Chapter – 1576 & 1590

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၇၆)

‌‌“လူသား၊ ဆရာယုရှုန်းက စိတ်ရှည်တဲ့ လူစားမျိုးမဟုတ်ဘူးနော်။ မင်းအသက်ရှင်ချင်ရင် မင်းအမှားကို ဝန်ခံပြီး ဒူးထောက် တောင်းပန်လိုက်။ အဲ့ဒါဆို မင်းအသက်ချင်ရှင်ရှင်နိုင်လိမ့်မယ်” မွန်းစတားမျိုးနွယ်စုဝင် တစ်ဦးက အော်ပြောလိုက်သည်။

“ငါ့အမှားကို ဝန်ခံပြီး ဒူးထောက်တောင်းပန်ရမယ်…” ရန်ကိုင်သည် ကောင်းကင်နှင့်မြေပြင် မည်မျှ ဝေးကွာသလဲ ဆိုသည်ကို မသိသည့်အလား သူ့မေးစေ့ကိုပွတ်ရင်း စွဲမက်ဖွယ်ကောင်း‌သော အမျိုးသမီးအား မီးတောက်မတတ် အကြည့်ဖြင့် ဆက်၍ စိုက်ကြည့်နေခဲ့သည်။ ထို့နောက် ယဲ့ယဲ့လေးပြုံးလျက် မေးလိုက်လေသည် “အလှလေး၊ မင်းကော ငါ့ကို အဲ့လို လုပ်စေချင်လား”

ရန်ကိုင်၏ စကားကို ကြားလိုက်သည့်အခိုက်တွင် လူအုပ်ကြီး တစ်ခုလုံး ထိတ်လန့်တုန်လှုပ်သွားခဲ့လေသည်။

အကုန်လုံးသည် ရန်ကိုင်အား မယုံကြည်နိုင်စွာဖြင့် စိုက်ကြည့်လာကြသည်။

ထိုလူသား… သူတို့ သခင်မလေးကို တကယ်ကြီး ‘အလှလေး’လို့ ခေါ်လိုက်တာလား။ ရိုင်းပြလိုက်လေခြင်း… ဤသည်မှာ သူတို့၏ သခင်မလေးကို လိင်ပိုင်းဆိုင်ရာ စော်ကားလိုက်ခြင်း ဖြစ်သည်။

သူတို့၏ သခင်မလေးသည် လူသားတစ်ယောက်သာ ဖြစ်သော်ငြား သူမကို မျိုးနွယ်စုခေါင်းဆောင်ကိုယ်တိုင်က မွေးစားသမီးအဖြစ် ခေါ်ယူမွေးစားခဲ့ခြင်း ဖြစ်သည်။ လွန်ခဲ့သော သုံးနှစ်အတွင်းတွင် သူမအား မျိုးနွယ်စုခေါင်းဆောင်ကိုယ်တိုင် သင်ကြားပေးခဲ့သည်။ လူသားဖြစ်သော်လည်း သခင်မလေးသည် အလွန်ကိုမှ ပါရမီ မြင့်မားပြီး မွန်းစတားမျိုးနွယ်စု၏ လက်ရွေးစင်များပင်လျှင် သူမ၏ ခြေဖျားကို လိုက်မမှီချေ။

သို့သော်လည်း လူသားတစ်ယောက်သည် လူအများရှေ့တွင် သူတို့၏ သခင်မလေးကို လာပြီး ဖွန်ကြောင်နေရဲသည်။ ထိုကောင် သေချင်နေလေသလော။

“ရဲတင်းလိုက်တာ” မွန်းစတားမျိုးနွယ်စုဝင်တစ်ဦးက ဒေါသတကြီး ထအော်လေသည်။

သခင်မလေးကို စော်ကားလိုက်ခြင်းသည် လနီမွန်းစတား မျိုးနွယ်စုဝင်ကို စော်ကားလိုက်ခြင်း ဖြစ်သည်။

မည်သည့် မွန်းစတားမျိုးနွယ်စုဝင်မှ ရန်ကိုင်၏ စော်ကားမှုကို သည်းမခံနိုင်ဘဲ ချက်ချင်း ဒေါသတကြီး ထအော်ကုန်လေသည်။

ယုရှုန်းသည်လည်း ရန်ကိုင်ပြောသည်ကို ကြားပြီးနောက်တွင် လုံးဝကို မှင်သက်သွားခဲ့သည်။ သို့သော်လည်း ခဏအကြာ၌ ထိတ်လန့်အံ့အားသင့်နေရာမှ အသိပြန်ဝင်လာခဲ့ပြီး ဝါးလုံးကွဲ အော်ရယ်လျက် ရန်ကိုင်ကို လက်ညိုးထိုးရင်း သူ့ဘေးနားတွင် ရပ်နေသော အမျိုးသမီးဘက်သို့ လှည့်၍ ပြောလိုက်လေသည် “ညီမလေး၊ ဒီကောင်လေးက နင့်ကို အလှလေးတဲ့”

“မဟုတ်လို့လား” အမျိုးသမီးက ယုရှုန်းအား မျက်လုံးလေးမှေးစဉ်း၍ ပြန်ကြည့်လိုက်လေသည်။

ယုရှုန်း၏ ရယ်သံ ရုတ်တရက် တဆိတ်သွားခဲ့ပြီး အလျင်အမြန်ပဲ ပြန်လည် ငြင်းဆိုလိုက်လေသည် “အစ်ကိုကြီး အဲ့လိုပြောချင်တာ မဟုတ်ဘူး… ညီမလေးကို ဘယ်သူမှ အဲ့လို မခေါ်ကြဘူးလေ။ ဒီတော့ တစ်ယောက်ယောက်က အဲ့လိုခေါ်တာ ကြားလိုက်တော့ နည်းနည်း အံ့အားသင့်သွားတာ။ ပြီးတော့ ဒီကောင်လေးက အရမ်း အရှက်မဲ့လွန်းတယ်။ အစ်ကိုကြီး ညီမလေးအတွက် ဒီကောင့်ကို သင်ခန်းစာ ကောင်းကောင်း ပေးလိုက်မယ်”

ပြောပြီးသည်နှင့် ရန်ကိုင်အား ကြမ်းကြုတ်စွာ စိုက်ကြည့်လိုက်၏။

လနီပိုင်နက်တွင် ယုရှုန်း၏ အဆင့်အတန်းသည် ထိပ်ဆုံးထဲတွင် ပါပေသည်။ သူသည် လနီမျိုးနွယ်စုခေါင်းဆောင်၏ မွေးစားသား ဖြစ်ပြီး သူသည် တန်ခိုးရှင်တတိယအဆင့် ကျင့်ကြံသူတစ်ယောက် ဖြစ်သည်။ ထို့ကြောင့် ယုရှုန်းသည် အဆင့်အတန်းကော၊ ခွန်းအားကောပါ မြင့်မားသူဟု ဆိုနိုင်ပေသည်။

ယုရှုန်းသည် တည့်တိုးဆန်ပြီး ရဲတင်းကာ သူ့အား အလျှော့ပေးအောင် လုပ်နိုင်သည့်လူဆို၍ နှစ်ယောက်သာ ရှိသည်။ တစ်ယောက်သည် မျိုးနွယ်စုခေါင်းဆောင် သခင်မ ဖြစ်ပြီး နောက်တစ်ဦးမှာ သူ့ဘေးတွင် ရပ်နေသော အမျိုးသမီး ဖြစ်သည်။

မျိုးနွယ်စုခေါင်းဆောင်ကို ကြောက်ရွံ့ရိုသေရသည်ဆိုလျှင် သူ့ညီမလေးကိုတော့ အမှန်တကယ် လေးစားမိခြင်း ဖြစ်သည်။ အရည်အချင်းကော၊ ပါရမီပိုင်းတွင် သူ့ညီမလေးသည် သူ့ထက် အများကြီး သာပေသည်။

သူ့ညီမလေးသည် ဘဟဲအပြင် လနီမျိုးနွယ်စု၏ အတောက်ပဆုံး ပါရမီရှင်တစ်ယောက် ဖြစ်လာပြီး အနာဂတ်တွင် တန်ခိုးရှင်ဘုရင် အဆင့်သို့ ချိုးဖျက်လိမ့်မည်ဟု မွေးစားအမေက သူ့အား ပြောခဲ့ဖူးသည်။

“မလိုပါဘူး” အလှလေးက ယုရှုန်း၏ ကမ်းလှမ်းချက်ကို ငြင်းဆိုလိုက်၏။

“နင်သူ့ကို ဒီအတိုင်း လွှတ်ပေးလိုက်ဖို့လား။ အဲ့ဒါ သက်ညှာလွန်းရာ မကျဘူးလား။ သူ့လုပ်ရပ်အတွက်တော့ ကျိန်းသေ ပြန်ပေးဆပ်ခိုင်းရမယ်လေ” ယုရှုန်းက အနည်းငယ် မကျေမနပ် ဖြစ်နေဟန်ဖြင့် ခေါင်းခါလိုက်သည်။

အမျိုးသမီးသည် ပြုံးသာပြုံးလိုက်သည်။ ထို့နောက် ထိုင်ခုံမှထ၍ ရှေ့သို့လမ်းလျှောက်သွားရင်း ရယ်ရယ်မောမောနှင့် ပြောလိုက်၏ “သူ့ကို လွှတ်ပေးရမှာလား။ ဘာလို့ လွှတ်ပေးရမှာလဲ။ ဒီလို နေရတကာ စုံသွားပြီး အိုင်တွေ့တိုင်း ခြေဆေးနေတဲ့ ကောင်မျိုးကို လွှတ်ပေးလိုက်လို့ ဘယ်လိုမှမဖြစ်ဘူး။ သူ့ကို ကျွန်မကိုယ်တိုင် အပြစ်ပေးရမယ်”

“အန်… ကောင်းပြီလေ” ယုရှုန်း ခေါင်းညိတ်လိုက်သည်။ ထို့နောက် ရန်ကိုင်အား လှောင်ပြုံးပြုံးကြည့်ရင်း “ကောင်လေး၊ မင်းတော့ သေပြီသာမှတ်။ ဒီအဖေသာ လှုပ်ရှားရင် မင်းမြန်မြန် သေရဦးမှာ။ အခု ငါ့ညီမလေးကိုယ်တောင် လှုပ်ရှားတာဆိုတော့ ဟဲဟဲဟဲ”

သူတို့၏ သခင်မလေးကိုယ်တိုင် ထိုလူသားကောင်လေးအား ကိုင်တွယ်တော့မည့်အကြောင်း ကြားလိုက်သော် ခန်းမ၏ တစ်ဖက် တစ်ချပ်စီတွင် ရပ်နေသော မွန်းစတားမျိုးနွယ်စုဝင် ပညာရှင်များ တပြုံးပြုံး ဖြစ်ကုန်ကြလေသည်။

ခဏအကြာတွင် ထိုစုန်းမလေး ရန်ကိုင်ရှေ့သို့ ရောက်လာပြီး ရန်ကိုင်၏ မျက်နှာကို မေးလေးမော့လျက သေချာ မော့ကြည့်လိုက်၏။ ရန်ကိုင်ကလည်း အကြောက်အလန့်မရှိ ပြုံး၍ ပြန်စိုက်ကြည့်လိုက်သည်။

ထိုအမျိုးသမီးသည် အံကြိတ်၍ သူမလက်ကို ဖြည်းဖြည်းချင်း ဆန့်ထုတ်ရင်း ရန်ကိုင်၏ ရင်ဘတ်ကို လက်ညိုးနှင့် ထိုးလိုက်၏။

ယုရှုန်းသည် လှောင်ပြုံးပြုံးလျက် ထိုလူသာကောင်လေးအား သူ့ညီမလေးမှ မည်ကဲ့သို့ နှိပ်စက်မည်လဲ ဆိုသည်ကို စိတ်ဝင်တစား စောင့်ကြည့်နေခဲ့သည်။

အခြား မွန်းစတားမျိုးနွယ်စုဝင်များသည်လည်း လည်တိုင်ကို ရှည်နိုင်သမျှရှည်အောင် ဆန့်လျက် မျှော်လင့်တကြီး စောင့်ကြည့်နေကြ၏။

ရန်ကိုင်၏ ရင်ဘတ်ကို လက်ညိုးဖြင့်ထိုးထားလျက် အမျိုးသမီးက ပြောလိုက်လေသည် “နင်ဆုံးဖြတ်၊ နင့်နှလုံးကို ဖောက်ထုတ်ရမလား၊ အသည်းကို ဖောက်ထုတ်ရမလား… ဒါမှမဟုတ် နင့်ရင်ဘတ်ကိုခွဲပြီး နင့်ကိုယ်တွင်းအင်္ဂါတွေ ဖြူလား၊ မည်းလား ကြည့်ရမလား၊ ဘယ်လိုလုပ်ရမလဲ”

“ငါ့ကို အဲ့လောက်တောင် မုန်းတာလား” ရန်ကိုင်က သူ့နှာခေါင်းကို ပွတ်၍ မေးလိုက်သည်။

“ဟုတ်တယ်” အမျိုးသမီးက မေးလေးမော့လျက် “ငါနင့်ကို အရိုးထဲကကို မုန်းတာ… နင့်အလောင်းကို အစိတ်စိတ်အမွှာမွှာ ဖြစ်အောင် လုပ်ပြီး နင့်တစ်ကိုယ်လုံးကို ပြာချပစ်ချင်လောက်အောင် မုန်းတာ…”

“ဟားဟား…” ရန်ကိုင် ခြောက်ကပ်ကပ် ရယ်လိုက်လေသည်။

စကားပြောနေစဉ်အတွင်း အမျိုးသမီးသည် ရန်ကိုင်အား အမှန်တကယ် မုန်းတီးနေသည့်နှယ် အံကို တင်းတင်းကြိတ်၍ သူမ၏ လက်ချောင်းသွယ်သွယ်လေးကို ရန်ကိုင်ရင်ဘတ် တစ်လျှောက် လျှောက်ဆွဲနေခဲ့သည်။

ထိုအခြင်းအရာကို ကြည့်ရင်း ယုရှုန်းမျက်နှာ စိတ်လှုပ်ရှားမှုကြောင့် ရဲတက်လာခဲ့သည်။

သူ့ညီမလေးသည် ဤကဲ့သို့ ထူးထူးခြားခြား ရက်စက်သည့် နည်းလမ်းမျိုးကို တစ်ခါမှ အသုံးမပြုဖူးချေ။ သို့သော်လည်း သူမ စွမ်းရည်ဖြင့် ထိုလူသားကောင်လေးကို ခံစားသွားအောင် လုပ်ရန်မှာ အလွန်ကိုမှ လွယ်ကူသော ကိစ္စတစ်ရပ် ဖြစ်သည်။

ထိုလူသားကောင်လေး၏ ကိုယ်တွင်းအင်္ဂါများကို သူ့ညီမလေးမှ ဆွဲထုတ်မည့်မြင်ကွင်းကို ယုရှုန်း မြင်ယောင်ကြည့်နေမိသည်။

သို့သော်လည်း… သူ့ညီမလေးကို ကြည့်ရင်သည်မှာ ဝမ်းနည်းနေသည့်ပုံစံ ဘာကြောင့် ပေါက်နေရနသည်း။ ယုရှုန်း နားမလည်နိုင်စွာဖြင့် ခေါင်းကုတ်မိလိုက်သသည်။

“ပြဿနာ မရှာနဲ့” ရန်ကိုင်သည် စုန်းမလေး၏လက်ကို သူ့လက်ဖြင့် ဖမ်းချုပ်ကိုင်လိုက်သည်။ စုန်းမလေးမှာ ရုန်းရန် ကြိုးစားသော်လည်း ရန်ကိုင်၏ ချုပ်ကွင်းမှ မလွတ်မြောက်နိုင်ခဲ့ပေ။

တန်းစီရပ်စောင့်နေကြေသော မွန်းစတားမျိုးနွယ်စုဝင် ကျင့်ကြံသူများ မျက်လုံးများသည် ထိုမြင်ကွင်းကိုကြည့်ရင်း မီးထွက်လုမတတ် ဖြစ်လာခဲ့လေသည်။

ရိုင်းစိုင်းလိုက်လေခြင်း… ထိုလူသားကောင်လေးသည် သူတို့၏ သခင်မလေးကို လိင်ပိုင်းဆိုင်ရာ စော်ကားခဲ့ရုံမက သခင်မလေး၏ လက်ကိုပင် အတင့်ရဲပြီး ကိုင်ရဲသည်။ ထိုလုပ်ရပ်သည် လုံးဝ သည်းခံ၍ရသည့် လုပ်ရပ်တစ်ခု မဟုတ်ချေ။

အကုန်လုံးသည် ရန်ကိုင်ဆီသို့ ပြေးဝင်ပြီး သင်ခန်းစာ ပေးတော့မည်အပြု သူတို့ သခင်မလေး၏ ထူးထူးဆန်းဆန်း အမူအရာကို မြင်ပြီး ပြေးထွက်ရန် ကြံနေသည့် ခြေလှမ်းများ ရုတ်တရက် ရပ်တန့်သွားခဲ့သည်။ သခင်မလေး၏ မျက်နှာသည် ရှက်သွေးဖြာနေသည့်နှယ် အနည်းငယ် နီမြန်းနေပြီး ခေါင်လေးကိုလည်း အနည်းငယ် ငုံ့ထားခဲ့သည်။

ဘာတွေများ ဖြစ်ပျက်သွားလေသနည်း။ သူတို့ သခင်မလေး ဘာကြောင့် ထိုကဲ့သို့ ပြုမူနေရသနည်း။

ခန်းမထဲတွင် ရှိနေကြသော မွန်းစတားမျိုးနွယ်စုဝင်အားလုံး မှင်သက်သွားခဲ့ကြလေသည်။

“အစုတ်ပလုတ်ကောင်” စုန်မလေးသည် မကျေမနပ်အမူအရာဖြင့် ကျိန်ဆဲလေတော့သည် “ငါမွန်းစတားဧကရာဇ်ကြယ်မှာ ရှိနေတယ်လို့ နင့်ကို ငါမပြောခဲ့ဘူးလား။ ဘာလို့ အခုမှ ရောက်လာတာလဲ”

“မတတ်နိုင်ဘူးလေ။ ကြယ်စီရင်စုကြီးတစ်ခုလုံးကို ဖြတ်ပြီး ဒီကို လာဖို့က ဖြစ်မှမဖြစ်နိုင်တာ” ရန်ကိုင်က ကူကယ်ရာမဲ့စွာဖြင့် ရှင်းပြလိုက်လေသည် “ဒီတစ်ကြိမ် ရောက်လာတာတောင် ကံကောင်းသွားတာကြောင့်လို့ ပြောလို့ရတယ်။ ဘာပဲဖြစ်ဖြစ်၊ နောက်ဆုံး ငါရောက်လာခဲ့ပြီလေ။ ဒါကြောင့် ဒေါသ မထွက်တော့နဲ့နော် ချင်းလော့၊ အခြားလူတွေကြည့်နေတယ်။ ရှက်စရာတွေ ဖြစ်ကုန်မယ်”

“သူတို့ကြည့်နေတာ ဟိုးအစောကြီးကတည်းက” ရှန်ချင်းလော့က ရန်ကိုင်ဘက်သို့လှည့်၍ “နင်ပဲ အခုလို ဖြစ်စေချင်ခဲ့တာ မဟုတ်ဘူးလား။ နင်အခု ကျေနပ်ပြီလား”

“ဟားဟား” ရန်ကိုင်က ပြုံးလျက် “တကယ်တော့ ငါနဲ့ စီနီယာ မမလေးကို လာတွေ့မယ်လူက နင်ဖြစ်နေလိမ့်မယ်လို့ ငါတကယ် မထင်ထားဘူး။ တကယ်ကြောင်သွားတဲ့လူကို ပြောခိုင်းရင် ငါ့ကိုယ်ငါပဲ ပြောရမှာ”

“အဲ့လိုဆိုမှတော့ ဒီတစ်ကြိမ် ငါနင့်ကို လွှတ်ပေးလိုက်မယ်” ရှန်ချင်းလော့က နှာခေါင်းရှုံ့လိုက်လေသည်။

ထိုနှစ်ယောက် သမီးရည်းစားသဖွယ် တရင်းတနှီး ပြုမူနေသည်ကို ကြည့်ရင်း ခန်းမထဲတွင် ရှိနေသော မွန်းစတားမျိုးနွယ်စုဝင် ကျင့်ကြံသူအားလုံး မှင်သက်နေခဲ့ကြလေသည်။

သူတို့ ပြောဆိုဆက်ဆံနေပုံကို ကြာပြီး၊ မြင်ပြီးနောက်တွင် ထိုလူသားကောင်လေးနှင့် သူမတို့၏ သခင်မလေးမှာ အသိအကျွမ်းများ ဖြစ်နေကြောင်းကို သူတို့ သိလိုက်ကြလေပြီ။ ထို့အပြင် သူတို့နှစ်ဦးကြားရှိ ဆက်ဆံရေးသည် ရိုးရိုး ဆက်ဆံရေးပင် မဟုတ်။ မဟုတ်လျှင် ယခုကဲ့သို့ လူမြင်ကွင်း၌ ရင်းရင်းနှီးနှီး ပြုမူနေကြလိမ့်မည် မဟုတ်ပေ။

သို့သော် ထိုအချက်သည် အကုန်လုံးကို ပို၍ လက်ခံရ ခက်သွားစေ၏။

ယုရှုန်းသည်လည်း ထိုမြင်ကွင်းကို မျက်လုံး အပြူးသားဖြင့် ရပ်ကြည့်နေလေသည်။

သူ့ညီမလေး ဤကဲ့သို့ သိမ်သိမ်မွေ့မွေ့နှင့် ပြည့်နေသည်ကို သူတစ်ခါမ မမြင်ဖူးချေ။ ထိုအပြင် လက်ရှိ သူ့ညီမလေးသည် အတော်လေးကို ကျေနပ်ပြုံးပျော်ရွှင်နေခဲ့သည်။

ယခင်ကဆိုလျှင် သူ့ညီမလေးသည် အမြဲတမ်း တွေတွေငိုင်ိုင်နဲ့ ရှိနေတတ်လေ့ရှိသူ တစ်ဦးဖြစ်သည်။

“နင့်အဆင့်အတန်းက အရမ်းမြင့်တဲ့ပုံပဲ” ရန်ကိုင်က မှတ်ချက်ပေးလိုက်သည်။

ရှင်းရှင်းပြောရလျှင် ရှန်ချင်းလော့ကို ခန်းမထိပ်ပိုင်းတွင် မြင်လိုက်စဉ်က သူတကယ်ကို အံ့အားသင့်သွားခဲ့သည်။ ရှန်ချင်းလော့ကို လနီမျိုးနွယ်စုခေါင်းဆောင်မှ မွေးစားသမီးအဖြစ် ခေါ်ယူမွေးစားခဲ့သော်လည်း သူမသည် လူသားတစ်ယောက် ဖြစ်နေဆဲ။ ထို့ကြောင့် ရှန်ချင်းလော့ အနေဖြင့် ဤနေရာ၌ အခြေကျရန် ခက်ခဲလိမ့်မည်ဟု ရန်ကိုင် တွေးထင်မိခဲ့ဖူးသည်။ ယနေ့ လက်ရှိ လူတွေ့မြင်လိုက်ရမှပဲ သူထင်ထားသလို မဟုတ်မှန်း သိလိုက်ရတော့သည်။

“အင်း၊ မွေးစားအမေက ငါ့ကို အရမ်းတန်ဖိုးထားတာလေ။ ဒါကြောင့် မွန်းစတားမျိုးနွယ်စုက ဘယ်သူမှ ငါ့ကို မလေးမစား မလုပ်ရဲဘူး” ရှန်ချင်းလော့က ပြန်ပြောလိုက်သည်။

“ဒါနဲ့ သူကဘယ်သူလဲ” ရန်ကိုင်က ယုရှုန်းအားကြည့်၍ မေးလိုက်၏။

“သူက ငါ့လိုပဲ။ မွေးစားအမွေက ခေါ်မွေးစားထားတဲ့ မွေးစားသား တစ်ယောက်။ နာမည်အရတော့ ငါ့အစ်ကိုပေါ့။ ဒါပေမယ့် သူက တကယ့် မွန်းစတားမျိုးနွယ်စုဝင်တစ်ဦးပဲ” ရှနင်းချန်က ရှင်းပြလိုက်သည်။

“တွေ့ရတာ ဝမ်းသာပါတယ် ယောက်ဖ” ရန်ကိုင်က ရုတ်တရက် ခေါင်းမော့၍ ယုရှုန်းအား လှမ်းအော်ခေါ်လိုက်သည်။

ရန်ကိုင်စကားကြောင့် ယုရှုန်း ဖင်ထိုင်လျက် လဲကျလုမတတ် ဖြစ်သွားခဲ့လေသည်။

ရန်ကိုင်နှင့် သူ့ညီမလေး တရင်းတနှီးဆက်ဆံနေပုံကိုကြည့်ပြီး သူတို့ကြားရှိ ဆက်ဆံရေးကို အနည်းငယ် မယုံသင်္ကာ ဖြစ်နေသေးလျှင်ပင် ယခု ရန်ကိုင်သူ့အား ခေါ်လိုက်ပုံကို ကြားပြီးနောက် သူ့စိတ်ထဲရှိ သံသယအားလုံး ပျောက်ကွယ်သွားရတော့သည်။

သူ့ညီမလေးနှင့် ထိုမိန်းမအားကိုး ကောင်လေးသည်… သမီးရည်းစားများ ဖြစ်နေကြသည်။

မည်သို့ကဲ့သို့ ဖြစ်နိုင်မည်နည်း။ ယုရှုန်းသည် ရှန်ချင်းလော့အား မယုံကြည်နိုင်စွာဖြင့် စိုက်ကြည့်လိုက်သည်။ သို့သော်လည်း ရှန်ချင်းလော့၏ ငြင်းပယ်မည့်ပုံမပြပဲ ရှက်ပြုံးပြုံး၍သာ သူ့အား ပြန်ကြည့်နေခဲ့သည်။

တကျိကျိ မြည်သံများကြားသဖြင့် လှည့်ကြည့်လိုက်ရာ မခံမရပ်နိုင်သာ ဖြစ်နေကြသော မွန်းစတားမျိုးနွယ်စုဝင်များကို တွေ့လိုက်ရသည်။ မွန်းစတားမျိုးနွယ်စုဝင်များသည် ရန်ကိုင်အား အစိမ်းလိုက် ဝါးစားပစ်ချင်နေသည့်နှယ် မုန်းတီးစွာ စိုက်ကြည့်နေကြ၏။

“အန်…” လက်ရှိ အဖြစ်အပျက်ကို ကြည့်ရင်း ယုရှုန်း ဘာလုပ်လို့ ဘာကိုင်ရမှန်းမသိ ဖြစ်သွားတော့သည်။ သို့သော်လည်း ရုတ်တရက် သူ့အကြည့်သည် ရန်ကိုင်ဘေးနားတွင် တစ်ချိန်လုံး ငြိမ်သက်စွာ ရပ်နေသော ရှနင်းချန်ဆီသို့ ရောက်သွားခဲ့ပြီး မနေနိုင်ဘဲ မေးကြည့်လိုက်သည် “အဲ့ဒါဆို ဒီက မိန်းကလေးကော ဘယ်လိုပက်သက်လဲ”

“စီနီယာမမလေးကလည်း ကျုပ်အမျိုးသမီးပဲ” ရန်ကိုင်က ပြုံး၍ လက်တစ်ဖက်ဖြင့် ရှနင်းချန်၏ ခါးကို ဖက်လိုက်ပြီး ကျန်တစ်ဖက်ဖြင့် ရှန်ချင်းလော့၏ခါးကို ဖက်လိုက်လေသည်။

ရှန်ချင်းလော့သည် အနည်းငယ် ရုန်းကန်ဟန် လုပ်လိုက်သော်ငြား နောက်ပိုင်းတွင် ဆက်၍ ရုန်းကန်မနေတော့ချေ။

ယုံကြည်ချက်အပြည့်ဖြင့် ပြုံးကာ သူ့ရှေ့တွင် ရပ်နေသော လူငယ်လေးကို ကြည့်ရင်း ယုရှုန်း ပါးစပ်အဟောင်းသား ဖြစ်သွားခဲ့၏။ တစ်ချိန်တည်းတွင် ထိုလူငယ်လေးအပေါ် လေးစားစိတ်တို့ သူ့စိတ်ထဲ တဖွားဖွား ထွက်ပေါ်လာခဲ့သည်။

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၇၇)

ရန်ကိုင်နှင့် ရှနင်းချန်တို့ နှစ်ဦးစလုံး နန်းတော်ထဲသို့ ချောချောမွေ့မွေ့နှင့် ဝင်ရောက်လာနိုင်ခဲ့သည်။

ခန်းမထဲရှိ အဖြစ်အပျက်ကို မြင်တွေ့ပြီးနောက် ရန်ကိုင်နှင့် ရှန်ချင်းလော့တို့ နှစ်ဦးသားကြားရှိ ဆက်ဆံရေးကို အကုန်လုံး သတိပြုမိသွားခဲ့ကြပြီး မွန်းစတားမျိုးနွယ်စုဝင် ပညာရှင်များစွာ၏ ရင်ထဲကြိတ်ပြီး မနာလို ဖြစ်သွားခဲ့ကြရလေသည်။

ရှန်ချင်းလော့သည် ရန်ကိုင်နှင့် ရှန်ချင်းလော့တို့ နားနေသည့် အခန်းထဲသို့ ပီလော့အား ခေါ်ကာ ရောက်လာခဲ့သည်။

အစောပိုင်းတွင် လူအများကြီး ရှိနေသဖြင့် ရန်ကိုင်နှင့် စကား အများကြီး မပြောလိုက်ခဲ့ရချေ။ သို့သော် ယခုမူ သူမတွင် အခွင့်အရေး ရှိနေပြီဖြစ်သဖြင့် ရန်ကိုင်နှင့် သူမစိတ်ကြိုက် စကားပြော၍ ရပေပြီ။

ရန်ကိုင်သည် ပီလော့ဆီမှ အကြောင်းအရာများစွာကို သိခဲ့ရသော်ငြား သူမသိသေးသည့် အကြောင်းအရာများစွာ ရှိနေပေသေးသည်။ ရှန်ချင်းလော့နှင့် စကားပြောပြီးနောက်တွင် သူမတို့ မွန်းစတားဧကရာဇ်ကြယ်သို့ ရောက်လာပြီးနောက် အခက်အခဲများစွာ ရင်ဆိုင်ခဲ့ကြောင်း သိလိုက်ရသည်။

ရှန်ချင်းလော့သည် အလွန်အမင်းကိုမှ လှပလှပြီး ညို့ဓါတ်လည်း ပြင်းလှသလို သူမ၏ ခွန်အားမှာလည်း သိပ်ပြီး မြင့်မားခြင်း မရှိသည့်အတွက် မွန်းစတားဧကရာဇ်ကြယ်သို့ ရောက်စဉ်က တဏှာကြီးသည့် လူများ၏ ပစ်မှတ် ပစ်ခဲ့ရသည်။

လနီမျိုးနွယ်စုခေါင်းဆောင်နှင့် မတော်တဆ တွေ့ဆုံပြီး မွေးစားသမီးအဖြစ် မွေးစားခြင်း ခံလိုက်ရသည့် အတွက်သာ မဟုတ်လျှင် သူမဘဝ မည်ကဲ့သို့ ရှိနေမည်လဲ ဆိုသည်ကို ရှန်ချင်းလော့ တွေးပင်မတွေးရဲခဲ့ပေ။

ထို့ကြောင့် လနီမျိုးနွယ်စုခေါင်းဆောင်ကို သူမ အလွန် ကျေးဇူးတင်မိသည်။ ထို့အပြင် သူမအား မွေးစားသမီးအဖြစ် ခေါ်ယူမွေးစားပြီးနောက်တွင် ချီယွဲ့သည့် သူ့အား ကောင်းမွန်စွာ ဆက်ဆံခဲ့သည်။ ထိုအချက်ကို လက်ရှိ လနီမျိုးနွယ်စုထဲရှိ ရှန်ချင်းလော့၏ အဆင့်အတန်းကို ကြည့်ရုံဖြင့် သိနိုင်၏။ အမှန်တရားကို မသိသောသူများမှာမူ သူမအား သွေးသန့် မွန်းစတားသားရဲ တစ်ကောင်ဟုပင် ထင်သွားနိုင်ပေသည်။

လနီမျိုးနွယ်စုထဲ ထိုမျှ ရာထူးအဆင့်အတန်း မြင့်မားသည့် လူသားတစ်ယောက် ရှိနေသည်ကို ကြည့်လျှင် လနီမျိုးနွယ်စု ခေါင်းဆောင်၏ လူသားများပေါ် အထင်အမြင်ကို ကြည့်နိုင်ပေသည်။

ရှန်ချင်းလော့ ပြောသည်ကို ကြားပြီးနောက် ရန်ကိုင်လည်း လနီမျိုးနွယ်စုခေါင်းဆောင်ကို ကျေးဇူးတင်မိသွားသည်။

“တိုတိုပြောရရင်တော့ မွေးစားအမေက ငါ့အပေါ် အရမ်း ကောင်းတယ်။ ပြီးတော့ ငါက ကောင်းကင်လနတ်ဆိုးပင့်ကူရဲ့ အရင်းအမြစ်ကို သန့်စင်လိုက်တာဆိုတော့ ငါ့ကိုယ့်ငါ လူသား စစ်လို့ ပြောလို့မရတော့ဘူး။ ဒါပေမယ့် ငါက မွန်းစတား မျိုးနွယ်စုရဲ့ မျိုးနွယ်စုဝင်လည်း မဟုတ်ပြန်ဘူး” ရှန်ချင်းလော့က ယဲ့ယဲ့လေးပြုံးလျက် မေးလိုက်သည်။

“အဲ့ဒါဆို နင်က ဘာလဲ” ရန်ကိုင်က ပြန်မေးလိုက်သည်။

“လူသားတစ်ဝက်၊ မွန်းစတားတစ်ဝက်ပဲ။ မွန်းစတားဧကရာဇ် ကြယ်မှာ လူသားတစ်ဝက်၊ မွန်းစတားတစ်ဝက်လို့ ပြောတဲ့ အဖွဲ့တွေရှိတယ်။ သူတို့ရဲ့ အဆင့်အတန်းတွေက လူသားတွေထက် နည်းနည်း ပိုမြင့်တယ်”

“လူသားတစ်ဝက်၊ မွန်းစတားတစ်ဝက်…” ရန်ကိုင် ကြောင်သွား၏။

“ဟုတ်တယ်။ လူသားတစ်ဝက်၊ မွန်းစတားတစ်ဝက် မျိုးနွယ်စုတွေက မွန်းစတားမျိုးနွယ်စုနဲ့ လူသားမျိုးနွယ်စုတွေ ပေါင်းဖက်ပြီး မွေးလာကြတဲ့လူတွေ၊ သူတို့ကို လူသားမျိုးနွယ်ကလည်း လက်မခံဘူး။ မွန်းစတား မျိုးနွယ်စုဝင်တွေကလည်း အသိမပြတ်ဘူး။ ဒါကြောင့် သူတို့ရဲ့ အဆင့်အတန်းက အနည်းငယ် ကိုးယိုးကားယား ဖြစ်နေတာ” ရှန်ချင်းလော့က ရှင်းပြလိုက်သည်။

“လူသားနဲ့ မွန်းစတားမျိုးနွယ်စုဝင် ပေါင်းဖက်တာ။ မွန်းစတား ဧကရာဇ်ကြယ်မှာ အဲ့လိုမျိုးကို ခွင့်ပြုလို့လား”

“ဘယ်ခွင့်ပြုပါ့မလဲ။ မွန်းစတားဧကရာဇ်ကြယ်လို မွန်းစတား မျိုးနွယ်စုတွေ ကြီးစိုးတဲ့ နေရာမှာ သူတို့သွေးကို လူသားသွေးတွေ စွန်းထင်းသွားမှာ ဘယ်လိုလုပ်ပြီး သည်းခံနိုင်မှာလဲ။ ဒါပေမယ့် တစ်ခါတစ်လေကျတော့ လူနှစ်ယောက်ကြားက အချစ်ဆိုတာ ဘယ်လိုမှထိန်းချုပ်လို့ မရတဲ့ အရာမျိုးလေ။ ဒါကြောင့် လူသားတစ်ဝက်၊ မွန်းစတားတစ်ဝက် မျိုးနွယ်စုဆိုတာ ဖြစ်လာတာ”

ချင်းလော့က အသာအယာပြုံးလျက် ပြန်ပြောလိုက်သည် “ရိုးရိုးသားသားပြောရရင် အဲ့လူတွေကို ငါတော်တော်လေး လေးစားတယ်။ ဥပမာပြောရရင် နင်နဲ့လာခဲ့တဲ့ စီနီယာဘဟဲပေါ့… သူလည်း အဲ့လိုကိစ္စ ကြုံခဲ့တာလေ”

“ဘဟဲကို နင်သိတာလား” ရန်ကိုင်၏ မျက်ဝဣ်းအစုံ တောက်ပသွား၏။

“အင်း။ အစကတော့ မသိဘူး။ ဟိုတစ်ခါ ယုရှုန်းပြောတာကို ကြားလိုက်မှပဲ သိရတာ”

“ငါကိုပြောပြပါလား။ အဲ့လူအိုကြီးအကြောင်း ငါတော်တော်လေး သိချင်လို့” ရန်ကိုင်က အလျင်အမြန် ပေးလိုက်သည်။

ရှန်ချင်းလော့လည်း အများကြီး မသိချေ။ သို့သော်လည်း ဘဟဲ လစန္ဒမြို့တွင် ပုန်းကွယ်နေနေရခြင်းမှာ လူသားအမျိုးသမီး တစ်ဦးကြောင့် ဖြစ်နေခဲ့သည်။

ဘဟဲသည် လနီမျိုးနွယ်စုခေါင်းဆောင်အောက်တွင် အားအကောင်းဆုံး ပညာရှင်တစ်ဦး ဖြစ်သလို ပါရမီမှာလည်း အလွန် မြင့်မားသည်။ တန်ခိုးရှင်တတိယအဆင့်သို့ သူရောက်ထားသည်မှာ ကြာနေခဲ့လေပြီ။ သူ့ရှီအပေါ် နားလည်နိုင်စွမ်းအရ မည်သည့် တန်ခိုးရှင်အဆင့် ပညာရှင်မှ သူ့ပြိုင်ဘက် မဟုတ်တော့ချေ။

ထိုစဉ်က သူသည် မွန်းစတားဧကရာဇ်ကြယ်၌ တန်ခိုးရှင်ဘုရင် အဆင့်အောက် ပြိုင်ဘက်ကင်းဟု ကျော်ကြားခဲ့ဖူးသည်။

တန်ခိုးရှင်ဘုရင်အဆင့်သို့ ချိုးဖျက်နိုင်သည့် မွန်းစတားဧကရာဇ် ကြယ်၏ ကြယ်ပွင့်များထဲမှလည်း တစ်ဦးဖြစ်သည်။ သူသာ ထိုအဆင့်သို့ ရောက်သည်နှင့် ချီယွဲ့နှင့် တန်းယှဉ်ကာ ရပ်တည်နိုင်ပြီး မျိုးနွယ်စုခေါင်းဆောင်အဆင့်ရှိ တည်ရှိမှုမျိုး ဖြစ်လာပေလိမ့်မည်။

သို့သော်လည်း ဘဟဲသည် လူသားတစ်ဦးနှင့် သွားချစ်ကျွမ်းဝင်မိခဲ့သည်…

မွန်းစတားမျိုးနွယ်စုဝင်များသည် လူသားများနှင့် မွန်းစတားများ ပေါင်းဖက်ခြင်းကို ငြင်းဆိုကြသည်။ ထိုသို့ဖြစ်လေရာ အနာဂတ် ကြယ်ပွင့်တစ်ဦးဖြစ်သည့် ဘဟဲကဲ့သို့သော လူမျိုးကို မည်ကဲ့သို့ လူသားတစ်ဦးနှင့် ပေါင်းဖက်ခွင့်ပြုမည်နည်း။ သူကြုံတွေ့ရသည့် အခက်အခဲသည် သာမန်ထက် အများကြီး ပိုကြီးမားပေသည်။ အထူးသဖြင့် လနီမျိုးနွယ်စုခေါင်းဆောင် ကိုယ်တိုင်ပါက တားဆီးလာသည့်အခါ ဘဟဲဘဝ ပို၍ ဒုက္ခရောက်ရတော့၏။

အခြေအနေသာ ဤအတိုင်း ဆက်သွားနေခဲ့လျှင် ဘဟဲ၏ မောက်မာသော စိတ်နေစိတ်ထားအရ မွန်းစတားမျိုးနွယ်စု တစ်ခုလုံးကို ကျောခိုင်းသွားမည်မှာ သေချာသလောက်ရှိ၏။ ထိုအခါ သူသည် မွန်းစတားမျိုးနွယ်စုဝင် တစ်ခုလုံး၏ ပစ်မှတ် ဖြစ်လာရပေလိမ့်မည်။

လနီမျိုးနွယ်စုခေါင်းဆောင်သည်လည်း ထိုကိစ္စနှင့် ပက်သက်၍ အကြီးအကျယ် ခေါင်းစားခဲ့ရသည်။ သူမ၏ နံပါတ်တစ်ဗိုလ်ချုပ် ထိုကဲ့သို့ ကူကယ်ရာမဲ့ အခြေအနေထဲ ရောက်သွားမည်ကို ချီယွဲ့လည်း မမြင်ချင်ချေ။

ဘဟဲ၏ ပါရမီကို လေးစားသောအားဖြင့် သူနှင့် ထိုအမျိုးသမီးကို ပေါင်းဖက်ခွင့်ပြုရန်ပင် စဉ်းစားတွေးတောခဲ့ဖူးသည်။

မျိုးနွယ်စုဝင်နှစ်ဦးသည် အတူတကွ မတည်ရှိနိုင်သော်လည်း မွန်းစတားမျိုးနွယ်စုဝင် ပညာရှင်အချို့သည် အလှလေးအချို့ကို သူတို့နှင့်အတူ ထားရှိသည်မှာ သဘာဝသာ ဖြစ်သည်။ မည်သည့် မွန်းစတားမျိုးနွယ်စုဝင် ပညာရှင်များအိမ်တွင် လူသား မိန်းမလှလေးများ မရှိလို့နည်း။ အကုန်လုံးသည် ထိုအချက်ကို သတိပြုမိကြသော်လည်း မည်သူမှ လူသိရှင်ကြား ထုတ်မပြောကြပေ။

ဘဟဲသာ တန်ခိုးရှင်ဘုရင်အဆင့်ကို ချိုးဖျက်နိုင်သရွေ့ သူနှင့် ထိုအမျိုးသမီး ပေါင်းဖက်လိုက်လျှင်ပင် မည်သည့် အကျိုးဆက်မှ ရင်ဆိုင်ရတော့မည် မဟုတ်ချေ။

သို့သော်လည်း ချီယွဲ့မှ အကြောင်းစုံကို သေချာ မရှင်းပြရသေးခင် ဆိုးရွားသည့် အဖြစ်အပျက်တစ်ခု ဖြစ်ပျက်သွားခဲ့သည်။

ဘဟဲ ချစ်ကြိုက်နေသည့် လူသားအမျိုးသမီးသည် အဆင့်သေး တစ်ဆင့် ချိုးဖျက်ရန် ကြိုးစားနေစဉ်အတောအတွင်း ကျင့်ကြံခြင်း လမ်းကြောင်း သေဖယ်သွားခဲ့ပြီး သေဆုံးသွားခဲ့သည်။

ထိုအကြောင်းကို သိလိုက်ရချိန် ဘဟဲ အလွန်ကိုမှ ဝမ်းနည်းသွားပြီး ယူကြုံးမရ ဖြစ်သွားခဲ့သည်။

သူ့အမျိုးသမီး ကျင့်ကြံခြင်းလမ်းကြောင်း သွေဖယ်သွားပြီး သေသွားရခြင်းမှာ လနီမျိုးနွယ်စုခေါင်းဆောင်မှ ဝင်ရှုပ်သည့် အတွက်ကြောင့် ဖြစ်သည်ဟု အထင်ရောက်သွားခဲ့၏။

ဒေါသထွက်ထွက်နှင့် ဘဟဲသည် လခြမ်းတောင်ပေါ်သို့ တက်ပြီး ချီယွဲ့နေထိုင်သည့် အခန်းဆီသို့သွားကာ မေးခွန်းထုတ် သောင်းကျန်းတော့၏။

ထိုနေ့မှစ၍ ဘာတွေဖြစ်ပျက်ခဲ့မှန်း မည်သူမှမသိကြ။ နောက်တစ်နေ့တွင် သခင်မချီယွဲ့မှ ဘဟဲ၏ ခေါင်းဆောင်အပေါ် မလေးစားမှု၊ မနာခံမှုတို့ကြောင့် သူမကိုယ်တိုင် ကွပ်မျက်ပစ်လိုက်သည်နှင့် ကြေညာခဲ့သည်။

ထိုအချိန်မှစ၍ နောက်နှစ်ပေါင်း နှစ်ရာတိတိ ဘဟဲနှင့် ပက်သက်သည့် မည်သည့် သတင်းမှ မထွဥ◌်ပေါ်လာခဲ့။

“ဒီတော့… လနီမျိုးနွယ်စုခေါင်းဆောင်က ဘဟဲကို မသတ်ဘဲ လွှတ်ပေးလိုက်တာပေါ့” ရန်ကိုင်က ပြောလိုက်သည်။

“ဟုတ်လောက်တယ်” ရှန်ချင်းလော့က အသာအယာ ခေါင်းညိတ်၍ “မွေးစားအမေက တန်ခိုးရှင်ဘုရင် ဒုတိယအဆင့် ရောက်နေတဲ့ ပညာရှင်တစ်ယောက်။ သူသာ ဆန္ဒရှိရင် ဘဟဲကို အသာလေး သတ်ပစ်လိုက်လို့ရတယ်။ သူလုံးဝ အသက်ရှင်စရာအကြောင်း မရှိဘူး”

ရန်ကိုင် ခေါင်းညိတ်လိုက်သည်။

“ရန်ကိုင်…” ရှန်ချင်းလော့က ရုတ်တရက် မေးလိုက်သည်။

“အန်”

“အဲ့လူသားမိန်းကလေး… ကျင့်ကြံခြင်းလမ်းကြောင်း သွေဖယ်သွားတာ မွေးစားအမေနဲ့ ဆက်စပ်နေလိမ့်မယ်လို့ နင်ထင်လား”

“ငါဘယ်လိုလုပ်ပြီး သိမှာလဲ။ ကာယကံရှင် ကိုယ်တိုင်ကလွဲပြီး ဘယ်သူမှ သိမှာမဟုတ်ဘူး” ရန်ကိုင်က ယဲ့ယဲ့လေး ပြုံးလျက် ပြန်ပြောလိုက်သည်။ ရှန်ချင်းလော့ မျက်နှာထက်ရှိ စိုးရိမ်နေသည့် အမူအရာကို မြင်သော် ရန်ကိုင် မျက်မျောင်ကြုတ်သွားခဲ့ပြီး ပြန်မေးလိုက်လေသည် “နင်ဘာတွေ စိုးရိမ်နေတာလဲ”

ရှန်ချင်းလော့က ဖြည်းဖြည်းချင်း ခေါင်းခါလိုက်ပြီး အားတင်းပြုံးလျက် “ဘာမှမဟုတ်ဘူး။ မီထျန်းဆိုတဲ့ကောင်ကို နင်သတိထားနော်။ နင်သူနဲ့ အချင်းများခဲ့တယ်လို့ ငါငသတင်းကြားတယ်။ မီထျန်းက အရမ်း မာနာကြီးတာ၊ နင်သူ့ကို ရန်သွားစလိုက်ပြီဆိုတော့ သူနင့်ကို လုံးဝ အလွတ်ပေးတော့မှာ မဟုတ်ဘူး”

“စိတ်မပူနဲ့။ သူငါ့ကို ဘာမှမလုပ်နိုင်ဘူး” ရန်ကိုင်က ယုံကြည်ချက် အပြည့်ဖြင့် ပြုံးကာ ပြန်ပြောလိုက်သည်။

နှစ်ယောက်သား ခဏမျှ ဆက်စကားပြောနေပြီးနောက်တွင် ရှန်ချင်းလော့နှင့် ပီလော့ ပြန်ထွက်သွားလေသည်။

“ဂျူနီယာမောင်လေး၊ ငါတို့ နောက်ဘာဆက်လုပ်ကြမလဲ” ရှန်ချင်းလော့ ထွက်သွားပြီးနောက်တွင် ရှနင်းချန်က မေးလိုက်၏။

“မစဉ်းစားရသေးဘူး” ရန်ကိုင် ကိုးယိုးကားယား အမူအရာဖြင့် ပြုံးလိုက်သည်။ ရှန်ချင်းလော့၏ အခြေအနေကို သိရအောင် နန်းတော်ထဲဝင်နိုင်ရန် အတတ်နိုင်ဆုံး ကြိုးစားခဲ့သည်။ ယခုသူမ အဆင်ပြေပြေနှင့် ရှိနေကြောင်း သိလိုက်ရသည့်နောက်တွင် သူစိတ်အေးသွားခဲ့ရလေပြီ။

“အဲ့ဒါဆို အစ်မချင်းလော့ကို ခေါ်သွားမှာလား” ရှနင်းချန်က မေးလိုက်သည်။

“မသိဘူး။ သူဘာလုပ်ချင်လဲ အရင်မေးကြည့်ရင် အကောင်းဆုံးပဲ။ သူဒီမှာ ဆက်နေရင် ပိုကောင်းမယ်လို့တော့ ထင်တာပဲ။ မွန်းစတား ဧကရာဇ်ကြယ်ရဲ့ အနေအထားက သူ့ကျင့်ကြံရေးအတွက် အရမ်း အကျိုးရှိတယ်လေ”

“အင်း” ရှနင်းချန် ခေါင်းညိတ်လိုက်သည်။

ဘဟဲ အဖြစ်အပျက်ကို ကြားပြီးနောက်တွင် ရန်ကိုင် အနေဖြင့် ရှန်ချင်းလော့ကို ဤနေရာမှ ခေါ်သွားချင်သည် ဆိုပါက သူ့အတွက် အတော်လေး ခက်ခဲပေလိမ့်မည်။ ဘဟဲနှင့် ချစ်ကြိုက်ခဲ့သည့် အမျိုးသမီး သေသွားရခြင်းမှာ လနီမျိုးနွယ်စုခေါင်းဆောင်နှင့် ပက်သက်နေသလား၊ မပက်သက်ဘူးလား မည်သူမှ မသိကြပေ။ လနွယ်မျိုးနွယ်စုခေါင်းဆောင်၏ စနက်ကြောင့်သာ ဆိုလျှင်တော့…

ရှန်ချင်းလော့ ဘာကြောင့် စိုးရိမ်သွားသလဲဆိုသည်ကို ရှနင်းချန် နားလည်ပေသည်။ သူမသည်လည်း ရန်ကိုင်နှင့် ပက်သက်၍ ထိုကဲ့သို့ တူညီသည့် ဖြစ်ရပ်မျိုး ထပ်ဖြစ်မည်ကို စိုးရိမ်နေခြင်း ဖြစ်သည်။

မွေးစားသမီး၏ အနာဂတ်အတွက် လူသားတစ်ယောက် သေသွားသည်ကို လနီမျိုးနွယ်စုခေါင်းဆောင် ဂရုစိုက်နေလိမ့်မည် မဟုတ်ချေ။

“ဒါပေမယ့် ဒီရောက်ပြီဆိုတော့ ပစ္စည်းကောင်းကောင်းလေးတွေ တတ်နိုင်သလောက် စုဆောင်းကြတာပေါ့” ရန်ကိုင်က ရှနင်းချန်အား အပြုံးဖြင့်ကြည့်ရင်း “ဒီကိစ္စကိုတော့ စီနီယာ မမလေးအပေါ် အားကိုးမယ်နော်”

…………

ရှန်ချင်းလော့သည် ဧည့်သည်ဆောင်မှ ထွက်လာပြီးနောက် ပီလော့နှင့်အတူ ချီယွဲ့၏ နားနေဆောင်ထဲသို့ ချက်ချင်း တန်းသွားလိုက်သည်။

ရှန်ချင်းလော့ကို ချီယွဲ့မှ အလွန်တန်ဖိုးထားပြီး သူမ၏ အနာဂတ် ဆက်ဆံသူအဖြစ် သတ်မှတ်ထားခဲ့သည်။ ထို့ကြောင့် နန်းတော်ထဲ၌ မည်သူမှ ရှန်ချင်းလော့ကို မတားဆီးရဲကြပေ။ သူမကို မြင်သည့် မွန်းစတားမျိုးနွယ်စုဝင် ကျင့်ကြံသူအားလုံး ဦးညွှတ်အလေးပြုကြရ၏။

ချီယွဲ့၏ နားနေဆောင်အပြင်ဘက်သို့ ရောက်သော် ထိုနေရာတွင် လူထွားကြီးတစ်ယောက် ရပ်နေသည်ကို တွေ့လိုက်ရသည်။ ထိုလူသည် တံခါးပေါက်အပြင်ဘက်တွင် ရပ်လျက် တစ်ခုခုကို ချောင်းနားထောင်နေသည့်အလား မျက်မှောင်ကြုတ်လျက် တံခါးပေါက်ဆီ နားနားကပ်ကပ်ထားခဲ့သည်။

“ယုရှုန်း” ရှန်ချင်းလော့ လမ်းလျှောက်လာပြီး အော်မေးလိုက်၏။

ထိုအော်သံကိုကြားသော် ယုရှုန်း အလျင်အမြန် လှည့်လိုက်ပြီး နားကပ်နား လက်ညိုးကပ်ပြကာ တိုးတိုးနေရန် ပြောလိုက်၏။

“မွေးစားအမေ နားနေဆောင်မှာ နင်ဘာတွေ ခိုးကြောင်ခိုးဝှက် လုပ်နေတာလဲ။ မွေးစားအမေ မိသွားရင် အပြစ်ပေးခံရမှာ နင်မကြောက်ဘူးလား” ရှန်ချင်းလော့က မျက်မှောင်ကြုတ်၍ မေးလိုက်လေသည်။

“အထဲမှာ စီနီယာဘဟဲ နှိပ်စက်ခံနေရတဲ့ပုံပဲ။ နားထောင်ကြည့်” ယုရှုန်းသည် အခန်းထဲသို့ လက်ညိုးထိုးပြလိုက်ပြီး စိတ်ဝင်တစား အမူအရာဖြင့် တိုးတိုးလေး ပြောလိုက်သည်။

ရှန်ချင်းလော့ အံ့အားသင့်သွားခဲ့သော်ငြား သေသေချာချာ နားထောင်ကြည့်လိုက်သည့်နောက်တွင် အခန်းထဲမှ နာကျင်စွာ အော်ဟစ်သံများ ထွက်ပေါ်နေသည်ကို တွေ့ရှိလိုက်ရသည်။

ထိုအော်သံများကိုကြားသော် ရှန်ချင်းလော့မျက်နှာ အနည်းငယ် ဖြူလျော်သွားခဲ့ပြီး အံ့အားတသင့် လေသံဖြင့် မေးလိုက်လေ၏ “ဒီတော့ မွေးစားအမေက စီနီဘာဘဟဲကို ခွင့်မလွှတ်ဘူးပေါ့”

ဘဟဲကို တစ်ခါမှမတွေ့ဖူးသော်လည်း ဘဟဲနှင့် သူမ၏ အခြေအနေသည် အတော်လေး တူညီနေခဲ့သည်။ ထို့ကြောင့် မျိုးနွယ်စုခေါင်းဆောင်သည် ဘဟဲကို ခွင့်လွှတ်မပေးခဲ့လျှင် ရန်ကိုင်ကိုလည်း လွှတ်ပေးလောက်မည် မဟုတ်ချေ။

ထို့ကြောင့် ဘဟဲ၏ အဖြစ်အပျက်ကို မြင်ပြီးနောက် သူမစိတ်ထဲ စိုးရိမ်မိသွားခဲ့ခြင်း ဖြစ်သည်။ ဘဟဲ နှိပ်စက်ခံနေရသည့် အသံများကို နားထောင်ရင်း ရန်ကိုင် နှိပ်စက်ခံနေရသည်ဟု တဖြည်းဖြည်း မြင်ယောင်မိလာသည်။

“ငါမသိဘူး။ မွေးစားအမေက ပုံမှန်ဆို ဒေါသထွက်ခဲတယ်။ တစ်ယောက်ယောက် အမှားလုပ်ရင်တောင် အပြစ်တင်တာပဲ ရှိတယ်။ ပြင်းပြင်းထန်ထန် အပြစ်ပေးလေ့မရှိဘူး။ စီနီယာဘဟဲ အခုလို ဖြစ်နေတာကိုကြည့်ရင် မွေးစားအမေ တကယ် ဒေါသထွက်နေလို့ ဖြစ်လိမ့်မယ်” ယုရှုန်က ချောင်းနားထောင်ရင်း ပြန်ပြောလိုက်သည်။

