဲ့ချေ။
တစ်ရက်ခန့်ကြာအောင် ပြန်ပြင်ပြီးနောက် ကြယ်သင်္ဘော နောက်တစ်ကြိမ် ခရီးပြန်ခရီးဆက်နိုင်သွား၏။
ကုကျန်းရှင်သည် ရန်ကိုင်အတွက် အလွန်ကိုမှ ခမ်းနားသော အခန်းတစ်ခန်းကို ပြင်ဆင်ပေးထားသည်။ အခန်းသည် အရမ်းကြီး မကျယ်သော်ငြား အမျိုးမျိုးသော အဆင်တန်ဆာများဖြင့် လှပတင့်တယ်စွာ တန်ဆာဆင်ထားခဲ့သည်။ ထို့အပြင် အခန်းထဲ၌ စိတ်ကို ငြိမ်းအေးစေနိုင်သော အမွှေးနံ့သာအိုးလည်း ရှိနေခဲ့သည်။
ရန်ကိုင်တွင် ကုကျန်းရှင်၏ ဖိတ်ခေါ်မှုကို လက်ခံရသည့် အကြောင်းအရင်း ရှိပေသည်။
ခရီးတောက်လျှောက်သွားပြီး ဟင်းလင်းပြင်အစီအရင်များ တစ်ခုပြီးတစ်ခု ခင်းကျင်းလာခဲ့သော်ငြား ကြယ်သေများပေါ်၌သာ ရှိသေးသည်။ အစစ်အမှန် ကျင့်ကြံရေး ကြယ်တစ်လုံးပေါ်၌ မခင်းကျင်းရသေးချေ။
ကြယ်မြေပုံထဲမှ ကြည့်ရသလောက် မိုးပြာသစ်ပင်ကြယ်သည် အတော်လေးကောင်းသည့် ကျင့်ကြံရေးကြယ်တစ်လုံး ဖြစ်သည်။
ရီရှီယွင်နှင့် အခြားသူများသာ သူခင်းကျင်းထားသော ဟင်းလင်းပြင်အစီအရင်များမှတစ်ဆင့် မိုးပြာသစ်ပင်ကြယ်သို့ လာရောက်နိုင်လျှင် အရိပ်ကြယ်၏ ဖိနှိပ်မှုမှ လွတ်မြောက်ကာ တန်ခိုးရှင်ဘုရင်အဆင့်၏ နက်နဲဆန်းကြယ်မှုများကို ထိတွေ့နိုင်ပေလိမ့်မည်။
နောက်ထပ် အကြောင်းအရင်းတစ်ခုမှာ သူ့တွင် လေဟာနယ်သလင်းကျောက် များများစားစား မကျန်တော့သည့် အတွက်ကြောင့် ဖြစ်ပေသည်။
ရီရှီယွင်နှင့် အခြားသူများသည် အရိယ်ကြယ်၌ လေဟာနယ် သလင်းကျောက်များကို ရသလောက် စုဆောင်းခဲ့သော်လည်း ကမ္ဘာခြားဟင်းလင်းပြင်အစီအရင်တစ်ခု တည်ဆောက်ရန် လိုအပ်သည့် လေဟာနယ်သလင်းကျောက် ပမာဏမှာ အလွန်ကိုမှ များပြားလွန်းသည်။
သူ့တွင် ကျန်သေးသည့် လေဟာနယ်သလင်းကျောက် ပမာဏသည် နောက်ထပ် ကမ္ဘာခြားဟင်းလင်းပြင် အစီအရင် တစ်ခု ထပ်ဆောက်ရုံလောက်သာ လုံလောက်တော့သည်။
ထို့ကြောင့် နောက်ထပ် လေဟာနယ်သလင်းကျောက်များ ထပ်ရှာရပေတော့မည်။
မိုးပြာသစ်ပင်ကြယ်၏ အရိပ်ကြယ်၏ လက်အောက်တွင် ရှိနေသော ကြယ်တစ်လုံးဖြစ်သည်။ ယခု ရန်ကိုင်သည် ကုကျန်းရှင်နှင့် ရင်းနှီးနေခဲ့လေပြီ။ ထို့ကြောင့် ဤအခွင့်အရေးကို သုံးကာ လေဟာနယ်သလင်းကျောက်များကို ထပ်မံ ရှာဖွေနိုင်၏။