ထိုစကားကို ကြားသည့်အခါ ရှန်ချင်းလော့၏ မျက်နှာအမူအရာ ပို၍ ပျက်ယွင်းသွားခဲ့ရသည်။ မွေးစားအမေနှင့် တွေ့သည့်အခါ မည်ကဲ့သို့ပြောလျှင် ကောင်းမလဲ စဉ်းစားနေရင်း သူမရင်ထဲရှိ စိုးရိမ်စိတ်တို့ ပိုပို၍ ကြီးထွားလာခဲ့လေသည်။

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၇၈)

တစ်နာရီကျော်လောက် ကြာပြီးသည့်နောက်တွင် နန်းတော်ထဲရှိ အော်သံများ တဖြည်းဖြည်း တိတ်ဆိတ်သွားခဲ့သည်။

ကြမ်းကြုတ်ခက်ထန်ပြီး သွေးရဲသော ယုရှုန်းပင်လျှင် ထိုအခိုက် အနည်းငယ် စိုးရိမ်ပူပန်မိနေသည်။

နန်းတော်တံခါး ရုတ်တရက် ပွင့်သွားပြီး ပုံရိပ်တစ်ခု ထိုထဲမှ ဒယီးဒယိုင်နှင့် ထွက်လာခဲ့သည်။ ထိုလူ တစ်ကိုယ်လုံး သွေးသံတရဲရဲ ဖြစ်နေပြီး သူ့အရှိန်အဝါမှာလည်း အတော်လေးကို ပရမ်းပတာ ဖြစ်နေခဲ့သည်။

ထိုအခြင်းအရာကို မြင်သော် ရှန်ချင်းလော့၏ မျက်ဝန်းအစုံ မှေးစဉ်းသွားခဲ့လေ၏။

ထွက်လာသည့်လူမှာ ဘဟဲပင် ဖြစ်လေသည်။

ဘဟဲပုံကို ကြည့်ရသလောက် ယခုတစ်ကြိမ် သူမ၏ မွေးစားအမေ တကယ်ကြီး ဒေါသထွက်သွားသည့်ပုံပင်။ ဘဟဲအား ခွင့်လွှတ်ခဲ့သလား ဆိုသည်နှင့်ပက်သက်၍မူ မရှင်းမရှင်းပင် ရှိနေသေးသည်။

“စီနီယာ အဆင်ပြေလား” ယုရှုန်းက ဘဟဲဆီသို့ လမ်းလျှောက်သွားပြီး ထမပေးလိုက်သည်။

“ရတယ်… ငါအဆင်ပြေတယ်။ အနည်းဆုံးတော့ မသေသေးဘူး” ဘဟဲက ဖြည်းဖြည်းချင်း လက်ဝှေ့ရမ်း၍ ပြန်ပြောလိုက်သည်။

ယုရှုန်း တစ်ခုခု ပြောရန် လုပ်လိုက်သော်လည်း ဘဟဲအား မည်ကဲ့သို့ နှစ်သိမ့်ပေးရမလဲမသိသဖြင့် သူ့ပါးစပ်မှ ဘာစကားမှ မထွက်လာခဲ့ချေ။

ဘဟဲသည် ရုတ်တရက် ခေါင်းမော့၍ ရှန်ချင်းလော့အား ကြည့်လိုက်သည်။ ရှန်ချင်းလော့ကို မြင်လိုက်သည့်နောက် သူ့မျက်ဝန်းအစုံ ရုတ်တရက် တောက်ပသွားခဲ့လေသည်။

ခေါင်းတညိတ်ညိတ်ဖြင့် ဘဟဲက ပြောလိုက်သည် “ဒီတော့ ဒီက သခင်မလေးရှန်ပေါ့”

“ချင်းလော့ စီနီယာကို နှုတ်ဆက်ပါတယ်” ရှန်ချင်းလော့က ဦးညွှတ်၍ နှုတ်ဆက်လိုက်သည်။

“သခင်မလေးရှန်က အရမ်း ယဉ်ကျေးနေတာပဲ။ မွန်းစတား မျိုးနွယ်စုက တကယ့် ပါရမီရှင်တစ်ယောက်ကို ရှာတွေ့သွားတာပဲ” ဘဟဲက ပြုံး၍ ပြောလိုက်သည် “ဒီလူအိုကြီး အလှည့်တုန်းက စိတ်အလိုလိုက်မိလိုက်လို့ မျိုးနွယ်စုခေါင်းဆောင် သခင်မရဲ့ မျှော်လင့်ချက်တွေ ရေစုန်မျှော်သွားခဲ့ရတယ်။ သခင်လေးရှန် ကတော့ မျိုးနွယ်စုခေါင်းဆောင်ရဲ့ မျှော်လင့်အချက်အတိုင်း ဖြစ်လာလိမ့်မယ်လို့ မျှော်လင့်ပါတယ်”

“စီနီယာ ပြောတာကို ဂျူနီယာ မှတ်ထားလိုက်ပါ့မယ်…” ရှန်ချင်းလော့က အနည်းငယ် ရှုပ်ထွေးသည့် အမူအရာဖြင့် ပြန်ပြောလိုက်လေသည်။

“အင်း၊ ဝင်သွားတော့လေ။ မျိုးနွယ်စုခေါင်းဆောင် သခင်မ စောင့်နေတယ်” လက်ဝှေ့ရမ်း၍ ပြောလိုက်ပြီးနောက် အားနည်းနေသော သူ့ခန္ဓာကိုယ်ကို သယ်မရင်း တစ်လှမ်းချင်း တစ်လှမ်းချင်း လမ်းလျှောက်ထွက်သွားလေသည်။

တဖြည်းဖြည်း ပျောက်ကွယ်သွားနေသော ဘဟဲ၏ ကျောပြင်ကို ကြည့်ရင်း ရှန်ချင်းလော့နှင့် ယုရှုန်းတို့ နှစ်ဦးစလုံး သက်ပြင်း အသီးသီး ချလိုက်ကြသည်။ တန်ခိုးရှင်ဘုရင်အဆင့် ဖြစ်လာရန် ရေပန်းအစားဆုံး၊ တန်ခိုးရှင်ဘုရင်အဆင့်အောက်တွင် နံပါတ်တစ် ဖြစ်သော ပညာရှင်ကို သူတို့ မွေးစားအမေမှ ပြင်းပြင်းထန်ထန် အပြစ်ပေးလိုက်သည်။

“ချင်းလော့လား၊ ဝင်လာခဲ့လေ” အထဲမှ ချီယွဲ့၏အသံ ထွက်ပေါ်လာခဲ့သည်။

သူမ၏ မွေးစားအမေ ခေါ်သံကိုကြားသော် ရှန်ချင်းလော့ရင်ထဲ စိတ်ပူမိသွဦးခဲ့သည်။ သို့သော် နှုတ်ခမ်းလေးကို ကိုက်၍ ရဲဆေးတင်ကာ အထဲသို့ ဝင်သွားလိုက်လေသည်။

“အင်း၊ ငါအရင် ပြန်နှင့်လိုက်မယ်နော်…” ပြောပြီးသည်နှင့် လှည့်ထွက်ပြေးရန် ပြင်လိုက်လေသည်။

“ယုရှုန်း၊ နင်လည်း ဝင်လာခဲ့” ချီယွဲ့၏ အသံ နောက်တစ်ကြိမ် ထွက်ပေါ်လာခဲ့သည်။

ယုရှုန်း လည်ပင်း ကျုံ့သွားခဲ့ပြီး ထွက်ပြေးရန် မြှောက်ထားသော ခြေထောက်ကို ပြန်ချလိုက်သည်။ မိဘနှစ်ပါး သေသွားသဖြင့် ပူဆွေးသောက ရောက်နေသည့် သားတစ်ယောက်နှယ် မသွားချင် သွားချင်ဖြင့် ရှန်ချင်းလော့နောက် လိုက်သွားလေသည်။

ငါအစောကြီးကတည်းက ထွက်သွားလိုက်သင့်တာ ယုရှုန်းရင်ထဲ နောင်တ ကြိတ်ရနေခဲ့သည်။

မီးထိန်ထိန်ညီးအောင် ထွန်းညှိထားသော ကျယ်ပြောလှသည့် နန်းတော်ထဲတွင် ဝတ်ရုံရှည်ဝတ်ထားသော ချောမောလှပသည့် အမျိုးသမီးတစ်ဦး ငြိမ်သက်တည်ငြိမ်စွာ ထိုင်နေခဲ့သည်။

ထိုအမျိုးသမီးသည် အရွယ်ရောက်ပြီးသော အမျိုးသမီးတစ်ဦး၏ ကိုယ်လုံးကိုယ်ပေါက် အချိုးစားကို ပိုင်ဆိုင်ထား၏။ ခါးအစုံမှာလည်း သေးကျဉ်လှသည်။ သူမဆီမှ မည်သည့် စွမ်းအင် အရှိန်အဝါမှ ဖြာထွက်နေခြင်းမရှိသဖြင့် ထိုအမျိုးသမီးသည် မည်သည့်အခါမှ ကျင့်ကြံဖူးခြင်းမရှိသော သာမန်သေမျိုး တစ်ဦးနှင့်ပင် တူနေသေးသည်။

ထိုအမျိုးသမီးသည် မွေးကတည်းက အလွန် ချောမောလှပမည်မှန်း သိသာလှသည်။ ပတ္တမြားရောင် တောက်ကာ ရွှန်းစိုနေသော နီစွေးစွေး နှုတ်ခမ်းအစုံသည် လာနမ်းလှည့်ပါဟု ဖိတ်ခေါ်နေသလိုလို၊ အသားအရေမှာလည်း နှင်သားကဲ့သို့ ဖြူဖွေးဥနေခဲ့သည်။

ဆွဲဆောင်မှုပိုင်းတွင် သူမသည် ရှန်ချင်းလော့အောက် မနိမ့်ကျချေ။ သို့သော် သူမတွင် ရှန်ချင်းလော့ကဲ့သို့ မွေးရာပါညို့ဓါတ်မျိုး ရှိမနေခဲ့ချေ။ ထို့အစား အဆပေါင်းများစွာ ပိုအားကောင်းသော တော်ဝင်အရှိန်အဝါတစ်မျိုးကို ပိုင်ဆိုင်ထားသည်။

ထိုအမျိုးသမီးသည် မွန်းစတားဧကရာဇ်ကြယ်၏ မျိုးနွယ်စုခေါင်းဆောင် ဆယ်ယောက်အနက်မှ တစ်ယောက်ဖြစ်ပြီး ရှန်ချင်းလော့နှင့် ယုရှုန်းတို့၏ မွေးစားအမေ ချီယွဲ့ ဖြစ်သည်မှာ အနည်းငယ် မယုံချင်စရာ ကောင်းနေခဲ့သည်။

နန်းတော်ထဲသို့ ဝင်လာပြီးနောက် ဝမ်းကွဲနှစ်ယောက် ချီယွဲ့အား နှုတ်ဆက်လိုက်ကြသည်။ ချီယွဲ့ ခေါင်းညိတ်ပြသည်ကို မြင်မှ သတိကြီးကြီးဖြင့် ထိုင်လိုက်လေသည်။

“လစန္ဒာမြို့ကနေ ရောက်လာတဲ့ ဆေးဝိဇ္ဇာအတွက် ပြင်စရာ ရှိတာတွေ ပြင်ဆင်ပြီးသွားပြီလား” ချီယွဲ့က မေးလိုက်သည်။

“အကုန်လုံး ပြင်ဆင်ပြီးသွားပါပြီ မွေးစားအမေ၊ မွေးစားအမေ သူ့ကို တွေ့ချင်လို့လား” ရှန်ချင်းလော့က ပြန်မေးလိုက်သည်။

“ထားလိုက်ဦး။ သူက ဆေးတိမ်တိုက်ပါတဲ့ တန်ခိုးရှင်အဆင့် ဆေးလုံးကို ဖော်စပ်နိုင်တယ်ဆိုတော့ တကယ်ကို ပါရမီရှိလို့ပဲ ဖြစ်ရလိမ့်မယ်။ ဒါပေမယ့် သူနဲ့ယှဉ်လိုက်ရင် သူနဲ့အတူ ပါလာတဲ့ လူသားကောင်လေးကို ငါပိုစိတ်ဝင်စားတယ်။ သူနဲ့ ပက်သက်တဲ့ မယုံနိုင်စရာ သတင်းတွေ ငါကြားလိုက်ရတယ်။ ချင်းလော့၊ နင်ငါ့ကို ပြောချင်တာများ ရှိလား” ချီယွဲ့က ရှန်ချင်းလော့ဘက်သို့ လှည့်၍ မေးလိုက်သည်။

ရှန်ချင်းလော့၏ ခန္ဓာကိုယ်လေး တုန်ရီသွားခဲ့ပြီး အလျင်စလို ဒူးထောက်လိုက်ကာ အံကြိတ်၍ တောင်းဆိုလိုက်လေသည် “မွေးစားအမေ၊ ကျေးဇူးပြုပြီး ညှတာပေးပါနော်။ အဲ့လူက…”

“နင်ဘာတွေ ဒီလောက်တောင် စိုးရိမ်နေတာလဲ။ မွေးစားအမေက သူ့ကို ကိုက်မစားပါဘူး။ အရင်ထလိုက်။ ထပြီးမှ ပြောကြတာပေါ့” ချီယွဲ့က လက်ဆန့်ကာ ရှန်ချင်းလော့ကို ထူမပေးလိုက်သည်။

ချီယွဲ့ ဒေါသမထွက်သည်ကို မြင်မှပဲ ရှန်ချင်းလော့ စိတ်ထဲ အနည်းငယ် စိုးရိမ်စိတ် ပြေသွားခဲ့သည်။

“ငါ့ကိုပြော၊ ကောလဟာလတွေက အမှန်ပဲလား” ချီယွဲ့က ဆက်မေးလိုက်သည်။

“အမှန်ပါပဲ” ရှန်ချင်းလော့က အံကြိတ်၍ ပြန်ပြောလိုက်သည်။

“အို၊ အဲ့တော့ ဒီလော့က နင့်ကြိုက်နေတဲ့လူပေါ့” ချီယွဲ့က ယဲ့ယဲ့လေး ရယ်မောလိုက်သည်။

“ဟုတ်ပါတယ်”

“သူဘာတွေ ဒီလောက်ကြီးကျယ်နေလို့ နင့်လို လူတစ်ယောက်က သူ့ကို ဒီလောက် ကြိုက်နေရတာလဲ။ ယုရှုန်းပြောတော့ သူက မိန်းမအားကိုးနဲ့ သာယာနေတဲ့ကောင်ဆို”

“ဘာမှမဟုတ်ဘူး။ ယုရှုန်း မဟုတ်တုတ်ကတွေ လျှောက်ပြောနေတာ” ရှန်ချင်းလော့က ယုရှုန်းအား စားတော့ဝါးတော့မတတ် အကြည့်ဖြင့် စိုက်ကြည့်လိုက်ရာ ယုရှုန်း ခေါင်းလေး ပုဝင်သွားခဲ့ပြီး ရူးချင်းယောင်ဆောင်လျက် အပေါ်သို့သာ မော့ကြည့်နေတော့သည်။

“အဲ့ဒါဆို ငါ့ကို သူအကြောင်းပြောပြ။ နင်ဘာသို့ သူ့ကို ဘယ်တော့မှ မေ့မရ ဖြစ်နေလဲဆိုတာ ပြောပြ” ချီယွဲ့သည် ထိုအကြောင်းကို စိတ်ဝင်စားနေသည့်အလား ဆက်မေးလိုက်၏။

ရှန်ချင်းလော့က ရှက်ပြုံးပြုံးလျက် “ကျွန်မတို့ ပထမဆုံး စတွေ့တဲ့ အကြိမ်တုန်းက သူအရမ်းအားနည်းနေတဲ့ အချိန်ပဲ။ အဲ့တုန်းက သမီးက အင်မော်တယ်တက်လှမ်းခြင်း အဆင့်ကိုးမှာ၊ သူကတော့ အစစ်အမှန်ဒြပ်စင်အဆင့်ကို ရောက်ခါစပဲ ရှိသေးတယ်”

“တော်တော်ကွာတာပဲ” ချီယွဲ့ မျက်ခုံးပင့်သွားခဲ့ပြီး “ဒါပေမယ့် သူက အခု တန်ခိုးရှင်ဒုတိယအဆင့် ကျင့်ကြံသူတစ်ယောက် ဖြစ်နေပြီ။ သူ့ကျင့်ကြံခြင်း အမြန်နှုန်းက သမီးလိုပဲ”

ထိုအချက်ကို သိလိုက်သော် ချီယွဲ့ အနည်းငယ် အံ့အားသင့်သွား၏။

ရှန်ချင်းလော့၏ ကျင့်ကြံနှုန်းသည် အလွန်ကိုမှ မြန်ဆန်ပေသည်။ ထိုလူသားကောင်းလေ၏ ကျင့်ကြံနှုန်းသည် သူမ မွေးစားသမီး၏ ကျင့်ကြံနှုန်းအောက် လျော့ကျခြင်းမရှိသည်ကို မြင်သော် ချီယွဲ့ အနည်းငယ် အံ့အားသင့်သွားလေသည်။

“အင်း။ အရင်နှစ်တွေတုန်းက သူဘယ်တွေရောက်နေလဲ၊ ဘာလုပ်နေလဲတော့ သမီး မသိဘူး။ ဒါပေမယ့် ဧကရာဇ်ဥယျာဉ်ထဲ ဝင်တုန်းက သူနဲ့ မတော်တဆ သွားတွေ့တယ်။ အခု သမီးကို ရှာဖို့အတွက် မွန်းစတားဧကရာဇ်ကြယ်ဆီ အထူးတလည် လာခဲ့တာ”

“သူလည်း ဧကရာဇ်ဥယျာဉ်ထဲ ရောက်ဖူးတာလား” ချီယွဲ့ ပို၍ စိတ်ဝင်စားမိသွားသည်။

“အင်း။ အဲ့တုန်းက သမီး၊ သူနဲ့ပေါင်းပြီး ဟုန်းလော့ကုန်သွယ်ရေး အဖွဲ့အစည်းက အဖွဲ့တစ်ဖွဲ့ကို ပြန်တိုက်ခိုက်ခဲ့တာ။ ဒါပေမယ့် သမီးတို့ စကားတောင် မပြောရသေးဘူး၊ ဧကရာဇ်ဥယျာဉ်က ပိတ်သွားရော”

“ဟန့်၊ ဟုန်းလော့ကုန်သွယ်ရေး အဖွဲ့အစည်း” ချီယွဲ့ အေးစက်စက် အမူအရာဖြင့် နှာခေါင်းရှုံ့လိုက်သည်။ အထင်းသေးသည့် အရိပ်အယောင်တို့ သူမ၏ မျက်နှာထက် ဖြတ်ပြေးသွားသည့်နောက် “သူနဲ့ အတူပူးပေါင်းပြီး တိုက်ခိုက်ခဲ့တာ ဆိုတော့ သူဘယ်လောက်သန်မာလဲ သမီး သိလား”

“အဲ့ဒါက….” ရှန်ချင်းလော့ ရှက်သွားခဲ့သည်။

“မသိဘူးလား” ချီယွဲ့ မျက်နှာပျက်သွား၏။

“ခွင့်လွှတ်ပေးပါ မွေဂစားအမေ။ တိုက်ပွဲက ခဏလေးပဲ တိုက်ခိုက်ခဲ့ရတာ ဆိုတော့ သူဘယ်လောက်အားကောင်းလဲ သမီး သတိမပြုမိလိုက်ဘူး။ ဒါပေမယ့် သူအားမနည်းတာတော့ လုံးဝ ကျိန်းသေတယ်”

ချီယွဲ့က ဖွဖွလေးရယ်မောလျက် “သမီးက သေချာနေမှတော့ မွေးစားအမေ အခွင့်အရေးတစ်ခု ပေးလိုက်မယ်။ သမီးကို ရှာဖို့အတွက် မွန်းစတားဧကရာဇ်ကြယ်ဆီ လာခဲ့တာ တကယ်ကို လေးစားဖို့ကောင်းတယ်ဆိုတော့ သူက လူသားတစ်ယောက်ပဲ။ ပြီးတော့ သူ့မှာ အခြားမိန်းမတစ်ယောက်လည်း ရှိနေသေးတယ်။ ဒီချီယွဲ့သမီးက ဘယ်လိုလုပ်ပြီး ယောကျာ်းတစ်ယောက်ကို အခြား မိန်းမတစ်ယောက်နဲ့ မျှသုံးရမှာလဲ။ အခုတော့ ဒီအတိုင်းလေးပဲ နေလိုက်ဦး။ စိတ်အလို မလိုက်နဲ့ဦး။ မွေးစားအမေ သူ့ကို အရင် စမ်းသပ်ကြည့်မယ်။ ထိုက်တန်တယ်ဆိုရင် သူမနဲ့သူ့ကြား ဆက်ဆံရေးကို မွေးစားအမေ ဝင်မရှုပ်ဘူး။ မဟုတ်ဘူး ဆိုရင်တော့ မွေးစားအမေကိုယ်တိုင် သူ့ကို သတ်ပစ်မယ်”

ပြောပြီးနောက် ရှန်ချင်းလော့များ ထိတ်လန့်သွားမလား အထင်ဖြင့် ရှန်ချင်းလော့ဘက်သို့ လှည့်ကြည့်လိုက်သော်လည်း ရှန်ချင်းလော့သည် ထိတ်လန့်သွားခြင်း မရှိသည့်အပြင် ပျော်ပင် ပျော်နေသည်ကို တွေ့ရှိလိုက်ရလေသည်။

“သူ့ကို အဲ့လောက်တောင် ယုံကြည်တာလား” ချီယွဲ့ အံ့အားသင့်သွား၏။

“သမီး သူ့ကို မတွေ့ရတာ နှစ်တွေအများကြီး ကြာပြီဆိုပေမယ့် သူက အဆန်းတကြယ်တွေကို အမြဲလုပ်ပြနိုင်တဲ့ လူတစ်ယောက်ပဲ။ ဒီတော့ သူသမီးကို စိတ်ပျက်အောင် မလုပ်ဘူးလို့ သမီးယုံတယ်” ရှန်ချင်းလော့က အလျင်အမြန် ပြန်ပြောလိုက်သည်။

“ကောင်းပြီလေ။ သမီးက အဲ့လိုတွေးမှတော့ မွေးစားအမေလည်း စမ်းသပ်ကြည့်ရတာပေါ့” ချီယွဲ့က ခေါင်းညိတ်လိုက်သည်။ ထို့နောက် လေသံတိုးတိုးဖြင့် “ယုရှုန်း”

“ဟုတ်ကဲ့” ယုရှုန်း ချက်ချင်း ထရပ်လိုက်သည်။

“အဲ့ကောင်လေးကို စမ်းသပ်ဖို့ တာဝန်ကို နင့်ဆီ ပေးလိုက်မယ်။ သူက သာမန်လူသားတစ်ယောက်ဆိုတာ သတ်သာ သစ်ပစ်လိုက်” ချီယွဲ့က သူ့လက်ကိုဝှေ့ရမ်း၍ ပြောလိုက်သည်။

“ဟုတ်ကဲ့”

“နင်တို့ ထွက်သွားလို့ရပြီ”

ထိုသို့ဖြင့် အစ်ကိုနှင့်ညီမအတွဲ ချီယွဲ့၏ နန်းတော်ထဲမှ ပြန်ထွက်လာခဲ့သည်။ အပြင်သို့ ရောက်ပြီးနောက် ယုရှုန်းသည် တိုက်ပွဲကြီးတစ်ရပ်ကို ဆင်နွှဲရတော့မည့်အလား စိတ်လှုပ်ရှားနေသည့်ဟန်ဖြင့် အင်္ကျီလက်စကို စလိပ်တော့၏။

သူ့ကိုပင်ယောက်ဖဟု ခေါ်ရဲသဖြင့် ရန်ကိုင်သည် အတော်လေး သတ္တိရှိသည့် လူတစ်ယောက်ဟု ပြော၍ရသော်ငြား ထိုကောင်သည် လူသားတစ်ယောက်သာ ဖြစ်နေသေးသည်။ သူ့တွင် မိန်းမတစ်ယောက် ရှိနေသေးသော်လည်း ထိုမိန်းမအားကိုး ပုဆိန်ရိုးကောင်သည် သူ့ညီမလေးကို လာလိုချင်နေသေး၏။ ထိုကဲ့သို့ ငန်းသားစားချင်နေသည့် ဖားပြုပ်ကို ယုရှုန်း တစ်ခါမှ မမြင်ဖူးချေ။

ယခု ချီယွဲ့ဆီမှ ခွင့်ပြုချက်ရလိုက်ပြီး ဖြစ်သဖြင့် ထိုရန်ကိုင်ဆိုသည့် ကောင်လေးကို ချက်ချင်း သွားစပ်တော့ပေမည်။ သူ့ခေါင်းထဲ ရန်ကိုင်အား စမ်းသပ်ရန် အတွက် အခြားဘာရှုပ်ရှုပ်ယှတ်ယှတ်ကိုမှ မတွေးနိုင်၊ ထိုလူသားကောင်လေးအား ထိုးကြိတ်မည့် အတွေးသာရှိသည်။

“ယုရှုန်း” ရှန်ချင်းလော့က ရုတ်တရက် အော်ခေါ်လိုက်သည်။

“အန်” ယုရှုန်း ရှန်ချင်းလော့ဘက်သို့ လှည့်ကြည့်လိုက်၏။

ရှန်ချင်းလော့သည် ယုရှုန်းအား အေးစက်စက် အကြည့်ဖြင့် စိုက်ကြည့်လျက် “နင်သူ့ကို ကိုယ်တိုင် သွားတိုက်ခိုက်မယ် ဆိုရင် ငါနဲ့ တွေ့ပြီသာမှတ်”

“အန်…” ယုရှုန်း မှင်သက်သွားလေပြီ။ ထို့နောက် မှုန်ကုတ်ကုတ် အမူအရာဖြင့် “ညီမလေး၊ ဒီကိစ္စက အစ်ကိုကြီး လုပ်ချင်လို့ လုပ်တာ မဟုတ်ဘူးလေ။ မွေးစာအမေးခိုင်းလို့ လုပ်ရတာလေ။ မွေးစာအမေ ခိုင်းတဲ့အတိုင်း မလုပ်ရင် အပြစ်ပေးခံရမှာကို ညီမလေးလည်း မသိဘူး”

“ဘာပဲဖြစ်ဖြစ် နင်ကိုယ်တိုင် လှုပ်ရှားလို့မရဘူး။ လှုပ်ရှားမယ် ဆိုရင် ညီမလေးကို ဘယ်တော့မှ ညီမလေးကို လာမခေါ်နဲ့” ပြောပြီးသည်နှင့် ယုရှုန်းအား တစ်ချက်လေးပင် ပြန်ပြောခွင့် မပေးဘဲ ချက်ချင်း လှည့်ထွက်သွားလေသည်။

“ညီမလေး… ဒေါ်လေး…” ယုရှုန်း လှမ်းအော်ခေါ်သော်ငြား မည်သည့် ပြန်ထူးသံမှ မကြားခဲ့ရချေ။

ရုတ်တရက် သူ့ကိုယ်သူ ဆုပ်လည်းစူး၊ စားလည်းရူး အခြေအနေထဲသို့ ရောက်သွားကြောင်း ယုရှုန်း တွေ့ရှိလိုက်ရ၏။

………

နန်းတော်ထဲတွင် သုံးရက်ကြာအောင် နေပြီးနောက်၌ ချီယွဲ့သည် ရှနင်းချန်အား ခေါ်တွေ့ခဲ့သည်။ ဆေးတိမ်တိုက်ပါသော ဆေးလုံးအား‌ ဖော်စပ်နိုင်သည့် လူတစ်ယောက်ကို သူမအဖို့ ခေါ်တွေ့ဖို့ ထိုက်တန်ပေသည်။

ရန်ကိုင်ကိုမူ မဖိတ်ခေါ်ခဲ့ချေ။ တွေ့ရန်လည်း မစဉ်းစားထားပေ။

ရှနင်းချန်အပေါ် ချီယွဲ့၏ အမြင်သည် အတော်လေး ကောင်းသည်ဟု ပြော၍ရသည်။ ဤလူသား ကောင်မလေးသည် သိမ်မွေ့ပြီး၊ ကြင်နာသည်။ မျက်ဝန်းအစုံမှာလည်း မည်သည့် အညစ်အကြေးမှ စွန်းထင်းခြင်းမရှိဘဲ သန့်စင်လှသည်။ ထို့အပြင် ကောင်းမွန်သော ကျင့်ကြံခြင်းကိုလည်း ပိုင်ဆိုင်ထားသေးပြီး ဆေးပညာကိုလည်း အဆင့်မြင့်မြင့် နားလည်ထားသေး၏။

ရှနင်းချန်ကို ဆင့်ခေါ်ပြီးနောက်တွင် နန်းတော်ထဲရှိ ဆေးပညာရှင်များကို ခေါ်၍ ရှနင်းချန်၏ အရည်အချင်းကို စမ်းသပ်ကြည့်စေသည်။

ရလဒ်သည်ကား ချီယွဲ့အား တကယ်ကို ကျေနပ်သွားစေခဲ့သည်။ ဆေးပညာပိုင်းတွင် ရှနင်းချန်၏ အရည်အချင်းသည် တစ်သက်လုံး ဆေးပညာလမ်းကြောင်းအပေါ် အချိန်ပေးလာသော ဆံဖြူလူအိုကြီးများအောက် နိမ့်ကျခြင်းမ ရှိချေ။

လူအများရှေ့တွင် ကျင်းပသည့် ဆေးပညာပြိုင်ပွဲကိုလည်း ရှနင်းချန်မှသာ အနိုင်ရသွားခဲ့သည်။

ရှနင်းချန်၏ ပါရမီကို မြင်ပြီးနောက်တွင် ချီယွဲ့ အလွန်ကိုမှ ကျေနပ်မိသွားခဲ့သည်။ ထို့နောက် သူမအား နန်းတော်ထဲတွင် နေ၍ ဆေးဖော်စပ်ပေးရန်အတွက် အလွန်ကောင်းမွန်သော ကမ်းလှမ်းချက်များဖြင့် ကမ်းလှမ်းခဲ့လေသည်။

ရှနင်းချန်သည် ငယ်ရွယ်သေးပြီး အခြား ဆေးပညာရှင်များကဲ့သို့ ဂုဏ်သတင်းကျော်ကြားခြင်း မရှိသေးသည့် အတွက်ကြောင့်သာ မဟုတ်လျှင် နန်းတော်ထဲရှိ ဆေးပညာရှင်ခေါင်းဆောင်ဟူသော ရာထူးသည် သူမလက်ထဲသို့ ရောက်နေလောက်ပေပြီ။

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၇၉)

(ဆေးဝိဇ္ဇာရှအတွက်လည်း ခက်ခဲခဲ့မှာပေါ့)

သီးသန့်နန်းတော်ဆောင်၊ နေ့တစ်ဒူဝကိစ္စများကို ဆောင်ရွက်ပေးရန်အတွက် အစေခံမလေးများလည်း ရရှိလိုက်သည့် အတွက်ကြောင့် ရှနင်းချန်၏ နေထိုင်မှုဘဝသည် အကြီးအကျယ် ပြောင်းလဲသွားခဲ့ရလေသည်။ သူမအဖို့ ဘာမှလုပ်စရာ မလိုတော့ဘဲ ချီယွဲ့အတွက်သာ ဆေးဖော်စပ်ပေးရန် လိုအပ်တော့ပြီး လိုအပ်သော အရင်းအမြစ်များအားလုံးကို ချီယွဲ့မှ ထောက်ပံ့ပေး၏။

အရာအားလုံးသည် ရန်ကိုင် မျှော်လင့်ထားသကဲ့သို့ပင် ဖြစ်လာ၏။

“ဆေးဝိဇ္ဇာရှအတွက် မျိုးနွယ်စုခေါင်းဆောင်သခင်မ ပို့လိုက်တဲ့ ပစ္စည်းတွေ ရောက်လာပါပြီ။ မျိုးနွယ်စုခေါင်းဆောင်သခင်မက ဆေးလုံးတွေကို တစ်လအတွင်း လိုချင်ပါတယ်တဲ့” ရှနင်းချန်၏ နန်းတော်ဆောင် အပြင်ဘက်သို့ အစိမ်းရောင်ဝတ်ရုံ ဝတ်ထားသော အစေခံမလေးတစ်ယောက် ရောက်လာပြီး သိုလှောင်လက်စွပ် တစ်ကွင်း လာပေးသည်။

“ကျုပ်ယူထားလိုက်မယ်” ရန်ကိုင်က ပြုံးလိုက်ပြီး သိုလှောင်လက်စွပ်ကို လှမ်းယူလိုက်သည်။

ရန်ကိုင်၏ လုပ်ရပ်ကြောင့် အစေခံမလေး မျက်မှောင်ကြုတ်သွားခဲ့သော်ငြား သိုလှောင်လက်စွပ်ကိုတော့ ပေးလိုက်ပေသည်။

သိုလှောင်လက်စွပ်ထဲရှိ ပစ္စည်းများကို ကောင်းကင်စိတ်အာရုံဖြင့် စစ်ဆေးကြည့်ပြီးနောက်တွင် ရန်ကိုင်က နှာခေါင်းရှုံ့လျက် “ဘာလို့ ပစ္စည်းနည်းနည်းလေးပဲ ပါတာလဲ”

“နည်းနည်းလေး၊ ဟုတ်လား။ အဲ့ပမာဏက တန်ခိုးရှင်အဆင့် ဆေးလုံး အလုံးလေးဆယ် ဖော်စပ်ဖို့ လုံလောက်နေပြီလေ” အစိမ်းရောင်ဝတ်ရုံ ဝတ်ဆင်ထားသည့် အစေခံမလေး မျက်မှောင်ကြုတ်သွားခဲ့သည်။

“ဟုတ်တယ်။ တကယ်ကို နည်းလွန်းတယ်။ နောက်ထပ် ထပ်ယူလာပေးလို့ မရဘူးလား” ရန်ကိုင်က ထပ်မေးလိုက်၏။

“ယူလာလို့ရတယ်။ ဒါပေမယ့်… အခြား ဆေးဝိဇ္ဇာတွေလည်း တစ်လကို အဲ့လောက်ပဲ သုံးကြတာ။ နောက်ထပ် ပိုယူလာရင် ဆေးဝိဇ္ဇာရှ ဆေးလုံးတွေကို အချိန်မှီအောင် ဖော်စပ်နိုင်တော့မှာ မဟုတ်ဘူး”

“အဲ့လူတွေကို ငါ့စီနီယာမမလေးနဲ့ ဘယ်လိုလုပ်ပြီး လာယှဉ်နေတာလဲ” ရန်ကိုင်က အထင်တသေးဖြင့် “သွားယူသာ ယူလာခဲ့။ များလေ ပိုကောင်းလေပဲ”

အစိမ်းရောင်ဝတ်ရုံ ဝတ်ဆင်ထားသည့် အစေခံမလေးသည် ရှနင်းချန်အား ကိုးယိုးကားယား အမူအရာဖြင့် ကြည့်လိုက်၏။ ရန်ကိုင်သည် သူ့နေထိုင်ရေးအတွက် မိန်းမအပေါ် အားကိုးနေရသည့် လူတစ်ယောက် ဖြစ်သည်ဟူသော ကောလဟာလသည် နန်းတော်တစ်ခုလုံး ပျံ့နေခဲ့လေပြီ။

ထိုကဲ့သို့သော ယောကျာ်းတစ်ယောက်ကို မည်သည့် မိန်းမမှ ကြည့်မရချေ။

ပိုဆိုသည်ကား သူသည် ဆေးဝိဇ္ဇာရှကို လှည့်စားရုံဖြင့် မကျေနပ်နိုင်သေးဘဲ သူတို့၏ သခင်မလေး ရှန်ချင်းလော့ကိုပါ ပစ်မှတ်ထားရန် ကြိုးစားနေခဲ့ခြင်းပင်။ ကံဆိုးစွာဖြင့် ရှန်ချင်းလော့သည်လည်း ထိုလူ မည်မျှ အရှက်မဲ့ပြီး အကျင့်မကောင်းလဲ ဆိုသည်ကို မမြင်နိုင်ခဲ့ဘဲ သူ့လက်တွင်းသို့ ကျဆင်းသွားခဲ့လေ၏။

နန်းတော်ထဲတွင် ရှိနေသူအားလုံး နွားချီးပုံပေါ် ပေါက်နေသည့် ရှန်ချင်းလော့ကဲ့သို့ လှပသော ပန်းပင်လေးတစ်ပင်အတွက် ဝမ်းပန်းတနည်း ဖြစ်နေခဲ့ကြလေသည်။

ယခု ရန်ကိုင် သူမရှေ့တွင် အရှက်မရှိ လာကြွားနေသည်ကို မြင်သော် အစိမ်းရောင်ဝတ်ရုံ ဝတ်ဆင်ထားသည့် အစေမခံလေး ရန်ကိုင်အားပို၍ အမြင်မကြည် ဖြစ်သွားခဲ့ရလေသည်။

သို့သော်လည်း မျိုးနွယ်စုခေါင်းဆောင်သခင်မသည် ဤဆေးဝိဇ္ဇာ အသစ်ကို အတော်လေး နှစ်သက်သဘောကျပြီး သူမ တောင်းဆိုသည်ကို ဖြည့်ဆည်းပေးရန် အမိန့်ပေးထားခဲ့သည့် အတွက် အစေခံမလေးအဖို့ ငြင်းဆိုရန် ခက်ခဲနေခဲ့သည်။ ထို့ကြောင့် ရှနင်းချန်၏ အထင်အမြင်ကိုသာ လှမ်းမေးရတော့၏။

“ဂျူနီယာမောင်လေး ပြောတဲ့အတိုင်း လုပ်လိုက်” ရှနင်းချန်က ပြောလိုက်၏ “မျိုးနွယ်စုခေါင်းဆောင် သခင်မမေးရင် ငါတောင်းတယ်လို့သာ ပြောလိုက်။ သူငြင်းမှာ မဟုတ်ဘူး”

“ဟုတ်ကဲ့” ရှနင်းချန်ကိုယ်တိုင်က ပြောလာပြီ ဖြစ်သဖြင့် အစေမခံလေးသည် မတတ်သာသည့်အဆုံး ခေါင်းညိတ်ရတော့၏။

“ဒါနဲ့ နန်းတော်ထဲက ဆေးဝိဇ္ဇာတွေ ဆေးတစ်ခါဖော်စပ်ရင် ဘယ်လောက်‌ အောင်မြင်နိုင်ချေရှိလဲ” ရန်ကိုင်က ရုတ်တရက် ကောက်မေးလိုက်သည်။

“နှစ်ဆယ်ရာခိုင်နှုန်းလောက်” အစေခံမလေးက ထူးမခြားနားဟန်ဖြင့် “ဆယ်စုံစာ ဆေးဖော်စပ်ရင် နှစ်စုံစာလောက်တော့ အောင်မြင်တယ်”

“နားလည်ပြီ။ ကျေးဇူးပဲ” ရန်ကိုင်က ပြုံး၍ လက်သီးဆုပ်ကာ ကျေးဇူးတင်စကား ဆိုလိုက်သည်။

အစေခံမလေးသည် တစ်ခုခု ထပ်ပြောချင်နေသည့်အလား ရန်ကိုင်အား အလေးအနက် အမူအရာဖြင့် စိုက်ကြည့်လိုက်၏။ သို့သော် ခဏကြာသည့်တိုင်အောင် မည်သည့် စကားလုံးမှ ထွက်မလာနိုင်ခဲ့ဘဲ နောက်ဆုံး၌ ရှနင်းချန်ကို ခေါင်းညိတ်ပြ၍သာ လှည့်ထွက်လာခဲ့လေသည်။

“အဲ့မိန်းကလေးကို ကြည့်ရတာ ကျွန်တော့်ကို သိပ်ကြည့်ရတဲ့ပုံ မပေါ်ဘူး” ရန်ကိုင်က အစေခံမလေး၏ ကျောပြင်ကို ကြည့်ရင်း ခြောက်ကပ်ကပ် ရယ်မောလိုက်သည်။ တစ်ဖက်လူ သူ့အား ဘာကြောင့် ကြည့်မရ ဖြစ်နေသလဲ ဆိုသည်ကို သိသော်လည်း စိတ်ထဲ မထားခဲ့ချေ။

“ဂျူနီယာမောင်လေး၊ ဒါသင့်တော်ပါ့မလား” ရှနင်းချန်က ရန်ကိုင်အား စိုးရိမ်တကြီးကြည့်ကာ မေးလိုက်သည်။

“ဘယ်လိုလုပ်ပြီး မသင့်တော်ရမှာလဲ”

“ဒါက တန်ခိုးရှင်အဆင့် ဆေးအမယ်တွေနော်။ သူတို့ တန်ဖိုးက သေးတာမဟုတ်ဘူး။ ဒီလိုလုပ်တာက လနီမျိုးနွယ်စု ခေါင်းဆောင်ဆီက ဆေးအမယ်တွေကို ခိုးယူနေသလို ဖြစ်မနေဘူးလား…” ရှနင်းချန်စိတ်ထဲ လိပ်ပြာမလုံသလို ခံစားနေရသည်။

“အဲ့လိုမျိုး မဟုတ်ဘူးလေ” ရန်ကိုင်က ခေါင်းခါလျက် “သေချာစဉ်းစားကြည့်၊ စီနီယာမမလေးရယ်၊ အဲ့ကောင်မလေး ပြောသွားတာ နန်းတော်ထဲက ဆေးဝိဇ္ဇာတွေ ဆေးဖော်စပ်ရင် နှစ်ဆယ်ရာခိုင်နှုန်းလောက်ပဲ အောင်မြင်တယ်တဲ့။ ဆိုလိုတာက ရှစ်ဆယ်ရာခိုင်နှုန်းက အမှိုက်ဖြစ်သွားတယ်ပေါ့။ ဒါပေမယ့် စီနီယာမမလေးက သူတို့နဲ့ မတူဘူးလေ။ စီနီယာမမလေးသာ အကောင်းဆုံး ကြိုးစားရင် ရှစ်ဆယ်၊ ကိုးဆယ် ရာခိုင်နှုန်းလောက်ကို အသာလေး ဆေးလုံး ပြောင်းနိုင်တယ်။ တစ်ခါတစ်လေ မအောင်မြင်ဘူး ဆိုရင်တောင် တစ်ကြိမ်၊ နှစ်ကြိမ်လောက်က ဘာမှ ထည့်တွက်နေစရာ မလိုဘူး။ ဒီတော့ ကျွန်တော်တို့ဘက်က သုံးဆယ်ရာခိုင်နှုန်းလောက်ကိုပဲ ပြန်ပို့မယ်ဆိုရင်တောင် လနီမျိုးနွယ်စုခေါင်းဆောင်အတွက် အတော်လေး မြတ်နေပြီလို့ ပြောလို့ရတယ်။ သူမြတ် ကိုယ်မြတ်ပဲလေ။ ဘာတွေ မသင့်တော်တာ ရှိလို့လဲ”

“ဂျူနီယာမောင်လေး ပြောတာ ဟုတ်တယ်ဆိုပေမယ့် အဲ့လို လုပ်ရမှာ ငါ့စိတ်ထဲ တစ်မျိုးကြီး ဖြစ်နေတယ်” ရှနင်းချန်က သူမ၏ နှုတ်ခမ်းလေးကို တွန့်ကွေးလျက် ပြန်ပြောလိုက်သည်။

သူမ၏ ဂျူနီယာမောင်လေး ပြောသည့်အစီအစဉ်အရ သူမကိုယ်သူမ သူခိုးတစ်ယောက်ဟု ခံစားနေရသည်။ သို့သော် ရန်ကိုင်က ပြောနေခြင်းဖြစ်သဖြင့် နောက်ဆုံးတွင် ရှနင်းချန်လည်း သဘောတူလိုက်လေသည်။

ရှနင်းချန်အတွက် ဆေးဖော်စပ်ခြင်းသည် ကျင့်ကြံခြင်းဖြစ်ပြီး ပျော်စရာအလုပ်တစ်ခုလည်း ဖြစ်သည်။ ထို့အပြင် လက်ရှိ သူမသည် တန်ခိုးရှင်ပထမအဆင့် ဆေးပညာရှင်တစ်ယောက် ဖြစ်နေခဲ့လေပြီ။ အစစ်အမှန် ဆေးပညာကျမ်းကို လေ့လာပြီးနောက် ဆေးပညာလမ်းစဉ်အပေါ် သူမ၏ နားလည်မှုတို့ တစ်ဟုန်ထိုး မြင့်မားတိုးတက်လာခဲ့ရသည်။

ထို့အပြင် မကြာသေးခင်ကလည်း ဆေးတိမ်တိုက်ပါသော တန်ခိုးရှင်အဆင့် ဆေးလုံးတစ်လုံးကို‌ အောင်မြင်စွာ ဖော်စပ်နိုင်ခဲ့သေးသည်။ ထိုသို့ ဖော်စပ်နိုင်ခဲ့သည့်အတွက် ဆေးပညာလမ်းစဉ်အပေါ် ပို၍ နက်နက်နဲနဲ လာခဲ့ရသည်။ ဆေးပညာနှင့် ပက်သက်လျှင် ရှနင်းချန်၏ ပါရမီကို ရန်ကိုင်ပင်လျှင် လေးစားရသည်။

ဆေးအမယ်များသည် အလွန်ကိုမှ မြင့်မားသောနှုန်းဖြင့် ဆေးလုံး အဖြစ်သို့ လျင်မြန်စွာ ‌ပြောင်းလဲနေခဲ့သည်။

ရန်ကိုင်လည်း အားအားယားယား ထိုင်မနေခဲ့ချေ။ အစစ်အမှန် ဆေးပညာကျမ်းထဲတွင် ဖော်ပြထားသော ဆေးအမယ်တစ်စုံဖြင့် ဆေးလုံးဆယ်လုံးက ဖော်စပ်နိုင်သော ဆေးဖော်စပ်နည်းကို စမ်းသပ်လေ့ကျင့်နေခဲ့လေသည်။

သူသာ ထိုနည်းလမ်းကို အောင်မြင်သွားခဲ့လျှင် ကြယ်စီရင်စု၏ ဆေးပညာလောကကြီးတစ်ခုလုံးကို ပြောင်းလဲနိုင်ပေလိမ့်မည်။

သို့သော်လည်း ထိုနည်းလမ်းကို မည်သို့ အောင်မြင်အောင် လုပ်ရမလဲ ဆိုသည်နှင့် ပက်သက်၍ ရန်ကိုင်တွင် သဲလွန်စ နည်းနည်းလေးပင် မရှိချေ။ ထို့ကြောင့် ဆေးလုံးများကို ဖော်စပ်လေ့လာရင်း ထိုနည်းလမ်းအား ဖော်ထုတ်နိုင်မည့် အဖြေကို စမ်းတဝါးဝါးဖြင့် ရှာကြည့်နေရုံသာ တတ်နိုင်ခဲ့သည်။

သူတို့နှစ်ယောက် အတိုင်အဖောက်ညီညီဖြင့် ဖော်စပ်နေလိုက်ရာ ရက်အနည်းငယ်အတွင်း အစေခံမလေး လာပို့ထားသည့် ဆေးအမယ်အားလုံး ကုန်ဆုံးသွားခဲ့လေသည်။

ရက်အနည်းငယ်ကြာပြီးနောက် အစေခံမလေးသည် ဆေးအမယ် အသစ်တစ်သုတ် ထပ်မံ ယူဆောင်လာခဲ့သည်။ ရှနင်းချန်ကလည်း သူမ ဖော်စပ်ထားသည့် ဆေးလုံးဆယ်နှစ်လုံးပါ ဆေးပုလင်းကို အစေမခံမလေးကို ပြန်ပေးလိုက်လေသည်။ ဆေးပုလင်းထဲရှိ ဆေးလုံး အရေအတွက်ကို မြင်ပြီးနောက် အစေခံမလေး ထိတ်လန့်တုန်လှုပ်သွားခဲ့၏။

သူမ ဆေးအမယ်များကို လာပို့ထားခဲ့သည်မှာ ရက်အနည်းငယ်သာ ရှိသေးသော်လည်း ဆေးဝိဇ္ဇာရှသည် ထိုဆေးအမယ်အားလုံးကို ရက်အနည်းငယ်အတွင်း ကုန်စင်အောင် ဆေးဖော်စပ်ပြသွားခဲ့၏။ ထို့အပြင် သူမ ဖော်စပ်ထားသည့် ဆေးလုံး အရေအတွက်သည် နန်းတော်ထဲရှိ အခြား ဆေးဝိဇ္ဇာများသည် ဖော်စပ်လေ့ရှိသည့် ဆေးလုံး အရေအတွက်ထက် တစ်ဆယ်ရာခိုင်နှုန်းပင် ပိုများနေသေး၏။

အစိမ်းရောင်ဝတ်ရုံ ဝတ်ထားသည့် အစေခံမလေး သူ့မျက်လုံးသူ မယုံနိုင်အောင် ဖြစ်နေခဲ့သည်။

ဆေးပုလင်းထဲရှိ ဆေးလုံးများသည် သူမ လာပို့ထားခဲ့သည့် ဆေးအမယ်များသုံး၍ ဖော်စပ်ရသည့် ဆေးလုံးများနှင့် တူညီနေသည့် အတွက်ကြောင့်သာ မဟုတ်လျှင် ရှနင်းချန်သည် သူမ ဖော်စပ်ပြီးသာ ဆေးလုံးများကို ပေးလိုက်သည်ဟု အထင်မှားမိမည်သာ။

မျိုးနွယ်စုခေါင်းဆောင် သူမအား တန်ဖိုးထားနေသည်မှာ အံ့ဩစရာ မဟုတ်တော့ချေ။ သူမတွင် ထိုကဲ့သို့ အရည်အချင်း ရှိနေသည်ကိုး။

ထိုအကြောင်းကို သိလိုက်ရချိန် အစေခံမလေးသည် ရန်ကိုင်အား ပို၍ ကြည့်မရ ဖြစ်သွားခဲ့လေသည်။ ထိုကောင်လေးသည် ဘာမှ မလုပ်ဘဲ အေးအေးဆေးဆေး နေပြီး ရိုးသားအပြစ်ကင်းစင်သည့် မိန်းကလေးကို သူ့ဘေးနား၌ တစ်ချိန်ကုန် ခေါ်ထားရဲသည်။ ဆေးဝိဇ္ဇာရှကို တစ်ယောက်ယောက်မှ လုယူသွားမည်ကို ကြောက်နေသည့် ပုံစံမျိုးပင်။

သို့သော်လည်း ဤကိစ္စနှင့်ပက်သက်၍ သူ့ကိုချည်း သွားအပြစ်တင်၍ မရချေ။ တကယ်တော့ သူ့ကိုယ်တိုင်တွင် ဘာစွမ်းရည်မှ မရှိလေဘဲ။ အသက်ရှင်နေဖို့ရာ မိန်းမတစ်ယောက် အပေါ် အားကိုးနေရသည့် ဘဝသည် သူအားကိုးအားထားရာ ဖြစ်သော အမျိုးသမီးကို အခြားတစ်ယောက်မှ လုယူသွားမည်ကို မစိုးရိမ်ဘဲ ဘယ်နေမည်နည်း။ ထို့အပြင် ဆေးဝိဇ္ဇာရှကဲ့သို့သော အမျိုးသမီးကို မလိုချင်သည့်လူ မည်သူမှ မရှိပေ။

“ဆေးဝိဇ္ဇာရှ၊ ဒီထဲမှ ဆေးအစုံတစ်ရာအတွက် တန်ခိုးရှင်အဆင့် ဆေးအမယ်တွေပါ။ လိုအပ်တဲ့ ဆေးအမယ်တွေ ရှိသေးရင် ကြိုက်တဲ့ အစေခံကို တောင်းလိုက်ပါတဲ့။ နန်းတော်က ဆေးဝိဇ္ဇာရှ လိုအပ်တာတွေကို ဖြည့်ဆည်းပေးပါမယ်လို့ မျိုးနွယ်စုခေါင်းဆောင် သခင်မက ပြောလိုက်ပါတယ်” အစေခံမလေးက ဆေးအမယ် အသစ်များပါသည့် သိုလှောင်လက်စွပ်ကို လေးလေးစားစား ပေးရင်း ပြောလိုက်လေသည်။

“ကျေးဇူးပဲ” ရှနင်းချန်က ပြုံး၍ ပြန်ပြောလိုက်သည်။

“အဲ့နားမှာ ချထားလိုက်” ရန်ကိုင်က ပြောလိုက်သည်။

အစေခံမလေးသည် ရန်ကိုင်အား စူးရဲစွာ စိုက်ကြည့်လိုက်ပြီး သိုလှောင်လက်စွပ်ကို ချထားလိုက်ပြီးနောက် ရုတ်တရက် အော်ပြောလိုက်လေသည် “ဆေးဝိဇ္ဇာရှကို ကောင်းကောင်း ဆက်ဆံပါ အရှက်မရှိတဲ့ မိန်းမအားကိုးကောင်ရဲ့”

ပြောပြီးသည်နှင့် ဒေါသတကြီး ထွက်သွားလေသည်။

ရန်ကိုင်မှာမူ ကြောင်တောင်တောင် အမူအရာဖြင့် ကျန်ခဲ့လေသည်။ ထို့နောက် မျက်မှောင်ကြုတ်လျက် သူ့ဘာသာ ရေရွတ်လိုက်လေ၏ “ငါသူ့ကို ဘာလုပ်လိုက်မိလို့ ငါ့ကို လာဒေါသထွက်နေရတာလဲ”

ထိုအခြင်းအရာကိုကြည့်ရင်း ရှနင်းချန်က တခစ်ခစ် ရယ်မောလျက် ပြန်ပြောလိုက်သည် “အခြားသူတွေရဲ့ အထင်အမြင်တွေကို ဂရုစိုက်မနေနဲ့ ဂျူနီယာမောင်လေး၊ ဂျူနီယာမောင်လေး ဘယ်လောက် တော်တယ်ဆိုတာကို ငါသိရင် အဆင်ပြေတယ်”

ရှနင်းချန်စကားကို ကြားပြီးနောက် ရန်ကိုင်ရင်ထဲ နွေးထွေးသွားခဲ့ရသည်။

ထို့နောက် ရှနင်းချန်က ခေါင်းလေးညိတ်၍ တိုးတိုးလေး ပြောလိုက်လေသည် “တကယ်တမ်း ပြောရရင် သူတို့ ဒီလို ထင်တာလည်း ကောင်းတယ်။ မဟုတ်လို့ ဂျူနီယာမောင်လေး နောက်ကို မိန်းမတွေအများကြီး လိုက်လာနေကြမှာ”

“စီနီယာမမလေးက အဲ့လိုပြောနေမှတော့ ဒီမိန်းမအားကိုး ကောင်လေးကို စောင့်ရှောက်ပေးဖို့ စီနီယာမမလေးကိုပဲ အားကိုးတော့မယ်နော်” ရန်ကိုင်က ရယ်ရယ်မောမောဖြင့် ပြန်ပြောလိုက်သည်။

မိန်းမအားကိုးကောင်လေး ဆိုသောစကားသည် သူမစိတ်ထဲရှိ ရှက်စရာ အတိတ်ဖြစ်ရပ်အချို့ကို ပြန်အမှတ်ရစေသဖြင့် ရှနင်းချန်၏ မျက်နှာလေး ရဲတက်သွားခဲ့ရလေသည်။

လနီပိုင်နက်သည် မွန်းစတားဧကရာဇ်ကြယ်ပေါ်ရှိ အားအကောင်းဆုံး ပိုင်နက်ဆယ်ခုအနက်တွင် ထိပ်ဆုံးသုံးခုထဲ ပါဝင်ပြီး အရင်းအမြစ်များ ပေါကြွယ်ဝသည့် နေရာတစ်ခုလည်း ဖြစ်သည်။ ထို့အပြင် မွန်းစတားဧကရာဇ်ကြယ် ဖြစ်သည့် အလျောက် မရေမတွက်နိုင်သော မွန်းစတားသားရဲများကို ဤနေရာတွင် နေရာတိုင်း၌ မြင်တွေ့နိုင်ပေသည်။ ထို့ကြောင့် နန်းတော်ထဲတွင် ဆေးဖော်စပ်ရာ၌ လိုအပ်သော ဆေးအမယ်များ ဖြစ်ကြသည့် ဆေးပင်များ၊ မွန်းစတား အစိတ်အပိုင်းများနှင့် မွန်းစတား အမြူတေများ ပေါပေါသောသော ရှိနေခဲ့သည်။

ထို့ကြောင့်အတွက် နန်းတော်သည် ရှနင်းချန် မည်မျှပင် တောင်းဆိုနေစေကာမူ သူမ၏ တောင်းဆိုမှုများကို ချွင်းချက်မရှိ ဖြည့်ဆည်းပေးနိုင်ပေသည်။

အကျိုးအမြတ်များများ ရနိုင်ရန်အတွက် ရန်ကိုင်သည် ရှနင်းချန်နှင့် အတူပူးပေါင်း၍ ဆေးလုံးများကို ဖော်စပ်ပေးလေသည်။ ဆေးတစ်သုတ် ရောက်လာပြီးနောက်တွင် သုံးဆယ်ရာခိုင်နှုန်းကို ဆေးလုံးများအဖြစ် ဖော်စပ်ပြီး အစေမခံလေးဆီ ပြန်ပေး၏။ ကျန်ခုနှစ်ဆယ် ရာခိုင်နှုန်းမှာမူ ရန်ကိုင်၏ အိတ်ကပ်ထဲသို့ ရောက်သွားခဲ့လေသည်။

အဆင့်မြင့် ဆေးအမယ်များကို အလကားရနိုင်သည့် ဤကဲ့သို့ အခွင့်အရေးမျိုးသည် ရခဲလှသဖြင့် ရန်ကိုင်သည် ဤအခွင့်အရေးကို အကျိုးရှိရှိ အသုံးချနေခြင်း ဖြစ်သည်။

အမှန်အတိုင်း ပြောရလျှင် ရန်ကိုင်သည် တန်ခိုးရှင်ဘုရင်အဆင့် ဆေးပညာရှင်တစ်ယောက် ဖြစ်နေပြီ ဖြစ်သည့်အတွက်ကြောင့် ဤတန်ခိုးရှင်အဆင့် ဆေးအမယ်များသည် သူ့အတွက် သိပ်ပြီး အဖိုးမတန်တော့ချေ။ တန်ခိုးရှင်အဆင့် ဆေးလုံးမည်မျှကို သူထပ်ပြီး ဖော်စပ်နေပါစေ သူ့ဆေးပညာအဆင့်ကို တိုးတက်လာအောင် လုပ်နိုင်တော့မည် မဟုတ်ဘဲ ဆေးလုံး ဖော်စပ်ခြင်းကို ပိုမို ကျွမ်းကျင်သွားအောင်သာ လုပ်နိုင်ပေလိမ့်မည်။

သို့သော်လည်း ရှနင်းချန်ကတော့ မတူချေ။ ရှနင်းချန်သည် သူမ၏ ကျင့်ကြံခြင်းကို တိုးတက်ရန်အတွက် ဆေးလုံးများများ ဖော်စပ်ရန် လိုအပ်သည် ဆေးအမယ်များစွာ လိုအပ်ပေသည်။

ထုန်းရွှမ်လောကကြီး၏ ကြယ်သခင် ဖြစ်သည့်အလျောက် သူမ၏ မွေးရပ်ဖြစ်သည့် ထုန်းရွှမ်လောကကြီးကို တိုးတက်လာအောင် လုပ်နိုင်ရန်အတွက် ရှနင်းချန် အနေဖြင့် သူမ၏ ကျင့်ကြံခြင်းကို မြန်နိုင်သမျှ မြန်မြန် မြှင့်တင်ရန် လိုအပ်ပေသည်။

နန်းတော်ထဲရှိ ရရှိလိုက်သည့် ဆေးအမယ်းများသည် ရှနင်းချန်၏ ကျင့်ကြံခြင်းကို တိုးတက်အောင်လုပ်ရန်အတွက် လိုအပ်သည့် ပစ္စည်းများသာ ဖြစ်ကြပေသည်။

ရှနင်းချန်၏ ထူးချွန်ပြောင်မြောက်သော စွမ်းရည်ဆောင်ကို မြင်ပြီး ချီယွဲ့ အလွန် ကျေနပ်မိနေသည်။

နန်းတော်ထဲတွင် အခြားသော ဆေးဝိဇ္ဇာများ ရှိနေသော်ငြား ထိုဆေးပညာရှင် အားလုံး ပေါင်းလျှင်ပင် ရှနင်းချန်၏ ခြေဖျားကို မမှီချေ။ ချီယွဲ့အတွက် ရှနင်းချန် တစ်ယောက်တည်းသည် ထိုဆေးပညာရှင် အားလုံးထက် ပိုပြီး အသုံးဝင်ပေသည်။

ရှနင်းချန်သာ လနီမျိုးနွယ်စုအတွက် ဆယ်နှစ်လောက် အလုပ်လုပ်ပေးနိုင်လျှင် လနီမျိုးနွယ်စု အနေဖြင့် နောက်ထပ် တန်ခိုးရှင်အဆင့် အယောက် တစ်ရာလောက်ကို ဖန်တီးနိုင်ပေလိမ့်မည်။

ထိုစကားမှာ ချဲ့ကားပြောနေခြင်း မဟုတ်ချေ။ ဆယ်နှစ်အတွင်း ရှနင်းချန် ဖော်စပ်ခဲ့သည့် ဆေးလုံးများကိုသာ ပါရမီမြင့်မားသော မွန်းစတားမျိုးနွယ်စုဝင်များကိုသာ ပေးလိုက်မည်ဆိုလျှင် ထိုပါရမီရှင်များသည် အလွန်ကိုမှ လျင်မြန်သော အမြန်နှုန်းဖြင့် အားကောင်းလာကြပေလိမ့်မည်။

ထို့ကြောင့် ချီယွဲ့သည် ရှနင်းချန်၏ တောင်းဆိုချက်မှန်သမျှကို နှောင့်နှေးခြင်းမရှိ ချက်ချင်း ဖြည့်ဆည်းပေးလေသည်။ သူမက ထိုကဲ့သို့ ဖြည်းဆည်းပေးနေသည့် အတွက် ရန်ကိုင်လည်း ဆေးအမယ် မြောက်မြားစွာကို သူ့အိတ်ကပ်ထဲသို့ ထည့်နေနိုင်ခဲ့သည်။

တန်ခိုးရှင်ဘုရင်အဆင့် ဆေးအမယ်များကို ချီယွဲ့ဆီမှ သွားတောင်းကြည့်လျှင် ကောင်းမလားဟုပင် တွေးမိနေလေပြီ။

မွန်းစတားဧကရာဇ်ကြယ်တွင် တန်ခိုးရှင်ဘုရင်အဆင့် ဆေးပညာရှင် တစ်ယောက်မှ ပေါ်မလာခဲ့ဖူးချေ။

ထို့ကြောင့် နန်းတော်ထဲတွင် တန်ခိုးရှင်ဘုရင်အဆင့် ဆေးအမယ် အမြောက်အများ ရှိလောက်ပေသည်။

ရန်ကိုင်သည် ထိုအကြောင်းနှင့် ပက်သက်၍ ရှန်ချင်းလော့အား တိတ်တဆိတ် မေးကြည့်လိုက်ရာ ချီယွဲ့တွင် တန်ခိုးရှင်ဘုရင် အဆင့် ဆေးအမယ်များအပါအဝင် အဖိုးတန် ပစ္စည်းများစွာကို သိမ်းဆည်းထားသော အထူးဂိုဒေါင်တစ်ခုရှိကြောင်း သိရှိလိုက်ရသည်။

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၈၀)

(ရွှယ့်လျန်)

ရှနင်းချန် ဆေးဖော်စပ်နေစဉ် အတောအတွင်း၌ ရန်ကိုင်သည် ချီယွဲ့၏ ဂိုဒေါင်ထဲမှ ဆေးပင်များကို မည်ကဲ့သို့ ရယူရမည်လဲ ဆိုသည်နှင့် ပက်သက်၍ အကြံထုတ်နေခဲ့သည်။

နည်းလမ်းတစ်ခုသာ ရှိပေသည်။ ကျောက်တုံးရုပ်သေးရုပ်ကို သုံးရန်ပင်။

ကျောက်တုံးရုပ်သေးရုပ်သည် မြေအောက်ထဲတွင် တိုးတိတ်စွာ သွားလာနိုင်ဖြင့် ၎င်း၏ ထူးခြားသော စွမ်းရည်ကြောင့် အခြားလူများ အနေဖြင့် သူ့အား သတိထားမိရန် အလွန် ခက်ခဲ၏။ အရိပ်ကြယ်ပေါ်တွင် ရှိစဉ်က ပုံရိပ်တစ်ထောင်ဖန်ဂိုဏ်းဆီသို့ ဧည့်သည်အဖြစ် သွားရောက်စဉ်က ကျောက်တုံးရုပ်သေးရုပ်ကို သုံး၍ ပုံရိပ်တစ်ထောင်ဖန်များကို ခိုးယူခဲ့ဖူးပေသည်။

သို့သော်လည်း လက်ရှိ အခြေအနေသည် ထိုစဉ်က အခြေအနေနှင့် ယှဉ်လိုက်လျှင် အနည်းငယ် ကွာခြားနေပေသည်။

ပုံရီပ်တစ်ထောင်ဖန်တောင်ကို ပုံရိပ်တစ်ထောင်ဖန်ဂိုဏ်းမှ တင်းတင်းကြပ်ကြပ် ကာကွယ်ထားသော်လည်း ထိုဂိုဏ်းမှ ပညာရှင်များသည် ကျောက်တုံးရုပ်သေးရုပ်ကဲ့သို့သော ထူးဆန်းသည့် သက်ရှိတစ်မျိုး တည်ရှိလိမ့်မည်ဟု မထင်ထားသည့် အတွက် သူတို့၏ စောင့်ကြည့်မှုအောက်မှ ပုံရိပ်တစ်ထောင်ဖန်ကို အောင်မြင်စွာ ခိုးယူနိုင်ခဲ့သည်။

သို့သော်လည်း ချီယွဲ့၏ ရတနာဂိုဒေါင်သည် ပုံရိပ်တစ်ထောင် ဖန်တောင်ထက် ပိုပြီး အကာအကွယ် တင်းကြပ်ပေသည်။

ကျောက်တုံးရုပ်သေးရုပ်တွင် အသုံးဝင်သော စွမ်းရည်များစွာ ရှိသော်လည်း ၎င်း၏ အသိဥာဏ်မှာ အတော်လေး နိမ့်ကျ၏။ ရန်ကိုင်သာ ကျောက်တုံးရုပ်သေးရုပ်ကို မဆင်မခြင် လွှတ်လိုက်လျှင် တစ်ဖက်လူများ သတိပြုမိသွားနိုင်ပေသဖြင့် သူကိုယ်တိုင် လုပ်ရန်သာ ရှိတော့လေ၏။

ထိုသို့ ဆုံးဖြတ်ပြီးသော် ဆက်ပြီး တွေဝေတုန့်ဆိုင်းမနေတော့ဘဲ ရွှေရောင်ကျောက်တုံးရုပ်သေးရုပ်ကို ထုတ်လိုက်လေသည်။ ဤကျောက်တုံးရုပ်သေးရုပ်သည် ရှောင်ရှောင်နှင့် မျိုးနွယ်တူ ဖြစ်သော်လည်း မွေးခါစတွင် ဝိဥာဉ် ဖြစ်ပေါ်လာခြင်း မရှိသည့် အတွက် အသိဥာဏ်မရှိသော သက်ရှိတစ်မျိုး ဖြစ်လာခဲ့၏။

အကျိုးဆက်အနေဖြင့် ဤကျောက်တုံးရုပ်သေးရုပ်သည် ရန်ကိုင်၏ ဝိဥာဉ်ကိုယ်ပွား နေထိုင်ရန်အတွက် အသင့်တော်ဆုံး ခန္ဓာကိုယ် တစ်ခု ဖြစ်လာခဲ့ရလေသည်။ ရှောင်ရှောင်နှင့်မတူ ရွှေရောင် ဖြစ်နေရခြင်းမှာမူ ရန်ကိုင်၏ ရွှေရောင်သွေးစက်များစွာကို စုပ်ယူထားသည့် အတွက်ကြောင့် ဖြစ်ပေသည်။

သူ့ရှေ့ရှိ ရွှေရောင်ကျောက်တုံးရုပ်သေးရုပ်ကို ကြည့်ရင်း ရန်ကိုင် ခေါင်းတညိတ်ညိတ် လုပ်လိုက်ပြီး အသိစိတ်ပင်လယ်ထဲမှ ဝိဥာဉ်ကိုယ်ပွားကို ထုတ်ကာ ကျောက်တုံးရုပ်သေးရုပ်ထဲသို့ ထည့်သွင်းလိုက်လေသည်။

မကြာမီတွင် ပိတ်နေသော ရွှေရောင်ကျောက်တုံးရုပ်သေးရုပ်၏ မျက်ဝန်းအစုံ တဖြည်းဖြည်း ပွင့်လာခဲ့လေသည်။ လက်ရှိ မျက်လုံးများသည် အသိစိတ်မရှိသည့် မျက်လုံးများနှင့် မတူဘဲ အသိဥာဏ်ရှိသော သက်ရှိတစ်ကောင်၏ မျက်လုံးများနှင့် ဆင်တူပေသည်။

ရန်ကိုင်သည် သူ့မျက်လုံးများကို ပိတ်လိုက်လေသည်။ သူ့အမူအရာလည်း မဆိုသလောက်ကလေး ပြောင်းလဲသွားခဲ့ရလေသည်။

အကြိမ်မည်မျှ ခံစားခဲ့ရပါစေ ဤကဲ့သို့လုပ်လိုက်တိုင်း သူ့စိတ်ထဲ အမြဲတမ်း အဆန်းတကြယ် ခံစားခဲ့ရသည်။ ရွှေရောင်ကျောက်တုံး ရုပ်သေးရုပ်ထဲသို့ သူ့ဝိဥာဉ်ကိုယ်ပွားကို ထည့်လိုက်ခြင်းသည် သူ့ကိုယ်သူ နှစ်ကိုယ်ခွဲလိုက်သလို ခံစားရစေသည်။

မူရင်း ခန္ဓာကိုယ်၏ ခံစားချက်များ၊ အာရုံခံစားမှုများကို ခံစားနိုင်ရုံမက ရွှေရောင်ကျောက်တုံးရုပ်သေးရုပ် မြင်သမျှ၊ ကြားသမျှ၊ ခံစားရသမျှ အားလုံးကို မြင်ကြားခံစားနိုင်ပေသည်။

တကယ်ကို ထူးဆန်းပြီး ရှင်းပြရခက်ခဲသည့် ခံစားချက်မျိုးပင်။

ရန်ကိုင်သည် ချက်ချင်း မလှုပ်ရှားသေးဘဲ ခန္ဓာကိုယ်အသစ်နှင့် အသားကျသွားအောင် အရင် လှုပ်ရှားကြည့်လိုက်သည်။ ခန္ဓာကိုယ် အသစ်နှင့် ရင်းနှီးသွားပြီဆိုမှ မြေအောက်ထဲသို့ တူးဝင်သွား၏။

ကျောက်တုံးရုပ်သေးရုပ်သည် ငါးတစ်ကောင် ရေထဲတွင် ကူးခတ်သွားလာနိုင်သကဲ့သို့ မြေကြီးထဲသို့ သွားလာနိုင်ပေ၏။ ထို့အပြင် ၎င်း၏ တစ်မူထူးခြားသော ခန္ဓာကိုယ်ကြောင့် သူ့ကိုယ်သူ မြေထုနှင့် တစ်သားတည်း ထင်သွားအောင် ကိုယ်ယောင်ဖျောက်ထားနိုင်ပေသည်။

ကျောက်တုံးရုပ်သေးရုပ်ကို မည်သူမှ သတိမပြုမိခဲ့ချေ။

သွားရမည့် လမ်းကြောင်းနှင့် ပက်သက်၍မူ ရှန်ချင်းလော့ကို ကြိုတင် မေးမြန်းထားပြီးသား ဖြစ်သဖြင့် ဦးတည်ရာမဲ့ လိုက်ပြီး ရှာနေစရာ မလိုတော့ချေ။

ခဏလောက် ကူးခတ်သွားလာပြီးနောက် မကြာခင်တွင် ရတနာဂိုဒေါင် အောက်ခြေသို့ ရောက်ရှိလာခဲ့သည်။ အောက်သို့ ရောက်သည်နှင့် ကောင်းကင်စိတ်အာရုံကို အပေါ်ဘက်သို့ ဖြန့်ကျက်ကြည့်လိုက်သည်။

သူထင်ထားသည့်အတွက် ရတနာဂိုဒေါင်၏ အောက်ခြေအား အစီအရင်တစ်ခုဖြင့် ကာကွယ်ထားသည်ကို တွေ့ရှိလိုက်ရသည်။ သူ့ကောင်းကင်စိတ်အာရုံကို ဖြန့်ကျက်လိုက်ချိန် မမြင်နိုင်သော အကာအရံတစ်ခုနှင့် သွားရိုက်ခတ်မိပြီး ရှေ့ဆက် မတိုးနိုင်တော့သည်ကို တွေ့ရှိလိုက်ရသည်။

သို့သော်လည်း ထိုမမြင်နိုင်သော အကာအရံသည် သိပ်ပြီး အားကောင်းခြင်းမရှိပေ။ ထို့ကြောင့် ရန်ကိုင်သည် ကောင်းကင်စိတ်အာရုံကို စုစည်းလျက် ထိုအကာအရုံကို ထိုးဖောက်ရန် ကြိုးစားလိုက်သည်။

ထိုအကာအရံကို ထိုးဖောက်ရန်မှာ အလွယ်လေး ဖြစ်သော်ငြား အခြားသူများ သတိပြုမိသွားမည်ကို စိုးရိမ်သဖြင့် သူ့ခွန်အားကို အရမ်းကြီး မသုံးရဲခဲ့ချေ။

သို့သော်ငြား သူ့ကောင်းကင်စိတ်အာရုံ မမြင်နိုင်သော အကာအရံကို ထိုးဖောက်ရန် ကြိုးစားလိုက်ချိန် နန်းတော်ထဲရှိ တစ်နေရာဆီမှ ကြောက်မက်ဖွယ်ရာ အရှိန်အဝါတစ်ရပ် ရုတ်တရက် ဖြာထွက်လာခဲ့လေသည်။ ထိုအရှိန်အဝါကို ခံစားမိလိုက်သည့်လူအားလုံး ဖြူဖတ်ဖြူလျော် ဖြစ်သွားကြ၏။

ဟင်းလင်းပြင်တွင်းမှ မမြင်နိုင်သော မျက်လုံးတစ်စုံ ပွင့်လာပြီး နန်းတော်တစ်ခုလုံးကို စီးမိုးကြည့်၍ အားလုံး၏ လှုပ်ရှားမှုကို စောင့်ကြည့်နေသည့်နှယ်၊ မည်သူမှ ထိုအကြည့်အောက်တွင် မဆင်မခြင် မလှုပ်ရှားရဲကြတော့ပေ။

အားကောင်းလှသော အရှိန်အဝါသည် နန်းတော်တစ်ခုလုံးကို လွှမ်းခြုံသွားပြီးနောက် ဒီရေကျသည့်နှယ် တဖြည်းဖြည်း ပြန်လည်း ပျောက်ကွယ်သွားခဲ့လေသည်။

ထိုအရှိန်အဝါ ပျောက်ကွယ်သွားသည်နှင့် လူပေါင်းများစွာသည် ချွေးသီးချွေးပေါက်များကျလျက် မြေကြီးပေါ်သို့ အားမရှိသည့်နှယ် လဲပြိုကျကုန်လေသည်။ နန်းတော်ထဲရှိ တန်ခိုးရှင်အဆင့် ပညာရှင်များသည် သူတို့တစ်ကိုယ်လုံး အားမရှိတော့သည့်နှယ် ပျော့ခွေချင်လာခဲ့သည်။

“မျိုးနွယ်စုခေါင်းဆောင်သခင်မ ဘာကိုရှာနေတာလဲ”

“ငါလည်မသိဘူး။ တစ်ယောက်ယာက် မျိုးနွယ်စုခေါင်းဆောင် သခင်မကို ဒေါသထွက်အောင်များ လုပ်လိုက်တာလား”

အကုန်လုံး နားမလည်နိုင် ဖြစ်နေခဲ့ကြသည်။

အစောပိုင်းက ရုတ်တရက် ထွက်ပေါ်လာခဲ့သော အရှိန်အဝါသည် မျိုးနွယ်စုခေါင်းဆောင် သခင်မ၏ အရှိန်အဝါ ဖြစ်ပေသည်။

ရန်ကိုင်သည်လည်း အံ့အားသင့်နေခဲ့သည်။ ချီယွဲ့၏ တုန့်ပြန်မှု ဤမျှ မြန်ဆန်လိမ့်မည်ဟု သူလည်း မထင်ထားခဲ့ချေ။ ကျောက်တုံး ရုပ်သေးရုပ်၏ မြေထုနှင့်ရောပြီး ကိုယ်ယောင်ဖျောက်နိုင်သည့် စွမ်းရည်ကြောင့်သာ မဟုတ်လျှင် လနီမျိုးနွယ်စုခေါင်းဆောင် သခင်မ သူ့အား တွေ့သွားလောက်ပေပြီ။

ထိုကဲ့သို့ ဖြစ်ပြီးနောက်ပိုင်း ရန်ကိုင်သည် ရတနာဂိုဒေါင်ထဲမှ ရတနာများအား ခိုးယူမည့်အကြံကို စွန့်ပယ်ပြီး သူနေထိုင်သည့် နေရာဆီသို့ ချက်ချင်း ပြန်လှည့်ပြေးလာခဲ့လေသည်။

ချီယွဲ့၏ နန်းတော်ဆောင်ထဲတွင်၊ ချီယွဲ့သည် မျက်မှောင်ကြုတ်၍ ဇဝေဇဝါ ဖြစ်နေဟန်ဖြင့် “ရတနာဂိုဒေါင်ရဲ့ အကာအရံကို တစ်ယောက်ယောက် ထိသွားတာ သေချာပါတယ်။ ဘာလို့ ဘာမှ ရှာမတွေ့ရတာလဲ”

သူမ၏ နယ်ပယ်အတွင်း၊ သူမ စောင့်ကြည့်နေသည့် စက်ကွင်းအတွင်း မည်သူမှ ပုန်းကွယ်နိုင်လိမ့်မည် မဟုတ်ဟု ထင်သဖြင့် တစ်ယောက်ကိုမှ ရှာမတွေ့ရခြင်းမှာ ရတနာဂိုဒေါင်၏ အကာအရံသည် အချိန်ကြာသဖြင့် တစ်နေရာရာ ချို့ယွင်းသွားခြင်း ဖြစ်မည်ဟုသာ ကောက်ချလိုက်လေသည်။

ထိုကဲ့သို့ တွေးလိုက်ပြီးနောက် ထိုအကြောင်းကို ဆက်ပြီး စဉ်းစားမနေတော့ဘဲ စိတ်ဝင်တစားပြုံး၍သာ ရေရွတ်လိုက်၏ “ဒီတစ်ကြိမ်တော့ ယုရှုန်း ခေါင်းသုံးတတ်သွားပြီပဲ။ ဓါးငှားပြီးတော့ လုပ်ကြံတတ်နေပြီ။ လူသားကောင်လေး၊ နင့်မှာ ဘယ်လို အရည်အချင်းရှိလဲ ဒီဘုရင်မ ကြည့်ကြည့်ရတာပေါ့”

ထိုကဲ့သို့ ရေရွတ်ပြီးနောက်တွင် ရှနင်းချန် နေနေသည့် နေရာဆီသို့ ကောင်းကင်စိတ်အာရုံ ဖြန့်ကျက်လိုက်လေသည်။

ရွှေရောင်ကျောက်တုံးရုပ်သေးရုပ်ကို အနက်ရောင်စာအုပ်ထဲသို့ ပြန်ထည့်လိုက်ပြီးရုံတင် ရှိသေးသော ရန်ကိုင်သည် တစ်ခုခုကို ခံစားမိလိုက်သည့်အလား မျက်မှောင်ကြုတ်လျက် တစ်ခုသော ဘက်ဆီသို့ လှမ်းကြည့်လိုက်လေသည်။

ယခု တစ်ယောက်ယောက်မှ သူ့အား စောင့်ကြည့်နေသလို ခံစားလိုက်ရသည်။ ကောင်းကင်စိတ်အာရုံကို ဖြန့်ကျက်၍ သေချာ စစ်ဆေးကြည့်လိုက်သော်ငြား ဘာကိုမှ မတွေ့ခဲ့ရချေ။

အစောပိုင်းက အဖြစ်အပျက်နှင့် ပက်သက်၍ ချီယွဲ့ တစ်ခုခုများ ရှာတွေ့သွားပြီး သူ့အား သံသယဝင်သွားခြင်းပေလား။

ရန်ကိုင် မျက်နှာပျက်သွားခဲ့သည်။

“အို… ဒီကောင်လေး အာရုံစူးရှသားပဲ” ချီယွဲ့ ပြုံးလိုက်၏။

တန်ခိုးရှင်ဘုရင် ဒုတိယအဆင့် ရောက်နေသည့် သူမအဖို့ တန်ခိုးရှင် ဒုတိယအဆင့် ကျင့်ကြံသူတစ်ယောက်ကို တစ်ဖက်လူ သတိမထားမိဘဲ စောင့်ဖို့ရာ အလွယ်လေးပင်။ သို့သော် ရန်ကိုင်သည် သူ့အား တစ်ယောက်ယောက်မှ စောင့်ကြည့်နေသည်ကို ချက်ချင်း သတိပြုမိသွားခဲ့သည်။

သတိပြုမိလိုက်သော်လည်း သူ့အကန့်အသတ်သည် သတိပြုမိရုံသာ ဖြစ်ပြီး သူ့အား စောင့်ကြည့်နေသော ကောင်းကင်စိတ်အာရုံကို အာရုံမခံမိခဲ့ချေ။

စိတ်ဝင်စားစရာတော့ ကောင်းသွားပြီ ချီယွဲ့ သူမဘာသာ တွေးလိုက်သည်။

ရန်ကိုင်ကမူ တင်ပလင်ခွေထိုင်လျက် မျက်မှောင်ကြီးကြုတ်ကာ ထိုင်စဉ်းစားနေခဲ့သည်။ ခဏမျှ စဉ်းစားနေပြီးနောက် မျက်လုံး ပိတ်၍ စိတ်ငြိမ်အောင် ကြိုးစားလိုက်လေသည်။

“တောင်းပန်ပါတယ် သခင်လေးတို့။ ဒီနေရာက ဆေးဝိဇ္ဇာရှဲ့ရဲ့ ကိုယ်ပိုင်နားနေဆောင်ပါ။ သူ့ခွင့်ပြုချက်မရဘဲ ဘယ်သူမှ ဆေးဖော်စပ်နေတာကို နှောင့်ယှတ်ခွင့်မရှိဘူးလို့ မျိုးနွယ်စု ခေါင်းဆောင် သခင်မက အမိန့်ပေးထားပါတယ်။ သခင်လေးတို့ ကျေးဇူးပြုပြီး ပြန်လှည့်သွားပေးကြပါ”

ထိုစကားသံကို ကြားလိုက်သည့်အခါ ရန်ကိုင်၏ အမူအရာ ပြောင်းလဲသွားခဲ့လေသည်။ စကားပြောလိုက်သည့်လူမှာ သူတို့ဆီသို့ ဆေးအမယ်များ လာပို့ပေးသော အစိမ်းရောင် ဝတ်ရုံ ဝတ်ဆင်ထားသည့် အစေခံမလေး ဖြစ်ပေသည်။ လက်ရှိတွင် သူမသည် တစ်ယောက်ယောက် ဤနေရာသို့ ဝင်လာမည်ကို တားဆီးနေသည့်ပုံပင်။

“ဒီနေရာက ဆေးဝိဇ္ဇာရှဲ့နေတဲ့ နေရာမှန်း ဒီသခင်လေး သိတယ်။ မဟုတ်ရင် ငါ့အဆင့်နဲ့ ဒီလို ချောင်ကျတဲ့နေရာဆီ လာမယ် ထင်နေလား။ ဘေးဖယ်စမ်း၊ ဒီသခင်လေး ဆေးဝိဇ္ဇာရှဲ့နဲ့ ဆွေးနွေးစရာ ရှိတယ်” ခပ်အောအော်အသံတစ်သံ ရုတ်တရက် ထွက်ပေါ်လာခဲ့သည်။

“သခင်လေးတို့ နှစ်ယောက် သေချာပြန်စဉ်းစားပေးပါ။ မျိုးနွယ်စုခေါင်းဆောင် ပေးထားတဲ့အမိန့်မို့လို့ပါ။ ကျေးဇူးပြုပြီး ဒီအစေခံကို ဒုက္ခရောက်အောင် မလုပ်ပါ့နဲ့” အစိမ်းရောင်ဝတ်ရုံ ဝတ်ဆင်ထားသည့် အစေခံမလေးသည် ချီယွဲ့၏ နာမည်ကို နောက်တစ်ကြိမ် အသုံးပြုရင်း ထပ်မံ တောင်းပန်လိုက်သည်။

“ထွက်သွားစမ်း” အစောပိုင်းက စကားပြောလိုက်သည့်လူက ဒေါသတကြီး ပြန်ပြောလိုက်သည် “စီနီယာချီယွဲ့ နာမည်နဲ့ ဒီသခင်လေးကို လာမခြိမ်းခြောက်နဲ့။ စီနီယာချီယွဲ့ မေးရင် ဒီသခင်လေးကိုယ်တိုင် ရှင်းပြပေးလိုက်မယ်။ နင့်ကို ရှင်းပြရမှာ မဟုတ်ဘူး။ အစေခံတစ်ယောက်ကများ ဒီသခင်လေးရဲ့ လမ်းကို လာပိတ်ရဲတယ်”

“မိန်းကလေး နင်ဖယ်ပေးသင့်တယ်။ ငါတို့လာတာ ဆေးဝိဇ္ဇာရှဲ့ကို ဆေးလုံးတစ်လုံး ဖော်စပ်ခိုင်းမလို့၊ သူ့ကို နှောင့်ယှတ်မလို့ မဟုတ်ဘူး။ ငါပြောနေတုန်း ဖယ်ပေးလိုက်ရင် ကောင်းမယ်။ အစ်ကိုရွှယ့်လျန်က စိတ်ရှည်တဲ့လူ မဟုတ်ဘူး။ ငါတို့ဘက်က နင့်ကို ရန်စမိလိုက်သလို ဖြစ်သွားခဲ့ရင် သူ့ကိုယ်စား ဒီသခင်လေးကပဲ တောင်းပန်လိုက်မယ်” နောက်ထပ် အသံတစ်သံ ထွက်ပေါ်လာခဲ့သည်။

ထိုအသံကို ကြားလိုက်သည့်အခိုက် ရန်ကိုင် လှောင်ပြုံးပြုံးလိုက်လေသည်။

အသံပိုင်ရှင်သည် မီထျန်းဆိုသည့်ကောင်မှလွဲ၍ အခြား မဟုတ်ချေ။

နန်းတော်ထဲသို့ ဝင်လာကတည်းက ထိုသကောင့်သားကို နောက်တစ်ကြိမ် ထပ်မတွေ့ရတော့ချေ။ သို့သော်လည်း မွေးကတည်းက ခြေမွေးမီးမလောင်၊ လက်မွှေးမီးမလောင်၊ လူအားလုံး၏ မြောက်စားခြင်း ခံလာရသည့် လူတစ်ယောက်သည် သူ့အား ရန်စသွားသည့် ရန်ကိုင်ကဲ့သို့ လူတစ်ယောက်ကို မည်သို့မှ အလွတ်ပေးလိမ့်မည် မဟုတ်ချေ။ မီထျန်းအား သတိထားရန် ရှန်ချင်းလော့သည် သူ့အား သတိပေးပြီးသား ဖြစ်သည်။

မီထျန် ဤနေရာသို့ ကောင်းသော လာခြင်းနှင့် လာခြင်း မဟုတ်မှန်း ရန်ကိုင် ခန့်မှန်းမိနေလေပြီ။

သို့သော်လည်း သူနှင့် ပါလာသည့်လူမှာ မည်သူနည်း။ မီထျန်းသည် ထိုလူအား အစ်ကိုရွှယ့်လျန်ဟု ခေါ်ဝေါ်နေပုံကိုကြည့်လျှင် တစ်ဖက်လူ၏ အဆင့်အတန်းသည်လည်း မနိမ့်လောက်ချေ။

ရန်ကိုင် သိချင်မိသွားခဲ့သည်။

“ဆေးဝိဇ္ဇာရှဲ့ကို ဆေးဖော်စပ်ခိုင်းဖို့” အစေခံမလေးသည် တစ်ချက် ကြောင်သွားသော်လည်း ချက်ချင်း ခေါင်းခါလိုက်ပြီး “အဲ့လိုလည်း မဖြစ်ဘူး။ ဆေးဝိဇ္ဇာရှဲ့ကို မျိုးနွယ်စုခေါင်းဆောင် အရမ်း တန်ဖိုးထားတာ။ မျိုးနွယ်စုခေါင်းဆောင်ရဲ့ ခွင့်ပြုချက် မပါဘဲ ဘယ်သူမှ ဆေးဝိဇ္ဇာရှဲ့ကို ဆေးဖော်စပ်ပေးဖို့ တောင်းဆိုလို့ မရဘူး”

“မရဘူး” ရွှယ့်လျန်ဆိုသော မွန်းစတားမျိုးနွယ်စုဝင် ကျင့်ကြံသူက နှာခေါင်းရှုံ့လျက် “ဘာလို့ မရရတာလဲ။ သူ့လို လူသားတစ်ယောက် အနေနဲ့ ဒီသခင်လေးက ဆေးဖော်စပ်ပေးဖို့ လာပြီး တောင်းဆိုတာကိုတောင် ဂုဏ်ယူနေသင့်တာ။ ဘယ်လိုလုပ်ပြီး ငြင်းရဲတာလဲ။ သူငြင်းရဲရင် ဒီသခင်လေး သူ့ကို ချက်ချင်း သတ်ပစ်မှာ”

အစေခံမလေး ကြောက်ရွံ့မှုကြောင့် ဖြူလျော်သွားခဲ့သည်။ သူမစိတ်ထဲ ကြောက်လန့်သွားခဲ့သော်ငြား လမ်းမဖယ်ပေးသေးဘဲ ခေါင်းမာမာဖြင့် ဆက်၍ ရပ်နေဆဲ။

“ငါနင့်ကို အသက်သုံးရှိုက်စာအ ချိန်ပေးမယ်။ အဲ့တော့မှ လမ်းမဖယ်ပေးဘူးဆိုရင် သေဖို့ ပြ်ငထားပေတော့။ နင့်လို့ အစေမခံလေး တစ်ယောက်ကို သတ်လိုက်ရင်တောင် စီနီယာ ချီယွဲ့ ဒီသခင်လေးကို အပြစ်တင်မှာ မဟုတ်ဘူး။ နင်သေချာစဉ်းစား” ရွှယ့်ယွယ်သည် အစေခံမလေးအား အေးစက်စက် အကြည့်ဖြင့် စိုက်ကြည့်၍ ပြောလိုက်သည်။

“ကောင်မလေး၊ နင်ဘေးဖယ်လိုက်တာ ပိုကောင်းမယ်နော်။ နင့်အသားတွေ စုတ်ပြဲသွားခဲ့ရင် နင့်ရုပ်ရည်က အခုလို ကြည့်ကောင်းနေတော့မှာ မဟုတ်ဘူးနော်” မီထျန်းက ယဲ့ယဲ့လေး ပြုံးလျက် အစေခံမလေးကို ပြောလိုက်သည်။

မီထျန်း၏ မျက်လုံးနှင့် အကြည့်ချင်း ဆုံးသွားချိန် အစေခံမလေး၏ မြင်ကွင်းတစ်ခုလုံး ဝေဝါးလားပြီး သူမ၏ ပါးပြင်တစ်ခုလုံး တဖြည်းဖြည်း ရဲတက်လာခဲ့လေသည်။ ထို့နောက် ရှက်ကိုးရှက်ကန်း အမူအရာဖြင့် ခေါင်းညိတ်၍ ဘေးဖယ်ပေးလိုက်လေ၏။

အေးစက်စက် အမူအရာဖြင့် နှာခေါင်းရှုံ့၍ ရွှယ့်လျန်သည် အစေခံမလေးကို ဘေးသို့ တွန်းဖယ်လိုက်ပြီး နန်းတော်ထဲသို့ ဝင်သွားလိုက်လေသည်။

မီထျန်းသည် ပြုံးလျက်သာ ရွှယ့်လျန်နောက်မှ လိုက်သွားခဲ့၏။

နန်းတော်မှ ဆယ်မီတာ အကွာသို့ ရောက်လာသော် နန်းတော်တံခါး ရုတ်တရက် ပွင့်လာပြီး ထိုထဲမှ လူတစ်ယောက် ထွက်လာသည်ကို နှစ်ဦးစလုံး မြင်တွေ့လိုက်ရသည်။

ရွှယ့်လျန်နှင့် မီထျန်းတို့ နှစ်ဦးစလုံးလည်း သွားနေရင်း ရပ်လိုက်ပြီး ရွှယ့်လျန်သည် ရန်ကိုင်အား အထင်တသေး စိုက်ကြည့်လိုက်၏။

ရန်ကိုင်၏ မြင်လိုက်သည်နှင့် တစ်ပြိုင်နက် မီထျန်း၏ မျက်လုံးထဲ ချောက်ခြားရိပ်၊ ဒေါသရိပ်တို့ ထွက်ပေါ်လာခဲ့လေသည်။

လစန္ဒာမြို့တွင် ပြဿခဲ့သော ရန်ကိုင်၏ စွမ်းဆောင်ရည်ကို ယနေ့ထိတိုင် မမေ့သေးချေ။ ရန်ကိုင်သည် လူသားတစ်ယောက် ဖြစ်သော်လည်း လျှော့တွက်သင့်သည့် လူတစ်ယောက် မဟုတ်ပေ။

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၈၁)

“အစ်ကိုရွှယ့်လျန်၊ သတိထားနော်။ သူက ကျုပ်ပြောခဲ့ဖူးတဲ့ လူသားပဲ” မီထျန်သည် ရန်ကိုင်အား အေးစက်စက် အကြည့်ဖြင့် စိုက်ကြည့်ရင်း ရေရွတ်လိုက်သည်။

ရွှယ့်လျန်ဆိုသော မွန်းစတားမျိုးနွယ်စုဝင် ကျင့်ကြံသူသည် ရန်ကိုင်အား နောက်တစ်ကြိမ် ထပ်ကြည့်လိုက်ပြီး အပြုံးကြီး ပြုံးလျက် “ဒီတော့ မင်းရဲ့ မိုးကြိုးမီးတောက်သားရဲ နှစ်ကောင်ကို သတ်ခဲ့တဲ့ကောင်က ဒီလူသားပေါ့။ သူ့ကြည့်ရတာလည်း ဘာမှ သိပ်ဟုတ်တဲ့ပုံ မပေါ်ပါဘူး”

သူ၏ အထင်တသေး အမူအရာအရ ရန်ကိုင်ကို မျက်လုံးထဲ မထည့်သည်မှာ သေချာသလောက်ရှိသည်။

မီထျန်းက ရယ်သွမ်းသွေးလိုက်ပြီး “သူ့ကို လူသားတစ်ယောက် ဖြစ်လို့ အထင်သေးနေတာ ဆိုရင်တော့ အစ်ကိုရွှယ့်လျန် အမှားကြီး မှားသွားလိမ့်မယ်နော်။ သူက မွန်းစတားဧကရာဇ်ကြယ်က အခြား လူသားတွေနဲ့ မတူဘူးနော်…”

“ဟန့်၊ မတွေ့ရတာ ဆယ်နှစ်လောက် ကြာသွားတာနဲ့ မင်းသတ္တိတွေ ပျောက်သွားကုန်တာပဲ၊ မီထျန်း၊ ဟန်။ လူသား တစ်ယောက်ကိုတောင် ကြောက်နေတဲ့ဘဝ ရောက်သွားတယ် ဆိုတော့။ ငါ့လှည်းကိုဆွဲတဲ့ သားရဲတွေသာ အသတ်ခံရမယ်ဆိုရင် ဒီကောင် နောက်နေ့ နေထွက်တာကို မြင်ရတော့မှာ မဟုတ်ဘူး။ မီထျန်း၊ မင်းအကန့်အသတ်က ဒီလောက်ပဲ၊ အခုကနေစပြီး မွန်းစတားဧကရာဇ်ကြယ်က ငါရွှယ့်လျန်ရဲ့ လောကကြီးပဲ” ရွှယ့်လျန်သည် မီထျန်းပြောသည့်စကားကို အလေးအနက် မထားဘဲ သူ့ကိုပင် ပြန်၍ လှောင်ပြောင်နေလိုက်သေးသည်။

သို့သော်လည်း မီထျန်းသည် ဒေါသထွက်သွားခြင်းမရှိဘဲ ပြုံး၍သာ “ငါမင်းကို အကြံပေးနေရုံပဲ၊ မင်းဘာသာ နားထောင်ထောင်၊ မထောင်ထောင် ကိစ္စမရှိဘူး… ဟဲဟဲ”

သူတို့ နှစ်ယောက်စလုံးသည် တိုးတိုးလေး ပြောနေခြင်း မဟုတ်သည့် အတွက် သူတို့ ပြောနေသည့်စကား အကုန်လုံးကို ရန်ကိုင် ကြားနေရသည်။

ရန်ကိုင်သည် ရွှယ့်လျန်ဆိုသော ကျင့်ကြံသူအား စိတ်ဝင်တစား လှမ်းကြည့်နေခဲ့သည်။

ဤရွှယ့်လျန်တွင် အားကောင်းသော နောက်ခံတစ်ခုခု ရှိရပေလိမ့်မည်။ မဟုတ်လျှင် မီထျန်အား ယခုကဲ့သို့ ပြောရဲလိမ့်မည် မဟုတ်ချေ။ မီထျန်းသည် မွန်းစတားဧကရာဇ် ကြယ်ပေါ်တွင် နာမည်ကျော်ကြားသော မျက်လုံးတစ်ထောင် တန်ခိုးရှင်ဘုရင်အဆင့် မျိုးနွယ်စုခေါင်းဆောင်၏ သားဖြစ်သည်။ ထိုကဲ့သို့သော လူတစ်ယောက်ကို ဝေဖန်လှောင်ပြောင်ရဲရအောင် ရွှယ့်လျန်သည် မည်သူများ ဖြစ်လေသနည်း။

ထို့အပြင် ရွှယ့်လျန်ဆိုသောလူသည် မီထျန်းထက် အားနည်းခြင်း မရှိဘဲ သူ့ကျင့်ကြံခြင်းသည် တန်ခိုးရှင် တတိယအဆင့်သို့ ရောက်ရှိနေခဲ့သည်။

“မင်းတို့နှစ်ယောက် ဘာကိစ္စရှိလို့လဲ” ရန်ကိုင်၏ ပြုံးလျက် ထိုနှစ်ယောက်ကို အေးစက်စက် အကြည့်ဖြင့် စိုက်ကြည့်ရင်း မေးလိုက်လေသည်။

“ရှိတာပေါ့” ရွှယ့်လျန်က သွားပေါ်အောင်ပြုံးလျက် ရန်ကိုင်အား အထင်တသေး စိုက်ကြည့်ရင်း “ဒါပေမယ့် ဒီသခင်မလေးနဲ့ စကားပြောဖို့ မင်းအဆင့်မမှီသေးဘူး။ မျိုးရိုးနာမည်ရှဲ့နဲ့ လူသားမိန်းကလေးကို အပြင်ထွက်လာပြီး လာတွေ့ခိုင်းလိုက်”

“စီနီယာမမလေးကို မြင်ချင်သေးတာလား” ရန်ကိုင်က ရယ်သွမ်းသွေးလျက် ခေါင်းခါ၍ “အဲ့လို မဖြစ်နိုင်လောက်မှာ စိုးရိမ်စရာကြီး။ စီနီယာမမလေးက အခု ဆေးဖော်စပ်နေတုန်း တန်းလန်းကြီးဆိုတော့ ဘယ်သူ့ကိုမှ တွေ့နိုင်မှာ မဟုတ်ဘူး”

“မတွေ့ဘူးလား” ရွှယ့်လျန်သည် အေးစက်စက် အမူအရာဖြင့် နှာခေါင်းရှုံ့၍ “အဲ့ဒါ သူဆုံးဖြတ်ရမှာမဟုတ်ဘူး။ ဒီသခင်လေး ကိုယ်တိုင် ရောက်လာပြီဆိုမှတော့ သူလာတွေ့ကို တွေ့ရမှာ။ သူ့မှာ ဘာပြောပိုင်ခွင့်မှမရှိဘူး”

ရွှယ့်လျန်နောက်တွင် ရပ်နေသော မီထျန်းက ပြုံးလျက် ထပ်ပေါင်းပြောလိုက်သည် “အစ်ကိုရွှယ့်လျန်က မိန်းကလေးကို ဆေးဖော်စပ်ခိုင်းဖို့ လာခဲ့တာ။ သူ့ဆေးပညာမှာ တော်တော်လေး တော်တယ်လို့ ငါတို့ သတင်းကြားလို့ ရောက်လာတာ။ လိုအပ်တဲ့ ဆေးအမယ်တွေ အကုန်လုံးကို အစ်ကိုရွှယ့်လျန် ပြင်ပြီးသွားပြီ။ ဆေးဖော်စပ်ပေးဖို့ပဲ လိုတော့တာ”

“ဆေးဖော်စပ်ခိုင်းဖို့လား” ရန်ကိုင်က ခေါင်းညိတ်လိုက်ပြီး “ဒီလောက်လေးနဲ့ စီနီယာမမလေးကို သွားနှောင့်ယှတ်ဖို့ မသင့်တော်ဘူး။ ဆေးပင်တွေ ထားခဲ့လိုက်။ သူ့အစား ငါယူထားလိုက်မယ်”

မီထျန်း မျက်ခုံးပင့်သွားခဲ့သော်ငြား ရွှယ့်လျန်က နှာခေါင်းရှုံ့၍ “မင်းဆီမှာ ဆေးပင်တွေ ထားခဲ့ရမှာ၊ မင်းက ဘာမို့လို့လဲ။ မင်းလို မိန်းမအားကိုးနေတဲ့ကောင်က ဘာလုပ်တတ်မှာ မို့လို့လဲ။ ဟိုမိန်းမကိုသာ အပြင်ထွက်လာခိုင်းလိုက်။ ဟန့်၊ ဘာမဟုတ်တဲ့ လူသားမိန်းမပျက် တစ်ယောက်ကများ ငါ့ရှေ့မှာ လာပြီး မောက်မာချင်သေးတယ်။ ငါ့သူခြေလက်တွေ အကုန် ဆွဲဖြုတ်ပစ်လိုက်ရလို့ မကောင်းရှိတော့မယ်”

ရန်ကိုင် မျက်နှာထက်ရှိအပြုံး ပျောက်ကွယ်သွားခဲ့ပြီး မျက်လုံး မှေးစဉ်းလျက် အေးစက်စက် လေသံဖြင့် ပြောလိုက်လေသည် “မင်းငါ့စီနီယာမမလေးကို စော်ကားလိုက်တာလား”

“မင်းသောက်နားပင်နေတာလား။ ငါသူ့ကို စော်ကားတော့ရော ဘာဖြစ်လဲ”

“အဲ့ဒါဆို ပြန်ပေးဆပ်ဖို့ ပြင်ဆင်ထားပေတော့”

ပြောပြီးသည်နှင့် သူ့ပုံရိပ် ရပ်နေရာမှ ရုတ်တရက် ပျောက်ကွယ်သွားပြီး ရွှယ့်လျန်ရှေ့၌ ဆန်းကြယ်စွာ ပြန်ပေါ်လာခဲ့၏။ လက်သီးကို တင်းတင်းဆုပ်လျက် ရွှယ့်လျန်၏ မျက်နှာတည့်တည့်သို့ ထိုးချလိုက်လေသည်။

ရွှယ့်လျန်သည် ဤနေရာကို ပြဿနာရှာရန် သက်သက်ဖြင့် ရောက်လာခြင်း ဖြစ်သည့်အတွက် ရန်ကိုင်လည်း သူ့အား ပြဿနာ လာရှာသည့်လူနှင့် စကားဆက်ပြောချင်စိတ် မရှိတော့ချေ။

ရွှယ့်လျန် ထိတ်လန့်သွားခဲ့သည်။ ရန်ကိုင် မည်ကဲ့သို့ လှုပ်ရှားလိုက်သလဲ သူမမြင်လိုက်ချေ။ သတ်ဖြတ်လိုစိတ် အပြည့်နှင့် သူ့ဆီ တိုးဝင်လာနေသော လက်သီးကို မြင်သော် မာန်သွင်းအော်ဟစ်လိုက်ပြီး ရန်ကိုင်၏ လက်သီးကို သူ့လက်သီးဖြင့် တန်ပြန်ထိုးလိုက်လေသည်။

သူ့မျက်လုံးထဲ ဒေါသရိပ်တို့ဖြင့် ပြည့်နေခဲ့သလို တစ်ချိန်တည်းတွင် အထင်သေးသည့် အရိပ်အယောင်တို့ဖြင့်လည်း ပြည့်နေခဲ့သည်။

ရန်ကိုင် ရုတ်တရက် တိုက်ခိုက်လိုက်သည့်အခိုက် အံ့အားသင့်သွားမိ၏။ မည်သူ့ လူသားမှ သူ့အား ဤကဲ့သို့ မတိုက်ခိုက်ခဲ့ဖူးသည်ကိုး။

သို့သော်လည်း ဤလူသားကောင်လေးသည် တကယ်ကို သွေးနားထင် ရောက်နေသည့် လူတစ်ဦးဖြစ်သည်။ သူနှင့်များ လာပြီး ကာယခွန်အားချင်း ယှဉ်ပြိုင်ချင်နေသည်။ မွန်းစတား ဧကရာဇ်ကြယ် တစ်ခုလုံးကို ထည့်သွင်းစဉ်းစားကြည့်မည် ဆိုလျှင်ပင် ရွှယ့်လျန်၏ သွေးမျိုးဆက်သည် ကာယခွန်အား အားကောင်းသည့် သွေးမျိုးဆက်ထဲ ပါဝင်ကာ အနည်းငယ်သာ မွန်းစတားမျိုးနွယ်စုဝင်များသည် သူတို့နှင့် ယှဉ်ပြိုင်နိုင်သည်။ လူသားတစ်ယောက်နှင့် ယှဉ်ရမည် ဆိုလျှင်တော့ ပြောနေစရာပင် မလိုတော့။

ရွှယ့်လျန်သည် အားကုန်သုံး၍ ပြန်ထိုးချလိုက်သည်။

လက်သီးနှစ်လုံး ထိပ်တိုက်တွေ့သွားချိန် မမြင်နိုင်သော စွမ်းအင်လှိုင်းများ အဘက်ဘက်သို့ ဖြာထွက်လာခဲ့လေသည်။

ရန်ကိုင်၏ ခန္ဓာကိုယ် အနည်းငယ် တုန်ခါသွားခဲ့ပြီး အံ့အားသင့်နေသည့် အမူအရာဖြင့် မော့ကြည့်မိလိုက်၏။

ရွှယ့်လျန်မှာမူ လက်ရှိ ဖြစ်ပျက်နေသည်ကို မယုံကြည်နိုင်သည့် အလား ရန်ကိုင်အား မျက်လုံးအပြူးသားဖြင့် ပြန်ကြည့်လိုက်၏။

လက်သီးချင်း ထိပ်တိုက်တွေ့သွားချိန် တစ်ဖက်လူ၏ လက်သီး မည်မျှ အားကောင်းသလဲ ဆိုသည်ကို နှစ်ယောက်စလုံး သတိပြု နားလည်လိုက်ကြသည်။

တန်ပြန်အားကြောင့် နှစ်ယောက်စလုံး နောက်သို့ ခြေလှမ်း အနည်းငယ် အသီးသီး ဆုတ်သွားခဲ့ကြရသည်။

“ကြမ်းလိုက်တာ” မီထျန်းသည် တုန့်ဆိုင်းမနေခြင်းမရှိဘဲ ချီးကျူးလိုက်သည်။ ရန်ကိုင် လှုပ်ရှားလိုက်သည်ကို မြင်သည်နှင့် တစ်ပြိုင်နက် သူပါအဆစ်မပါသွားစေရန် အလျင်အမြန် အနောက်ဆုတ်နေလိုက်သည်။ တိုက်ပွဲရလဒ်ကို မြင်လိုက်ရသည့် အခိုက် မီထျန်း အတော်လေး အံ့အားသင့်သွားခဲ့သည်။

ဘက်ပေါင်းစုံကို ထည့်သွင်းတွက်ချက်၍ ခွန်အားချင်းကို နှိုင်းယှဉ်ကြည့်မည်ဆိုလျှင် သူ့ခွန်အားသည် ရွှယ့်လျန်အောက် နိမ့်ကျခြင်း မရှိသော်လည်း ကာယခွန်အားချင်း ယှဉ်ပြိုင်မည် ဆိုလျှင်တော့ ရွှယ့်လျန်ကို သူမနိုင်ချေ။ ရွှယ့်လျန်၏ သွေးမျိုးဆက်သည် ကာယခွန်အားကြောင့် ကျော်ကြားသည့် သွေးမျိုးဆက်တစ်ခု ဖြစ်သည် မဟုတ်ပေလော။

ရွှယ့်လျန်နှင့်သာ ထိပ်တိုက်ရင်ဆိုင်ရမည်ဆိုလျှင် မီထျန်း အနေဖြင့် သူနှင့် ထိပ်တိုက်မတွေ့မိအောင် အတတ်နိုင်ဆုံး ရှောင်ပေမည်။

သို့သော်လည်း ရန်ကိုင်ဆိုသော ထိုလူသားသည် ရွှယ့်လျန်နှင့် လက်သီးချင်း ယှဉ်ထိုးခဲ့ပြီး ပထမတစ်ကြိမ် ထိုးပြီးနောက်တွင် နှစ်ဖက်စလုံး မည်သည့်ဘက်မှ အသာစီး မရခဲ့ချေ။

မီထျန်း၏ အမူအရာ လေးနက်သွားခဲ့ပြီး ရန်ကိုင် သူ့မွန်းစတား သားရဲနှစ်ကောင်ကို သတ်နိုင်ခြင်းမှာ သူ့ခွန်အားကို ရုတ်တရက် ဖောက်ခွဲထုတ်၍ တိုက်ခိုက်ခြင်းကြောင့် မဟုတ်ဘဲ သူ့အစစ်အမှန် ခွန်အား သက်သက်ကြောင့်သာ ဖြစ်မှန်း နားလည်သွားတော့၏။

ပွဲတော့ ကြည့်ကောင်းပေပြီ။ မီထျန်း ရုတ်တရက် စိတ်လှုပ်ရှားလာပြီး မီတာထောင်နှင့်ချီ ဝေးကွာသော တစ်နေရာဆီသို့ ရုတ်တရက် လှမ်းကြည့်လိုက်လေသည်။

ထိုနေရာ၌ ယုရှုန်းသည် လက်ပိုင်လျက် အထက်စီးမှ ထူးမခြားနားဟန်ဖြင့် ငုံ့ကြည့်နေခဲ့သည်။ မီထျန်း၏ အကြည့်ကို သတိပြုမိသော် လက်မြှောက်ပြလိုက်ပြီး တိုက်ပွဲကိုသာ ပြန်ကြည့်နေတော့သည်။

“စိတ်ဝင်စားစရာပဲ၊ တကယ်ကို စိတ်ဝင်စားစရာပဲ” ရွှယ့်လျန်သည် ရန်ကိုင်အား အထက်အောက် အစုံအဆန် ကြည့်လျက် အော်ပြောလိုက်လေသည် “နောက်တစ်ကြိမ်”

သူ့စကာသံ ဆုံးသွားသည်နှင့် သူ့တစ်ကိုယ်လုံး သွေးရောင် အရှိန်အဝါတို့ဖြင့် တောက်ပလာခဲ့လေသည်။ ပြီးသည်နှင့် ခြေဆောင့်လျက် ရန်ကိုင်ဆီသို့ ပြေးဝင်သွားလေသည်။

သူ့ခြေတစ်လှမ်း လှမ်းလိုက်တိုင်း ခြေရာတစ်ခု ကျန်ရစ်ခဲ့၏။ ကျန်ရစ်ခဲ့သည့် ခြေရာများနေရာရှိ မြေထုသည် ပင့်ကူအိမ်ကဲသို့ ရုတ်တရက် အက်ကွဲသွားလေတော့သည်။ ရန်ကိုင် တစ်ကိုယ်လုံးကို သိပ်သည်းလှသော သတ်ဖြတ်လိုစိတ်တို့က ရုတ်တရက် လွှမ်းခြုံလာခဲ့သည်။