ထိုသို့မလုပ်ခင် သတ္တုကြယ်ဆီပြန်ပြီး ချင်းတုန်၊ ရီရှီယွင်တို့ လေဟာနယ်သလင်းကျောက်တွင်း တစ်တွင်းလောက် ရှာတွေ့မတွေ့ သွားမေးမြန်းကြည့်ရပေဦးမည်။ တကယ်ကြီးသာ ရှာတွေ့ခဲ့မည်ဆိုလျှင်တော့ သူ့အတွက် အတော်လေး ပြဿနာ နည်းသွားပြီဟု ပြော၍ရသည်။
အခန်းထဲသို့ ရောက်သည့်နောက် ရန်ကိုင်သည် တိုက်ပွဲမှ ရလာသည့် ပစ္စည်းများကို ထုတ်ကြည့်လိုက်သည်။
လူသုံးယောက်ကိုသာ သတ်ခဲ့သည့်အတွက် အများကြီးတော့ မရခဲ့ပေ။ ကျန်းဖုနှင့် လျိုတုန်း၏ သိုလှောင်လက်စွပ်ထဲတွင် ရန်ကိုင် စိတ်ဝင်စားလောက်မည့် မည်သည့် ပစ္စည်းမှ ရှိမနေခဲ့ပေ။ ထိုပစ္စည်းအားလုံး အထက်စကြာဝဠာဂိုဏ်း၏ ရတနာဂိုဒေါင် ထဲသို့သာ ရောက်သွားပေလိမ့်မည်။
လီမင်ဟိုင်၏ သိုလှောင်လက်စွပ်ထဲတွင် အဖိုးတန်ပစ္စည်းများစွာ ရှိနေခဲ့သည်။
အသိသာ အထင်ရှားဆုံးမှာ တန်ခိုးရှင်ဘုရင်အဆင့် ဖြစ်သော ဝိဥာဉ်ဖျက်လှံပင် ဖြစ်သည်။
ကြယ်စီရင်စုကြီး တစ်ခုလုံးတွင်ပင် တန်ခိုးရှင်ဘုရင်အဆင့် မှော်ရတနာများသည် ဝယ်ချင်တိုင်း ဝယ်၍မရသော မှော်ရတနာများ ဖြစ်ကြသည်။ သို့သော်လည်း ဤမှော်ရတနာနှင့် ပက်သက်၍ ရန်ကိုင် အရမ်းကြီး စိတ်လှုပ်ရှားမနေခဲ့ချေ။ သူ့အသိများထဲတွင် ဤမှော်ရတနာကို သုံးနိုင်သည့်လူ တစ်ဦးမှ ရှိမနေခဲ့ချေ။
ထို့ကြောင့် ထိုမှော်ရတနာကို ခဏ ဘေးဖယ်ထားလိုက်၏။
သိုလှောင်လက်စွပ်ထဲမှ ပစ္စည်းများကို စစ်ဆေးနေစဉ် တံခါးခေါက်သံ ထွက်ပေါ်လာခဲ့သည်။ ခဏအကြာ၌ ရန်ကိုင်က လှမ်းပြောလိုက်၏ “ဝင်လာခဲ့”
တံခါးပွင့်လာပြီးနောက် မိန်းမလှလေးနှစ်ဦး ဘေးချင်းယှဉ် လမ်းလျှောက်ဝင်လာခဲ့သည်။
“အစ်ကိုရန်” ဟဲမြောင်သည် ရန်ကိုင်အား တက်ကြွစွာ နှုတ်ဆက်လိုက်ပြီးနောက် သယ်လာသည့် လင်ဗန်းအချို့ကို စားပွဲပေါ်တွင် ချလိုက်လေသည်။