ထိုသတ်ဖြတ်လိုစိတ်သည် အလွန်ကိုမှ သိပ်သည်းလှကာ အေးစက်စက် ဓါးတစ်စင်းနှယ် ရန်ကိုင်၏ အရေပြားကို ဖြတ်တောက်ရန် ကြိုးစားနေခဲ့သည်။

သို့သော်လည်း ရန်ကိုင်သည် ပြန်ဆုတ်သွားမည့် အရိပ်အယောင် နည်းနည်းလေးမှ မပြချေ။

ဒေါသထွက်နေသော သားရဲတစ်ကောင်နှယ် အော်ဟစ် မာန်သွင်းလိုက်သည့်နောက် ရန်ကိုင်၏ ကြွက်သားများ ဖောင်းတက်လာပြီး အရိုးချင်း ပွတ်တိုက်သံများ ထွက်ပေါ်လာခဲ့၏။ တစ်ချိန်တည်း၌ သူ့အရှိန်အဝါသည် တစ်ဟုန်ထိုး မြင့်တက်လာခဲ့ပြီး သူ့အပေါ် ဖိနှိပ်နေသော သတ်ဖြတ်လိုစိတ်ကို တစ်စစီ ဖျက်စီးပစ်လိုက်လေသည်။

ထိုစဉ် ရွှယ့်လျန်သည် ရန်ကိုင်ရှေ့သို့ ရောက်လာပြီး ရန်ကိုင် မျက်နှာတည့်တည့်အား အရှိန်အဟုန် ပြင်းထန်လှသော လက်သီးချက်များ တရစပ် ပစ်ကျွေးတော့သည်။

ရန်ကိုင်သည် ထိုလက်သီးချက်များကို နည်းနည်းလေးမှ ရှောင်ရန် မကြိုးစားဘဲ စီးခံလျက် ရွှယ့်လျန်၏ သွေကွင်းသွေကွက် နေရာများဆီ ပြန်ထိုးလေသည်။

ဖုန်း… ဘုန်း… ခွပ်…

ရန်ကိုင်သည် ရှုံးနိမ့်သွားမည့် အရိပ်အယောင် နည်းနည်းလေးမှ မပြဘဲ ရွှယ့်လျန်ကိုပင် လက်သီးချင်း ယှဉ်ထိုးနေလိုက်သေး၏။

ထိုမြင်ကွင်းကြည့်ရင်း မီထျန်း ကြောင်သွားခဲ့ပြီး ယုရှုန်းမှာမူ ပါးစပ်အဟောင်းသား ဖြစ်နေတော့လေသည်။ အစိမ်းရောင် ဝတ်ဆင်ထားသည့် အစေခံမလေးသည်ပင်လျှင် ထိုမြင်ကွင်းကို ကြည့်ရင်း တုန်ရီနေခဲ့သည်။

ရန်ကိုင်သည် အသက်ရှင်နေထိုင်နိုင်ရန်အတွက် မိန်းမအပေါ် အားကိုးနေသည့် အရှက်မရှိသည့် အမှိုက်ကောင်တစ်ကောင် ဖြစ်သည်ဟုသာ ထင်ခဲ့သည်။ ရန်ကိုင်ကဲ့သို့ လူတစ်ယောက်ကို ရွေးချယ်ခဲ့သည့် ရှနင်းချန်၏ ဘဝကိုပင် သနားနေလိုက်သေး၏။ ဤလောကကြီးတွင် လူတော်များစွာ ရှိလျက်နှင့် ထိုကဲ့သို့သော ယောကျာ်းမျိုးကိုမှ သွားရွေးရသည်ဟု တွေးလျက်…

သို့သော်လည်း ယခု မြင်ကွင်းကို မြင်ပြီးနောက်တွင် သူမ၏ အထင်အမြင်အားလုံး လုံးဝ မှားယွင်းနေမှန်း သိလိုက်ရတော့သည်။

သခင်လေးရွှယ့်လျန်ကိုပင် ထိပ်တိုက်ရင်ဆိုင် တိုက်ခိုက်ရဲသည့် လူသားတစ်ယောက်သည် မည်ကဲ့သို့ သာမန်လူသားတစ်ယောက် ဖြစ်နိုင်မည်နည်း။

လက်ရှိ ရန်ကိုင်သည် သူမ အမြင်ထဲ ယခင်ထက် ပို၍ ရုပ်ချောလာသလိုလို…

ရွှယ့်လျန် အလွန်ဂုဏ်ယူရသော ကာယခွန်အားသည် ရန်ကိုင်နှင့် အတွေ့တွင် လုံးဝ အသုံးမဝင် ဖြစ်သွားရတော့လေသည်။

ရန်ကိုင်နှင့် ရွှယ့်လျန်သည် ဒေါသထွက် သွေးဆာနေသော သားရဲရိုင်းနှစ်ကောင်ပမာ အပြန်အလှန် ထိုးကြိတ်သတ်ပုတ်နေကြ၏။

မီထျန်းနှင့် ယုရှုန်းတို့ကမူ သူတို့နှစ်ယောက် တိုက်ခိုက်နေသည်ကို သေချာ မမြင်နိုင်တော့ဘဲ တလက်လက် တောက်ပနေသော ပုံရိပ် နှစ်ခုကိုသာ မြင်ရတော့သည်။ ပေါက်ကွဲသံများ အဆက်မပြတ် ထွက်ပေါ်လာနေပြီး ကြောက်မက်ဖွယ်ရာ အားလှိုင်းတို့သည်လည်း အဘက်ဘက်သို့ တောက်လျှောက် ဖြာထွက်လာနေခဲ့သည်။

နှစ်ယောက်စလုံးသည် ယခုမှ စတွေ့ကြခြင်း ဖြစ်ကြသော်လည်း ကမ္ဘာမကျေရန်သူများနှယ် ပြင်းထန်ကြမ်းတမ်းစွာ တိုက်ခိုက်နေကြသည်။

ရန်ကိုက်နှင့် တိုက်ခိုက်နေရင်း ရွှယ့်လျန် ပိုပို၍ ထိတ်လန့်လာခဲ့ရသည်။

ဤလောကကြီးတွင် သူနှင့် ကာယခွန်အားချင်း ယှဉ်ပြိုင်နိုင်သော လူသားတစ်ယောက် ရှိနေလိမ့်မည်ဟု မထင်ထားခဲ့ချေ။ ရန်ကိုင် ကိုယ်ပေါ်သို့ သူ့လက်သီး ရောက်သွားတိုင် ကျောက်တုံး ကျောက်ဆောင်ကြီးကို ထိုးလိုက်ရသလို ခံစားလိုက်ရသည်။

ရန်ကိုင်၏ ခန္ဓာကိုယ်သည် အသွေးအသားနှင့် ဖွဲ့စည်းမထားဘဲ အလွန်ကိုမှ မာကျောလှသော သတ္တုတစ်ခုခုဖြင့်များ ထုလုပ်ထားလေသလားဟုပင် ရွှယ့်လျန် အထင်ရောက်မိသွား၏။

ထို့သို့ မည်ကဲ့သို့ ဖြစ်နိုင်မည်နည်း။ ကယာခွန်အားကြောင့် နာမည်ကျော်ကြားသော မွန်းစတားမျိုးနွယ်စုဝင် အများစုပင်လျှင် သူနှင့် ကာယခွန်အားချင်း မယှဉ်ပြိုင်နိုင်သည်ကို လူသား တစ်ယောက်က သူနှင့် မည်ကဲ့သို့ ယှဉ်ပြိုင်နိုင်နေရသနည်း။

ထိုကောင် လူသားကော ဟုတ်မှဟုတ်ပါလေစွ။

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၈၂)

ပို၍ ထိတ်လန့်စရာကောင်းသည်ကား တိုက်ပွဲချိန် ကြာလာသည်နှင့် အမျှ ရန်ကိုင်၏ ခွန်အားသည် နည်းနည်းလေးမှ လျော့ကျသွားခြင်း မရှိသည့်အပြင် သူ့လက်သီးချက်တိုင်းသည် ပိုပို၍ အားကောင်းလာနေခဲ့သည်။ တိုက်ခိုက်ရင်း တိုက်ခိုက်ရင် ရွှယ့်လျန်ပင်လျှင် တဖြည်းဖြည်း အောက်စည်းသို့ ရောက်လာရ၏။

အစပိုင်းတွင် လက်ရည်ချင်း ညီနေသော်လည်း လက်ဖက်ရည် တစ်ခွက်စာကြာအောင် တိုက်ခိုက်နေပြီးနောက်တွင် ရွှယ့်လျန် တဖြည်းဖြည်း ဖိနှိပ်ခံလာခဲ့ရသည်။

ဘာတွေဖြစ်နေတာလဲ။ အခုထိ ဒီလူသား အားကုန် ထုတ်မသုံးသေးတာလား

ရွှယ့်လျန်၏ အမူအရာ ပိုပို၍ လေးနက်လာခဲ့သလို သူ့ရင်ထဲ ဒေါသလည်း ထွက်မိသွားခဲ့သည်။

သူ့သည် မွန်းစတားဧကရာဇ်ကြယ်၏ အနာဂတ် ကြယ်တစ်ပွင့် ဖြစ်သော ကောင်းချီးပေး ပါရမီရှင်တစ်ယောက် ဖြစ်သည်။ အားကောင်းသော ရန်သူများနှင့် ရင်ဆိုင်ရသည်ကို သူမကြောက်၊ ထိုကဲ့သို့သော ရန်သူများနှင့် တိုက်ခိုက်ရသည်ကိုပင် ပို၍ နှစ်သက်သည်။ အားကောင်းသော ပညာရှင်များကို သတ်ဖြတ်နိုင်မှသာလျှင် သူ့ခွန်အားကို သက်သေပြနိုင်ပေလိမ့်မည်။

နောက်ဆုံးတွင် ရန်ကိုင်ကို သူစိတ်ဝင်စားမိလာခဲ့သည်။

“ယုရှုန်း၊ ဘာတွေ ဖြစ်နေတာလဲ” ယုရှုန်းဘေးတွင် ရှန်ချင်းလော့ ရုတ်တရက် ပေါ်လာခဲ့ပြီး အောက်ဘက်ရှိ တိုက်ပွဲကို ကြည့်ရင်း စိုးရိမ်တကြီး မေးလိုက်လေသည်။

ဤမျှ တိုက်ပွဲသံများ ဆူညံနေလေရာ သူမ သတိမပြုမိဘဲ ဘယ်နေမည်နည်း။ စွမ်းအင်လှိုင်းများ ဖြာထွက်နေသည်မှာ ရှနင်းချန်၏ နန်းတော်မှဖြစ်ကြောင်း သတိပြုမိလိုက်သည့်နောက် ဤနေရာသို့ ချက်ချင်း အပြေးလာခဲ့လေသည်။ သူမအား ဆီးကြိုနေသည်ကား ရန်ကိုင်နှင့် ရွှယ့်လျန်တို့ တိုက်ခိုက်နေသည့် မြင်ကွင်းပင် ဖြစ်လေသည်။

“ရန်ကိုင် ရွှယ့်လျန်နဲ့ ဘာလို့ တိုက်ခိုက်နေတာလဲ။ ရွှယ့်လျန် ဟိုရက်ပိုင်းလောက်ကမှ ဒီကို ရောက်လာတာ မဟုတ်ဘူးလား” ရှန်ချင်းလော့က မယုံသင်္ကာဖြင့် မေးလိုက်သည်။ ရန်ကိုင်သာ မီထျန်းနှင့် တိုက်ခိုက်နေရလျှင် ရှန်ချင်းလော့ နားလည်နိုင်သေး၏။

တကယ်တော့ ရန်ကိုင်နှင့် မီထျန်းကြားတွင် ရန်ငြိုးရန်စ ရှိနေသည် မဟုတ်ပေလော။ ရန်ကိုင်သည် မီထျန်း၏ မွန်းစတားသားရဲ နှစ်ကောင်ကို သတ်လိုက်သည့်အတွက် မီထျန်း၏ စရိုက်အရ ထိုကိစ္စကို မည်သို့မှ မေ့လိုက်လိမ့်မည် မဟုတ်ချေ။

သို့သော်လည်း ရန်ကိုင်နှင့် ရွှယ့်လျန်နှင့် တစ်ခါမှ မတွေ့ဖူးသလို သူတို့ကြား မည်သည့် ရန်ငြိုးရန်စမှလည်း မရှိချေ။ ထိုသို့ဆိုလျှင် ရန်ကိုင်သည် ရွှယ့်လျန်နှင့် ဘာကြောင့် တိုက်ခိုက်နေရသနည်း။

“ငါမသိဘူး” ယုရှုန်း ခေါင်းကျုံ့သွားခဲ့ပြီဂ အလျင်အမြန် လက်ဝှေ့ရမ်းပြလိုက်လေသည်။ သို့သော်လည်း သူမနှင့် မျက်လုံးချင် မဆုံမိအောင် သတိထားနေသော ယုရှုန်း၏ အပြုအမူကို ရှန်ချင်းလော့ သတိပြုမိလိုက်လေသည်။

“နင်တကယ် ဘာမှမသိတာလား” ရှန်ချင်းလော့သည် မျက်လုံး မှေးစဉ်းလျက် ယုရှုန်းအား အေးစက်စက် အကြည့်ဖြင့် စိုက်ကြည့်ရင်း မေးလိုက်သည်။

“အင်း၊ ဟုတ်တယ်.. ငါတကယ် မသိတာ…”

“နောက်ဆုံးအကြိမ် ထပ်မေးမယ်။ ဒါဘာတွေ ဖြစ်နေတာလဲ” ရှန်ချင်းလော့က အံကြိတ်၍ အော်မေးလိုက်သည်။

ယုရှုန်းသည် ပါးစပ်ကို တင်းတင်းစေ့ပြီး ဘာတစ်ခွန်းမှ ပြန်မပြောဘဲ ရှန်ချင်းလော့အား ခါးသက်သက် အမူအရာဖြင့်သာ ကြည့်နေလိုက်၏။

“တကယ်ကြီး နင့်လက်ချက်ပေါ့” ရှန်ချင်းလော့ ဒေါသပုန် ထသွားခဲ့၏။ ဒေါသထွက်လွန်းသည့်အတွက် သူမ၏ ရင်မို့မို့သည်ပင် နိမ့်ချည်မြင့်ချည် ဖြစ်လာခဲ့ရလေသည်။ ရွှယ့်လျန်သည် သာမန် မွန်းစတားမျိုးနွယ်စုဝင်တစ်ဦး မဟုတ်ချေ။ ရန်ကိုင်အဖို့ ရွှယ့်လျန်အား နိုင်သည်ဖြစ်စေ၊ ရှုံးသည်ဖြစ်စေ သူ့အတွက် ဘာကောင်းကျိုးမှ မရှိပေ။

ယခုကဲ့သို့ဖြစ်အောင် ယုရှုန်းမှ စီစဉ်းထားခဲ့ကြောင်း သိလိုက်ရသည့်နောက်တွင် ရှန်ချင်းလော့ အလွန်အမင်း ဒေါသထွက်သွားခဲ့ပြီး ဒေါသထွက်လွန်းသဖြင့် ယုရှုန်းအား တစ်စစီဖြစ်အောင် လုပ်ပစ်ချင်စိတ်တို့ သူမရင်ထဲ တဖွားဖွား ထွက်ပေါ်လာခဲ့လေသည်။

“ငါလည်း ဘာမှမှ မတတ်နိုင်တာ…” ယုရှုန်းက ကိုးယိုးကားယား အမူအရာဖြင့် ခေါင်းကိုကုတ်၍ “ရွှယ့်လျန်က လွန်ခဲ့တဲ့ သုံးရက်တုန်းက နန်းတော်ကို ရောက်လာခဲ့တယ်။ ငါက သူနဲ့ မီထျန်းကို ဆေးဝိဇ္ဇာရှ ဘယ်လောက်တော်ကြောင်း ပြောပြ၊ သူကလည်း ဆေးလုံးကို ဖော်စပ်ချင်နေတာနဲ့ သွားကွက်တိတိုး…”

ရှန်ချင်းလော့သည် ဘာမှပြန်မပြောဘဲ အံကြိတ်၍သာ ယုရှုန်းကို မမှိတ်မသုံ စိုက်ကြည့်နေခဲ့သည်။

“အစ်ကိုကြီးရဲ့ အပြစ်မဟုတ်ဘူးလေ။ အစ်ကိုကြီးက မီထျန်းကို လှုပ်ရှားစေချင်တာ။ ဒါပေမယ့် အဲ့မုန်းစရာကောင်းတဲ့ကောင်က အရမ်း ဥာဏ်များလွန်းတယ်။ ဘယ်လိုလုပ်လိုက်လဲ မသိဘူး၊ သူမတိုက်ခိုက်ဘဲ ရွှယ့်လျန်ကို သွားတိုက်ခိုက်ခိုင်းတယ်။ တကယ်တမ်း ပြောရမယ်ဆိုရင် ဒါတွေအားလုံးက ညီမလေးရဲ့ အပြစ်ပဲ”

“ငါ့အပြစ်” ရှန်ချင်းလော့က ဒေါသတကြီး အော်ပြောလိုက်၏။

ပင်အပ်ပေါ် ဖင်ခုထိုင်နေသလို ယုရှုန်း ခံစားလိုက်ရသည်။ ချက်ချင်းပဲ ပြန်ပြောလိုက်သည် “အစ်ကိုကြီးကို ကိုယ်တိုင် မလှုပ်ရှားဖို့ နင်ပဲ ပြောတလေ။ ဒါပေမယ့် ဒီကောင်လေးကို စမ်းသပ်ရမယ်ဆိုပြီး မွေးစားအမေက အမိန့်ပေးထားသေးတယ်။ အစ်ကိုကြီး ကိုယ်တိုင်လည်း မလုပ်ရတော့ ဒီလို အကြံ ထွက်လာဖို့ကို သုံးရက်သုံးညလောက် ထိုစဉ်းစားလိုက်ရတာ။ ညီမလေးသာ အစ်ကိုကြီးကို လှုပ်ရှားခိုင်းလိက် အစ်ကိုကြီး သူ့ကို ထိခိုက်အောင် လုပ်မှာမဟုတ်ဘူး”

“ဒီတော့ ငါ့အပြစ်ပေါ့” ရှန်ချင်းလော့က အပြုံးမဟုတ်သော အပြုံးပြုံးလျက် ပြန်မေးလိုက်သည်။

“မဟုတ်ဘူး။ မဟုတ်ဘူး။ ညီမလေးအပြစ် မဟုတ်ဘူး။ အစ်ကိုကြီး အပြစ်” ယုရှုန်းက ချက်ချင်း သူ့အပြစ်ကို ဝန်ခံလိုက်သည်။ သူသာ ဆက်ငြင်းနေလျှင် အဆုံးသတ် ကောင်းမည်မဟုတ်မှန်း သိနေသည်။ ထို့ကြောင့် သူကိုယ်တိုင်သာ အနစ်နာခံရန် ဆုံးဖြတ်လိုက်လေသည်။

“သူတစ်ခုခု ဖြစ်သွားရဲဖြစ်သွားကြည့်၊ အစ်ကိုကြီး သေပြီသာမှတ်” ရှန်ချင်းလော့က အံကြိတ်၍ အော်ပြောလိုက်သည်။

“စိုးရိမ်နေစရာ မလိုဘူး သခင်မလေးချင်းလော့” ထိုစဉ် အသံတစ်သံ သူတို့ဘေးဘက်ဆီမှ ရုတ်တရက် ထွက်ပေါ်လာ၏။

ရှန်ချင်းလော့နှင့် ယုရှုန်းတို့ နှစ်ဦးစလုံး အသံကြားရာဆီသို့ လှည့်ကြည့်လိုက်ရာ မည်သည့် အချိန်ကတည်းကမှန်းမသိ သူတို့ ဘေးနားသို့‌ ရောက်နေသော ဘဟဲကို တွေ့လိုက်ရလေသည်။

တန်ခိုးရှင်အဆင့်အောက် အားအကောင်းဆုံး ပညာရှင် ဆိုသည့်အတိုင်းပင်၊ သူ့ကျင့်ကြံခြင်းသည် နှစ်နှစ်ရာ ကြာသွားသည့်တိုင် တိုးတက်လာခြင်း မရှိသော်လည်း သူ့ခွန်အားမှာ ပို၍ ကြောက်မက်ဖွယ် ကောင်းလာခဲ့သည်။

ယုရှုန်းနှင့် ရှန်ချင်းလော့တို့ နှစ်ဦးစလုံး အံ့ဩလျက်သား အမူအရာဖြင့် အလျင်စလို ဦးညွှတ်လိုက်ကြလေသည်။

“စီနီယာ… ပြောချင်တာက ရန်ကိုင် အခြေအနေ ကောင်းတယ်ပေါ့” ရှန်ချင်းလော့သည် ဘဟဲအား စိတ်လှုပ်ရှားနေသည့် အမူအရာဖြင့် စိုက်ကြည့်ရင်း မေးလိုက်သည်။

သူမသည်လည်း တန်ခိုးရှင် တတိယအဆင့်သို့ ရောက်ထားသော်ငြား အတွေ့အကြုံပိုင်းအရ၊ ဘဟဲကို သူမ မယှဉ်နိုင်ချေ။ ဘဟဲ တန်ခိုးရှင်တတိယအဆင့်သို့ ရောက်နေသည်မှာ နှစ်ပေါင်း နှစ်ရာကျော်နေခဲ့လေပြီ။

ဘဟဲက ရယ်သွမ်းသွေးလျက် ခေါင်းခါ၍ “အဲ့လိုမျိုး ပြောတာ မဟုတ်ဘူး… ဒါပေမယ့် သူကလည်း ရင်ဆိုင်ရလွယ်ကူတဲ့ လူတစ်ယောက် မဟုတ်ဘူး။ ရွှယ့်လျန် သူ့ကို အနိုင်ယဓနိုင်မှာ မဟုတ်ဘူး။ အခု လက်ရှိပုံစံအတိုင်းပဲ တိုက်ခိုက်မယ် ဆိုရင်ပေါ့”

ပြောပြီးသည့်နောက် ဘဟဲက သက်ပြင်းတစ်ချက်ချလျက် “တကယ်ကို မယုံကြည်နိုင်စရာပဲ။ အခုခေတ် လူငယ်တွေ တကယ်ကို အံ့အားသင့်စရာ ကောင်းတာပဲ။ ဒီကောင်လေးက အခုမှ တန်ခိုးရှင်ဒုတိယအဆင်ပဲ ရှိသေးတယ်။ ဒါတောင် ရွှယ့်လျန်ကို လက်ရည်တူ တိုက်ခိုက်နိုင်နေပြီ။ သူသာ တန်ခိုးရှင် တတိယအဆင့်ကို ရောက်သွားရင် ရွှယ့်လျန် ဘယ်လိုမှ သူ့ပြိုင်ဘက် ဖြစ်နိုင်တော့မှာ မဟုတ်ဘူး”

ရှန်ချင်းလော့ ချက်ချင်း ဂုဏ်ယူမိသွားခဲ့လေသည်။

ဤလူသည် သူမ ရွေးချယ်ထားသည့် လူတစ်ယောက် ဖြစ်သည်။

ဗဟိုမြို့တော်တွင် ရှိစဉ်က ကျင့်ကြံခြင်း အဆင့်နိမ့်သည့်တိုင် ထိုမြို့တော်တစ်ခုလုံးကို မုန်တိုင်းထန်အောင် လုပ်နိုင်ခဲ့သည်။ လူအများ မထင်မှတ်ထားသည့် အရာများကိုလည်း ပဥ္စလက်ဆန်ဆန် လုပ်ပြသွားခဲ့သေးသည်။ ယခု နှစ်ပေါင်းများစွာ ကြာသွားပြီးသည့်နောက်တွင် သူမ ရွေးချယ်ထားသည့်လူသည် ပို၍ အံ့ဩစရာ ကောင်းလာခဲ့သည်။

ရွှယ့်လျန်သည် သာမန် မွန်းစတားမျိုးနွယ်စု တစ်ယောက် မဟုတ်ချေ။ အားကောင်းသော တန်ခိုးရှင်တတိယအဆင့် ပညာရှင် တစ်ဦး ဖြစ်သည်။

ရန်ကိုင် မလုပ်နိုင်သည့်အရာ ဘာမှမရှိသည့်အလား ရှန်ချင်းလော့၏ မျက်ဝန်းအစုံ တဖျက်ဖျက် တောက်ပလာခဲ့သည်။

“လက်ရှိပုံစံနဲ့ ရွှယ့်လျန် သူ့ကို မနိုင်နိုင်ဘူးလို စီနီယာ ပြောလိုက်တာလား” ယုရှုန်းကမူ အစောပိုင်းက ဘဟဲ ပြောသွားသည့် စကားကို ပို၍ အာရုံစိုက်မိနေသည်။

“ဟုတ်တယ်။ ရွှယ့်လျန်က ခွန်အားကုန် မသုံးရသေးဘူး။ အခုထိ သူ့ရေနဂါးသွေးမျိုးဆက်ကို အသက်မသွင်းရသေးတာကို ကြည့်လေ” ဘဟဲက ပြုံးလျက် ရှင်းပြလိုက်သည်။

ထိုစကားကို ကြားသည့်အခါ ရှန်ချင်းလော့၏ ပြုံးနေသော မျက်နှာလေး ရှုံ့မဲ့သွားခဲ့လေသည်။

ယုရှုန်းသည် ရှန်ချင်းလော့အား သတိထားကြည့်လျက် မေးလိုက်၏ “အဲ့လိုဆို ရွှယ့်လျန် အားကုန်ထုတ်သုံးမယ်ဆိုရင် ကျုပ်ယောက်ဖ ရှုံးမယ်ပေါ့၊ ဟုတ်လား”

“အဲ့ဒါတော့ ငါမသိဘူး” ဘဟဲက ယဲ့ယဲ့လေးပြုံးလျက် “အဲ့ကောင်လေးအကြောင်း ငါသေချာမသိဘူး။ သူ့ခွန်အားက ဒီလောက်ပဲဆိုရင် ရွှယ့်လျန်ကို သူနိုင်မှာမဟုတ်ဘူး။ ဒါပေမယ့် သူ့မှာ ဝှက်ဖဲတွေ ရှိနေသေးတယ် ဆိုရင်တောင့် နောက်ဆုံး တိုက်ပွဲရလဒ်က တစ်မျိုးတစ်ဖုံ ပြောင်သွားနိုင်တယ်။ ငါ့အထင်အရ ပြောရမယ်ဆိုရင်တော့ ကာယခွန်အားသက်သက် တိုက်ပွဲဆိုရင် ရွှယ့်လျန်ကို သူမနိုင်လောက်ဘူး”

“အဲ့ဒါတော့ ဂျူနီယာလည်း သဘောတူတယ်” ယုရှုန်းက ခေါင်းညိတ်ထောက်ခံလိုက်သည်။

သို့သော်လည်း အဆင့်သေးတစ်ဆင့် နိမ့်နေသည့် လူသား တစ်ယောက် ဖြစ်လျက်နှင့် ရွှယ့်လျန်နှင့် ဤကဲ့သို့ ယှဉ်ပြိုင်နိုင်သည်နှင့်ပင် ဂုဏ်ယူစရာကောင်းနေလေပြီ။

ဤမျှလောက်ဆိုလျှင် သူတို့၏ မွေးစားအမေ ပေးခဲ့တာ တာဝန်ကို ကျေသွားပြီဟု ပြော၍ရသည်။ ဤခွန်အားလောက်ဆိုလျှင် ချီယွဲ့လည်း ရန်ကိုင်ကို လက်မခံစရာအကြောင်း မရှိလောက်ပေ။ သို့သော်လည်း ထိုကောင်လေးတွင် အခြားမိန်းမတစ်ယောက် ရှိနေသေးသည်။ ထိုကဲ့သို့သော ကိစ္စမျိုးကို မွေးစားအမေ မည်ကဲ့သို့ လက်ခံနိုင်မည်နည်း။

“ညီမလေး၊ စိတ်ချထားလိုက်။ အန္တရာယ်များလာပြီဆိုရင် အစ်ကိုကြီး ဝင်တားလိုက်မယ်” ယုရှုန်းက ပြောလိုက်သည်။

သို့သော်လည်း ရှန်ချင်းလော့သည့် သူ့အား စူးရဲစွာသာ ပြန်၍ စိုက်ကြည့်လာသဖြင့် ယုရှုန်း ခြောက်ကပ်ကပ်သာ ရယ်မောလိုက်လေ၏။

“ဟန်၊ ရွှေရောင်သွေးပါလား” ဘဟဲက ရုတ်တရက် အလန့်တကြား အော်ပြောရင်း ရန်ကိုင်အား မယုံကြည်နိုင်စွာ စိုက်ကြည့်လိုက်၏။

ရန်ကိုင်၏ ဒဏ်ရာမှ စီးထွက်နေသော သွေးများသည် အနီရောင် ဖြစ်မနေဘဲ ရွှေရောင်ဖြစ်နေသည်ကို အံ့အားသင့်ဖွယ် တွေ့ရှိလိုက်ရသည်။

ထိုသွေးအရောင်သည် လူသားတစ်ယောက်၏ သွေးအရောင်မျိုး မဟုတ်ချေ။ ဆိုလိုသည်ကား ထိုရွှေရောင်သွေးမျိုးဆက်ဖြစ်သည့် ထူးခြားသော သွေးမျိုးဆက်ကြောင့် ရွှယ့်လျန်နှင့် ကာယ ခွန်အားချင်း ယှဉ်ပြိုင်နိုင်နေခြင်းများလား။

ဒါပေမယ့်… မည်သို့သော သွေးမျိုးဆက်ကများ ရွှေရောင်သွေးကို ထုတ်ပေးနိုင်လေသနည်း။

ထိုရွှေရောင်တောက်နေသည့် သွေးများသည် အလွန်ကိုမှ သိပ်သည်းလှသော အသက်ဓါတ်များကို ဘဟဲ ခံစားနေမိ၏။ ထိုရွှေရောင်သွေးစက်များ၏ ကုစားမှုအောက်တွင် ရန်ကိုင်၏ ဒဏ်ရာဒဏ်ချက်များသည် အလျင်အမြန် ပြန်လည် ပျောက်ကွယ်သွားခဲ့လေသည်။

ထိုမြင်ကွင်းကို ကြည့်ရင်း ဘဟဲ မှင်သက်နေခဲ့သည်။

ရန်ကိုင် တစ်ကိုယ်လုံး ရွှေရောင်တောက်နေချိန် ရွှယ့်လျန် တစ်ကိုယ်လုံးမှာတော့ အနီရောင် တောက်နေခဲ့လေသည်။

ဘုန်း… ဘုန်း… ဘုန်း…

ပြင်းထန်သော တိုက်ပွဲသည် ဆက်လက် ဖြစ်ပွားနေခဲ့သည်။ ရုတ်တရက် နောက်ဆုံးတစ်ကြိမ် တိုက်ခိုက်လိုက်ပြီးနောက် နှစ်ယောက်စလုံး နောက်သို့ အသီးသီး ပြန်ဆုတ်လိုက်ကြသည်။

သို့သော်ငြား နှစ်ဦးစလုံးသည် သူတို့၏ ဒဏ်ရာများကို လုံးဝ ဂရုစိုက်ခြင်းမရှိဘဲ တစ်ယောက်ကို တစ်ယောက်သာ အေးစက်စက် အကြည့်ဖြင့် ပြန်စိုက်ကြည့်နေခဲ့သည်။

“လူသား၊ မင်းတကယ် ထူးခြားတာပဲ။ ငါပြောခဲ့တဲ့စကားကို ပြန်ရုတ်သိမ်းတယ်။ မင်းတကယ် ပြိုင်ဘက်ကောင်း တစ်ယောက်ပဲ” ရွှယ့်လျန်က အသက်ပြင်းပြင်း ရှူသွင်းလျက် အသံအက်အက်ဖြင့် အော်ပြောလိုက်သည်။

“သေချာတာပေါ့” ရန်ကိုင်က သွားပေါ်အောင် ပြုံးဖြီးလျက် “ဒါပေမယ့် မင်းကတော့ ဘာမှလည်း သိပ်မဟုတ်ပါလား”

ရွှယ့်လျန်က ရယ်မောလျက် “မင်းတကယ် မောက်မာတာပဲ။ ငါမင်းကို ပြောမနေတော့ဘူး။ မင်းလို့ လူသားတစ်ယောက်ကို မတွေ့ရတာတောင် အတော်လေး ကြာသွားပြီ။ နောက်ဆုံး ငါ့ကို အဲ့လို ပြောခဲ့တဲ့ လူတစ်ယောက်ကို သူ့ခြေလက် နှစ်ဖက်စလုံး ငါဆွဲဖြုတ်ပစ်လိုက်တာ။ မင်းထပ်ပြီး တောင့်ခံနိုင်ဦးမယ်လို့ ငါမျှော်လင့်တယ်။ ဒါမှ ငါကြာကြာ ပျော်လို့ရမှာ

ပြောပြီးသွားသည်နှင့် တစ်ပြိုင်နက် ရွှယ့်လျန်၏ အသားပေါ်မှ အနီရောင်သွေးစက်များ တစ်စက်ပြီးတစ်စက် ထွက်ပေါ်လာ၏။ ပေါ်လာပြီးသည်နှင့် ချက်ချင်းဆိုသလို ထိုသွေးစက်များအားလုံး ပေါက်ကွဲထွက်သွားပြီး ရွှယ့်လျန် တစ်ကိုယ်လုံးကို ဖုံးအုပ်သွားခဲ့လေသည်။

အစကတည်းက အတော်လေး ပြင်းထန်နေပြီဖြစ်သည့် ရွှယ်လျန်၏ အရှိန်အဝါသည် ယခုအခါ ပို၍ ပြင်းထန်လာခဲ့လေသည်။

ရုတ်တရက်ဆိုသလို ရွှယ့်လျန်သည် သွေးလူသား တစ်ဦးအဖြစ်သို့ ပြောင်းလဲသွားသလားပင် ထင်မှတ်ရသည်။ သူ့တစ်ကိုယ်လုံး သွေးနီရောင်တောက်နေပြီး သူ့ပုံစံမှာလည်း အတော်လေးကိုမှ ကြောက်မက်ဖွယ်ကောင်းနေခဲ့သည်။

ထို့နောက်တွင် သူ့တစ်ကိုယ်လုံးအား လွှမ်းခြုံထားသော သွေးမြူများသည် အကြေးခွံများအဖြစ်သို့ ပြောင်းလဲသွားကုန်လေ၏။

တစ်ချိန်တည်းတွင် ရွှယ့်လျန်၏ နဖူးထက်မှ ကြက်သွေးရောင် ဦးချိုနှစ်ချောင်း ထွက်ပေါ်လာခဲ့သည်။

“သွေးနဂါးအသွင်ပြောင်းလဲခြင်း” ထိုအခြင်းအရာကို ကြည့်ရင်း ဘဟဲက အသံတိုးတိုးဖြင့် ရေရွတ်လိုက်သည်။

ရှန်ချင်းလော့ မျက်နှာပျက်သွားခဲ့သလို့ ယုရှုန်း၏ အမူအရာလည်း လေးနက်သွားခဲ့သည်။

ရွှယ့်လျန်သည် သွေးနဂါးမျိုးနွယ်စုခေါင်းဆောင်၏ သားဖြစ်ပြီး သွေးနဂါးမျိုးဆက်သွေးကို ပိုင်ဆိုင်ထားသည်။ ထိုသွေးမျိုးဆက်သည် မွန်းစတားဧကရာဇ်ကြယ် တစ်ခုလုံးတွင် အားအကောင်းဆုံး သွေးမျိုးဆက်များထဲ တစ်ခုအပါအဝင် ဖြစ်၏။

သွေးနဂါးအသွင်ပြောင်းလဲခြင်းကို အသုံးပြုလိုက်သည့်နောက်တွင် ရွှယ့်လျန်၏ ခွန်အားသည် ယခင်ထက် သုံးဆယ်ရာခိုင်နှုန်းခန့် ပိုမို မြင့်တက်လာခဲ့သည်။

ဤကဲ့သို့သော လျှို့ဝှက်နည်းစနစ်မျိုးကို အားကောင်းသော မွန်းစတားမျိုးနွယ်စုဝင် ပညာရှင်တိုင်းလိုလို ပိုင်ဆိုင်ထားကြ၏။ သို့သော်ငြား သူတို့ ခွန်အားကို မြင့်တင်နိုင်သော ပမာဏသည် သူတို့၏ မျိုးဆက်သွေးပေါ်တွင် မူတည်နေပေသည်။

လက်ရှိရွှယ့်လျန်သည် ယခင်ရွှယ့်လျန်နှင့် မတူတော့ချေ။ လက်ရှိ ရွှယ့်လျန်သည် ပို၍ ကြမ်းကြုတ်လာသလို ပို၍လည်း အားကောင်းလာ၏။ သူ့တစ်ကိုယ်လုံးရှိ သွေးများအားလုံး ဆူပွက်လောင်ကျွမ်းနေသည့်အလား၊ ရွှယ့်လျန် တစ်ကိုယ်လုံး အနီရောင်တောက်နေခဲ့သည်။

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၈၃)

“ဒီကောင်လေး သွေးနဂါးအသွင်ပြောင်းလဲခြင်း ပညာရပ်ကို ပြီးပြည့်စုံခြင်း အဆင့်ထိတောင် ကျင့်ပြီသွားပြီပဲ” နားနေဆောင်မှ နေ၍ ရန်ကိုင်နှင့် ရွှယ့်လျန်တို့ကြား တိုက်ပွဲအား စောင့်ကြည့်နေသော ချီယွဲ့က သူမကိုယ်သူမ ရေရွတ်လိုက်၏။

မျိုးနွယ်စုခေါင်းဆောင်တစ်ယောက် ဖြစ်သည့်အတွက် လူငယ် နှစ်ယောက်ကြားမှ တိုက်ပွဲကို အပြေးသွားကြည့်မနေသင့်ပေ။ ထိုကဲ့သို့ အပြုအမူမျိုးသည် သူမ၏ အဆင့်အတန်းနှင့် သိပ်ပြီး မသင့်တော်လှ။ သို့သော် ကောင်းကင်စိတ်အာရုံဖြင့် လှမ်း၍ ကြည့်ခြင်းကမူ ကိစ္စမရှိပါချေ။

ရိုးရိုးသားသားပြောရလျှင် ရွှယ့်လျန်နှင့် ရန်ကိုင်ကြား တိုက်ပွဲသည် သူမအတွက်ပင် အတော်လေး ကြည့်ကောင်းသည်ဟု ပြော၍ရ၏။

ရွှယ်လျန်သည် သွေးနဂါးမျိုးနွယ်စုခေါင်းဆောင်၏ သားဖြစ်သည့် အပြင်ကိုမှ တန်ခိုးရှင်တတိယအဆင့်သို့လည်း ရောက်ထားသော်ငြား ရန်ကိုင်ကို အနိုင်မယူနိုင်ခဲ့ချေ။

ရန်ကိုင် ရင်ဆိုင်နေရသည့်လူသာ သာမန် တန်ခိုးရှင်တစ်ယောက် ဖြစ်နေခဲ့လျှင် သူ့အတွက် ကိစ္စမရှိသော်လည်း သူရင်ဆိုင်ရသည့် လူမှာ ရွှယ့်လျန် ဖြစ်နေခဲ့သည်။

လူသားတစ်ယောက် ဖြစ်လျက်နှင့် ရန်ကိုင်သည် ရွှယ့်လျန်ကို နဂါးအသွင်ပြောင်းလဲခြင်း ပညာရပ်အား အသုံးပြုလာသည်အထိ တွန်းအားပေးနိုင်လိမ့်မည်ဟု ချီယွဲ့ မထင်ထားခဲ့ချေ။

မွန်းစတားမျိုးနွယ်စုဝင် ပညာရှင်များထဲတွင်ပင် အနည်းငယ်သာ ရွှယ့်လျန်အား နဂါးအသွင်ပြောင်းလဲခြင်း ပညာရပ်ကို အသုံးပြုအောင် ဖိအားပေးနိုင်သည်။

သို့သော်လည်း ရန်ကိုင်သာ လူသားတစ်ယောက် အနေဖြင့် ရွှယ့်လျန်နှင့် ကာယစွမ်းအားချင်း ယှဉ်ပြိုင်ပြီး တိုက်ပြသွားခဲ့၏။

မွန်းစတားဧကရာဇ်ကြယ် သမိုင်း၌ ဤကဲ့သို့သောလူမျိုး တစ်ခါမှ ပေါ်မလာခဲ့ဖူးချေ။ မွန်းစတားဧကရာဇ်ကြယ်တွင် နေကြသည့် လူသားမျိုးနွယ်စုဝင်များသည် မွန်းစတားမျိုးနွယ်စုဝင်များ၏ အမြဲတစေ ဖိနှိပ်ခြင်း ခံခဲ့ရသည်။ ထို့ကြောင့် သွေးနဂါးမျိုးနွယ်စု ခေါင်းဆောင်၏ အချစ်တော်သားကို ယှဉ်တိုက်ရန် မဆိုထားနှင့် တန်ခိုးရှင်အဆင့်သို့ ရောက်သည့် လူသားပင် မွန်းစတားဧကရာဇ် ကြယ်၌ ခပ်ရှားရှား ဖြစ်နေရခြင်းပင်။

သူမ ရန်ကိုင်၏ ခွန်အားကို တကယ် မမြင်နိုင်ခဲ့သည်ကိုလည်း ယခုမှသာ နားလည်သွားတော့လေသည်။

ကျန်တော့သည်ကား… သူသည် ကာယခွန်အားအပြင် အခြား မည်သည့်နေရာတွင်များ ထူးချွန်နေသေးသလဲ ဆိုသည်ကိုပင်။ သူ့ယေဘုယျခွန်အားသည် တကယ်ကို အထင်ကြီးစရာ ကောင်းနေပြီဆိုပါက သူနှင့် ရှန်ချင်းလော့ကြား ဆက်ဆံရေးကို ချီယွဲ့ ကန်ကွက်တော့မည် မဟုတ်ချေ။

အကြောင်းမှာ ရှန်ချင်းလော့သည် သူ့အား ကြိုက်နှစ်သက်သလို သူ့တွင်လည်း ရှန်ချင်းလော့အား ကာကွယ်ပေးနိုင်သည့် အရည်အချင်း ရှိသည်။ ထို့အပြင် ရန်ကိုင်ကို လက်ခံလိုက်ခြင်းသည် သူမအတွက် အားကောင်းသော အကူအညီ တစ်ယောက်ကို ရလိုက်သည်နှင့် တူပေသည်။ တစ်ချက်ခုတ် နှစ်ချက်ပြတ်ပင်။

ဘဟဲကိစ္စနောက်ပိုင်း ထိုကဲ့သို့ လူနှစ်ဦးကြား ချစ်ကြိုက်မှုကို ချီယွဲ့ အတင်းအကြပ် မတားဆီးရဲတော့ချေ။ ရှန်ချင်းလော့အား တွန်းအားပေးခဲ့လျှင် ဘဟဲကဲ့သို့ အဖြစ်အပျက်မျိုး တစ်ပတ် ပြန်လည်မည်ကို ချီယွဲ့ စိုးရိမ်နေမိသည်။

“ဒီဘုရင်မကို စိတ်မပျက်စေနဲ့ ကောင်လေး”

ထိုကဲ့သို့ တွေးရင်း ချီယွဲ့သည့် တိုက်ပွဲ အခြေအနေကို ကောင်းကင်စိတ်အာရုံဖြင့် ဆက်လက် စောင့်ကြည့်နေခဲ့လေသည်။

ရန်ကိုင်သည် မျက်မှောင်ကြုတ်၍ ရွှယ့်လျန်အား အထူးအဆန်း အမူအရာဖြင့် စိုက်ကြည့်နေခဲ့သည်။

ရွှယ့်လျန်၏ အရှိန်အဝါမှာ ကြောက်မက်ဖွယ်ကောင်းလာသလောက် သူ့အမူအရာမှာ ပို၍ ကြောက်စရာကောင်းနေခဲ့သည်။ တစ်ကိုယ်လုံး သွေးရောင် အကြေးခွံများဖြင့် ဖုံးအုပ်ထားပြီး အနီရောင်တောက်နေသော သူ့ခန္ဓာကိုယ်မှာ တကယ်ကို ကြည့်ရဆိုးလှ၏။ ယုံကြည်ချက် ပြန်ရလာသည့်နောက်တွင် ရွှယ့်လျန်သည် ရန်ကိုင်အား ထူးမခြားနားဟန်ဖြင့် စိုက်ကြည့်၍ ရယ်မောရင်း အထက်စီး လေသံဖြင့် “လူသား၊ မင်းကြောက်နေပြီလား။ ကြောက်နေရင်၊ ဒူးထောက်တောင်းပန်ဖို့ နောက်မကျသေးဘူးနော်”

“မင်းတကယ် လေးကြီးလေကျယ် ပြောတဲ့ကောင်ပဲ” ရန်ကိုင်က လှောင်ပြုံးပြုံးလျက် ရွှယ့်လျန်အား ထူးထူးဆန်းဆန်း အမူအရာဖြင့် စိုက်ကြည့်ရင်း ပြန်ပြောလိုက်သည်။

ရွှယ့်လျန် သွေးနဂါးအသွင်ပြောင်းလဲခြင်းကို သုံးလိုက်သည်နှင့် တစ်ပြိုင်နက် သူ့ကိုယ်ထဲမှ စွမ်းအားတစ်မျိုးသည် ရုန်းကြွသောင်းကျန်းလာပြီး အပြင်သို့ အတင်းပြေးထွက်ရန် ကြိုးစားနေသည်ကို ရန်ကိုင် ခံစားမိလိုက်သည်။

ထို့အတွက်ကြောင့် ရန်ကိုင် အတော်လေး အံ့အားသင့်မိသွား၏။

သူ့ကိုယ်ထဲတွင် ဂနာမငြိမ်ဖြစ်နေသည့်အရာ မည်သည့်အရာမှန်း သိရှိသွားသည့် နောက်မှသာ ရန်ကိုင် စိတ်အေးသွားခဲ့ရလေသည်။

သို့သော်လည်း ထိုစွမ်းအားကို ပေါက်ကွဲထွက်ခွင့် မပေးဘဲ ပြန်ဖိနှိပ်ထားလိုက်ကာ ငါးရောင်ခြယ်အလင်းတန်းကိုသာ ထုတ်လွှတ်လိုက်လေသည်။

ရန်ကိုင်ဆီမှ ထွက်ပေါ်နေသော အရှိန်အဝါသည် ရုတ်တရက် တစ်ဟုန်ထိုး မြင့်တက်သွားခဲ့သည်။

“ဘာကြီးလဲ” ဘဟဲသည် အထိတ်တလန့်ဖြင့် ရန်ကိုင်ဘက်သို့ လှည့်ကြည့်လိုက်သည်။

“ငါ့လခွမ်း၊ ဒီကောင် အခုထိ အားကုန် မသုံးသေးတာလားဟ” ယုရှုန်းလည်း ထိုမြင်ကွင်းကိုကြည့်ရင်း မျက်လုံးပြူးနေခဲ့သည်။

ထိုမြင်ကွင်းကို အဝေးမှ စောင့်ကြည့်နေသော မီထျန်းသည်လည်း မျက်လုံးပြူးနေခဲ့သည်။ ရွှယ့်လျန် သွေးနဂါးအသွင်ပြောင်းလဲခြင်း ပညာရပ်ကို ထုတ်သုံးလိုက်သည်နှင့် ပွဲပြတ်သွားလိမ့်မည်ဟု ထင်ထားခဲ့သော်ငြား ရန်ကိုင်တွင်လည်း ဝှက်ဖဲရှိနေဦးမည်ဟု မထင်ထားခဲ့ချေ။

လူသားမျိုးနွယ်စုရဲ့ ပညာရပ်တွေက တကယ်ကို ဆန်းကြယ်တာပဲ မီထျန်း စိတ်ထဲကြိတ်၍ တွေးလိုက်သည်။ တစ်ချိန်တည်းတွင် စိတ်လည်း လှုပ်ရှားလာမိပြီး ရန်ကိုင် ထုတ်သုံးနေသည့် ပညာရပ်ကို မျက်တောင်မခတ်တမ်း စိုက်ကြည့်နေတော့လေ၏။

အဝါရောင်၊ အပြာရောင်၊ အဖြူရောင်၊ အနီရောင်နှင့် ရွှေရောင် အလင်းတန်းတို့သည် ရန်ကိုင်၏ အနီးတစ်ဝိုက်တွင် စုဝေးလာခဲ့ကြသည်။ ထိုအရှိန်အဝါငါးမျိုးသည် တစ်ခုနှင့်တစ်ခု လုံးဝ မတူညီကြသော်လည်း အချင်းချင်း ပဋိပက္ခဖြစ်ခြင်းမရှိဘဲ ပြီးပြည့်စုံစွာ ပေါင်းစပ်တည်ရှိနေကြလေသည်။

ဒြပ်ကြီးငါးပါးအကြွင်းမဲ့ဓါးချီပင်…

ရန်ကိုင်၏ ခန္ဓာကိုယ်သည် သာမန် ကျင့်ကြံသူများ၏ ခန္ဓာကိုယ်ထက် အားကောင်းနေရခြင်းမှာ သိုင်းပညာလမ်းစဉ်သို့ စတင် ခြေချစဉ်ကတည်းက ခန္ဓာသန့်စင်ခြင်း ပညာရပ်ကို လေ့ကျင့်ခဲ့သည့် အတွက်ကြောင့်ဖြစ်သလို အသက်ရေစင်ကို သုံး၍ သူ့ကိုယ်တွင်ရှိ သွေးအများစုကို ရွှေရောင်သွေးများများ အစားထိုးခဲ့သည့် အတွက်ကြောင့်လည်း ဖြစ်ပေသည်။

ထိုမျှသာမကသေး၊ ဒြပ်ကြီးငါးပါး အကြွင်းမဲ့ဓါးခန္ဓာ ကျင့်စဉ်ကိုပါ ထပ်မံ လေ့ကျင့်လိုက်သည့်အတွက် သူ့ခန္ဓာကိုယ်သည် ယခင်ထက် အဆများစွာ ပိုမို အားကောင်းလာခဲ့ရလေသည်။

ရောင်စဉ်ငါးဖြာဖြင့် လွှမ်းခြုံနေသော ရန်ကိုင်ကို မြင်မြင်ခြင်း ရွှယ့်လျန် တစ်ချက် ကြောင်သွားခဲ့သော်လည်း မကြာမီ ပြုံးဖြဲ၍ “အံ့ဩစရာပဲ။ မင်းမှာလည်း ဝှက်ဖဲရှိသေးတာကိုး။ ဘယ်သူ့ဝှက်ဖဲ ပိုအားကောင်းလဲ ကြည့်ရသေးတာပေါ့”

ပြောပြီးသည်နှင့် သူ့ခန္ဓာကိုယ်သည် သွေးနီရောင် အလင်းတန်း အဖြစ်သို့ ရိပ်ခနဲ ပြောင်းလဲသွားပြီး ရန်ကိုင်ဆီသို့ တိုးဝင်သွားလေ၏။

အနီရောင်အလင်းတန်းသည် သွေးတိမ်တိုက်တစ်ခုနှယ် ရန်ကိုင်ပေါ်သို့ သက်ဆင်းလာပြီး ရန်ကိုင်အား ဝါးမြိုရန် ကြိုးစားနေသည့် ပါးစပ်ပေါက်ကြီးတစ်ခုနှယ် သူ့တစ်ကိုယ်လုံးကို လွှမ်းခြုံသွားခဲ့လေသည်။ ပြင်းထန်လှသော သွေးနှံ့နှင့် ရက်စက်ကြမ်းကြုတ်သည့် အရှိန်အဝါတို့ကြောင့် ရန်ကိုင်၏ မျက်လုံးများ နီရဲလာခဲ့ပြီး သူ့စိတ် မတည်မငြိမ် ဖြစ်လာရသည်။

ရန်ကိုင်သည် အသက်ပြင်းပြင်းတစ်ချက် ရှူသွင်းလိုက်ပြီး ငါးရောင်ခြယ် အလင်းတန်းကို သံကြပ်ကာအင်္ကျီတစ်ခုအဖြစ် အသွင်ပြောင်းလဲ၍ သူ့ကိုယ်သူ ကာကွယ်လိုက်သည်။ ထို့နောက် ရွှေရောင်အလင်းတန်းကို သူ့လက်သီးထိပ်တွင် စုဝေးစေလျက် တိုးဝင်လာနေသော သွေးနီရောင်မြူခိုးထုကြီးဆီ လက်သီးချက်များ တရစပ် ပစ်လွှတ်လိုက်လေတော့သည်။

ဒြပ်ကြီးငါးပါးအနက် သတ္တုဓါတ်သည် အထက်ရှဆုံးနှင့် ထိုးဖောက်အား အကောင်းဆုံး ဖြစ်သည်။

ရွှယ့်လျန်ကိုယ်ပေါ်ရှိ သွေးနီရောင် အကြေးခွံများကို ကြည့်ရသည်မှာ အတော်လေး အားကောင်းပုံ ပေါ်သည့်အတွက် ထိုအကြေးခွံများကို ထိုးဖောက်နိုင်ရန်အတွက် သတ္တုဓါတ်ကို အသုံးပြုရန် ရွေးချယ်လိုက်ခြင်း ဖြစ်သည်။

တိုက်ပွဲအား စောင့်ကြည့်နေသည့် လူများသည် အသက်ပင် မရှူနိုင်တော့ဘဲ ရင်ခုန်စိတ်လှုပ်ရှားစွာဖြင့် နှစ်ဦးသား ထိပ်တိုက် တွေ့မည့် အခိုက်အတန်ကို စောင့်မျှော်ကြည့်ရှုနေကြလေသည်။

ယခင်ကမူ နှစ်ဦးသားတိုက်ခိုက်ရာတွင် သူတင်ကိုယ်တင် အပြန်အလှန် တိုက်ခိုက်နိုင်ခဲ့သော်လည်း ယခုတစ်ကြိမ်၌မူ ရွှယ့်လျန် အောက်စည်းသို့ ရောက်သွားခဲ့သည်။

သွေးနီရောင်အလင်းတန်းတွင်းမှ ရွှယ့်လျန်၏ ကြမ်းကြုတ်စွာ အော်ဟစ်သံများ အဆက်မပြတ် ထွက်ပေါ်လာနေသော်လည်း ရန်ကိုင်ကမူ အသံတစ်ချက်ပင် မထွက်ဘဲ သွေးနီရောင် မြူခိုးထုထဲသို့သာ လက်သီးချက်များ အဆက်မပြတ် ပစ်လွှတ်နေ၏။

သွေးစိမ်းရှင်ရှင် ပန်းထွက်လာပြီး ကျိုးကြေနေသော အကြေးခွံများ လွင့်ပျံထွက်လာခဲ့သည်။ ထိုမြင်ကွင်းကို မြင်ပြီးနောက် ဘဟဲ မျက်လုံးမှေးစဉ်းသွားခဲ့လေသည်။

ယခုမှပဲ ရန်ကိုင်၏ ခန္ဓာကိုယ် မည်မျှ ကြောက်မက်ဖွယ် ကောင်းကြောင်းကို ဘဟဲ နားလည်သွားရတော့သည်။ ရန်ကိုင်၏ ခန္ဓာကိုယ်ခွန်အားသည် သွေးနဂါးအသွင်ပြောင်းလဲခြင်းကို အသုံးပြုထားသော ရွှယ့်လျန်ကိုပင် ဖိနှိပ်နိုင်နေခဲ့သည်။

ထို့နောက် ဘဟဲသည် သူသာ ရွှယ့်လျန်ဖြစ်ခဲ့လျှင် ယခုအခြေအနေမှ မည်ကဲ့သို့ ရုန်းထွက်မလဲ စဉ်းစားကြည့်လိုက်၏။

သို့သော် လုံးဝ မစဉ်းစားတတ်ခဲ့ချေ။

တန်ခိုးရှင်ဒုတိယအဆင့်သာ ရှိသေးသော လူငယ်လေး၏ ခွန်အားသည် မည်သည့် တန်ခိုးရှင်တတိယအဆင့်ထက်မဆို နိမ့်ကျခြင်း မရှိချေ။ ထိုလူသားကောင်လေး၏ ခန္ဓာကိုယ်သည် တန်ခိုးရှင်တတိယအဆင့် အများစုထက်ပင် ပို၍ ကြောက်စရာကောင်းသေးသည်။ သူသာ ထိုလူငယ်လေးနှင့် ယှဉ်တိုက်ရမည်ဆိုလျှင်ပင် ရှုံးနိမ့်သွားမည့်လူသည် သူသာ ဖြစ်ပေလိမ့်မည်။

ထိုအကြောင်းကို စဉ်းစားရင်း ဘဟဲနဖူးထက် ချွေးသီးအချို့ ဝေ့သီလာခဲ့လေသည်။ လူသားတစ်ယောက်ဖြစ်၍ တန်ခိုးရှင် ဒုတိယအဆင့်သာ ရှိသေးသည့်တိုင် ဤမျှ အားကောင်းနေရအောင် ထိုလူသား မည်သည့်နေရာမှ ရောက်လာခဲ့လေသနည်း။

ကြယ်စီရင်စုကြီး တစ်ခုလုံးကို ရှာကြည့်လိုက်မည် ဆိုလျှင်ပင် သူ့ကဲ့သို့ ပါရမီရှင်တစ်ယောက်ကို ရှာတွေ့ရန်မှာ အလွန်ကိုမှ ခဲယဉ်းလှသည်။

“ညီမလေး၊ ငါ့ယောက်ဖ ဘယ်ကျင့်ကြံရေးကြယ်က လာတယ်လို့ နင်ပြောခဲ့တာလဲ” ယုရှုန်းက မေးလိုက်သည်။

“အဆင့်နိမ့် ကြယ်တစ်လုံးကလေ” ရှန်ချင်းလော့က ပြုံးလျက် “ငါပြောရင်တောင် နင်သိမှာမဟုတ်ဘူး”

အဆင့်နိမ့်ကြယ်… ယုရှုန် လုံးဝ မစဉ်းစားတတ်တော့အောင် ဖြစ်သွားခဲ့သည်။

အဆင့်နိမ့်ကြယ်မှ လူသားတစ်ယောက်သည် ဤမျှပင် ကြောက်မက်ဖွယ်ကောင်းလေသလော။ ထိုမွန်းစတားကောင်၏ အရည်အချင်းသည် ကြယ်စီရင်စုထဲ သူတို့ကိုယ်သူတို့ ပါရမီရှင်ဟု ခေါ်နေကြသော လူအားလုံးကို ယူကျုံးမရဖြစ်ပြီး ကိုယ့်ကိုယ်ကို သက်သေသွားရလောက်အောင် ကြောက်စရာကောင်းလွန်းနေ၏။

“ဟုတ်တယ်။ အခု မွေးစားအမေကို သွားတင်ပြပေးလို့ ရပြီလား။ ဒီလောက်ဆို မွေးစားအမေ ကျေနပ်လိမ့်မယ်လို့ ငါထင်တယ်” ရှန်ချင်းလော့က ယုရှုန်းအား ပြုံးလျက်ကြည့်ကာ ပြောလိုက်၏။

“ငါပြန်တင်ပြလိုက်မယ်…” ယုရှုန်း ခေါင်းညိတ်လိုက်သည်။ ဤအရည်အချင်းကိုပင် မကျေနပ်နိုင်သေးလျှင်လည်း မွေးစားအမေကို စိတ်တိုင်းကျစေနိုင်မည့် ပါရမီရှင် ဤလောကကြီး၌ ရှိတော့လိမ့်မည် မဟုတ်ချေ။

ရှန်ချင်းလော့သည် စကားဆက်ပြောမနေတော့ဘဲ တိုက်ပွဲကိုသာ ပြန်အာရုံစိုက်လိုက်သည်။ အထက်စီးမှ တိုက်ခိုက်နေသော ရန်ကိုင်၏ အံ့ဩမှင်သက်ဖွယ်ရာ ခွန်အားကိုကြည့်ရင်း သူမရင်ထဲ အလွန်ကိုမှ စိတ်လှုပ်ရှားနေမိသည်။ ရန်ကိုင် နိုင်နေမှန်း သိသွားသည့် နောက်တွင် တိုက်ပွဲအား နည်းနည်းလေးမှ ဆက်၍ စိတ်ပူမနေတော့ဘဲ ပျော်ပျော်ရွှင်ရွှင်ဖြင့် ဆက်ကြည့်တော့၏။

ရုတ်တရက် ရွှယ့်လျန်သည် မာန်သွင်းအော်ဟစ်လျက် တိုက်ပွဲမှ နောက်သို့ ပြန်ဆုတ်သွားခဲ့သည်။ ရန်ကိုင်အား ကြည့်နေသည့် သူ့အကြည့်တို့မှာလည်း ကြောက်ရွံ့မှုကြောင့် အနည်းငယ် တုန်ရီနေခဲ့လေသည်။

သူ့အရှိန်အဝါမှာ မတည်မငြိမ် ဖြစ်နေပြီး သူ့ကိုယ်ပေါ်ရှိ သွေးအကြေးခွံများစွာမှာလည်း ဖျက်စီးခံထားရလေပြီ။ ခေါင်းပေါ်ရှိ ချိုနှစ်ချောင်း၏ အရောင်အဝါသည်ပင် ယခင်ကကဲ့သို့ တောက်ပခြင်း မရှိတော့ဘဲ အနည်းငယ် မှေးမှိန်နေခဲ့သည်။

ရှက်စရာကောင်းလိုက်လေခြင်း… အများရှေ့ သူအရှက်တကွဲ အကျိုးနည်း ဖြစ်ခဲ့လေပြီ။

သူ့ထက် အဆင့်တစ်ဆင့်ပင် နိမ့်ကျနေသော လူသား တစ်ယောက်ကြောင့် ဤကဲ့သို့ အရှက်တကွဲ အကျိုးနည်း အခြေအနေသို့ ရောက်ခဲ့ရသည့် အဖြစ်သည် ဖျောက်ဖျက်မရသည့် အစွန်းအထင်းတစ်ခုနှယ် ရွှယ့်လျန်၏ ဘဝတစ်လျောက်လုံး တောက်လျောက် ကပ်ပါနေတော့ပေမည်။

ဤကဲ့သို့သော ရလဒ်မျိုးကို သူလက်မခံနိုင်ပေ။

မွန်းစတားကြယ်ဧကရာဇ်ကြယ်ပေါ်၌ တန်ခိုးရှင်ဘုရင်အဆင့်အောက် မည်သူ့ကိုမှ သူမကြောက်ချေ။ သူသည် မီထန်းကိုပင် အရှင်းဂရုမစိုက်သည့်လူ ဖြစ်သော်လည်း ယခုမူ မည်သည့်နေရာမှ ရောက်လာမှန်း မသိရသော လူသား တစ်ယောက်ကြောင့် လူအများရှေ့ အရှက်ကွဲခဲ့ရသည်။ သူ့သွေးမျိုးဆက်သည်လည်း အများရယ်စရာ ဖြစ်သွားခဲ့ရသည်။

ဤသို့သော ရလဒ်မျိုးကို သူလက်မခံနိုင်ချေ။

“လူသား မင်းငါ့ကို တွန်းအားပေးလိုက်တာပဲ” စိတ်ပိုင်းဖြတ်ပြီးနောက်တွင် ရွှယ့်လျန်သည် ရန်ကိုင်အား ဒေါသတကြီး ဒေါသတကြီး လှမ်းအော်ပြောလိုက်ပြီး သူ့ပါးစပ်ထဲမှ ဝိုင်စက်နေသော သွေးနီရောင် အလုံးလေး တစ်လုံးကို ထွေးထုတ်လိုက်လေသည်။

ထိုအလုံးလေးသည် ကလေးလက်သီးဆုပ် အရွယ်လောက်သာ ရှိသော်လည်း ထိုအရာလေးဆီမှ ကြောက်မက်ဖွယ်ကောင်းသည့် စွမ်းအားတို့ ဖြာထွက်နေခဲ့သည်။ သေချာကြည့်လိုက်မည် ဆိုလျှင် ထိုအလုံးလေးထဲ ကူးခတ်သွားလာနေသော မြွေပုံစံ အရိပ်လေး တစ်ခုကို မြင်တွေ့နိုင်ပေလိမ့်သည်။

“ရွှယ့်လျန် ရူးသွားတာလား” ထိုမြင်ကွင်းကို မြင်ပြီးနောက်၌ ယုရှုန်းသည် မယုံကြည်နိုင်စွာဖြင့် အလန့်တကြား ထအော်တော့၏ “ဘာလို့ သူ့မွန်းစတားအမြူတေကို အပြင်ထုတ်လိုက်တာလဲ”

“မကောင်းတော့ဘူး။ ဒီကောင် စိတ်လွတ်နေပြီ” ဘဟဲလည်း ထိတ်လန့်သွားခဲ့ပြီး အလျင်စလို အော်ပြောလိုက်လေသည် “သူ့ကို မြန်မြန်တား”

ပြောပြီးသည်နှင့် တိုက်ပွဲဆီသို့ အလျင်စလို ပြေးဝင်သွား၏။

ရှန်ချင်းလော့သည်လည်း ယခုမှ အသိပြန်ဝင်လာဟန်ရကာ ဘဟဲနောက်မှ အလျင်စလို ပြေးလိုက်သွားလေသည်။

မွန်းစတားသားရဲ အသွင်ဖြင့် မွေးဖွားလာသော မွန်းစတား မျိုးနွယ်စု ဖြစ်စေ၊ လူသားအသွင်ဖြင့် မွေးဖွားလာသော မွန်းစတား မျိုးနွယ်စုဝင် ဖြစ်စေ၊ အကုန်လုံးတွင် မွန်းစတားအမြူတေတစ်ခု ရှိကြသည်။ ထိုမွန်းစတားအမြူတေသည် မွန်းစတားမျိုးနွယ်စုဝင် တစ်ဦး၏ အဖိုးအတန်ဆုံး အရာဖြစ်ပြီး သူတို့၏ အသက်ဟုလည်း ပြော၍ရသည်။

တိုက်ပွဲတစ်ပွဲ တိုက်ခိုက်သည့်အခါ၊ မဖြစ်မနေ အခြေအနေမျိုး မရောက်သရွေ့ မွန်းစတားမျိုးနွယ်စုဝင်များသည် သူတို့၏ မွန်းစတား အမြူတေကို ထုတ်သုံးလေ့ မရှိချေ။ မွန်းစတား အမြူတေသည် အနည်းငယ်လေး ထိခိုက်သွားခြင်း ခံရလျှင်ပင် ပိုင်ရှင်ဖြစ်သူ အနေဖြင့် ဆိုးရွားသော အကျိုးဆက်များကို ရင်ဆိုင်ရနိုင်၏။

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၈၄)

မွန်းစတားအမြူတေကို ထုတ်သုံးလိုက်ခြင်းသည် မွန်းစတား မျိုးနွယ်စုဝင် တစ်ဦး၏ ခွန်အားကို အကြီးအကျယ် တိုးတက်လာစေနိုင်သည်။

ရွှယ့်လျန် မွန်းစတားအမြူတေကိုပင် ထုတ်သုံးလိုက်ပုံကို ကြည့်လျှင် ဒေါသကြောင့် သူစုံလုံးကန်းသွားပြီး မည်သည့် အကျိုးဆက်ကိုမှ မစဉ်းစားနိုင်တော့မှန်း မြင်တွေ့နိုင်၏။ ထို့ကြောင့် ဘဟဲတို့ ထိတ်လန့်တုန်လှုပ်သွားခြင်း ဖြစ်သည်။

ရွှယ့်လျန်သည် သာမန် မွန်းစတားမျိုးနွယ်စုဝင်တစ်ဦး မဟုတ်ချေ။ အနိုင်ရနိုင်ရန်အတွက် မွန်းစတားအမြူတေကိ ထုတ်သုံးသော်ငြား ရှုံးနေသေးခဲ့လျှင် သွေးနဂါးမျိုးနွယ်စုခေါင်းဆောင်အတွက် မျက်နှာ ပျက်စရာဖြစ်မည် ဖြစ်ကာ သူကိုယ်တိုင်လည်း ရန်ကိုင်အား မည်သို့မှ အလွတ်ပေးတော့မည် မဟုတ်ချေ။ မွန်းစတားဧကရာဇ် ကြယ်တွင် မျိုးနွယ်စုခေါင်းဆောင်တစ်ဦးအား ဒေါသထွက်အောင် လုပ်ခြင်းသည် အလွန်ဆိုးရွားသော အကျိုးဆက်များကို ဖြစ်ပေါ်လာစေနိုင်ပေသည်။

ရွှယ့်လျန်သာ နိုင်သွားခဲ့မည်ဆိုလျှင်လည်း ဒေါသကြောင့် စုံးလုံးကန်းနေပြီ ဖြစ်လေရာ ရန်ကိုင်အား မည်ကဲ့သို့ အလွတ် ပေးမည်နည်း။ ထို့ကြောင့် ဘဟဲ၊ ယုရှုန်းနှင့် ရှန်ချင်းလော့တို့ ရပ်ကြည့်မနေနိုင်ခြင်း ဖြစ်သည်။

မည်သို့ပင်ဖြစ်ပါစေ မွန်းစတားအမြူတေထဲတွင် ရှိနေသော စွမ်းအားကို ရွှယ့်လျန် ထုတ်မသုံးနိုင်ခင် သူ့အား အချိန်မှီ တားဆီးရပေမည်။ ထိုသို့လုပ်မှပဲ ယခုကိစ္စကို ဖြေရှင်းနိုင်ပေလိမ့်မည်။

သူတို့ သုံးယောက်၏ တုန့်ပြန်နှုန်းမှာလည်း အလွန်မြန်သည်။ သူတို့ ရပ်ကြည့်နေသည့် နေရာသည် တိုက်ပွဲကွင်းပြင်နှင့် အလွန် ဝေးကွာခြင်း မရှိသည့်အတွက် မျက်တောင်တစ်ခတ်အတွင်း တိုက်ပွဲ ဖြစ်ပွားနေသည့် နေရာဆီသို့ ရောက်လာခဲ့သည်။

ဘဟဲသည် ပါစပ်ဟပြီး ဖျန်ဖြေသူ တစ်ယောက် အနေဖြင့် တစ်ခုခု ပြောရန် လုပ်လိုက်သော်ငြား သူဘာမှ မပြောနိုင်သေးခင်မှာပင် ရန်ကိုင်၏ ခန္ဓာကိုယ်တွင်းမှ နားပင်မတတတ် နဂါးဟိန်းသံကြီး ထွက်ပေါ်လာခဲ့ပြီး တစ်ချိန်တည်းတွင်လည်း လွှမ်းမိုးနိုင်စွမ်း ပြင်းထန်လှသော အားတစ်ရပ် ဖြာထွက်လာခဲ့လေသည်။

သူ့ခွန်အားနှင့်ပင်လျှင် ထိုစွမ်းအားနှင့် ဟိန်းသံကို ခံစားမိလိုက်သည့် အခိုက် ဘဟဲတစ်ကိုယ်လုံး တဆတ်ဆတ် တုန်ရီသွားခဲ့သည်။ သူ့အထင်သာ မမှားလျှင် အစောပိုင်းက ဟိန်းသံသည်…

“နဂါးဟိန်းသံ” နားနေဆောင်မှနေ၍ တိုက်ပွဲအား စောင့်ကြည့်နေသော ချီယွဲ့၏ မျက်နှာသည်လည်း ဖြူလျော်သွားခဲ့၏။ ထို့နောက် အလွန်ကိုမှ ထူးခြားသော အရာတစ်ခုကို ရှာတွေ့လိုက်သည့်အလား တလက်လက် တောက်ပနေသော မျက်ဝန်းအစုံဖြင့် ထိုင်ရာမှ ထရပ်လိုက်၏။

တန်ခိုးရှင်ဘုရင် ဒုတိယအဆင့်သို့ ရောက်နေသည့်တိုင် ထိုဟိန်းသံကို ကြားလိုက်သည့်အခိုက် သူမ၏ ကျောရိုးတစ်လျှောက် စိမ့်တက်သွားခဲ့ရသည်။

ချီယွဲ့သည် ကောင်းကင်လနတ်ဆိုးပင့်ကူ၏ သွေးမျိုးဆက် အနည်းငယ်ကို ပိုင်ဆိုင်ထားခဲ့သည်။ ထို့အတွက်ကြောင့်လည်း တန်ခိုးရှင်ဘုရင်အဆင့်သို့ ရောက်နိုင်ခဲ့ခြင်း ဖြစ်သည်။ ထို့အကြောင့်ကြောင့်ပင် ရှနင်းချန်ကို သူမ၏ မွေးစားသမီး အဖြစ် မွေးစားခဲ့ပြီး ပြုစုပျိုးထောင်ပေးခဲ့ခြင်းလည်း ဖြစ်သည်။

ကောင်းကင်လနတ်ဆိုးပင့်ကူ၏ စွမ်းအား အပြည့်အဝကို ရှန်ချင်းလော့မှ ထုတ်ဖော်လာပြီး ကောင်းကင်လနတ်ဆိုးပင့်ကူ၏ ဂုဏ်သရေအား ပြန်လည်ယူဆောင်လာမည့်နေ့ကို ချီယွဲ့ မျှော်လင့်စောင့်စားနေမိလေသည်။

ကောင်းကင်လနတ်ဆိုးပင့်ကူသည် မျိုးကွဲရှေးနတ်ဘုရားဝိဥာဉ်(ရှေးနတ်ဘုရားမျိုးစိတ်) တစ်မျိုးဖြစ်ပြီး ကြောက်မက်ဖွယ်အကောင်းဆုံး မွန်းစတားသားရဲများ အနက် တစ်ကောင် အပါအဝင် ဖြစ်သည်။

သို့သော်ငြား ဒဏ္ဏာရီလာ အစစ်အမှန် ရှေးနတ်ဘုရားဝိဥာဉ်များနှင့် နှိုင်းယှဉ်လိုက်ပါက အနည်းငယ် နိမ့်ကျနေပေသေးသည်။

ရှေးနတ်ဘုရားဝိဥာဉ်များထဲ၌ နဂါးနှင့် ဖီးနစ်တို့သည် နတ်ဘုရား ဝိဥာဉ်အားလုံး၏ အရှင်သခင်များ ဖြစ်သည်ဟု ဆိုကြသည်။

ကံမကောင်းစွာဖြင့် လွန်ခဲ့သော နှစ်ပေါင်းများစွာခန့်က ထိုအားကောင်းသော ရှေးနတ်ဘုရားဝိဥာဉ်အားလုံး ပျောက်ကွယ်သွားခဲ့ကြပြီး ထိုအရာများ တည်ရှိခဲ့သည့် အကြောင်းကို ရှေးဟောင်းစာအုပ်များထဲတွင်သာ ရှာတွေ့နိုင်တော့သည်။

ရှေးနတ်ဘုရားဝိဥာဉ်များသည် ဒဏ္ဏာရီထဲတွင် တည်ရှိကြသည့် သက်ရှိမျိုးစိတ်များ ဖြစ်ကြပြီး မွန်းစတားမျိုးနွယ်စုဝင်များအနက် တစ်မျိုးအပါအဝင် ဖြစ်ပါသော်ငြား… ထိုသက်ရှိမျိုးစိတ်များသည် ဧကရာဇ်များအဖြစ် မွေးဖွားလာကြသည့် သက်ရှိများဖြစ်ပြီး မွန်းစတားမျိုးနွယ်စုဝင်အားလုံး ဦးညွတ်ရိုသေကြရသည့် သက်ရှိများလည်း ဖြစ်ပေသည်။

ရှေးနတ်ဘုရားဝိဥာဉ်များသည် မျိုးတုန်းပျောက်ကွယ်သွားပြီဟု ချီယွဲ့လည်း ထင်ခဲ့ဖူးသည်။

သို့သော်လည်း ယနေ့တွင် အစစ်အမှန် နဂါးဟိန်းသံကို သူမ၏ နန်းတော်ဆောင်ထဲ ကြားလိုက်ရလေသည်။

ထိုနဂါးဟိန်းသံ ထွက်ပေါ်လာချိန် သူမ၏ သွေးကြောထဲရှိ ကောင်းကင်လနတ်ဆိုး‌ပင့်ကူ၏ သွေးအချို့ပင် တုန်ရီသွားခဲ့၏။

တုန့်ဆိုင်းမနေရဲတော့သည်နှင့် ချီယွဲ့သည် နားနေဆောင်မှ ထွက်၍ တိုက်ပွဲကွင်းပြင်ဆီသို့ အလျင်စလို ပြေးထွက်သွားလေသည်။

ရွှယ့်လျန် လုံးဝ ပြဿနာတက်ပြီမှန်း သူမ သိနေခဲ့သည်။

ရန်ကိုင်သည် အေးစက်စက် အမူအရာဖြင့် မတ်တပ်ရပ်ရင်း အသက်ပြင်းပြင်း ရှူသွင်းလျက် သူ့ကိုယ်ထဲ ရုန်းကြွနေသော ဆန်းကြယ်သည့် စွမ်းအင်များကို ပေါက်ကွဲထွက်ခွင့် ပေးလိုက်တော့သည်။

နဂါးဟိန်းသံနှင့်အတူ ရန်ကိုင်၏ ခန္ဓာကိုယ်ဆီမှ ရွှေရောင် အလင်းတန်းတို့ ဖြာထွက်လာခဲ့ပြီး ဧရာမ ရွှေနဂါးကြီးတစ်ကောင် ထွက်ပေါ်လာခဲ့လေသည်။ ကိုယ်ထည်တစ်ခုလုံးသာ‌ ရွှေရောင် တောက်နေခြင်း မဟုတ်ဘဲ အိမ်တစ်အိမ်စာမျှ ကြီးမားသော ၎င်း၏ မျက်လုံးများမှာလည်း ရွှေရောင်တောက်နေခဲ့သည်။

ထွက်ပေါ်လာပြီးသည်နှင့် တစ်ပြိုင်နက် ခေါင်းကိုခါ၊ အမြီးကို လှုပ်ရမ်းလျက် ရွှယ့်လျန်ဆီသို့ တစ်ဟုန်ထိုး ပြေးဝင်သွားလေ၏။

ထိုမြင်ကွင်းကို ကြည့်ရင်း ရွှယ့်လျန် မှင်သက်နေခဲ့သည်။ အစောပိုင်းက တဟုန်းဟုန်း တောက်လောင်နေသည့် မီးတောက် တစ်ခုနှယ် ဝုန်းဒိုင်းကြဲနေသော သူ့အရှိန်အဝါသည် ယခုမူ ရေအေး တစ်ခွက်ဖြင့် လောင်းချခံလိုက်ရသည့်နှယ် လုံးဝကို ငြိမ်သက် တိတ်ဆိတ်သွဦးခဲ့သည်။

ထိုအခိုက်သည် ရွှယ့်လျန်သည် အသိစိတ်မရှိတော့သည့် လူတစ်ယောက်နှယ် ရွှေနဂါးမှ သူ့ဆီ ပြေးဝင်လာပြီး သူ့မွန်းစတား အမြူတေအား ပါးစပ်ဟ၍ ဝါးမြိုသွားကာ ရန်ကိုင်ဆီသို့ ချက်ချင်း ပြန်သွားသည်ကို ဤအတိုင်းသာ ရပ်ကြည့်နေခဲ့လေသည်။

“မဖြစ်နိုင်ဘူး” ရွှေနဂါးကို မြင်လိုက်သည့်နောက်တွင် မီထျန်းကမူ သွေးရူးသွေးတန်း ထအော်လေသည်။

“နဂါးကြီးလား” ယုရှုန် သူ့လျှာသူပြန်ကိုက်လုမတတ် ဖြစ်သွားခဲ့သည်။

ဘဟဲသည်လည်း သူ့ရှေ့ရှိ မှင်သက်ဖွယ်ရာ မြင်ကွင်းကို ပါးဟပ်အဟောင်းသားဖြင့် ရပ်ကြည့်နေမိလေသည်။

ရှန်ချင်းလော့မှာမူ အများနှင့်မတူဘဲ သူမ၏ မျက်ဝန်းအစုံမှာ တဖျက်ဖျက် တောက်ပနေခဲ့သည်။ လက်ရှိတွင် သူမ၏ ဦးခေါင်းထက်တွင် ဧကရာမပင့်ကူကြီးတစ်ခေါင် ရှိနေပြီး ရွှေနဂါးမှ ထုတ်လွှတ်သော ဖိအားကို ခုခံနေခဲ့သည်။ ထိုပင့်ကူသည် အိမ်တစ်လုံးထက်ပင် ပိုပြီးမားပြီး အလွန်ကိုမှ အသက်ဝင်လှရာ တကယ့် ပင့်ကူတစ်ကောင်လားဟုပင် အထင်မှားစရာ ရှိသည်။

ထိုပင့်ကူသည် ကောင်းကင်လနတ်ဆိုးပင့်ကူ ဖြစ်ပေသည်။

ရှိနေသည့် လူအားလုံးထဲတွင် ရှန်ချင်းလော့ တစ်ယောက်သာ အဆင်ပြေနေခြင်း ဖြစ်သည်။

အကြောင်းအရင်းသည်ကား သူမသည် လူသား တစ်ယောက်အဖြစ် မွေးဖွားလာခဲ့ခြင်း ဖြစ်သည့် အတွက်ကြောင့် ဖြစ်သည်။ လူသား တစ်ယောက် ဖြစ်သည့်အတွက် သူမခံစားရသည့် ဖိအားသည် အခြား မွန်းစတားသားရဲ မျိုးနွယ်စုဝင်များ ခံစားရသည့် ဖိအားနှင့် ယှဉ်လျှင် ပိုနည်းပါးသည်။ ဒုတိယအချက် အနေဖြင့် သူမသည် ကောင်းကင်လနတ်ဆိုးပင့်ကူ၏ အရင်းအမြစ်ကို စုပ်ယူထားခဲ့သည်။ ထို့ကြောင့် ကောင်းကင်လနတ်ဆိုးပင့်ကူ၏ စွမ်းအားကိုသုံး၍ နဂါးဖိအား တစ်စိတ်တစ်ပိုင်းကို ခုခံနိုင်၏။

ထိုသို့ဆိုလျှင်ပင် ရန်ကိုင်ကိုယ်ထဲမှ ထွက်ပေါ်လာသော နဂါးကြီးကိုကြည့်ရင်း သူမအလွန် ထိတ်လန့်တုန်လှုပ်မိနေသည်။

ထိုရွှေနဂါးပေါ်လာသည်နှင့် တစ်ပြိုင်နက် ပြိုင်ပွဲကွင်းပြင်ကြီး တစ်ခုလုံး သုဿန်တစပြင်နှယ် ရုတ်ချည်း တိတ်ဆိတ်သွားခဲ့၏။

ရန်ကိုင်သည် အပေါ်သို့ တစ်ချက် မော့ကြည့်လိုက်ပြီး အနည်းငယ် ထူးဆန်းသည့် အမူအရာတစ်ခု သူ့မျက်နှာထက် ဖြတ်ပြေးသွား၏။ ထို့နောက် ရွှယ့်လျန်ဘက်သို့ လှည့်၍ “ဒီကောင့်ကြည့်ရတာ မင်းရဲ့ မွန်းစတားအမြူတေကို အရမ်း စိတ်ဝင့်စားနေတဲ့ပုံပဲ။ ငါသူ့ကို ဆက်ပြီး ဖိနှိပ်မထားနိုင်တော့ဘူး”

ရွှယ့်လျန် အလွန်ကိုမှ စိတ်ဓါတ်ကျသွားခဲ့သည်။ တစ်ချိန်က မာနရိပ်တို့ဖြင့် လွှမ်းနေခဲ့သော သူ့မျက်ဝန်းအစုံသည် လုံးဝကို အသက်မဲ့သလို ဖြစ်နေခဲ့လေပြီ။

စတင် တိုက်ခိုက်သည့်အချိန်မှစ၍ ယခုအချိန်သည် ရန်ကိုင်သည် သူ၏ ခန္ဓာကိုယ်ကို ထိခိုက်အောင် လုပ်နိုင်ခဲ့ရုံမက သူ့စိတ် အခြေအနေကိုလည်း ချုံးချုံးကျသွားအောင် လုပ်ပစ်နိုင်ခဲ့သည်။

ကြောက်မက်ဖွယ်ရာကောင်းလှသည့် နဂါးဖိအားအောက်ဝယ် မွန်းစတားအမြူတေကို ပြန်ယူရန်ကိုပင် ရွှယ့်လျန် မေ့လျော့နေတော့။

“တော်လောက်ပြီ” အော်သံတစ်သံနှင့်အတူ အမျိုးသမီးတစ်ဦး ရုတ်တရက် ထွက်ပေါ်လာခဲ့သည်။ လူအုပ်ကြီးကို စူးရဲစွာ တစ်ချက် ဝေ့ကြည့်လိုက်ပြီးနောက် ရွှေနဂါးဆီ လှမ်းကြည့်လိုက်လေသည်။ ထို့နောက် အသက်ပြင်းပြင်း ရှူသွင်းလိုက်ရာ သူမ၏ မို့မောက်သော ရင်အစုံပင် နိမ့်ချည်မြင့်ချည် ဖြစ်လာခဲ့သည်။

“မွေးစားအမေ” ရှန်ချင်းလော့နှင့် ယုရှုန်းတို့ နှစ်ဦးစလုံး အလျင်အမြန် အော်ခေါ်လိုက်သည်။

“သခင်မ” ဘဟဲက လေးလေးစားစား ဦးညွှတ်လိုက်သည်။

ရန်ကိုင် မျက်လုံးမှေးစဉ်းသွားခဲ့ပြီး ထိုအမျိုးသမီးကို ကောင်းကင်စိတ်အာရုံဖြင့် လှမ်းစစ်ဆေးကြည့်လိုက်ရာ မည်သို့မှ စူးစမ်း၍ မရသည်ကို တွေ့ရှိလိုက်ရသည်။

တန်ခိုးရှင်ဘုရင်အဆင့်…

ယခုပေါ်လာသည့် အမျိုးသမီးသည် လနီမျိုးနွယ်စုခေါင်းဆောင် ချီယွဲ့ပင် ဖြစ်လေသည်။

တန်ခိုးရှင်ဘုရင်အဆင့် ပညာရှင်များကို ယခုမှသာ မြင်ဖူးခြင်း မဟုတ်ဘဲ ယခင်ကလည်း မြင်ခဲ့ဖူးပေသည်။ သူသည် တန်ခိုးရှင် ဘုရင်အဆင့်ဖြစ်သော ကွေ့ဇူအနားတွင် အတော်ကြာအောင် နေခဲ့ရဖူးသည်။ သို့သော် ကွေ့ဇူဆီမှ ခံစားရသော ဖိအားသည် ချီယွဲ့ဆီမှ ခံစားရသည့် ဖိအားလောက် ပြင်းထန်ခြင်း မရှိပေ။

ကွေ့ဇူသည် တန်ခိုးရှင်ဘုရင် ပထမအဆင့်သာ ရှိသေးပြီး ချီယွဲ့သည် တန်ခိုးရှင်ဘုရင် ဒုတိယအဆင့်သို့ ရောက်နေသည့် ပညာရှင်တစ်ဦး ဖြစ်သည့်အတွက် သူတို့ဆီမှ ခံစားရသည့် ဖိအား မတူညီခြင်းမှာ အထူးအဆန်းတော့ မဟုတ်။

အဆင့်သေးတစ်ဆင့်သာ ဆိုသော်လည်း ထိုအဆင့်သေး တစ်ဆင့်သည် မခန့်မှန်းနိုင်လောက်အောင် များပြားလှသော ခွန်အား ကွာခြားချက်ကို ဖြစ်ပေါ်စေနိုင်ပေသည်။

“ဂျူနီယာရန်ကိုင် စီနီယာချီယွဲ့ကို နှုတ်ဆက်ပါတယ်” ရန်ကိုင်က လက်သီးဆုပ်၍ အော်နှုတ်ဆက်လိုက်သည်။

ယခုမှသာ ချီယွဲ့ ရန်ကိုင်အား လှည့်ကြည့်မိလာပြီး ခေါင်းညိတ်၍ “နင်က ဧည့်သည့်တစ်ယောက်ပဲဆိုတော့ ဒီလောက်ကြီး ယဉ်ကျေးနေစရာ မလိုဘူး”

ရန်ကိုင်ကပြုံး၍ “စီနီယာရဲ့ ခမ်းနားကြီးကျယ်လှတဲ့ ဂုဏ်သတင်း အကြောင်း ဂျူနီယာ ကြားဖူးနေတာ ကြာခဲ့ပြီ။ စီနီယာဆီ လာလည်ချင်ခဲ့ပေမယ့် ဒီဂျူနီယာရဲ့ နိမ့်ကျတဲ့ အဆင့်အတန်းကြောင့် စီနိယာနဲ့ မျက်နှာချင်းဆိုင်ဖို့ မဝံ့ရဲခဲ့ဘူး။ အဲ့အချက်နဲ့ ပက်သက်ပြီး ကျေးဇူးပြုပြီး ခွင့်လွှတ်ပေးပါ စီနီယာ၊ ဂျူနီယာ စီနီယာကို မလေးမစားလုပ်ချင်လို့ မဟုတ်ပါဘူး”

“ကိစ္စမရှိဘူး။ ဒီဘုရင်မကလည်း နင့်ကို တွေ့ဖို့ စီစဉ်ထားတာ မဟုတ်ဘူး” ချီယွဲ့က ပြန်ပြောလိုက်သည်။

“မွေးစားအမေ၊ ဒီတစ်ကြိမ်…” ချီယွဲ့၏ ရန်ကိုင်အပေါ် ဆက်ဆံပုံသည် ဟက်ဟက်ပက်ပက် မရှိသည်ကို မြင်သော် ရှန်ချင်းလော့ ထိတ်လန့်သွားခဲ့လေသည်။

“ပြောနေစရာမလိုဘူး၊ ငါသိတယ်” ချီယွဲ့က လက်ဝှေ့ရမ်း၍ ကြားဖြတ်ပြောလိုက်သည်။ သူမ၏ ဖီးနစ်မျက်ဝန်းအစုံဖြင့် ရန်ကိုင်အား မျက်လုံးမှေးစဉ်းကာ ငုံ့ကြည့်လိုက်ပြီးနောက် ထပ်ပြောလိုက်လေသည် “တိုက်ပွဲက ပြီသွားပြီဆိုတော့ မွန်းစတား အမြူတေကို ပြန်ပေးသင့်ပြီလို့ မထင်ဘူးလား”

“ပြန်ပေးရဖို့” ရန်ကိုင် မျက်ခုံးပင့်သွားခဲ့လေသည်။

“နင့်သူ့ကို သတ်ဖို့ စဉ်းစားနေတာတော့ မဟုတ်ပါဘူးနော်” ချီယွဲ့က ဖြည်းဖြည်းချင်း ခေါင်းခါလျက် “နင်က လူတော် တစ်ယောက်ပဲ၊ နင်အဲ့လိုလုပ်လိုက်ရင် ဘယ်လို အကျိုးဆက်ကို ရင်ဆိုင်ရမလဲ သိမှာပေါ့”

“ဂျူနီယာတကယ် မသိလို့ စီနီယာ အလင်းဖွင့်ပေးဖို့ တောင်းဆိုပါတယ်” ရန်ကိုင်သည် ချီယွဲ့အား အကြောက်အလန့် ကင်းကင်းဖြင့် ကြည့်၍ ပြန်ပြောလိုက်လေသည်။

ချီယွဲ့နှင့် မျက်နှာချင်းဆိုင် စကားပြောနေသည့် ရန်ကိုင်မှာ ဘာမှမဖြစ်သော်လည်း ဘေးမှ ရပ်ကြည့်နေသည့် ဘဟဲမှာမူ နဖူးတစ်ပြင်လုံး ချွေးအေးများဖြင့် စိုရွှဲနေပြီး မီထျန်းမှာမူ ခြေမခိုင်ချင်၊ လက်မခိုင်ချင် ဖြစ်နေခဲ့သည်။ ယုရှုန်းဆိုလျှင်လည်း တဆတ်ဆတ်ကို တုန်ရီနေခဲ့လေသည်။

ထိုကောင်လေးသည် ကောင်းကင်နှင့်မြေပြင် မည်မျှ ကွာခြားလဲ ဆိုသည်ကို မသိသည့် လူတစ်ယောက်လော… သခင်မ ချီယွဲ့ကိုပင် ထိုကဲ့သို့ ပြောရဲသည်။

မွန်းစတားမျိုးနွယ်စု၏ ခေါင်းဆောင်တစ်ယောက်ကို ဒေါသ ထွက်အောင် လုပ်၍များ ဘာအကျိုးရှိမည်နည်း။ ရန်မစသင့်သည့် လူတစ်ယောက်ကို သွားရန်မစသင့်ဟူသော ဆောင်ပုဒ်ကို သူနားမလည်လေသလော။

“ကောင်စုတ်လေး” ချီယွဲ့သည် အတော်လေး သည်းခံနိုင်စွမ်းရှိပုံ ရ၏။ ထို့ကြောင့် ချက်ချင်း ဒေါသထွက်သွားခြင်း မရှိဘဲ ခဏမျှ စဉ်းစားလိုက်ပြီးနောက် ပြန်ပြောလိုက်လေသည် “ဒီဘုရင်မက နင့်ကို မျက်နှာသာပေးနေတာ၊ နင်ကလည်း ဒီဘုရင်မကို ပြန်ပြီး မျက်နှာသာပေးသင့်တယ်။ ပြောရရင် ငါက နင့်ထက် အသက် အများကြီးပိုကြီးတယ်၊ စကားအများကြီး ပြောရတာ ငါ့အတွက် ပင်ပန်းလွန်းတယ်”

“စီနီယာက အသက်ကြီးတာလား၊ ဂျူနီယာ အမြင်မှာတော့ စီနီယာက အလှက အပျိုစင်မိန်းကလေး တစ်ယောက်ရဲ့ အလှအောက် မနိမ့်ကျသလိုပဲ” ရန်ကိုင်က အံ့အားသင့်နေသည့် လေသံဖြင့် ပြန်ပြောလိုက်သည်။

ရန်ကိုင်ပြောသည်ကို ကြားပြီးနောက် မွန်းစတားမျိုးနွယ်စုဝင် အကုန်လုံး ပါးစပ်အဟောင်းသား ဖြစ်ကုန်ကြလေသည်။

အကုန်လုံးသည် ရန်ကိုင်အား အရူး တစ်ယောက်နှယ် ကြည့်လိုက်ကြသည်။

ထိုကောင့် မျိုးနွယ်စုခေါင်းဆောင်ကို လိင်ပိုင်းဆိုင်ရာအားဖြင့် စော်ကားလိုက်လေသလား… သူတကယ် စော်ကားလိုက်သည်၊ ဟုတ်သည်မလား။ ဤလောကကြီးတွင် မျိုးနွယ်စုခေါင်းဆောင်အား ဤကဲသို့ စော်ကားရဲသည့် လူတစ်ယောက် ရှိနေခဲ့သည်။

သို့သော်လည်း မျိုးနွယ်စုခေါင်းဆောင် နည်းနည်းလေးမှ ဒေါသ ထွက်သွားခြင်းမ ရှိသည့်အတွက်ကြောင့် အကုန်လုံး အံ့ဩနေကြ၏။ မျိုးနွယ်စုခေါင်းဆောင်သည် ဒေါသထွက်သွားခြင်း မရှိသည့်အပြင် ရန်ကိုင်၏ စကားကြောင့် အနည်းငယ် ကျေနပ်သွားသည့်ပုံပင်။

သို့သော်လည်း ခဏအကြာ၌ အေးစက်စက် လေသံဖြင့် နှာခေါင်းရှုံံ၍ “နင်က တကယ်ကို လျှာစောင်းထက်တာပဲ၊ ချင်းလော့ နင့်ကို တမ်းတမ်းစွဲ ဖြစ်နေတာလည်း ဒါကြောင့်ကိုး။ နင်သူ့ကို ဒါမျိုး လှည့်စားခဲ့တာမလား”

“စီနီယာမှားနေပြီ။ ဂျူနီယာက ချင်းလော့ကို ကိုယ့်အရည်အချင်းနဲ့ ဆွဲဆောင်ခဲ့တာ။ စကားချိုချိုလေးတွေ ပြောပြီး ဖြာယောင်းခဲ့တာ မဟုတ်ဘူး” ရန်ကိုင်က ခေါင်းခါ၍ အလေးအနက် အမူအရာဖြင့် ပြန်ပြောလိုက်သည်။

“ဟင့်” ချီယွဲ့ သူမ၏ နှုတ်ခမ်းလေးကိုကွေး၍ ပြုံးလိုက်သည်။ သို့သော် ချက်ချင်းပဲ သူမစိတ်ကို တည်ငြိမ်အောင် လုပ်လိုက်ပြီး အလေးအနက် အမူအရာဖြင့် “ဘာပဲဖြစ်ဖြစ်၊ ငါ့နန်းတော်လာပြီး နင်လုပ်ချင်တိုင်း လုပ်လို့မရဘူး။ ရွှယ့်လျန်သာ ဒီမှာ မတော်တဆ တစ်ခုခု ဖြစ်သွားခဲ့ရင် ဒီဘုရင်မ ရွှယ်ကျောက်ကို ရှင်းပြနိုင်မှာ မဟုတ်ဘူး။ မွန်းစတားအမြူတေကို ပြန်ပေးလိုက်၊ ဒီဘုရင်မ နင့်ကို အကြွေးတစ်ခု တင်တယ်လို့ မှတ်ထားလိုက်မယ်”

ရန်ကိုင်သည် မျက်လုံးမှေးစဉ်းလျက် ရွှယ့်လျန်အား အနည်းငယ် တုန့်ဆိုင်းနေသည့် အမူအရာဖြင့် လှမ်းကြည့်လိုက်သည်။

“သူဘာမှလုပ်စရာ မလိုဘူး” ရွှယ့်လျန်က ရုတ်တရက် အော်ပြောလာခဲ့သည် “ဘာမှမဟုတ်တဲ့ နဂါးပုံရိပ်လေးနဲ့ ဒီသခင်လေးနဲ့ မွန်းစတားအမြူတေကို ချုပ်နှောင်ထားလို့ ရရိုးလား”

ပြောပြီးသည်နှင့် ပါးစပ်ဟ၍ သက်ပြင်းပြင်း ရှူသွင်းလိုက်သည်။

သူ့ဆီမှ နဂါးဟိန်းသံတစ်သံ ရုတ်တရက် ထွက်ပေါ်လာပြီး တစ်ချိန်တည်းတွင် ရွှေရောင်နဂါးဆီမှ အနီရောင်အလင်းတန်း တစ်ခု ဖြာထွက်လာခဲ့ကာ ရွှယ့်လျန်ဆီသို့ တိုးဝင်သွားခဲ့၏။

သူ့မွန်းစတားအမြူတေကို အလွယ်တကူ ပြန်ယူလိုက်နိုင်၏။

သူ့အစာ ပြန်ယူသွားခံလိုက်ရသည့်အတွက် ရွှေရောင်နဂါး ဒေါသထွက်သွားပြီး ရွှယ့်လျန်ဘက်သို့ မာန်ဖီဟိန်းဟောက်တော့၏။

“လူသား၊ ဒီသခင်လေး သတိတစ်ချက် လွတ်သွားလို့ ငါ့မွန်းစတား အမြူတေကို မင်းယူသွားနိုင်တာ။ ဒီနဂါးပုံရိပ်လေးနဲ့ ငါ့ကို အနိုင်ယူနိုင်မယ်လို့ မင်းတကယ်ကြီး ထင်နေတာလား” ရွှယ့်လျန်သည် အောက်ကျမခံ ပြန်ပြောလိုက်သည်။ သို့သော်ငြား ရန်ကိုင်ကို ကြည့်သည့် သူ့အကြည့်သည် ယခင်ကကဲ့သို့ အထင်သေး နှိမ့်ချသည့် အကြည့်မျိုး မဟုတ်တော့ဘဲ ထိတ်လန့်မှုတို့ အနည်းငယ် ရောစွက်နေသည့် အကြည့်မျိုး ဖြစ်နေခဲ့လေပြီ။

သူဝန်ခံခံ၊ မခံခံ၊ ရန်ကိုင်၏ ခွန်အားသည် သူ့အောက် လုံးဝ နိမ့်ကျခြင်း မရှိချေ။

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၈၅)

“တော်လောက်ပြီ ရွှယ့်လျန်၊ နင်ရောက်နေတာ ဒီဘုရင်မ နန်းတော်၊ နင့်နေရာ မဟုတ်ဘူး။ နင့်ကိုယ်နင် သွေးနဂါး ပိုင်နက်ထဲမှာ ရှိနေတယ်လို့ ထင်တုန်းလား။ နင်ဒီကိုမလာခင် ဘယ်လိုနေထိုင်ရမလဲဆိုတာ ရွှယ်ကျောက် နင့်ကို မသင်ပေးလိုက်ဘူးလား” ချီယွဲ့က ဆူပူကြိမ်းမောင်းတော့သည် “ဒီတစ်ကြိမ်တော့ ခွင့်လွှတ်ပေးလိုက်မယ်။ နောက်တစ်ကြိမ် ဒါမျိုးထပ်ဖြစ်မယ်ဆိုရင်တော့ ငါနဲ့ တွေ့ပြီသာမှတ်”

ရွှယ့်လျန်သည် လက်မလျှော့ချင်သေးသော်လည်း ချီယွဲ့ ကိုယ်တိုင်က သတိပေးနေပြီ ဖြစ်သဖြင့် လက်သီးဆုပ်၍ ပြန်ပြောလိုက်လေသည် “ရွှယ့်လျန် မလေးမစား လုပ်မိသလို ဖြစ်သွားပါတယ်။ စီနီယာချီယွဲ့ သဘောထားကြီးကြီးနဲ့ ခွင့်လွှတ်ပေးဖို့ တောင်းဆိုပါတယ်”

“မီထျန်း၊ သူ့ကို နားဖို့ ပြန်ပေါ်သွားလိုက်တော့။ နင်တို့ သွားဖို့က ရက်သိပ်ကျန်တော့တာ မဟုတ်ဘူး။ နင့်သူ့ကို သေချာ စောင့်ကြည့်ထားနော်။ ဒီတစ်ကြိမ် သူပြဿနာ ထပ်ရှာရင် နင့်တာဝန်လည်း မကင်းဘူးမှတ်” ချီယွဲ့က မီထျန်းဘက်သို့ လှည့်၍ အေးစက်စက် လေသံဖြင့် ပြောလိုက်လေသည်။

“ဟုတ်ကဲ့ပါ” မီထျန်းသည် နာနာခံခံဖြင့် ပြန်ပြောလိုက်သည်။ သူမည်မျှပင် မောက်မာနေပါစေ၊ ချီယွဲ့ကဲ့သို့ မျိုးနွယ်စုခေါင်းဆောင် တစ်ယောက်‌ ရှေ့တွင်တော့ သွား၍ မောက်မာနေ၍ ရမည်မဟုတ်မှန်း သူကိုယ်သူ သိသည်။

မွန်းစတားဧကရာဇ်ကြယ်ပေါ်ရှိ မည်သည့် မျိုးနွယ်စု ခေါင်းဆောင်ကိုမှ အလွယ်တကူ သွားရန်စ၍ မဖြစ်ချေ။ မျိုးနွယ်စု ခေါင်းဆောင်များထဲ ထိပ်ဆုံးအဆင့်၌ ရပ်တည်နေသော ချီယွဲ့ဆိုလျှင် ပို၍ပင် ရန်စ၍ မဖြစ်ချေ။

ချီယွဲ့မှ အမိန့်ပေးလာသည်နှင့် ရွှယ့်လျန်ကို ခေါ်ပြီး ထိုနေရာမှ အလျင်အမြန် ထွက်သွားလေသည်။

“လူသား၊ မင်းသေချာမှတ်ထားလိုက်။ ဒီတစ်ကြိမ်ကိစ္စက ဒီလောက်နဲ့ ပြီးသွားမှာ မဟုတ်ဘူး” ရွှယ့်လျန်သည် မထွက်သွားခင် ရန်ကိုင်အား မုန်းမုန်းတီးတီး စိုက်ကြည့်၍ ခြိမ်းခြောက်စကား ပြောသွားခဲ့သေးသည်။

ရန်ကိုင်မူ ထီမထင်ဟန်ဖြင့်သာ ထိုနှစ်ယောက် ထွက်သွားသည်ကို ကြည့်နေခဲ့ပြီး နောက်မှသာ ရွှေနဂါးကို ပြန်သိမ်းလိုက်လေ၏။

“နင်တို့လည်း ပြန်တော့” ချီယွဲ့သည့် ယုရှုန်းနှင့် အခြားသူများကို အမိန့်ပေးလိုက်ပြီးနောက်တွင် ရန်ကိုင်ဘက်သို့ လှည့်၍ “နင်ကတော့ ဒီဘုရင်မနဲ့ လိုက်ခဲ့”

ပြောပြီးသည်နှင့် ရန်ကိုင်အား သူမ၏ သူတော်စင်ချီဖြင့် ရစ်ပတ်လိုက်လေ၏။ ရန်ကိုင်လည်း ချီယွဲ့၏စွမ်းအား သူ့အား လာရောက်ရစ်ပတ်သည်ကို ကြည်ကြည်ဖြူဖြူ လက်ခံလိုက်၏။ ထို့နောက် သူတို့နှစ်ယောက် အားလုံး၏ မြင်ကွင်းမှ ပျောက်ကွယ်သွားလေသည်။

“မွေးစားအမေ” ရှန်ချင်းလော့က အလန့်တကြား လှမ်းအော်ခေါ်လိုက်သည်။

“စိတ်ပူမနေနဲ့။ မွေးစားအမေ သူ့ကို ဘာမှမလုပ်လောက်ဘူး။ မွေးစားအမေရဲ့ ခွန်အားနဲ့ဆို သူသာ တကယ်လုပ်ချင်ရင် ယောက်ဖ ဘာမှတတ်နိုင်မှာ မဟုတ်ဘူး” ယုရှုန်းက ပြောလိုက်သည်။

ရှန်ချင်းလော့သည် တစ်ခဏမျှ တုန့်ဆိုင်းနေပြီးနောက် အံကြိတ်၍ ချီယွဲ့၏ နန်းတော်ဆောင်ဆီသို့ ပျံသန်းသွားလေသည်။

ချီယွဲ့၏ နန်းတော်ဆောင်ထဲ ရန်ကိုင်နှင့် ချီယွဲ့တို့ ပေါ်လာခဲ့သည်။

အခန်းတစ်ခန်းလုံးသည် ထူးထူးခြားခြား ပြင်ဆင်ထားခြင်း မရှိဘဲ အတော်လေးကို ရိုးရှင်းလှသော်လည်း အခန်းတစ်ခန်းလုံးသည် မြင့်မြတ်ထည်ဝါသော အရှိန်အဝါတို့ဖြင့် ပြည့်နှက်နေခဲ့သည်။

ဒါချီယွဲ့နေတဲ့ နေရာ ဖြစ်လောက်တယ် ရန်ကိုင် စိတ်ထဲ ခန့်မှန်းလိုက်သည်။

ရန်ကိုင်၏ နန်းတော်ဆောင်ဆီသို့ ခေါ်လာပြီးနောက်တွင် ချီယွဲ့သည် အခြားဘာမှ ထပ်မလုပ်ဘဲ ရန်ကိုင်ကိုသာ သူမ၏ ဖီးနစ်မျက်ဝန်းအစုံဖြင့် မမှိတ်မသုံ စိုက်ကြည့်နေလေသည်။

ရန်ကိုင်ကမူ မကြောက်မလန့်ဖြင့် သူမအား ပြန်၍ စိုက်ကြည့်လိုက်လေသည်။

ခဏအကြာတွင် ချီယွဲ့သည် အသာအယာ ခေါင်းညိတ်လျက် လှောင်ပြောင်သံလား၊ ချီးကျူးသံလား မသဲကွဲသော လေသံဖြင့် ပြောလိုက်လေသည် “နင့်သတ္တိက မသေးပါလား။ ဒီဘုရင်မကို ဘယ်လူသားကမှ နင့်လို စိုက်မကြည့်ရဲဘူး။ ဒီဘုရင်မ နင့်ကို ဘာမှမလုပ်ရဲဘူးလို့ ထင်နေတာလား”

“မဟုတ်ပါဘူး” ရန်ကိုင်က ရယ်သွမ်းသွေးလျက် “စီနီယာက အားနည်းသူကို အနိုင်ကျင့်တတ်တဲ့ လူတစ်ယောက်နဲ့ မတူဘူး”

“နင်အဲ့လို ထင်နေတဲ့ နင့်ရွှေနဂါးအရင်းအမြစ်ကို အရမ်း အထင်သေးရာ ကျသွားတာပေါ့” ချီယွဲ့က အသက်ပြင်းပြင်း ရှူသွင်းလျက် အလေးအနက် အမူအရာဖြင့် “အမှန်အတိုင်း ပြောရင် ငါလည်း နင့်ကိုယ်ထဲက ရွှေနဂါးအရင်းအမြစ်ကို အတော်လေး စိတ်ဝင်စားတယ်။ နင့်ကို သတ်ပြီး အဲ့ဒါကို လုယူလိုက်ရင် ကောင်းမလားလို့တောင် စဉ်းစားနေတာ။ အဲ့ဒါနဲ့ဆို ဒီဘုရင်မှ တန်ခိုးရှင်ဘုရင် တတိယအဆင့်ကို ရောက်နိုင်ချေ ပိုများသွားပြီ။ အဲ့လို အခွင့်အရေးမျိုးကို ရဖို့ကို ဒီဘုရင်မ နှစ်တွေ ဘယ်လောက်ကြာအောင် စောင့်နေခဲ့ရလဲဆိုတာ နင်သိလား။ အခု ငါ့စိတ်ကိုငါ မနည်း ထိန်းနေရတယ်”

ထိုစကားကို ကြားပြီးသွားသည့်တိုင် ရန်ကိုင်ကမူ ကြောက်ရွံ့သည့် အရိပ်အယောင် အရှင်းမပြဘဲ ခေါင်းညိတ်လျက်သာ ပြန်၍ ပြောလိုက်လေသည် “စီနီယာက အဲ့လို ပြောမှတော့ ကျုပ်ကို မသတ်ချင်လို့ပေါ့။ သတ်ချင်နေရင် သတ်ပစ်လိုက်တာ ကြာနေပြီ။ ဒါနဲ့ ဘာလို့ အဲ့လိုမလုပ်လဲ ကျုပ်သိလို့ရမလား”

“နင်လုံးဝ မတုံးသေးဘူးပဲ” ချီယွဲ့က အေးစက်စက် အမူအရာဖြင့် နှာခေါင်းရှုံ့လိုက်ပြီးနောက် ထိုင်ခုံတစ်ခုံ ယူထိုင်လျက် အကြောင်းအရင်းကို ရှင်းပြလိုက်လေသည် “သုံးချက်ရှိတယ်။ ပထမတစ်ချက်က နင့်ကို သတ်လိုက်ရင်တောင် နင့်ကိုယ်ထဲက ရွှေနဂါးအရင်းအမြစ်ကို ရနိုင်မလားဆိုတာ မသေချာလို့ပဲ။ အဲ့ဒါက နင့်ကို ရွေးချယ်ထားတာ နင့်ကို အသိအမှတ်ပြုလို့၊ ဒါပေမယ့် ဒီဘုရင်မကို အသိအမှတ်ပြုမပြု မသေချာဘူး။ ဒုတိယ အနေနဲ့ အဲ့ဒါ ငါ့ကို အသိအမှတ်ပြုမယ် ဆိုရင်တောင် တန်ခိုးရှင်ဘုရင် တတိယအဆင့်ကို ငါမချိုးဖျက်နိုင်တာလည်း ဖြစ်နိုင်တာပဲ”

ရန်ကိုင်က ခေါင်းညိတ်၍ “တတိယ အချက်ကကော”

“နင်က ချင်းလော့ချစ်တဲ့လူ၊ ဒီဘုရင်မ နင့်ကို သတ်လိုက်ရင် ချင်းလော့ကို ဆုံးရှုံးရလိမ့်မယ်။ ရမယ့် အကျိုးအမြတ်က ဆုံးရှုံးရမှာထက်ကို ဘယ်လိုမှ သာမနေဘူး။ ချင်းလော့၏ အနာဂတ်က ဒီဘုရင်မထက် အများကြီး ပိုမြင့်မားတယ်”

“စီနီယာ အခုလို ပွင့်ပွင့်လင်းလင်း ပြောတာကို ကြားရတာ ဂျူနီယာ တကယ်ကို လေးစားမိပါတယ်” ရန်ကိုင်က ပြုံး၍ ပြောလိုက်သည်။

“ဖားယားနေတာတွေ တော်လိုက်တော့။ ဒီဘုရင်မ အဲ့ဒါတွေကို ဂရုမစိုက်ဘူး” ချင်းယွဲ့က အလေးအနက် အမူအရာဖြင့် “ဒီဘုရင်မ နင့်ကို မသတ်ချင်ပေမယ့် ဒီတစ်ကြိမ် နင်ဘာပြဿနာ ရှာလိုက်လဲ နင်သိလား”

ရန်ကိုင် မျက်မှောင်ကြုတ်သွားပြီးနောက် တွေးတွေးဆဆဖြင့် ပြန်ပြောလာခဲ့သည် “ရွှယ့်လျန်ကို ပြောချင်တာလား”

“သူက ဘာမို့လို့လဲ” ချီယွဲ့က နှာခေါင်းရှုံ့လျက် “ဒီဘုရင်မ ပြောနေတဲ့ ပြဿနာက မွန်းစတားဧကရာဇ်ကြယ်က အခြား မျိုးနွယ်စုခေါင်းဆောင်တွေကို ပြောနေတာ”