လင်ဗန်း တစ်ခုလုံး စားစရာမှား၊ ဝိုင်းများဖြင့် ပြည့်နေသည်။ ရန်ကိုင် စိတ်ဝင်စားသည့် အရာများတော့ မဟုတ်။ သူ့လက်ရှိ အဆင့်အရ အစားအစာများသည် အရသာခံစားနိုင်ရုံမှအပ သူ့ခန္ဓာကိုယ်အား မည်သည့် အကျိုးကျေးဇူးမှ မဖြစ်စေတော့ပေ။ အချို့သော အစားအသောက်များသည်သာ သူ့ခွန်အားကို တိုးတက်စေနိုင်တော့သည်။
“အစ်ကိုရန်ကို နှောင့်ယှတ်မိသလို ဖြစ်သွားလား” ဟဲကျောင်သည် ဟဲမြောင်ထက် ပို၍ ရင့်ကျက်သူပီပီ ရန်ကိုင်၏ ပုံမှန် အသွင်အပြင်ကိုမြင်သော် စိုးရိမ်တကြီး မေးလိုက်လေသည်။
“မဖြစ်ပါဘူး” ရန်ကိုင်က ပြုံးလျက် “ထိုင်ပါဦး”
“မရဘူး” ဟဲကျောင်က လက်ဝှေ့ရမ်း၍ “ကျွန်မတို့က အစ်ကိုရန်ရဲ့ ဝေယျာဝစ္စကိစ္စတွေကို လုပ်ပေးဖို့ လာခဲ့တာ။ အစ်ကိုရန် လုပ်ခိုင်းချင်တာရှိရင် အားနာမနေနဲ့၊ ပြောသာ ပြောလိုက်”
“ကုကျန်းရှင် လာခိုင်းလိုက်တာလား” ရန်ကိုင် မျက်ခုံးပင့်သွားခဲ့သည်။
“အင်း” ဟဲကျောင်သည် မျက်ဝန်းလေးချလျက် လေးလေးစားစား ပြန်ပြောလိုက်သည်။ ဟဲမြောင်ကမူ ပတ်ဝန်းကျင်ကိုသာ စိတ်ဝင်တစား လိုက်ကြည့်နေ၏။ ဤကဲ့သို့ ခမ်းနားကြီးကျယ်သည့် အခန်းမျိုး တစ်ခါမှ မမြင်ဖူးသည့်ပုံပင်။
“အဲ့ဒါဆို အရင်ထိုင်ဦး။ ဒါအမိန့်ပဲ” ရန်ကိုင်က ပြုံးလိုက်သည်။
ဟဲကျောင်သည် ခဏတာ တုန့်ဆိုင်းနေပြီးနောက် သူ့ညီမနှင့်အတူ ထိုင်ချလိုက်လေသည်။ သူမမှာတော့ လိုက်လျောညီထွေဖြစ်အောင် ထိုင်နေသော်ငြား ဟဲမြောင်၏ ဂနာမငြိမ် ဖြစ်နေသော အမူအရာကို မြင်သော် ဟဲမြောင်အား စူးရဲစွာ စိုက်ကြည့်လိုက်လေသည်။
ဟဲမြောင်သည် လျှာလေးတစ်လစ်တစ်လစ် ထုတ်လျက် ထိုင်ချလိုက်လေသည်။
“ငါနင်တို့ကိုတွေ့တိုင်း တစ်ခါမှ အဆင်ပြေနေတယ်ဆိုတာ မရှိဘူးနော်” ရန်ကိုင်က ပြုံးလျက် ပြောလိုက်သည်။
ပထမအကြိမ် တွေ့စဉ်က ညီအစ်မနှစ်ဦးသည် ခရမ်းကြယ်မှ ကျင့်ကြံသူများ လိုက်ဖမ်းသဖြင့် ထွက်ပြေးနေခဲ့ရသည်။ ယခု တစ်ကြိမ်တွင်လည်း လီမင်ဟိုင်တို့၏အဖွဲ့၏ ချောင်းမြောင်း တိုက်ခိုက်ခြင်း ခံရပြန်သည်။
ရန်ကိုင်၏ စကားကိုကြားသော် ဟဲကျောင် ရှက်သွားခဲ့၏။ ဟဲမြောင်ကမူ “အဲ့စကားကို ကျွန်မတို့က ပြောရမှာပါနော်”
“ဟဲမြောင်” သူမ အစ်မက စူးရဲစွာ စိုက်ကြည့်နေသည်ကို မြင်သော် ဟဲမြောင်က နှုတ်ခမ်းလေး ဆူပုပ်ပုပ်ဖြင့် “ဘာဖြစ်လို့လဲ။ အစ်ကိုရန်က အဲ့လောက်ကို ဂရုစိုက်နေမှာမှ မဟုတ်တာ”