ကြားကြားချင်း ရန်ကိုင် ကြောင်သွားခဲ့သော်လည်း မကြာမီ ချီယွဲ့ ဘာပြောချင်နေလဲ ဆိုသည်ကို နားလည်သွားခဲ့လေသည်။

“နင့်ရွှေနဂါးအရင်းအမြစ်ကို အရမ်း အထင်သေးနေတာပဲ။ လူသား ဘုရင်တစ်ယောက်သာ နင်ရွှေနဂါးအရင်းအမြစ် ပိုင်ဆိုင်ထားတာကို သိရင် အံ့ဩသွားလောက်ရုံပဲ။ အများဆုံး ဆိုရင်တောင် နင်အားမကောင်းလာခင် နင့်ကို သတ်ပစ်ဖို့ ကြိုးစားရုံပဲ။ ဒါပေမယ့် ငါတို့ မွန်းစတားမျိုးနွယ်စုဝင် ကျင့်ကြံသူတွေ အတွက်တော့ နဂါးဆိုတာ… အစစ်အမှန် အရှင်သခင် တစ်းပါးပဲ။ သန်းနဲ့ချီတဲ့ မွန်းစတားမျိုးနွယ်စုဝင်တွေ ရိုသေလေးစားရတဲ့ တည်ရှိမှုတစ်ခုပဲ။ ဘယ်သူကများ အဲ့လို ဘဝမျိုးကို မလိုချင်ဘဲ နေမှာလဲ” ချီယွဲ့က ရှင်ပြလိုက်သည် “နင့်မှာ ရွှေနဂါးအရင်းအမြစ် ရှိတယ်ဆိုတဲ့ သတင်းသာ ပြန့်သွားခဲ့ရင် အခြားမျိုးနွယ်စုခေါင်းဆောင် ကိုးယောက် ဘာလုပ်မယ်ထင်လဲ။ အကုန်လုံး လနီပိုင်နက်ကို အပြေးလာပြီး နင့်ကို ဝိုင်းသတ်ကြမှာ။ အဲ့အခါကျ ဒီဘုရင်မ နင့်ကို ကာကွယ်ပေးမယ် ထင်နေလား။ ဒီဘုရင်မ ကိုယ့်ကိုယ်ကို အထင်သေးနေတာ မဟုတ်ဘူး။ ဒါပေမယ့် ငါတစ်ယောက်တည်းနဲ့ အဲ့ကိုးယောက်ကို ဘယ်လိုမှ မထိန်းနိုင်ဘူး။ အခု ဒီဘုရင်မကို ဘယ်လောက် ပြဿနာပေးလိုက်လဲ နင်သိပြီလား”

“အင်း…” ရန်ကိုင် အံ့အားသင့်သွားခဲ့သည် “ဒီကိစ္စကို ဂျူနီယာ တစ်ခါမှ မစဉ်းစားမိလိုက်ဘူး။ ဒါပေမယ့် စီနီယာ၊ အခုကိစ္စက တကယ်ကော ဂျူနီယာရဲ့ အမှား ဟုတ်လို့လား။ တကယ်တမ်း ပြောရရင် အခုလို ဖြစ်သွားရတာ စီနီယာရဲ့ အပြစ်လည်း မကင်ဘူးလေ”

သူနှင့် ရွှယ့်လျန် တိုက်ခိုက်နေသည်မှာ အတော်လေး ကြာပေသည်။ ထို့ကြောင့် သူတို့နှစ်ယောက်ကြား တိုက်ပွဲကို ချီယွဲ့ သတိမပြုမိစရာ အကြောင်းမရှိချေ။ သို့တိုင် ဝင်မပါဘဲ ရပ်ကြည့်နေသဖြင့် ချီယွဲ့ကိုယ်တိုင်က သူတို့ နှစ်ယောက်ကို တိုက်ခိုက်စေချင်သည့် အတွက်ကြောင့် ဖြစ်ရပေမည်။ သူတို့ နှစ်ယောက် ယခုကဲ့သို့ တိုက်ခိုက်လာအောင် နောက်ကွယ်မှ ကြိုးဆွဲထိန်းချုပ်ခဲ့သည့်သူမှာ သူမကိုယ်တိုင်ပင်လျှင် ဖြစ်နေနိုင်ပေသေးသည်။

ချီယွဲ့သည် ဝန်လည်းမခံသလို ငြင်းလည်း မငြင်းခဲ့ဘဲ ရန်ကိုင်ကိုသာ စူးရဲစွာ စိုက်ကြည့်နေလိုက်သည်။

“ရှင်းရှင်းပြောရရင် ဒီဘုရင်မနဲ့ နင်နဲ့ ဘာမှမပက်သက်ဘူး။ နင်ရှာတဲ့ ပြဿနာအားလုံးကို နင်ပဲ ရှင်းရမှာ။ ဒီဘုရင်မ ဝင်ပါမှာ မဟုတ်ဘူး” ချီယွဲ့က အပြတ်ပြောချလိုက်သည်။

“ဟဲဟ၊ ဂျူနီယာလည်း စီနီယာဆီက အကူအညီ မတောင်းပါဘူး” ရန်ကိုင်က သူ့နှာခေါင်းကိုပွတ်၍ “သူတို့ ကျုပ်ဆီက ရွှေနဂါး အရင်းအမြစ်ကို လိုချင်ရင် လာယူပါစေပေါ့။ ဒါပေမယ့် လွယ်လွယ်နဲ့ ရရိုးလား”

ချီယွဲ့ မျက်မှောင်ကြုတ်လိုက်ပြီး ရန်ကိုင်အား ခဏကြာမျှ ကြောင်ကြည့်မိသွားသည်။ ထို့နောက် မဲ့ပြုံးပြုံးလျက် လှောင်ပြောင်လိုက်လေသည် “မောက်မာချက်ကတော့ မျိုးနွယ်စုခေါင်းဆောင်တွေကိုတောင် ဂရုမစိုက်တဲ့ အထိပါလား။ နင်တို့ လူသားတွေ မောက်မာမှန်း ဒီဘုရင်မသိတယ်။ ဒါပေမယ့် နင့်လောက် မောက်မာလွန်းတဲ့လူကိုတော့ ဒီဘုရင်မ တစ်ခါမှ မတွေ့ဖူးဘူး”

“တကယ် အစွမ်းအစရှိရင် လုပ်ချင်တာ လုပ်လို့ရတယ်လေ။ အဓိကက အစွမ်းအစရှိဖို့ပဲ” ရန်ကိုင်က မျက်လုံးမှေးစဉ်းလျက် “ဂျူနီယာ ပြောတာနဲ့ ပက်သက်ပြီး စီနီယာ မကျေနပ်မှန်း ဂျူနီယာ သိတယ်။ ဒါပေမယ့် စီနီယာ ဂျူနီယာကို သတ်ချင်တယ် ဆိုရင်တောင် သတ်နိုင်မှာ မဟုတ်ဘူး”

ချီယွဲ့ မျက်လုံးမှေးစည်းသွားပြီး ရန်ကိုင်အား အေးစက်စက် လေသံဖြင့် မေးခွန်းထုတ်လိုက်လေသည် “နင်ဒီဘုရင်မကို ရန်စနေတာလား”

ရန်ကိုင်က ဖြည်းဖြည်းချင်း ခေါင်းခါလျက် “ရန်စနေတာ မဟုတ်ဘူး။ အမှန်အတိုင်း ပြောနေတာ”

ချီယွဲ့သည် ရန်ကိုင် လိမ်ညာနေသလား သိရလေအောင် ရန်ကိုင်အား မမှတ်မသုံ စိုက်ကြည့်လိုက်သည်။ သို့သော်ငြား ရန်ကိုင်၏ အမူအရာမှာမူ စိုးစဉ်းမျှ ပြောင်းလဲသွားခြင်း မရှိပေ။ သူ့မျက်နှာကို ကြည့်ရသည်မှာ လိမ်နေသည့်ပုံလည်း မပေါ်။ ထိုသို့ဆိုလျှင် သူ့ယုံကြည်ချက်သည် မည်သည့်နေရာမှ‌ ရောက်လာသနည်း။

ရန်ကိုင်သည် တန်ခိုးရှင်ဒုတိယအဆင့်သာ ရှိသေးသော်လည်း သူမသည် တန်ခိုးရှင်ဘုရင်ဒုတိယအဆင့် ဖြစ်သည်။ သူတို့ နှစ်ဦးကြား အဆင့်ကြီးတစ်ဆင့် ကွာခြားနေသည်။ ထို့ကြောင့် ရန်ကိုင်သည် ရွှယ့်လျန်ကို လက်ရည်တူ ယှဉ်နိုင်ခဲ့လျှင်ပင် သူမအဖို့ ရန်ကိုင်ကိုသတ်ရန် တစ်ချက်သာ လိုသည်ဟု ချီယွဲ့ ယုံကြည်နေဆဲ။

နှစ်ပေါင်းများစွာကြာအောင် အသက်ရှင်လာသည့် သက်တမ်း တစ်လျှောက် ရန်ကိုင်ကဲ့သို့ ကမ်းကုန်အောင် မောက်မာပြီး ယုံကြည်ချက် မိုးထိုးနေသည့် လူငယ်မျိုး တစ်ခါမှ မမြင်ဖူးခဲ့ပေ။

သို့သော်လည်း ရန်ကိုင်သည် မောက်မာသော်လည်း သူ့တွင် တစ်မူထူးခြားသော ဆွဲဆောင်မှုမျိုး ရှိနေသည်မှာတော့ ငြင်း၍ မရသည့် အချက်တစ်ချက် ဖြစ်သည်။ ချင်းလော့သူ့အား တမ်းတမ်းစွဲ ချစ်မိသွားသည်မှာလည်း မထူးဆန်းတော့။

“နင့်မှာ ဝှက်ဖဲရှိသေးတယ်ပေါ့” ချီယွဲ့က အံ့အားသင့်သွားသည့် လေသံဖြင့် ရန်ကိုင်အား ကြည့်လိုက်သည်။

ရွှယ့်လျန်နှင့် တိုက်ခိုက်ရာတွင် ရန်ကိုင် အားကုန်ထုတ်သုံးခဲ့သည်ဟု သူမ ထင်ခဲ့သည်။ သို့သော်လည်း ယခု ရန်ကိုင် ပြောသည်ကို ကြားပြီးနောက်တွင် ရွှယ့်လျန်နှင့် တိုက်ပွဲ၌ ရန်ကိုင် အားကုန်ထုတ်မသုံးခဲ့မှန်း သူမ နားလည်သွားခဲ့သည်။

ရွှယ့်လျန် ရှုံးသည်မှာလည်း ရှုံးသင့်စရာပင်။

ဤလူသားကောင်လေးနှင့် ယှဉ်လိုက်လျှင် မွန်းစတားဧကရာဇ် ကြယ်ပေါ်ရှိ တက်သစ်စ လူငယ်ကြယ်ပွင့်အားလုံး ရွက်ကြမ်းရေကျို ဖြစ်သွားကုန်ကြရလေသည်။

“ဟုတ်တယ်” ရန်ကိုင်က အမှန်အတိုင်း ဝန်ခံလိုက်သည်။

ချီယွဲ့သည် အသာအယာ သက်ပြင်းချလျက် ရန်ကိုင်အား မွန်းစတား တစ်ကောင်ကို ကြည့်သည့်နှယ် စိုက်ကြည့်လိုက်၏။ အချိန်အတော်ကြာပြီးနောက် သူမလက်ကို ဝှေ့ရမ်း၍ “မေ့လိုက်တော့။ အခုမှ အဲ့အကြောင်းတွေ ပြောနေလို့လည်း ဘာမှ မထူးတော့ဘူး။ အခုနင်က မွန်းစတားမျိုးနွယ်တစ်ပိုင်းလို့ ပြောလို့ရတယ်။ ဒါကြောင့် အကြီးအကဲတစ်ယောက် ဖြစ်တဲ့ငါက နင့်ကို အရမ်း အရှက်ရအောင် လုပ်နေမှာ မဟုတ်ဘူး။ နင်နဲ့ ချင်းလော့ကြားက ကိစ္စကို ငါဝင်မရှုပ်တော့ဘူး…”

“ဂျူနီယာ ဘယ်တုန်းက မွန်းစတားမျိုးနွယ်တစ်ပိုင်း ဖြစ်သွားတာလဲ” ရန်ကိုင်က မှင်သက်နေသည့် အမူအရာဖြင့် ပြနမေးလိုက်လေသည်။

သူသည် ရေမရောသည့် လူသားစစ်စစ်တစ်ယောက် ဖြစ်သည်။

“ဟန့်၊ မွန်းစတားမျိုးနွယ် တစ်ပိုင်းလို့ ပြောခံလိုက်ရတာ နင့်ကို စော်ကားလိုက်တယ်လို့ ထင်နေတယ်ပေါ့” ချီယွဲ့က ရန်ကိုင်ကို အေးစက်စက် အမူအရာဖြင့် စိုက်ကြည့်လျက် “ဒီလို အခွင့်အရေးမျိုးကို အခြားသူတွေ အိမ်မက်မက်လို့တောင် ရနိုင်တဲ့ အခွင့်အရေးမျိုးမဟုတ်ဘူး ကောင်လေး၊ အခုလို အခွင့်အရေးမျိုး ရတာကို နင်အရမ်း ကျေနပ်နေသင့်တာ”

“အခွင့်အရေး…” ရန်ကိုင်၏ မျက်ခုံးကြောတို့ တွန့်ကွေးသွားပြီး တစ်ခဏတာ တုန့်ဆိုင်းနေပြီးနောက် “ရွှေနဂါးအရင်းအမြစ်ကို စီနီယာ ပြောချင်နေတာလား”

“အမှန်ပဲ။ နင့်လက်ရှိပုံစံက ချင်းလော့နဲ့ ခပ်ဆင်ဆင်ပဲ။ လူသား တစ်ယောက်ဖြစ်ပြီး အားကောင်းတဲ့ မွန်းစတားမျိုးနွယ်စုဝင် တစ်ဦးရဲ့ အရင်းအမြစ်ကို စုပ်ယူထားတာမို့လို့ မွန်းစတားမျိုးနွယ် တစ်ပိုင်းလို့ ပြောလို့ရတယ်”

“ရွှေနဂါးအရင်းအမြစ်အကြောင်း စီနီယာ အသေးစိတ်လေး ရှင်းပြပေးလို့ရမလား” ရန်ကိုင်က မေးလိုက်သည်။

“နင်ဘာသိချင်နေတာလဲ” ချီယွဲ့က ပြန်မေးလိုက်သည်။

“အဲ့ဒါနဲ့ ပက်သက်ပြီး အကုန်သိချင်တယ်” ရန်ကိုင်က စပ်ဖြဲဖြဲပြုံးလျက် ပြန်ပြောလိုက်သည်။

ချီယွဲ့ မျက်မှောင်ကြုတ်သွားခဲ့သော်ငြား ဒေါသတော့ ထွက်မသွားခဲ့။ ထို့အစား စိတ်ရှည်ရှည်ဖြင့်သာ ရှင်းပြလိုက်၏ “ရှေးနတ်ဘုရားဝိဥာဉ်တွေ အကြောင်းကို နင်လည်း ကြားဖူးမှာပေါ့၊ ဟုတ်တယ်မလား။ ရှေးနတ်ဘုရားဝိဥာဉ်တွေက ကောင်းကင်နဲ့ မြေပြင် စတင်ပြီး ဖြစ်ပေါ်လာတုန်းက မွေးဖွားလာခဲ့တဲ့ သက်ရှိတွေပဲ။ သူတို့တွေက ငါတို့ မွန်းစတားမျိုးနွယ်ရဲ့ ဘိုးဘေးတွေပဲ၊ မွန်းစတားမျိုးနွယ်စု တစ်ခုလုံးရဲ့ အားအကောင်းဆုံး တည်ရှိမှုတွေဆိုရင်လည်း မမှားဘူး။ အခုလက်ရှိ မွန်းစတားမျိုးနွယ်စုဝင်တွေက အဲ့ရှေးနတ်ဘုရား ဝိဥာဉ်တွေရဲ့ သွေးမျိုးဆက်တွေကနေ ဆင်းသက်လာတာ။ သူတို့ရဲ့ သွေးမျိုးဆက်ကနေပြီး မျိုးနွယ်စုပေါင်း သန်းနဲ့ချီပြီး ကွဲထွက်သွားတယ်။ အဲ့တော့ နောက်မျိုးဆက်တွေရဲ့ သွေးမျိုးဆက်တွေက မသန့်စင်တော့ဘူး။ ဒါကြောင့်ပဲ အရင် မျိုးဆက်တွေနဲ့ ယှဉ်လိုက်ရင် လက်ရှိမျိုးဆက်တွေက အရမ်း အားနည်းနေကြတာ။ နင်နဲ့တိုက်ခိုက်ခဲ့တဲ့ ရွှယ့်လျန်ကို ပြောရရင် သူက အစစ်အမှန်နဂါးတစ်ကောင်ရဲ့ မျိုးဆက်ဖြစ်တဲ့ သွေးနဂါးမျိုးဆက်သွေးကို ပိုင်ဆိုင်ထားတယ်။ သူ့သွေးမျိုးဆက်ကလည်း အတော်လေး အားကောင်းတယ်။ ဒါပေမယ့် ရွှေနဂါးအရင်းအမြစ်နဲ့ ယှဉ်လိုက်ရင်တော့ အကွာကြီး ကျန်သေးတယ်။ ဒါကြောင့်ပဲ ရွှေနဂါးအရင်းအမြစ် ပေါ်လာတာနဲ့ သူချက်ချင်း ဖိနှိပ်ခံလိုက်ရတာပဲ။ ရွှေနဂါးအရင်းအမြစ်ကကော ဘာလို့ သူ့မွန်းစတားအမြူတေကို စိတ်ဝင်စားရတာလဲ။ ဘာလို့လဲဆိုတော့ သူ့မွန်းစတားအမြူတေကို ဝါးမြိုလိုက်မယ် ဆိုရင် ရွှေနဂါးအရင်းအမြစ်က ပိုပြီး အားကောင်းလာမှာ မို့လို့ပဲ”

ရန်ကိုင်သည် ချီယွဲ့ ရှင်းပြသည်ကို သေချာ နားထောင်နေခဲ့၏။

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၈၆)

“ဒါပေမယ့် နင့်ကြည့်ရတာ ဒီရွှေနဂါးအရင်းအမြစ်ကို ဘယ်လို အသုံးပြုရမယ်မှန်း သိတဲ့ပုံမပေါ်ဘူး။ ဒီလောက်ကောင်းတဲ့ အခွင့်အရေးက နင့်လက်ထဲရောက်မှ အသုံးမဝင် ဖြစ်နေတာပဲ” ချီယွဲ့က ရန်ကိုင်အား လှောင်ပြောင်လိုဟန်ဖြင့် ကြည့်လျက် “ဒါကြောင့်ပဲ ရွှယ့်လျန် သူ့မွန်းစတားအမြူတေကို အလွယ်တကူ ပြန်ယူနိုင်တာ။ မဟုတ်ရင် သူအခု အသက်ရှင်နေပါဦးမလား”

ချီယွဲ့၏ စကားကြောင့် ရန်ကိုင် အနည်းငယ် ရှက်သွားခဲ့သည်။

ထိုရွှေနဂါးအရင်းအမြစ်သည် ကောင်းကင်စံအိမ်တွင် ရှိစဉ်က စုယန်နှင့်အတူ ကောင်းကင်အမွေအနှစ်လိုဏ်ဂူထဲမှ ရရှိခဲ့သည့် အရာတစ်ခု ဖြစ်သည်။

နှစ်ပေါင်းများစွာ ကြာပြီးနောက်တွင် ထိုအမွေအနှစ်သည် ထုန်းရွှမ်လောကကြီး၏ နဂါးဖီးနစ်နန်းတော်၏ တည်ထောင်သူများ ဖြစ်ကြသော နဂါးဧကရာဇ်နှင့် ဖီးနစ်ဧကရာဇ်တို့မှ ချန်ရစ်ခဲ့သည့် အမွေအနှစ်များဖြစ်ကြောင်း သိရှိခဲ့ရသည်။

သို့သော်လည်း ထိုအမွေအနှစ်ရပြီးသည့် နှစ်ပေါင်းများစွာအတွင်း ရန်ကိုင်သည် ထိုအရာကို သိပ်ပြီး အသုံးမပြုဖြစ်ခဲ့ချေ။ စုယန်နှင့် တူနှစ်ကိုယ်ကျင့်စဉ် ကျင့်ကြံသည့် အခါမှပဲ သူ့ကျောပေါ်၌ ထိုးထားသော တက်တူ အသက်ဝင်လှုပ်ရှားလာလေ့ရှိသည်။

အခွင့်အရေးကောင်းကြီးကို ဖြုန်းတီးပစ်နေသည်ဟု ချီယွဲ့ ပြောသည်မှာ မမှားချေ။

“အဲ့ကိစ္စကို အခု ဘေးဖယ်ထားကြရအောင်။ ရှေးနတ်ဘုရားဝိဥာဉ် တစ်ကောင်ချင်းစီတိုင်းက အရမ်းအားကောင်းပြီး မွန်းစတား မျိုးနွယ်စုရဲ့ ဧကရာဇ်တွေလည်း ဖြစ်တယ်။ အဲ့ရှေးနတ်ဘုရား ဝိဥာဉ်တွေထဲမှာမှ နဂါးနဲ့ဖီးနစ်က အားအကောင်းဆုံးပဲ။ ဒါပေမယ့် ဘာလို့မှန်းမသိဘူး။ ခေတ်တစ်ခုကို ရောက်တဲ့အချိန်မှာ ရှေးနတ်ဘုရား ဝိဥာဉ်တွေ အကုန်လုံး ပျောက်ကွယ်သွားတယ်။ တိုက်ပွဲကြီးတစ်ခုမှာ ရှေးနတ်ဘုရားဝိဥာဉ် (၉၉)ရာခိုင်နှုန်း ကျဆုံးသွားတယ်တဲ့။ ကျန်တဲ့ ရှေးနတ်ဘုရားဝိဥာဉ်တွေလည်း ခြေယောင်ဖျောက် ပုန်းကွယ်သွားကုန်ကြရော။ တကယ့် ဘာဖြစ်လို့ အဲ့လို ဖြစ်သွားရလဲ ဆိုတာကိုတော့ ဘယ်သူမှ မသိကြဘူး”

“ရှေးနတ်ဘုရားဝိဥာဉ်တွေ ပျောက်ကွယ်သွားတဲ့နောက်ပိုင်းက မျိုးကွဲ ရှေးနတ်ဘုရားဝိဥာဉ်တွေက မွန်းစတားမျိုးနွယ်စုကို ပြန်ဦးဆောင်လာတယ်။ အဲ့မျိုးကွဲနတ်ဘုရားဝိဥာဉ်တွေက သွေးနဂါး၊ ကောင်းကင်လနတ်ဆိုးပင့်ကူ၊ တောင်ပံပါအရိပ်ကျားနဲ့ အခြားမျိုးနွယ်စုဝင်တွေပဲ။ အဲ့မျိုးကွဲ ရှေးနတ်ဘုရားဝိဥာဉ်တွေ ထဲက အချို့ရဲ့ ခွန်အားက အစစ်အမှန် ရှေးနတ်ဘုရာဝိဥာဉ်တွေရဲ့ ခွန်အားအောက် မနိမ့်ကျဘူး။ ပြီးတော့ အချို့ အသွင်ပြောင်း ရှေးနတ်ဘုရားဝိဥာဉ်တွေဆို အခုထိ အသက်ရှင်နေတုန်းပဲ။ ဒါပေမယ့် နှစ်တွေအများကြီး မျိုးဆက်အဆင့်ဆင့် လက်ဆင့် ကမ်းလာတော့ သွေးမျိုးဆက်တွေကတော့ ကျဲပါးလာတာတော့ပေါ့”

“ရွှယ့်လျန်ရဲ့ သွေးမျိုးဆက်နဲ့ ရှန်ချင်းလော့ စုပ်ယူလိုက်တဲ့ အရင်းအမြစ်က မျိုးကွဲတွေရဲ့ ဟာတွေမလား” ရန်ကိုင်က နှိမ့်နှိမ့်ချချဖြင့် မေးလိုက်သည်။

“ဟုတ်တယ်” ချီယွဲ့က ခေါင်းညိတ်လိုက်ပြီး “ဒါကြောင့်ပဲ ချင်းလော့က အနာဂတ်မှာ ဒီဘုရင်မကို ကျော်လွန်လိမ့်မယ်လို့ ပြောတာ။ ဒီဘုရင်မက ကောင်းကင်လနတ်ဆိုးပင့်ကူရဲ့ သွေးမျိုးဆက် နည်းနည်းလေးကိုပဲ အမွေရထားတာ။ သူကတော့ လုံးဝ ပြီးပြည့်စုံတဲ့ သွေးမျိုးဆက်ကို ရထားတာ။ ရှင်းရှင်းပြောရရင် ငါတို့ နှစ်ယောက်စလုံးက တစ်မိသားစုတည်းလို့တောင် ပြောလို့ရတယ်။ အခု ချင်းလော့ ဒီဘုရင်မအတွက် ဘယ်လောက် အရေးကြီးလဲ နင်သိပြီလား”

“ဂျူနီယာ နားလည်ပါပြီ” ရန်ကိုင် ရိုးရိုးသားသား ခေါင်းညိတ်လိုက်လေသည်။

“ဒါဆို ရှေးနတ်ဘုရားဝိဥာဉ်တွေဘက်ဆီ ပြန်သွားကြတာပေါ့” ရန်ကိုင်၏ ပြောဆိုပုံနှင့် ပက်သက်ပြီး ချီယွဲ့ အတော်လေးကိုမှ ကျေနပ်နေမိသည် “ရှေးနတ်ဘုးရားဝိဥာဉ်တွေထဲမှ နဂါးနဲ့ဖီးနစ်က ဧကရာဇ်တွေလို့ ပြောခဲ့တယ်နော်။ ဒါပေမယ့် အဲ့နဂါးကလန်ထဲမှာတောင် ရွှေနဂါးက ခေါင်းဆောင်ပဲ။ နင် အမွေရထားတာက ရွှေနဂါးရဲ့ အရင်းအမြစ်ပဲ”

“ရွှေနဂါး” ရန်ကိုင် မျက်လုံးမှေးစဉ်းသွားခဲ့သည်။

“ရှင်းရှင်းပြောရရင် နင်က ရှေးနတ်ဘုရား ဝိဥာဉ်တွေထဲမှာတောင် အားအကောင်းဆုံး ရှေးနတ်ဘုရား ဝိဥာဉ်ရဲ့ အရင်းအမြစ်ကို အမွေရထားတာ။ အခု နင့်ဟာက မွန်းစတားမျိုးနွယ်စု ခေါင်းဆောင်တွေကို ဘယ်လောက်တောင် ဆွဲဆောင်နိုင်လဲဆိုတာ နားလည်သွားပြီလား”

ရန်ကိုင်က ခေါင်းညိတ်လိုက်ပြီး ရုတ်တရက် ပြုံးလျက် “ဒီလောက် ကောင်းမွန်တဲ့ အခွင့်အရေးကြီး ကိုယ့်ရှေ့ရောက်နေတာတောင် ကိုယ့်ကိုယ်ကို ထိန်းချုပ်ထားနိုင်တဲ့ စီနီယာရဲ့စိတ်ကို ဂျူနီယာ တကယ် လေးစားပါတယ်”

“ချင်းလော့သာ မရှိရင် ဒီဘုရင်မ နင်နဲ့ အပိုတွေ ပြောနေမယ်လို့ ထင်လား” ချီယွဲ့၏ အမူအရာ အေးစက်စက် သွားခဲ့ပြီး ယူကျုံးမရ ဖြစ်နေဟန်ဖြင့် ကြုံးဝါးလိုက်လေသည် “ချင်းလော့သာ မရှိရင် ဒီဘုရင်မ နင့်ကိုဖမ်းပြီး နင့်ဝိဥာဉ်ကို သန့်စင်နေလောက်ပြီ”

“ဟားဟား” ရန်ကိုင် ခြောက်ကပ်ကပ် ပြုံးလိုက်သည်။

“ဒါပေမယ့် ရွှေနဂါးအရင်းအမြစ် နင်ဘယ်လောက်လောက် အမွေဆက်ခံရထားလဲ ဆိုတာကိုတော့ ဒီဘုရင်မ သိချင်မိသား…” ချီယွဲ့က ရန်ကိုင်အား စိတ်ဝင်တစား စိုက်ကြည့်ရင်း သူမ၏ ကောင်းကင်စိတ်အာရုံဖြင့် စစ်ဆေးကြည့်လိုက်လေသည်။

“ဂျူနီယာလည်း မသိဘူး” ရန်ကိုင် ပခုံးတွန့်ပြလိုက်သည်။

“ထူးဆန်းတယ်” ရုတ်တရက် တစ်ခုခုကို ရှာတွေ့လိုက်သည့် အလား ချီယွဲ့သည့် ဝေခွဲနားမလည်နိုင် ဖြစ်နေဟန်ဖြင့် မျက်မှောင်ကြုတ်လျက် “ဘာလို့… နင့်ကိုယ်ထဲမှာ ရှေးနတ်ဘုရား ဝိဥာဉ်နှစ်မျိုးရဲ့ စွမ်းအားကို ခံစားမိနေတာလဲ။ တစ်ခုက ရွှေနဂါး၊ ဒါပေမယ့် နောက်တစ်ခုကလည်း…”

“စီနီယာ ဒါကို ပြောနေတာလား” ရန်ကိုင်သည် မျက်မှောင်ကြုတ်၍ နဂါးအရိုးဓါးကို ဆင့်ခေါ်ပြီး ထိုထဲသို့ သူတော်စင်ချီ ထည့်သွင်းလိုက်လေသည်။ နဂါးဟိန်းသံကြီးနှင့်အတူ အစိမ်းရောင်နဂါးတစ်ကောင် ရန်ကိုင်၏ ဦးခေါင်းထက် ထွက်ပေါ်လာပြီး ချီယွဲ့အား အထက်စီးမှ စိုက်ကြည့်လိုက်လေသည်။

ချီယွဲ့၏ မျက်ဝန်းအစုံ မှေးစဉ်းသွားခဲ့ပြီး အလန့်တကြား ထအော်တော့သည် “မဖြစ်နိုင်ဘူး။ နင့်မှာ ဘာလို့ ဒါမျိုးတောင် ရှိနေရတာလဲ”

ဤလက်နက်အား နဂါးအရိုးနှင့် နဂါးဓါတ်လုံးမှ လုပ်ထားမှန်း သူမ တွေ့ရှိလိုက်ရသည်။ ထို့အပြင် နဂါးဓါတ်လုံးထဲ မှိန်ဖျော့ဖျော့ နဂါးဝိဥာဉ်ပင် ရှိနေသေးသည်။

ရန်ကိုင် ရထားသည့် အခွင့်အရေးများကိုကြည့်ရင်း ချီယွဲ့၏ မျက်ဝန်းအစုံ နီရဲလာခဲ့သည်။

သူသည် လူသားတစ်ယောက်သာ ဖြစ်သော်လည်း သူ့တွင် မွန်းစတားမျိုးနွယ်များ အလွန်လိုချင်နေသည့် အရာများ ဘာကြောင့် ရှိနေရသနည်း။

“ဒါနင့်ရဲ့ ဝှက်ဖဲလား” ရုတ်တရက် ထွက်ပေါ်လာသည့် နဂါးဖိအားကြောင့် သူမကိုယ်တွင်းရှိ ကောင်းကင်လနတ်ဆိုးပင်ကူ သွေးမျိုးဆက် မတည်မငြိမ် ဖြစ်သွားသည်ကို ချီယွဲ့ သတိပြုမိလိုက်သည်။ ခဏအကြာတွင် သူမ မျက်နှာထက်ရှိ စိတ်လှုပ်ရှားမှုတို့ ပျောက်ကွယ်သွားခဲ့ပြီး ရှုပ်ထွေးမှုတို့က အစားထိုးဝင်ရောက်လာခဲ့ကာ “နင်ဒါကို အားကိုးနေတာ ဆိုရင်တော့ ကိုယ့်ကိုယ်ကို သိပ်အထင်မကြီးဖို့ ဒီဘုရင်မ သတိပေးလိုက်မယ်။ ဒါနဲ့ဆိုရင် တန်ခိုးရှင်ဘုရင်အဆင့် အတွင်းမှာ ပြိုင်ဘက်ကင်းချင် ကင်းလိမ့်မယ်။ ဒါပေမယ့် အဲ့ဒါက နင်ကိုယ်တိုင်လည်း တန်ခိုးရှင်ဘုရင်အဆင့်ကို‌ ရောက်နေမှရမှာ။ တန်ခိုးရှင်အဆင့်နဲ့ ဆိုရင်တော့ တန်ခိုးရှင်ဘုရင်အဆင့်ကို ဘာမှ သွားလုပ်လို့ ရမှာမဟုတ်ဘူး”

ရန်ကိုင်ကမူ ထူးမခြားနားဟန်ဖြင့်သာ ပြုံးလိုက်သည်။

ဒီကောင်မှာ ဝှက်ဖဲတွေ ရှိနေသေးတာလား ချီယွဲ့ အမှန်တကယ် ထိတ်လန့်သွားခဲ့သည်။ ထို့ကောင်တွင် ဝှက်ဖဲ မည်မျှများ ရှိနေလေသနည်း။

ချီယွဲ့ ခံစားမိလိုက်သည့် အရာမှာ နဂါးအရိုးဓါး မဟုတ်ဘဲ ရေခဲဖီးနစ်မှန်း ရန်ကိုင် သိသည်။

သို့သော်လည်း ရေခဲဖီးနစ်သည် သူပိုင်ဆိုင်သည့် အရာမဟုတ်၊ စုယန် ပိုင်သည့်အရာ ဖြစ်သည်။ ရေခဲဖီးနစ်သည် သူ့ခန္ဓာကိုယ်ကို ယာယီနေစရာအဖြစ် ခေတ္တ အသုံးပြုနေခြင်းသာ ဖြစ်သည်။

ထို့ကြောင့် ရေခဲဖီးနစ်၏ တည်ရှိမှုကို ထုတ်ဖော်မည့်အစား နဂါးအရိုးဓါးကိုသာ ဖော်ထုတ်လိုက်ပေမည်။ ချီယွဲ့သာ သူ့တွင် ရေခဲဖီးနစ်အကြောင်း သိသွားခဲ့လျှင် သူမ မည်ကဲ့သို့ တုန့်ပြန်မလဲ ရန်ကိုင် မပြောတတ်ချေ။

“မေ့လိုက်တော့။ နင်ဒီလို ပစ္စည်းတွေ ဆက်ပြီး ထုတ်ပြနေရင် ဒီဘုရင်မ ကိုယ့်စိတ်ကိုယ် ထိန်းနိုင်တော့မှာ မဟုတ်ဘူး”

ရန်ကိုင်လည်း နဂါးအရိုးဓါးကို ပြန်သိမ်းထားလိုက်လေသည်။

ချီယွဲ့သည် အချိန်ခဏကြာသည်အထိ ငြိမ်ငြိမ်လေး ထိုင်နေ၏။ လက်ရှိတွင် သူမ၏စိတ် အတော်လေး မတည်မငြိမ် ဖြစ်နေသည့် အတွက် တည်ငြိမ်သွားအောင် ပြန်လုပ်နေရခြင်း ဖြစ်သည်။ ရန်ကိုင်သည်လည်း သူမအား သွားရောက်မနှောင့်ယှတ်ဘဲ ငြိမ်သက်စွာသာ ရပ်စောင့်နေလိုက်သည်။

လက်ဖက်ရည် တစ်ခွက်စာ ကြာပြီးနောက်တွင် ချီယွဲ့သည် ခေါင်းမော့၍ ရန်ကိုင်အား ပြုံးကြည့်လျက် မေးလိုက်သည် “ကောင်လေး၊ နင့်ကိုယ်ထဲမှာ ရှိတဲ့ ရွှေနဂါးအရင်းအမြစ်ရဲ့ အစွမ်းကို သုံးတတ်ချင်လား”

ထိုစကားကို ကြားသည့်အခါ ရန်ကိုင်၏ မျက်ဝန်းအစုံ တောက်ပသွားခဲ့ပြီး “စီနီယာမှာ နည်းလမ်း ရှိလို့လား”

“ဟဲဟဲ။ ဘာလို့ မရှိရမှာလဲ” ချီယွဲ့က ပြုံးလျက် “နင်နဲ့ ရွှယ့်လျန် တိုက်ပွဲကို ငါကြည့်ပြီးသွားပြီ။ နင့်ခန္ဓာကိုယ်ခွန်အားက ရွှယ့်လျန်ထက် ပိုသာတာ ငါတွေ့တယ်။ အဲ့လို ခန္ဓာကိုယ်မျိုး ရအောင် နင်ဘယ်လို လေ့ကျင့်ခဲ့လဲတော့ ငါမသိဘူး။ ဟိုငါးရောင်ခြယ် စွမ်းရည်နဲ့ ပက်သက်နေရလိမ့်မယ်လို့တော့ ငါထင်တယ်။ ဒါပေမယ့် ရွှေနဂါးရဲ့ စွမ်းအားကို သုံးလိုက်မယ် ဆိုရင်တော့ နင့်ခန္ဓာကိုယ်က လုံးဝကို ပိုမြင့်တဲ့ အဆင့်တစ်ခုကို ရောက်သွားလိမ့်မယ်။ အစစ်အမှန် နဂါးတစ်ကောင်နဲ့ ယှဉ်နိုင်တဲ့ ခန္ဓာကိုယ်မျိုးကိုတောင် ရလာမှာ”

ရန်ကိုင်၏ မျက်ဝန်းအစုံ ပို၍ တောက်ပလာခဲ့သည်။

“အဲ့လို ခန္ဓာကိုယ်မျိုးကိုမှ ဖျက်စီးလို့မရနိုင်တဲ့ အကြွင်းမဲ့ ခန္ဓာကိုယ်မျိုးလို့ခေါ်တာ” ချီယွဲ့၏ လေသံထဲ အလွန်ကိုမှ လိုချင်တောင့်တသည့် စိတ်ဆန္ဒတို့ ပြည့်နေခဲ့သည်။

ရန်ကိုင် မျက်နှာထက်ရှိ စိတ်လှုပ်ရှားနေသည့် အမူအရာ တစ်မုဟုတ်ချည်း‌ ပျောက်ကွယ်သွားပြီး ချီယွဲ့အား သတိထားကြည့်လျက် ခဏ တုန့်ဆိုင်းနေပြီးနောက် မေးကြည့်လိုက်လေသည် “စီနီယာ ပြောစရာရှိရင် တန်းပြောလိုက်တာ အကောင်းဆုံးပဲ။ စီနီယာပြောတာနဲ့ ပက်သက်ပြီး ဂျူနီယာ တကယ် စိတ်ဝင်စားမိတာ မှန်တယ်။ ဒါပေမယ့် အဲ့အတွက် ဂျူနီယာဘက်က ဘာပြန်ပေးရမလဲ ဆိုတာလည်း ရှိသေးတယ်မလား။ အဲ့လိုဆိုမှတော့ စီနီယာ တိုက်ရိုက် ပြောလိုက်တာ အကောင်းဆုံးပဲ။ ပေးရမယ့် တန်ဖိုးက အရမ်းများနေရင် အဲ့အခွင့်အရေးကို ဂျူနီယာ မယူတော့ဘူး”

“တည့်တိုးဆန်တယ်ဆိုတာ ဒါမျိုးကိုပြောတာ” ချီယွဲ့က ခေါင်းညိတ်၍ “ဥာဏ်ကောင်းတဲ့ လူတွေနဲ့ စကားပြောရတာ တကယ်ကို လေကုန်သက်သာရတယ်။ ဟုတ်တယ်၊ ဒီဘုရင်မလည်း နင့်အကူအညီကို လိုတယ်။ ဒါပေမယ့် ငါကမ်းလှမ်းချက်ကို နင်သဘောတူမတူ ဆိုတာကတော့ နင့်အပေါ်ပဲ မူတည်လိမ့်မယ်”

“ကျေးဇူးပြုပြီး ပြောပါ စီနီယာ”

“တောင်စိမ်းကြယ်ပေါ်က သွေးအကျဉ်းထောင် စမ်သပ်ပွဲ အကြောင်း နင်ကြားဖူးလား”

“ကြားဖူးတယ်” ရန်ကိုင်၏ အမူအရာ ထူးထူးဆန်းဆန်း ဖြစ်သွားခဲ့သည်။ သွေးအကျဉ်းထောင်စမ်းသပ်ပွဲကို သူမကြားဖူးဘဲ နေမလား။ ချင်းတုန်နှင့် အခြားသူများကိုပင် ထိုနေရာ၌ စောင့်ခိုင်းထားခဲ့သေးသည် မဟုတ်လော။

ချီယွဲ့ ဘာကြောင့် ထိုအကြောင်း အစဖော်လာရသနည်း။

သွေးအကျဉ်းထောင်စမ်းသပ်ပွဲသည် အမှန်တကယ် ကျော်ကြာပြီး ကြယ်စီရင်စုကြီး တစ်ခုလုံးတွင် ရှိနေသော တန်ခိုးရှင်တတိယ အဆင့်သို့ ရောက်နေသည့် ပညာရှင်များကို ဆွဲဆောင်နိုင်သော်ငြား မွန်းစတားဧကရာဇ်ကြယ်မှ ပညာရှင်များသည် မွန်းစတား မျိုးနွယ်များ ဖြစ်ကြသည်။ ထို့ကြောင့် သူတို့အနေဖြင့် တောင်စိမ်းကြယ်၌ ဒီအတိုင်းကြီး ပေါ်လာ၍ အဆင်ပြေလိမ့်မည် မဟုတ်ချေ။

သူတို့သာ ဤအတိုင်း ထွက်သွားလိုက်မည် ဆိုပါက ကျိန်းသေ ဒုက္ခရောက်ကြရပေလိမ့်မည်။ မွန်းစတားဧကရာဇ်ကြယ်တွင် လူသားမျိုးနွယ်များ ဖိနှိပ်ခံကြရသလို လူသားများ ကြီးစိုးသည့် နေရာမျိုးတွင်လည်း မွန်းစတားမျိုးနွယ်များ ဖိနှိပ်ခံရသည်။

“နင်ကြားဖူးရင် ရှင်းပြရတာ ပိုလွယ်သွားပြီ” ချီယွဲ့ ကျေနပ်စွာ ပြုံးလိုက်ပြီး “ဒီဘုရင်မ လုပ်စေချင်တာက နင်သွေးအကျဉ်းထောင် ထဲသွားပြီး တစ်ခုခုကိုရှာပြီး ဒီဘုရင်မကို ပြန်လာပေးစေချင်တာ”

“ဘာကိုရှာရမှာလဲ”

“မူလအဆီအနှစ် သလင်းကျောက်” ချီယွဲ့က ပြန်ပြောလိုက်သည်။

“ဘာကြီးလဲ” ရန်ကိုင် မျက်မှောင်ကြုတ်သွားခဲ့သည်။

“တန်ခိုးရှင်ဘုရင် တတိယအဆင့်တွေပဲ သိပ်သည်းနိုင်တဲ့ ရတနာ တစ်မျိုးပဲ။ အဲ့ဒါကို တန်ခိုးရှင်တတိယအဆင့် ပညာရှင်တစ်ဦးရဲ့ စွမ်းအင်အဆီအနှစ်တွေ အခဲဖြစ်သွားတာလို့သာ တွေးလိုက်။ သူတို့အဆင့် ပညာရှင်တစ်ဦး သေသွားခဲ့ရင် မူလအဆီအနှစ် သလင်းကျောက်တွေ ကျန်ခဲ့လိမ့်မယ်။ ငါနင့်ကို ရှာစေချင်တာက မွန်းစတားမျိုးနွယ် တစ်ဦးရဲ့ မူလအဆီအနှစ် သလင်းကျောက်ပဲ။ အဲ့ဒါက သူ့ခန္ဓာကိုယ်ရဲ့ အမြူတေလို့ ပြောလို့ရတယ်”

“အမြူတေ”

“ဟုတ်တယ်။ သွေးအကျဉ်းထောင်စမ်းသပ်ပွဲ ဘယ်လို ဖြစ်လာတာလဲ ဆိုတာကိုလည်း နင်ကြားဖူးမှာပေါ့။ တန်ခိုးရှင်အဆင့် အယောက်နှစ်ဆယ်ကျော် တိုက်ခိုက်ပြီး သူတို့တွေ သေသွားခဲ့လို့ ဖြစ်လာရတာာပဲ။ အဲ့နေရာမှာ နယ်ပယ် အကြွင်းအကျန်းတွေ ရှိနေလို့ တန်ခိုးရှင်တတိယအဆင့် ကျင့်ကြံသူတွေအတွက် အရမ်းဆွဲဆောင်စရာ ဖြစ်နေတာ။ အဲ့တိုက်ပွဲမှာတုန်းက ငါတို့ မွန်းစတားဧကရာဇ်ကြယ်က အားကောင်းတဲ့ မျိုးနွယ်စုခေါင်းဆောင် တစ်ဦးလည်း ဝင်ပြီး တိုက်ခိုက်ခဲ့တယ်။ ကံမကောင်းစွာနဲ့ သူလည်း အဲ့တိုက်ပွဲမှာ ကျဆုံးသွားခဲ့တယ်။ ငါနင့်ကို ပြန်ယူလာစေချင်တာ သူ့ရဲ့ မူလအဆီအနှစ် သလင်းကျောက်ပဲ”

“ကျုပ်အဲ့ဒါကို သွားယူရမှာလား” ရန်ကိုင် မျက်မှောင်ကြုတ်သွားခဲ့သည်။

“ဒီလိုဆိုတော့ မီထျန်းတို့၊ ရွှယ့်လျန်တို့ စီနီယာရဲ့ နန်းတော်ကို အခုအချိန် ရောက်လာတာ သွေးအကျဉ်းထောင်စမ်းသပ်ပွဲမှာ ဝင်ပြီး ယှဉ်ပြိုင်ချင်လို့ပေါ့”

ရန်ကိုင် ရုတ်တရက် နားလည်သွားခဲ့သည်။ အချိန်ကို ပြန်ရေတွက်ကြည့်လိုက်မည်ဆိုလျှင် မျက်လုံးတစ်ထောင် မျိုးနွယ်စုခေါင်းဆောင်၏ သားနှင့် သွေးနဂါးမျိုးနွယ်စု ခေါင်းဆောင်၏ သားတို့ နန်းတော်သို့ ရောက်လာသည့် အချိန်မှာ အတူတူလောက် ရှိကြသည်။ ယခု ချီယွဲ့ သွေးအကျဉ်းထောင် စမ်းသပ်ပွဲကို အစဖော်လာသည့်နောက် အခြေအနေကို ရန်ကိုင် နားလည်သွားခဲ့လေသည်။

“ဟုတ်တယ်။ သူတို့ ဝင်ပြိုင်ကြမှာ။ ဒါကြောင့် ဒီဘုရင်မ နန်းတော်ဆီ ရောက်လာခဲ့တာ။ ဘာလို့လဲဆိုတော့ ဒီဘုရင်မပဲ သူတို့ကို သွေးအကျဉ်းထောင်နန်းတော်ဆီ လုံလုံခြုံခြုံ ပို့ပေးနိုင်လို့ပဲ။ သူတို့တင် မဟုတ်ဘူး၊ ချင်းလော့၊ ဘဟဲနဲ့ ယုရှုန်းတို့လည်း ဝင်ပြိုင်ကြဦးမှာ၊ နင်မတွေ့ရသေးတဲ့ မွန်းစတား မျိုးနွယ် ဂျူနီယာနှစ်ယောက်လည်း ကျန်သေးတယ်”

“လူတွေအများကြီး ဝင်ပြိုင်နေတာကို ဘာလို့ ဂျူနီယာကိုပဲ သွားယူစေချင်ရတာလဲ” ရန်ကိုင်သည် ချီယွဲ့အား မျက်လုံး မှေးစဉ်းကြည့်လျက် မေးလိုက်လေသည် “အန္တရာယ်ရှိလို့မလား”

“သွေးအကျဉ်းထောင် စမ်းသပ်ပွဲမှာ ဝင်ပြိုင်မယ် ဆိုကတည်းက အန္တရာယ်ရှိပြီးသား။ သွေးအကျဉ်းထောင်ထဲ ဝင်သွားတဲ့ ပညာရှင် တစ်ဝက်လောက် ပြန်မထွက်လာနိုင်ဘူး ဆိုတဲ့အကြောင်း နင်မကြားဖူးဘူးလား။ မူလအဆီအနှစ် သလင်းကျောက်ကို ယူဖို့က နည်းနည်း အန္တရာယ်များတာ မှန်တယ်။ ဒါပေမယ့် နင့်စရိုက်နဲ့… အဲ့လောက် အန္တရာယ်လေးကို ကြောက်တယ်လို့တော့ ဒီဘုရင်မကို လာမပြောနဲ့နော်”

“ဂျူနီယာမှာ အသက်တစ်သက်ပဲ ရှိတာ။ ကိုယ့်အသက်ကို ကျိန်းသေ တန်ဖိုးထားရမှာပေါ့။ ဒါကြောင့် အခု ဂျူနီယာ မေးလိုက်တဲ့ မေးခွန်းကို စီနီယာ ဖြေပေးဖို့ တောင်းဆိုပါတယ်” ရန်ကိုင်သည် ချီယွဲ့အား အသေအချာ စိုက်ကြည့်၍ ပြောလိုက်၏။

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၈၇)

ဒီကောင်က တကယ် စကားပြောရခက်တဲ့ကောင်ပဲ ချီယွဲ့စိတ်ထဲ ကြိတ်၍ ကျိန်ဆဲလိုက်သည်။

သို့သော်လည်း အစကတည်းက ရန်ကိုင် အလွယ်တကူ သဘောတူမည်ဟု မထင်းထားခဲ့ချေ။ ရန်ကိုင်ကဲ့သို့ လူပါး တစ်ယောက်သည် အကြောင်းစုံကို အသေးစိတ် မသိရသေးဘဲ အလျင်စလို သဘောတူလိမ့်မည် မဟုတ်ချေ။

“ကောင်းပြီလေ” ချီယွဲ့က သက်ပြင်းချလျက် “ဒီဘုရင်မ နင့်ကို ဘာလို့ သွားယူခိုင်းလဲဆိုတော့ အားလုံးထဲမှာ နင်တစ်ယောက်ပဲ သွားယူနိုင်တာ မို့လို့ပဲ။ အဲ့မွန်းစတားမျိုးနွယ် ပညာရှင် သေသွားတာ ကြာပြီဆိုပေမယ့် သူ့မူလအဆီအနှစ် သလင်းကျောက်က အလွယ်တကူ ရယူနိုင်တဲ့ အရာမျိုး မဟုတ်ဘူး။ အခပ်မသင့်ရင် သူ့ဘာသာ ပေါက်ကွဲသွားနိုင်တယ်”

“အသိစိတ်ရှိတာလား” ရန်ကိုင် ကြောင်သွားခဲ့သည်။

“မဟုတ်ဘူး။ သေသွားတဲ့ မွန်းစတားမျိုးနွယ် ပညာရှင်ရဲ့ ဝိဥာဉ် တစ်စိတ်တစ်ပိုင်းလောက်ပဲ ကျန်ရစ်ခဲ့တာ” ချီယွဲ့က ဖြည်းဖြည်းချင်း ခေါင်းခါလျက် “တန်ခိုးရှင်တတိယအဆင့်ရဲ့ နက်နဲဆန်းကြယ်တဲ့ သဘောတရားတွေကို နားလည် သဘောပေါက်နိုင်ဖို့ အဲ့ဒါကို ငါလိုအပ်တယ်။ ပြီးတော့ အဲ့ဒါကို နင်တစ်ယောက်ပဲ ဖိနှိပ်နိုင်မှာ။ အဲ့ဒါကို တွေ့ပြီဆိုတာနဲ့ နင့်ရဲ့ ရွှေနဂါးအရင်းအမြစ်ကိုသုံးပြီး ဖိနှိပ်လိုက်ရင် အဆင်ပြေပြီ။ အခု ငါပြောတာ နားလည်ပြီလား”

“အင်း။ ဂျူနီယာ နားလည်ပါပြီ…” ရန်ကိုင်က ခေါင်းညိတ်၍ “ဒါပေမယ့် ဂျူနီယာ သိချင်နေတာ အဲ့ဒါကို စီနီယာ ဒီလောက် လိုချင်နေတာ စီနီယာကိုယ်တိုင် ဘာလို့ သွားမယူတာလဲ။ စီနီယာရဲ့ အစွမ်းနဲ့ဆို အဲ့ဒါကို အသာလေး ဖိလိုက်လို့ ရတယ်လေ။ မဟုတ်ဘူးလား”

“နင်လာပြောင်နေတာလား” ချီယွဲ့က ဒေါသတကြီး နှာခေါင်းရှုံ့လျက် “တောင်စိမ်းကြယ်မှာ ကြယ်သခင်တစ်ယောက် ရှိတယ်ဆိုတာ နင်မသိဘူးလား။ သွေးအကျဉ်းထောင်ထဲ ဂျူနီယာ အချို့ကို ခိုးဝင်ခိုင်းတာ ဘာပြဿနာမှ မရှိပေမယ့် ဒီဘုရင်မ ကိုယ်တိုင်သွားရင် အဲ့ခွေးအိုကြီး ထိုင်ကြည့်နေမယ်ထင်လား။ သူ့ပိုင်နက်ထဲမှာ သွားတိုက်ခိုက်ရလောက်တဲ့အထိ ဒီဘုရင်မ မရူးမိုက်သေးဘူး”

“အန်၊ တောင်စိမ်းကြယ်မှာ ကြယ်သခင်ရှိတာလား” ရန်ကိုင် ကြောင်သွားခဲ့လေသည် “ဒီတော့ တောင်စိမ်းကြယ်မှာ တန်ခိုးရှင် ဘုရင် တတိယအဆင့် ပညာရှင်တစ်ယောက် ရှိတယ်ပေါ့”

“အဲ့ခွေးအိုကြီး ဘယ်လိုလုပ်ပြီး အဲ့လောက်တောင် ကံကောင်းသွားလဲ ဘယ်သူသိမှာလဲ။ တန်ခိုးရှင်ဒုတိယ အဆင့်လေးနဲ့ ကြယ်အမြူတေကို သန့်စင်လိုက်တာ တကယ်ကြီး အောင်မြင်သွားတယ်လို့။ တကယ်ကို ကောင်းလိုက်တဲ့ကံ” ထိုတောင်စိမ်းကြယ်သခင်နှင့် သိနေသည့်အလား ထိုလူ အကြောင်း ပြောနေချိန် ချီယွဲ့၏ မျက်နှာကြီး ရှုံ့မဲ့သွားခဲ့သည်။

ရန်ကိုင် ခေါင်းညိတ်လိုက်သည်။ ထိုကဲ့သို့သာဆိုလျှင် ချီယွဲ့ ပြောသည့် အကြောင်းအရာ အကုန်လုံး ယုတ္တိရှိပေသည်။

တောင်စိမ်းကြယ်ကို ကြယ်သခင်တစ်ပါးမှ စောင့်ကြပ်နေသဖြင့် ချီယွဲ့ ထိုနေရာသို့ မသွားရဲသည်မှာ အထူးအဆန်း မဟုတ်တော့ပေ။ နှစ်ယောက်စလုံးသည် တန်ခိုးရှင်ဘုရင် ဒုတိယအဆင့်များ ဖြစ်ကြသဖြင့် အခြား တစ်နေရာတွင်သာ တိုက်ခိုက်လျှင် သရေကျလျှင် ကျမည်ဖြစ်သော်လည်း တောင်စိမ်းကြယ်တွင်တော့ ချီယွဲ့ အနေဖြင့် ထိုပညာရှင်၏ ပြိုင်ဘက် ဖြစ်နိုင်လိမ့်မည် မဟုတ်ချေ။

“ဒီဘုရင်မ တောင်းဆိုချင်တာ အဲ့ဒါပဲ။ နင်သဘောတူမလား၊ သဘောမတူဘူးလား ဆိုတာကိုတော့ သေချာ အချိန်ယူပြီး စဉ်းစား။ ဘာပဲဖြစ်ဖြစ်၊ သွေးအကျဉ်းထောင် စမ်းသပ်ပွဲ စဖို့က အချိန်နည်းနည်း ကျန်သေးတယ်။ ဒီဘုရင်မ စောင့်လို့ရတယ်” ချီယွဲ့သည် ရန်ကိုင် သဘောတူလိမ့်မည်ဟု ယုံကြည်ချက် အပြည့်ရှိနေသည့်အလား ရန်ကိုင်အား ပြုံးလျက် ကြည့်လိုက်၏။

“စဉ်းစားစရာ မလိုတော့ဘူး။ ဂျူနီယာ သဘောတူတယ်” ရန်ကိုင်သည် ချက်ချင်းလက်ငင်း သဘောတူလိုက်လေသည်။

“ဒါပေမယ့် ဂျူနီယာဘက်ကလည်း တောင်းဆိုစရာတစ်ခု ရှိတယ်” ရန်ကိုင်က ပြုံး၍ ပြန်ပြောလိုက်သည်။

“ဘာလဲ”

“ရွှေနဂါးအရင်းအမြစ်ရဲ့ စွမ်းအားကို ဘယ်လိုသုံးရမလဲ ဆိုတဲ့ နည်းလမ်း ပြောပြဖို့ပဲ”

“နင်ဒီဘုရင်မကို သုံးနှစ်သားကလေး မှတ်နေတာလား” ချီယွဲ့က အမောတကော အသက်ရှူလျက် “နင်အောင်မြင်မှပဲ ဆုကို ရမှာပေါ့။ ဘာလို့ ဒီဘုရင်မက နင့်ကို ကြိုပေးထားရမှာလဲ”

ရန်ကိုင်က ခေါင်းခါလျက် “စီနီယာ တွေးတာ မှားနေတယ်။ စီနီယာ ပြောတဲ့အတိုင်းဆို ဂျူနီယာအောင်မြင်မလား၊ မအောင်မြင်ဘူးလား ဆိုတာ ရွှေနဂါးအရင်းအမြစ် အဲ့မူလအဆီအနှစ် သလင်းကျောက်ကို ဖိနှိပ်နိုင်လား၊ မဖိနိုင်ဘူးလား ဆိုတဲ့ အပေါ်မှာ မူတည်နေတယ်။ ဒါပေမယ့် ဂျူနီယာက ရွှေနဂါးအရင်းအမြစ်ရဲ့ စွမ်းအားကို ဘယ်လိုသုံးရမလဲမှ မသိတာ။ မတော်တဆ တစ်ခုခု ဖြစ်သွားခဲ့ရင် အဲ့မူလအဆီအနှစ် သလင်းကျောက် သူ့ဘာသာ ဖောက်ခွဲသွားမှာကို ဂျူနီယာ မတားလိုက်နိုင်တာမျိုး ဖြစ်သွားနိုင်တယ်လေ။ အဲ့လိုမျိုးတော့ စီနီယာ မဖြစ်စေချင်ဘူးမလား”

ချီယွဲ့၏ မျက်နှာလှလှလေး ရှုံ့မဲ့သွားခဲ့ပြီး မျက်ခုံးကြောတို့ တွန့်ကွေးသွားခဲ့လေသည်။

ရန်ကိုင် အပိုစကားတွေ လျှောက်ပြောနေမှန်း သူမသိသည်။ သို့သော် ယခုကဲ့သို့ အခြေအနေမျိုးတွင် ထိုကဲ့သို့သော မတော်ဆလေးကိုပင် သေချာထည့်သွင်းစဉ်းစားရန် လိုအပ်ပေသည်။

“မတော်တဆတွေ မဖြစ်ရအောင်လို့ စီနီယာ အနေနဲ့ ဂျူနီယာကို အဲ့နည်းလမ်း ကြိုသင်ပေးထားသင့်တယ်လို့ ဂျူနီယာ ထင်တယ်။ စီနီယာ စိတ်ချထားလိုက်။ ဂျူနီယာက သဘောတူပြီးသွားပြီ ဆိုမှတော့ အဲ့မူလအဆီအနှစ် သလင်းကျောက်ကို ရအောင် အတတ်နိုင်ဆုံး ကြိုးစားပေးမှာ”

နင့်စကားကို ယုံရအောင် ငါ့ကို အရူးမှတ်နေလား ချီယွဲ့က အေးစက်စက် အမူအရာဖြင့် နှာခေါင်းရှုံ့လိုက်သည်။

ခဏမျှ တုန့်ဆိုင်းနေပြီးနောက်တွင် ချီယွဲ့က ရုတ်တရက် ပြုံးလျက် “ဒီဘုရင်မက နင့်ကို အရင်ကြိုမပေးထားလို့ မရတာတော့ မဟုတ်ဘူး။ ဒီဘုရင်မ ကိုယ်တိုင်တောင် နင့်ကို သေချာညွှန်ကြား ပြသပေးလို့ ရသေးတယ်”

“အို” ရန်ကိုင် မျက်ခုံးပင့်လိုက်ပြီး “စီနီယာရဲ့ ကြင်နာမှုကို ဒီဂျူနီယာ ငြင်းလိုက်ရင် မယဉ်ကျေးရာ ကျသွားမှာပေါ့”

“ဒါပေမယ့် ဒီဘုရင်မ နင့်ကို ပထမတစ်ပိုင်းပဲ သင်ပေးနိုင်မယ်။ ဒုတိယတစ်ပိုင်းကိုတော့ နင်အောင်မြင်မှပဲ ပေးမယ်”

“သဘောတူတယ်” ရန်ကိုင် ချက်ချင်း သဘောတူလိုက်သည်။ သို့သော် ပြောပြီးနောက်တွင် တစ်ခုခုကို တွေးမိသွားဟန်ရကာ ထပ်ပေါင်းပြောလိုက်လေသည် “အင်း၊ စီနီယာ ဂျူနီယာကို ပထမတစ်ပိုင်း သင်ပေးပြီး ကျန်တဲ့တစ်ပိုင်းကို ယုရှုန်းဆီ ပေးထားလိုက်လို့ မရဘူးလား။ အဲ့ဒါဆို မူလအဆီအနှစ် သလင်းကျောက်ကို ရတာနဲ့ ယုရှုန်းဆီမှာ သွားပြီး လဲလိုက်လို့ ရတယ်”

ချီယွဲ့ မျက်မှောင်ကြုတ်သွားပြီး ရန်ကိုင်ကာ သင်္ကာမကင်း အမူအရာဖြင့် စိုက်ကြည့်လိုက်သည်။

“ဟဲဟဲ၊ အဲ့လို ကျင့်စဉ်ကောင်းတစ်ခုကို ဂျူနီယာ အရမ်း လိုချင်နေတာ သဘာဝပဲလေ” ရန်ကိုင်က ပြုံးလျက် ပြန်ပြောလိုက်သည်။

ချီယွဲ့သည် ရန်ကိုင်အား အချိန်အတော်ကြာအောင် စိုက်ကြည့်နေပြီးနောက် ခေါင်းညိတ်၍ “ကောင်းပြီ။ ဒီဘုရင်မ သဘောတူတယ်။ ဒါပေမယ့် ဒီဘုရင်မကို လာပြီး လှည့်စားမယ်လို့တော့ မတွေးလိုက်နဲ့နော်။ မဟုတ်ရင် ချင်းလော့ရဲ့ ခံစားချက်ကို နည်းနည်းလေးမှ ထွက်မတွက်ဘူးဆိုပြီး ဒီဘုရင်မကို အပြစ်မတင်နဲ့”

“မလှည့်စားပါဘူး။ ဘာလို့ လှည့်စားရမှာလဲ။ ဂျူနီယာက ဖြောင့်မတ်တဲ့ လူတစ်ယောက်ပဲဟာကို” ရန်ကိုင်သည် သူ့ရင်ဘတ်ကို ပုတ်၍ အာမခံလိုက်လေသည်။

ဆွေးနွေးညှိနှိုင်းပြီးသွားသော် ချီယွဲ့သည် ရန်ကိုင်အား ကျင့်ကြံရေး အခန်းတစ်ခန်းဆီသို့ ခေါ်သွားပြီး ရွှေနဂါးအရင်းအမြစ်၏ စွမ်းအားကို ထုတ်ဖော်စေနိုင်သည့် ပညာရပ်၏ ပထမတစ်ပိုင်းကို သင်ပေးလိုက်လေသည်။

မူလအဆီအနှစ် သလင်းကျောက်ကို ရန်ကိုင် အောင်မြင်စွာ ရယူနိုင်စေရန်အတွက် ချီယွဲ့သည့် ပထမတစ်ပိုင်းနှင့် ပက်သက်၍ သူမ သိထားသမျှ အကြောင်းအရာ မှန်သမျှကို သင်ကြားပေးခဲ့၏။

ဤမွန်းစတား အသွင်ပြောင်းလဲခြင်း ပညာရပ်ရဲ သွေးမျိုးဆက်ထဲ ကိန်းအောင်နေသော စွမ်းအားကို ထုတ်ဖော်စေနိုင်သည့် ပညာရပ် တစ်မျိုး ဖြစ်သော်လည်ငြား ရှေးနတ်ဘုရားဝိဥာဉ်အဆင့်ရှိ အရင်းအမြစ်များပေါ်အတွင်လည်း အလုပ် ဖြစ်ပေသည်။

ရွှေနဂါးအရင်းအမြစ်ကို စရသည့်အချိန်မှစ၍ ရန်ကိုင်သည် ရွှေနဂါး၏ စွမ်းအားကို အပြည့်အဝ တစ်ခါမှ မထုတ်ဖော်နိုင်ခဲ့ပေ။ သို့သော်လည်း ချီယွဲ့၏ အကူအညီဖြင့် ရန်ကိုင်သည် ရွှေနဂါး၏ မယုံကြည်နိုင်စရာကောင်းလှသည့် စွမ်းအားကို ထုတ်ဖော်နိုင်လေပြီ။

ထိုပညာရပ်ကို လေ့ကျင့်လိုက်ခြင်းသည် သူ့ကျင့်ကြံခြင်းအား တိုးတက်လာစေခြငး မရှိသော်လည်း သူသာ ရွှေနဂါးအရင်းအမြစ်၏ စွမ်းအားကို အသုံးပြုနိုင်မည်ဆိုလျှင် ရန်ကိုင် ထုတ်ဖော်နိုင်သည့် စွမ်းအားသည် အကြီးအကျယ် တိုးတက်လာပေလိမ့်မည်။

အချိန်သည် တဖြည်းဖြည်း ကုန်ဆုံးနေခဲ့ရာ မကြာမီ လဝက် ပြည့်သွားခဲ့လေသည်။

ရန်ကိုင်သည် ချီယွဲ့၏ နန်းတော်ထဲမှ စိတ်လှုပ်ရှားနေသည့် အမူအရာဖြင့် လမ်းလျှောက် ထွက်လာခဲ့သည်။

ယခု သူရထားသည့် ရွှေနဂါးအရင်းအမြစ် မည်မျှ အဖိုးတန်ကြောင်း ရန်ကိုင် နားလည်သွားခဲ့လေပြီ။ သို့သော်ငြား ချီယွဲ့သည် သူ့အား မွန်းစတား အသွင်ပြောင်းလဲခြင်း ပညာရပ်၏ ပထမ တစ်ပိုင်းကိုသာ သင်ပေးသွားခဲ့သည့်အတွက် ရန်ကိုင် ထုတ်ဖော်နိုင်သည့် စွမ်းအားသည် အနည်းငယ် လိုအပ်နေသေးသည်ဟု ပြော၍ရသည်။

“ဒီကောင်စုတ်လေး ဘာတွေ ကြံနေတာလဲ” ချီယွဲ့သည် သူမ၏ နန်းတော်ထဲတွင် ထိုင်နေရင်း ရေရွတ်လိုက်သည်။ ဒုတိယ အပိုင်းကို ယုရှုန်းဆီ ပေးထားရန် ရန်ကိုင် ပြောစဉ်က သူမစိတ်ထဲ ထိုကိစ္စနှင့် ပက်သက်၍ တစ်ခုခု မှားယွင်းနေသည်ဟု ခံစားရ၏။ သို့သော်လည်း ရန်ကိုင် ဘာကြံနေမှန်း သူမ နားမလည်နိုင်အောင် ဖြစ်နေခဲ့သည်။

ရန်ကိုင်သည် မွန်းစတားဧကရာဇ်ကြယ်သို့ ပြန်မလာတော့ရန် စဉ်းစားနေသလော။ ထိုသို့ ဖြစ်နိုင်လောက်ပေသည်။

သို့သော်လည်း သူ့စီနီယာမမလေး ဤနေရာတွင် ရှိနေလေရာ ဘာကြောင့် ဤနေရာသို့ ပြန်မလာရမည်နည်း။ သူ့ပုံစံကို ကြည့်ရသလောက် သူချစ်ရသည့် လူများ၏ လုံခြုံရေးကို ဂရုမစိုက်သည့် လူတစ်ယောက်နှင့် မတူချေ။ မဟုတ်လျှင် ချင်းလော့ သူ့အား စွန့်ပစ်သွားခဲ့သည်မှာ ကြာလောက်ပေပြီ။

ထို့ကြောင့် ရန်ကိုင် ဘာကြံနေလဲ ချီယွဲ့ မစဉ်းစားတတ်ခြင်း ဖြစ်သည်။

ခဏကြာအောင် ထပ်ပြီး စဉ်းစားနေသည့်တိုင် ရန်ကိုင်၏ အကြံအစဉ်ကို မစဉ်းစားနိုင်သဖြင့် စောင့်ကြည့်ရန်သာ ဆုံးဖြတ်လိုက်လေတော့သည်။

ရှနင်းချန်သာ သူမလက်ထဲ ရှိနေသရွေ့ ရန်ကိုင် ပြဿနာ ရှာမည်ကို ကြောက်နေစရာ မလိုချေ။

ထိုအချိန်အတောအတွင်း၌၊ ရှန်ချင်းလော့နှင့် ရှနင်းချန်သည် ရှနင်းချန် ဆေးဖော်စပ်သည့် အခန်းထဲတွင် စိုးရိမ်တကြီး စောင့်ဆိုင်းနေကြလေသည်။

ရန်ကိုင်နှင့် ရွှယ့်လျန်တို့ တိုက်ခိုက်ပြီး ရန်ကိုင်ကို ချီယွဲ့မှာ ခေါ်သွားသည်မှာ လဝက် ရှိနေခဲ့လေပြီ။ သို့သော် ယနေ့ထိတိုင် ပြန်ရောက်မလာသေးသဖြင့် မိန်းကလေး နှစ်ဦးစလုံး အလွန်ကိုမှ စိုးရိမ်ပူပန်မိနေခဲ့ကြသည်။

ရှန်ချင်းလော့သည် ချီယွဲ့၏ နန်းတော်ဆီသွားပြီး အကြိမ်များစွာ သွားတွေ့သော်လည်း သူမ၏ မွေးစားအမေနှင့် တွေ့ခွင့်မရခဲ့ပေ။

“နင်းချန်၊ စိတ်မပူနဲ့။ မွေးစားအမေ သူ့ကို ဘာမှလုပ်မှာ မဟုတ်ဘူး” ရှန်ချင်းလော့သည် သူမကိုယ်တိုင် မီးခဲဖင်ခုထိုင်နေရသလို စိတ်ဂနာမငြိမ် ဖြစ်နေသော်လည်း ရှနင်းချန်ကိုမူ နှစ်သိမ့်ပေးလိုက်ပေသေးသည်။

“အစ်မချင်းလော့၊ လနီမျိုးနွယ်စုခေါင်းဆောင် ဂျူနီယာ မောင်လေးကို ဘာမှ မလုပ်တာ သေချာပါတယ်နော်” ရှနင်းချန်သည် အတည်ပြုလိုသည့် အကြည့်မျိုးဖြင့် ကြည့်လျက် ရှန်ချင်းလော့အား မေးလိုက်လေသည်။

ထိုရိုးသားအပြစ်ကင်းစင်သည့် မျက်ဝန်းလေးကို ကြည့်ရင်း ပြန်ဖြေဖို့ရာ သူမစိတ်ထဲ အတော်လေးကိုမှ ဖိအားများနေသည်။ ရန်ကိုင် ဘာမှမဖြစ်ပါဟု အာမမခံရဲသော်လည်း ရှနင်းချန် စိတ်သက်သာသွားစေရန် ယုံကြည်ချက်အပြည့်ဖြင့် အလျင်အမြန် ခေါင်းညိတ်ပြလိုက်ပေသေးသည်။

ထိုစဉ် အပြင်ဘက်မှ ခြေသံများ ထွက်ပေါ်လာသဖြင့် အမျိုးသမီး နှစ်ဦးစလုံး ကောင်းကင်စိတ်အာရုံကို ဖြန့်ကျက်ကြည့်လိုက်ရာ နှစ်ဦးစလုံး ဝမ်းသာပျော်ရွှင်သွားခဲ့ပြီး ချက်ချင်း ထိုင်ရာမှထ၍ တံခါးပေါက်ဆီသို့ ပြေးထွက်သွားလေသည်။

မကြာမီ ရန်ကိုင် တံခါးပေါက်ကိုဖွင့်၍ အထဲသို့ ဝင်လာလေသည်။

“နင်တို့ ငါ့ကို စောင့်နေတာလား” ရန်ကိုင်က အမျိုးသမီးနှစ်ဦးကို ကြည့်၍ မေးလိုက်ပြီးနောက် စားပွဲခုံဆီသို့ လျှောက်သွားလိုက်ပြီး လက်ဖက်ရည်ကြမ်းတစ်ခွက် ငှဲ့လိုက်လေသည်။

“နင်အဆင်ပြေလား” ရှန်ချင်းလော့က စိုးရိမ်တကြီး မေးလိုက်သည်။

“ငါလား၊ ပြေတာပေါ့” ရန်ကိုင်က ရယ်သွမ်းသွေးလျက် “စိတ်မပူနဲ့။ စီနီယာချီယွဲ့ ငါ့ကို ဘာမှမလုပ်ဘူး။ ငါနဲ့ သဘောတူညီချက် တစ်ခုပဲ လုပ်ခဲ့တာ”

“သဘောတူညီချက်” ရှန်ချင်းလော့ မျက်မှောင်ကြုတ်သွားပြီး “ဘယ်လို သဘောတူညီချက်မျိုးလဲ”

“အင်၊ အသေးစိတ်ရှင်းပြဖို့တော့ နည်းနည်း ခက်လိမ့်မယ်။ ဒါပေမယ့် တိုတိုပြောရရင်တော့ ငါလည်း နင်တို့နဲ့အတူ တောင်စိမ်းကြယ်ဆီ လိုက်ရလိမ့်မယ်”

“နင်လည်း တောင်စိမ်းကြယ်ကို သွားမှာလား။ ဒီတော့ သွေးအကျဉ်းထောင်စမ်းသပ်ပွဲမှာ နင်ဝင်ပြိုင်မှာပေါ့” ရှန်ချင်းလော့ သူမ၏ ပါးစပ်လေးကို အုပ်လိုက်သည်။

“ဟုတ်တယ်”

“ဒါပေမယ့် နင်က တန်ခိုးရှင်ဒုတိယအဆင့်ပဲ ရှိသေးတာလေ” ရှန်ချင်းလော့က စိုးရိမ်နေသည့် အမူအရာဖြင့် “အဲ့ကိုသွားတဲ့ လူတိုင်းက တန်ခိုးရှင်တတိယအဆင့်တွေချည်းပဲ”

“ပြဿနာမရှိဘူး” ရကနန်ကိုင်က ရယ်သွမ်းသွေးလျက် “အဲ့ထဲ ဝင်ဖို့ တန်ခိုးရှင်တတိယအဆင့် ဖြစ်နေရမယ်လို့ ဘယ်သူမှ မသတ်မှတ်ထားဘူး။ ဘာပဲဖြစ်ဖြစ်၊ ငါချီယွဲ့ကို ကတိ ပေးပြီးသွားပြီဆိုတော့ အခုမှ ပြန်ရုတ်သိမ်းလို့ မရတော့ဘူး”

“ဟုတ်တယ်ဆိုပေမယ့်…”

“စိတ်ပူမနေနဲ့” ရန်ကိုင်က ခေါင်းခါရမ်းလျက် “ဒါပေမယ့် ငါနားမလည်တာ တစ်ချက်ရှိတယ်။ ငါတွက်ကြည့်သလောက် သွေးအကျဉ်းထောင်စမ်းသပ်ပွဲက နောက်ထပ် တစ်လ၊ နှစ်လလောက် နေရင် စတော့မှာ။ ငါတို့အဲ့ကို ဘယ်လို အချိန်မှီရောက်အောင် သွားကြမှာလဲ”

ရှန်ချင်းလော့က ပြုံးလျက် “ဒီအတိုင်း သွားမှာမှ မဟုတ်တာ။ ဟင်းလင်ပြင်အစီအရင် သုံးပြီး သွားမှာလေ။ အဲ့ဟင်းလင်းပြင် အစီအရင်နဲ့ဆို သွေးအကျဉ်းထောင်ဆီ တန်းရောက်တယ်။ သွေးအကျဉ်းထောင် ပွင့်လာမယ့်အချိန်ကို စောင့်နေဖို့ပဲ လိုတာ”

ရန်ကိုင်၏ မျက်ဝန်းအစုံ တောက်ပသွားခဲ့ပြီး “ဒီမှာ ကြယ်ချင်း ဆက်သွယ်ထားတဲ့ ဟင်းလင်းပြင်အစီအရင် ရှိတယ်ပေါ့”

“ဟုတ်တယ်” ရှန်ချင်းလော့က ခေါင်းညိတ်၍ “ပြောရရင်တော့ အဲ့အစီအရင်က အရင်ခေတ်က ကျန်ခဲ့တဲ့ အစီအရင်တစ်ခုပဲ။ သွေးအကျဉ်းထောင် စမ်းသပ်ပွဲက အရမ်းနာမည်ကျော်တော့ ငါတို့ မွန်းစတားဧကရာဇ်ကြယ်က ပါရမီရှင်တွေကလည်း အဲ့စမ်းသပ်ပွဲ သွားပြီး ဝင်ပြိုင်ချင်ကြတယ်။ ဒါပေမယ့် ဒီအတိုင်း သွားလို့တော့ အဆင်မပြေဘူးလေ။ ဒါကြောင့် အရင် လနီမျိုးနွယ်စု ခေါင်းဆောင်က ပန်းပဲပညာရှင်တွေ၊ အစီအရင် ပညာရှင်တွေ ခေါ်ပြီး ကြယ်ချင်း သွားလာနိုင်တဲ့ ဟင်းလင်းပြင် အစီအရင် တစ်ခု လွန်ခဲ့တဲ့ နှစ်နှစ်ထောင်လောက်က တည်ဆောက်ခဲ့တာ။ သွေးအကျဉ်းထောင်ဖွင့်တဲ့ အချိန်တိုင်း ငါတို့ မွန်းစတားဧကရာဇ်ကြယ်က တက်သစ်စ လက်ရွေးစင် အဖွဲ့တစ်ဖွဲ့ကို တိတ်တဆိတ် စေလွှတ်လေ့ရှိတယ်”

“လတ်စသတ်တော့ အဲ့လိုကိုး” ရန်ကိုင် ရုတ်တရက် နားလည်သွားခဲ့သည် “အချိန်ဒီလောက် ကပ်နေတာတောင် စီနီယာချီယွဲ့ ပျာယာခတ်မနေတာ ဒါကြောင့်ကိုး”

“ဟုတ်တယ်။ မဟုတ်ရင် မီထျန်းနဲ့ အခြားသခင်လေးတွေ ဘာလို့ ဒီကိုလာတယ်လို့ နင်ထင်လဲ။ သူတို့လည်း သွေးအကျဉ်းထောင် စမ်းသပ်ပွဲမှာ ဝင်ပြိုင်ဖို့ ရောက်လာခဲ့တာ” ရှန်ချင်းလော့က ပြုံး၍ ရှင်းပြလိုက်လေသည်။

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၈၈)

ရှန်ချင်းလော့ ပြောသည်ကို ကြားပြီးနောက် အခြားပိုင်နက် နယ်ပယ်များမှ မွန်းစတားမျိုးနွယ် ပညာရှင်များ လနီနန်းတော်ဆီသို့ ဘာကြောင့် လာကြမှန်း ရန်ကိုင် နားလည်သွားခဲ့လေပြီ။ လနီပိုင်နက်နယ်ပယ်ထဲတွင် ရှိနေသော ဟင်းလင်းပြင် အစီအရင်ကို အသုံးပြုချင်နေသည့် အတွက်ကြောင့် ဖြစ်သည်ကိုး။

“ဒါနဲ့၊ ရှန်ချင်းလော့၊ သွေးအကျဉ်းထောင်စမ်းသပ်ပွဲက လွယ်မှာ မဟုတ်ဘူး။ ဒါကို ယူထားလိုက်” ရန်ကိုင်သည် ရုတ်တရက် တစ်ခုခု စဉ်းစားမိလိုက်သည့်နှယ် သိုလှောင်လက်စွပ်ထဲမှ ပစ္စည်း တစ်ခုခုကို ထုတ်ယူလိုက်ပြီး ရှန်ချင်းလော့ကို ပေးလိုက်လေသည် “အချိန်အများကြီး မရှိတော့ပေမယ့် သန့်စင်ဖို့ လုပ်ကြည့်လိုက်။ ဒါနဲ့ဆို နင့်အတွက် အတော်လေး အဆင်ပြေသွားပြီ”

“ဒါက…” ရှန်ချင်းလော့သည် ရန်ကိုင်သူမကို ပေးလာသည့် ပစ္စည်းအား မမှိတ်မသုံ စိုက်ကြည့်နေခဲ့သည်။ မကြာမီ သူမ၏ မျက်ဝန်းများ တဖျက်ဖျက် တောက်ပလာခဲ့ပြီး တိုးတိုးလေး ပြောလိုက်လေသည် “တန်ခိုးရှင်ဘုရင်အဆင့် မှော်ရတနာလား”

ဤမှော်ရတနာမှ ဖြာထွက်နေသော အားကောင်းလှသည့် စွမ်းအင်လှိုင်းများကို ချက်ချင်း သတိပြုမိလိုက်သည်။ ထိုကဲ့သို့သော စွမ်းအင်လှိုင်းမျိုးသည် တန်ခိုးရှင်ဘုရင်အဆင့် မှော်ရတနာများတွင်သာ ရှိသည့် စွမ်းအင်လှိုင်းမျိုး ဖြစ်သည်။

“အင်း” ရန်ကိုင်က ယဲ့ယဲ့လေးပြုံးလျက် “ဒါကို ငှက်မျိုးခုနှစ်ကောင် မိုးကြိုးမီးတောက်ကြာပွတ်လို့ ခေါ်တယ်။ နင်နဲ့ လိုက်လောက်မယ်လို့ ငါထင်တယ်”

ရှန်ချင်းလော့သည် နှုတ်ခမ်း နားရွက်တက်ချိတ်လုမတတ် ပြုံးဖြီးသွားခဲ့လေသည်။ ကြာပွတ်အား ချက်ချင်း ယူလိုက်ပြီး သူတော်စင်ချီ ထည့်သွင်းလိုက်ရာ ကြာပွတ်ဆီမှ တစီစီ မြည်သံတို့ ထွက်ပေါ်လာခဲ့လေသည်။ ထိုတဝီဝီ မြည်သံသည် သူမ၏ သူတော်စင်ချီနှင့် ပဲ့တင်ထပ်နေသည့်နှယ်…

“ငါနဲ့ တကယ် လိုက်တဲ့ပုံပဲ…” ရှန်ချင်းလော့ အတွေးနက်သွားပြီး “အရင်ပိုင်ရှင်က လူသားတစ်ယောက်မလား။ ဒီကြာပွတ်ပေါ်မှာ ကျန်ရစ်ခဲ့တဲ့ ဝိဥာဉ်အမှတ်အသားက အဲ့ဒါနဲ့ သိပ်ပြီး သဟဇာတ မဖြစ်ဘူး ဖြစ်နေတယ်… ကြည့်ရတာ ဒီမှော်ရတနာရဲ့ စွမ်းအား အကုန်ကို ထုတ်သုံးချင်တယ်ဆိုရင် မွန်းစတားချီကို သုံးမှ ရမယ်နဲ့တူတယ်”

“တကယ်ကြီးလား” ရန်ကိုင် ကြောင်သွားခဲ့သည်။

ထိုအကြောင်းကို သူမသိခဲ့ချေ။

ခုနှစ်မျိုးငှက်မိုးကြိုးကြာပွတ်သည် မိုးကြိုးမုန်တိုင်းဂိုဏ်း၏ မှော်ရတနာတစ်ခု ဖြစ်သည်။ ကမ္ဘာငယ်လေးထဲတွင် ဖန်ဖုန်းကို သတ်ပြီးနောက် ထိုမှော်ရတနာကိုပါ သိမ်းယူလာခဲ့ခြင်း ဖြစ်သည်။ သို့သော်လည်း မှော်ရတနာသည် ကြာပွတ်ဖြစ်နေသည့်အတွက် သိပ်စိတ်မဝင်စားသည့် အတွက်ကြောင့် သေချာ မစစ်ဆေးခဲ့ချေ။ ရှန်ချင်းလော့နှင့် လိုက်မည်ဟု ထင်သည့်အတွက်ကြောင့်သာ ထုတ်ပေးလိုက်ခြင်း ဖြစ်သည်။

ကြာပွတ်ထဲသို့ မွန်းစတားချီကို ထည့်သွင်းပြီးနောက်တွင် ရှန်ချင်းလော့သည် ကြာပွတ်အား စတင် ဝှေ့ရမ်းကြည့်လေသည်။ သူမ ကြာပွတ်ဝှေ့ရမ်းနေသည့် ပုံစံမှာ အကမယ်လေးတစ်ပါး ကိုယ်ခန္ဓာကိုယ်ကို ယိမ်းနွှဲ့လျက် ကကြိုးဆင်နေသည့်နှယ် အလွန်ကိုမှ လှပလှသည်။

“ဒါကို ခုနှစ်မျိုးငှက်မိုးကြိုးကြာပွတ်လို့ ခေါ်တယ်မလား” ရှန်ချင်းလော့သည် ကြာပွတ်ား ပျော်ရွှင်စွာ ဝှေ့ရမ်းနေရင်းမှ မေးကြည့်လိုက်သည်။

“ဟုတ်တယ်”

“ငါသိပြီ။ ဒါကို အရင်က မွန်းစတားမျိုးနွယ်တွေ ပိုင်ခဲ့တာ ဖြစ်ရမယ်။ နောက်မှ လူသားတွေလက်ထဲ ရောက်သွားခဲ့တာ”

“နင်ပြောမှလည်း ငါလည်း စဉ်းစားကြည့်မိတယ်။ အဲ့လို ဖြစ်လောက်မယ်” ရန်ကိုင်က မျက်မှောင်ကြုတ်လျက် “ဒီကြာပွတ်ရဲ့ အရင်ပိုင်ရှင်နဲ့ တိုက်ခိုက်တုန်းက ကြာပွတ် အစွမ်းက ဒီလောက် မရှိဘူး။ အခု နင့်လက်ထဲ ရောက်လာပြီ ဆိုတော့ ကြာပွတ်လည်း သူ့အစွမ်းအစကို ထုတ်ပြနိုင်ပြီပေါ့”

“သေချာတာပေါ့၊ ကျေးဇူးပဲ ရန်ကိုင်” ရှန်ချင်းလော့သည် ရန်ကိုင်အား ရှက်သွေးဖြာနေသည့် အမူအရာဖြင့် ကြည့်ကာ ပြောလိုက်သည်။

သူမဘဝတွင် တန်ခိုးရှင်ဘုရင်အဆင့် မှော်ရတနာကို တစ်ခါမှ မပိုင်ဆိုင်ဖူးချေ။ တန်ခိုးရှင်ဘုရင်အဆင့် မှော်ရတနာကို ပိုင်ဆိုင်ထားသူ အားလုံးသည် မျိုးနွယ်စုခေါင်းဆောင်များသာ ဖြစ်ကြသည်။

တန်ခိုးရှင်ဘုရင်အဆင့် မှော်ရတနာ မည်မျှ အဖိုးတန်ကြောင်း သူမ ကောင်းကောင်း သိသည်။ သို့သော်လည်း ထိုကဲ့သို့သော မှော်ရတနာ တစ်ခုကို ရန်ကိုင်သည် သူမအား မျက်တောင် မခတ်ဘဲ ပေးလာခဲ့သည်။ ရှန်ချင်းလော့ မပျော်ဘဲ ဘယ်နေမည်နည်း။

“ငါထွက်သွားပေးရမလား” ရှနင်းချန်က အားမရှိသည့် လေသံဖြင့် မေးလာခဲ့သည်။

ရှန်ချင်းလော့ အံ့အားသင့်သွားခဲ့သော်လည်း ချက်ချင်း တခစ်ခစ် ရယ်မောလိုက်လေသည်။ ထို့နောက် ရှနင်းချန်ဆီ တစ်လှမ်းချင်း တစ်လှမ်းချင်း လျှောက်သွားလိုက်ပြီး သူမရှေ့သို့ ရောက်သည်နှယ့် သူမ၏ လက်သွယ်သွယ်လေးဖြင့် ရှနင်းချန်၏ မေးလေးကို ကိုင်ကာ အပေါ်သို့ မော့လိုက်သည်။

ထို့နောက် ခါးကိုကိုင်းလျက် သူမ၏ နှုတ်ခမ်းအစုံဖြင့် ရှနင်းချန်၏ နှုတ်ခမ်းကို ဖိနမ်းချလိုက်လေသည်။

“အစ်မချင်းလော့၊ နင်ဘာလုပ်နေတာလဲ…”

ရှနင်းချန် စကားဆုံးအောင် မပြောနိုင်သေးခင်မှာပင် ရှန်ချင်းလော့၏ သူမ၏ နှုတ်ခမ်းဖြင့် ရှနင်းချန်၏ နှုတ်ခမ်းကို ပိတ်ချလိုက်သည်။ နှုတ်ခမ်းချင်း ဆုံသွားချိန် သူမ၏ ပါးစပ်ထဲသို့ တစ်ခုခု တိုးဝင်လာသည်ကို ရှနင်းချန် ခံစားမိလိုက်သည်။

ချက်ချင်း မျက်လုံးပြူးသွားပြီး ဘာလုပ်ရ ဘာကိုင်ရမှန်းမသိ ဖြစ်သွားလေသည်။

ရန်ကိုင်သည်လည်း ထိုမြင်ကွင်းကိုကြည့်ရင်း မှင်သက်နေခဲ့သည်။

ခဏအကြာမှ ရှန်ချင်းလော့သည် ရှနင်းချန်ဆီ ပြန်ခွာလိုက်ပြီး သူမ၏ အပေါ်နှုတ်ခမ်းကို လျှာဖြင့် သပ်လိုက်သည်။ အောက်နှုတ်ခမ်းကို ကိုင်၍ ရန်ကိုင်ဘက်သို့ လှည့်ကြည့်လာ၏။ ထို့နောက် တခစ်ခစ် ရယ်မောလျက် အခန်းထဲမှ တစ်လှမ်းချင်း လျှောက်ကာ ထွက်သွားခဲ့လေသည်။

ရန်ကိုင်နှင့် ရှနင်းချန်တို့ နှစ်ဦးစလုံး၏ ရင်အစုံ ဖားဖိုကြီးနှယ် နိမ့်ချည်မြင့်ချည် ဖြစ်ကျန်ရစ်ခဲ့ကြလေသည်။

“ချင်းလော့ လူမှားပြီး ကျေးဇူးတင်မိသွားတာလား” ရန်ကိုင်သည် တံခါးပေါက်ဆီသို့ ကြည့်ရင်း တံတွေးကို တစ်လုတ်ပြီးတစ်လုတ် မြိုချနေခဲ့သည်။ ရှန်ချင်းလော့ ထွက်မသွားခင် သူ့အား ကြည့်သွားသည့် အကြည့်သည် သူ့ဝိဥာဉ်ကိုပင် သိမ်းကျုံး ဆွဲယူသွားတော့မတတ် ဆွဲဆောင်မှုရှိလွန်းလှသည်။

“အင်း…” ရှနင်းချန် ချက်ချင်း ခေါင်းငုံသွားခဲ့သည်။ ဒီတစ်သက် နောက်မည်သူ့ကိုမှ အကြည့်ချင်း မဆိုင်ရဲတော့သည့်အလား ခေါင်းကိုသာ ငုံ့နေခဲ့သည်။ သူမ၏ နားသီးလေးများဆိုလျှင်လည်း မီးဖိုထဲ ထည့်ကင်ထားခံရသည့်အလား ရဲရဲတောက်နီမြန်းနေခဲ့၏။

ရှနင်းချန်ကို ကြည့်လိုက်သည့်အခိုက် ရန်ကိုင်စိတ် ဂနာမငြိမ် ဖြစ်လာခဲ့သည်။ ဘာကြောင့်မှန်းတော့ မသိသော်ငြား ရှန်ချင်းလော့ လူမှားကျေးဇူးတင်မိခဲ့သော်လည်း၊ ထိုနှစ်ယောက် နမ်းရှိုက်နေသည်ကို ကြည့်ရင်း သူ့သွေးများ ဆူပွက်လာရပြီး ရာဂစိတ် ငယ်ထိပ်သို့ ဆောင့်တက်လာခဲ့ရသည်။

ချက်ချင်း မတ်တပ်ရပ်လိုက်ပြီး ရှနင်းချန်၏ ဘေးဘက်ဆီသို့ လမ်းလျှောက်သွားကာ သူမအား လှမ်းကိုင်လိုက်ည်။

ရှနင်းချန်၏ ခန္ဓာကိုယ်လေး မီးမြိုက်ခံထားရသည့်နှယ် ပူလောင်နေသည်ကို ရန်ကိုင် ခံစားမိလိုက်သည်။
…
မွန်းစတားဧကရာဇ်ကြယ်မှ သွေးအကျဉ်းထောင်စမ်းသပ်ပွဲသို့ သွားရန် ရည်ရွယ်ထားသည့် လူအရေအတွက်မှာ စုစုပေါင်း ခြောက်ယောက်သာ ဖြစ်သည်။

နှစ်ယောက်သည် ရှန်ချင်းလော့နှင့် ယုရှုန်းတို့ ဖြစ်ကြသည်။

သူတို့နှစ်ဦးအပြင် မီထျန်းနှင့် ရွှယ့်လျန်တို့ နှစ်ဦးလည်း ပါကြ၏။ သူတို့ နှစ်ဦးအပြင် တန်ခိုးရှင်တတိယအဆင့်သို့ ရောက်နေသော အခြား မွန်းစတားမျိုးနွယ် နှစ်ဦးလည်း ထပ်ရှိသေးသည်။

သို့သော်လည်း ယခုမူ ဘဟဲ ပြန်လာပြီဖြစ်သည့်အတွက် သူ့ကိုလည်း သွေးအကျဉ်းထောင်စမ်းသပ်ပွဲသို့ ပိုရပေမည်။

ဘဟဲသည် ချီယွဲ့ဆီသို့ ပြန်လာပြီး သူ့အမှားကို ဝန်ခံခဲ့သည်။ တစ်ချိန်တည်းတွင် သွေးအကျဉ်းထောင်စမ်းသပ်ပွဲ၌ ဝင်ရောက် ယှဉ်ပြိုင်နိုင်မည့် အခွင့်အရေးကိုလည်း လိုချင်နေမိသည်။ သို့မှသာ တန်ခိုးရှင်ဘုရင်အဆင့်သို့ ရောက်နိုင်ချေ ရှိပေလိမ့်မည်။

ရန်ကိုင်အပါအဝင် မွန်းစတားဧကရာဇ်ကြယ်မှ သွေးအကျဉ်းထောင် စမ်းသပ်ပွဲသို့ သွားမည့်လူ စုစုပေါင်း ရှစ်ယောက် ရှိပေသည်။ ထို့ကြောင့် ပုံမှန် သတ်မှတ်ထားသည့် လူအရေအတွက်ထက် နှစ်ယောက် ပိုများလာသည်ဟု ပြော၍ရသည်။

အချို့သည် အသက်ရှင်လျက် ပြန်လာနိုင်ကြသော်ငြား အချို့မှာမူ ထိုကဲ့သို့ မဟုတ်ကြ။ သွေးအကျဉ်းထောင်ထဲသို့ ဝင်သွားပြီးသည်နှင့် မည်သူမှ သူတို့အသက်အပေါ် အာမခံချက် မရှိတော့ချေ။

သွေးအကျဉ်းထောင်စမ်းသပ်ပွဲအတွင်းမှ အသေအပျောက်များသည် သွေးအကျဉ်းထောင်ထဲတွင် ရှိနေသော နယ်ပယ်များ၏ စွမ်းအားကြောင့် ဖြစ်သလို အမျိုးမျိုးသော ကျင့်ကြံရေးကြယ်များမှ ရောက်လာသည့် ယှဉ်ပြိုင်သူများကြောင့်လည်း ဖြစ်ပေသည်။

ပညာရှင်အများစုသည် အချင်းချင်း ပြိုင်ဆိုင်ကြရင်း သေဆုံးသွားကြခြင်း ဖြစ်သည်။

သို့သော်လည်း မည်မျှပင် အန္တရာယ်များနေစေကာမူ။ သွေးအကျဉ်းထောင် စမ်းသပ်ပွဲသို့ လူပေါင်း မရေမတွက်နိုင်အောင် လာရောက်နေကြဆဲ။ ပုံမှန်အားဖြင့် တန်ခိုးရှင်ဘုရင်အဆင့်သို့ ချိုးဖျက်နိုင်ဖို့ရာ အလွန်ကိုမှ ခက်ခဲလှလေရာ ဤကဲ့သို့ သူတို့အား တန်ခိုးရှင်ဘုရင်အဆင့်သို့ ချိုးဖျက်နိုင်အောင် ကူညီပေးသော ပွဲတော်ကြီးတစ်ခုကို မည်သူကများ လက်လွှတ်နိုင်မည်နည်း။

သို့သော်လည်း သွေးအကျဉ်းထောင်တွင်းရှိ နယ်ပယ်များ၏ အကူအညီနှင့်ပင် တန်ခိုးရှင်ဘုရင်အဆင့်သို့ ချိုးဖျက်သွားနိုင်သူမှာ မရှိသလောက်ကို နည်းပါးလွန်းလှသည်။ သွေးအကျဉ်းထောင် စမ်သပ်ပွဲသို့ ရောက်လာသူ တန်ခိုးရှင်တတိယအဆင့် အယောက် တစ်ရာအနက်တွင် ရှီအား ပြီးပြည့်စုံခြင်း အဆင့်သို့ရောက်အောင် ကျင့်ကြံထားနိုင်သည့် လူအရေအတွက်မှာ နှစ်ယောက်၊ သုံးယောက်ပင် မရှိတတ်ချေ။ ထိုနှစ်ယောက်၊ သုံးယောက်ပင်လျှင် တန်ခိုးရှင်ဘုရင်အဆင့်သို့ ချိုးဖျက်သွားလိမ့်မည်ဟု တရားသေ မည်သူမှ မပြောနိုင်။

ထို့ကြောင့် ကြယ်စီရင်စုကြီး တစ်ခုလုံးတွင်ပင် တန်ခိုးရှင်ဘုရင် အဆင့် ပညာရှင်များ အလွန်ရှားပါးနေရခြင်း ဖြစ်သည်။

သွေးအကျဉ်းထောင်ထဲသို့ ဝင်သွားခြင်းအားဖြင့် ကျင့်ကြံသူ တစ်ယောက်သည် လွန်ခဲ့သော နှစ်သောင်းနှင့်ချီက ကျန်ရစ်ခဲ့သည် နယ်ပယ်၏ စွမ်းအားကို သိမြင်နိုင်ရုံသာမက ထူးခြားသော အရာ တစ်ခုခုကိုလည်း ရှာတွေ့ကောင်း ရှာတွေ့နိုင်ပေသည်။

ထိုအရာမှာ နယ်ပယ်ကျောက်တုံး ဖြစ်သည်။

နယ်ပယ်ကျောက်တုံး ဖြစ်ပေါ်လာရခြင်းမှာ သေဆုံးသွားသော တန်ခိုးရှင်ဘုရင်အဆင့် ပညာရှင်များနှင့် သက်ဆိုင်နေသည်။ သူတို့ သေဆုံးသွားပြီးနောက် ပေါက်ကွဲထွက်လာသော စွမ်းအားများကို သွေးအကျဉ်းထောင်ထဲရှိ ထူးခြားသော ကျောက်စိမ်းအချို့မှ စုပ်ယူသွားခဲ့သည်။ နှစ်ပေါင်းမရေမတွက်နိုင်အောင် အနည်ထိုင်၊ စုဝေးလာပြီးသည့်နောက်တွင် ထိုကျောက်များသည် ထူးခြားသော နယ်ပယ်ကျောက်တုံးဟု ခေါ်သည့် အရာများအဖြစ်သို့ အသွင် ပြောင်းလဲလာခဲ့သည်။

နယ်ပယ်ကျောက်တုံးထဲတွင် ကိန်းအောင်းနေသော နယ်ပယ်အဆင့်၏ ဆန်းကြယ်မှုများကို ကျင့်ကြံသူများ အချိန်မရွေး၊ နေရာမရွေး နားလည်ဆင်ခြင်နိုင်ပေသည်။

တန်ခိုးရှင်တတိယအဆင့် ပညာရှင် အများစုသည် နယ်ပယ် ကျောက်တုံးကို ရှာရန်အတွက် သွေးအကျဉ်းထောင်ဆီသို့ လာခဲ့ကြခြင်း ဖြစ်သည်။

သွေးအကျဉ်းထောင်ထဲသို့ဝင်ပြီး တန်ခိုးရှင်ဘုရင်အဆင့်သို့ ချိုးဖျက်နိုင်လိမ့်မည်ဟု သူတို့ မျှော်လင့်မထားကြ။ နယ်ပယ် ကျောက်တုံးများကို ရှာပြီး ထိုကျောက်တုံးထဲတွင် ရှိနေသော ဆန်းကြယ်မှုများကို လေ့လာကာ သူတို့၏ သိုင်းတာအိုအပေါ် ထိုးထွင်းနားလည်မှုများကို တိုးတက်အောင် လုပ်လိုခြင်းသာ။

သွေးအကျဉ်းထောင်ထဲသို့ ဝင်လာသည့် ကျင့်ကြံသူများအစု၏ ရည်ရွယ်ချက်မှာ ထိုကဲ့သို့ ဖြစ်ပေသည်။ ထိုအကြောင်းအရင်းသည် လူအသေအပျောက် များရခြင်း၏ အဓိက အကြောင်းအရင်း ဖြစ်သည်။ ထို့ကြောင့်သာ မဟုတ်လျှင် ကျင့်ကြံသူအချင်းချင်း အပြန်အလှန် သည်းကြီးမည်းကြီး တိုက်ခိုက်နေကြလိမ့်မည် မဟုတ်ချေ။

ရှန်ချင်းလော့သည် ရန်ကိုင်ထက် သွေးအကျဉ်းထောင်အကြောင်း အများကြီး ပိုသိထားခဲ့သည်။ သွေးအကျဉ်းထောင်ထဲတွင် နယ်ပယ်ကျောက်တုံးကဲ့သို့သော အရာများရှိကြောင်း သိပြီးနောက် ရန်ကိုင် ထိုအရာကို စိတ်ဝင်စားသွားခဲ့သည်။

သူသည် တန်ခိုးရှင်ဒုတိယအဆင့်သို့သာ ရောက်သေးသော်လည်း တစ်နေ့နေ့တွင် တန်ခိုရှင်းတတိယအဆင့်သို့ ကျိန်းသေ ရောက်လာပေလိမ့်မည်။ ထိုအခါ သူသည် အခြားသော ကျင့်ကြံသူများ ရင်ဆိုင်ရသည့် အတားအဆီးကို ရင်ဆိုင်ရပေလိမ့်မည်။

နယ်ပယ်ကျောက်တုံးသည် ထိုအချိန်မျိုးသို့ ရောက်လာသည့်အခါ သူ့အား အတော်လေး အကူအညီ ပေးနိုင်လောက်၏။

အင်္ကျီလက်ကို ခေါက်တင်လပ် သွေးအကျဉ်းထောင်စမ်းသပ်ပွဲ စမည့်နေ့ကို စောင့်ဆိုင်းနေလိုက်လေသည်။

သွေးအကျဉ်းထောင် စမ်းသပ်ပွဲ မစသေးခင်တွင်မူ ရှနင်းချန်သည် ဆေးလုံးများကို ဖော်စပ်အချိန်ဖြုန်းနေပြီး ရန်ကိုင်မူ ချီယွဲ့ သင်ကြားပေးခဲ့သည့် ပညာရပ်ကို သေချာ လေ့လာနေခဲ့သည်။

တစ်လခွဲကျော် ကြာပြီးနောက်၊ ရုတ်တရက် တံခါးခေါက်သံကို ရန်ကိုင် ကြားလိုက်ရသည်။ တံခါးသွားဖွင့်ကြည့်လိုက်သည့် အခါ အပေါက်ဝတွင် ရပ်နေသော ရှန်ချင်းလော့ကို တွေ့လိုက်ရ၏။

“အချိန်ကျပြီလား” ရန်ကိုင်က မေးလိုက်သည်။

“အင်း” ရှန်ချင်းလော့က ခေါင်းညိတ်၍ “မွေးစားအမေက အားလုံးကို လူစုဖို့ ပြောနေပြီ”

“ကောင်းပြီ” ရန်ကိုင်က ခေါင်းညိတ်လိုက်ပြီး “ခဏစောင့်၊ ငါအခုပဲ ပြန်လာခဲ့မယ်”

ထို့နောက် အခန်းထဲသို့ ပြန်လျှောက်ဝင်သွားလိုက်သည်။ ခဏအကြာ၌ ရှန်ချင်းလော့ရှေ့ ပြန်ပေါ်လာပြီး သူမနှင့်အတူ နန်းတော်ဆီသို့ ထွက်သွားလေသည်။

နန်းတော်ထဲတွင် ပညာရှင်ပေါင်းများစွာ စုဝေးနေခဲ့ကြသည်။ ထိုနေရာတွင် မွန်းစတားမျိုးနွယ်စု၏ ကြယ်ပွင့်လေးများသာ ရှိနေရုံတင်မဟုတ်ဘဲ တန်ခိုးရှင်ဘုရင်အဆင့် ပညာရှင်များလည်း စုဝေးနေခဲ့ကြသည်။

သို့သော်ငြား အကုန်လုံးသည် တစ်ခုခုကို စောင့်ဆိုင်းနေသည့် အလား နန်းတော်တစ်ခုလုံး ပကတိ တိတ်ဆိတ်နေခဲ့ကြသည်။ .