ဟဲကျောင်းလည်း ကူကယ်ရာမဲ့သွားဖြင့် ရန်ကိုင်အား ကြည့်၍ တောင်းတောင်းပန်ပန်ဖြင့် ပြောလိုက်လေသည် “ကျွန်မ ညီမလေးကို ခွင့်လွှတ်ပေးပါ အစ်ကိုရန်၊ သူက ငယ်ငယ်လေး ကတည်းက အလိုလိုက်ခံထားရလို့ပါ”
“ဘာမှမဖြစ်ပါဘူး။ ဒီလောက်ကြီး စိုးရိမ်မနေစမ်းပါနဲ့” ရန်ကိုင်က လက်ဝှေ့ရမ်းလိုက်၏။ ပထမအကြိမ် တွေ့စဉ်က သူ့ခွန်အားသည် ညီအစ်မနှစ်ဦးနှင့် မတိမ်မယိမ်း ဖြစ်သည့်အတွက် ပုံမှန်စကားပြောသလို ပြောဆိုနိုင်ခဲ့သည်။ ယခုမူ သူတို့ကြားရှိ ခွန်အားကွာခြားချက်မှာ အလွန်ကိုမှ ကြီးမားနေခဲ့သဖြင့် ဟဲကျောင်အဖို့ ရန်ကိုင်နှင့် စကားပြောရာတွင် အတော်လေး အခက်တွေ့နေခဲ့ရလေသည်။
တကယ်တော့ သူတို့၏ ဆရာသည်ပင် တန်ခိုးရှင် ပထမအဆင့်သို့သာ ရောက်သေးသည် မဟုတ်လော။ ရန်ကိုင်သည် တန်ခိုးရှင်တတိယအဆင့်သို့ ရောက်နေရုံမက သူတို့၏ သခင်လေးနှင့်လည်း ရင်းနှီးနေခဲ့သည်။
ဟဲကျောင်း၏ ကသိကအောက် ဖြစ်နေသည့် အမူအရာကို မြင်သော် ရန်ကိုင်လည်း ချက်ချင်းပဲ ခေါင်းစဉ်ပြောင်းလိုက်ကာ အရင်နှစ်များအတဝွင် သူတို့ မည်ကဲ့သို့ အခြေအနေရှိသလဲ မေးမြန်းကြည့်လေသည်။
ဟဲကျောင်လည်း ချက်ချင်းပဲ ရှင်းပြလိုက်သည်။
လွင့်မျောတိုက်ကြီးမှ လွတ်မြောက်လာပြီးနောက် ရွယ်ရှီသည် သူမတို့ ညီအစ်မနှစ်ဦးကို ဓါးအဖွဲ့အစည်းကို ပြန်ခေါ်လာခဲ့သည်။ သို့ရာတွင် ပေးလိုက်သည့် တာဝန်ကို ကျရှုံးလာခဲ့ရုံမက ကြယ်သင်္ဘောပါ ပျက်စီးပြီး အဖွဲ့သားများစွာ သေကြေခဲ့ရသည့် အတွက် ခေါင်းဆောင်ဖြစ်သော ရွယ်ရှီ ဒုက္ခရောက်လုနီးပါး ဖြစ်သွားခဲ့ရသည်။ သို့ရာတွင် ကံကောင်းထောက်မစွာဖြင့် ရာထူးမြင့် အကြီးအကဲတစ်ဦးမှ ဝင်ပြောပေးသည့်အတွက် သေဘေးမှ လွတ်မြောက်ခဲ့ရပေသည်။
ထို့ကြောင့်ပင် ရွယ်ရှီနှင့် သူမ တပည့်နှစ်ဦးသည် ကုကျန်းရှင်နောက်သို့ စလိုက်ခဲ့ကြလေသည်။ အကြောင်းမှာ သူတို့ဘက်မှ ဝင်ပြောပေးခဲ့သော စီနီယာသည် ကုကျန်းရှင်တို့ အဖွဲ့ဘက်မှ ဖြစ်နေသည့် အတွက်ကြောင့် ဖြစ်ပေသည်။