…

မွန်းစတားမျိုးနွယ်များ တစ်ယောက်ပြီးတစ်ယောက် တောက်လျှောက် ရောက်လာနေခဲ့ကြသည်။ ရောက်လာသည်နှင့် အမြင့်တွင် ထိုင်နေသော မျိုးနွယ်စုခေါင်းဆောင် သုံးဦးကို ဦးညွှတ်လိုက်ပြီး ထိုင်စရာနေရာတစ်ခုရှာကာ မျက်လုံးပိတ်၍ တင်ပလင်ခွေထိုင်နေလိုက်လေသည်။

နောက်ဆုံးတွင် ရန်ကိုင်နှင့် ရှန်ချင်းလော့တို့လည်း ရောက်လာခဲ့သည်။ နန်းတော်ထဲသို့ ဝင်လိုက်သည်နှင့် တစ်ပြိုင်နက် ရန်ကိုင်၏ မျက်ဝန်းအစုံ မှေးစဉ်းသွားခဲ့ပြီး သူ့သွေးကြောထဲရှိ သူတော်စင်ချီကိုလည်း အလိုလို လှည့်ပတ်မိလိုက်သည်။

ဤနန်းတော်ထဲတွင် တန်ခိုးရှင်ဘုရင် တတိယအဆင့် ပညာရှင် သုံးဦးပင် ရှိနေလိမ့်မည်ဟု မထင်ထားခဲ့ချေ။ ချီယွဲ့အပြင် သူမတွေ့ဖူးသည့် နောက်ထပ် တန်ခိုးရှင်ဘုရင်အဆင့် ပညာရှင် နှစ်ဦး ရှိနေခဲ့သည်။

ထိုနှစ်ဦး၏ အကြည့်ကြောင့် ရန်ကိုင့် ဦးရေပြား ထုံသွားခဲ့သည်။

“ဟေး၊ ချီယွဲ့၊ ဒီမှာဘာလို့ လူသားတစ်ယောက် ရှိနေတာလဲ” ဘယ်ဘက်တွင် ရှိနေသော ဆံပင်နီနီနှင့် လူအိုကြီးက ရန်ကိုင်အား မယုံသင်္ကာဖြင့် ကြည့်လိုက်သည်။

“ဟုတ်တယ်။ ချီယွဲ့၊ နင်ငါ့တို့ကို ဒီအကြောင်း တစ်ခါမှ မပြောဘူး။ ဒါဘာသဘောလဲ” ညာဘက်တွင် ရှိနေသော ကြေးနီရောင် အသားအရေနှင့် လူထွားကြီးကလည်း ပြောလိုက်သည်။

ချီယွဲ့က ရယ်သွမ်းသွေးလျက် “လူသားတစ်ယောက်ပဲဟာကို၊ ဘာတွေ ဒီလောက် ဖြစ်နေကြတာလဲ”

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၈၉)

အနီရောင်ဆံပင်နှင့် လူအိုကြီးက အေးစက်စက် အမူအရာဖြင့် နှာခေါင်းရှုံ့လျက် “လူသားတစ်ယောက်ကို ဘာမှ ဂရုစိုက်နေစရာ မရှိတာ ဟုတ်တယ်။ ဒါပေမယ့် နင်မှားနေတာလား။ ဒီနေ့ လူတွေ စုဝေးလိုက်ရတာ ငါတို့ မွန်းစတားမျိုးနွယ်ရဲ့ လူငယ်ပါရမီရှင်တွေကို သွေးအကျဉ်းထောင်ဆီ ပို့ဖို့လေ။ သူလည်း ဒီရောက်နေတယ်ဆိုတော့ သူ့ကိုလည်း သွေးအကျဉ်းထောင်ဆီ စေလွှတ်ဖို့ လုပ်ထားတာလား”

“ဟုတ်တယ်” ချီယွဲ့က ခေါင်းညိတ်လိုက်သည်။

အနီရောင်ဆံပင်နှင့် လူအိုကြီး မျက်နှာပျက်သွားပြီး သူ့မျက်ဝန်းထဲ ဒေါသရိပ်တို့ ဖြတ်ပြေးသွားခဲ့လေသည်။ လူထွားကြီးကမူ အေးစက်စက် လေသံဖြင့် ပြန်မေးခွန်းထုတ်လိုက်လေသည် “ဒီအကြောင်းကို အစ်ကိုခွမ်းရှီနဲ့ငါ ဘာလို့ မသိရတာလဲ”

“ဒီလို ကိစ္စလေးကို ဘာလို့ လူတကာ လျှောက်ပြောနေရမှာလဲ” ချီယွဲ့က မကျေမနပ် ဖြစ်သွားသည့် အမူအရာဖြင့် “အဲ့ကောင်လေးနဲ့ ငါ့ချင်းလော့က အသိတွေပဲ။ သူက ဒီဘုရင်မရဲ့ ဟင်းလင်းပြင်အစီအရင်ကို သုံးပြီး တောင်စိမ်းကြယ်ဆီ သွားချင်ရုံပဲ၊ နင်တို့နှစ်ယောက် ဝင်ရှုပ်စရာ မလိုဘူး”

လူထွားကြီးက မျက်မှောင်ကြုတ်လျက် ချီယွဲ့အား စိုက်ကြည့်နေပြီးနောက်တွင် လေသံတိုးတိုးဖြင့်‌ မေးလိုက်၏ “ချီယွဲ့၊ နင်ဘာတွေ ကြံနေတာလဲ”

“ဒီဘုရင်မ ဘယ်တုန်းက ဘာတွေကြံဖူးလို့လဲ။ အဲ့ကောင်လေး တန်ခိုးရှင်ဒုတိယအဆင့်ပဲ ရှိသေးတာ နင်တို့ မတွေ့ဘူးလား။ ဒီကောင်လေးက အရမ်းမောက်မာတဲ့ကောင်၊ သူ့အဆင့်နဲ့ ငါတို့ ချင်းလော့ကိုများ လာလိုချင်နေသေးတယ်။ ချင်းလော့ကြောင့် ငါသူ့အသက်ကို ချမ်းသာပေးလိုက်တယ်။ ပြီးတော့ သူသာ သွေးအကျဉ်းထောင်စမ်းသပ်ပွဲမှာ အသက်ရှင်နိုင်မယ်ဆိုရင် ချင်းလော့နဲ့သူ့ကြား ကိစ္စကို ဝင်မရှုပ်တော့ဘူးလို့လည်း ကတိပေးလိုက်တယ်။ သူက သေချင်နေမှတော့ ဒီဘုရင်မကလည်း ဘာလို့ တားနေရဦးမှာလဲ။ ဒီလောက်ဆို ကျေနပ်ပြီလား”

ဆံပင်အနီရောင် လူအိုကြီးနှင့် လူထွားကြီးတို့သည် တိတ်တဆိတ် အကြည့်ချင်း တစ်ချက် ဖလှယ်လိုက်ကြသည်။ ချီယွဲ့ပြောသည့် စကား အကုန်လုံးကို မယုံရဲသော်လည်း ဤကိစ္စကို ဆက်မေးနေ၍ မသင့်တော်မှန်း သိလိုက်သည့်အတွက်ကြောင့် ထိုနေရာတွင်သာ ရပ်တန့်လိုက်လေတော့သည်။

သွေးအကျဉ်းထောင်ဆီ ဦးတည်နေသော ဟင်းလင်းပြင် အစီအရင်အား ယခင်လနီမျိုးနွယ်စုခေါင်းဆောင်မှ လွန်ခဲ့သည့် နှစ်တစ်သောင်းခန့်က ခင်းကျင်းခဲ့ခြင်း ဖြစ်သည်။ ထိုအစီအရင်သည် လနီမျိုးနွယ်စု၏ အပိုင်ဖြစ်သည့်အတွက် ချီယွဲ့ကသာ သူတို့ပိုင်နက်နယ်မြေမှ ပါရမီရှင်များကို သွေးအကျဉ်းထောင်ဆီ ပို့ပေးနိုင်ခြင်း ဖြစ်သည်။

သူတို့သာ ခေါင်းမာနေလျှင် အဆုံးတွင် ဖွတ်မရ ဓါးမဆုံး ဖြစ်သွားနိုင်သည်။ ချီယွဲ့သာ ဒေါသထွက်သွားပြီး သူတို့၏ မျိုးဆက်တပည့်များကို ဟင်းလင်းပြင်အစီအရင်အား အသုံးပြုခွင့် မပေးတော့ပါ နောက်တစ်ကြိမ်ကျလျှင် သူတို့လည်း သွေးအကျဉ်းထောင်ဆီ သွားနိုင်တော့လိမ့်မည် မဟုတ်ချေ။

“ဒီကောင်လေးက တကယ် ရူးနေတာပဲ” ဆံပင်အနီရောင်နှင့် လူအိုကြီးက ရန်ကိုင်အား အထင်တသေးဖြင့် ကြည့်လျက် “တကယ် လေလုံးထွားတဲ့ကောင်။ သူက သေချင်နေမှတော့ ဒီလူအိုကြီးလည်း ခွင့်ပြုပေးရမှာပေါ့။ ဒါပေမယ့် ချီယွဲ့၊ နောက်တစ်ကြိမ်ကျရင်တော့ ငါတို့ကို ကြိုပြီး အကြောင်းကြားပေး”

“ဟုတ်တယ်” လူထွားကြီးက ခေါင်းညိတ်ထောက်ခံလိုက်သည်။

ချီယွဲ့က ပြုံးလျက် “ဒီဘုရင်မ ဒီတစ်ကြိမ် ကတိုက်ကရိုက် ဖြစ်သွားတယ်။ နောက်တစ်ကြိမ်ကျရင် အကုန်လုံးကို အကြောင်းကြားမယ်လို့ ဒီဘုရင်မ ကတိပေးတယ်”

ချီယွဲ့က ထိုကဲ့သို့ ပြောလာသဖြင့် လူအိုကြီး နှစ်ယောက်လည်း ဘာမှ ထပ်ပြောမနေတော့ချေ။ မသိချင်ယောင်သာ ဆောင်နေပေးလိုက်တော့သည်။

“ချင်းလော့၊ စီနီယာခွမ်းရှီနဲ့ စီနီယာနူရှယ်တို့ကို လာနှုတ်ဆက်လိုက်ဦး” ချီယွဲ့က ရှန်ချင်းလော့ကို အချက်ပြလိုက်၏။

ရှန်ချင်းလော့သည် ချီယွဲ့ပြောသည့်အတိုင်း ထိုလူအိုကြီး နှစ်ဦးကို သွားနှုတ်ဆက်လိုက်လေသည်။

ထိုလူအိုကြီးနှစ်ဦးသည် ခြင်္သေရိုင်း မျိုးနွယ်စုခေါင်းဆောင်နှင့် ဂဏန်းရိုင်းမျိုးနွယ်စုခေါင်းဆောင်တို့ ဖြစ်ရမည်မှန်း ရန်ကိုင် သိလိုက်သည်။ သို့သော် သူတို့နှစ်ဦး ဤနေရာတွင် ဘာကြောင့် ပေါ်လာရသလဲ ဆိုသည်ကိုတော့ ရန်ကိုင် မသိပါချေ။

ထိုအကြောင်းကို စဉ်းစားနေစဉ်မှာပင် သူ့အား စူးရဲ စိုက်ကြည့်နေသည့် အကြည့်တစ်ခုကို ခံစားမိလိုက်သည့်အတွက် လှည့်ကြည့်လိုက်ရာ မီးတောက်မတတ် အကြည့်ဖြင့် သူ့အား စိုက်ကြည့်နေသော ရွှယ့်လျန်ကို တွေ့လိုက်ရလေသည်။ ရန်ကိုင်က ပြုံးပြလိုက်ရာ ရွှယ့်လျန် မျက်နှာကြီး ရှုံ့မဲ့သွားခဲ့လေသည်။ ရန်ကိုင်လက်၌ ကောင်းကောင်း တီးခံလိုက်ရသည့် အကြောင်းကို ပြန်စဉ်းစားမိသွားည့်ပုံပင်။

“ရန်ကိုင်၊ ဒီမှာ” ဘဟဲက ရန်ကိုင်အား လှမ်းခေါ်လိုက်သည်။

ရန်ကိုင်လည်း ခေါင်းညိတ်လိုက်ပြီး ဘဟဲဘေးနားရှိ ထိုင်ခုံဆီသို့ လျှောက်သွားလိုက်လေသည်။

လွန်ခဲ့သော ရက်အနည်းငယ်ခန့်က ဘဟဲသည် သူ့စီနီယာမမလေးဆီ ရောက်လာပြီး ဆေးလုံး ဖော်စပ်ပေးရန် တောင်းဆိုခဲ့သည်။ သူတောင်းဆိုခဲ့သည့် ဆေးလုံးကိုလည်း သူ့စီနီယာမမလေးမှ အောင်မြင်စွာ ဖော်စပ်ပေးနိုင်ခဲ့ပေသည်။

ထို့ကြောင့် ဘဟဲသည် ရှနင်းချန်အပေါ် အလွန် ကျေးဇူးတင်သွားပြီး ရန်ကိုင်အပေါ်လည်း ပို၍ ရင်းနှီးလာခဲ့သည်။

“ရန်ကိုင်၊ သွေးအကျဉ်းထောင်ဆီသွားရင် သတိထားနော်။ ဒီမှာ ရှိနေတဲ့ လူတွေအကုန်လုံးက မင်းထက် အဆင့်တစ်ဆင့် မြင့်တဲ့ လူတွေချည်းပဲ” ဘဟဲက တိုးတိုးလေး သတိပေးလိုက်သည်။

“ဂျူနီယာ အမြဲတမ်း နှိမ့်နှိမ့်ချချပဲ နေတာပါ” ရန်ကိုင်က ရယ်သွမ်းသွေးလျက် ပြန်ပြောလိုက်သည်။

ဘဟဲ မျက်နှာကြီးမဲ့လျက် ရန်ကိုင်အား စောင်းကြည့်လိုက်လေ၏။

“ဒါနဲ့ စီနီယာ၊ အဲ့နှစ်ယောက်က ဘယ်သူတွေလဲ” ရန်ကိုင်သည် သူတစ်ခါမှ မတွေ့ဖူးသည့် မွန်းစတားမျိုးနွယ် နှစ်ဦးကို ညွှန်ပြရင်း မေးလိုက်သည်။

ဘဟဲလည်း ထိုနှစ်ယောက်အကြောင်းကို လေသံတိုးတိုးဖြင့် ရှင်းပြလိုက်လေသည်။

တစ်ယောက်မှာ ဂဏန်းရိုင်းမျိုးနွယ်စုမှ ပျိုးထောင်ပေးထားသည့် ဂဏန်းရိုင်းမျိုးနွယ်စု ခေါင်းဆောင်၏ အားအကောင်းဆုံး လက်အောက်ငယ်သား တစ်ဦး ဖြစ်ပြီး အခြား တစ်ယောက်မှာ ခြင်္သေရိုင်းမျိုးနွယ်စုခေါင်းဆောင်၏ အားအကောင်းဆုံး လက်အောက်ငယ်သား တစ်ဦးဖြစ်သည့် လဲ့ဖုန်း ဖြစ်ပေသည်။

ခြင်္သေ့ရိုင်းမျိုးနွယ်စုခေါင်းဆောင်နှင့် ဂဏန်းရိုင်း မျိုးနွယ်စု ခေါင်းဆောင်တို့၏ အမွေခံများသည် ကျေနပ်လောက်စရာ စွမ်းအားကို ပိုင်ဆိုင်ထားခြင်း မရှိသဖြင့် သူတို့၏ လက်အောက် ငယ်သားများကို အစားထိုး စေလွှတ်ရခြင်း ဖြစ်သည်။

ထိုမွန်းစတားမျိုးနွယ် နှစ်ဦးသည်လည်း ရန်ကိုင်အား အတော်လေး စိတ်ဝင်စားဟန်ရကာ မကြာမကြာ သူ့ဆီ လှမ်းလှမ်းကြည့်နေပြီး လဲ့ဖုန်းဆိုလျှင် ရန်ကိုင်အား ပြုံးပင်ပြုံးပြနေသေးသည်။

ဒီကောင်ကြည့်ရတာ ပေါင်းလို့သင်းလို့ ကောင်းမယ့်ပုံပဲ ရန်ကိုင် စိတ်ထဲ ကြိတ်တွေးလိုက်သည်။

ခန်းမကြီးတစ်ခုလုံးသည် ထူးထူးခြားခြားကို တိတ်ဆိတ်နေခဲ့သည်။ လူများ တစ်ယောက်ပြီး တစ်ယောက် ရောက်လာခဲ့သော်လည်း ဆူညံ့သွားခြင်း မရှိချေ။

ရန်ကိုင်သည် အဓိကခန်းမထဲတွင် ရှိနေသော ဟင်းလင်းပြင် အစီအရင်အား သူ့ကောင်းကင်စိတ်အာရုံဖြင့် အဆက်မပြတ် စစ်ဆေးကြည့်သည်။ စစ်ဆေးကြည့်ပြီးနောက်၌ ထိုဟင်းလင်းပြင် အစီအရင်သည် မွန်းစတားဧကရာဇ်ကြယ်နှင့် ပင့်ကူအမေကြီး၏ အသိုက်ကို ဆက်သွယ်ထားသည့် ဟင်းလင်းပြင် အစီအရင်နှင့် တူညီနေကြောင်း တွေ့ရှိလိုက်ရသည်။ ထိုနှစ်ခု မည်သို့များ ပက်သက်နေသလဲ ဆိုသည်နှင့် ပက်သက်၍ ရန်ကိုင် အတွေး များမိသွားသည်။

တစ်ရက်ကြာပြီးနောက်တွင် ချီယွဲ့နှင့် အခြားမျိုးနွယ်စု ခေါင်းဆောင်နှစ်ယောက် မျက်လုံးပွင့်လာခဲ့သည်။

“အချိန်ကျပြီ” ခြင်္သေရိုင်းမျိုးနွယ်စုခေါင်းဆောင်က ပြောလိုက်၏။

သွေးအကျဉ်းထောင်စမ်းသပ်ပွဲဆီ သွားမည့် တန်ခိုးရှင်အဆင့် ပညာရှင် ရှစ်ယောက်စလုံး မတ်တပ်ရပ်လိုက်ကြသည်။

မွန်းစတားမျိုးနွယ်စုခေါင်းဆောင် သုံးယောက်သည် ဟင်းလင်းပြင် အစီအရင်ဘေးနားသို့ ရောက်သွားပြီး သုံးထောင့်ကွက်ပုံစံဖြင့် ရပ်လိုက်ကြသည်။

“စတော့” ချီယွဲ့က အော်ဟစ်လိုက်ပြီး တစ်ချိန်တည်းတွင် ရှုပ်ထွေးသော လက်ကွက်များကို ထုတ်ဖော်လိုက်လေသည်။

နူရှယ်နှင့် ခွမ်းရှီတို့သည်လည်း တစ်ချိန်တည်း လှုပ်ရှားလိုက်ကြ၏။ အားကောင်းလှသော စွမ်းအင်လှိုင်းတို့သည် သူတို့ခန္ဓာကိုယ်ဆီမှ ဖြာထွက်လာခဲ့ကြလေသည်။

ချီယွဲ့၊ နူရှယ်နှင့် ခွမ်းရှီတို့ သုံးဦးစလုံး ဟင်းလင်းပြင် အစီအရင်ထဲသို့ သူတို့၏ သူတော်စင်ချီများကို စတင် ထည့်သွင်းကြတော့သည်။

အစီအရင်တစ်ခုလုံး တဝီဝီ မြည်လာပြီး အစီအရင်၏ မြောင်းပေါက်များထဲ ထည့်သွင်းထားသော သူတော်စင် သလင်းကျောက်များ အားလုံး တဖျက်ဖျက် တောက်ပလာခဲ့လေသည်။

“နင်တို့အားလုံး သေချာနားထောင်။ တောင်စိမ်းကြယ်က ဒီနေရာနဲ့ အဝေးကြီးပဲ။ ဒီအစီအရင်က နင်တို့ကို သွေးအကျဉ်းထောင်ထဲ ပို့ပေးနိုင်တယ် ဆိုပေမယ့် နင်တို့ ဘယ်နေရာမှာ ပေါ်လာမလဲ ဆိုတာတော့ မပြောနိုင်ဘူး။ ဒါကြောင့် သေသေချာချာ သတိနဲ့ လှုပ်ရှားကြ” ချီယွဲ့က အားလုံးကို အော်ဟစ် သတိပေးလိုက်သည် “သွေးအကျဉ်းထောင်ထဲ ဝင်နိုင်တဲ့လူတွေ အကုန်လုံးက အဆင့်မြင့် ပညာရှင်တွေချည်းပဲ။ အဲ့ရောက်ရင် ပြဿနာမဖြစ်အောင် နေကြ။ နင်တို့ အဓိက ပန်းတိုင်က နယ်ပယ်ကို နားလည်ဖို့နဲ့ နယ်ပယ် ကျောက်တုံးကို ရနိုင်ဖို့ပဲ။ နင်တို့အားလုံး အသက်ရှင်လျက် ပြန်လာနိုင်မယ်လို့ ဒီဘုရင်မ မျှော်လင့်တယ်”

“ကြားကြလား” လူအုပ်ကြီး ငြိမ်သက်နေသည်ကို မြင်သော် ခွမ်းရှီက အော်မေးလိုက်လေသည်။

“ဟုတ်ကဲ့” မွန်းစတားမျိုးနွယ် ဂျူနီယာအားလုံး ပြိုင်တူ ပြန်ဖြေလိုက်ကြသည်။

ထိုအခါမှ ခွမ်းရှီ ကျေနပ်သွားတော့သည်။

“ဒီဘုရင်ကတော့ ဘာမှ ပြောမနေတော့ဘူး” နူရှယ်က ရယ်သွမ်းသွေးလျက် “မင်းတို့သာ အသက်ရှင်လျက် ပြန်လာနိုင်ရင် အနာဂတ်ကျရင် မွန်းစတားဧကရာဇ်ကြယ်မှာ နေရာတစ်နေရာ ရလာမယ် ဆိုတာတော့ သေချာတယ်”

“စီနီယာတို့ ညွှန်ကြားပြသတာကို သေချာ လိုက်နာပါ့မယ်”

ထိုစဉ် နန်းတော်တစ်ခုလုံး တုန်ခါလာပြီး ဟင်းလင်းပြင် အစီအရင်မှ တဝုန်းဝုန်း မြည်သံများနှင့် အဖြူရောင် အလင်းတန်းများ ထွက်ပေါ်လာခဲ့လေသည်။

မိုင်ထောင်ပေါင်းများစွာ အဝေးမှပင် ထိုအဖြူရောင် အလင်းတန်းများကို လှမ်းမြင်နိုင်ပေသည်။

တုန်ခါမှုများ ပျောက်ကွယ်သွားပြီး အဖြူရောင်အလင်းတန်းများ မရှိတော့သည့်နောက်တွင် ဟင်းလင်းပြင် အစီအရင်ပေါ်၌ ဘဲဥပုံစံ ဂိတ်ပေါက်ဝလေးတစ်ခု ထွက်ပေါ်လာခဲ့သည်။

“သွားပေတော့” ချီယွဲ့က အလေးအနက် အမူအရာဖြင့် အော်ပြောလိုက်သည်။

ဘဟဲသည် ရှေ့ဆုံးမှနေ၍ ဦးဆောင် ထွက်သွားလိုက်သည်။ မသွားခင် ချီယွဲ့အား ခေါင်းတစ်ချက် ညိတ်ပြလိုက်ပြီးနောက် နောက်ပင် ပြန်လှည့်မကြည့်တော့ဘဲ ဘဟဲပုံစံ ဂိတ်ပေါက်ဝထဲသို့ ပြေးဝင်သွားတော့လေသည်။

ဘဟဲ ဝင်သွားပြီးသည်နှင့် တစ်ယောက်ပြီးတစ်ယောက် လိုက်ဝင်သွားသည်။

ရန်ကိုင်ကမူ အကုန်လုံး ဝင်သွားပြီးသည့်အချိန်ထိ စောင့်နေလိုက်၏။ အကုန်လုံး ဝင်သွားပြီးသည့် နောက်မှသာ ဂိတ်ပေါက်ထဲသို့ ဝင်သွားလေသည်။ သို့သော် ဂိတ်ပေါက်သို့ ရောက်ချိန် ချီယွဲ့အား လက်ဝှေ့ရမ်း၍ ပြုံးပြလျက် “စီနီယာချီယွဲ့၊ ရေစက်မကုန်သေးရင် ပြန်ဆုံကြတာပေါ့”

ထိုစကားကို ကြားလိုက်ချိန် ချီယွဲ့ မျက်နှာပျက်သွားပြီး မျက်မှောင်ကြုတ်သွားခဲ့လေသည်။

သို့သော်လည်း သူမ ဘာမှ ပြန်မပြောရသေးခင်မှာပင် ရန်ကိုင်သည် အားလုံး၏ မြင်ကွင်းမှ ပျောက်ကွယ်သွားခဲ့သည်။

“ဒီလူသားက တကယ်ကို စည်းမရှိကမ်းမရှိတဲ့ကောင်ပဲ” ခွမ်းရှီက အေးစက်စက် အမူအရာဖြင့် နှာခေါင်းရှုံ့လိုက်သည်။

“ဂိတ်ပေါက်ကို မြန်မြန် ပိတ်လိုက်တော့” နူရှယ့်က အလျင်စလို ပြောလိုက်သည် “တော်ကြာ တောင်စိမ်းကြယ်က ခွေးအိုကြီး သတိပြုမိသွားဦးမယ်”

သို့သော်လည်း ချီယွဲ့ကမူ ဘာမှ ပြန်မပြော၍ တစ်ခုခု စဉ်းစားနေဟန်ဖြင့်သာ မတ်တပ်ရပ်နေခဲ့သည်။ တစ်ခုခုကို နားလည်သွားသည့်နှယ် ချီယွဲ့သည် ရှနင်းချန်နေသည့် နန်းဆောင်အား သူမ၏ ကောင်းကင်စိတ်အာရုံဖြင့် လှမ်း၍ စစ်ဆေးကြည့်လိုက်သည်။

ထို့နောက်တွင် ချီယွဲ့မျက်နှာ ရှုံ့မဲ့သွားခဲ့ပြီး အံကိုတင်းတင်း ကြိတ်၍ သွားကြားထဲမှ ထွက်သည့် လေသံဖြင့် ရေရွတ်လိုက်၏ “ခွေးကောင်လေး၊ နင်ဒီဘုရင်မကို လှည့်စားရဲတယ်ပေါ့”

ရှနင်းချန် သူမ၏ နန်းဆောင်ထဲ မရှိတော့ချိန် ရန်ကိုင် ဘာကြံနေသလဲ ဆိုသည်ကို ချီယွဲ့ ချက်ချင်း နားလည်လိုက်၏။

ရန်ကိုင်သည် မွန်းစတားဧကရာဇ်ကြယ်သို့ ပြန်လာရန် မစီစဉ်ထားခဲ့ပေ။

ရှနင်းချန်ကိုသာ ခေါ်ထားခဲ့လျှင် ထိုလူသားကောင်လေးကို ထိန်းချုပ်ထားနိုင်မည်ဟု ထင်ထားခဲ့သော်လည်း ထိုလူသား ကောင်လေးသည် သူမအား တစ်ဖက်လှည့်နားရိုက်သွားခဲ့၏။

သို့သော်လည်း သူမ မည်သို့ပင် တွေးစေကာမူ ရှနင်းချန် မည်ကဲ့သို့ ပျောက်ကွယ်သွားသလဲ သို့မဟုတ် ရန်ကိုင် ရှနင်းချန်ကို မည်ကဲ့သို့ ခေါ်သွားသလဲ ဆိုသည်ကို လုံးဝ မစဉ်းစားနိုင်ခဲ့ပေ။

လွန်ခဲ့သော ရက်အနည်းငယ်ခန့် ထိုမျိုးရိုးနာမည်ရှနှင့် အမျိုးသမီး နန်းတော်ထဲတွင် ရှိနေခဲ့ပေသေးသည်ကို ယနေ့ကျမှ ဘာကြောင့် ပျောက်ကွယ်သွားရသနည်း။

“ချီယွဲ့ နင်ဘာတွေလုပ်နေတာလဲ” နူရှယ့်နှင့် ခွမ်းရှီတို့ နှစ်ဦးစလုံး ချီယွဲ့ ဘာကြောင့် ရုတ်တရက်ကြီး အရမ်း ဒေါသထွက်လာမှန်း နားမလည်နိုင်အောင် ဖြစ်နေခဲ့သည်။

“ဘာမှမဟုတ်ဘူး” ချီယွဲ့က ခေါင်းခါလိုက်ပြီး အသက်ပြင်းပြင်း တစ်ချက် ရှူသွင်းလိုက်ပြီးနောက် “ဂိတ်ပေါက်ကို ပိတ်လိုက်တော့”

လူသားတစ်ယောက်၏ လှည့်စားခြင်း ခံလိုက်ရသည့် အကြောင်းကို လူသိရှင်ကြား ကြေညာနေလိမ့်မည် မဟုတ်ချေ။ သူမသာ ထိုနှစ်ယောက်ကို ပြောပြလိုက်လျှင် အလှောင်ပြောင်ခံရမည်မှာ လုံးဝ ကျိန်းသေသည်ကို ဘာကြောင့် ထုတ်ပြောနေရမည်နည်း။

သူမသည် ကိုယ့်သေတွင်း ကိုယ်တူမည့်လူ မဟုတ်ချေ။
ဒီကောင်လေးမှာ နည်းလမ်းကောင်းတွေ ရှိနေတာပဲ။ ယုရှုန်းဆီ မွန်းစတားအသွင်ပြောင်းလဲခြင်း ပညာရပ်ကို သွားပေးခိုင်းတာ ဒါကြောင့်ကိုး

ထိုသို့ဆိုလျှင် ချင်းလော့ကော။ ချင်းလော့ကိုပါ သူနှင့်အတူ ခေါ်သွားမည်လား။ ထိုကဲ့သို့ စဉ်းစားမိလိုက်သည့်အခိုက် ချီယွဲ့မျက်နှာ အရုပ်ဆိုးသွားခဲ့ရသည်။

ရန်ကိုင်၏ လှည့်စားခြင်း ခံလိုက်ရလျှင်ပင် မူလအဆီအနှစ် သလင်းကျောက်ကို ရလိုက်နိုင်သရွေ့ ဘာမှ ဆုံးရှုံးသွားလိမ့်မည် မဟုတ်ချေ။ သို့သော်လည်း ချင်းလော့ကိုပါ သူနှင့်အတူ ခေါ်သွားခဲ့လျှင်တော့ သူမ အရှုံးကြီး ရှုံးရပေလိမ့်မည်။ ထိုနှစ်ယောက်ကို ကြယ်စီရင်စုကြီးထဲ မည်ကဲ့သို့ လိုက်ရှာမည်နည်း။ ထိုကဲ့သို့ လိုက်ရှာရမည်မှာ ကောက်ရိုးပုံထဲ အပ်ပျောက်ရှာသည်ထက်ပင် ပိုဆိုးနေပေလိမ့်မည်။

နင်လုပ်ရဲလုပ်ကြည့် ဒီဘုရင်မ ကြယ်စီရင်စုတစ်ခုလုံး လိုက်ရှာရမယ် ဆိုရင်တောင် လိုက်ရှာပြီး နင့်ကို သတ်ပစ်မယ်

Martial Peak
အထွဋ်အထိပ်သိုင်းဧကရာဇ်
အပိုင်း (၁၅၉၀)

လေဟာနယ်တစ်ခုလုံး သူ့ခေါင်းပေါ် ပြိုကျလာသည့်အလား ရန်ကိုင်ခေါင်း အနည်းငယ် ရီဝေဝေ ဖြစ်သွားခဲ့သည်။ ဤသို့ ဖြစ်ရခြင်းမှာ ဟင်းလင်းပြင် ဆုတ်ဖြဲခံလိုက်ရခြင်းကြောင့် ဖြစ်ပေသည်။

တာတိုတည်နေရာ ခုန်ကူးခြင်းသည် ရန်ကိုင်အပေါ် အကျိုး သက်ရောက်မှု မရှိတော့သော်ငြား အလွန်ကိုမှ ဝေးကွာသော နေရာတစ်ခုမှ တစ်ခုသို့ တည်နေရာခုန်ကူးခြင်း၊ ကြယ်တစ်လုံးမှ အခြားတစ်လုံးသို့ ဟင်းလင်းပြင်ဆုတ်ဖြဲ၍ သွားလာခြင်းသည် ရန်ကိုင်အပေါ် အနည်းငယ် ဝန်ပိစေပေသေးသည်။

ကံကောင်းစွာဖြင့် လေဟာနယ်ကို ဆုတ်ဖြဲ၍ ဟင်းလင်းပြင်ထဲ သွားနေကျသူ တစ်ဦး ဖြစ်သည်မို့ ယခုခံစားချက်သည် သူ့အတွက် သိပ်ပြီး မပြင်းထန်လှချေ။

သူ့မြင်ကွင်းထဲ အလင်းတစ်ချက် လက်သွားပြီးနောက်တွင် ထူးဆန်းသော ကုန်းမြေတစ်ခုဆီသို့ ရောက်ရှိနေကြောင်း တွေ့ရှိလိုက်ရသည်။

လှည့်ပတ်မစူးစမ်းရသေးခင်မှာပင် သူ့အနီးအနား ဝန်းကျင်၌ အသက်စွမ်းအင် အရှိန်အဝါတစ်ခုရှိနေကြောင်း တွေ့ရှိလိုက်ရ၏။

သတိထားလျက် လှည့်ကြည့်လိုက်ရာ သူနှင့်အတူ သွေးအကျဉ်းထောင်သို့ လာခဲ့သော ခြင်္သေ့ရိုင်းပိုင်နက်မှ လဲ့ဖုန်းဖြစ်ကြောင်း တွေ့ရှိလိုက်ရသည်။

လဲ့ဖုန်းသည် ဟင်းလင်းပြင် အစီအရင်ထဲသို့ သူ့ထက်ဦးစွာ စောဝင်သွားခဲ့ခြင်း ဖြစ်သည်။ ဟင်းလင်းပြင်ထဲ ဝင်သွားခြင်းသာ ဖြစ်သော်လည်း ရန်ကိုင်ကဲ့သို့ လေဟာနယ်တာအိုကို ကျွမ်းကျင်ထားခြင်း မရှိသည့်အတွက် ရန်ကိုင်က အဆင်ပြေနေသော်ငြား သူ့မှာတော့ ဟင်းလင်းပြင် အစီအရင်ထဲမှ ထွက်လာပြီးနောက် အတော်လေး ဒုက္ခရောက်နေခဲ့လေသည်။

သို့သော်ငြား မွန်းစတားဧကရာဇ်ကြယ်၏ ပါရမီရှင်တစ်ဦး ဖြစ်သည်နှင့်အညီ ဟင်းလင်းပြင် အစီအရင်ဖြင့် သွားလာခြင်းမှ ဖြစ်ပေါ်လာသည့် ဘေးထွက်ဆိုးကျိုးသည် သူ့အား အချိန် အကြာကြီး အနှောင့်အယှတ် ပေးနိုင်ခဲ့ခြင်း မရှိချေ။ အသက် သုံးရှိုက်စာအတွင်း လဲ့ဖုန်း မျက်လုံး ပြန်ပွင့်လာပြီး ပုံမှန်အတိုင်း ဖြစ်သွားခဲ့သည်။ ထို့နောက် သူတော်စင်ချီကို စုစည်းလျက် ရန်ကိုင်ကဲ့သို့ပင် ပတ်ဝန်းကျင်အား သတိထားကာ စတင် စစ်ဆေးတော့လေသည်။

ထို့နောက် ရန်ကိုင်ကို တွေ့သွားခဲ့သည်။

“အို…” လဲ့ဖုန်း တစ်ခဏမျှ အံ့အားသင့်သွားခဲ့ပြီးနောက် ပြုံးလျက် ရန်ကိုင်ဆီသို့ လမ်းလျှောက်လာပြီး မေးလိုက်လေသည် “မင်းနာမည်က ရန်ကိုင်ဆို၊ ဟုတ်လား”

“ဟုတ်တယ်”

“မင်းရွှယ့်လျန်ကို သင်ခန်းစာ ကောင်းကောင်း ‌ပေးလိုက်သေးတယ်ဆို” လဲဖုန်းသည် ရန်ကိုင်အပေါ် အတော်လေး စိတ်ဝင်စားနေသည့်ပုံပင်။

ဤမေးခွန်းကိုတော့ ရန်ကိုင်ကမူ ပြန်မဖြေခဲ့ချေ။

လဲ့ဖုန်းက ပခုံးတွန့်၍သာ “ယုရှုန်းဆီကနေ ကြားခဲ့တာ။ ငါလနီပိုင်နက်ဆီ စောမရောက်လာခဲ့တာ ဆိုးသွားတယ်။ မဟုတ်ရင် ပွဲကြီးပွဲကောင်း ကြည့်လိုက်ရမှာ။ ဟဲဟဲ၊ အမှန်အတိုင်း ပြောရရင် အဲ့ရွှယ့်လျန်ဆိုတဲ့ကောင်ကို ငါလည်း ကြည့်ရတာ မဟုတ်ဘူး။ ဒါပေမယ့် မင်းအဲ့ကောင်ကို ဆုံးမနိုင်တာ ငါတကယ် အံဩတယ်။ ကြည့်ရတာ လူသားတွေလည်း အထင်သေးလို့ မရဘူးနဲ့တူတယ်။ အင်း၊ ငါမင်ကို ကမ်းလှမ်းချင်တယ်”

“ဘာကမ်းလှမ်းမှာလဲ” ရန်ကိုင်က ပြန်မေးလိုက်သည်။

လဲဖုန်းသည် သူ့အပေါ် ရင်းရင်းနှီးနှီး လာပြောနေသဖြင့် ရန်ကိုင်ကလည်း အေးစက်စက် ပြန်လုပ်မနေခဲ့ချေ။

“အတူတူ လှုပ်ရှားဖို့လေ” လဲ့ဖုန်းက ပြုံး၍ “မင်းလည်း သိတာပဲ ရောင်းရင်းရန်၊ ဒီနေရာက တောင်စိမ်းကြယ်လေကွာ။ ငါတို့ မွန်းစတား မျိုးနွယ်တွေက ဒီနေရာကို ခိုးဝင်လာတာဆိုတော့ အခြားသူတွေက ငါတို့ကို ကြည့်ရမှာ မဟုတ်ဘူး။ ပြီးတော့ ကြည့်ရသလောက် ဒီနေရာမှာ ပေါ်လာတာ မင်းနဲ့ငါပဲ ရှိတယ်။ ငါတို့သာ အတူပူးပေါင်းမယ်ဆိုရင် ပိုပြီး လုံခြုံနိုင်တယ်လေ”

“ငြင်းရမှာ စိတ်မကောင်းပေမယ့် စိတ်မဝင်စားဘူး” ရန်ကိုင်က ခေါင်းခါလိုက်သည်။

“ဘာလို့လဲ” လဲ့ဖုန်း မျက်မှောင်ကြုတ်သွားခဲ့သည်။

“ဘာလို့လဲဆိုတော့ ငါက လူသားလေ။ မွန်းစတားမျိုးနွယ်မှ မဟုတ်တာ။ မင်းတို့လို ဆက်ဆံခံရမှာ မဟုတ်ဘူး” ရန်ကိုင်က သူ့ကိုယ်သူ လက်ညိုးအရင်ထိုးလိုက်ပြီးနောက် လဲ့ဖုန်းကို လက်ညိုးထိုး၍ “မင်းက မွန်းစတားမျိုးနွယ်၊ မွန်းစတား မျိုးနွယ်ဝင်တွေကို မုန်းတဲ့ တစ်ယောက်ယောက်သာ မင်းနဲ့ငါ့ အတူရှိနေတာကို မြင်သွားရင် ဘာလုပ်မယ်ထင်လဲ။ ငါ့ကိုလည်း တိုက်မှာပေါ့။ ငါပါ အလကားသက်သက် အတိုက်ခိုက်ခံရမယ့် အဖြစ်မျိုး မလိုချင်ဘူး”

“အန်…” လဲ့ဖုန်း ကြောင်သွားခဲ့ပြီး သူ့ခေါင်းကိုကုတ်လျက် “အဲ့ဒါလည်း ဟုတ်သား။ ရောင်းရင်းရန်က အဲ့လိုတွေးမှတော့ ငါမပြောလိုက်ဘူးလို့ပဲ သဘောထားလိုက်တော့”

ရန်ကိုင် ခေါင်းညိတ်လိုက်သည်။

“အဲ့လိုဆို ရောင်းရင်းရန် ကံကောင်းပါစေဗျာ” လဲဖုန်းသည် ရန်ကိုင် ငြင်းလိုက်သည့်အတွက် ဒေါသထွက်သွားဟန် မရဘဲ ရယ်ရယ်မောမောဖြင့်သာ လမ်းကြောင်းတစ်ခုရွေးပြီး ထွက်သွားလေသည်။

လဲ့ဖုန်း ထွက်သွားပြီးနောက်တွင် ကောင်းကင်စိတ်အာရုံကို ဖြန့်ကျက်၍ ပတ်ဝန်းကျင်အား သေချာ စစ်ဆေးကြည့်လိုက်၏။

ခဏအကြာတွင် ရန်ကိုင်၏ မျက်နှာအမူအရာ ပြောင်းလဲသွားပြီး သူ့ကောင်းကင်စိတ်အာရုံကို အလျင်အမြန် ပြန်ရုတ်လိုက်၏။

ရှန်ချင်းလော့ ပြောခဲ့သည်မှာ မမှားချေ။ သွေးအကျဉ်းထောင်ထဲ၌ ကောင်းကင်စိတ်အာရုံကို ဖြန့်ကျက်ချင်တိုင်း မဖြန့်ကျက်သင့်ပေ။

သွေးအကျဉ်းထောင်ထဲ၌ ကောင်းကင်စိတ်အာရုံကို ကန့်သတ်သည့် အကန့်အသတ်များ၊ ဖိနှိပ်သည့် စွမ်းအားများ မရှိသော်လည်း ဤနေရာတွင် မရေမတွက်နိုင်သော နယ်ပယ်ဝဲကတော့များ ရှိနေသည်။

ထိုနယ်ပယ် ဝဲကတော့များသည် တန်ခိုးရှင်ဘုရင်အဆင့် ပညာရှင်များ ကြာမှ တိုက်ပွဲ၏ နောက်ဆက်တွဲရလဒ်များ ဖြစ်ကြသည်။ အချို့ နယ်ပယ်များမှာ ပျောက်ကွယ်သွားကြသော်ငြား အချို့မှာမူ အချိန်နှင့်အမျှ ပို၍ အားကောင်းလာခဲ့သည်။

ထိုနယ်ပယ်ဝဲကတော့များသည် ကောင်းကင်စိတ်အာရုံ အပါအဝင် အရာအားလုံးကို ဝါးမြိုနိုင်စွမ်း ရှိပေသည်။

ယခုပင် ရန်ကိုင် တစ်ချက် ခံလိုက်ရသေးသည်။ သူ့ကောင်းကင်စိတ်အာရုံကိုသာ အချိန်မှီ ပြန်မရုတ်သိမ်းခဲ့လျှင် သူ့ဝိဥာဉ်ပင် ထိခိုက်သွားနိုင်သည်အထိ အခြေအနေ ဆိုးသွားနိုင်၏။ ယခုထိတိုင် သူ့ခေါင်းတစ်ခုလုံး အပ်တစ်ချောင်းဖြင့် စိုက်ခံနေရသည့်နှယ် တဆစ်ဆစ် ကိုက်နေဆဲ။

ဤသို့ဖြစ်ရခြင်းမှာ သူ့ကောင်းကင်စိတ်အာရုံ ထိခိုက်သွားသောကြောင့် ဖြစ်သည်။ သို့သော်ငြား သူ့ဝိဥာဉ်ကို အားပြန်ဖြည့်ပေးနေသည့် ခုနှစ်ရောင်ခြယ်ဝိဥာဉ်ကြာပန်း ရှိနေသည့်အတွက် ထိုမျှလောက်သော ဒဏ်ရာလေးကို ရန်ကိုင် ဂရုမစိုက်ပါချေ။

“တကယ်ကြီး သွေးအကျဉ်းထောင်ထဲကို ရောက်လာတာပဲ” ပတ်ဝန်းကျင်ကို လှည့်ပတ်ကြည့်ပြီးနောက်တွင် ရန်ကိုင်က ရေရွတ်လိုက်၏။

သွေးအကျဉ်းထောင်ထဲတွင်သာ ထိုကဲ့သို့ ထူးဆန်းသည့် နယ်ပယ် ဝဲကတော့များ တည်ရှိပေသည်။

သွေးအကျဉ်းထောင်နှင့် မွန်းစတားဧကရာဇ်ကြယ်ကို ဆက်သွယ်ပေးနိုင်သည့် ကမ္ဘာခြား ဟင်းလင်းပြင်အစီအရင်ကို ခင်းကျင်းပေးနိုင်သည့် ယခင်လနီမျိုးနွယ်စုခေါင်းဆောင်သည် တကယ့်ကို ပါရမီရှင်ကြီးတစ်ယောက် ဖြစ်ရပေမည်။

သို့သော်လည်း အလွန်ကိုမှ ဝေးကွာသော နေရာနှစ်ခုကို ဆက်သွယ်ထားရသည့် အတွက်ကြောင့် ပုံမှန် နေရာ မသတ်မှတ်နိုင်တော့ဘဲ အစီအရင်အား အသုံးပြုသည့်လူအားလုံး ရောက်ချင်သည့်နေရာ ရောက်ကုန်တော့သည်။ ဤအနီးအနား၌ သူနှင့် လဲဖုန်း နှစ်ယောက်တည်း ရှိနေသည်ကို ကြည့်လျှင် သိနိုင်ပေသည်။

ရှန်ချင်းလော့၏ ခွန်အားကို ရန်ကိုင် ယုံကြည်ပေသည်။ ကောင်းကင်လနတ်ဆိုးပင့်ကူ၏ အရင်းအမြစ်ကို စုပ်ယူထားသည့် အတွက် သာမန်တန်ခိုးရှင်တတိယအဆင့်များအဖို့ သူမအား မည်သို့မှ ယှဉ်နိုင်လိမ့်မည် မဟုတ်ချေ။

သူပေးထားသည့် တန်ခိုးရှင်ဘုရင်အဆင့် ကြာပွတ်ပါ ရှိနေသည့် အတွက် ရှန်ချင်းလော့ကို ယှဉ်နိုင်သည့် တန်ခိုးရှင်တတိယအဆင့် ပညာရှင် အတော်လေး ရှားသွားပြီဟု ပြော၍ရသည်။

သို့သော်ငြား တကယ် ခေါင်းစားစရာ ပြဿနာသည်ကား မြင်သူတိုင်း အကြည့်မလွှဲနိုင်လောက်အောင် စွဲမက်ဖွယ် ကောင်းလွန်းလှသည့် သူမ၏ ရုပ်ရည်ရူပကာပင်။ သူမ၏ ရုပ်ရည်သည် အခြားသူများ သူမအား ပစ်မှတ်ထားရသည့် အကြောင်းအရင်း တစ်ခု ဖြစ်လာနိုင်ပေသည်။

သူ့ညို့ဓါတ်ကို ဘယ်ယောကျာ်းသားမှ မခုခံနိုင်ဘူး…

ခဏလောက် စဉ်းစားနေပြီးနောက် ဖြည်းဖြည်းချင်း ခေါင်းခါလျက် ထိုကိစ္စကို ခေါင်းထဲမှ ထုတ်ထားလိုက်သည်။

ချင်းလော့ သူ့နည်းသူ့ဟန်နဲ့ အဆင်ပြေလောက်ပါတယ် သူအနေဖြင့် ရှန်ချင်းလော့အား အချိန်တိုင်းလိုက်ပြီး စောင့်ရှောက်မပေးနိုင်ချေ။ ထို့အပြင် သူတို့ နှစ်ပေါင်းများစွာ ကြာအောင် ခွဲခွာခဲ့ရသော်လည်း သူမသည် သူမဘာသာ အဆင်ပြေပြေနှင့် ရှိနေဆဲ။ ထို့ကြောင့် နောင်အနာဂတ်တွင်လည်း သူမနည်း သူမဟန်ဖြင့် အဆင်ပြေလိမ့်မည်ဟု သူယုံကြည်နေမိ၏။

ထိုကိစ္စကို ခေါင်းထဲမှ ထုတ်ပြီးနောက် ကြုံရာလမ်းကြောင်း တစ်ခု ရွေးကာ စတင် ခရီးထွက်တော့သည်။

သွားသာသွားနေသော်ငြား ခပ်မြန်မြန်ကြီးတော့ မသွားရဲ။ သွေးအကျဉ်းထောင်၏ အန္တရာယ်များအကြောင်းကို ကြားသာ ကြားဖူးပြီး ကိုယ်တိုင် တစ်ခါမှ မကြုံဖူးသော်ငြား ဤနေရာသည် တန်ခိုးရှင်ဘုရင်အဆင့် ပညာရှင် မြောက်မြားစွာ၏ သင်္ချိုင်း ဖြစ်သည်မှာ ငြင်း၍မရသည့် အမှန်တရား ဖြစ်သည် မဟုတ်လော။

တန်ခိုးရှင်ဘုရင်အဆင့်အောက်၌ မည်သူ့ကိုမှ မကြောက်သော်ငြား တန်ခိုးရှင်ဘုရင်အဆင့် တစ်ဦး၏ နယ်ပယ်စွမ်းအားနှင့် ရင်ဆိုင်ရချိန် သတိထားရန်တော့ လိုပေသည်။ မဆင်မခြင် လှုပ်ရှား၍ သေရမည့် အဖြစ်မျိုးနှင့် သူမကြုံချင်ပေ။

လမ်းတစ်လျှောက်တွင် မည်သည့် အန္တရာယ်၊ အခက်အခဲနှင့်မှ မကြုံခဲ့ရသော်ငြား နယ်ပယ်ဝဲကတော့ နှစ်ခုနှင့်တော့ ကြုံတွေ့ခဲ့ရသည်။

ကံမကောင်းစွာဖြင့် ထိုဝဲကတော့နှစ်ခုသည် သိပ်ပြီး အားကောင်းခြင်း မရှိဘဲ ၎င်းတို့ထဲတွင် ကိန်းအောင်းနေသော နိယာမသဘောတရားတို့မှာ အတော်လေး ဝေဝေဝါးဝါး ဖြစ်နေခဲ့သည့်အတွက် ရန်ကိုင်သည် အချိန်အတော်လေးပေးပြီး ထိုအရာများကို လေ့လာကြည့်ခဲ့သည့်တိုင် အဖိုးတန်သည့် မည်သည့် အချက်အလက်ကိုမှ မရရှိနိုင်ခဲ့ချေ။ ထို့ကြောင့် နောက်ဆုံးတွင် လက်လျှော့ပြီးတော့သာ ထွက်လာခဲ့လိုက်၏။

သို့သော်လည်း နည်းနည်းလေးမှ သတိပေါ့လျော့မသွားရဲခဲ့။ နေရာတိုင်းတွင် သေခြင်းထောက်ချောက်များနှင့် ပြည့်နေမှန်း သူသိသည်။ ပထမဆုံး တွေ့ခဲ့သည့် နယ်ပယ်ဝဲကတော့ နှစ်ခုသည် အားနည်းပြီး သေးငယ်သည့်အတွက် သွေးအကျဉ်းထောင်ကို သွားလျှော့တွက်လျှင် အမှားအကြီးကြီး မှားသွားနိုင်ပေသည်။

လမ်းတစ်လျှောက်တွင် အသက်အရှိန်အဝါများစွာကို အာရုံခံမိပြီး သူနှင့် မီတာတစ်ထောင်အကွာမှ ဖြတ်သွားသော တန်ခိုးရှင် တတိယအဆင့် ပညာရှင်တစ်ဦးကိုပင် တွေ့လိုက်သေးသည်။

ကံကောင်းစွာဖြင့် သွေးအကျဉ်းထောင်သည် ဖွင့်ခါစသာ ရှိသေးသည့်အတွက် မည်သူမှ ပြဿနာ မရှာချင်ကြသေးပေ။ အကုန်လုံးသည် အခြားသူများနှင့် အတတ်နိုင်ဆုံး ပြဿနာ မဖြစ်မိအောင် ထိန်းထိန်းသိမ်းသိမ်း နေကြခြင်း အခွင့်အလမ်းများကိုသာ ရှာဖွေနေကြသည်။ ထို့ကြောင့် ထိုကျင့်ကြံသူသည် ရန်ကိုင်ကို သတိပြုမိသော်လည်း သူ့အား ဘာမှလာမလုပ်ခဲ့ဘဲ အခြားလမ်းကြောင်း တစ်ခုကို ရွေးပြီးတော့သာ ထွက်သွားလိုက်သည်။

တစ်ရက်ကြာပြီးနောက်တွင်၊ ရန်ကိုင်သည် တစ်ခုသော နေရာတွင် ရပ်လျက် သူ့ရှေ့ဘက် မီတာတစ်ထောင်အကွာရှိ‌ နေရာအား အလေးအနက် အမူအရာဖြင့် စိုက်ကြည့်နေခဲ့သည်။

သူကြည့်နေသည့် အရပ်တွင် သွေးချင်းနီနေသည့် အပြာရောင် ဝတ်ရုံနှင့် သက်လတ်ပိုင်းလူကြီးတစ်ဦး ရှိနေခဲ့သည်။ ထိုလူအိုကြီးသည် သူတော်စင်ချီကို အဆက်မပြတ် ထုတ်လွှတ်ရင်း သူ့ပတ်လည်ရှိ အကာအကွယ် မှော်ရတနာတစ်ခု ဖြစ်သော ရေအကာအရံကို အသက်သွင်းနေခဲ့သည်။

ထိုလူအိုကြီးသည် ရှီကို အဆက်မပြတ် ထုတ်လွှတ်ပြီး အမျိုးမျိုးသော နည်းစနစ်များကို ထုတ်သုံးနေသည့်တိုင် သူပိတ်မိနေသည့် နေရာမှ မည်သို့မှ မရုန်းထွက်နိုင်ခဲ့ချေ။ သူမည်မျှ ကြိုးစားနေစေကာမူ အချည်းနှီးသာ။ သာမန် ဟင်းလင်းပြင်ထက် ပို၍ သိပ်သည်းကျစ်လစ်ဟန်ရသော သူ့အနီးတစ်ဝိုက်ရှိ ဟင်းလင်းပြင်ကြောင့် သက်လတ်ပိုင်းလူကြီးမှာ ရှေ့လည်း မတိုးနိုင်၊ နောက်လည်း မဆုတ်နိုင် ဖြစ်နေခဲ့သည်။

သက်လတ်ပိုင်းလူကြီး၏ ပတ်လည်တွင်မူ အလင်းတန်းများ ရှိနေခဲ့ပြီး ထိုအလင်းတန်းများသည် ဓါးသွားများနှယ် သူ့အကာအကွယ် အရံအတားကို အဆက်မပြတ် ဖြတ်တောက်နေခဲ့၏။

ထိုလူသည် နယ်ပယ်ဝဲကတော့တစ်ခုထဲသို့ မတော်တဆ ပြေးဝင်သွားမိခဲ့ခြင်း ဖြစ်သည်။

ပိုဆိုးသည်ကား သူကြုံနေရသည့် တန်ခိုးရှင်တတိယအဆင့် ပညာရှင် တစ်ဦးကိုပင် အလွယ်တကူ ပိတ်လှောင်ထားနိုင်သည့် အလွန်အားကောင်းသော နယ်ပယ်ဝဲကတော့တစ်ခု ဖြစ်သည်။

သေခြင်းတရားသည် သူနှင့်နီးကပ်လာနေပြီမှန်း သိသော်ငြား သက်လတ်ပိုင်းလူကြီးသည် သူတော်စင်ချီကို လှည့်ပတ်၍ အပြင်းအထန် ကြိုးစားနေခဲ့သည်။

ရုတ်တရက် သူအား အနီးအနားတစ်နေရာမှ စောင့်ကြည့်နေသော ရန်ကိုင်ကို တွေ့သွားခဲ့သည်။ အသက်ကယ် ကောက်ရိုးမျှင် တစ်မျှင်ကို တွေ့လိုက်ရသည့်အလား လှမ်းအော်ဟစ် အကူအညီ တောင်းတော့လေသည် “ရောင်းရင်း၊ ကျေးဇူးပြုပြီး ငါ့ကို ကူညီပေးလို့ရမလား။ ငါနယ်ပယ်ဝဲကတော့မှာ ပိတ်မိနေလို့။ ကျေးဇူးပြုပြီး ငါ့ကို ကူညီပေးပါကွာ”

ရန်ကိုင် မျက်မှောင်ကြုတ်သွားခဲ့သည်။ ပြန်လည်း မပြောခဲ့ချေ။

သက်လတ်ပိုင်းလူကြီးကို မကြောက်သော်ငြား ထိုလူကို ပိတ်လှောင်ထားသည့် နယ်ပယ်ဝဲကတော့ကိုတော့ အနည်းငယ် လန့်မိသည်။ ကိုယ်နှင့် ဘာမှမပက်သက်သည့် သူစိမ်း တစ်ယောက်ကို ကိုယ့်အသက်ကို မစွန့်စားချင်ပေ။

ရန်ကိုင် ရပ်ကြည့်နေရသည်မှာလည်း ထိုနယ်ပယ်ဝဲကတော့၏ ဆန်းကြယ်မှုများကို နားလည်လိုသည့်အတွက် ဖြစ်သည်။

ရန်ကိုင် ပြန်မဖြေသည်ကို မြင်သော် သက်လတ်ပိုင်းလူကြီး ပို၍ စိုးရိမ်မိလာခဲ့သည်။ သို့သော်လည်း အကူအညီဆို၍ ရန်ကိုင်သာ ရှိသဖြင့် နောက်တစ်ကြိမ် ထပ်အကူအညီ တောင်းပြန်လေ၏ “ရောင်းရင်း၊ ဒီတစ်ယောက်က လှိုင်းနီကြယ်၊ ငှက်မွှေးပြာဂိုဏ်းရဲ့ ဂိုဏ်းချုပ် ရှုတင်းယန်ပါ။ ကျေးဇူးပြုပြီး ငါ့ကို ကူညီပေးပါကွာ။ ငါ့ကို ကယ်ပေးနိုင်ရင် ငါမင်းကို ကောင်းကောင်း ကျေးဇူးဆပ်မှာပါ။ ငါတို့ ငှက်မွှေးပြာဂိုဏ်းကလည်း မင်းအပေါ် တကယ် ကျေးဇူးတင်မှာပါ”

“လှိုင်းနီကြယ်” ရန်ကိုင် မျက်ခုံးပင့်လိုက်မိသည်။ ထိုနာမည်ကို သူကြားဖူးနေသလို ခံစားနေရသော်ငြား မည်သည့်နေရာတွင် ကြားဖူးခဲ့မှန်း မမှတ်မိခဲ့။ သို့သော် ခေါင်းခါ၍ “ရောင်းရင်း၊ ကျုပ်မကူညီပေးချင်တာ မဟုတ်ဘူး။ ဒီနယ်ပယ်ဝဲကတော့ရဲ့ စွမ်းအားက တော်တော်လေး ကြောက်ဖို့ကောင်းလွန်းလို့ကို အဆင်မပြေ ဖြစ်နေတာ”

ရှုတင်းယန် မျက်နှာပျက်သွားခဲ့သည်။ သူ့စိတ်ထဲ အတော်လေး စိတ်ဓါတ်ကျသွားခဲ့သော်ငြား ရန်ကိုင် အမှန်ကို ပြေ‌နေမှန်း သူသိည်။

“ခဏတောင့်ခံထား၊ ကျုပ်တစ်ချက် နည်းလမ်းရှာကြည့်မယ်” ရန်ကိုင်က ပြောလိုက်သည်။

ရန်ကိုင်သည် သဘောမနောကောင်းနေသည့် အတွက်ကြောင့် ကူညီပေးခြင်းမဟုတ်၊ ရှုတင်းယန် မည်သို့သော လူစားမှန်း သူမသိ။ သို့သော် ရှုတင်းယန်သည် လူကောင်းတစ်ယောက် ဖြစ်လျှင်ပင် သွေးအကျဉ်းထောင်ထဲသို့ ဝင်လာကတည်းက သူ့ကိုယ်သူ သေဖို့ရာ ပြင်ဆင်ထားသင့်ပေသည်။

ဤနေရာ၌ သူသေသွားခဲ့လျှင် မည်သူ့ကိုမှ အပြစ်တင်နေ၍ မရချေ။ ရန်ကိုင်ဘက်က ကူညီပေးရခြင်းမှာလည်း ဤနေရာသို့ သူလာခဲ့သည်မှာ နယ်ပယ်ဝဲကတော့ကို လေ့လာချင်သည့် အတွက်ကြောင့် ဖြစ်သည်။ အားကောင်းသည့် နယ်ပယ် ဝဲကတော့ တစ်ခု သူရှေ့ရောက်နေသည်ကို ရန်ကိုင် အနေဖြင့် မည်ကဲ့သို့ ဤအတိုင်း ထွက်သွားနိုင်မည်နည်း။

ရန်ကိုင် စကားကို ကြားသည့်အခါ ရှုတင်းယန် ပျော်သွားပြီး “ဒီရှု ကြိုပြီး ကျေးဇူးတင်ပါရစေ ရောင်းရင်း။ ရောင်းရင်းလည်း သတိထားဦးနော်။ ဒီဝဲကတော့က နယ်ပယ်တွေ အများကြီး ပေါင်းစပ်နေတာ။ အဲ့ဒါကြောင့်မို့လို့ ဖျက်စီးဖို့ ခက်တာ”

ရန်ကိုင် ခေါင်းညိတ်လိုက်ပြီး ရှေ့သို့ တစ်လှမ်းတိုးလိုက်၏။

ချက်ချင်းဆိုသလို ရန်ကိုင်မျက်နှာ ဖြူလျော်သွားခဲ့လေသည်။ ရှေ့သို့ တိုးလိုက်သည်နှင့် တစ်ပြိုင်နက် သူ့ပတ်ဝန်းကျင် လေဟာနယ် တစ်ခုလုံး အေးခဲသွားသလို ခံစားလိုက်ရသည်။ အလွန်အားကောင်းသည့် စွမ်းအားအမျိုးမျိုးသည် သူ့အပေါ် ဆင့်ကာဆင့်ကာ ထပ်လာသလို ခံစားလိုက်ရသည်။

သူတော်စင်ချီကို လှည့်ပတ်၍ ခုခံလိုက်သည့်တိုင် သူ့အင်္ကျီစများ စုတ်ပြဲကုန်ရသည်။ ဤမမြင်နိုင်သော ဝဲကတော့သည် အထဲသို့ ဝင်လာသည့် သက်ရှိမှန်သမျှကို သတ်ပစ်နိုင်သည့်ပုံပင်။

တုန့်ဆိုင်းမနေရဲတော့သည်နှင့် ရန်ကိုင်သည် ခရမ်းရောင်ဒိုင်းကို ချက်ချင်းထုတ်၍ သူ့ကိုယ်သူ ကာကွယ်လိုက်သည်။ ခရမ်းရောင်ဒိုင်းသည် အလင်းအကာအရံတစ်ခု အဖြစ်သို့ ပြောင်းလဲသွားပြီး ရန်ကိုင် တစ်ကိုယ်လုံးကို လွှမ်းခြုံသွားလေ၏။